ᤛᤠᤶᤕᤥᤌᤡᤶ ᤀᤡᤱ 34 - LIFOTNT

ᤔᤥᤛᤠᤴ ᤔᤠᤛᤡᤱ

¹ ᤂᤧᤴ ᤀᤣᤃᤠᤱ ᤔᤥᤛᤠᤴ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥᤗᤠᤶ ᤕᤖᤡᤜᤥ ᤋᤃᤠᤱ ᤗᤧᤵᤔᤠᤱᤒᤠ ᤏᤣᤒᤥ ᤁᤥ᤺ᤰᤔᤠᤀᤥᤒᤠ ᤐᤡᤛᤃᤠ᤺ᤸᤗᤧ ᤁᤢᤈᤱᤅᤥ ᤌᤥ᤺ᤰᤛᤡᤱ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤧᤖᤧᤰ ᤗᤠᤈᤣᤴ ᤀᤥ᤺ᤴᤎᤠᤰᤋᤢ—ᤃᤡᤗᤠᤍᤗᤠᤶ ᤍᤠᤏ ᤌᤠᤖᤡᤰ.

² ᤏᤵᤋᤠᤗᤡᤒᤠ ᤁᤧᤖᤧᤰ ᤋᤧᤴᤜᤠ᤹. ᤀᤣᤑᤪᤠᤀᤡᤔ ᤖ ᤔᤏᤛ᤻ᤛᤣᤒᤠ ᤌᤢᤶᤜᤠ᤹. ᤏᤠᤶᤎᤠ ᤗᤢᤶᤒᤠ ᤘᤖ᤺ᤱᤅᤥ ᤌᤠᤖᤡᤰᤐᤠ ᤕᤜᤢᤍᤠᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹.

³ ᤏᤣᤃᤣᤒ ᤔᤧᤵᤔᤏᤠᤒᤠ ᤕᤥᤜᤠᤱᤒᤠ ᤗᤠᤈᤣᤴ ᤏᤢ ᤂᤧᤒᤰᤛᤡᤱ ᤁᤧᤕᤢᤱᤒᤠ ᤕᤖᤡᤜᤥ ᤕᤧᤰᤕᤰᤁᤥᤒᤠ ᤏᤧᤏᤧᤒᤠᤍᤧᤴᤗᤠᤶ ᤛᤥᤀᤖ ᤌᤠᤖᤡᤰ॥

⁴ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤁᤴ ᤗᤠᤈᤣᤴ ᤀᤠᤱᤃᤠ᤹ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤀᤰᤂᤣᤗ᤹ᤖᤡᤰ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤕᤧ. ‘ᤀᤠᤱᤃᤠ᤹ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤁᤴ ᤐᤡᤖᤢᤱᤛᤡᤱ᤹॥’ ᤀᤠᤱᤃᤠ᤹ ᤁᤴ ᤗᤠᤈᤣᤴ ᤜᤠᤒᤠ ᤁᤧᤔᤡᤰᤁᤡᤸᤗᤧ ᤀᤥᤃᤧᤔᤧᤳᤋᤢᤖ ᤕᤠ᤺ᤴᤏᤧ. ᤁᤖ ᤂᤧᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤁᤧᤱᤄᤥᤏᤧᤴ॥”

⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤔᤥᤛᤠᤴ ᤔᤥᤀᤠᤒ ᤗᤠᤈᤣ᤹ᤀᤥ ᤔᤠᤛᤡᤱ॥

⁶ ᤔᤥᤀᤠᤒ ᤗᤠᤈᤣ᤹ᤀᤥᤒᤠ ᤒᤣᤌ-ᤐᤥᤖ ᤋᤃᤠᤱ ᤗᤧᤵᤔᤠᤱᤒᤠ ᤗᤳᤇᤠ ᤏᤧᤏᤧᤒᤠᤍᤧᤴᤏᤥ ᤂᤢᤏᤧ᤹ ᤔᤥᤛᤠᤴ ᤗᤢᤵᤋᤢ॥ ᤁᤖ ᤀᤠᤀᤡᤴ ᤌᤠᤖᤡᤰ ᤜᤠ᤺ᤳᤗᤧᤀᤠᤱ ᤂᤧᤸᤗᤧ ᤁᤢᤀᤡᤐᤢᤱᤅᤡᤴ ᤔᤧᤴᤏᤡᤀᤣ ᤘᤠ᤹॥

⁷ ᤔᤥᤛᤠᤴ ᤔᤠᤛᤡᤱᤅᤡᤸᤗᤧ ᤂᤢᤏᤧ᤹ ᤁᤡᤵ ᤌᤡᤰᤁᤠᤱ ᤏᤡᤒᤥᤱ ᤋᤱᤒᤣ ᤕᤥᤖᤧ॥ ᤜᤧᤰᤁᤣᤛᤠᤱ ᤂᤢᤏᤧ᤹ ᤁᤢᤔᤡᤰᤛᤠ ᤏᤢᤖᤧᤀᤠᤱ ᤘᤕᤧ. ᤐᤎᤢᤶ ᤌᤢᤶᤍᤧᤀᤠᤱ ᤘᤕᤧ॥

⁸ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤔᤥᤛᤠ᤺ᤸᤗᤧ ᤁᤢᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ ᤛᤢᤶᤒᤥᤱ ᤕᤧᤴ ᤌᤠᤖᤡᤰ ᤔᤧᤖᤡᤱ ᤔᤧᤎᤰᤋᤧ॥ ᤁᤓ᤻ᤔᤗ᤹ᤖᤡᤰ ᤔᤥᤛᤠ᤺ᤸᤗᤧ ᤁᤢᤗᤠᤃᤡ ᤏᤧᤋᤩᤢᤰᤔᤠ ᤏᤢ ᤔᤧᤖᤡᤱ ᤌᤰᤔᤠ ᤕᤧᤴᤏᤡᤴ ᤆᤢᤖᤧ॥

⁹ ᤀᤠᤸᤗ ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤀᤥ ᤏᤧᤛ᤻ᤛᤢᤀᤠᤱ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤛᤣ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤡᤖᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤄᤧᤵᤛᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ॥

¹⁰ ᤂᤧᤴ ᤕᤧᤶᤔᤠᤱ ᤁᤳᤌᤥ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤔᤥᤛᤠᤴ ᤜᤧᤰᤋᤱᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤘᤣ᤹ ᤜᤠ᤺ᤳᤋᤠᤱ ᤔᤧᤸᤗ᤺ᤴᤏᤣ ᤘᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤏᤠᤍᤢᤶᤍᤢᤶᤒᤠ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥

¹¹ ᤔᤡᤛᤪ ᤗᤠᤈᤣ᤹ᤀᤥ ᤑᤠᤖᤥᤴ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤕᤢᤰᤛᤠᤒᤠᤜᤠ᤹ᤀᤥ ᤁᤧᤖᤧᤰ ᤁᤢᤗᤠᤈᤣ᤹ᤀᤥ ᤏᤧᤜᤡᤖᤧ ᤔᤧᤴᤎᤠᤵᤔᤏᤠᤒᤠ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤧ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤂᤢᤏᤧ᤹ᤀᤣ ᤐᤠᤱᤄᤢᤀᤠᤱ ᤘᤕᤧ॥

¹² ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤔᤥ ᤔᤥᤛᤠ᤺ᤸᤗᤧ ᤆᤥᤃᤢᤒᤠ ᤁᤡᤵᤔᤠᤃᤧᤄᤢᤒᤠ ᤕᤠ᤺ᤶᤒᤰᤜᤠ᤹ ᤀᤡᤃᤪ ᤂᤧᤸᤗᤧ ᤆᤥᤃᤢᤒᤠ ᤔᤢᤰᤛᤠᤶᤒᤠ ᤁᤢᤔᤢᤰᤁᤡᤴ ᤘᤣ᤹ ᤀᤠᤳᤋᤡᤸᤗᤧᤀᤠᤱ ᤀᤠᤵᤑᤠᤸᤗᤧᤀᤠᤱ ᤀᤥᤛᤣ᤺ᤴᤎᤠᤱ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥