ᤛᤠᤶᤕᤥᤌᤡᤶ ᤀᤡᤱ 33 - LIFOTNTᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ ᤔᤥᤛᤠ᤺ᤸᤗᤧ ᤔᤢ᤹ᤀᤡᤛᤠᤶ ᤐᤡᤖᤢᤛᤡ 1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤔᤥᤛᤠ᤺ᤸᤗᤧ ᤂᤢᤏᤧ᤹ ᤁᤢᤔᤠᤛᤡᤱᤔᤠᤏᤢ᤺ᤸᤗᤧ ᤋᤃᤡ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤔᤡᤴ ᤜᤠᤒᤠ ᤁᤴᤗᤥ— 2 ᤂᤢᤏᤧ᤹ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤴ ᤛᤡᤏᤤ ᤁᤥ᤺ᤰᤔᤠᤗᤠᤶ ᤕᤧᤖᤥ. ᤜᤧᤰᤁᤩᤠᤱ ᤛᤣᤀᤡᤖ ᤌᤧᤃᤢᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤏᤠᤶ ᤁᤢᤀᤡᤛᤡᤰ ᤁᤧᤖᤧ ᤌᤠᤅᤧᤖᤥ॥ ᤂᤢᤏᤧ᤹ ᤐᤠᤖᤠᤏ ᤁᤥ᤺ᤰᤔᤠ ᤑᤠᤱᤈᤱᤗᤠᤶ ᤀᤥ᤺ᤳᤋᤧᤖᤥ ᤌᤡᤒᤥᤱ ᤜᤧᤴᤇᤡᤱ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤗᤠᤱᤃᤧᤳ ᤐᤡᤛᤠᤱᤗᤠᤶ. ᤁᤢᤃᤥ᤺ᤰᤔᤠᤀᤥᤒᤠ ᤕᤠᤰᤁᤣ᤺ᤰᤁᤣ᤺ᤰᤐᤠ ᤋᤧᤴᤜᤠ᤹ᤗᤠᤶ ᤂᤢᤏᤧ᤹ ᤌᤠᤅᤧᤖᤥ॥ 3 ᤛᤧᤰᤂᤠᤛᤠᤱ ᤂᤢᤏᤧ᤹ᤃ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ. ᤛᤣᤛᤣ ᤔᤏᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤁᤢᤜᤢᤰᤁᤥ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤄᤠᤜᤢᤴᤜᤠ᤹ ᤔᤧᤄᤧᤵᤛᤢᤖᤥ॥ 4 ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤁᤢᤳᤆᤡᤀᤥᤒᤠ ᤕᤠᤱᤛᤠᤁᤢᤴᤎᤣ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤜᤠ᤹ ᤔᤥᤛᤠ᤺ᤸᤗᤧ ᤀᤠᤏᤡ᤹ ᤀᤠᤒᤡᤖᤧᤖᤥ॥ 5 ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹. ᤀᤡᤛᤪᤠᤀᤡᤗᤒᤠ ᤌᤠ᤺ᤰᤜᤠ᤹ᤀᤠᤱ ᤛᤥᤛᤥᤖᤡᤰ ᤔᤧᤈᤢᤵᤛᤧᤸᤗᤧ ᤂᤢᤏᤧ᤹ ᤕᤛᤢᤖᤢᤏᤀᤥ ᤜᤠᤱ ᤐᤥ᤺ᤰᤂᤧᤖᤥ॥” 6 “ᤔᤥᤛᤠ᤺ᤸᤗᤧ ᤖᤢᤒᤣᤏ ᤌᤠ᤺ᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤖᤥ— “ᤖᤢᤒᤣᤏ ᤌᤠ᤺ᤰᤜᤠ᤹ ᤔᤧᤜᤡᤱᤅᤠᤱ ᤔᤧᤘᤠ᤹ᤖᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤴᤇᤡᤏᤧᤴᤗᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤜᤠ᤹ ᤛᤢ᤺ᤸᤗᤡᤰ ᤔᤧᤶᤒᤥᤱᤏᤧᤴᤗᤖᤥ᥄” 7 ᤕᤜᤢᤍᤠᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ— “ᤕᤜᤘᤣ ᤍᤠᤱᤒᤠᤀᤣ. ᤕᤜᤢᤍᤠ᤺ᤸᤗᤧ ᤁᤢᤀᤡᤰᤗᤠᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤁᤢᤔᤏᤠᤜᤠ᤹ᤀᤥ ᤋᤠᤖᤧ᤹ᤀᤥ॥ ᤀᤠᤵᤑᤣᤰ ᤁᤢᤜᤢᤰᤁᤡᤸᤗᤧ ᤂᤢᤏᤧ᤹ ᤋᤠᤱᤛᤧ᤺ᤵᤛᤡᤱᤗᤥ॥ ᤂᤢᤏᤧ᤹ ᤁᤧᤀᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤧᤏᤧ᤹ ᤂᤢᤏᤧ᤹ ᤁᤢᤓᤠ᤹ᤒᤠᤱ ᤐᤥ᤺ᤰᤂᤧ᤹ᤀᤥ॥” 8 ᤗᤧᤒᤡᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤧᤏᤧ᤹ ᤁᤧᤍᤢᤶᤔᤡᤶᤔᤧᤴ ᤏᤢ ᤂᤧᤏᤧ᤹ ᤁᤧᤀᤢᤖᤡᤶᤔᤧᤴ ᤂᤧᤏᤧ᤹ ᤁᤧᤛᤡᤖᤠ᤹ ᤁᤧᤎᤠᤱᤒᤠ ᤛᤧᤘᤠᤖᤥᤒᤧᤴᤏᤢ ᤘᤠ᤹ᤖᤥ. ᤂᤧᤏᤧ᤹ ᤔᤛ᤻ᤛᤠᤀᤥ ᤂᤧᤸᤗᤧ ᤁᤢᤏᤡᤱᤘᤠ᤹ ᤁᤧᤛ᤻ᤛᤠ᤹ᤖᤢᤖᤥ. ᤔᤣᤖᤡᤒᤠᤒᤠ ᤆᤫᤠ᤺ᤳᤋᤥ ᤂᤧᤏᤧ᤹ ᤂᤧᤴᤏᤢ ᤂᤧᤔᤠ᤹ ᤁᤧᤈᤥᤃᤧᤖᤥ॥ 9 ᤂᤧᤸᤗᤧ ᤐᤠᤏᤢᤍᤡᤱ ᤁᤢᤶᤒᤠ ᤔᤠᤏᤢᤍᤡᤱ ᤁᤢᤶᤔᤠᤏᤢ᤺ᤸᤗᤧ ᤕᤖᤡᤰ. ᤂᤢᤏᤧ᤹ ᤁᤢᤶᤓᤢ᤹ ᤏᤢ ᤁᤢᤴᤛᤠ᤹ᤜᤠ᤹ᤏᤢ᤺ᤸᤗᤧ ᤕᤖᤡᤰ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤁᤢᤀᤣᤜᤠ᤹ᤏᤢ᤺ᤸᤗᤧ ᤕᤖᤡᤰ ᤀᤠᤍᤠᤱᤒᤠ ᤔᤠᤱᤛᤧᤘᤠ ᤁᤧᤔᤧᤳᤋᤧᤖᤥ॥ ᤂᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢ ᤏᤠ᤺ᤳᤋᤢᤖᤥ. ᤂᤧᤒᤩᤠᤱ ᤀᤠᤍᤠᤱᤒᤠᤖᤧ ᤁᤧᤔᤠᤱᤜᤢᤵᤐᤥ ᤏᤛᤠ᤺ᤴᤛᤠᤒᤠ ᤐᤥ᤺ᤰᤂᤧᤖᤥ॥ 10 ᤂᤧᤸᤗᤧ ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤕᤠᤁᤢᤒᤧᤴ ᤜᤢ᤹ᤖᤢᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤂᤧᤏᤧ᤹ ᤁᤧᤛᤠᤶᤕᤥ ᤌᤡᤶᤜᤠ᤹ ᤜᤢ᤹ᤖᤢᤖᤥ॥ ᤂᤧᤸᤗᤧ ᤂᤧᤏᤧ᤹ ᤁᤧᤍᤃᤡ ᤛᤢᤰᤐᤠ ᤜᤠ᤺ᤴᤍᤢᤖᤥ ᤂᤧᤒᤩᤠᤱ ᤁᤧᤖᤧᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤂᤧᤏᤧ᤹ᤀᤥ ᤗᤧᤳᤋᤡ ᤔᤧᤍᤥᤴᤍᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤥ᤺ᤴᤍᤢᤖᤥ॥ 11 ᤕᤜᤘᤣ ᤍᤠᤱᤒᤠᤀᤣ. ᤂᤧᤸᤗᤧ ᤁᤧᤖᤧᤰ ᤁᤢᤛᤢᤶᤒᤥᤎᤠᤀᤥ. ᤀᤠᤍᤠᤱᤒᤠᤖᤧ ᤂᤧᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤧ᤹ᤀᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤋᤠ᤺ᤰᤋᤧ᤹ᤀᤥ॥ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥᤰᤐᤠᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤋᤰᤁᤪᤢᤶᤒᤧᤴ ᤜᤡᤵᤋᤧ ᤐᤡᤛᤧ᤹ᤀᤥ. ᤕᤠᤶᤔᤥ ᤐᤥ᤺ᤰᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤂᤧᤸᤗᤧ ᤁᤢᤏᤡᤱᤔᤡᤜᤠ᤹ ᤌᤃᤧᤛᤧ᤹ᤀᤥ॥” 12 ᤒᤣᤏᤩᤠᤔᤡᤏᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ— “ᤕᤜᤘᤣ ᤍᤠᤱᤒᤧᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤧᤴ ᤂᤢᤏᤧ᤹ᤀᤥ ᤋᤠᤵᤌᤣᤰ ᤕᤠᤶᤎᤣᤰ ᤘᤠ᤹ᤖᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤴ ᤏᤠᤶᤎᤠᤎᤠ ᤌᤣ᤺ᤰᤋᤢ ᤁᤳᤋᤢᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤒᤧᤴ ᤂᤢᤏᤧ᤹ ᤁᤢᤓᤰᤋᤠᤱᤜᤠ᤹ᤖᤧ ᤁᤢᤗᤢᤶᤔᤥ ᤏᤠ᤺ᤶᤛᤡᤱᤗᤥ॥” 13 ᤕᤥᤛᤣᤑᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤌᤠ᤺ᤱ ᤋᤠᤱᤛᤠᤱᤒᤥᤗᤠᤶ ᤁᤧᤎᤠᤒᤠ ᤀᤡᤔᤧᤸᤗᤢᤱᤒᤠ ᤛᤣ᤺ᤰᤘᤠ᤺ᤸᤗᤧ ᤜᤧᤰᤁᤩᤠᤱ ᤔᤢ ᤐᤠᤰᤗᤢᤶ ᤁᤧᤗ᤹ᤒᤠ ᤆᤫᤠ᤺ᤳᤋᤡᤸᤗᤧ ᤘᤠᤖᤰᤂᤢᤀᤠᤱ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤁᤢᤗᤠᤈᤣᤴ ᤔᤢ᤹ᤀᤡᤛᤠᤶ ᤐᤡᤖᤢᤖᤥ— 14 ᤏᤠᤶᤔᤡᤸᤗᤧ ᤁᤢᤈᤠ᤹ ᤌᤥ᤺ᤰᤗ ᤕᤠ᤺ᤴᤍᤢᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤐᤠ᤺ᤴ. ᤜᤧᤰᤁᤩᤠᤱ ᤗᤠᤒᤧᤸᤗᤧ ᤐᤡᤔᤠ ᤛᤢᤰᤋᤢᤒᤠ ᤁᤠᤰᤏᤢ᤺ᤸᤗᤧ ᤏᤢᤒᤠ ᤐᤠ᤺ᤴ. 15 ᤀᤢᤏᤠᤜᤢᤖᤡᤒᤠ ᤁᤥ᤺ᤰᤔᤠᤜᤠ᤹ᤀᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤁᤢᤈᤠᤜᤠ᤹. ᤂᤶᤓᤩᤠᤱ ᤏᤢᤵᤔᤧᤴᤍᤡᤱᤒᤠ ᤌᤧᤃᤢᤜᤠ᤹ᤀᤥᤒᤠ ᤘᤧᤳᤋᤧᤛᤖᤧ ᤛᤡᤱᤛᤣ᤹ᤜᤠ᤹. 16 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤂᤧᤸᤗᤧ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤜᤠᤱᤛᤧᤶᤜᤠ᤹. ᤔᤡᤃᤧᤍᤡᤰᤐᤠᤖ ᤁᤧᤕᤢᤱᤒᤠ ᤑᤠᤳᤋᤠᤵᤐᤥ ᤁᤧᤕᤢᤱᤒᤠᤸᤗᤧ ᤁᤢᤗᤢᤱᤃᤢᤶᤔᤡᤴ— ᤁᤴᤜᤠ᤹ ᤁᤧᤖᤧᤰ ᤕᤥᤛᤣᤑᤖᤧ ᤁᤢᤎᤧᤃᤣᤰ ᤛᤶᤎᤠᤱ ᤘᤠ᤹ᤖᤖᤥ. ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤀᤥᤒᤠ ᤋᤢᤶᤔᤩᤠᤱᤜᤠᤱᤅᤡᤸᤗᤧ ᤁᤢᤔᤡᤰᤂᤢᤱᤒᤠ ᤛᤶᤎᤠᤱ ᤐᤳᤗᤖᤥ॥ 17 ᤜᤠᤱᤘᤠ ᤔᤠᤱᤘᤠᤀᤥ ᤂᤧᤴ ᤋᤃᤡ ᤁᤧᤎᤠᤵᤐᤠ ᤐᤡᤳᤛᤠᤳ ᤜᤧᤰᤁᤣ ᤗ᤹ᤖᤥ. ᤂᤧᤸᤗᤧ ᤁᤢᤍᤠᤱᤅᤡᤴ ᤋᤠᤶᤓᤢᤱ ᤛᤠ᤺ᤱᤘᤧᤳᤋᤡᤸᤗᤧ ᤁᤢᤍᤠᤱᤗᤥ॥ ᤁᤴ ᤁᤢᤍᤠᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤏᤠᤛᤔᤠ ᤁᤢᤕᤠᤀᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤠᤱ ᤌᤥ᤺ᤰᤂᤢᤛᤡᤖᤥ॥ ᤀᤡᤑᤪᤠᤀᤡᤔᤒᤠᤜᤠ᤹ ᤁᤶᤓᤗ᤹ᤖᤡᤰᤁᤣ ᤌᤡᤒᤥᤱ ᤜᤧᤴᤇᤡᤱ ᤜᤧᤴᤇᤡᤱ ᤔᤧᤒᤥᤱᤗᤥ. ᤔᤏᤛ᤻ᤛᤣᤒᤠᤜᤠ᤹ ᤀᤰᤂᤣᤗ᤹ᤖᤡᤰᤁᤣ ᤜᤧᤴᤇᤡᤱ ᤔᤧᤒᤥᤱᤗᤥ॥” 18 ᤈᤒᤗᤢᤏ ᤏᤢ ᤀᤡᤛ᤻ᤛᤠᤁᤠᤖᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤈᤒᤗᤢᤏᤣ. ᤂᤧᤏᤧ᤹ ᤗᤠ᤺ᤰᤁᤠᤳ ᤏᤠᤏᤠ ᤁᤳᤏᤠ ᤁᤧᤒᤣ᤺ᤰᤁᤡᤸᤗᤧ. ᤜᤧᤰᤁᤩᤠᤱ ᤀᤡᤛ᤻ᤛᤠᤂᤠᤖᤣ. ᤂᤡᤏᤡ᤹ ᤛᤠ᤺ᤱᤃᤠᤜᤡᤶᤔᤥ. ᤂᤡᤏᤡ᤹ ᤏᤡᤱᤘᤠ᤹ ᤕᤧᤕᤧ ᤗ᤹ᤖᤧᤶᤔᤧ᤹ᤀᤥ॥ 19 ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤁᤥ᤺ᤰᤔᤠᤀᤥ ᤔᤧᤀᤢ᤺ᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤵᤔᤥ ᤛᤠᤶᤕᤥᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖᤥ॥ ᤂᤧᤱᤜᤠ᤹ᤖᤧ ᤘᤖ᤺ᤱᤅᤥᤒᤠ ᤘᤧᤳᤋᤧᤛᤖᤧ ᤕᤠᤱᤛᤠᤁᤢᤴᤎᤣ ᤏᤢ ᤕᤧ᤺ᤱᤄᤠᤀᤥ ᤁᤧᤕᤠᤰᤐᤠ ᤕᤠᤱᤓᤢ᤺ᤴ ᤔᤧᤕᤠᤱᤄᤢᤖᤥ॥” 20 ᤃᤠᤍᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤃᤠᤍᤖᤧ ᤁᤢᤗᤠᤈᤣ᤹ ᤁᤧᤓᤥᤒᤧᤴ ᤔᤢ᤹ᤀᤡᤛᤠᤒᤠᤖᤥ. ᤌᤧᤃᤣᤰᤐᤠ ᤏᤢ ᤜᤢᤰᤜᤠ᤹ ᤁᤧᤛᤠ᤺ᤱᤒᤠᤖ ᤁᤧᤕᤢᤱᤒᤠ ᤂᤡᤖᤡᤱᤒᤠᤴ ᤜᤧᤰᤁᤣ ᤃᤠᤍᤧᤴ ᤂᤧᤵᤔᤥ ᤕᤢᤱᤗᤥ॥ 21 “ᤂᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤗᤠᤈᤣᤴ ᤛᤣᤃᤢᤖᤥ. ᤗᤠᤶᤗᤥᤒᤠᤸᤗᤧ ᤁᤢᤗᤰᤁᤡᤴ ᤂᤢᤏᤧ᤹ ᤁᤢᤗᤠᤃᤡ ᤔᤧᤛᤧᤴᤍᤢᤀᤠᤱ ᤏᤧᤛ᤻ᤛᤧᤖᤥ॥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤸᤗᤧ. ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥ ᤏᤡᤱᤘᤠ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤂᤢᤏᤧ᤹ ᤁᤢᤄᤠᤛᤧᤴᤜᤠ᤹ ᤂᤧᤸᤗᤧ ᤁᤧᤳᤋᤢᤖᤥ॥” 22 ᤍᤠᤏᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ— “ᤍᤠᤏᤧᤱᤃ ᤌᤧᤖᤡᤱᤒᤧᤸᤗᤧ ᤁᤢᤛ᤻ᤛᤠᤖᤥ. ᤂᤧᤴ ᤒᤠᤛᤠᤏᤗᤠᤶ ᤐᤡᤴᤗ ᤕᤢᤖᤥ॥” 23 ᤏᤵᤋᤠᤗᤡᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤏᤵᤋᤠᤗᤡ᤺ᤸᤗᤧ ᤕᤖᤡᤰ ᤔᤢ᤹ᤀᤡᤛᤠᤶ ᤂᤥᤛᤢᤖᤥ. ᤂᤧᤸᤗᤧ ᤘᤖᤰᤁᤡᤸᤗᤧ ᤕᤥᤜᤠᤱ ᤏᤠᤶᤎᤠ ᤗᤧᤵᤔᤠᤱ ᤕᤢᤰ ᤆᤥᤃᤢᤖᤥ॥” 24 ᤀᤠᤛᤣᤖᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤧᤶᤒᤡᤳᤇᤠ ᤛᤠᤜᤠ᤹ᤀᤥ ᤀᤠᤛᤣᤖᤧᤴ ᤁᤧᤖᤧᤰᤏᤢ᤺ᤸᤗᤧ ᤕᤖᤡᤰ ᤔᤢ᤹ᤀᤡᤛᤠᤶ ᤁᤧᤄᤥᤒᤠ ᤐᤥᤱᤗᤖᤥ॥ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤖᤧ ᤂᤧᤴ ᤛᤠ᤹ᤖᤡᤰ ᤂᤢᤴᤇᤡ᤹ ᤛᤡᤖᤠ᤹ᤃᤧᤎᤠᤱᤒᤠ ᤐᤥᤱᤗᤖᤥ. ᤜᤧᤰᤁᤩᤠᤱ ᤁᤢᤗᤠᤈᤣ᤹ᤒᤠ ᤆᤤᤋᤢᤏ ᤛᤡᤱᤒᤢᤱᤜᤠ᤹ ᤕᤖᤡᤰ ᤁᤢᤈᤠ᤹ ᤌᤥ᤺ᤰᤗᤖᤥ॥ 25 ᤁᤧᤗᤠᤶᤎᤣ᤺ᤳᤋᤡᤸᤗᤧ ᤁᤢᤀᤧᤵᤔᤠᤜᤠ᤹ ᤑᤧᤴᤈᤣ᤹ ᤏᤢ ᤁᤠᤛᤠ᤺ᤸᤗᤧᤴ ᤐᤥᤱᤗᤖᤥ. ᤂᤧᤏᤧ᤹ ᤁᤧᤕᤧᤴᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰᤐᤠ ᤐᤥᤱᤗᤖᤥ॥” 26 “ᤕᤛᤢᤖᤢᤏᤖᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤜᤧᤰᤋᤱᤒᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ. ᤂᤡᤏᤡ᤹ ᤑᤠ᤹ᤔᤠᤖᤧ ᤗᤠᤃᤡ ᤂᤢᤏᤧ᤹ ᤋᤠᤱᤛᤠᤱᤒᤥ ᤌᤠ᤺ᤱ ᤁᤢᤜᤠᤱᤘᤠ ᤁᤢᤔᤠᤱᤘᤠᤀᤥ ᤂᤢᤏᤧ᤹ ᤂᤠ᤹ᤔᤡ᤺ᤳᤋᤧᤴ ᤕᤢᤰᤋᤢᤖᤥ॥ 27 ᤏᤢᤵᤔᤧᤴᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤀᤡ᤺ᤶᤛᤡᤱᤔᤠᤍᤧᤴᤗᤥ. ᤂᤧᤒᤩᤠᤱ ᤁᤢᤛᤡᤃᤠᤱᤃ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤁᤧᤎᤢᤶᤒᤠ ᤔᤢᤰᤛᤠᤶᤒᤠ ᤁᤢᤜᤢᤰᤜᤠ᤹ ᤘᤠ᤹ᤖᤥ॥ ‘ᤂᤧᤱᤜᤠ᤹ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤔᤧᤰᤂᤧᤶᤛᤡᤶᤔᤧ᤹ᤀᤥ’ ᤗ᤹ᤖᤡᤰ ᤂᤡᤏᤡ᤹ ᤏᤡᤱᤔᤡᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤢᤛᤡᤖᤥ॥ 28 ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤧᤴ ᤀᤣ᤺ᤰ ᤁᤶᤒᤪᤠᤱᤅᤥ ᤏᤧᤖᤥ ᤁᤢᤈᤠ ᤏᤢ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤁᤧᤘᤠ᤹ᤒᤠ ᤗᤠᤈᤣ᤹ᤀᤥ. ᤕᤠᤁᤢᤒᤖᤧ ᤁᤢᤈᤫᤠ᤺ᤳ ᤐᤢᤴᤍᤠᤰᤘᤠᤴ ᤁᤶᤒᤪᤠᤱᤅᤥ ᤏᤧᤖᤥ ᤂᤧᤵᤔᤥ ᤋᤠᤱᤛᤠᤱᤒᤧᤸᤗᤧ ᤛᤣ᤺ᤰᤘᤠ ᤌᤠᤛᤢᤖᤥ॥ 29 ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤔᤢ᤹ᤀᤡᤛᤠᤒᤠᤏᤧᤖᤥ᥄ ᤕᤜᤘᤣ ᤍᤠᤱᤒᤠᤗᤠᤶ ᤛᤧᤴᤗᤵ ᤁᤧᤄᤥᤒᤠ ᤛᤢᤘᤠᤱ. ᤂᤧᤏᤧ᤹ ᤜᤧᤰᤋᤱᤒᤠ ᤜᤠᤳ ᤘᤠ᤹ᤀᤠᤱᤒᤣ᥅ ᤂᤢᤏᤧ᤹ᤃ ᤂᤧᤏᤧ᤹ ᤁᤧᤄᤥ ᤏᤢ ᤁᤧᤓᤠ᤹ᤒᤠᤱᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤠᤱᤘᤠ ᤁᤧᤔᤠᤱᤘᤠ ᤋᤠᤓᤣᤖᤥ॥ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤁᤧᤍᤃᤡ ᤔᤧᤏ᤺ᤶᤛᤡᤱᤅᤠᤱ ᤔᤧᤍᤠᤖᤥ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤴᤈᤶᤒᤠᤍᤧᤴᤜᤠ᤹ ᤁᤧᤗᤠ᤺ᤰᤋᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.