ᤛᤠᤶᤕᤥᤌᤡᤶ ᤀᤡᤱ 32 - LIFOTNT1 ᤋᤠᤱᤛᤠᤱᤒᤣ. ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤠᤖᤥ᥄ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤣ. ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤂᤧᤵᤛᤧ᤹ᤀᤥ॥ 2 ᤀᤠᤱᤃᤠ᤹ ᤀᤠᤏᤡᤛᤠᤶᤔᤡᤴ ᤘᤜᤡᤳ ᤜᤧᤰᤁᤣ ᤌᤠᤖᤖᤥ. ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤜᤠ᤹ ᤜᤡ᤺ᤰᤘᤠ ᤁᤢᤀᤡᤛᤡᤰ ᤆᤢᤰᤗᤖᤥ. ᤁᤢᤏ᤺ᤰ ᤕᤠᤴ ᤛᤶᤎᤠᤱ ᤘᤠᤃᤣ᤺ᤰ ᤜᤧᤰᤁᤣ ᤌᤠᤖᤖᤥ. ᤛᤡᤱᤗᤡᤱ ᤛᤶᤎᤠᤱ ᤋᤧᤳᤋᤧᤳ ᤁᤧᤗ᤹ᤒᤠ ᤆᤫᤠ᤺ᤳ ᤜᤧᤰᤁᤣ ᤗ᤹ᤖᤖᤥ॥ 3 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤀᤢᤘᤠ ᤆᤥᤃᤢᤱᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤆᤥᤰᤗᤥ᥄ 4 ᤂᤢᤏᤧ᤹ᤃ ᤀᤡ᤺ᤶᤛᤡᤱᤔᤠᤍᤧᤴ ᤕᤠᤰᤐᤣ᤹ᤖᤥ. ᤂᤢᤏᤧ᤹ ᤁᤢᤕᤠ᤺ᤶᤒᤰᤜᤠ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤶᤜᤠ᤹ ᤁᤢᤍᤥ᤺ᤵᤔᤠ ᤆᤥᤰᤗᤥ॥ ᤂᤢᤏᤧ᤹ᤃ ᤐᤠᤴ ᤔᤧᤶᤓᤣ᤺ᤶᤔᤏᤠᤒᤠ ᤏᤛᤠ᤺ᤴᤛᤠᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤗᤥ᤺ᤶᤒᤠ ᤏᤢ ᤛᤧᤰᤂᤠᤒᤠ ᤆᤥᤰᤗᤥ॥ 5 ᤂᤧᤱᤜᤠ᤹ᤖᤧ ᤂᤢᤏᤧ᤹ᤏᤢ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤖᤥ. ᤁᤱᤃ ᤛᤡᤖᤡᤱᤔᤔᤠ ᤐᤠ᤺ᤴᤗᤥ ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤂᤢᤏᤧ᤹ ᤁᤢᤔᤏᤠᤛᤡ ᤔᤣ᤺ᤴᤇᤡᤖᤥ. ᤂᤧᤱᤜᤠ᤹ᤃ ᤀᤡᤱᤗᤧᤰ ᤁᤧᤈᤥ᤺ᤰᤐᤠ ᤏᤢ ᤁᤢᤍᤥ᤺ᤵᤔᤠ ᤗᤠᤶ ᤔᤧᤴᤏᤠ᤺ᤵᤔᤏᤠᤒᤠ ᤌᤠ᤺ᤰᤛᤡᤖᤥ॥ 6 ᤌᤣ ᤀᤰᤂᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ ᤁᤧᤈᤧᤰᤂᤢᤶᤒᤡ᥅ ᤀᤍᤱ ᤏᤢ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤜᤥᤵᤐᤠ ᤔᤏᤠᤛᤣ. ᤂᤡᤏᤡ᤹ ᤆᤀᤡ᤺ᤳ ᤁᤧᤏᤧᤒᤠ ᤏᤢ ᤁᤧᤈᤥ᤺ᤰᤐᤠ ᤂᤢᤏᤧ᤹ᤀᤣ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ. ᤂᤡᤏᤡ᤹ ᤗᤳᤇᤠ ᤛᤢᤘᤠᤱ ᤁᤧᤈᤥ᤺ᤰᤐᤠ ᤂᤢᤏᤧ᤹ᤀᤣ ᤔᤣ᤺ᤴᤏᤠᤱᤒᤡ᥅ 7 ᤀᤢᤴᤇᤥᤴ ᤀᤢᤴᤇᤥ᤺ᤴᤒᤠ ᤕᤧᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤀᤢᤏᤠᤜᤢᤖᤡ ᤋᤃᤡᤒᤠ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤂᤡᤏᤡ᤹ ᤏᤡᤱᤘᤠ᤹ᤛᤢᤶ ᤗ᤹ᤖᤧᤶᤔᤧ᤹ᤀᤥ॥ ᤂᤡᤏᤡ᤹ ᤐᤠᤜᤠ᤹ ᤛᤣ᤺ᤴᤍᤥᤛᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤧᤶᤔᤧᤳᤋᤡᤖᤥ. ᤂᤡᤏᤡ᤹ ᤁᤠᤵᤐᤥ ᤋᤢᤶᤛᤠᤜᤠ᤹ ᤛᤧ᤺ᤴᤗᤠᤵᤋᤠᤶᤛᤡᤶᤔᤧ᤹ᤀᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤈᤧᤰᤋᤡᤖᤥ॥ 8 ᤀᤠᤸᤗ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤗᤠᤈᤣ᤹ᤛᤡᤱᤒᤢᤱ ᤐᤡᤖᤢᤛᤡᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤧᤴᤍᤢᤛᤡᤖᤥ. ᤂᤧᤒᤩᤠᤱ ᤀᤡᤛᤪᤠᤀᤡᤗᤡ ᤔᤢ᤹ᤀᤡᤍᤠᤱᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤁᤢᤀᤡᤛᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤴᤍᤥᤜᤠ᤹ ᤏᤧᤛ᤻ᤛᤢ ᤐᤡᤖᤢᤛᤡᤖᤥ॥ 9 ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤛᤡᤖᤥ. ᤕᤠᤁᤢᤒᤧᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤕᤠᤱᤛᤠ ᤁᤢᤴᤎᤣᤖᤥ॥ 10 ᤔᤢᤖᤧᤰ ᤂᤠᤖᤧᤰᤐᤠ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ. ᤛᤢᤖᤡᤳ ᤁᤣᤈᤱ ᤁᤧᤜᤢ᤺ᤰᤐᤠ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤡᤰᤗᤠ᤺ᤸᤗᤧ ᤗᤥ᤺ᤰᤂᤢᤒᤠᤍᤧᤴᤏᤥ ᤂᤢᤏᤧ᤹ ᤂᤧᤱᤜᤠ᤹ ᤂᤥᤛᤢᤛᤡᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖᤥ. ᤂᤢᤏᤧ᤹ ᤂᤧᤱᤜᤠ᤹ ᤁᤢᤔᤡᤰᤜᤠᤱᤔᤠ ᤜᤧᤰᤁᤣ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ॥ 11 ᤁᤢᤜᤠᤵᤐᤡᤴ ᤁᤧᤔᤢᤶᤒᤠᤀᤠᤱ ᤁᤢᤛ᤻ᤛᤠᤜᤠ᤹ ᤛᤶᤎᤠᤱ ᤛᤢᤖᤡᤳ ᤁᤣᤈᤱᤅᤥ ᤁᤧᤒᤧᤒᤠᤀᤠᤱ ᤁᤧᤘᤠ᤹ᤒᤠ. ᤁᤢᤗᤠᤵᤐᤡᤴ ᤜᤵᤑᤧ ᤁᤧᤔᤧᤵᤐᤠᤀᤠᤱ ᤁᤢᤛ᤻ᤛᤠᤜᤠ᤹ ᤁᤧᤎᤣ᤺ᤰᤐᤠ ᤜᤧᤰᤁᤩᤠᤱ ᤁᤢᤗᤠᤵᤜᤠ᤹ ᤛᤶᤎᤠᤱ ᤁᤢᤛ᤻ᤛᤠ ᤁᤧᤒᤱᤒᤠ ᤁᤰᤁᤑᤡ᤺ᤰᤔᤠ ᤜᤧᤰᤁᤣ. 12 ᤕᤜᤘᤣ ᤍᤠᤱᤒᤧᤸᤗᤧ ᤀᤣ᤺ᤰ ᤂᤧᤱᤜᤠ᤹ ᤗᤠᤶᤗᤥᤛᤢᤛᤡᤖᤥ. ᤂᤢᤏᤧ᤹ᤏᤢ ᤘᤣ᤹ ᤗᤠᤈᤣ᤹ᤒᤠ ᤀᤠᤳᤋᤡᤴ ᤔᤠᤱᤅᤡᤴᤏᤠᤱ ᤜᤥ᤺ᤵᤋᤧᤖᤥ॥ 13 ᤂᤢᤏᤧ᤹ ᤂᤧᤱᤜᤠ᤹ ᤆᤴᤈᤶᤒᤠᤍᤧᤴᤜᤠ᤹ ᤗᤡᤱᤒᤠᤱᤄᤢᤛᤡᤖᤥ ᤜᤧᤰᤁᤩᤠᤱ ᤀᤡᤰᤋᤠᤵᤜᤠ᤹ᤀᤥᤒᤠ ᤁᤢᤈᤠᤜᤠ᤹ ᤆᤠ᤺ᤳᤋᤢᤛᤡᤖᤥ. ᤂᤢᤏᤧ᤹ ᤂᤧᤱᤜᤠ᤹ ᤕᤠᤰᤐᤣ᤹ᤀᤥᤒᤠ ᤔᤠᤱᤘᤠ ᤛᤰᤘᤠᤄᤢ ᤏᤢ ᤕᤠᤰᤂᤪᤧ᤺ᤰᤁᤥᤒᤠ ᤆᤤᤋᤢᤏ ᤏᤡ᤺ᤱᤃᤣ᤹ ᤆᤠ᤺ᤳᤋᤢᤛᤡᤖᤥ॥ 14 ᤂᤢᤏᤧ᤹ ᤂᤧᤱᤜᤠ᤹ ᤐᤡᤳᤌᤰᤛᤠᤜᤠ᤹ᤗᤠᤶ ᤏᤢᤍᤠᤰᤘᤠ ᤜᤧᤰᤁᤩᤠᤱ ᤁᤧᤔᤧ᤹ᤒᤠ ᤔᤧᤸᤗᤢᤰᤛᤠ᤺ᤳᤜᤠ᤹ᤏᤢ ᤛᤥᤛᤥᤖᤡᤰ ᤌᤰᤛᤠ ᤗᤢᤵᤜᤠ᤹ᤗᤠᤶ ᤐᤡᤳᤏᤢ ᤌᤢᤱᤄᤢᤛᤡᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤢᤒᤠ ᤔᤠᤛᤡᤜᤠ᤹ᤏᤢ ᤛᤥᤛᤥᤖᤡᤰ ᤔᤧ᤺ᤴᤍᤠᤜᤠ᤹ ᤏᤢ ᤒᤠᤛᤠᤏᤒᤠ ᤏᤢᤒᤠ ᤌᤢ᤺ᤶᤒᤠᤜᤠ᤹ ᤐᤡᤖᤢᤛᤡᤖᤥ॥ ᤆᤧᤸᤗᤧᤰᤛᤣᤸᤗᤧ ᤁᤢᤘᤠᤗᤠᤶ ᤆᤥ᤺ᤰᤔᤏᤠᤒᤠ ᤆᤠ᤹ᤖᤡᤰ ᤁᤢᤈᤠᤃᤧᤏᤢ᤹ᤒᤠ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤁᤧᤎᤢᤅᤢᤶᤗᤥ॥ 15 ᤁᤖ ᤕᤛᤢᤖᤢᤏ ᤔᤧ᤹ᤖᤢᤀᤠᤱ ᤗᤠᤱᤃᤧᤎᤡᤰᤐᤠ ᤐᤥ᤺ᤰᤂᤧᤖᤥ. ᤏᤢᤖᤡᤰ ᤆᤠᤔᤠ ᤔᤧᤄᤥᤛᤢᤀᤠᤱ ᤔᤏᤠᤜᤠ᤹ ᤆᤠᤵᤔᤧ᤹ ᤔᤧ᤹ᤖᤢᤛᤡᤖᤥ ᤜᤧᤰᤁᤩᤠᤱ ᤘᤖᤧᤱᤗᤧᤱᤒᤠ ᤔᤧᤒᤥ᤺ᤰᤂᤧᤒᤠᤖᤥ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥ᤺ᤰᤐᤠ ᤀᤠᤒᤠᤅᤣ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤗᤧᤖᤢ ᤔᤧᤍᤣᤛᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤧᤴᤗᤵᤍᤠᤱᤒᤠ ᤕᤠᤰᤐᤣ᤹ᤀᤡᤴ ᤜᤏᤧ ᤔᤧᤴᤈᤥᤒᤠ ᤔᤧᤔᤧᤳᤋᤢᤖᤥ॥ 16 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤘᤣ᤹ ᤔᤠᤱᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤢᤏᤧ᤹ ᤁᤢᤏᤠ ᤁᤧᤜᤧᤶᤒᤠ ᤐᤥ᤺ᤰᤂᤧᤖ ᤔᤧᤕᤠ᤺ᤴᤍᤢᤖᤥ. ᤜᤧᤰᤁᤩᤠᤱ ᤛᤡᤰᤁᤧᤗᤧ᤺ᤱᤒᤠ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤆᤥᤃᤢᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧᤖ ᤔᤧᤈᤥᤃᤢᤖᤥ॥ 17 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤛᤧᤘᤠ ᤔᤧᤶᤔᤧᤳᤋᤣ ᤁᤧᤘᤠ᤹ᤒᤠ ᤔᤠᤱᤜᤠ᤹. ᤀᤠᤸᤗᤥ ᤂᤠᤖᤰ ᤁᤧᤃᤧᤵᤐᤠ ᤁᤧᤍᤠᤒᤠ ᤔᤠᤱᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤇᤡᤴᤒᤠ ᤔᤠᤱᤜᤠ᤹. ᤏᤡᤱᤘᤠ᤹ᤑᤢᤔᤠᤱ ᤔᤣ᤺ᤴᤒᤠ ᤑᤧᤴᤛᤠᤶᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖᤥ॥ 18 ᤂᤡᤏᤡ᤹ ᤛᤠᤃᤧᤘᤠ᤺ᤶᤒᤠ ᤕᤠᤰᤐᤣ᤹ᤀᤡᤴ ᤁᤧᤗᤧᤖᤢᤶᤗᤥ. ᤂᤡᤏᤡ᤹ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤗᤥ॥ 19 ᤂᤧᤴ ᤏᤡᤛᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤏᤠ᤹ᤖᤡᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤸᤗᤧ ᤜᤠᤱᤃᤧᤴ ᤛᤡᤰᤆᤠ ᤗᤥᤖᤧᤖᤥ॥ 20 ᤂᤧᤒᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤂᤧᤱᤜᤠ᤹ ᤗᤠᤵᤑᤢᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤧᤔᤠ ᤔᤧᤒᤥᤱᤒᤡ. ᤀᤥᤔᤧᤳᤋᤢᤱ ᤛᤠ᤹ᤖᤢᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤑᤧᤳᤁᤧᤗᤠ᤹ᤒᤠ ᤌᤠ᤺ᤰᤛᤡᤖᤥ. ᤀᤡᤱᤀᤠᤗᤧᤰᤗᤧᤰᤐᤠ ᤌᤡᤴᤍᤠᤱ ᤛᤠᤕᤥᤒᤥᤖᤠᤛᤡᤖᤥ॥ 21 ᤂᤧᤴ ᤔᤠᤱ ᤔᤧ᤺ᤴᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤢᤏᤠᤃᤧᤜᤧᤶᤒᤠ ᤔᤧᤈᤥᤃᤠᤱᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤏᤧᤒᤠ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥ᤺ᤰᤂᤢᤖᤥ॥ ᤗᤳᤇᤠ ᤛᤢᤘᤠᤱᤅᤣ ᤁᤧᤜᤥᤵᤐᤠ ᤔᤏᤠᤜᤠ᤹ᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤁᤢᤏᤠ ᤁᤧᤜᤧᤶᤒᤠ ᤆᤥᤃᤢᤱᤛᤡᤱᤗᤥ. ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤗᤳᤇᤠ ᤛᤢᤘᤠᤱᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤁᤧᤴ ᤑᤥ᤺ᤰᤂᤢᤱᤗᤥ॥ 22 ᤌᤣᤀᤠᤱᤓᤧᤸᤗᤧ ᤀᤠᤛᤠᤰᤁᤧᤴᤏᤡᤸᤗᤧ ᤔᤡᤎᤢᤱ ᤔᤡᤖᤠ᤺ᤰ ᤐᤥᤃᤧᤖᤥ. ᤂᤧᤸᤗᤧ ᤛᤡᤃᤠᤱ ᤔᤢ ᤛᤡᤔᤧᤸᤗᤧ ᤜᤠᤱᤈᤢᤶᤔᤡᤴ ᤔᤡᤎᤡᤰᤂᤢᤖᤥ॥ ᤂᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤂᤧᤵᤔᤥᤒᤠ ᤁᤢᤈᤠᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ. ᤂᤶᤓᤩᤠᤱ ᤁᤥ᤺ᤰᤔᤠ ᤕᤢᤰᤏᤠᤜᤠ᤹ᤀᤥ ᤁᤧᤖᤧᤰ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤣ᤺ᤳᤋᤢᤖᤥ॥ 23 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤢᤰᤂᤣ ᤗᤠᤰᤂᤣ ᤋᤠᤖᤢᤱᤗᤥ. ᤀᤠᤱᤃᤠ᤹ ᤀᤠᤍᤥ᤺ᤱᤜᤠ᤹ᤖᤧ ᤂᤧᤱᤜᤠ᤹ ᤀᤠᤒᤢᤱᤛᤡᤱᤗᤥ॥ 24 ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤔᤧᤱᤔᤧᤱᤒᤠ ᤛᤠᤰᤘᤠ᤺ᤴ. ᤔᤡᤀᤠᤍᤡᤰᤋᤡᤰᤐᤠ ᤕᤱᤍᤢᤱᤒᤠ ᤜᤧᤰᤁᤩᤠᤱ ᤀᤠᤛᤡᤛᤡᤒᤠ ᤋᤢᤰᤔᤠᤜᤠ᤹ ᤐᤠᤱᤄᤢᤱ ᤋᤠᤛᤢᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤁᤣ᤺ᤱᤜᤠ᤹ ᤏᤢ ᤂᤠᤶᤒᤠᤱᤅᤥ ᤁᤧᤀᤢ᤺ᤱᤛᤡᤱᤒᤠ ᤁᤧᤀᤠ᤺ᤵᤐᤠ ᤁᤢᤏᤡᤱ ᤁᤧᤕᤠᤰᤐᤠ ᤀᤛᤣ᤺ᤰᤜᤠ᤹ ᤐᤠᤱᤄᤢᤱ ᤋᤠᤛᤢᤱᤛᤡᤱᤗᤥ॥ 25 ᤔᤠᤖᤠᤶᤜᤠ᤹ᤀᤥ ᤋᤠᤓᤣ᤺ᤸᤗᤧ ᤂᤧᤱᤜᤠ᤹ ᤗᤡᤃᤢᤰ ᤔᤧᤰᤂᤢᤱᤛᤡᤱᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤁᤡᤔᤠ ᤕᤱᤔᤠ ᤀᤡᤛᤣ᤺ᤱ ᤐᤥᤱᤗᤥ॥ ᤏᤠᤗᤡᤃᤧᤴ ᤌᤠᤱᤒᤧᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤛᤥᤛᤥᤖᤡᤰ. ᤏᤢᤃᤧᤎᤢᤱᤒᤠ ᤀᤠᤶᤒᤪᤧ᤺ᤱᤘᤠ ᤀᤅᤧ᤺ᤰᤘᤠ ᤏᤢ ᤁᤢᤎᤧᤃᤣᤰ ᤁᤧᤓᤢᤵᤐᤠ ᤁᤠᤵᤐᤥ ᤋᤢᤶᤛᤠᤜᤠ᤹ᤀᤠᤱ ᤔᤧᤔᤧᤰᤗᤥ॥ 26 ᤂᤧᤱᤜᤠ᤹ ᤏᤡᤱᤘᤠ᤹ᤛᤢᤶᤔᤥᤀᤠᤱ ᤔᤧᤴᤍᤠᤏᤧᤴᤗ ᤜᤠᤶᤒᤪᤧᤰ. ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤘᤖᤧᤱᤗᤧᤱ ᤔᤧᤰᤂᤢᤱᤛᤡᤱᤒᤠ ᤘᤕᤧᤖᤥ॥ 27 ᤁᤖ ᤏᤡᤱᤔᤡᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤒᤠ᤺ᤳᤋᤢᤒᤠ ᤀᤠᤛᤡᤖᤠ᤹ ᤔᤧᤎᤠᤅᤧᤸᤗᤥ. ᤏᤡᤱᤔᤡᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤏᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤒᤡᤗᤠᤖᤥ. ‘ᤀᤠᤏᤡ᤹ ᤜᤢᤰᤁᤡᤸᤗᤧ ᤀᤠᤏᤠ᤺ᤴᤍᤢᤶᤛᤡᤶᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤴᤜᤠ᤹ ᤁᤧᤖᤧᤰ ᤆᤥᤃᤢᤒᤠ ᤔᤣ᤺ᤴᤗᤥ॥’” 28 ᤀᤡᤛᤪᤠᤀᤡᤗᤧᤴ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤛᤢᤘᤠᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤣᤀᤠᤱ ᤛᤧᤶᤔᤠ ᤔᤧᤴᤇᤰᤋᤢᤴᤗᤥ॥ 29 ᤂᤧᤱᤜᤠ᤹ ᤛᤡᤰᤁᤢᤶᤛᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤒᤠ ᤜᤧᤰᤁᤣ᤺ᤸᤗᤧᤃ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤧᤴ ᤀᤠᤰᤂᤣ ᤐᤥᤱ ᤑᤠ᤹ᤀᤠᤱ ᤔᤧᤏᤡᤛᤢᤒᤠ ᤜᤧᤰᤁᤣ᤺ᤸᤗᤧᤃ᥄ 30 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤰᤐᤣ᤺ᤸᤗᤧ ᤔᤧᤛᤱᤄᤢᤛᤡᤴᤒᤠ ᤘᤕᤧᤸᤗᤧᤃ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤗᤠᤵᤑᤢᤔᤠ ᤔᤧᤛᤢᤖᤢᤛᤡᤴᤒᤠ ᤘᤕᤧᤸᤗᤧᤃ. ᤀᤠᤰᤂᤣᤗ᤹ᤖᤡᤰ ᤌᤡᤰᤐᤠᤖᤧ ᤜᤧᤴᤇᤡᤱᤎᤡᤰ ᤏᤠ᤺ᤵᤔᤠ ᤛᤢᤰᤋᤢᤛᤡᤒᤠ ᤘᤕᤧᤒᤣ᥅ ᤀᤡᤃᤪ ᤏᤧᤳᤇᤡᤖᤧ ᤌᤡᤒᤥᤱ ᤜᤧᤴᤇᤡᤱ ᤏᤠ᤺ᤵᤔᤠ ᤛᤢᤰᤋᤧᤛᤢᤒᤣ᥅ 31 ᤁᤖ ᤀᤡᤛᤪᤠᤀᤡᤗᤒᤠ ᤕᤠᤰᤐᤣᤴ ᤀᤠᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤰᤐᤣ᤹ ᤜᤧᤰᤋᤱᤒᤠ ᤔᤣ᤺ᤴᤗᤥ. ᤀᤠᤏᤡ᤹ ᤏᤡᤱᤔᤡᤜᤠ᤹ ᤀᤠᤵᤑᤣᤰᤁᤣ ᤁᤴ ᤐᤠ᤺ᤴᤏᤥ ᤔᤧᤍᤧᤴᤗᤥ॥ 32 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤧᤸᤗᤧᤰᤛᤣ᤹ ᤀᤡᤘᤠ᤺ᤳᤋᤡᤴ ᤛᤍᤥᤔᤒᤠ ᤆᤧᤸᤗᤧᤰᤛᤣ᤹ ᤀᤡᤘᤠ᤺ᤳᤋᤥᤗᤠᤶ ᤜᤧᤰᤁᤩᤠᤱ ᤃᤔᤥᤖᤠᤒᤠ ᤀᤡᤰᤋᤠᤵᤜᤠ᤹ᤀᤥᤗᤠᤶ ᤋᤩᤧᤒᤠᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤧᤸᤗᤧᤰᤛᤣ᤹ᤀᤡᤴ ᤏᤡᤱ ᤁᤧᤕᤠᤰᤐᤠ ᤆᤥᤰᤗᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤈᤠᤜᤠ᤹ ᤛᤠᤰᤂᤡ᤺ᤰ ᤁᤧᤄᤡ᤺ᤰᤐᤠ ᤆᤥᤰᤗᤥ॥ 33 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤧᤸᤗᤧᤰᤛᤣ᤹ ᤌᤡ᤺ᤴ. ᤀᤛᤣ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤗᤥ ᤕᤠᤱᤜ᤺ᤰᤁᤡᤸᤗᤧ ᤁᤧᤀᤠ᤺ᤵᤐᤠ ᤁᤢᤏᤡᤱᤗᤥ॥ 34 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤌᤣ ᤁᤴ ᤀᤠᤱᤃᤠ᤹ ᤕᤠᤱᤄᤥ᤺ᤳᤋᤢᤱ ᤕᤢᤰᤂᤢᤱᤒᤠ ᤜᤥ᤺ᤵᤐᤡ. ᤜᤧᤰᤁᤩᤠᤱ ᤆᤠᤎᤠ᤺ᤱᤅᤥ ᤀᤣ᤺ᤵᤛᤠᤵ ᤀᤣ᤺ᤵᤋᤢᤱᤒᤠ ᤜᤥ᤺ᤵᤐᤡ᥅ 35 ᤁᤢᤗᤧᤰᤘᤠ ᤏᤢ᤺ᤰᤔᤠᤃ ᤀᤠᤱᤃᤠ᤹ ᤀᤠᤕᤠ᤺ᤶᤒᤰᤗᤥ. ᤀᤠᤱᤃᤠ᤹ᤀᤣ ᤁᤢᤗᤧᤰᤘᤠ ᤜᤢᤅᤢᤱᤗᤥ॥ ᤁᤧᤗᤠ᤹ᤒᤠ ᤕᤧᤶᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤅᤡᤴ ᤗᤧ᤺ᤱᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠ ᤕᤧᤴᤏᤡᤴ ᤏᤡ᤺ᤳᤋᤠᤱ ᤁᤧᤖᤧᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗ ᤔᤧᤒᤳᤗᤥ॥” 36 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤧᤴᤎᤢᤶᤔᤏᤠᤒᤠ ᤔᤧᤒᤥᤱᤒᤠ ᤏᤢ ᤂᤢᤴᤇᤡ᤹ ᤀᤡᤄᤣ᤺ᤱᤅᤥᤗᤠᤶ ᤔᤧᤸᤗᤧᤖᤢᤛᤡᤴᤒᤠ ᤂᤢᤏᤧ᤹ ᤏᤡᤛᤢᤖᤥ॥ ᤂᤧᤒᤩᤠᤱ ᤂᤢᤴᤇᤡ᤹ ᤗᤧᤵᤔᤠᤱ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡᤖᤥ. ᤂᤶᤓᤩᤠᤱ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ 37 ᤂᤧᤒᤩᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤛᤢᤛᤡᤖᤥ. “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤶᤛᤡᤱᤔᤠᤍᤧᤴ ᤕᤠᤰᤐᤣ᤹. ᤂᤢᤴᤇᤡ᤹ ᤔᤠᤱᤜᤠ᤹ ᤀᤠᤳᤋᤡ ᤔᤧᤘᤠ᤹ᤒᤣ᥅ 38 ᤁᤴ ᤔᤠᤱᤜᤠ᤹ᤖᤧᤃ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤔᤧᤈᤀᤠᤱ ᤘᤕᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤧᤸᤗᤧᤰᤛᤣ᤹ ᤌᤡ ᤛᤡᤍᤢᤱᤈᤓᤠᤴ ᤔᤧᤎᤢᤅᤢᤀᤠᤱ ᤘᤕᤧᤖᤥ॥ ᤁᤴᤜᤠ᤹ ᤔᤧᤒᤥ᤺ᤰᤁᤠᤱ ᤂᤡᤏᤡ᤹ ᤁᤧᤶᤓᤠ᤹ᤖᤡᤖᤖᤥ᥄ ᤁᤴᤜᤠ᤹ᤖᤧ ᤂᤡᤏᤡ᤹ ᤕᤢᤱᤔᤠᤍᤧᤴ ᤁᤧᤶᤒᤡᤖᤡᤖᤖᤥ᥄ 39 ᤀᤠᤸᤗ ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ᤃ ᤂᤢᤏᤧ᤹ᤀᤣᤀᤠᤖᤥ. ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤔᤠᤱ ᤜᤥᤵᤗᤥ॥ ᤀᤠᤱᤃᤠ᤹ᤀᤣ ᤛᤧᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗᤥ॥ ᤀᤠᤱᤃᤠ᤹ᤀᤣ ᤂᤠ᤺ᤴᤍᤢᤱᤛᤡᤱᤗᤥ. ᤂᤶᤓᤩᤠᤱ ᤀᤠᤱᤃᤠ᤹ᤀᤣ ᤘᤣ᤺ᤴᤍᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤜᤠ᤺ᤳᤗᤧᤀᤠᤱ ᤛᤧᤶᤔᤠ ᤔᤧᤛᤢᤰᤋᤢᤛᤡᤴᤗᤥ॥ 40 ᤀᤠᤸᤗ ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤑᤥ᤺ᤰᤂᤢᤱᤗᤥ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤱᤗᤥ— ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ 41 ᤀᤠᤸᤗ ᤛᤧᤸᤗᤧᤱ ᤛᤧᤸᤗᤧᤱ ᤁᤧᤗ᤹ᤒᤠ ᤀᤠᤱᤃᤠ᤹ ᤀᤠᤍᤠᤓᤣᤴ ᤕᤠᤖᤠᤵᤋᤢᤱᤗᤥ. ᤜᤧᤰᤁᤩᤠᤱ ᤂᤠᤛᤧᤴ ᤗᤥ᤺ᤶᤔᤥ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤂᤧᤴ ᤋᤧᤶᤛᤢᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤁᤧᤀᤵᤐᤠᤜᤠ᤹ᤀᤥ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤏᤠ᤹ᤒᤠᤜᤠ᤹ᤀᤥ ᤁᤢᤗᤧᤰᤘᤠ ᤜᤢᤅᤢᤱᤗᤥ॥ 42 ᤀᤠᤱᤃᤠ᤹ ᤀᤠᤍᤥ᤺ᤱᤜᤠ᤹ ᤔᤠᤰᤂᤡ᤹ ᤛᤧᤔᤠ ᤐᤠᤱᤄᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤀᤵᤐᤠᤜᤠ᤹ ᤀᤠᤍᤠᤓᤣᤸᤗᤧ ᤛᤧᤖᤢᤛᤡᤖᤥ॥ ᤀᤠᤱᤃᤠ᤹ᤏᤢ ᤌᤱ ᤁᤧᤈᤥ᤺ᤰᤐᤠᤜᤠ᤹ ᤗᤳᤇᤠᤀᤠᤱ ᤔᤧᤗᤧᤖᤢᤱᤛᤡᤱᤅᤡᤸᤗᤥ. ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤏᤢ ᤁᤧᤃᤠ᤺ᤶᤒᤠᤜᤠ᤹ᤀᤠᤱ ᤔᤧᤛᤡᤖᤥ॥” 43 ᤔᤧᤴᤇᤠᤶ ᤛᤢᤘᤠᤱᤛᤣ. ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤛ᤺ᤳᤋᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤜᤢᤅᤢᤖᤥ॥ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ᤀᤥ ᤁᤢᤗᤧᤰᤘᤠ ᤏᤢ᤺ᤰᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤈᤣ᤹ ᤏᤢ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢᤛᤡᤖᤥ॥ 44 ᤔᤥᤛᤠᤴ ᤏᤢ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤋᤩᤧᤛᤡᤀᤠᤱ ᤁᤴ ᤛᤧᤘᤠᤛᤠᤶᤗᤥᤀᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤏᤠᤜᤠ᤹ ᤆᤧᤰᤋᤧᤇᤢᤛᤡᤖᤥ॥ ᤔᤥᤛᤠ᤺ᤸᤗᤧ ᤁᤢᤏᤢᤵᤔᤠ ᤁᤢᤀᤡᤱᤈᤠᤱᤜᤠ᤹ 45 ᤜᤧᤰᤁᤣᤗ᤹ᤖᤡᤰ ᤔᤥᤛᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤁᤴ ᤁᤠᤰ ᤐᤠ᤺ᤴᤈᤠ᤺ᤰᤜᤠ᤹ ᤔᤧᤳᤋᤢ ᤛᤢᤖᤢᤛᤡᤸᤗᤧ. 46 ᤂᤢᤏᤧ᤹ ᤕᤥ᤹ᤖᤢᤖ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤀᤡᤴ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤇᤡᤱᤅᤠᤀᤠᤱ ᤂᤡᤏᤡ᤹ ᤔᤧᤳᤏᤡᤱᤒᤠ ᤁᤧᤖᤧᤰ ᤐᤠ᤺ᤴᤈᤠ᤺ᤰᤜᤠ᤹ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤕᤢᤰᤂᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤛᤠᤜᤠ᤹ᤀᤠᤱ ᤁᤴ ᤛᤠᤶᤕᤥᤌᤡᤶᤔᤥᤒᤠ ᤁᤧᤖᤧᤰ ᤐᤠ᤺ᤴᤈᤠ᤺ᤰᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤜᤢ᤹ᤔᤠ ᤁᤧᤛᤢᤰᤋᤢᤶᤛᤡᤶᤗ॥ 47 ᤁᤴ ᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤗᤠᤃᤡ ᤜᤏᤧᤒᤠ ᤔᤣ᤺ᤴ॥ ᤁᤴᤜᤠ᤹ ᤂᤡᤏᤡ᤹ ᤗᤠᤃᤡ ᤜᤡᤱᤔᤠ ᤗᤠᤶᤗᤥ॥ ᤁᤴᤜᤠ᤹ᤗᤠᤶᤒᤠᤀᤣ ᤕᤷᤍᤏ ᤏᤠᤎᤠ᤺ᤶᤒᤡ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤐᤣ᤺ᤰᤔᤠ ᤁᤧᤈᤥᤃᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤢᤎᤠ᤺ᤰ ᤁᤧᤈᤠ᤹ᤒᤠ ᤁᤧᤒᤥ᤺ᤰᤂᤡ᤹॥” ᤔᤥᤛᤠᤖᤧ ᤁᤢᤛᤡᤔᤠ ᤐᤠᤴ 48 ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤔᤥᤛᤠᤴ ᤀᤰᤂᤣ ᤔᤧᤳᤋᤢ. 49 “ᤕᤖᤡᤜᤥ ᤁᤢᤒᤣᤛᤠᤱᤒᤠ ᤔᤥᤀᤠᤒ ᤗᤠᤈᤣ᤹ᤀᤥ ᤁᤧᤏᤧᤒᤠ ᤀᤒᤠᤖᤡᤔ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤏᤣᤒᤥ ᤁᤥ᤺ᤰᤔᤠᤀᤥ ᤌᤠ᤺ᤱ ᤌᤥ᤺ᤰᤛᤡᤱ ᤐᤣᤃᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤐᤡᤖᤢᤱᤛᤡᤱᤅᤠᤱ ᤏᤧᤒᤠ ᤁᤏᤠᤏ ᤗᤠᤈᤣᤴ ᤀᤥᤔᤧᤳᤋᤧ᤹॥ 50 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤓᤢ᤹ ᤜᤠᤖᤢᤏᤧᤴ ᤜᤥᤖ ᤁᤥ᤺ᤰᤔᤠᤀᤥ ᤔᤠᤛᤡᤱ ᤂᤧᤒᤩᤠᤱ ᤁᤧᤛᤡᤒᤠ ᤁᤧᤄᤧᤵᤐᤠ ᤁᤢᤃᤠ᤹ᤀᤡᤜᤠ᤹ᤀᤥ ᤐᤣ. ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤁᤧᤎᤥ᤺ᤰᤛᤡᤱ ᤁᤧᤒᤣ᤺ᤰᤐᤠ ᤂᤧᤴ ᤁᤥ᤺ᤰᤔᤠ ᤑᤠᤱᤈᤱᤅᤥ ᤂᤧᤏᤧ᤹ ᤁᤧᤛᤡᤖᤥ ᤜᤧᤰᤁᤩᤠᤱ ᤁᤧᤔᤠᤛᤡᤱᤒᤠ ᤁᤧᤄᤧᤵᤐᤠ ᤂᤧᤏᤧ᤹ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ᤀᤥ ᤋᤱᤛᤡᤱᤛᤧ ᤁᤧᤒᤣ᤺ᤰ॥ 51 ᤌᤣᤀᤠᤱᤓᤧᤸᤗᤧ ᤂᤧᤴᤇᤡ᤹ ᤏᤧᤵᤔᤠᤱᤗᤧ ᤈᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤔᤣᤖᤡᤒᤠ-ᤁᤠᤍᤣᤛᤒᤠ ᤆᤫᤠ᤺ᤳᤋᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ᤏᤢ ᤏᤛᤠᤴ ᤁᤧᤗᤧᤰᤂᤢᤛᤡ. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤴᤇᤡ᤹ ᤀᤠᤱᤃᤠ᤹ ᤛᤣᤛᤣᤒᤠ ᤆᤥ᤺ᤰᤁᤠᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤛᤡᤴ॥ 52 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤱᤛᤡᤱᤅᤠᤱ ᤏᤧᤒᤠ ᤂᤧᤴ ᤗᤠᤈᤣᤴ ᤔᤠ᤺ᤱᤄᤠ ᤗᤠᤶᤒᤠᤖᤰ ᤁᤧᤏᤡᤛᤢ᤹. ᤁᤖ ᤂᤧᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤁᤧᤱᤄᤥᤏᤧᤴᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.