ᤛᤠᤶᤕᤥᤌᤡᤶ ᤀᤡᤱ 31 - LIFOTNTᤕᤜᤥᤛᤢᤴ ᤗᤠᤶᤗᤥᤒᤠ ᤐᤥᤱ᤹ 1 ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤴ ᤐᤠ᤺ᤴᤜᤠ᤹ ᤔᤧᤵᤔᤠ ᤛᤢᤖᤢᤛᤡᤸᤗᤧ 2 ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤀᤡᤴ ᤁᤡᤵ ᤌᤡᤰᤁᤠᤱ ᤏᤡᤒᤥᤱ ᤋᤱᤒᤣ ᤁᤧᤖᤠᤱ॥ ᤀᤠᤸᤗ ᤀᤠᤱᤃᤠ᤹ ᤗᤠᤶᤗᤥᤔᤠ ᤔᤧᤛᤢᤰᤏᤡᤱᤅᤡᤴ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤅᤠᤱ ᤘᤠ᤹. ‘ᤂᤧᤏᤧ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤁᤠ᤺ᤰᤔᤠᤀᤠᤱ ᤐᤣ᤺ᤰᤔᤠ ᤁᤧᤴᤇᤢᤰᤋᤢᤴ᤹॥’ 3 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤂᤡᤏᤡ᤹ ᤋᤃᤡ ᤏᤠᤎᤠ᤺ᤶᤒᤡ ᤐᤣᤰ॥ ᤂᤢᤏᤧ᤹ ᤂᤡᤏᤡ᤹ ᤋᤃᤡᤗᤠᤶᤒᤠ ᤁᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤰᤂᤢᤛᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤁᤧᤕᤢᤰᤋᤢᤶ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤕᤜᤥᤛᤢᤴ ᤏᤠᤱ ᤂᤡᤏᤡ᤹ ᤋᤃᤡ ᤏᤠᤎᤠ᤺ᤶᤒᤡ ᤐᤣᤰ॥ 4 “ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ ᤛᤡᤜᤥᤏᤧᤴ ᤏᤢ ᤀᤥᤃᤧᤴ ᤔᤧᤰᤂᤢᤛᤡᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤴᤏᤠᤱ ᤔᤧᤰᤂᤢ᤹॥ 5 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤛᤡ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤁᤴᤜᤠ᤹ ᤁᤧᤔᤧᤳᤋᤢᤶᤛᤡᤶᤗ ᤐᤥᤱ᤹॥ 6 ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ᤹᥄ ᤁᤴᤜᤠ᤹ᤏᤢ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ ᤜᤧᤰᤁᤩᤠᤱ ᤕᤱᤔᤠ ᤔᤧᤛᤩᤧᤴᤏᤧ᤹᥄ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤂᤡᤏᤡ᤹ᤏᤢ ᤐᤣᤰ॥ ᤂᤢᤏᤧ᤹ ᤂᤡᤏᤡ᤹ ᤀᤠᤓᤧᤸᤗᤧᤀᤠᤱ ᤁᤧᤸᤗᤧᤖᤡᤴ᤹. ᤗᤠᤵᤐᤠᤱ ᤁᤧᤴᤍᤣᤛᤡᤴ᤹॥” 7 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤕᤜᤥᤛᤢᤴ ᤀᤢ᤺ᤳᤋᤢᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤢᤏᤧ᤹ ᤔᤧᤳᤋᤢ. “ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ᤹᥄ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤏᤡᤱ ᤔᤧᤳᤋᤢᤛᤡᤀᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤗᤠᤈᤣ᤹ᤀᤥ ᤁᤴ ᤔᤏᤠᤜᤠ᤹ᤏᤢ ᤂᤧᤏᤧ᤹ᤀᤣ ᤁᤧᤒᤣ᤺ᤰ. ᤜᤧᤰᤁᤩᤠᤱ ᤂᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠᤖᤧ ᤗᤠᤃᤡ ᤂᤧᤏᤧ᤹ ᤂᤧᤱᤜᤠ᤹ ᤁᤧᤓ᤺ᤰᤂᤢ ᤁᤧᤒᤡᤖᤢᤛᤡᤖ ᤐᤥᤱ᤹॥ 8 ᤕᤜᤘᤣ ᤍᤠᤱᤒᤧᤴ ᤀᤠᤵᤑᤣᤰ ᤂᤧᤏᤧ᤹ ᤁᤧᤍᤃᤡ ᤐᤣᤰ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤛᤥᤖᤡᤰ ᤘᤠ᤹॥ ᤂᤢᤏᤧ᤹ ᤂᤧᤏᤧ᤹ ᤀᤠᤓᤧᤸᤗᤧᤀᤠᤱ ᤁᤧᤸᤗᤧᤳᤏᤧᤴ. ᤗᤠᤵᤐᤠᤱ ᤁᤧᤴᤍᤣᤏᤧᤴᤗᤥ॥” ᤌᤡᤶᤜᤠ᤹ ᤏᤡ᤺ᤵᤔᤠ ᤁᤧᤒᤥᤱᤒᤠ ᤕᤧᤶᤜᤠ᤹ 9 ᤁᤸᤗᤧᤆᤥᤃᤢᤸᤗᤧ ᤔᤥᤛᤠ᤺ᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤋᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤐᤡᤖᤢᤛᤡ॥ 10 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤋᤱᤒᤣ ᤏᤢᤛᤡ ᤌᤰᤔᤠᤒᤠ ᤁᤢᤏᤢᤵᤔᤥ ᤛᤡᤱᤏᤠᤳᤜᤠ᤹ ᤗᤧᤵᤔᤠ ᤐᤡᤔᤠᤛᤡ ᤋᤱᤒᤣᤀᤥ. ᤋᤰᤋᤰᤘᤠ ᤜᤡᤶ ᤕᤠ᤺ᤰᤔᤠ ᤋᤱᤏᤠᤶᤔᤥ. 11 ᤂᤢᤏᤧ᤹ ᤛᤣᤃᤢᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤀᤥᤛᤣ᤺ᤴᤎᤠᤰᤛᤡᤱᤛᤧ ᤔᤧᤍᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤢᤴᤇᤡ᤹ ᤔᤧᤄᤧᤵᤛᤢᤖ ᤂᤡᤏᤡ᤹ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤡᤖᤧᤶᤔᤧ᤹॥ 12 ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ. ᤜᤡᤴᤈᤠ᤹ᤒᤡᤳᤇᤠ᤹ ᤏᤢ ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ ᤁᤧᤖᤧᤰ ᤛᤢᤵᤛᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤵᤔᤠ ᤏᤢ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤧᤖᤧᤰ ᤐᤠ᤺ᤴᤈᤠ᤺ᤰᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤜᤢ᤹ᤛᤡᤱᤗ॥ 13 ᤕᤷᤍᤏ ᤏᤠᤎᤠ᤺ᤶᤒᤡ ᤂᤡᤏᤡ᤹ ᤕᤢᤰ ᤆᤥ᤺ᤰᤛᤧ ᤐᤣ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤗᤠᤈᤣ᤹ᤀᤥ ᤁᤧᤕᤢᤅᤡᤖ ᤌᤠᤖᤡᤰ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ᤖᤧᤀᤠᤱ ᤔᤧᤄᤧᤵᤛᤢᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤵᤔᤠ ᤜᤢ᤹ᤛᤡᤱᤔᤠ ᤁᤧᤒᤥᤱᤒᤠ ᤘᤠ᤹ᤖᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤁᤢᤏᤢᤵᤔᤠ ᤀᤡᤱᤈᤠᤱ 14 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤛᤡᤔᤠ ᤕᤧᤴᤏᤡᤴ ᤏᤡ᤺ᤳᤋᤠᤱ ᤋᤩᤧᤄᤧᤖᤧ॥ ᤁᤸᤗᤧᤆᤥᤃᤢᤸᤗᤧ ᤕᤜᤥᤛᤢᤴ ᤀᤢ᤺ᤳᤋᤧ᤹. ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤂᤡᤏᤡ᤹ ᤋᤩᤧᤶᤔᤧ᤹॥ ᤂᤧᤵᤔᤥ ᤂᤢᤏᤧ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤀᤠᤱᤃᤠ᤹ ᤜᤢᤰᤛᤢᤵᤋᤢᤱ᤹॥” ᤂᤧᤒᤩᤠᤱ ᤔᤥᤛᤠᤴ ᤏᤢ ᤕᤜᤥᤛᤢᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤋᤩᤧᤛᤡ॥ 15 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤛᤠ᤺ᤱᤃᤠᤜᤡᤶᤔᤥ ᤗᤳᤇᤠ ᤂᤠ᤹ᤔᤡᤳ ᤛᤡᤳᤗᤠᤱᤅᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ. ᤂᤶᤓᤩᤠᤱ ᤂᤧᤴ ᤛᤠ᤺ᤱᤃᤠᤜᤡᤶᤔᤥ ᤗᤠ᤺ᤵᤔᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤑᤴᤇᤡᤱ॥ 16 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤶᤒᤠ ᤁᤧᤎᤠ᤺ᤰᤌᤧᤒᤠᤜᤠ᤹ ᤁᤢᤀᤡᤛᤡᤰ ᤂᤧᤏᤧ᤹ ᤛᤡᤔᤠ ᤁᤧᤈᤥᤰ॥ ᤂᤧᤏᤧ᤹ ᤁᤧᤛᤡᤀᤠᤱ ᤀᤣᤃᤠᤱ ᤂᤧᤱᤜᤠ᤹ ᤔᤧᤗᤠ᤺ᤵᤐᤠ ᤗᤠᤈᤣ᤹ᤀᤥ ᤔᤧᤃᤧᤳᤋᤠᤱ ᤁᤴ ᤔᤏᤠᤜᤠ᤹ᤖᤧ ᤜᤠᤖᤠᤀᤣ ᤘᤣ᤹ ᤗᤠᤈᤣ᤹ᤒᤠ ᤔᤠᤱᤜᤠ᤹ ᤗᤧᤵᤔᤠᤱ ᤔᤧᤗᤠᤳ ᤜᤧᤰᤁᤩᤠᤱ ᤕᤠᤶᤛᤠᤶᤔᤥ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹॥ ᤀᤠᤱᤃᤠ᤹ ᤔᤧᤗᤧᤳᤋᤠᤀᤠᤱ ᤂᤧᤱᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤂᤧᤱᤜᤠ᤹ᤖᤧ ᤔᤧᤓᤣ᤺ᤴᤍᤢ᤹॥ 17 ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤆᤢᤰ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤗᤠᤵᤑᤣᤛᤢᤱᤛᤡᤱ᤹. ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤏᤠᤖᤠᤴ ᤂᤧᤱᤜᤠ᤹ᤗᤠᤶ ᤆᤡᤰᤂᤢᤱᤅᤠᤱ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤔᤧᤰ॥ ᤕᤖᤡᤰ ᤋᤢᤰᤂᤣ ᤗᤠᤰᤂᤣᤜᤠ᤹ ᤏᤢ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤀᤡᤍᤠᤖᤥ॥ ᤂᤧᤒᤩᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤗᤢᤶᤔᤥ ᤜᤥᤵᤐᤠᤸᤗᤧ ᤆᤥᤃᤢᤸᤗᤧᤀᤣ ᤀᤠᤏᤡ᤹ ᤛᤶᤎᤠᤱ ᤀᤰᤋᤱᤒᤠ ᤁᤧᤛᤠᤰᤐᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤋᤩᤧᤒᤠᤃ ᤔᤣ᤺ᤶᤒᤡ᥅’ 18 ᤘᤣ᤹ ᤔᤠᤱᤜᤠ᤹ ᤗᤧᤵᤔᤠᤱ ᤔᤧᤗᤠ᤺ᤳᤋᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤛᤧᤰᤂᤠᤛᤠᤱ ᤀᤠᤏᤠᤖᤠᤴ ᤆᤡᤰᤂᤢᤱ᤹॥ 19 “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤴ ᤛᤧᤘᤠᤛᤠᤶᤗᤥᤴ ᤛᤠᤵᤋᤧᤶᤔᤧ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤜᤢ᤹ᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠᤶᤗᤥᤔᤠ ᤐᤠᤱᤄᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤴ ᤛᤠᤶᤗᤥᤴ ᤀᤠᤱᤃᤠ᤹ ᤀᤠᤗᤠᤃᤡ ᤗᤳᤇᤠ ᤋᤥ᤺ᤴᤍᤡ ᤐᤥᤱᤗ॥ 20 ᤁᤴᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤀᤠᤱᤃᤠ᤹ ᤔᤠᤱᤜᤧᤰ ᤆᤥᤃᤢᤱᤛᤡᤱᤅᤠᤱ ᤐᤡᤔᤠᤛᤡ ᤔᤠᤱᤜᤢᤵ ᤆᤥᤃᤢᤱᤒᤠ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤂᤧᤱᤜᤠ᤹ ᤁᤧᤳᤋᤢᤱᤛᤡᤱᤅᤠᤱ ᤀᤣᤃᤠᤱ. ᤂᤧᤱᤜᤠ᤹ᤖᤧ ᤔᤧᤈ ᤔᤧᤎᤢᤅᤢ᤹ ᤜᤧᤰᤁᤩᤠᤱ ᤘᤣ᤹ ᤔᤠᤱᤜᤠ᤹ ᤗᤧᤵᤔᤠᤱ ᤔᤧᤗᤠ᤺ᤳᤋᤠᤱ ᤁᤴᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤏᤠ᤹ᤀᤠᤕᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤔᤧᤓᤣ᤺ᤴᤍᤢ᤹॥ 21 ᤕᤖᤡᤰ ᤋᤢᤰᤂᤣ ᤗᤠᤰᤂᤣ ᤏᤢ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤠᤀᤠᤱ ᤀᤣᤃᤠᤱ ᤁᤴ ᤛᤧᤘᤠᤛᤠᤶᤗᤥᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤁᤢᤛᤡᤱ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤓᤧᤸᤗᤧᤀᤠᤱ ᤏᤡᤱᤘᤠ᤹ ᤔᤧᤶᤓᤣ᤺ᤳᤇᤢᤴ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤏᤡᤱ ᤔᤧᤳᤋᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤁᤧᤵᤔᤠᤛᤡᤏᤢ᤺ᤸᤗᤧ ᤋᤃᤡᤀᤣ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤢᤒᤠ᤺ᤴ ᤁᤢᤛᤡᤱ ᤏᤡ᤺ᤳᤋᤢᤱ ᤛᤢᤖᤢᤱᤅᤠᤱ ᤘᤠ᤹॥” 22 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤜᤠᤒᤠ ᤂᤧᤴ ᤕᤧᤴᤏᤥ ᤁᤴ ᤛᤧᤘᤠᤛᤠᤶᤗᤥᤴ ᤛᤠᤵᤋᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤜᤢ᤹ᤖᤢᤛᤡ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢ. “ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ᤹᥄ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤡᤏᤡᤱ ᤔᤧᤳᤋᤢᤱᤛᤡᤱᤅᤠᤱ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤔᤠᤱᤜᤢᤵ ᤆᤥᤃᤢᤱᤒᤠ ᤗᤠᤈᤣ᤹ᤀᤥ ᤂᤧᤏᤧ᤹ᤀᤣ ᤀᤡᤛᤪᤠᤀᤡᤗᤡᤜᤠ᤹ ᤁᤧᤃᤧᤳᤋᤢᤛᤡ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤵᤑᤣᤰ ᤂᤧᤏᤧ᤹ᤏᤢ ᤘᤠ᤹ᤀᤠ॥” 24 ᤔᤥᤛᤠ᤺ᤸᤗᤧ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰ ᤛᤠᤵᤋᤢ ᤛᤢᤖᤢᤀᤠᤱ ᤀᤣᤃᤠᤱ 25 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢᤛᤡ. 26 “ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤴ ᤛᤠᤵᤐᤴᤏᤡᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤒᤣᤛᤠᤱ ᤏᤧᤛ᤻ᤛᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤁᤧᤏᤡᤒᤠ ᤋᤥ᤺ᤴᤍᤡ ᤁᤢᤛᤡᤱ ᤂᤧᤵᤔᤥ ᤏᤧᤖ॥ 27 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤐᤡᤑᤩᤢᤱ ᤁᤧᤈᤥᤃᤡᤒᤠᤴ ᤏᤢ ᤂᤡᤏᤡ᤹ ᤐᤠᤴ ᤔᤧᤱᤄᤧᤶᤔᤠᤴ ᤁᤢᤛᤡᤱ ᤏᤡ᤺ᤳᤋᤢᤱ᤹॥ ᤀᤠᤀᤡᤴ ᤀᤠᤱᤃᤠ᤹ ᤜᤡᤱᤅᤠᤀᤠᤱ ᤘᤠ᤹ᤀᤠᤖᤀᤣ ᤀᤠᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤖᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤁᤧᤒᤥᤃᤡᤀᤠᤱ ᤁᤧᤘᤕᤡᤏᤧᤓᤃᤪ. ᤀᤠᤱᤃᤠ᤹ ᤛᤡᤀᤠ ᤂᤧᤳᤋᤠᤀᤠᤱ ᤀᤣᤃᤠᤱᤃ ᤇᤧᤴᤏᤠ ᤛᤠ᤹ᤖᤡᤰ ᤐᤡᤑᤩᤢᤱ ᤁᤧᤈᤥᤃᤡ᤹᥄ 28 ᤂᤡᤏᤡ᤹ ᤌᤠ᤺ᤰᤁᤥ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤏᤢ ᤂᤡᤏᤡ᤹ ᤁᤧᤖᤧᤰ ᤕᤢᤰᤛᤠᤒᤠᤜᤠ᤹ ᤀᤠᤱᤃᤠ᤹ᤀᤥ ᤑᤢᤰᤂᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤐᤠ᤺ᤴᤈᤠ᤺ᤰᤜᤠ᤹ ᤂᤡᤏᤡ᤹ ᤔᤧᤳᤏᤡᤱ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤠᤱᤛᤠᤱᤒᤠᤴ ᤏᤢ ᤂᤠᤶᤒᤣ᤺ᤰᤔᤠᤴ ᤁᤧᤏᤡᤒᤠ ᤋᤥ᤺ᤴᤍᤡ ᤕᤧᤵᤛᤢᤱᤛᤡᤱ᤹॥ 29 ᤀᤠᤱᤃᤠ᤹ ᤛᤡᤀᤠᤀᤠᤱ ᤀᤣᤃᤠᤱ ᤂᤡᤏᤡ᤹ ᤛᤧᤰᤂᤠᤛᤠᤱ ᤛᤠ᤹ᤖᤡᤰ ᤑᤧᤳᤁᤧᤗᤠᤖᤡ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤡᤏᤡᤱᤒᤠ ᤀᤡᤱᤈᤠᤱᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤁᤧᤒᤥ᤺ᤰᤂᤡ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤂᤡᤏᤡ᤹ ᤑᤧᤴᤕᤠ᤺ᤶᤒᤰ ᤁᤧᤈᤥᤃᤢᤶᤒᤠ ᤏᤢ ᤂᤡᤏᤡ᤹ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤸᤗᤧ ᤂᤢᤏᤧ᤹ ᤁᤢᤛᤡᤰ ᤁᤧᤓᤥ᤺ᤰᤂᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤂᤡᤏᤡ᤹ ᤕᤧᤳᤋᤢᤰᤂᤣ ᤁᤧᤍᤢᤔᤢᤶᤗᤥ॥” ᤔᤥᤛᤠ᤺ᤸᤗᤧ ᤁᤢᤛᤠᤶᤗᤥ 30 ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤁᤴ ᤛᤧᤘᤠᤛᤠᤶᤗᤥᤀᤥᤒᤠ ᤐᤠ᤺ᤴᤇᤣ᤺ᤰᤘᤠᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤔᤧᤄᤧᤵᤛᤢᤖ ᤕᤠ᤺ᤴᤍᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.