ᤛᤠᤶᤕᤥᤌᤡᤶ ᤀᤡᤱ 30 - LIFOTNT

ᤛᤧᤴᤗᤵ ᤏᤢ ᤔᤢ᤹ᤀᤡᤛᤠᤶ ᤂᤥᤔᤠ ᤐᤠ᤺ᤴᤍᤱᤜᤠ᤹

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤡᤏᤡ᤹ ᤁᤧᤏᤠ᤺ᤳᤋᤡ ᤁᤧᤍᤣᤛᤡ᤹ᤀᤠᤱ ᤀᤣᤃᤠᤱ ᤀᤠᤸᤗ ᤁᤴ ᤔᤢ᤹ᤀᤡᤛᤠᤶᤜᤠ᤹ ᤏᤢ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤂᤡᤏᤡ᤹ ᤛᤶᤎᤠᤱ ᤌᤠᤖᤥ ᤜᤧᤰᤁᤣ᤺ᤸᤗᤧ ᤂᤧᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤠᤱ

² ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤏᤢ᤺ᤰᤂᤡ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤴ ᤀᤡᤱᤈᤠᤱ ᤆᤥᤃᤢᤱᤒᤠ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤛᤡᤰᤗᤢᤱᤔᤠ᤹ ᤏᤢ ᤂᤡᤏᤡ᤹ ᤁᤧᤖᤧᤰ ᤏᤢ ᤛᤠ᤺ᤱᤃᤥ ᤛᤰᤔᤠ᤺ᤸᤗᤧ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶ᤹.

³ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠ ᤕᤧᤴᤏᤡᤴ ᤁᤧᤏᤢ᤺ᤰᤋᤡ ᤁᤧᤒᤡᤖᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡ᤹. ᤂᤶᤓᤩᤠᤱ ᤀᤠᤳᤋᤡᤴ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤁᤧᤈᤥᤃᤡᤀᤠᤱ ᤘᤕᤧ. ᤂᤧᤱᤜᤠ᤹ᤗᤠᤶ ᤂᤡᤏᤡ᤹ ᤁᤧᤓᤢᤰᤂᤡ ᤁᤧᤍᤠᤖᤡ᤹॥

⁴ ᤂᤡᤏᤡ᤹ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤁᤧᤶᤗ᤺ᤳᤋᤡ ᤁᤧᤶᤍᤣᤛᤡᤀᤠᤱ ᤋᤠᤱᤛᤠᤱᤒᤠᤸᤗᤧ ᤁᤢᤛᤡᤱᤃᤠᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤔᤠ᤺ᤱᤄᤠᤒᤠ ᤗᤠᤈᤣ᤹ᤀᤥ ᤁᤧᤘᤕᤡᤛᤠᤱ ᤂᤧᤵᤔᤥᤗᤠᤶ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤓᤢᤰᤂᤡ᤹. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤡᤏᤡ᤹ ᤁᤧᤏᤢ᤺ᤰᤋᤡ ᤁᤧᤍᤠᤖᤡ᤹॥

⁵ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤕᤢᤰᤋᤢᤒᤠ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤍᤠᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤴ ᤁᤧᤕᤢᤰᤋᤢᤶ᤹. ᤂᤧᤒᤩᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤁᤧᤏᤢ᤹ᤒᤠ ᤁᤧᤍᤠᤒᤠ ᤏᤢ ᤏᤡ᤺ᤵᤔᤧᤴᤍᤧᤳᤋᤣ ᤕᤖᤡᤰ ᤁᤧᤈᤥᤃᤡ᤹॥

⁶ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤁᤧᤖᤧᤰ ᤛᤠ᤺ᤱᤃᤥ ᤛᤰᤔᤠ᤺ᤸᤗᤧ ᤔᤡ᤺ᤶᤈᤡ ᤁᤧᤔᤧᤳᤋᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤜᤷᤍᤥ ᤜᤧᤃᤢ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤱᤔᤠ ᤁᤧᤛᤢᤰᤋᤡᤖ॥

⁷ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤂᤡᤏᤡ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠ ᤏᤢ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ᤀᤥ ᤌᤠᤖ ᤕᤠ᤺ᤴᤍᤢ᤹॥

⁸ ᤂᤡᤏᤡ᤹ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤍᤧᤴᤍᤡ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤂᤢᤏᤧ᤹ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶ᤹॥

⁹ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤐᤠ᤺ᤴᤏᤥ ᤁᤧᤏᤢᤖᤡ ᤁᤧᤍᤠᤛᤡᤖ ᤆᤥᤃᤢ᤹॥ ᤂᤢᤏᤧ᤹ ᤕᤖᤡᤰ ᤜᤡᤴᤈᤠ᤹ᤒᤡᤳᤇᤠ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤠᤜᤠ᤹ ᤁᤧᤒᤡᤖᤡ᤹. ᤂᤡᤏᤡ᤹ ᤀᤡᤰᤋᤠᤵᤜᤠ᤹ᤀᤥ ᤕᤖᤡᤰ ᤁᤢᤈᤠ ᤁᤧᤎᤥ᤺ᤰᤐᤠ ᤐᤥᤱᤗ ᤕᤠ᤺ᤴᤍᤢ ᤁᤧᤒᤡᤖᤡ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤏᤢ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤕᤠᤶᤔᤥ ᤂᤡᤏᤡ᤹ᤏᤢ ᤁᤢᤏᤡᤱᤘᤠ᤹ ᤋᤠᤖᤥ॥

¹⁰ ᤛᤠᤶᤕᤥᤌᤡᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤀᤡᤱᤈᤠᤱᤜᤠ᤹. ᤌᤡᤶᤜᤠ᤹ ᤏᤢ ᤂᤢᤏᤧ᤹ ᤁᤢᤀᤡᤰᤗᤠᤴ ᤁᤧᤄᤧᤵᤛᤢᤶᤔᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤡᤰᤗᤢᤱᤔᤠ᤹ ᤏᤢ ᤛᤰᤔᤠ ᤛᤠᤶᤔᤡᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤁᤧᤏᤢ᤺ᤰᤂᤡᤏᤧᤓᤃᤪ. ᤂᤡᤏᤡ᤹ᤏᤢ ᤁᤢᤏᤡᤱᤘᤠ᤹ ᤋᤠᤖᤥ॥

ᤜᤡᤱᤔᤧᤴ ᤏᤢ ᤛᤡᤔᤧᤴ ᤛᤣ᤺ᤰᤔᤠ

¹¹ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤀᤡᤱᤈᤠᤱᤅᤡᤴ ᤂᤡᤏᤡ᤹ ᤗᤠᤃᤡ ᤛᤠ᤹ᤖᤡᤰ ᤐᤛᤠᤰᤁᤧᤛᤠᤰᤐᤠ ᤀᤡᤃᤪ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤇᤢᤰᤋᤢᤶᤔᤡᤴᤒᤠ ᤔᤧᤈᤥᤰᤏᤧᤴ॥

¹² ᤌᤣᤀᤠᤱᤓᤧᤸᤗᤧ ᤂᤧᤱᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤜᤥᤵ. ᤂᤡᤏᤡ᤹ ᤀᤰᤂᤣ ᤗ᤹ᤔᤠ ᤔᤧᤒᤥᤱᤏᤧᤴ. “ᤀᤠᤏᤡ᤹ ᤗᤠᤃᤡ ᤜᤠᤳ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤌᤥ᤺ᤰᤛᤡᤱ ᤐᤣ᤺ᤰᤁᤠᤱ ᤂᤧᤴ ᤕᤢᤖᤢ ᤀᤠᤒᤡᤒᤣ ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤔᤧᤳᤋᤠᤱ ᤂᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠᤒᤣ᥅”

¹³ ᤂᤧᤴ ᤘᤖ᤺ᤱᤅᤡᤸᤗᤧ ᤏᤠᤛᤔᤠ ᤁᤢᤕᤠᤀᤥᤀᤠᤱ ᤜᤥᤵ. ᤂᤡᤏᤡ᤹ ᤀᤰᤂᤣ ᤗ᤹ᤔᤠ ᤔᤧᤒᤥᤱᤏᤧᤴ. “ᤜᤠᤳ ᤘᤖ᤺ᤱ ᤏᤠᤎᤠ᤺ᤶᤒᤡ ᤐᤣ᤺ᤰᤐᤠᤒᤣ ᤜᤧᤰᤁᤩᤠᤱ ᤂᤧᤴ ᤑᤧᤳᤋᤢᤀᤠᤱ ᤀᤠᤏᤡ᤹ ᤀᤠᤔᤧᤳᤋᤠᤱ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤒᤠᤒᤣ᥅”

¹⁴ ᤁᤖ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤐᤠ᤺ᤴᤈᤠ᤺ᤰᤁᤡᤴ ᤂᤡᤏᤡ᤹ ᤏᤡ᤺ᤳᤋᤠᤱᤅᤣ ᤘᤠ᤹. ᤂᤡᤏᤡ᤹ ᤀᤠᤵᤑᤣᤰ ᤔᤢᤖᤠᤀᤥ ᤏᤢ ᤂᤡᤏᤡ᤹ ᤛᤡᤰᤗᤢᤱᤔᤥᤀᤣ ᤘᤠ᤹॥

¹⁵ ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤀᤠᤀᤡᤴ ᤜᤡᤱᤔᤧᤴ ᤏᤢ ᤏᤢ᤹ᤔᤠ ᤋᤠᤔᤧᤴ ᤜᤧᤰᤁᤩᤠᤱ ᤔᤧᤰᤔᤠ ᤏᤢ ᤛᤡᤔᤧᤴ ᤛᤣ᤺ᤰᤔᤠ ᤂᤡᤏᤡ᤹ ᤐᤡᤏᤡᤱ᤹॥

¹⁶ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ. ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤄᤣ᤺ᤰᤔᤠ. ᤂᤢᤏᤧ᤹ ᤁᤢᤀᤡᤱᤈᤠᤱ. ᤁᤢᤎᤡᤶ ᤏᤢ ᤛᤠᤶᤕᤥᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤗ ᤐᤳᤋᤠ॥ ᤜᤧᤰᤁᤩᤠᤱᤗᤰ ᤂᤡᤏᤡ᤹ ᤁᤧᤜᤡᤅᤡ᤹. ᤂᤡᤏᤡ᤹ ᤁᤧᤒᤥ᤺ᤴᤍᤡ ᤁᤧᤎᤧ᤹ᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹॥

¹⁷ ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤋᤠᤰᤁᤴᤏᤠᤱ ᤂᤡᤏᤡ᤹ ᤀᤠᤎᤡᤱᤃᤠᤏᤡ ᤁᤧᤒᤥ᤺ᤰᤂᤡ᤹ ᤜᤧᤰᤁᤩᤠᤱ ᤘᤣ᤹ ᤛᤠᤶᤔᤠᤱᤜᤠ᤹ ᤗᤧᤵᤔᤠᤱ ᤂᤡᤏᤡ᤹ ᤏᤡᤱᤘᤠ᤹ ᤀᤡᤃᤣ᤺ᤰ ᤗ᤹ᤀᤠᤱ ᤂᤧᤱᤜᤠ᤹ ᤛᤧᤘᤠ ᤔᤧᤵᤔᤠᤛᤡ ᤏᤢ ᤛᤠᤒᤴ ᤜᤰᤐᤧᤳᤋᤠᤱ ᤔᤠᤱᤛᤧᤘᤠ ᤔᤧᤵᤔᤠ ᤁᤧᤜᤣ᤺ᤰᤋᤢᤶᤛᤡᤶᤏᤧᤓᤃᤪ.

¹⁸ ᤂᤡᤏᤡ᤹ ᤛᤧᤰᤂᤠᤀᤣ ᤕᤢᤔᤪᤧᤰ ᤁᤧᤔᤧᤃᤡ᤹ ᤑᤠ᤹ᤀᤠᤱ ᤀᤠᤀᤡᤴ ᤀᤢᤘᤠ ᤆᤥᤃᤢᤱ᤹. ᤜᤧᤰᤁᤩᤠᤱ ᤕᤷᤍᤏ ᤏᤠᤎᤠ᤺ᤶᤒᤡ ᤂᤡᤏᤡ᤹ ᤕᤢᤰᤔᤠᤖᤧ ᤗᤠᤃᤡ ᤐᤣ᤺ᤰᤔᤠ ᤁᤧᤈᤥᤃᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤕᤖᤡᤰ ᤕᤧᤴ ᤁᤧᤴᤜᤡᤅᤡᤴ᤹॥

¹⁹ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤋᤃᤡ ᤜᤡᤱᤔᤧᤴ ᤏᤢ ᤛᤡᤔᤧᤴ. ᤔᤢ᤹ᤀᤡᤛᤠᤶᤔᤡᤴ ᤏᤢ ᤔᤠᤱᤍᤣ ᤛᤠᤱᤃᤪᤠ᤺ᤴ ᤂᤡᤏᤡ᤹ ᤋᤃᤡ ᤏᤧᤛ᤻ᤛᤢᤱᤅᤠᤱ ᤏᤧᤖᤥ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤁᤧᤏᤡᤒᤠ ᤋᤥ᤺ᤴᤍᤡ ᤕᤧᤵᤛᤢᤱᤛᤡᤱ᤹॥ ᤀᤠᤸᤗ ᤜᤡᤱᤔᤧᤴᤏᤣ ᤂᤡᤏᤡ᤹ ᤛᤣᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤜᤡᤱᤔᤠ ᤛᤢᤰᤋᤧᤶᤔᤧ᤹.

²⁰ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤳᤋᤧᤶᤔᤧ᤹ᤖ. ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤂᤧᤒᤩᤠᤱ ᤂᤢᤏᤧ᤹ᤀᤥ ᤂᤡᤶᤔᤠᤛᤡᤶᤔᤡᤴᤏᤧ᤹ᤀᤠᤱ ᤜᤡᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴᤏᤣ ᤂᤡᤏᤡ᤹ ᤜᤡᤱᤔᤠᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤂᤶᤓᤩᤠᤱ ᤕᤠᤁᤢᤒᤧᤴᤏᤢ ᤂᤢᤏᤧ᤹ ᤐᤡᤏᤡᤱ ᤔᤧᤳᤋᤢᤛᤡᤀᤠᤱ ᤔᤠᤱᤜᤧᤰᤛᤡᤱᤒᤠ ᤗᤠᤈᤣ᤹ᤀᤥ ᤂᤢᤏᤧ᤹ ᤂᤡᤏᤡ᤹ ᤌᤠ᤺ᤰ ᤁᤧᤈᤠ᤹ᤒᤠ ᤁᤧᤈᤥᤃᤡᤖᤥ॥