ᤛᤠᤶᤕᤥᤌᤡᤶ ᤀᤡᤱ 3 - LIFOTNTᤀᤡᤛᤪᤠᤀᤡᤗᤖᤧ ᤀᤥᤃ ᤜᤠᤱᤅᤡᤴ ᤏᤠ᤺ᤴᤍᤢ ( ᤂᤠᤏᤡ᤺ᤳ ᥈᥇:᥉᥇-᥉᥋ ) 1 ᤂᤧᤴ ᤀᤣᤃᤠᤱ ᤒᤠᤛᤠᤏ ᤗᤧᤵᤔᤠᤱ ᤌᤠᤀᤠᤍᤡᤃᤧ॥ ᤒᤠᤛᤠᤏᤒᤠ ᤜᤠᤱ ᤀᤥᤃᤧᤴ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤑᤧᤳᤋᤢᤛᤡᤀᤠᤱ ᤀᤠᤏᤡᤃᤧᤏᤢ ᤋᤧᤴᤎᤱ ᤆᤥ᤺ᤰᤛᤧ ᤀᤣᤍᤪᤀᤡᤀᤥ ᤁᤧᤖᤧᤓᤧᤖᤧ॥ 2 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤂᤧᤏᤧ᤹ ᤂᤧᤴᤏᤢ ᤔᤧᤃᤡᤛᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ. ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤂᤢᤏᤧ᤹ ᤁᤢᤗᤠᤈᤣ᤺ᤴᤏᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤐᤡᤏᤧᤀᤠᤱ ᤘᤠ᤹॥ ᤜᤣᤛ᤻ᤒᤥᤏᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤛᤡᤜᤥᤏᤧᤴ. ᤂᤧᤏᤧ᤹ ᤀᤠᤰᤂᤣ ᤁᤧᤔᤧᤳᤋᤢ ᤂᤧᤴᤏᤠᤱ ᤜᤠᤒᤠ ᤜᤧᤰᤁᤣᤀᤣ ᤔᤧᤳᤋᤧ᤹॥” 3 ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠᤛᤠᤏᤒᤠ ᤜᤠᤱ ᤀᤥᤃᤧᤴ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤀᤠᤏᤡᤃᤣ ᤜᤢᤰᤁᤥ ᤌᤠᤛᤢᤛᤡ॥ ᤀᤠᤏᤡᤃᤣ ᤗᤳᤇᤠᤀᤠᤱ ᤔᤧᤸᤗᤧᤳᤋᤣ ᤂᤰᤐᤧᤳ ᤛᤧᤖᤢᤶᤛᤡᤶᤒᤧ॥ 4 ᤜᤠᤒᤠ ᤂᤧᤴ ᤕᤧᤶᤔᤥ ᤀᤠᤏᤡᤃᤣ ᤗᤳᤇᤠᤀᤠᤱ ᤔᤧᤸᤗᤧᤳᤋᤣ ᤂᤢᤏᤧ᤹ ᤋᤢᤰᤐᤥᤱ ᤁᤢᤕᤧᤰᤕᤰᤜᤠ᤹ ᤀᤠᤏᤡᤃᤣ ᤜᤢᤰᤁᤠᤵ ᤆᤥᤃᤢᤶᤒᤧ. ᤒᤠᤛᤠᤏᤒᤠ ᤀᤥᤃ ᤜᤠᤱᤅᤡᤸᤗᤧ ᤁᤢᤜᤠᤱᤈᤢᤶ ᤀᤷᤃᤥᤒᤒᤠ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤠᤱ ᤜᤢᤰᤁᤠᤵ ᤆᤥᤃᤢᤶᤒᤧ॥ 5 ᤁᤴ ᤁᤧᤖᤧᤰ ᤕᤧᤰᤕᤰᤜᤠ᤹ ᤁᤣ᤺ᤶᤒ ᤁᤣ᤺ᤶᤒᤠ ᤗᤢᤱᤎᤠᤰᤜᤠ᤹ᤖᤧ ᤁᤒᤢᤒᤠ. ᤁᤢᤀᤧᤵᤔᤠ ᤏᤢ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤁᤧᤕᤧᤵᤐᤠ ᤆᤥᤃᤧ॥ ᤁᤴᤏᤢ᤺ᤸᤗᤧ ᤘᤣ᤹ ᤗᤢᤱᤎᤠᤰ ᤔᤧᤴᤕᤧᤵᤔᤏᤠᤒᤠ ᤕᤖᤡᤰ ᤐᤠᤱᤓᤣ᤹ᤜᤠ᤹ᤀᤠᤱ ᤏᤧᤛ᤻ᤛᤧ॥ 6 ᤜᤣᤛ᤻ᤒᤥᤏᤒᤠ ᤜᤠᤱ ᤛᤡᤜᤥᤏᤧᤴ ᤔᤧᤵᤔᤏᤠᤒᤠ ᤜᤧᤰᤁᤣᤀᤣ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤕᤧᤰᤕᤰᤜᤠ᤹. ᤕᤧᤶᤒᤡᤳᤇᤠᤜᤠ᤹. ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤂᤰᤐᤧᤳ ᤀᤠᤏᤡᤃᤣ ᤔᤧᤰᤂᤢᤶᤛᤡᤶᤒᤧ॥ 7 ᤁᤖ ᤁᤧᤖᤧᤰ ᤐᤡᤳᤌᤰᤛᤠᤜᤠ᤹ ᤏᤢ ᤕᤧᤰᤕᤰᤁᤥᤒᤠ ᤆᤡᤃᤰᤘᤠ ᤕᤠᤱᤛᤠᤁᤢᤴᤎᤣᤜᤠ᤹ ᤀᤠᤏᤡᤃᤣ ᤏᤠ᤺ᤶᤔᤏᤠᤒᤠ ᤕᤠᤱᤛᤠᤁᤢᤴᤎᤣ ᤁᤢᤀᤡᤛᤡᤰ ᤀᤠᤒᤠᤅᤣ ᤗᤠᤃᤡ ᤋᤣ᤹ᤖᤢᤶᤒᤧ॥ 8 ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤶᤔᤥ ᤁᤴ ᤏᤧᤳᤇᤡ ᤀᤣᤔᤥᤖᤡ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤷᤏᤥᤏ ᤘᤜ᤺ᤱᤅᤥᤏᤢ ᤜᤣᤷᤔᤥᤏ ᤁᤥ᤺ᤰᤔᤠ ᤌᤠᤖᤡᤰ ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱᤒᤠ ᤗᤠᤈᤣᤴ ᤀᤠᤏᤡᤃᤣ ᤜᤢᤰᤁᤠᤵ ᤆᤥᤃᤢᤶᤒᤧ॥ 9 (ᤜᤣᤷᤔᤥᤏᤧᤴ ᤛᤡᤍᤥᤏᤡᤜᤠ᤹ᤖᤧ ᤛᤡᤖᤡᤀᤥᤏ ᤏᤢ ᤀᤣᤔᤥᤖᤡᤜᤠ᤹ᤖᤧ ᤛᤣᤏᤡᤖ ᤔᤧᤔᤧᤳᤋᤢ॥) 10 ᤋᤧᤸᤗᤰᤁᤥ ᤁᤧᤖᤧᤰ ᤕᤧᤰᤕᤰᤜᤠ᤹ ᤏᤢ ᤁᤧᤖᤧᤰ ᤃᤡᤗᤠᤍᤧᤴ ᤏᤢ ᤁᤧᤖᤧᤰ ᤒᤠᤛᤠᤏᤧᤴ ᤏᤢ ᤒᤠᤛᤠᤏᤀᤥ ᤁᤧᤏᤧᤒᤠ ᤀᤥᤃᤖᤧ ᤁᤢᤜᤠᤱᤈᤢᤶᤔᤥᤒᤠ ᤛᤗᤁᤠ ᤏᤢ ᤀᤣᤍᤪᤀᤡ ᤕᤧᤰᤕᤰᤜᤠ᤹ ᤌᤠᤖᤡᤰᤁᤠᤱ ᤀᤠᤏᤡᤃᤣ ᤜᤢᤰᤁᤠᤵ ᤆᤥᤃᤢᤶᤒᤧ॥ 11 (ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤖᤐᤠᤀᤡᤜᤠ᤹ᤀᤥ ᤒᤠᤛᤠᤏᤒᤠ ᤀᤥᤃ ᤜᤠᤱᤅᤡᤴ ᤘᤕᤧ॥ ᤂᤢᤏᤧ᤹ ᤁᤢᤏᤧᤳᤏᤠ ᤀᤠ᤺ᤴᤎᤠᤴ ᤑᤧᤴᤈᤣ᤺ᤸᤗᤧᤴ ᤏᤧᤛ᤻ᤛᤧ॥ ᤁᤴ ᤀᤠ᤺ᤴᤎᤠᤴ ᤀᤠᤀᤡᤴ ᤌᤠᤖᤡᤰᤛᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰ ᤖᤒ᤻ᤒᤠᤀᤥ ᤏᤧᤖᤥ॥ ᤜᤢᤰᤁᤡᤸᤗᤧ ᤛᤡ᤺ᤰᤔᤧᤸᤗᤧ ᤁᤴ ᤜᤢᤰᤛᤡᤰ ᤑᤠᤱᤛᤡ ᤁᤢᤗᤠᤶᤋᤡ ᤏᤢ ᤜᤢᤰᤛᤡᤰ ᤗᤡᤛᤡ ᤁᤢᤓᤧᤖᤧᤒᤠ ᤆᤥᤃᤧᤖᤥ॥) ᤕᤷᤍᤏ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤗᤠᤈᤣ᤹ᤜᤠ᤹ ᤔᤧᤓ᤺ᤰᤂᤢ ( ᤂᤠᤏᤡ᤺ᤳ ᥉᥈:᥇-᥊᥈ ) 12 ᤂᤧᤴ ᤕᤧᤶᤔᤥ ᤂᤧᤴ ᤗᤠᤈᤣᤴ ᤀᤠᤏᤡᤃᤣ ᤕᤢᤰᤁᤥ ᤋᤠᤖᤢᤶᤒᤧᤸᤗᤧ. ᤀᤷᤏᤥᤏ ᤘᤜ᤺ᤱᤅᤥᤒᤠ ᤀᤖᤥᤀᤣᤖᤗᤠᤶ ᤌᤠᤱᤃᤧᤳ ᤐᤡᤛᤠᤱᤒᤠ ᤋᤧᤱᤃᤵᤐᤡᤴ ᤏᤢ ᤃᤡᤗᤠᤍᤒᤠ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤺ᤸᤗᤧ ᤁᤢᤓᤪᤧ᤺ᤰ. ᤂᤧᤵᤔᤥᤒᤠ ᤕᤧᤰᤕᤰᤜᤠ᤹ᤀᤠᤱ ᤀᤠᤱᤃᤠ᤹ ᤖᤢᤒᤣᤏᤡᤜᤠ᤹ ᤏᤢ ᤃᤠᤍᤡᤜᤠ᤹ ᤐᤡᤖᤢᤱᤛᤡᤱ॥ 13 ᤃᤡᤗᤠᤍ ᤗᤠᤈᤣ᤹ᤀᤥᤒᤠ ᤁᤧᤏᤶᤒᤠ ᤗᤰᤁᤡᤴ ᤏᤢ ᤀᤥᤃᤖᤧ ᤁᤢᤜᤠᤱᤈᤢᤶᤒᤠ ᤁᤧᤖᤧᤰ ᤒᤠᤛᤠᤏᤧᤴ ᤀᤠᤱᤃᤠ᤹ ᤔᤏᤛ᤻ᤛᤣ᤺ᤸᤗᤧ ᤁᤢᤓᤪᤧ᤺ᤰ ᤁᤢᤎᤠ᤺ᤰᤜᤠ᤹ ᤐᤡᤖᤢᤱᤛᤡᤱ॥ (ᤒᤠᤛᤠᤏᤀᤥ ᤁᤧᤏᤧᤒᤠ ᤀᤷᤃᤥᤒᤒᤠ ᤁᤧᤖᤧᤰ ᤋᤧᤱᤃᤵᤜᤠ᤹ ᤖᤐᤠᤀᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ ᤔᤧᤔᤧᤳᤋᤢᤀᤠᤱ ᤏᤧᤛ᤻ᤛᤧ॥ 14 ᤔᤏᤛ᤻ᤛᤣᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤕᤠᤀᤡᤖᤖᤧ ᤃᤛᤢᤖᤡ ᤏᤢ ᤔᤠᤁᤠᤋᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤀᤥ ᤌᤠᤖᤡᤰ ᤀᤷᤃᤥᤒᤒᤠ ᤁᤧᤖᤧᤰ ᤋᤧᤱᤃᤵᤜᤠ᤹ ᤔᤧᤳᤇᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤵᤑᤣᤰ ᤁᤢᤔᤡᤱᤗᤠᤶ ᤔᤡᤱ ᤘᤠ᤺ᤳᤋᤢ॥ ᤁᤸᤗᤧᤆᤥᤃᤢᤸᤗᤧ ᤀᤠᤀᤡᤴ ᤌᤠᤖᤡᤰᤛᤠᤱ ᤒᤠᤛᤠᤏᤧᤴ ᤜᤒ᤻ᤒᤠᤋ ᤕᤠᤀᤡᤖ ᤔᤧᤔᤧᤳᤋᤢ॥) 15 ᤜᤧᤰᤁᤩᤠᤱ ᤃᤡᤗᤠᤍᤧᤴ ᤀᤠᤱᤃᤠ᤹ ᤔᤠᤁᤡᤖᤧᤴ ᤐᤡᤖᤢᤱ॥ 16 ᤁᤖ ᤃᤡᤗᤠᤍᤗᤠᤶ ᤀᤷᤏᤥᤏ ᤜ᤺ᤱᤃᤢ᤺ᤸᤗᤧ ᤁᤢᤗᤢᤶᤔᤥ ᤌᤠᤖᤡᤰ ᤏᤢ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥ. ᤕᤒ᤻ᤒᤥᤁ ᤘᤜ᤺ᤱ ᤌᤠᤖᤡᤰ ᤆᤡᤓᤡ᤹ᤑᤡ᤹ᤒᤠ ᤏᤧᤏᤧᤒᤠᤍᤧᤴᤏᤡᤴ ᤀᤠᤱᤃᤠ᤹ ᤖᤢᤒᤣᤏᤡᤜᤠ᤹ ᤏᤢ ᤃᤠᤍᤡᤜᤠ᤹ ᤐᤡᤖᤢᤱᤛᤡᤱ॥ 17 ᤂᤧᤸᤗᤧ ᤏᤠᤶᤎᤠ ᤐᤡᤛᤠᤱᤒᤠ ᤀᤡ᤺ᤴᤍᤥᤴ ᤕᤷᤍᤏ ᤏᤧᤏᤧᤒᤠᤍᤧᤴ. ᤃᤠᤗᤡᤗ ᤘᤖ᤺ᤱᤅᤥᤗᤠᤶ ᤐᤡᤛᤃᤠᤒᤠ ᤕᤠᤰᤁᤣ᤺ᤰᤁᤡᤸᤗᤧ ᤁᤢᤛᤡᤃᤠᤱ ᤁᤧᤏᤧᤒᤠ ᤀᤖᤠᤒᤠᤒᤠ ᤘᤖ᤺ᤱ. ᤂᤧᤴ ᤕᤢᤶᤗᤠ᤺ᤰᤂᤠᤱ ᤘᤖ᤺ᤱᤅᤠᤱ ᤔᤧᤔᤧᤳᤋᤢ॥ 18 ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤂᤧᤴ ᤛᤢᤘᤠᤱᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱᤅᤠᤱ ᤀᤡᤱᤈᤠᤱ ᤐᤡᤖᤢᤱᤛᤡᤱ. “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤗᤠᤈᤣᤴ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤏᤧᤖᤥ॥ ᤜᤧᤰᤁᤣᤛᤠᤱ ᤂᤡᤏᤡ᤹ᤀᤥᤗᤠᤶ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤑᤧᤈᤢᤶᤓᤧᤕᤠ ᤜᤣ᤹ᤛᤡᤱᤔᤠᤀᤠᤱ ᤂᤡᤏᤡ᤹ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ᤜᤠ᤹ ᤑᤠ᤹ᤔᤠᤛᤡᤖᤧ ᤗᤠᤃᤡ ᤂᤢᤴᤇᤡ᤹ ᤋᤃᤡ ᤐᤣ᤺ᤰᤔᤠ ᤐᤥᤱ᤹॥ 19 ᤂᤡᤏᤡ᤹ ᤔᤣ᤺ᤳᤜᤠ᤹. ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤏᤢ ᤛᤠ᤹ᤖᤡᤰ ᤕᤖᤡᤰ ᤌᤰᤛᤠᤜᤠ᤹ᤃ ᤀᤠᤱᤃᤠ᤹ ᤐᤡᤏᤡᤱᤒᤠ ᤕᤧᤰᤕᤰᤜᤠ᤹ᤀᤥ ᤔᤧᤘᤠ᤹ ᤔᤧᤕᤠ᤺ᤰ॥ 20 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤜᤧᤰᤁᤣᤀᤣ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤏᤠ᤺ᤶᤛᤡᤱᤔᤠ ᤔᤧᤶᤒᤡᤛᤣ ᤌᤠᤖᤡᤰ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤷᤍᤏ ᤏᤠᤶᤎᤠ ᤐᤡᤛᤠᤱ ᤐᤡᤖᤢᤛᤡᤒᤠ ᤗᤠᤈᤣᤴ ᤂᤧᤱᤜᤠ᤹ᤖᤧ ᤕᤢᤰ ᤔᤧᤴᤈᤥ᤺ᤰᤁᤣ ᤌᤠᤖᤡᤰ. ᤂᤡᤏᤡ᤹ ᤀᤰᤂᤣ ᤆᤥᤃᤧᤶᤔᤧ᤹॥ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤂᤡᤏᤡ᤹ ᤕᤢᤰᤁᤥ ᤐᤡᤏᤡᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤖᤧᤰ ᤏᤢ᤺ᤱᤔᤠᤓᤧᤶᤔᤠ ᤁᤧᤛᤢᤰᤋᤡ᤹॥” 21 ᤀᤠᤱᤃᤠ᤹ ᤂᤧᤴ ᤕᤧᤶᤔᤥ ᤕᤜᤥᤛᤢᤴ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤱ. “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤏᤧᤵᤑᤢ ᤜᤠᤱᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡᤀᤠᤱ ᤘᤕᤧ ᤂᤧᤱᤜᤠ᤹ ᤁᤧᤖᤧᤰ ᤂᤡᤏᤡ᤹ ᤀᤠᤒᤠᤅᤣ ᤔᤡᤰᤁᤡᤸᤗᤧ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹॥ ᤀᤠᤸᤗ ᤂᤡᤏᤡ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤒᤣᤃᤡᤸᤗᤧ ᤂᤧᤴ ᤁᤧᤖᤧᤰ ᤜᤠᤱᤈᤢᤶᤜᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤧᤰᤁᤣᤀᤣ ᤔᤧᤳᤋᤢᤛᤡ᤹॥ 22 ᤂᤧᤱᤜᤠ᤹ᤏᤢ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤗᤠᤃᤡ ᤌᤰᤗᤥ॥” ᤔᤥᤛᤠᤴ ᤁᤏᤠᤏ ᤗᤠᤈᤣ᤹ᤀᤥ ᤗᤠ᤺ᤵᤔᤠ ᤔᤧᤄᤥᤏᤧᤴ 23 ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤁᤶᤓᤗ᤹ᤖᤡᤰ ᤐᤣᤗᤡ ᤑᤠᤰᤋᤢᤱ. 24 “ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤀᤠᤵᤑᤣᤰ ᤁᤧᤛᤧᤘᤠᤖᤥᤒᤧᤴ ᤂᤧᤏᤧ᤹ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤁᤧᤈᤥ᤺ᤰᤐᤠ ᤏᤢ ᤁᤧᤔᤢᤰᤛᤠᤶᤔᤡᤴ ᤀᤥ᤺ᤴᤎᤠᤰᤔᤠ ᤁᤧᤀᤡ᤺ᤳᤋᤢᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤧᤏᤧ᤹ ᤁᤧᤈᤥᤃᤢᤒᤠ ᤜᤧᤰᤋᤱᤒᤠ ᤕᤠ᤺ᤶᤒᤰ ᤏᤢ ᤜᤠᤱᤘᤠ ᤔᤠᤱᤘᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤛᤢᤰᤐᤠ ᤜᤠᤳ ᤘᤠ᤹ᤒᤣ᥅ 25 ᤀᤠᤱᤃᤠ᤹ ᤏᤠᤎᤠ᤺ᤶᤒᤡ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹. ᤜᤧᤰᤁᤩᤠᤱ ᤕᤷᤍᤏ ᤏᤠᤎᤠ᤺ᤶᤒᤡᤒᤠ ᤂᤧᤴ ᤏᤢᤒᤠ ᤗᤠᤈᤣᤴ. ᤂᤧᤴ ᤏᤢᤒᤠ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣᤴ ᤏᤢ ᤗᤧᤒᤏᤠᤏᤧᤴ ᤀᤠᤱᤃᤠ᤹ ᤏᤡᤔᤠ ᤂᤥᤛᤢᤱᤗ॥” 26 ᤁᤖ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤏᤢ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤢᤏᤧ᤹ ᤔᤧᤄᤧᤵᤛᤢᤴ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤠ᤺ᤰᤋᤢ. ᤀᤠᤸᤗ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ᤏᤢ ᤘᤣ᤹ ᤐᤠᤴ ᤔᤧᤒᤠ᤺ᤳᤋᤧᤴᤏᤧ᤹॥ 27 ᤐᤡᤛᤃᤠ᤺ᤸᤗᤧ ᤁᤢᤈᤱᤅᤥ ᤌᤥ᤺ᤰᤛᤡᤱᤅᤧ ᤐᤣᤃᤧ᤹. ᤜᤧᤰᤁᤩᤠᤱ ᤏᤠᤶᤃᤧᤴ ᤏᤠᤶᤎᤠ. ᤌᤠᤱᤃᤧᤳ. ᤗᤠᤱᤃᤧᤳ. ᤁᤧᤖᤧᤰ ᤐᤡᤛᤠᤱ ᤀᤥᤔᤢᤕᤧ᤹॥ ᤀᤠᤵᤑᤣᤰ ᤁᤧᤔᤡᤰᤁᤡᤸᤗᤧ ᤂᤧᤴ ᤗᤠᤈᤣᤴ ᤀᤥᤔᤧᤳᤋᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤕᤷᤍᤏᤧᤴ ᤂᤧᤏᤧ᤹ ᤁᤠ᤺ᤰᤔᤠ ᤁᤧᤱᤄᤥᤛᤢᤴ᤹॥ 28 ᤐᤖᤢᤔᤠᤸᤗᤧ ᤂᤧᤏᤧ᤹ ᤕᤜᤥᤛᤢᤴ ᤀᤡᤱᤈᤠᤱ ᤐᤡᤖᤧ᤹. ᤂᤧᤒᤩᤠᤱ ᤀᤠ᤺ᤴᤇᤡᤱᤔᤠ ᤐᤡᤖᤧ᤹ᤀᤠᤱ ᤜᤠᤱᤜᤠᤱ ᤁᤧᤗ᤹ᤒᤠ ᤆᤥᤃᤧ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤀᤣ ᤁᤴ ᤔᤏᤠᤜᤠ᤹ ᤏᤠᤎᤠ᤺ᤶᤒᤡ ᤋᤣ᤹ᤖᤢᤛᤡ ᤜᤧᤰᤁᤩᤠᤱ ᤂᤧᤏᤧ᤹ ᤏᤡᤔᤠ ᤁᤧᤈᤥᤃᤢᤒᤠ ᤂᤧᤴ ᤗᤠᤈᤣᤴ ᤂᤧᤱᤜᤠ᤹ ᤕᤢᤰ ᤆᤥ᤺ᤰᤔᤠ ᤐᤠᤱᤄᤢᤛᤡ᤹॥” 29 ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤒᤣᤌ-ᤐᤥᤖᤖᤧ ᤁᤢᤒᤣᤛᤠᤱᤒᤠ ᤏᤧᤏᤧᤒᤠᤍᤧᤴᤏᤥ ᤕᤢᤅᤡᤃᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.