ᤛᤠᤶᤕᤥᤌᤡᤶ ᤀᤡᤱ 29 - LIFOTNTᤔᤥᤀᤠᤒ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵ 1 ᤜᤥᤖᤣᤒ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴᤏᤢ᤺ᤸᤗᤧ ᤘᤣ᤹ ᤔᤥᤀᤠᤒ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤔᤠᤱᤜᤢᤵᤐᤡᤸᤗᤧᤴ ᤐᤠ᤺ᤴᤍᤠᤱᤜᤠ᤹ ᤀᤠᤶᤓᤠ ᤁᤴᤜᤠ᤹ᤀᤣᤖᤥ॥ 2 ᤔᤥᤛᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ— ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪ ᤗᤠᤈᤣ᤹ᤀᤥ ᤑᤠᤖᤥᤴ. ᤂᤢᤏᤧ᤹ ᤁᤧᤖᤧᤰ ᤁᤢᤕᤢᤰᤛᤠᤒᤠᤜᤠ᤹ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤈᤣ᤹ᤀᤥ ᤂᤡᤏᤡ᤹ᤀᤣ ᤋᤃᤡ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹॥ 3 ᤕᤶᤒᤕᤶᤒᤠ ᤋᤢᤰᤂᤣ ᤗᤠᤰᤂᤣᤜᤠ᤹. ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤏᤢ ᤂᤧᤴ ᤏᤧᤜᤡᤖᤧ ᤔᤧᤴᤎᤠᤵᤔᤏᤠᤒᤠ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤀᤠᤵᤑᤣᤰ ᤂᤡᤏᤡ᤹ ᤔᤡᤰᤁᤡᤸᤗᤧ ᤁᤧᤏᤡᤛᤢᤶ॥ 4 ᤁᤖ ᤀᤠᤀᤡᤴ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹. ᤏᤡᤔᤠ ᤔᤡᤰ ᤏᤢ ᤂᤧᤶᤔᤠ ᤏᤧᤓᤠᤰ ᤔᤧᤶᤒᤡᤀᤣ ᤁᤧᤃᤳᤋᤡ᤹॥ 5 ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤡᤏᤡ᤹ ᤗᤠᤶᤗᤥᤏᤡᤱ ᤑᤧᤳᤏᤡᤱᤅᤡᤸᤗᤧ ᤂᤡᤏᤡ᤹ ᤌᤰᤁᤥ ᤁᤧᤈᤠᤰᤂᤢᤶᤒᤠ ᤆᤠᤱᤜᤠ᤹ ᤁᤢᤍᤪᤧᤰ ᤔᤧᤒᤥ᤺ᤰᤂᤧᤴ. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤱᤅᤥ ᤁᤧᤈᤠᤰᤂᤢᤶᤒᤠ ᤗᤠᤱᤛᤢ᤺ᤵᤐᤡᤴᤏᤠᤱ ᤁᤢᤍᤪᤧᤰ ᤔᤧᤒᤥ᤺ᤰᤂᤧᤴ॥ 6 ᤂᤡᤏᤡ᤹ ᤂᤖᤧ᤺ᤱ ᤁᤧᤴᤈᤠᤶᤔᤡᤴ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤁᤧᤍᤢᤶᤒᤠ ᤌᤡ ᤀᤡᤃᤪ ᤘᤣ᤹ ᤀᤠᤔᤔᤒᤠ ᤌᤧᤔᤠᤀᤠᤱ ᤁᤧᤴᤎᤢᤅᤢᤶᤔᤡᤴ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴᤏᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤁᤧᤗ᤹ᤒᤠ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤰᤂᤣ ᤆᤥᤃᤢᤱᤒᤠᤖᤥ॥” 7 ᤂᤡᤏᤡ᤹ ᤁᤴ ᤋᤧᤴᤏᤥ ᤁᤧᤃᤧᤖᤡ ᤁᤧᤓᤧᤖᤡᤸᤗᤧ ᤜᤣᤛ᤻ᤒᤥᤏᤒᤠ ᤜᤠᤱ ᤛᤡᤜᤥᤏᤏᤢ ᤒᤠᤛᤠᤏᤒᤠ ᤜᤠᤱ ᤀᤥᤃᤧᤴ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤌᤰᤛᤧ ᤗ᤺ᤴᤍᤧ ᤋᤩᤧᤛᤡ. ᤜᤧᤰᤁᤩᤠᤱ ᤀᤠᤏᤡ᤹ ᤂᤧᤱᤜᤠ᤹ ᤀᤠᤏᤠ᤺ᤴᤍᤢᤶᤛᤡᤶ॥ 8 ᤜᤧᤰᤁᤩᤠᤱ ᤀᤠᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ ᤜᤢᤰᤁᤠᤵ ᤆᤥ᤺ᤰᤔᤏᤠᤀᤠᤱ. ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ ᤂᤧᤴ ᤂᤢᤴᤇᤡ᤹ ᤂᤥᤔᤠ ᤗᤰ ᤁᤢᤛᤡᤱ ᤀᤠᤒᤡᤖᤢᤶᤛᤡᤶ॥ 9 ᤁᤴ ᤔᤠᤱᤜᤢᤵᤐᤥᤒᤠ ᤐᤠ᤺ᤴᤈᤠ᤺ᤰᤁᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤂᤡᤏᤡ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤧᤒᤥ᤺ᤰᤂᤡᤖ॥ 10 ᤀᤠᤀᤡᤴ ᤂᤡᤏᤡ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤕᤧᤒᤡ ᤁᤧᤃᤖᤡ—ᤂᤡᤏᤡ᤹ ᤗᤠᤶᤗᤥᤒᤠᤱᤜᤠ᤹ ᤏᤢ ᤋᤢᤶ ᤗᤠᤶᤗᤥᤒᤠᤜᤠ᤹. ᤗᤠᤶᤗᤥᤒᤠᤜᤠ᤹ ᤏᤢ ᤕᤢᤰᤛᤠᤒᤠᤜᤠ᤹ ᤏᤢ ᤘᤣ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹. 11 ᤂᤡᤏᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ ᤏᤢ ᤂᤡᤏᤡ᤹ ᤔᤣ᤺ᤳᤜᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤛᤠ᤺ᤱᤃᤠᤜᤡᤶᤔᤥ ᤛᤡᤱ ᤁᤧᤄᤧ᤺ᤵᤐᤠ ᤏᤢ ᤆᤫᤠ᤺ᤳ ᤁᤧᤓᤠ᤺ᤵᤐᤠᤜᤠ᤹ ᤘᤣ᤹ ᤗᤠᤈᤣ᤹ᤒᤠᤀᤠᤱ ᤁᤧᤕᤧᤒᤡ᤹॥ 12 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤗᤳᤇᤠ ᤔᤠᤱᤜᤢᤵᤐᤥ ᤜᤢᤵᤛᤡᤱᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤵᤔᤥ ᤁᤧᤕᤧᤒᤡ᤹. ᤂᤧᤴ ᤔᤠᤱᤜᤢᤵᤐᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤀᤡᤴ ᤂᤡᤏᤡ᤹ᤏᤢ ᤜᤢᤵᤋᤢᤖ ᤐᤳ ᤜᤧᤰᤁᤩᤠᤱ ᤔᤠᤱᤜᤧᤰᤁᤡᤸᤗᤧ ᤀᤣ᤺ᤵᤛᤠᤵ ᤀᤣ᤺ᤵᤋᤢᤖ ᤐᤳ॥ 13 ᤀᤠᤰᤂᤣᤗ᤹ᤖᤡᤰ ᤂᤢᤏᤧ᤹ ᤂᤡᤏᤡ᤹ᤏᤢ ᤔᤠᤱᤜᤢᤵ ᤆᤥᤃᤢ ᤜᤧᤰᤁᤩᤠᤱ ᤂᤡᤏᤡ᤹ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤂᤧᤒᤩᤠᤱ ᤕᤠᤁᤢᤒᤏᤢ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧ. ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤔᤠᤖᤧ ᤗᤠᤃᤡ ᤏᤢ ᤂᤡᤏᤡ᤹ᤃ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤏᤠ ᤆᤠ᤺ᤰᤔᤠᤖᤧ ᤗᤠᤃᤡ ᤛᤧᤰᤂᤠ ᤆᤥᤃᤢᤖ ᤐᤳ॥ 14 ᤀᤠᤱᤃᤠ᤹ ᤁᤴ ᤔᤠᤱᤜᤧᤰᤁᤡᤴᤏᤢ ᤛᤥᤖᤡᤰᤐᤠ ᤔᤠᤱᤜᤢᤵᤐᤡᤴ ᤂᤡᤏᤡ᤹ ᤀᤠᤀᤡᤴ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤏᤡ᤹ᤏᤢ ᤛᤥᤖᤡᤰ ᤁᤧᤕᤧᤵᤐᤠᤜᤠ᤹ᤏᤢᤖᤰ ᤔᤧᤜᤢᤵᤐᤠᤀᤠᤴ. 15 ᤁᤖ ᤀᤠᤀᤡᤴ ᤀᤠᤸᤗ ᤀᤠᤏᤡ᤹ᤏᤢ ᤛᤥᤖᤡᤰ ᤁᤵᤔᤥ ᤔᤧᤴᤘᤠ᤹ᤔᤏᤠᤒᤠᤜᤠ᤹ᤏᤢᤀᤠᤱ ᤀᤠᤱᤃᤠ᤹ ᤔᤠᤱᤜᤢᤵ ᤆᤥᤃᤢᤱ᤹॥ 16 ᤀᤠᤏᤡ᤹ ᤀᤠᤰᤂᤣᤗ᤹ᤖᤡᤰ ᤔᤡᤛᤪ ᤗᤠᤈᤣ᤹ᤀᤥ ᤀᤠᤕᤢᤅᤧ. ᤜᤧᤰᤁᤩᤠᤱ ᤁᤵᤔᤥ ᤁᤧᤵᤔᤠᤖᤧ ᤗᤠᤃᤡ ᤘᤣ᤹ ᤗᤠᤈᤣ᤹ᤜᤠ᤹ᤗᤠᤶ ᤀᤠᤏᤡ᤹ ᤀᤠᤒᤥ᤺ᤰᤂᤧᤖ ᤀᤠᤰᤂᤣᤗ᤹ᤖᤡᤰ ᤀᤠᤃᤠ᤺ᤰᤋᤢᤶ ᤀᤠᤓᤧᤳᤋᤢᤶ ᤂᤧᤴ ᤂᤡᤏᤡ᤹ ᤁᤧᤏᤡᤛᤢᤶ᤹॥ 17 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤧᤗᤧ᤺ᤱᤒᤠ ᤛᤡᤱ. ᤗᤢᤱ. ᤕᤢᤵᤐᤠ ᤏᤢ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤘᤠ᤹॥ 18 ᤛᤡᤱᤛᤡᤱ ᤗ᤹ᤖᤧᤶᤔᤧ᤹᥄ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤛᤧᤘᤠ ᤔᤧᤳᤇᤧ ᤀᤠᤀᤡᤴ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤡᤏᤡ᤹ᤀᤥᤒᤠ ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ. ᤁᤡᤃᤪ ᤌᤠ᤺ᤰ ᤀᤡᤃᤪ ᤐᤠᤛᤡᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤔᤧᤜᤡᤛᤡᤱᤅᤡᤴᤗ॥ ᤕᤧᤰᤕᤧᤰ ᤗ᤹ᤖᤧᤶᤔᤧ᤹. ᤂᤡᤏᤡ᤹ ᤗᤢᤶᤔᤥ ᤀᤰᤋᤱᤒᤠ ᤑᤧᤴᤏᤡᤱᤘᤠ᤹ ᤁᤧᤍᤠ᤺ᤵᤐᤠ ᤌᤧᤔᤠ ᤐᤠ᤺ᤴᤏᤡᤸᤗᤧᤀᤠᤱ ᤁᤢᤒᤢᤱ ᤜᤥ᤺ᤵᤗ॥ 19 ᤀᤠᤸᤗ ᤜᤧᤰᤋᤱᤒᤠ ᤔᤏᤠ᤺ᤸᤗᤧ ᤁᤴ ᤔᤠᤱᤜᤧᤰᤁᤥᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤂᤧᤵᤛᤢᤸᤗᤧ ᤂᤧᤴ ᤀᤠᤵᤑᤣᤰ ᤔᤢ᤹ᤀᤡᤛᤠᤶ ᤐᤡᤛᤡᤱ ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤇᤡᤱ᤹. “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤶᤔᤥ ᤗᤠᤱᤄᤣ᤺ᤰᤁᤠᤀᤠᤱ ᤐᤳᤋᤠᤛᤠᤱ ᤀᤠᤱᤃᤠ᤹ ᤋᤠᤵᤌᤣᤰ ᤕᤠᤶᤎᤣᤰ ᤘᤠ᤹ᤀᤠ॥” ᤁᤴ ᤔᤏᤠ᤺ᤸᤗᤧ ᤆᤫᤠ᤺ᤳᤋᤡᤸᤗᤧ ᤘᤠᤖᤰᤂᤢᤒᤠ ᤗᤠᤈᤣ᤹ ᤛᤶᤎᤠᤱᤏᤢ ᤛᤥᤛᤥᤖᤡᤰ ᤁᤢᤛᤧᤱᤃᤪᤠ ᤗᤠᤈᤣ᤹ᤀᤥᤀᤠᤱ ᤋᤢᤰᤂᤣ ᤗᤠᤰᤂᤣ ᤋᤠᤖᤢ᤹॥ 20 ᤂᤧᤴ ᤗᤧᤵᤔᤡ ᤐᤡᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤵᤑᤠᤸᤗᤧᤀᤠᤱ ᤁᤢᤏᤡᤱᤘᤠ᤹ ᤔᤧᤏᤢ᤺ᤰᤋᤢᤴ᤹. ᤁᤖ ᤂᤢᤏᤧ᤹ ᤔᤡ ᤁᤧᤍᤡ᤺ᤵᤐᤠ ᤁᤢᤛᤠᤰᤁᤧᤴᤏᤡᤴ ᤏᤢ ᤁᤢᤏᤠᤜᤧᤶᤔᤠᤴ ᤂᤧᤴ ᤔᤏᤠ᤺ᤸᤗᤧ ᤁᤢᤛᤶᤎᤠᤱ ᤌᤠᤖᤥ॥ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤂᤧᤴ ᤔᤏᤠ᤺ᤸᤗᤧ ᤁᤢᤛᤶᤎᤠᤱ ᤆᤢᤰ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤁᤢᤔᤡᤱᤅᤡᤴ ᤋᤠᤱᤛᤠᤱᤒᤠ ᤛᤡᤃᤠᤱᤗᤠᤶ ᤔᤠᤛᤢ ᤐᤡᤖᤢ᤹॥ 21 ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤌᤠ᤺ᤰᤁᤥᤗᤠᤶ ᤔᤧᤰᤔᤠ ᤛᤡᤔᤠᤖᤧ ᤗᤠᤃᤡ ᤀᤣ᤺ᤰ ᤛᤧᤴᤍᤢᤍᤣᤛᤢ᤹॥ 22 ᤂᤡᤏᤡ᤹ ᤀᤣᤃᤠᤱ ᤁᤧᤍᤠᤒᤠ ᤌᤠ᤺ᤰᤌᤠ᤺ᤰᤜᤠ᤹ ᤏᤢ ᤛᤠ᤹ᤖᤡᤰ ᤔᤠ᤺ᤱᤄᤠ ᤗᤠᤈᤣ᤹ᤜᤠ᤹ᤗᤠᤶ ᤁᤧᤍᤠᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤡᤏᤡ᤹ ᤗᤠᤈᤣ᤹ᤀᤥ ᤁᤧᤍᤠᤒᤠ ᤔᤧᤰᤔᤠ ᤛᤡᤔᤠᤜᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤔᤥ ᤋᤠᤖᤢᤒᤠ ᤋᤢᤰᤔᤠᤜᤠ᤹ ᤔᤧᤏᤡᤛᤢᤖᤥ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤡᤰ ᤐᤥ᤺ᤰᤔᤥ ᤛᤍᤥᤔ ᤏᤢ ᤃᤔᤥᤖᤠ. ᤀᤍ᤻ᤔᤠ ᤏᤢ ᤛᤒᤥᤕᤡᤔᤧᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤗᤠᤈᤣ᤹ᤀᤥ ᤁᤧᤖᤧᤰ ᤁᤠᤴᤎᤠᤰ ᤏᤢ ᤕᤢᤶ ᤔᤡᤃᤧᤍᤡᤰᤐᤠ ᤔᤡᤄᤠᤱᤃᤪᤥᤰᤗᤰ ᤐᤥᤱ᤹॥ ᤂᤧᤴ ᤌᤧᤔᤠᤀᤠᤱ ᤔᤧᤸᤗᤣ᤺ᤳᤋᤣᤒᤠ. ᤌᤧᤔᤠᤀᤠᤱ ᤔᤧᤸᤗᤡᤱᤔᤏᤠᤒᤠ ᤏᤢ ᤕᤠ᤺ᤴᤛᤢᤱᤅᤠᤱ ᤔᤧᤸᤗᤡᤱᤔᤏᤠᤒᤠ ᤕᤠᤰᤆᤠᤏᤠ ᤐᤥᤱ᤹॥ 24 ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤐᤠ᤺ᤴᤛᤣ᤺ᤴᤍᤥ ᤔᤧᤈᤥᤃᤢ᤹. “ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤗᤠᤈᤣᤴ ᤌᤣᤀᤠᤱ ᤀᤰᤋᤱᤒᤠ ᤆᤥᤃᤢᤒᤠᤒᤣ᥅ ᤁᤴ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤜᤧᤰᤋᤱᤒᤠ ᤛᤠᤰᤁᤧᤴᤏᤡᤴ ᤌᤣᤀᤠᤱᤒᤣ᥅” 25 ᤜᤧᤰᤁᤣ᤺ᤸᤗᤧ ᤀᤰᤋᤱᤒᤠ ᤏᤥᤃᤵ ᤋᤠᤖᤥ. “ᤂᤧᤱᤜᤠ᤹ ᤔᤡᤛᤪᤗᤠᤶ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤧᤳᤋᤢᤛᤡᤸᤗᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤏᤢ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤧᤱᤜᤠ᤹ᤖᤧ ᤔᤧᤗᤧᤖᤢ ᤔᤧᤍᤣᤛᤢᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥ 26 ᤂᤧᤱᤜᤠ᤹ ᤔᤧᤒᤣᤀᤠᤱ ᤘᤣ᤹ ᤔᤠᤱᤛᤠᤶᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ ᤜᤧᤰᤁᤩᤠᤱ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱᤅᤠᤱ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡ. ᤂᤧᤴ ᤔᤠᤱᤛᤠᤶᤔᤠᤱᤜᤠ᤹ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤇᤣ ᤔᤧᤘᤕᤧ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤠᤱᤛᤠᤶᤔᤠᤜᤠ᤹ ᤂᤢᤴᤇᤡ᤹ ᤐᤡᤖᤢᤛᤡᤒᤠ ᤜᤥ᤺ᤵᤋᤧ॥ 27 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤁᤴ ᤗᤠᤈᤣ᤹ᤀᤥ ᤌᤩᤧ. ᤜᤧᤰᤁᤩᤠᤱ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤂᤢᤏᤧ᤹ ᤁᤴ ᤗᤠᤈᤣ᤹ᤀᤥ ᤌᤠᤛᤢ॥ 28 ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤡᤰ ᤐᤥ᤺ᤰᤔᤥ ᤏᤢ ᤛᤠ᤹ᤖᤡᤰ ᤁᤢᤕᤠ᤺ᤰᤗᤧ᤹ᤔᤥ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ᤀᤥᤗᤠᤶ ᤜᤠ᤹ᤕᤠᤰ ᤀᤠ᤺ᤰᤂᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤧᤴ ᤀᤠᤀᤡᤴ ᤐᤥ᤺ᤰᤂᤧᤀᤠᤱ ᤏᤧᤒᤠ ᤁᤢᤀᤡᤛᤡᤰ ᤘᤣ᤹ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤗᤠᤵᤐᤢᤱᤍᤣᤛᤢᤛᤡ᥄” 29 ᤀᤥᤛᤣ᤺ᤴᤎᤠᤱ ᤔᤧᤶᤒᤥᤱᤔᤏᤠᤒᤠ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤧᤴᤗᤥ॥ ᤁᤖ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤧᤖᤧᤰ ᤐᤠ᤺ᤴᤈᤠ᤺ᤰᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤀᤥᤛᤣ᤺ᤴᤎᤠᤱ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ᤃ ᤀᤠᤏᤡ᤹ ᤏᤢ ᤀᤠᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤖᤧ ᤗᤠᤃᤡ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱᤗᤧ ᤗᤠᤃᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.