ᤛᤠᤶᤕᤥᤌᤡᤶ ᤀᤡᤱ 28 - LIFOTNTᤀᤡᤱᤈᤠᤱ ᤀᤡ᤺ᤵᤔᤧᤸᤗᤧᤒᤠ ᤔᤢ᤹ᤀᤡᤛᤠᤶᤜᤠ᤹ ( ᤗᤧᤒᤡ ᥈᥌:᥉-᥇᥉ ; ᤛᤠᤶᤕᤥ ᤀᤡᤱ ᥍:᥇᥈-᥈᥊ ) 1 ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤋᤡᤶᤔᤠ ᤏᤠ᤺ᤵᤔᤠ ᤁᤧᤍᤧᤴᤍᤡ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ. ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤂᤡᤏᤡ᤹ ᤌᤥᤎᤥᤰᤐᤠ ᤁᤧᤈᤥᤃᤡ᤹॥ 2 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤁᤴ ᤁᤧᤖᤧᤰ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤜᤠ᤹ ᤂᤡᤏᤡ᤹ᤀᤥ ᤌᤠᤀᤠᤱ ᤂᤡᤏᤡ᤹ ᤔᤢ᤹ᤀᤡᤛᤠᤒᤠ ᤁᤧᤒᤥᤰᤂᤡᤖᤥ. 3 ᤂᤡᤏᤡ᤹ ᤕᤧᤰᤕᤰᤁᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤐᤠᤱᤓᤣ᤹ ᤐᤠᤱᤈᤢᤶᤔᤥ ᤔᤢ᤹ᤀᤡᤛᤠᤶ ᤌᤠᤖᤥ॥ 4 ᤂᤡᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤖᤥ. ᤂᤧᤴᤏᤢ ᤛᤥᤛᤥᤖᤡᤰ ᤀᤡᤰᤋᤠᤵᤐᤥᤒᤠ ᤐᤥᤃᤢᤃᤧᤴ ᤁᤢᤈᤠᤀᤥ ᤔᤢ᤹ᤀᤡᤛᤠᤶ ᤌᤠᤖᤥ. ᤐᤡᤳᤌᤰᤛᤠ. ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤥ ᤔᤢ᤹ᤀᤡᤛᤠᤶ ᤌᤠᤖᤥ॥ 5 ᤂᤡᤏᤡ᤹ ᤏᤠ᤹ᤀᤡᤔᤠᤜᤠ᤹ᤀᤥ ᤏᤢ ᤑᤣ᤹ᤖᤢᤶ ᤛ᤹ᤔᤠ ᤂᤷᤒᤠᤜᤠ᤹ᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤖᤥ॥ 6 ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤁᤧᤗᤠᤛᤡ᤹ ᤁᤧᤗ᤺ᤴᤍᤡᤸᤗᤧ ᤂᤡᤏᤡ᤹ᤀᤥ ᤜᤠᤱᤘᤠ ᤔᤢ᤹ᤀᤡᤛᤠᤶ ᤌᤠᤖᤥ॥ 7 ᤂᤡᤏᤡ᤹ᤏᤢ ᤌᤱ ᤁᤧᤈᤥ᤺ᤰᤐᤠ ᤏᤡᤱᤔᤡᤜᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤂᤡᤏᤡ᤹ ᤋᤃᤡᤀᤣ ᤜᤠᤖᤡ ᤆᤠ᤺ᤳᤋᤢᤛᤡ᤹॥ ᤂᤧᤱᤜᤠ᤹ ᤂᤡᤏᤡ᤹ᤏᤢ ᤌᤰᤛᤧ ᤌᤡᤰ ᤗᤠᤶ ᤗᤠᤶᤒᤠ ᤔᤧᤍᤠᤖᤥ. ᤁᤖ ᤂᤧᤱᤜᤠ᤹ ᤂᤡᤏᤡ᤹ᤗᤠᤶ ᤏᤢᤛᤡ ᤗᤠᤶᤜᤠ᤹ᤀᤥ ᤔᤧᤄᤧᤳᤇᤡᤱ᤹॥ 8 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤆᤠᤎᤠ᤺ᤱᤅᤥ ᤏᤢ ᤂᤡᤏᤡ᤹ ᤁᤧᤖᤧᤰ ᤕᤠ᤺ᤶᤒᤰᤁᤥ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤀᤠᤱ ᤏᤧᤒᤠ ᤗᤠᤈᤣ᤹ᤀᤥ ᤂᤢᤏᤧ᤹ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹॥ 9 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤍᤧᤴᤍᤡᤀᤠᤱ ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤃᤧᤄᤣᤃᤡᤏᤧᤓᤃᤪ. ᤂᤢᤏᤧ᤹ ᤂᤡᤏᤡ᤹ᤀᤥ ᤔᤠᤱᤜᤧᤰᤛᤡᤱᤅᤠᤱ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤀᤠᤵᤑᤣᤰ ᤛᤣᤛᤣ ᤁᤢᤔᤏᤠ ᤁᤧᤈᤥᤃᤡᤀᤠᤱ ᤁᤧᤕᤢᤰᤂᤡ᤹॥ 10 ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥᤗᤠᤶ ᤁᤧᤀᤢ᤺ᤳᤋᤡᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤡᤏᤡ᤹ᤏᤢ ᤔᤧᤃᤡᤖᤥ॥ 11 ᤂᤡᤏᤡ᤹ ᤐᤡᤏᤡᤱ ᤑᤠ᤹ᤀᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹. ᤐᤡᤳᤌᤰᤛᤠᤜᤠ᤹ ᤏᤢ ᤗᤠᤈᤣ᤹ᤀᤥ ᤁᤧᤎᤥ᤺ᤰᤐᤠ ᤁᤢᤈᤠᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤘᤧᤳᤋᤧᤛᤖᤧ ᤏᤢ᤹ᤔᤠ ᤋᤠᤔᤠ ᤁᤧᤒᤡᤖᤡᤖᤥ॥ 12 ᤕᤜᤘᤣ ᤍᤠᤱᤒᤧᤸᤗᤧ ᤋᤠᤱᤛᤠᤱᤒᤥ ᤘᤧᤳᤋᤧᤛᤖᤧ ᤆᤡᤰᤂᤢ ᤕᤢᤰᤂᤢᤒᤠ ᤁᤢᤎᤠ᤺ᤱᤅᤡᤴ ᤜᤴᤍᤢᤀᤠᤱ ᤂᤡᤏᤡ᤹ ᤗᤠᤈᤣ᤹ᤀᤥ ᤆᤠᤜᤠ ᤆᤥ᤺ᤰᤐᤠ ᤕᤠᤰᤘᤠᤀᤥ ᤘᤜᤡᤳ ᤌᤠᤛᤢ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤜᤢᤰᤁᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹॥ ᤂᤡᤏᤡ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤡᤱᤏᤠᤳ ᤁᤧᤒᤡᤖᤢᤶᤛᤡᤶ᤹. ᤁᤖ ᤀᤠᤳᤋᤡᤴᤜᤠ᤹ᤗᤠᤶᤔᤠᤱ ᤕᤠᤱᤏᤠ ᤛᤡᤱᤏᤠᤳ ᤁᤧᤶᤓᤥ᤺ᤰᤂᤢᤶᤔᤡᤴᤗᤥ॥ 13 ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ᤀᤥ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ. ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤀᤣᤃᤠᤱ ᤔᤣ᤺ᤴ ᤁᤖ ᤋᤃᤠᤱ ᤁᤧᤈᤥᤃᤡ᤹॥ ᤂᤡᤏᤡ᤹ ᤌᤥᤎᤥᤰᤐᤠ ᤁᤧᤒᤥ᤺ᤰᤂᤡ᤹ ᤁᤖ ᤕᤥᤕᤥᤰ ᤁᤧᤶᤒᤥ᤺ᤰᤂᤡᤴᤗᤥ॥ 14 ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤀᤡᤱᤈᤠᤱᤜᤠ᤹ᤀᤥᤒᤠ ᤁᤢᤓᤠᤗᤠᤶ ᤑᤧᤱᤘᤠ ᤏᤢ ᤆᤢᤰᤘᤠ ᤗᤧᤵᤔᤠᤱ ᤔᤧᤒᤣᤃᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤘᤣ᤹ ᤔᤠᤱᤜᤠ᤹ ᤔᤧᤍᤡᤶᤍᤧᤶᤛᤡᤶᤔᤡᤴᤏᤧ᤹ᤀᤠᤱ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤀᤡᤱᤈᤠᤱ ᤔᤧᤴᤀᤡ᤺ᤵᤔᤧᤸᤗᤧᤒᤠ ᤛᤠᤱᤃᤪᤠᤜᤠ᤹ ( ᤗᤧᤒᤡ ᥈᥌:᥇᥊-᥊᥌ ) 15 ᤁᤖ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤗ ᤐᤳᤋᤠᤒᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤏᤢ ᤁᤢᤎᤡᤶᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤱᤄᤧᤵᤛᤢᤶᤔᤡᤴᤏᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤜᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤧᤓᤃᤪ. ᤁᤴ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤂᤡᤏᤡ᤹ ᤛᤶᤎᤠᤱ ᤌᤠᤀᤠᤱ ᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤖᤥ. 16 ᤂᤡᤏᤡ᤹ ᤕᤧᤰᤕᤰᤜᤠ᤹ᤀᤥ ᤛᤠᤱᤃᤪᤠ ᤌᤠᤖᤥ. ᤂᤡᤏᤡ᤹ ᤐᤠᤱᤓᤣ᤹ ᤐᤠᤱᤈᤢᤶᤔᤥ ᤔᤠᤱᤍᤣ ᤌᤠᤖᤥ॥ 17 ᤂᤡᤏᤡ᤹ ᤏᤠ᤹ᤀᤡᤔᤠᤜᤠ᤹ᤀᤥ ᤜᤧᤰᤁᤩᤠᤱ ᤑᤣ᤹ᤖᤢᤶ ᤛ᤹ᤔᤠ ᤂᤷᤒᤠᤜᤠ᤹ᤀᤥ ᤔᤠᤱᤍᤣ ᤛᤠᤱᤃᤪᤠ ᤌᤠᤖᤥ॥ 18 ᤂᤡᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤀᤥ. ᤂᤧᤴᤏᤢ ᤛᤥᤛᤥᤖᤡᤰ ᤀᤡᤰᤋᤠᤵᤐᤥᤒᤠ ᤐᤥᤃᤢᤃᤧᤴ ᤁᤢᤈᤠᤀᤥ. ᤐᤡᤳᤌᤰᤛᤠ ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳᤛᤠᤳᤜᤠ᤹ᤀᤥ. ᤔᤧᤰᤗᤢᤰ ᤔᤧ᤺ᤴᤍᤠ ᤔᤧᤸᤗᤢᤰᤛᤠ᤺ᤳ ᤔᤧ᤺ᤴᤍᤛᤠ᤺ᤳᤜᤠ᤹ᤀᤥ ᤔᤠᤱᤍᤣ ᤛᤠᤱᤃᤪᤠ ᤌᤠᤖᤥ॥ 19 ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤁᤧᤗᤠᤛᤡ᤹ ᤁᤧᤗ᤺ᤴᤍᤡᤸᤗᤧ ᤂᤡᤏᤡ᤹ᤀᤥ ᤔᤠᤱᤍᤣ ᤛᤠᤱᤃᤪᤠ ᤌᤠᤖᤥ॥ 20 ᤂᤢᤏᤧ᤹ ᤁᤧᤏᤠ᤹ᤖᤢᤶᤔᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤂᤡᤔᤥ ᤁᤧᤶᤔᤧᤃᤡᤴᤗ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤛᤶᤎᤠᤱ ᤏᤢ ᤂᤡᤏᤡ᤹ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤀᤥ ᤔᤠᤱᤍᤣ ᤛᤠᤱᤃᤪᤠ. ᤜᤕᤱ ᤁᤡᤸᤗᤡᤱ ᤏᤢ ᤋᤢᤰᤂᤣ ᤗᤠᤰᤂᤣ ᤐᤥᤱᤗ ᤆᤥᤃᤢ᤹॥ 21 ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤒᤣᤃᤡᤖ ᤁᤧᤒᤳᤇᤡᤒᤠ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤔᤡᤱ ᤘᤖᤧᤱᤗᤧᤱ ᤔᤠᤖ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤗᤢᤶᤔᤥ ᤛᤠ᤹ᤖᤡᤰ ᤕᤶᤒᤠ ᤔᤠᤱᤍᤢᤰᤔᤠ ᤐᤥ᤺ᤰᤗ ᤆᤥᤃᤢ᤹॥ 22 ᤌᤰ ᤁᤧᤜᤣᤒᤠ ᤁᤧᤈᤵᤐᤠ. ᤋᤢᤱᤍᤠᤔᤠ. ᤀᤠᤜᤶᤜᤶᤒᤠ ᤋᤢᤰᤔᤠ. ᤔᤡᤀᤠᤍᤡᤰᤋᤡᤰᤐᤠ ᤀᤠᤀᤥ᤹ᤀᤥ᤹ᤒᤠ. ᤛᤠᤱᤕᤠᤰᤔᤠ. ᤛᤡᤱᤈ᤺ᤰ ᤀᤡᤃᤧᤛᤢ᤹ᤒᤠ ᤂᤢᤰᤘᤠᤔᤣ᤺ᤳ ᤏᤢ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤋᤢᤰᤔᤠᤜᤠ᤹ ᤋᤠᤖᤢᤀᤠᤱ ᤂᤡᤏᤡ᤹ ᤁᤧᤶᤔᤧᤃᤡᤴᤗ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤳᤋᤡ᤹॥ 23 ᤜᤧᤰᤁᤩᤠᤱ ᤂᤡᤏᤡ᤹ ᤛᤶᤎᤠᤱ ᤁᤧᤒᤵᤐᤠ ᤋᤠᤱᤛᤠᤱᤒᤠᤴ ᤁᤠᤛᤠ ᤜᤧᤰᤁᤣ ᤘᤜᤡᤳ ᤔᤧᤴᤎᤠᤔᤏᤠᤒᤠ ᤏᤢ ᤂᤡᤏᤡ᤹ ᤛᤡᤃᤠᤱᤒᤠ ᤂᤠᤶᤒᤠᤱᤅᤡᤴ ᤑᤧᤴᤈᤣ᤹ ᤜᤧᤰᤁᤣ ᤁᤢᤈᤠ ᤔᤧᤴᤎᤥ᤺ᤰᤔᤏᤠᤒᤠ ᤐᤥᤱ᤹॥ 24 ᤂᤡᤏᤡ᤹ ᤗᤠᤈᤣ᤹ᤀᤥ ᤁᤧᤎᤠᤒᤠ ᤐᤠᤱᤃᤧᤴᤍᤡᤱ ᤘᤜᤡᤳᤋᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤠᤶᤜᤡ᤺ᤰ ᤗᤢᤱᤜᤡ᤺ᤰ ᤐᤥᤱᤗ ᤆᤥᤃᤢ᤹॥ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤔᤧᤶᤔᤧᤰᤁᤣ ᤌᤠᤖᤡᤰ ᤋᤠᤱᤛᤠᤱᤒᤥᤗᤠᤶ ᤂᤧᤴ ᤂᤡᤏᤡ᤹ ᤛᤶᤎᤠᤱ ᤌᤠᤖᤥ॥ 25 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤜᤠᤖᤡ ᤁᤧᤍᤩᤧ᤹ᤀᤡᤖ ᤁᤧᤕᤠ᤺ᤴᤍᤡ᤹॥ ᤂᤧᤱᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤂᤡᤏᤡ᤹ ᤗᤳᤇᤠ ᤗᤠᤶ ᤗᤠᤶᤒᤠ ᤁᤧᤒᤣᤃᤡ᤹ ᤁᤖ ᤂᤧᤱᤜᤠ᤹ᤗᤠᤶ ᤂᤡᤏᤡ᤹ ᤏᤢᤛᤡᤗᤠᤶ ᤗᤠᤶᤒᤠ ᤁᤧᤄᤧᤳᤋᤠᤛᤡ᤹॥ ᤂᤡᤏᤡ᤹ ᤁᤧᤍᤢᤔᤢᤶᤒᤠᤴ ᤔᤧᤏᤡᤛᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤐᤃᤡ ᤔᤧᤃᤡ॥ 26 ᤂᤡᤏᤡ᤹ ᤁᤧᤛᤡᤒᤠ ᤌᤰᤜᤠ᤹ ᤋᤠᤱᤛᤠᤱᤒᤥᤒᤠ ᤐᤢᤜᤠ᤹ ᤏᤢ ᤂᤠᤶᤒᤣ᤺ᤰᤁᤥᤒᤠ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤆᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤏᤠ᤺ᤵᤐᤠ ᤁᤧᤍᤣᤒᤠ ᤜᤠ᤺ᤳᤋᤠᤱ ᤔᤧᤜᤥᤵ॥ 27 ᤂᤡᤏᤡ᤹ ᤘᤣ᤺ᤵᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤒᤠ ᤜᤥ᤹. ᤏᤧᤰᤛᤠ ᤁᤧᤒᤥᤒᤠ. ᤜᤥᤖᤡᤰ ᤁᤧᤀᤥ᤹ᤒᤠ ᤑᤰᤘᤠᤗᤧ᤺ᤱᤘᤠ ᤏᤢ ᤏᤧᤰᤛᤠ ᤁᤧᤛᤥᤒᤠ ᤋᤢᤰᤔᤠᤸᤗᤧ ᤁᤧᤍᤖᤡᤖ ᤁᤧᤕᤠ᤺ᤴᤍᤡ᤹॥ 28 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤏᤠᤱᤏᤠᤱ ᤌᤠᤵᤌᤠᤵ ᤗ᤹ᤔᤠ. ᤔᤡᤰᤑ᤺ᤶᤒᤠ ᤐᤥᤱᤔᤠ ᤏᤢ ᤏᤡᤱᤘᤠ᤹ ᤔᤢᤍᤱ ᤆᤠᤔᤠ ᤋᤢᤰᤔᤧᤸᤗᤧ ᤁᤧᤍᤖᤡᤖ ᤁᤧᤕᤠ᤺ᤴᤍᤡ᤹॥ 29 ᤔᤡᤰᤑ᤺ᤶᤒᤧᤸᤗᤧ ᤂᤠᤔᤠᤰᤔᤥ ᤛᤛᤵ ᤛᤛᤵ ᤛᤵᤛᤢᤒᤠ ᤁᤢᤀᤡᤛᤡᤰ ᤗᤧᤴᤍᤡᤰ ᤔᤛᤣᤖᤠ ᤂᤡᤏᤡ᤹ ᤗᤠᤱᤃᤧᤄᤣᤃᤡ᤹॥ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤁᤢᤗᤡᤱᤍᤥ ᤔᤧᤱᤃᤧᤵᤔᤏᤠᤒᤠ ᤁᤧᤒᤥ᤺ᤰᤂᤡ᤹॥ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤐᤠ ᤜᤠ᤺ᤳᤋᤠᤱ ᤜᤥᤵᤐᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤁᤧᤶᤕᤢᤰᤋᤡ ᤁᤧᤶᤏᤠᤵᤋᤡ᤹॥ 30 ᤂᤡᤏᤡ᤹ᤏᤢ ᤐᤠᤴ ᤁᤧᤒᤢ᤹ᤔᤠᤀᤠᤱ ᤁᤧᤕᤧᤵᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤘᤣ᤹ ᤔᤏᤠ᤺ᤸᤗᤧ ᤋᤣ᤹ᤖᤢ᤹ ᤜᤧᤰᤁᤩᤠᤱ ᤑᤧᤳᤗᤠ᤺ᤴᤍᤢ᤹॥ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤜᤡᤶᤔᤥ ᤂᤡᤏᤡ᤹ ᤀᤠᤵᤑᤣᤰ ᤕᤢᤱᤔᤠ ᤁᤧᤱᤄᤥᤛᤢᤶᤔᤡᤴ᤹॥ ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤁᤧᤗᤣ᤺ᤳᤋᤢᤶ᤹. ᤂᤧᤸᤗᤧ ᤁᤢᤈᤠ᤹ᤀᤡᤴ ᤀᤠᤵᤑᤣᤰ ᤛᤠ᤹ᤔᤠ ᤁᤧᤱᤄᤥᤛᤢᤶᤔᤡᤴ᤹॥ 31 ᤂᤡᤏᤡ᤹ ᤔᤡᤰ ᤋᤃᤡ ᤔᤧᤛᤥ᤺ᤴᤍᤢᤒᤠ ᤀᤠᤵᤑᤣᤰ ᤐᤡᤳᤇᤠᤴ ᤂᤡᤏᤡ᤹ ᤆᤠᤔᤠ ᤁᤧᤱᤄᤥᤛᤢᤶᤔᤡᤴ᤹॥ ᤂᤡᤏᤡ᤹ᤗᤠᤶ ᤛᤠᤰᤁᤧᤸᤗᤧᤰ ᤁᤧᤶᤏᤠᤵᤋᤡ ᤁᤧᤶᤍᤣ᤹ᤖᤡᤒᤠ ᤀᤍᤱᤅᤡᤴ ᤔᤧᤴᤏᤢ᤺ᤰᤋᤢᤴ ᤁᤧᤔᤧᤶᤒᤡᤖᤡᤴ᤹॥ ᤂᤡᤏᤡ᤹ ᤔᤧᤸᤗᤢᤰᤁᤡᤴ ᤂᤡᤏᤡ᤹ ᤏᤡᤱᤔᤡᤜᤠ᤹ ᤔᤧᤒᤡᤖᤢᤛᤡ᤹. ᤁᤖ ᤂᤧᤴ ᤏᤢ᤺ᤰᤔᤠᤖᤧ ᤗᤠᤃᤡ ᤜᤠ᤺ᤳᤗᤧᤀᤠᤱ ᤁᤧᤶᤓᤠ᤹ᤖᤡᤴ᤹॥ 32 ᤂᤡᤏᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤘᤣ᤹ᤛᤔᤠ ᤛᤢᤘᤠᤱᤜᤠ᤹ ᤔᤧᤒᤡᤖᤢᤛᤡ᤹. ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤔᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶ ᤀᤥᤃᤧᤔᤧᤳᤋᤢᤶᤔᤡᤸᤗᤧ ᤂᤡᤏᤡ᤹ ᤔᤡᤰᤁᤡᤴ ᤜᤧ᤺ᤳᤋᤠᤱᤒᤠ ᤐᤥᤱ᤹॥ ᤁᤖ ᤂᤧᤱᤜᤠ᤹ ᤘᤣ᤹ ᤗᤠᤈᤣ᤹ᤗᤠᤶ ᤏᤢ᤺ᤰᤔᤠ ᤋᤠ᤺ᤵᤔᤠᤛᤡ ᤂᤡᤏᤡ᤹ ᤁᤧᤴᤇᤢᤰᤋᤢᤶᤛᤡᤶᤔᤡᤴ᤹॥ 33 ᤂᤡᤏᤡ᤹ ᤗᤠᤈᤣ᤹ᤀᤥ ᤛᤩᤠᤱᤔᤧᤴᤍᤠᤱ ᤁᤧᤈᤥᤃᤢᤶᤒᤠ ᤁᤢᤈᤠᤴ ᤁᤢᤛᤣ᤺ᤴ ᤏᤡᤔᤧᤴᤍᤧᤵᤔᤏᤠᤒᤠ ᤛᤢᤘᤠᤱᤜᤠ᤹ᤖᤧ ᤔᤧᤈᤔᤧᤍᤣᤛᤢ᤹. ᤜᤧᤰᤁᤩᤠᤱ ᤂᤡᤏᤡ᤹ᤃ ᤂᤡᤏᤡ᤹ ᤜᤡᤱᤜᤡᤱ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡᤀᤠᤱ ᤁᤧᤶᤕᤢᤰᤋᤡ᤹॥ 34 ᤂᤡᤏᤡ᤹ ᤔᤡᤰᤁᤡᤸᤗᤧ ᤏᤡᤛᤢᤒᤠ ᤏᤡᤕᤠᤖᤠ ᤐᤠ᤺ᤴᤜᤠ᤹ ᤀᤥᤃᤧᤔᤧᤳᤋᤢᤶᤔᤡᤸᤗᤧ ᤂᤡᤏᤡ᤹ ᤁᤧᤏᤠᤰᤂᤡ ᤁᤧᤒᤣᤃᤡ᤹॥ 35 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤌᤢᤱᤒᤥ᤹ ᤏᤢ ᤗᤠᤱ ᤜᤧᤰᤁᤩᤠᤱ ᤌᤧᤃᤣ᤺ᤰᤁᤠᤱ ᤕᤥ ᤗᤠᤱᤍᤠᤵᤐᤣ᤹ᤀᤥ ᤌᤠᤖᤡᤰ ᤁᤧᤘᤠᤶᤒᤠ. ᤔᤧᤴᤘᤣ᤺ᤵᤔᤏᤠᤒᤠ ᤁᤧᤍᤢᤰᤐᤠ ᤜᤥ᤹ᤀᤡᤸᤗᤧ ᤁᤧᤍᤢᤃᤡᤖ ᤁᤧᤕᤠ᤺ᤴᤍᤡ᤹॥ 36 ᤂᤡᤏᤡ᤹ ᤏᤢ ᤂᤡᤏᤡ᤹ ᤕᤢᤰᤋᤡᤱ ᤁᤧᤈᤥᤃᤢᤶᤒᤠ ᤜᤠᤱᤅᤡᤴ. ᤂᤡᤏᤡ᤹ ᤏᤢ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤁᤢᤛᤣ᤺ᤴ ᤔᤧᤴᤏᤡ᤺ᤳᤋᤢᤴᤇᤡᤶᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤏᤠ᤺ᤳᤋᤡ ᤁᤧᤍᤣᤛᤡ᤹. ᤂᤶᤓᤩᤠᤱ ᤂᤧᤵᤔᤥ ᤛᤡᤱ ᤏᤢ ᤗᤢᤱ ᤔᤠᤱᤜᤠ᤹ ᤂᤡᤏᤡ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ᤹॥ 37 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤏᤠ᤺ᤳᤋᤡ ᤁᤧᤍᤣᤛᤡᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤏᤡᤛᤡᤀᤠᤱ ᤆᤡᤈᤡᤱ ᤕᤱᤔᤠ ᤔᤧᤛᤡ᤹᤺. ᤜᤧᤰᤁᤩᤠᤱ ᤗᤳᤇᤠ ᤕᤣ᤺ᤵᤔᤠ ᤏᤢ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤁᤧᤒᤥ᤺ᤰᤂᤡ᤹॥ 38 ᤀᤡᤰᤋᤠᤵᤐᤥ ᤂᤡᤏᤡ᤹ ᤕᤖᤡᤰ ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤖᤢᤶ᤹. ᤁᤖ ᤆᤒᤧ᤺ᤳᤇᤡᤰᤗᤰ ᤁᤢᤈᤠ ᤁᤧᤛᤢᤵᤛᤢᤶ᤹. ᤌᤣᤀᤠᤱᤓᤧᤸᤗᤧ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤂᤧᤴ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢ᤹॥ 39 ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤁᤧᤃᤣ᤺ᤳᤋᤢᤶ᤹ ᤜᤧᤰᤁᤩᤠᤱ ᤁᤢᤈᤠ᤹ ᤌᤥ᤺ᤰᤗ ᤁᤧᤕᤠ᤺ᤴᤍᤢᤶ᤹. ᤁᤖ ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤌᤢᤱᤔᤠ ᤏᤢ ᤆᤧᤸᤗᤧᤰᤛᤣ᤹ ᤛᤢᤶᤔᤠ ᤁᤧᤱᤄᤥᤛᤢᤶᤔᤡᤴ᤹. ᤌᤣᤀᤠᤱᤓᤧᤸᤗᤧ ᤑᤣ᤹ᤒᤠ᤺ᤳᤜᤠ᤹ᤖᤧ ᤂᤧᤴ ᤔᤧᤈᤔᤧᤍᤣᤛᤢ᤹॥ 40 ᤗᤠᤈᤣ᤹ ᤁᤧᤖᤧᤰ ᤂᤡᤏᤡ᤹ ᤆᤤᤋᤢᤏᤜᤠ᤹ ᤁᤧᤗᤣ᤺ᤳᤋᤢᤶ᤹. ᤁᤖ ᤂᤡᤏᤡ᤹ ᤏᤡ᤺ᤱᤃᤣ᤹ ᤕᤢᤔᤠ ᤁᤧᤱᤄᤥᤛᤢᤶᤔᤡᤴ᤹. ᤌᤣᤀᤠᤱᤓᤧᤸᤗᤧ ᤆᤤᤋᤢᤏᤧᤸᤗᤧ ᤁᤢᤈᤠ᤹ᤜᤠ᤹ ᤂᤠᤶᤒᤠᤱᤅᤥ ᤔᤰᤌᤠᤒᤣ᤺ᤰ॥ 41 ᤂᤡᤏᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤔᤧᤘᤠ᤹. ᤁᤖ ᤂᤡᤏᤡ᤹ ᤂᤧᤱᤜᤠ᤹ ᤁᤵᤔᤠ ᤁᤧᤱᤄᤥᤛᤢᤶᤛᤡᤔᤡᤴ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ᤹॥ 42 ᤂᤡᤏᤡ᤹ ᤛᤡᤱᤒᤢᤱᤜᤠ᤹ ᤏᤢ ᤗᤠᤈᤣ᤹ᤀᤥᤒᤠ ᤁᤢᤈᤠᤜᤠ᤹ ᤁᤧᤖᤧᤰ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢ᤹॥ 43 ᤂᤡᤏᤡ᤹ ᤗᤢᤶᤔᤥ ᤕᤠᤱᤃᤧᤎᤥ᤺ᤰᤐᤠ ᤘᤣ᤹ ᤗᤠᤈᤣ᤹ᤒᤠᤴ ᤂᤡᤏᤡ᤹ᤏᤢ᤺ᤸᤗᤧ ᤌᤥᤎᤥᤰᤐᤠ ᤐᤥᤱᤗ ᤐᤣᤰ. ᤁᤖ ᤂᤡᤏᤡ᤹ ᤕᤥᤕᤥᤰ ᤁᤧᤒᤥ᤺ᤰᤂᤡᤖ ᤁᤧᤒᤣᤃᤡ᤹॥ 44 ᤂᤧᤸᤗᤧ ᤂᤡᤏᤡ᤹ ᤛᤡᤱᤏᤠᤳ ᤁᤧᤒᤡᤖᤡ᤹. ᤁᤖ ᤂᤡᤏᤡ᤹ ᤂᤧᤴ ᤛᤡᤱᤏᤠᤳ ᤁᤧᤶᤒᤡᤖᤢᤶᤔᤡᤴ᤹॥ ᤂᤧᤴᤃ ᤋᤃᤠᤱ ᤐᤥᤱ᤹. ᤁᤖ ᤂᤡᤏᤡ᤹ᤃ ᤀᤣᤃᤠᤱ ᤁᤧᤒᤥ᤺ᤰᤂᤡ᤹॥ 45 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤀᤡᤱᤈᤠᤱᤜᤠ᤹ ᤏᤢ ᤌᤡᤶᤜᤠ᤹ ᤋᤡᤶᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴᤏᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤔᤧᤶᤔᤧᤰᤁᤣ ᤌᤠᤖᤡᤰ ᤁᤴ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤂᤡᤏᤡ᤹ ᤛᤶᤎᤠᤱ ᤌᤠᤀᤠᤱ ᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤖᤥ॥ 46 ᤂᤡᤏᤡ᤹ ᤏᤢ ᤂᤡᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤂᤧᤴ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤧᤜᤡᤖᤧ ᤔᤧᤴᤎᤠᤵᤔᤏᤠᤒᤠ ᤐᤠ᤺ᤴᤜᤠ᤹ ᤐᤥᤱ᤹॥ 47 ᤂᤡᤏᤡ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤘᤧᤳᤋᤧᤛᤖᤧ ᤁᤧᤃᤳᤋᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤋᤩᤧᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤁᤧᤶᤔᤧᤳᤋᤢᤶᤔᤡᤴ᤹॥ 48 ᤁᤸᤗᤧᤆᤥᤃᤢᤸᤗᤧ ᤛᤠᤰᤔᤧᤴᤈᤠ. ᤘᤔᤧᤴᤎᤢᤱ. ᤗᤧᤰᤆᤠ᤹ ᤏᤢ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥ ᤁᤧᤎᤩᤧ᤹ᤀᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤐᤠᤱᤄᤢ ᤋᤠᤛᤢᤛᤡᤒᤠ ᤏᤡᤱᤔᤡᤜᤠ᤹ ᤕᤠ᤺ᤶᤒᤰ ᤁᤧᤈᤥᤃᤢᤶ ᤁᤧᤒᤡᤖᤢᤶᤛᤡᤶ᤹॥ ᤂᤢᤏᤧ᤹ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤁᤧᤶᤔᤧᤰᤂᤡᤴᤗ ᤌᤠᤖᤡᤰ ᤂᤡᤏᤡ᤹ ᤑᤰᤋᤠᤱᤅᤥ ᤑᤧᤴᤈᤣ᤹ ᤂᤧ᤺ᤵᤛᤡᤱᤅᤡᤴ ᤑᤳᤇᤢ ᤁᤧᤒᤡᤖᤡ᤹॥ 49 ᤕᤜᤘᤣ ᤍᤠᤱᤒᤧᤸᤗᤧ ᤔᤠ᤺ᤱᤄᤠᤗᤠᤶ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤛᤔᤠ ᤁᤢᤕᤠᤀᤥᤏᤢ ᤛᤢᤒᤢᤒᤢᤏᤠ ᤁᤰᤁᤑᤡ᤺ᤰᤔᤠᤸᤗᤧ ᤔᤢ ᤑᤳᤋᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠ ᤗᤳᤇᤠ ᤛᤢᤘᤠᤱᤛᤔᤠ ᤔᤏᤠᤜᤠ᤹ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤋᤠᤖᤢᤛᤡ᤹. 50 ᤁᤢᤗᤢᤱᤔᤠ᤹ᤀᤥ ᤁᤢᤶᤒᤪᤡᤰ ᤁᤧᤕᤢᤱᤒᤠ ᤛᤢᤘᤠᤱᤛᤔᤠ ᤔᤏᤠᤜᤠ᤹ᤖᤧ ᤁᤠᤵᤐᤥ ᤋᤢᤶᤛᤠᤜᤠ᤹ ᤏᤠᤔᤧᤴᤇᤠ᤹ᤖᤢᤛᤡᤴ᤹ ᤜᤧᤰᤁᤩᤠᤱ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤂᤢᤴᤇᤡ᤹ ᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤏᤧᤴ᤹॥ 51 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤐᤡᤳᤌᤰᤛᤠᤜᤠ᤹ᤀᤥᤒᤠ ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳᤛᤠᤳᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤥᤒᤠ ᤔᤧᤸᤗᤢᤰ ᤔᤧ᤺ᤴᤍᤛᤠ᤺ᤳᤜᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤈᤣ᤹ᤀᤥᤒᤠ ᤁᤢᤈᤠᤜᤠ᤹ ᤂᤡᤏᤡ᤹ ᤁᤧᤔᤧᤃᤡᤖ ᤕᤠᤖᤡᤰ ᤔᤧᤈᤔᤧᤍᤣᤛᤢ᤹॥ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤁᤧᤒᤥ᤺ᤰᤂᤡᤖ ᤕᤠᤖᤡᤰ ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ. ᤆᤤᤋᤢᤏ ᤏᤡ᤺ᤱᤃᤣ᤹. ᤐᤡᤳᤌᤰᤛᤠᤜᤠ᤹ᤀᤥᤒᤠ ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳᤛᤠᤳᤜᤠ᤹ ᤀᤡᤃᤪ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤥᤒᤠ ᤁᤢᤶᤒᤠᤒᤠ ᤁᤢᤶᤔᤠᤔᤠ ᤔᤧᤸᤗᤢᤰ ᤔᤧ᤺ᤴᤍᤛᤠ᤺ᤳᤜᤠ᤹ᤀᤥ ᤁᤢᤓᤠ ᤌᤣᤀᤠᤱ ᤔᤧᤸᤗᤧᤖᤢᤴ᤹॥ 52 ᤂᤡᤏᤡ᤹ ᤁᤧᤖᤧᤰ ᤕᤧᤰᤕᤰᤜᤠ᤹ ᤁᤡᤷᤃᤵ ᤔᤧᤃᤒᤢ ᤔᤧᤏᤧᤛ᤻ᤛᤢ᤹. ᤜᤧᤰᤁᤩᤠᤱ ᤂᤡᤏᤡ᤹ ᤋᤠ᤺ᤰᤐᤥ ᤁᤧᤕᤢᤰᤂᤢᤶᤒᤠ ᤗᤠᤈᤣ᤹ ᤁᤧᤖᤧᤰᤐᤠ ᤁᤣ᤺ᤶᤒᤠ ᤗᤢᤱᤎᤠᤰᤜᤠ᤹ ᤂᤧᤱᤜᤠ᤹ᤖᤧ ᤔᤧᤗᤢ᤺ᤴᤍᤢ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤁᤧᤖᤧᤰ ᤗᤠᤈᤣ᤹ ᤁᤢᤗᤧ᤺ᤶ ᤂᤧᤱᤜᤠ᤹ᤖᤧ ᤕᤧᤰᤕᤰᤜᤠ᤹ ᤌᤰᤔᤠ ᤂᤡᤏᤡ᤹ ᤁᤡᤷᤃᤵ ᤁᤧᤶᤃᤒᤡ᤹॥ 53 ᤁᤡᤷᤃᤵ ᤁᤧᤶᤃᤒᤡᤒᤠ ᤕᤧᤶᤔᤥ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤋᤢᤰᤂᤣ ᤁᤧᤶᤈᤠ᤺ᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤔᤢ᤹ᤀᤡᤍᤠᤱᤛᤠ. ᤀᤠᤵᤑᤣᤰ ᤛᤠᤜᤠ᤹ᤀᤠᤱ ᤂᤡᤏᤡ᤹ ᤁᤧᤈᤠᤶᤛᤡᤶ᤹॥ 54 ᤂᤡᤏᤡ᤹ᤀᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤢᤛᤢᤳᤏᤠ ᤁᤧᤏᤢ᤹ᤒᤠ ᤏᤢ ᤛᤠ᤹ᤖᤡᤰ ᤛᤡᤶᤛᤡᤶᤒᤠ ᤔᤏᤠ᤺ᤸᤗᤧᤀᤠᤱ ᤀᤠᤵᤑᤣᤰ ᤁᤢᤴᤛᤠ᤹. ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤔᤠ ᤁᤢᤔᤣ᤺ᤳᤋᤡᤴ ᤜᤧᤰᤁᤩᤠᤱ ᤁᤧᤍᤠᤱᤒᤠ ᤀᤅᤧ᤺ᤰᤘᤠ ᤁᤢᤛ᤻ᤛᤠ ᤁᤢᤀᤣᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤴ᤹॥ 55 ᤁᤶᤓᤩᤠᤖᤡᤰ ᤛᤠ᤹ᤖᤡᤰᤁᤠᤱ ᤐᤥᤱ᤹. ᤂᤢᤏᤧ᤹ ᤆᤖ ᤕᤢᤱᤒᤠ ᤀᤅᤧ᤺ᤰᤘᤠ ᤁᤢᤛ᤻ᤛᤠᤜᤠ᤹ᤗᤠᤶᤒᤠᤒᤠ ᤛᤠᤴ ᤘᤣ᤹ ᤜᤠ᤺ᤳᤋᤠᤱ ᤔᤧᤒᤡᤖᤢᤴ᤹॥ ᤏᤡᤱᤔᤡᤜᤠ᤹ᤖᤧ ᤂᤡᤏᤡ᤹ ᤕᤧᤰᤕᤰᤜᤠ᤹ ᤁᤡᤷᤃᤵ ᤔᤧᤃᤒᤢ ᤔᤧᤏᤧᤛ᤻ᤛᤢᤒᤠ ᤛᤠ᤹ᤖᤡᤰ ᤕᤶᤒᤠ ᤋᤢᤰᤂᤣᤀᤥ ᤂᤧᤴ ᤔᤏᤠᤀᤥ ᤘᤣ᤹ ᤌᤧᤔᤠ᤺ᤴᤏᤠᤱ ᤔᤧᤍᤠᤱᤏᤧᤴ ᤔᤧᤕᤠ᤺ᤰᤏᤧᤴ᤹॥ 56 ᤂᤡᤏᤡ᤹ᤀᤥᤒᤠ ᤁᤢᤛᤢᤳᤏᤠ ᤁᤧᤏᤢ᤹ᤒᤠ ᤏᤢ ᤛᤠ᤹ᤖᤡᤰ ᤛᤡᤶᤛᤡᤶᤔᤠ. ᤂᤠᤶᤒᤠᤱᤅᤥᤀᤠᤱ ᤁᤢᤗᤠᤱᤕᤥᤰ ᤔᤧᤴᤎᤠᤔᤏᤠᤔᤠ ᤁᤢᤛᤢᤳᤏᤠ ᤁᤧᤏᤢ᤹ᤔᤠ ᤏᤢ ᤛᤡᤶᤛᤡᤶ ᤁᤧᤗ᤹ᤔᤠ ᤔᤧᤴᤇᤢᤔᤠ᤺ᤸᤗᤧ ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤏᤢ ᤀᤠᤵᤑᤣᤰ ᤁᤢᤛ᤻ᤛᤠᤜᤠ᤹ 57 ᤂᤢᤏᤧ᤹ ᤁᤢᤛ᤻ᤛᤠ ᤕᤠᤱᤍᤠᤱᤅᤥᤗᤠᤶ ᤁᤧᤗ᤺ᤶᤒᤠ ᤐᤧ᤹ᤜᤡ᤺ᤴ ᤏᤢ ᤂᤢᤏᤧ᤹ ᤌᤠᤵᤋᤢᤛᤡᤒᤠ ᤀᤠᤶᤒᤪᤧ᤺ᤱᤘᤠ ᤁᤢᤛ᤻ᤛᤠᤜᤠ᤹ᤗᤠᤶᤒᤠᤒᤠ ᤛᤠ᤺ᤴᤏᤠᤱ ᤆᤠᤔᤠᤖᤧ ᤗᤠᤃᤡ ᤐᤡᤔᤠᤛᤡ ᤔᤧᤍᤧᤴᤏᤧᤴ᤹॥ ᤂᤢᤏᤧ᤹ ᤁᤢᤛᤰᤔᤠ ᤜᤡ᤺ᤰᤜᤡ᤺ᤰ ᤁᤧᤗ᤹ᤔᤠ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤡᤷᤃᤵ ᤁᤵᤔᤠ ᤕᤧᤶᤔᤥ ᤏᤡᤱᤔᤡᤜᤠ᤹ᤖᤧ ᤂᤡᤏᤡ᤹ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤂᤡᤏᤡ᤹ ᤋᤢᤰᤂᤣ ᤁᤧᤶᤈᤠ᤺ᤳᤋᤡᤒᤠ ᤛᤠ᤹ᤖᤡᤰ ᤕᤶᤒᤠ ᤋᤢᤰᤂᤣᤀᤥ ᤂᤧᤸᤗᤧ ᤛᤫᤠ᤺ᤳᤋᤠᤱ ᤂᤧᤴ ᤛᤠᤴ ᤀᤠᤵᤑᤣᤰ ᤆᤠᤔᤠ ᤏᤡᤱᤘᤠ᤹ ᤆᤥᤃᤢ᤹॥ 58 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤔᤡᤍᤡᤱᤃᤧᤴ ᤁᤡᤵᤔᤠᤃᤧᤄᤢᤒᤠ ᤁᤢᤔᤡᤱᤅᤥ ᤁᤧᤱᤃᤡᤛᤡᤴ ᤜᤧᤰᤁᤩᤠᤱ ᤂᤡᤏᤡ᤹ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤧᤖᤧᤰ ᤁᤢᤒᤠ᤺ᤴᤈᤠᤰᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤧᤓᤃᤪ. 59 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤢ ᤂᤡᤏᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ᤀᤥ ᤁᤡᤵᤔᤠᤃᤧᤄᤢᤒᤠ. ᤌ᤺ᤵᤔᤧᤴᤍᤧᤵᤔᤏᤠᤒᤠ ᤏᤢ ᤆᤰᤔᤧᤸᤗ᤹ᤒᤠ ᤋᤢᤰᤂᤣᤜᤠ᤹ ᤜᤧᤰᤁᤩᤠᤱ ᤜᤠᤖᤠᤘᤖᤠ᤹ ᤔᤧᤴᤘᤣ᤺ᤵᤔᤏᤠᤒᤠ ᤛᤠ᤹ᤖᤡᤰ ᤕᤶᤒᤠ ᤋᤢᤰᤔᤠᤜᤠ᤹ ᤋᤠᤖᤢᤖᤥ॥ 60 ᤔᤡᤛᤪᤒᤠ ᤋᤢᤰᤔᤠᤜᤠ᤹ᤗᤠᤶ ᤂᤡᤏᤡ᤹ ᤁᤧᤃᤡᤛᤡᤀᤠᤱ ᤘᤕᤧ. ᤂᤧᤴ ᤁᤧᤖᤧᤰ ᤋᤢᤰᤔᤠᤜᤠ᤹ ᤂᤢᤏᤧ᤹ ᤂᤡᤏᤡ᤹ᤀᤥ ᤋᤠᤖᤢᤖᤥ. ᤜᤧᤰᤁᤩᤠᤱ ᤂᤧᤴ ᤋᤢᤰᤔᤠᤜᤠ᤹ ᤂᤡᤏᤡ᤹ᤀᤥ ᤂᤡᤶᤛᤡᤱ᤹॥ 61 ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤐᤖᤡᤰᤐᤠ ᤋᤢᤰᤔᤠ ᤏᤢ ᤁᤧᤛᤠᤰᤐᤠ ᤋᤢᤰᤂᤣᤜᤠ᤹ᤀᤠᤱ ᤂᤡᤏᤡ᤹ ᤔᤧᤶᤔᤧᤰᤁᤣ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ᤀᤥ ᤋᤠᤖᤢ᤹॥ 62 ᤋᤃᤡ ᤂᤡᤏᤡ᤹ ᤋᤠᤱᤛᤠᤱᤒᤥᤒᤠ ᤂᤣᤛᤣᤒᤠᤜᤠ᤹ ᤕᤠᤖᤡᤰ ᤁᤧᤘᤠ᤹ᤒᤠᤜᤠ᤹ ᤛᤢ᤺ᤸᤗᤡᤰ ᤌᤡᤰᤗᤰ ᤁᤧᤍᤠᤅᤡ ᤁᤧᤕᤠ᤺ᤰᤋᤡ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴ॥ 63 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤩᤧᤖ ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠ ᤏᤢ ᤁᤧᤒᤥ᤺ᤴᤍᤡ ᤁᤧᤎᤧ᤹ᤖᤡᤖ ᤆᤥᤃᤢ. ᤀᤠᤸᤗ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤖ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤡᤀᤠᤱ ᤁᤧᤔᤧᤰᤂᤡ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠ᤺ᤵᤔᤠ ᤁᤧᤈᤥᤃᤡᤒᤠ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤜᤠ᤹ᤕᤠᤰ ᤁᤧᤀᤠᤃᤡ᤹॥ 64 ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤗᤳᤇᤠ ᤁᤢᤕᤠᤀᤥᤏᤢ ᤘᤣ᤹ᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤘᤣ᤹ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤁᤧᤛᤧᤛᤡ᤹॥ ᤂᤧᤵᤔᤥ ᤂᤡᤏᤡ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤛᤡᤶᤔᤡᤴᤒᤠ ᤜᤧᤰᤁᤩᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤛᤡᤴᤒᤠ ᤛᤡᤱ ᤏᤢ ᤗᤢᤱᤗᤠᤶ ᤔᤧᤈᤥᤃᤢᤛᤡᤒᤠ ᤘᤣ᤹ ᤔᤠᤱᤜᤠ᤹ ᤂᤡᤏᤡ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ᤹॥ 65 ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤢᤖᤡᤰ ᤋᤠᤖᤡᤰᤁᤠᤱ ᤕᤢᤱᤔᤠ ᤁᤧᤱᤄᤥᤛᤢᤶᤔᤡᤴ. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤱᤋᤥ᤹ᤓᤣᤳ ᤏᤠ᤺ᤶᤔᤠᤍᤧᤴᤏᤠᤱ ᤁᤧᤱᤄᤥᤛᤢᤶᤔᤡᤴ॥ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠ. ᤜᤠᤱᤔᤠᤖᤧ ᤜᤠᤱᤔᤠᤖᤧ ᤔᤡᤰᤁᤥ ᤛᤢᤖᤡᤳ ᤗᤠ᤺ᤵᤔᤠ ᤏᤢ ᤏᤡᤱᤘᤠ᤹ ᤛᤪᤥ᤺ᤴ ᤁᤧᤗ᤹ᤒᤠ ᤆᤥᤃᤢ ᤁᤧᤒᤡᤖᤡ᤹॥ 66 ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤕᤥᤏᤠᤎᤥᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤜᤡᤅᤡ᤹॥ ᤛᤧᤴᤍᤡᤰ ᤗᤧᤴᤍᤡᤰ ᤁᤡᤔᤠᤖᤧ ᤆᤡᤖᤡᤶᤗᤡᤶᤏᤠ ᤁᤧᤕᤰᤂᤡ᤹ ᤜᤧᤰᤁᤩᤠᤱ ᤀᤠᤛᤡᤛᤡᤒᤠ ᤁᤡᤔᤧᤸᤗᤧ ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤁᤧᤃᤡᤛᤡ᤹॥ 67 ᤂᤡᤏᤡ᤹ ᤏᤡᤱᤘᤠ᤹ᤀᤥ ᤐᤃᤡ ᤁᤧᤃᤡᤛᤡᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤂᤡᤏᤡ᤹ ᤔᤡᤰᤁᤡᤸᤗᤧ ᤏᤡᤛᤢᤒᤠ ᤏᤡᤕᤠᤖᤠ᤺ᤸᤗᤧ ᤆᤥᤃᤢᤸᤗᤧ ᤋᤠᤏᤠᤶ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ᤹. “ᤕᤢ᤺ᤴᤇᤡᤰ ᤐᤥᤱᤅᤡᤸᤗᤧᤃᤔᤧᤴ ᤏᤢ᤹ᤒᤠᤔᤧᤴ᥄” ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤁᤧᤒᤠ᤺ᤳᤋᤢᤶ᤹. “ᤋᤠᤏᤠᤶ ᤂᤠᤀᤥ᤺ᤳᤋᤡᤸᤗᤧᤃᤔᤧᤴ ᤏᤢ᤹ᤒᤠᤔᤧᤴ᥄” 68 ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤔᤡᤛᤪ ᤗᤠᤈᤣ᤹ᤀᤥ ᤕᤠᤱᤏᤠ ᤔᤧᤏᤢ᤺ᤰᤏᤡᤱᤅᤡᤴ ᤐᤠ᤺ᤳᤋᤢᤀᤠᤱ ᤘᤕᤧᤛᤠᤱ ᤘᤠᤗᤠᤎᤠᤜᤠ᤹ᤗᤠᤶ ᤂᤢᤏᤧ᤹ ᤂᤧᤵᤔᤥ ᤕᤠᤶᤔᤥ ᤕᤠᤱᤏᤠ ᤁᤧᤒᤠᤱᤄᤡ᤹॥ ᤂᤧᤵᤔᤥ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤐᤥᤱᤔᤠᤖᤧ ᤗᤠᤃᤡ ᤂᤡᤏᤡ᤹ ᤀᤠᤵᤑᤣᤰ ᤛᤱᤔᤠᤛᤡᤱ ᤋᤶᤛᤡᤱ ᤁᤧᤈᤥᤃᤢᤶ᤹. ᤁᤖ ᤜᤠ᤺ᤳᤗᤧᤀᤠᤱ ᤂᤡᤏᤡ᤹ ᤁᤧᤴᤀᤡᤅᤡᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.