ᤛᤠᤶᤕᤥᤌᤡᤶ ᤀᤡᤱ 27 - LIFOTNTᤀᤣᤒᤠᤗ ᤌᤧᤃᤢᤀᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ 1 ᤔᤥᤛᤠ᤺ᤴ. ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤏᤢ ᤕᤧᤶᤛᤡᤱᤅᤠᤱ ᤔᤏᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ 2 ᤀᤠᤸᤗ ᤕᤷᤍᤏ ᤘᤜ᤺ᤱᤅᤡᤴ ᤁᤧᤃᤠ᤺ᤰᤋᤢᤶᤔᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤏᤧᤒᤠ ᤗᤠᤈᤣ᤹ᤀᤥ ᤁᤧᤃᤧᤖᤡ᤹. ᤂᤧᤒᤧᤸᤗᤧ ᤕᤶᤒᤕᤶᤒᤠ ᤗᤢᤱᤜᤠ᤹ ᤋᤰᤐᤧᤳ ᤕᤧᤵᤛᤠᤶᤔᤧ᤹ᤀᤠᤱ ᤛᤡᤒᤢᤳᤋᤧᤸᤗᤧ ᤜᤡᤵᤋᤧᤶᤔᤧ᤹॥ 3 ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤏᤧᤒᤠ. ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤀᤥ ᤁᤧᤗᤠᤛᤡᤒᤠ ᤕᤧᤴᤏᤥ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤁᤵᤔᤥ ᤛᤠᤵᤋᤧᤶᤔᤧ᤹॥ 4 ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤃᤧᤖᤡᤒᤠ ᤕᤧᤴᤏᤥ ᤀᤠᤱᤃᤠ᤹ ᤀᤠᤀᤡᤴ ᤀᤡᤱᤈᤠᤱ ᤐᤡᤏᤡᤱᤒᤠ ᤁᤢᤀᤡᤛᤡᤰ ᤁᤴ ᤗᤢᤱᤜᤠ᤹ ᤀᤣᤒᤠᤗ ᤌᤧᤃᤢᤀᤥ ᤕᤧᤵᤛᤠᤶᤔᤧ᤹ᤀᤠᤱ ᤛᤡᤒᤢᤳᤋᤧᤸᤗᤧ ᤜᤡᤵᤋᤧᤶᤔᤧ᤹॥ 5 “ᤂᤧᤒᤩᤠᤱ ᤀᤠᤶᤓᤠ ᤂᤧᤵᤔᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤗᤢᤱᤅᤡᤸᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤧᤶᤔᤧ᤹॥ ᤂᤧᤵᤔᤥ ᤑᤧᤴᤈᤣ᤹ ᤛᤠᤷᤍᤠᤶ ᤔᤧᤕᤠᤅᤠᤶᤔᤡᤴᤏᤧ᤹॥ 6 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤀᤡᤰᤋᤠᤵᤐᤥᤒᤠ ᤗᤢᤱᤜᤠ᤹ᤗᤠᤶ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ 7 ᤂᤡᤏᤡ᤹ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹ᤀᤠᤱ ᤜᤠᤒᤠ ᤂᤧᤵᤔᤥ ᤆᤧᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤥᤛᤥ᤺ᤳ ᤗᤖᤠᤱ ᤆᤥᤃᤧᤶᤔᤧ᤹॥ 8 ᤂᤡᤏᤡ᤹ ᤁᤧᤕᤧᤵᤛᤢᤶᤒᤠ ᤂᤧᤴ ᤗᤢᤱᤜᤠ᤹ᤀᤥ ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤏᤢᤖᤡᤰᤁᤠᤱ ᤛᤠᤵᤋᤧᤶᤔᤧ᤹॥” 9 ᤂᤧᤒᤩᤠᤱ ᤔᤥᤛᤠᤴ ᤏᤢ ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤡᤛᤣ. ᤛᤫᤠ᤺ᤳ ᤕᤢᤅᤧᤶᤔᤧ᤹ᤀᤠᤱ ᤂᤧᤵᤛᤧᤶᤔᤧ᤹᥄ ᤀᤠᤀᤡᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤣᤰ ᤁᤢᤔᤏᤠ ᤁᤧᤒᤥ᤺ᤰᤂᤡᤀᤠᤱ ᤘᤠ᤹॥ 10 ᤀᤠᤱᤃᤠ᤹ ᤀᤠᤀᤡᤴ ᤀᤡᤱᤈᤠᤱ ᤐᤡᤏᤡᤱᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤏᤢ ᤁᤢᤎᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤧᤶᤔᤧ᤹ᤀᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ᤀᤥ॥” ᤀᤣᤒᤠᤗ ᤌᤧᤃᤢᤀᤥᤒᤠ ᤔᤠᤱᤍᤣ ᤛᤠᤱᤃᤪᤠᤜᤠ᤹ 11 ᤜᤠᤒᤠ ᤂᤧᤴ ᤕᤧᤴᤏᤥ ᤔᤥᤛᤠ᤺ᤸᤗᤧ ᤔᤏᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. 12 “ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤃᤠ᤺ᤰᤋᤢᤶᤔᤠᤱ ᤀᤣᤃᤠᤱ ᤛᤡᤔᤡᤕᤥᤏ. ᤗᤧᤒᤡ. ᤕᤜᤢᤍᤠ. ᤀᤡᤛ᤻ᤛᤠᤂᤠᤖ. ᤕᤢᤛᤢᤑ ᤏᤢ ᤒᤣᤏᤩᤠᤔᤡᤏᤧᤴ ᤔᤏᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤔᤠᤛᤡᤖᤧ ᤗᤠᤃᤡ ᤃᤡᤖᤡᤈ᤻ᤈᤡᤔ ᤁᤥ᤺ᤰᤔᤠᤀᤥ ᤕᤧᤒᤧᤶᤔᤧ᤹॥ 13 ᤖᤢᤒᤣᤏ. ᤃᤠᤍ. ᤀᤠᤛᤣᤖ. ᤈᤒᤗᤢᤏ. ᤍᤠᤏ ᤏᤢ ᤏᤵᤋᤠᤗᤡᤴ ᤀᤣᤒᤠᤗ ᤁᤥ᤺ᤰᤔᤠᤀᤥ ᤕᤧᤒᤧᤶᤔᤧ᤹ᤀᤠᤱ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤠᤶᤛᤡᤶᤔᤧ᤹॥ 14 “ᤜᤧᤰᤁᤩᤠᤱ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠ᤺ᤸᤗᤧ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤀᤢᤘᤠ ᤔᤧᤈᤥᤃᤢᤛᤡᤖᤖᤥ. 15 “‘ᤆᤥᤒᤣᤃᤢ᤺ᤸᤗᤧ ᤆᤥᤃᤢᤒᤠ ᤜᤧᤰᤁᤣ ᤗᤰᤔᤏᤠᤒᤠ ᤀᤡᤃᤪ ᤕᤥ᤺ᤶᤔᤏᤠᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤁᤧᤗᤧ᤺ᤱᤒᤠ ᤏᤠᤘᤠᤀᤡᤳᤗᤠᤴ ᤛᤫᤠ᤺ᤳᤋᤠᤱ ᤁᤧᤕᤢᤱᤒᤠ ᤔᤏᤠᤴ ᤛᤠᤱᤃᤪᤠᤖᤧ ᤋᤧᤳᤋᤢᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 16 ‘ᤀᤠᤵᤑᤣᤰ ᤁᤢᤶᤒᤠ ᤁᤢᤶᤔᤠ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠ ᤔᤏᤠᤴ ᤔᤠᤱᤍᤣ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 17 ‘ᤀᤠᤵᤑᤣᤰ ᤁᤢᤜᤡᤶᤒᤣᤛᤠᤱᤒᤧᤸᤗᤧ ᤁᤢᤀᤡ᤺ᤴᤍᤥᤀᤥᤒᤠ ᤗᤢᤱ ᤁᤧᤈᤵᤐᤠ ᤔᤏᤠᤴ ᤛᤠᤱᤃᤪᤠ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 18 ‘ᤁᤢᤔᤡᤰ ᤁᤧᤜᤥ᤺ᤵᤐᤠᤴ ᤌᤡᤰᤏᤠᤜᤠᤱ ᤗᤠᤶ ᤀᤥ᤺ᤴᤃᤧᤎᤠᤰᤐᤠ ᤔᤏᤠᤴ ᤔᤠᤱᤍᤣ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 19 ‘ᤘᤣ᤹ ᤗᤠᤈᤣ᤹ᤒᤠ. ᤕᤧᤳᤇᤠᤒᤠ ᤕᤧᤳᤇᤠᤔᤠ ᤏᤢ ᤔᤣᤔᤣᤍᤢᤔᤠᤜᤠ᤹ᤖᤧ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤴᤗᤥ᤺ᤶᤔᤏᤠᤒᤠ ᤔᤏᤠᤴ ᤛᤠᤱᤃᤪᤠ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 20 ‘ᤀᤠᤵᤑᤣᤰ ᤁᤢᤶᤒᤠᤖᤧ ᤁᤢᤔᤣ᤺ᤳᤜᤠ᤹ᤏᤢ ᤁᤧᤀᤡᤶᤒᤠ ᤔᤏᤠᤴ ᤔᤠᤱᤍᤣ ᤌᤠᤖᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤵᤑᤣᤰ ᤁᤢᤶᤒᤠᤖᤧ ᤁᤢᤀᤡᤵᤏᤠᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 21 ‘ᤌᤰᤛᤠ ᤔᤣ᤺ᤳ ᤁᤧᤔᤧᤵᤐᤠ ᤔᤏᤠᤴ ᤔᤠᤱᤍᤣ ᤌᤠᤖᤖᤥ᥄’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 22 ‘ᤀᤠᤵᤑᤣᤰ ᤁᤢᤶᤒᤠ ᤀᤡᤃᤪ ᤁᤢᤶᤔᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ. ᤁᤡᤃᤪ ᤀᤠᤵᤑᤣᤰ ᤁᤢᤴᤛᤠ᤹ ᤔᤧᤴᤇᤢᤔᤠᤴ ᤔᤣ᤺ᤳ ᤁᤧᤍᤣ᤹ᤒᤠ ᤔᤏᤠᤴ ᤛᤠᤱᤃᤪᤠᤖᤧ ᤋᤧᤳᤋᤢᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 23 ‘ᤀᤠᤵᤑᤣᤰ ᤁᤢᤴᤏᤢ᤺ᤵᤔᤧᤴ ᤔᤣ᤺ᤳ ᤁᤧᤍᤣ᤹ᤒᤠ ᤔᤏᤠᤴ ᤔᤠᤱᤍᤣ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 24 ‘ᤛᤫᤠ᤺ᤳᤋᤠᤱ ᤁᤢᤜᤡᤶᤒᤣᤛᤠᤱᤒᤠ ᤔᤏᤠ ᤁᤧᤛᤧᤵᤐᤧᤴ ᤛᤠᤱᤃᤪᤠ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 25 ‘ᤁᤢᤍᤥ᤺ᤵᤔᤠ ᤔᤏᤠᤴ ᤛᤧᤵᤔᤠᤖᤧ ᤗᤠᤃᤡ ᤛᤫᤠ᤺ᤳ ᤛᤢᤖᤢᤋᤩᤠᤱ ᤁᤧᤈᤠᤒᤠ ᤔᤏᤠᤴ ᤛᤠᤱᤃᤪᤠ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥ 26 ‘ᤁᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤁᤢᤗᤡᤱᤍᤥ ᤁᤧᤳᤗ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤏᤠᤴ ᤔᤠᤱᤍᤣ ᤌᤠᤖᤖᤥ॥’ ᤂᤧᤒᤩᤠᤱ ᤁᤧᤖᤧᤰᤗᤧ ‘ᤀᤠᤔᤡᤴ᥄’ ᤔᤧᤒᤠ᤺ᤳᤋᤢᤖᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.