ᤛᤠᤶᤕᤥᤌᤡᤶ ᤀᤡᤱ 26 - LIFOTNT

ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤴ ᤌᤡᤒᤥᤱᤗᤰ ᤋᤥ᤺ᤶᤔᤠ

¹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤠᤵᤑᤣᤰ ᤕᤢᤰᤁᤥ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣ᤹ᤀᤥ ᤁᤧᤃᤧᤖᤡᤀᤠᤱ ᤂᤧᤴ ᤁᤧᤕᤢᤰᤋᤢᤶ᤹ ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤵᤔᤥ ᤁᤧᤕᤢᤅᤡᤀᤠᤱ ᤀᤣᤃᤠᤱ

² ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤏᤧᤒᤠ ᤗᤠᤈᤣ᤹ᤀᤥᤗᤠᤶ ᤁᤧᤒᤥ᤺ᤰᤐᤠ ᤁᤧᤖᤧᤰ ᤐᤖᤡᤰᤐᤠ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤴ ᤗᤳᤇᤠ ᤏᤠ᤹ᤀᤡᤔᤠᤀᤥ ᤕᤠᤰᤋᤧᤶᤔᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤣᤰ ᤁᤢᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤛᤣᤃᤢᤒᤠᤍᤧᤴᤏᤥ ᤋᤣ᤹ᤖᤧᤶᤔᤧ᤹.

³ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤐᤣᤃᤧᤶᤔᤧ᤹ᤀᤠᤱ ᤔᤧᤳᤋᤧᤶᤔᤧ᤹. “ᤂᤢᤏᤧ᤹ ᤀᤠᤏᤡᤃᤣ ᤐᤡᤏᤡᤱ ᤔᤧᤳᤋᤡᤃᤧᤀᤠᤱ ᤀᤠᤏᤡᤃᤣ ᤐᤠᤎᤧᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤁᤧᤖᤠᤱ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤱᤃᤠ᤹ ᤀᤢᤘᤠ ᤆᤥᤃᤢᤱ᤹॥”

⁴ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤡᤏᤡ᤹ ᤜᤢᤰᤁᤥᤗᤠᤶ ᤂᤧᤴ ᤏᤠ᤹ᤀᤡᤔᤠᤴ ᤕᤠᤱᤛᤡᤅᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤃᤡ ᤕᤢᤰᤂᤢ᤹॥

⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤡᤏᤡ᤹ ᤀᤰᤂᤣ ᤐᤠ᤺ᤳᤋᤧᤶᤔᤧ᤹. “ᤀᤠᤱᤃᤠ᤹ ᤀᤠᤍᤠᤰᤌᤧᤒᤠᤴ ᤋᤠᤰᤁᤧᤒᤧ᤹ᤒᤠᤀᤠᤱ ᤁᤧᤘᤠ᤹ᤒᤠ ᤀᤖᤠᤔᤡ ᤘᤕᤧ॥ ᤂᤢᤏᤧ᤹ ᤛᤢ᤺ᤸᤗᤡᤰ ᤁᤢᤜᤡᤶᤛᤕᤱᤜᤠ᤹ᤏᤢ ᤔᤡᤛᤪᤀᤥ ᤐᤣᤀᤠᤱ ᤘᤣ᤹ ᤗᤠᤈᤣ᤹ᤒᤠ ᤐᤥ᤺ᤰᤂᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ᤗᤠᤶ ᤗᤳᤇᤠ ᤐᤕᤶ ᤕᤶᤒᤠ. ᤔᤢᤰᤛᤠᤶᤒᤠ ᤏᤢ ᤀᤠᤳᤋᤠᤋᤠᤴᤏᤣ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤛᤢᤘᤠᤱ ᤐᤥ᤺ᤰᤂᤧ॥

⁶ ᤁᤖ ᤔᤡᤛᤪᤡᤜᤠ᤹ᤖᤧ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤡᤃᤧᤀᤠᤱ ᤀᤠᤏᤡᤃᤣ ᤋᤢᤰᤂᤣ ᤔᤧᤈᤠ᤺ᤳᤋᤡᤃᤧ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤁᤧᤛᤠᤰᤐᤠ ᤕᤥ᤺ᤰᤁᤥ ᤔᤧᤓᤳᤇᤡᤃᤧ॥

⁷ ᤂᤧᤒᤩᤠᤱ ᤀᤠᤏᤡᤃᤣ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤌᤠ᤺ᤰᤌᤧᤒᤠ᤺ᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤶᤒᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤏᤡᤃᤣ ᤀᤡᤰᤗᤠᤴ ᤂᤧᤵᤛᤢ ᤂᤶᤓᤩᤠᤱ ᤀᤠᤏᤡᤃᤣ ᤋᤢᤰᤂᤣ ᤗᤠᤰᤂᤣ. ᤛᤩᤠᤱᤔᤧᤴᤍᤠᤱ ᤆᤥᤃᤢᤶᤒᤧᤒᤠ ᤕᤠ᤺ᤶᤒᤰᤁᤡᤴ ᤏᤢ ᤀᤠᤏᤡᤃᤣ ᤛᤶᤎᤠᤱ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤛᤢ॥

⁸ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤎᤢᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤕᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤔᤧᤰᤔᤠᤛᤡᤔᤠ. ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤏᤢ ᤏᤧᤜᤡᤖᤧ ᤔᤧᤴᤎᤠᤵᤔᤏᤠᤒᤠ ᤕᤠ᤺ᤶᤒᤰᤜᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢ ᤜᤧᤰᤁᤩᤠᤱ ᤔᤡᤛᤪᤗᤠᤶ ᤀᤠᤏᤡᤃᤣ ᤗ᤺ᤳᤋᤡᤃᤧ ᤑᤧᤳᤋᤡᤃᤧ॥

⁹ ᤂᤢᤏᤧ᤹ ᤀᤠᤏᤡᤃᤣ ᤁᤴ ᤋᤧᤴᤏᤥ ᤑᤧᤳᤋᤡᤃᤧᤀᤠᤱ ᤁᤴ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣᤴ ᤐᤡᤖᤡᤃᤧ॥

¹⁰ ᤀᤠᤸᤗ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤧᤒᤡᤖᤠᤱᤒᤠ ᤗᤠᤈᤣ᤹ᤀᤥᤒᤠ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤴ ᤂᤧᤏᤧ᤹ᤀᤥ ᤋᤠᤖᤢᤱᤅᤠᤱ ᤘᤠ᤹ᤖᤥ॥” ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤴ ᤏᤠ᤹ᤀᤡᤔᤧᤴ ᤕᤢᤰᤂᤧᤶᤔᤧ᤹ ᤜᤧᤰᤁᤩᤠᤱ ᤛᤠᤒᤴ ᤜᤒᤳ ᤑᤴᤏᤠᤛᤡᤶᤔᤧᤶᤔᤧ᤹ᤀᤠᤱ ᤂᤢᤏᤧ᤹ ᤛᤧᤘᤠ ᤔᤧᤳᤋᤧᤶᤔᤧ᤹॥

¹¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢ᤺ᤒ᤻ᤏᤢᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤏᤢ ᤂᤡᤏᤡ᤹ ᤜᤡᤶᤛᤕᤱᤜᤠ᤹ ᤁᤧᤒᤡᤖᤡᤀᤠᤱ ᤘᤠ᤹. ᤂᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤂᤡᤏᤡ᤹. ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ. ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤀᤠᤱ ᤛᤥᤛᤥ᤺ᤳ ᤗᤖᤠᤱ ᤔᤧᤗ᤹ᤖ॥

¹² ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠᤜᤠ᤹ᤖᤧᤴ ᤁᤢᤳᤆᤡᤒᤠ ᤌᤡᤒᤥᤱᤗᤰ ᤁᤧᤍᤥ᤺ᤴᤍᤢᤶᤗ ᤐᤥᤱ᤹॥ ᤁᤴ ᤋᤱᤒᤣᤀᤥᤒᤠ ᤂᤡᤏᤡ᤹ ᤁᤧᤖᤧᤰ ᤌᤡᤒᤥᤱ ᤗᤰᤜᤠ᤹ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤘᤣ᤹ ᤗᤠᤈᤣ᤹ᤒᤠ. ᤕᤧᤳᤇᤠᤒᤠ ᤕᤧᤳᤇᤠᤔᤠ ᤏᤢ ᤔᤣᤔᤣᤍᤢᤔᤠᤜᤠ᤹ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤕᤧᤰᤕᤰᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤧᤴ ᤔᤧᤈᤀᤠᤱ ᤂᤢᤴᤇᤡ᤹ ᤛᤡᤰᤀᤣ᤺ᤵᤋᤢᤖ॥

¹³ ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤳᤋᤧᤶᤔᤧ᤹. “ᤀᤠᤱᤃᤠ᤹ ᤀᤠᤜᤡᤶᤔᤥᤗᤠᤶ ᤛᤣᤛᤣ ᤁᤢᤗᤰ ᤗ᤺ᤳᤋᤢᤱᤅᤠᤱ ᤂᤧᤏᤧ᤹ ᤁᤧᤀᤡᤱᤈᤠᤱ ᤁᤢᤀᤡᤛᤡᤰ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤘᤣ᤹ ᤗᤠᤈᤣ᤹ᤒᤠ. ᤕᤧᤳᤇᤠ ᤜᤥ᤹ᤍᤥ᤺ᤰ ᤏᤢ ᤔᤣᤔᤣᤍᤢᤔᤠᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤀᤠ॥ ᤀᤠᤱᤃᤠ᤹ ᤂᤧᤏᤧ᤹ ᤀᤠᤳᤋᤡᤴ ᤁᤧᤀᤡᤱᤈᤠᤱᤜᤠ᤹ᤀᤠᤱ ᤔᤧᤴᤓᤣ᤺ᤴᤏᤣ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤀᤠᤳᤋᤡᤴᤏᤠᤱ ᤏᤡᤱᤘᤠ᤹ᤔᤧᤶᤔᤢ᤺ᤴᤏᤣ ᤘᤠ᤹ᤀᤠ॥

¹⁴ ᤔᤧᤖᤡᤱᤎᤰᤔᤠ ᤕᤧᤶᤔᤥ ᤂᤧᤴ ᤛᤣᤛᤣ ᤗᤰᤁᤥᤗᤠᤶ ᤀᤠᤱᤃᤠ᤹ ᤌᤧᤔᤠᤀᤠᤱ ᤔᤧᤴᤈᤠᤀᤣ ᤁᤳᤋᤢᤱ᤹. ᤀᤠᤛᤢᤳᤌᤥ ᤐᤥ᤺ᤰᤂᤠᤱᤒᤠ ᤕᤧᤶᤔᤥᤀᤠᤱ ᤂᤧᤵᤔᤥᤗᤠᤶ ᤌᤧᤔᤠᤀᤠᤱ ᤔᤧᤸᤗ᤺ᤳᤋᤣ ᤁᤳᤋᤢᤱ᤹. ᤂᤧᤵᤔᤥᤗᤠᤶ ᤁᤧᤛᤡᤒᤠᤜᤠ᤹ᤀᤥ ᤌᤧᤔᤠᤀᤠᤱ ᤔᤧᤴᤍᤥ᤺ᤴᤏᤣ ᤘᤠ᤹ᤀᤠ॥ ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠ᤺ᤴᤈᤠ᤺ᤰᤁᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤖᤧᤰ ᤁᤧᤀᤡᤱᤈᤠᤱᤜᤠ᤹ ᤁᤧᤳᤋᤢᤱᤅᤠᤱ ᤘᤠ᤹॥

¹⁵ ᤂᤧᤏᤧ᤹ ᤁᤧᤛᤣᤛᤣ ᤕᤢᤱᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤥᤔᤧᤳᤋᤧ᤹ᤀᤠᤱ ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ॥ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤏᤢ ᤔᤠᤱᤜᤧᤰ ᤁᤧᤈᤥᤃᤢᤀᤠᤱ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤀᤠᤏᤡᤃᤣ ᤕᤠᤵᤔᤡ ᤁᤧᤒᤡᤖᤧᤒᤠ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤺ᤴᤏᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤧ᤹ᤀᤥ॥”

ᤕᤜᤘᤣ ᤍᤠᤱᤒᤧᤸᤗᤧ ᤀᤠᤵᤑᤣᤰ ᤁᤢᤔᤏᤠ

¹⁶ ᤀᤠᤶᤓᤠ ᤁᤴ ᤌᤡᤶᤜᤠ᤹ᤀᤣ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤀᤡᤴ ᤂᤡᤏᤡ᤹ ᤀᤡᤱᤈᤠᤱ ᤁᤧᤒᤡᤖᤡ᤹॥ ᤂᤧᤴ ᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤏᤡᤱᤘᤠ᤹ᤀᤥ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥

¹⁷ ᤕᤜᤘᤣ ᤍᤠᤱᤒᤧᤴ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤗᤥ. ᤀᤠᤏᤡᤃᤣ ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤄᤣᤃᤡᤃᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤠᤰᤌᤡᤶ. ᤁᤢᤀᤡᤱᤈᤠᤱ ᤏᤢ ᤁᤢᤎᤡᤶᤜᤠ᤹ ᤋᤡᤶᤍᤢᤶᤒᤧ. ᤂᤧᤒᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤀᤡ᤺ᤳᤋᤢᤶᤒᤧ ᤏᤠ᤺ᤳᤋᤢᤶᤒᤧ ᤑᤠ᤹ᤀᤠᤱ ᤀᤠᤀᤡᤴ ᤏᤡ᤺ᤴᤎᤥ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹॥

¹⁸ ᤜᤧᤰᤁᤩᤠᤱ ᤀᤠᤀᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤁᤢᤀᤡᤛᤡᤰ ᤂᤡᤏᤡ᤹ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤏᤠ ᤏᤢ ᤀᤡᤔᤧᤸᤗᤢᤱᤒᤠ ᤁᤢᤕᤠᤱᤛᤠᤁᤢᤴᤎᤣ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ ᤜᤧᤰᤁᤩᤠᤱ ᤂᤡᤏᤡ᤹ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤀᤣ ᤐᤥᤱ᤹ ᤑᤠ᤹ᤀᤠᤱ ᤂᤢᤏᤧ᤹ ᤀᤢᤘᤠ ᤆᤥᤃᤢᤀᤠᤱ ᤘᤠ᤹॥

¹⁹ ᤂᤢᤏᤧ᤹ ᤆᤥᤃᤢᤛᤡᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤕᤖᤡᤰ ᤂᤡᤏᤡ᤹ ᤏᤧᤒᤥ ᤑᤥᤔᤠ. ᤔᤡᤱᤛᤥ ᤀᤡᤱᤎᤠᤱ ᤏᤢ ᤔᤡᤱ ᤋᤡ᤺ᤳᤗ ᤕᤠ᤺ᤴᤍᤢ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤠᤱᤜᤢᤵ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤗᤳᤇᤠ ᤛᤣᤛᤣᤒᤠ ᤛᤢᤘᤠᤱ ᤁᤧᤒᤥ᤺ᤰᤂᤡ᤹ ᤑᤠ᤹ᤀᤠᤱ ᤂᤢᤏᤧ᤹ ᤀᤢᤘᤠ ᤆᤥᤃᤢᤀᤠᤱ ᤘᤠ᤹ᤖᤥ॥