ᤛᤠᤶᤕᤥᤌᤡᤶ ᤀᤡᤱ 25 - LIFOTNT

¹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤧᤔᤠ᤹ ᤐᤥᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤂᤠᤛᤧᤴᤗᤥ᤺ᤶᤔᤠᤍᤧᤴ ᤜᤡᤶᤔᤥ ᤔᤧᤍᤣ᤹ᤖᤢᤖ ᤜᤧᤰᤁᤩᤠᤱ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤂᤧᤴ ᤂᤧᤔᤠ᤹ᤀᤡᤴ ᤂᤠᤛᤧᤴ ᤗᤥ᤺ᤴᤍᤢᤖ ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤔᤏᤠᤴ ᤗᤧᤖᤢᤖ ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤴ ᤀᤠᤵᤋᤡᤰᤛᤠᤒᤠ ᤗᤣ᤺ᤳᤋᤢᤖ॥

² ᤀᤠᤵᤋᤡᤰᤛᤠᤒᤠ ᤔᤏᤠᤴ ᤜᤡᤵᤔᤠ ᤐᤥᤱᤏᤧᤓᤃᤪ. ᤂᤠᤛᤧᤴᤗᤥ᤺ᤶᤒᤠᤸᤗᤧ ᤂᤧᤴ ᤛᤶᤒᤧᤳ ᤏᤧᤔᤠ ᤐᤠᤱᤄᤢᤖ ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤆᤥᤃᤢᤒᤠ ᤁᤢᤀᤡᤛᤡᤰ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤛᤡᤖ.

³ ᤁᤖ ᤗᤡᤒᤥᤱ ᤗᤧᤱᤏᤢ᤺ᤸᤗᤧ ᤕᤖᤡᤰ ᤋᤧ᤺ᤶᤓᤢᤰ ᤕᤠᤰᤔᤧᤒᤠᤱᤄᤢᤛᤡᤴᤗ॥ ᤂᤧᤸᤏᤢ᤺ᤸᤗᤧ ᤕᤖᤡᤰ ᤋᤧ᤺ᤶᤓᤢᤰ ᤆᤠ᤺ᤸᤗᤧ ᤂᤡᤏᤡ᤹ ᤔᤡᤰᤛᤠᤀᤥ ᤂᤡᤏᤡ᤹ ᤏᤢᤛᤠ᤹ᤀᤡᤴ ᤁᤢᤏᤠᤔᤧᤴᤇᤠ᤹ ᤐᤥᤱ᤹॥

⁴ ᤕᤠ᤹ ᤁᤧᤎᤠᤵᤛᤢᤶᤔᤡᤸᤗᤧ ᤐᤡᤳᤋᤧᤸᤗᤧ ᤁᤢᤶᤒᤪᤠᤀᤥ ᤆ᤺ᤵᤐᤡᤸᤗᤧ ᤔᤧᤛᤢ᤺ᤵᤋᤧᤶᤔᤡᤴᤏᤧ᤹ᤀᤥ॥

ᤁᤧᤔᤠᤛᤡᤱᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤗᤠᤃᤡ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ

⁵ ᤛᤥᤖᤡᤰ ᤁᤧᤕᤢᤅᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤁᤢᤓᤠ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤘᤠ᤹ᤀᤣ ᤔᤠᤛᤡᤱᤏᤧᤓᤃᤪ. ᤂᤧᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤗᤠᤁᤠᤳᤐᤠ ᤘᤣ᤹ ᤛᤢᤘᤠᤱᤅᤥ ᤔᤣ᤺ᤰᤂᤡᤶ ᤔᤧᤈᤥᤃᤢᤴᤗ॥ ᤁᤧᤔᤠᤛᤡᤱᤒᤧᤸᤗᤧᤀᤣ ᤁᤢᤴᤛᤠ᤹ᤀᤡᤸᤗᤧ ᤂᤧᤴ ᤀᤠᤵᤑᤣᤰ ᤔᤣ᤺ᤳ ᤆᤥᤃᤢᤖ. ᤜᤧᤰᤁᤩᤠᤱ ᤁᤧᤔᤠᤛᤡᤱᤒᤠ ᤁᤢᤕᤧᤶᤒᤠ᤺ᤸᤗᤧ ᤁᤢᤶᤓᤢ᤹ ᤀᤡᤃᤪ ᤁᤢᤴᤛᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤁᤧᤳᤋᤢᤖ॥

⁶ ᤂᤧᤸᤗᤧ ᤁᤳᤋᤢᤒᤠ ᤋᤢᤶᤒᤠ ᤁᤢᤛ᤻ᤛᤠᤴ ᤁᤧᤔᤠᤛᤡᤱᤒᤠ ᤁᤢᤶᤓᤢ᤹ ᤀᤡᤃᤪ ᤁᤢᤴᤛᤠ᤹ᤖᤧ ᤁᤢᤔᤡᤱ ᤕᤢᤰᤂᤢ ᤐᤡᤖᤢᤖ. ᤜᤧᤰᤁᤣᤗ᤹ᤖᤡᤰ ᤂᤧᤸᤗᤧ ᤁᤢᤔᤡᤱᤅᤡᤴ ᤀᤡᤛᤪᤠᤀᤡᤗᤗᤠᤶ ᤔᤧᤔᤠᤏᤧᤴᤗ॥

⁷ ᤁᤖ ᤁᤢᤴᤇᤥᤔᤡ᤺ᤵᤐᤧᤸᤗᤧ ᤁᤢᤴᤏᤧ᤹ᤍᤪᤣᤔᤧᤴ ᤕᤢᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤏᤧᤓᤃᤪ. ᤁᤢᤴᤏᤧ᤹ᤍᤪᤣᤔᤧᤴ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤐᤣ᤺ᤰᤁᤠᤱ ᤗᤠᤶᤗᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ. “ᤁᤧᤛᤡᤒᤠ ᤀᤠᤕᤧᤶᤒᤠ᤺ᤸᤗᤧ ᤁᤢᤔᤡᤱᤅᤡᤴ ᤁᤢᤴᤛᤠ᤹ᤖᤧ ᤀᤡᤛᤪᤠᤀᤡᤗᤀᤥ ᤘᤠ᤹ᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤴ᤹॥ ᤂᤧᤸᤗᤧ ᤀᤠᤱᤃᤠ᤹ᤏᤢ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤴ᤹॥”

⁸ ᤂᤧᤒᤩᤠᤱ ᤂᤧᤸᤗᤧ ᤁᤢᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤛᤢᤈᤠ ᤔᤧᤒᤡᤖᤢᤖ॥ ᤜᤧᤰᤁᤩᤠᤱ ᤂᤧᤴ ᤀᤠᤒᤠᤅᤣ ᤁᤢᤒᤠ᤺ᤴᤏᤥ ᤜᤠᤍᤡᤱ ᤌᤰᤁᤠᤱ “ᤀᤠᤱᤃᤠ᤹ ᤁᤴ ᤔᤣ᤺ᤳ ᤔᤧᤍᤣ᤹ᤀᤠᤴ” ᤑᤠ᤹ᤀᤠᤱ ᤀᤰᤂᤣ ᤐᤠ᤺ᤳᤋᤢᤏᤧᤓᤃᤪ

⁹ ᤁᤢᤴᤏᤧ᤹ᤍᤪᤣᤴ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤢᤏᤧ᤹ᤀᤥ ᤐᤣ᤺ᤰᤁᤠᤱ ᤂᤧᤸᤗᤧᤀᤣ ᤗᤳᤇᤠ ᤁᤢᤗᤠᤱᤛᤢ᤺ᤵᤐᤡᤴ ᤑᤧᤴᤍᤢᤖ ᤜᤧᤰᤁᤩᤠᤱ ᤁᤢᤶᤒᤪᤠᤀᤥ ᤌᤩᤠ᤺ᤳ ᤌᤥ᤺ᤰᤋᤢᤀᤠᤱ ᤀᤰᤂᤣ ᤔᤧᤳᤋᤢᤖ. “ᤀᤠᤳᤋᤡᤴ ᤁᤢᤶᤓᤢ᤹ᤁᤢᤴᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤑᤥᤔᤠ ᤔᤧᤍᤧᤴᤏᤧᤴ. ᤂᤧᤴ ᤀᤰᤂᤣᤀᤣ ᤔᤧᤵᤔᤠ ᤐᤥᤱ᤹॥”

¹⁰ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤂᤧᤴ ᤕᤧᤶᤒᤡᤳᤇᤠ᤺ᤸᤗᤧ ᤁᤢᤜᤡᤶᤛᤕᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ᤹. “ᤗᤠᤱᤛᤢ᤺ᤵ ᤑᤧᤶᤔᤏᤠᤒᤠ ᤜᤡᤶᤛᤕᤱᤛᤡᤖᤥ॥

ᤘᤣ᤹ ᤌᤡᤶᤜᤠ᤹

¹¹ “ᤕᤧᤶᤒᤡᤳᤇᤠ ᤏᤧᤴᤇᤡ ᤆᤢᤱᤛᤡᤸᤗᤧ ᤌᤡᤰᤐᤠᤖᤧ ᤁᤢᤔᤣ᤺ᤳᤋᤡᤴ ᤋᤠᤀᤠᤱ ᤀᤠᤵᤑᤣᤰ ᤁᤢᤕᤧᤶᤒᤠ᤺ᤴ ᤏᤠᤱᤔᤠᤖᤧ ᤗᤠᤃᤡ ᤘᤣ᤹ᤛᤔᤠᤸᤗᤧ ᤁᤢᤸᤎᤡ᤺ᤶᤒᤧᤴ ᤕ᤹ᤖᤢ ᤐᤡᤖᤢᤏᤧᤓᤃᤪ.

¹² ᤂᤡᤏᤡ᤹ ᤂᤧᤸᤗᤧ ᤁᤢᤜᤢᤰᤁᤡᤴ ᤂᤰᤋᤧᤶ ᤐᤡᤖᤧᤶᤔᤧ᤹. ᤂᤧᤴ ᤆᤒᤧ᤺ᤳᤇᤡᤰᤁᤠᤱ ᤗᤢᤱᤔᤠ᤹ ᤔᤧᤍᤢᤰᤋᤧᤶᤔᤡᤴᤏᤧ᤹॥

¹³ “ᤗᤳᤇᤠ ᤁᤢᤎᤠᤱᤔᤠᤖᤧ ᤗᤠᤃᤡ ᤁᤧᤗᤡ᤺ᤵᤐᤠ ᤏᤢ ᤕᤠᤱᤕᤠᤱᤒᤠ ᤐᤖᤡᤰ ᤐᤖᤡᤰᤐᤠ ᤁᤢᤎᤠᤱᤔᤠ ᤂᤡᤏᤡ᤹ ᤛᤢᤰᤘᤠᤀᤥ ᤔᤧᤃᤳᤋᤧᤶᤔᤡᤴᤏᤧ᤹॥

¹⁴ ᤂᤡᤏᤡ᤹ ᤜᤡᤶᤔᤥᤀᤠᤱ ᤗᤳᤇᤠ ᤁᤢᤛᤡ᤺ᤰᤔᤠᤖᤧ ᤗᤠᤃᤡ ᤏᤧᤳᤇᤡ ᤐᤖᤡᤰᤐᤠ ᤕᤶᤒᤠ ᤏᤢ ᤆᤢᤰᤐᤠ ᤁᤢᤛᤡ᤺ᤰᤔᤠ ᤔᤧᤃᤳᤋᤧᤶᤔᤡᤴᤏᤧ᤹॥

¹⁵ ᤁᤖ ᤂᤡᤏᤡ᤹ ᤁᤢᤍᤥ᤺ᤵᤔᤠ ᤐᤠᤛᤠᤱᤃᤠ ᤜᤧᤰᤁᤩᤠᤱ ᤁᤧᤃᤧᤵᤐᤠ ᤁᤢᤎᤠᤱᤔᤠ ᤏᤢ ᤁᤢᤛᤡ᤺ᤰᤔᤠ ᤁᤧᤃᤳᤋᤢᤶᤗ ᤐᤥᤱ᤹. ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤀᤠᤱ ᤏᤧᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖ॥

¹⁶ ᤌᤣᤀᤠᤱᤓᤧᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤡᤱᤗᤧᤰ ᤁᤧᤈᤥ᤺ᤰᤐᤠᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤡ᤺ᤳᤋᤢᤖᤥ॥

ᤀᤔᤠᤗᤧᤁᤡᤜᤠ᤹ ᤛᤧᤵᤔᤠᤛᤡ ᤀᤡᤱᤈᤠᤱ

¹⁷ “ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤓᤧᤖᤡᤸᤗᤧ ᤀᤔᤠᤗᤧᤁᤡᤜᤠ᤹ᤖᤧ ᤗᤠᤶᤔᤥ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤋᤡᤒᤠ ᤐᤠ᤺ᤴᤏᤡᤴ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹॥

¹⁸ ᤗᤠᤶᤔᤥ ᤂᤡᤏᤡ᤹ ᤐᤏᤠ ᤁᤧᤏᤠᤛᤡᤒᤠ ᤕᤧᤶᤔᤥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤍᤢᤔᤡ ᤜᤧᤰᤁᤩᤠᤱ ᤁᤧᤏᤠᤒᤠᤀᤠᤱ ᤀᤣᤃᤠᤱ ᤁᤧᤒᤵᤐᤠᤜᤠ᤹ ᤁᤧᤖᤧᤰ ᤔᤧᤛᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤡᤖᤢᤴ॥

¹⁹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰᤁᤥ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣ᤹ᤀᤥ ᤏᤡᤱᤔᤡᤜᤠ᤹ᤖᤧ ᤌᤱᤅᤥ ᤁᤧᤶᤓᤳᤋᤡᤒᤠᤗᤠᤶ ᤏᤠ᤺ᤶᤛᤡᤱᤔᤠ ᤁᤧᤄᤥᤛᤢᤶᤔᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤔᤠᤗᤧᤁᤡᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤔᤡᤰᤛᤣ᤺ᤴᤏᤣ ᤔᤠᤛᤧᤶ ᤐᤡᤖᤧᤶᤛᤡᤶᤔᤧ᤹॥ ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ᥄”