ᤛᤠᤶᤕᤥᤌᤡᤶ ᤀᤡᤱ 24 - LIFOTNTᤏᤠᤈᤱ ᤏᤢ ᤕᤠᤶᤔᤥ ᤔᤣ᤺ᤰᤂᤡᤶ ᤆᤥ᤺ᤰᤔᤠ 1 ᤁᤢᤓᤠ ᤕᤧᤶᤒᤡᤳᤇᤠ᤺ᤸᤗᤧ ᤋᤧᤴᤎᤠᤶ ᤔᤣ᤺ᤰᤂᤡᤶ ᤗᤃᤢᤔᤠ ᤔᤧᤴᤇᤢᤔᤠᤀᤥ ᤁᤢᤓᤠ ᤀᤠᤵᤋᤡᤰ ᤂᤥᤛᤢ᤹ ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤏᤠᤱ ᤏᤠᤈᤱ ᤛᤠᤵᤗᤠ ᤛᤠᤵᤋᤢ ᤐᤡᤖᤢ᤹ ᤂᤧᤒᤩᤠᤱ ᤜᤡᤶᤔᤥᤗᤠᤶ ᤂᤧᤴ ᤗ᤺ᤳᤋᤢᤍᤣᤛᤢ᤹. 2 ᤜᤧᤰᤁᤩᤠᤱ ᤜᤡᤶᤔᤡᤴ ᤗᤧᤖᤢᤀᤠᤱ ᤀᤣᤃᤠᤱ ᤂᤧᤴ ᤘᤣ᤹ ᤔᤏᤠ᤺ᤸᤗᤧ ᤁᤢᤔᤣᤳ ᤐᤥᤱ᤹ 3 ᤜᤧᤰᤁᤩᤠᤱ ᤏᤡᤛᤡᤃᤣᤰᤐᤠ ᤁᤢᤕᤣᤶᤒᤠ᤺ᤴᤏᤠᤱ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤏᤠᤱ ᤏᤠ᤹ᤖᤢᤒᤠ ᤛᤠᤵᤋᤢ ᤐᤡᤖᤢᤀᤠᤱ ᤜᤡᤶᤔᤥᤗᤠᤶ ᤂᤧᤴ ᤗ᤺ᤳᤋᤢᤍᤣᤛᤢ᤹ ᤀᤡᤃᤪ ᤕᤧᤶᤒᤡᤳᤇᤠᤴ ᤀᤠᤵᤑᤣᤰ ᤛᤩᤧᤏᤧᤓᤃᤪ. 4 ᤂᤧᤴ ᤀᤠᤛᤢᤳᤌᤥ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤁᤧᤏᤠ᤹ᤒᤠ ᤋᤃᤡᤒᤠ ᤁᤢᤕᤧᤶᤒᤠ᤺ᤸᤗᤧ ᤂᤢᤏᤧ᤹ ᤕᤠᤶᤔᤥ ᤔᤣ᤺ᤳ ᤋᤣ᤹ᤔᤠ ᤔᤧᤏᤠ᤹ᤏᤧᤴᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤁᤴ ᤗᤳᤇᤠ ᤕᤠᤶᤃᤧᤛᤡᤱᤒᤠ ᤆᤥᤰ॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤰᤂᤥᤔᤠᤀᤥ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤗᤠᤕᤥᤸᤗᤧᤴ ᤀᤠᤵᤋᤡᤰ ᤔᤧᤍᤠᤖᤧᤶᤔᤡᤴᤏᤧ᤹ᤀᤥ॥ ᤐᤖᤡᤰ ᤐᤖᤡᤰᤐᤠ ᤌᤡᤶᤜᤠ᤹ 5 ᤂᤠᤖᤰ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠ ᤕᤧᤶᤒᤡᤳᤇᤠᤴ ᤌᤰᤛᤢᤒᤠ ᤐᤥᤱᤛᤧ ᤔᤧᤒᤠᤱᤄᤧᤶᤔᤡᤴᤏᤧ᤹ ᤀᤡᤃᤪ ᤘᤣ᤹ ᤕᤠ᤺ᤶᤒᤰᤗᤧ ᤗᤠᤃᤡ ᤗᤰᤐᤧᤴ ᤔᤧᤒᤡᤖᤧᤶᤔᤡᤴᤏᤧ᤹॥ ᤋᤱᤒᤣ ᤌᤡᤰ ᤌᤠᤖᤡᤰ ᤂᤧᤴ ᤁᤢᤜᤡᤶᤔᤥ ᤏᤠᤏᤠ ᤌᤥᤎᤥ ᤔᤧᤸᤗ᤹ᤀᤣ ᤕᤢᤱᤗ ᤜᤧᤰᤁᤩᤠᤱ ᤂᤢᤏᤧ᤹ ᤋᤠᤖᤢᤔᤠ ᤁᤢᤔᤣ᤺ᤳᤋᤡᤴ ᤁᤢᤏᤡᤱᤘᤠ᤹ ᤋᤠᤛᤢ ᤐᤡᤖᤢᤖ॥ 6 ᤛᤡᤱᤏᤠᤳᤋᤡᤸᤗᤧ ᤁᤢᤗᤧᤰᤘᤠ ᤋᤡᤰ ᤜᤧᤰᤁᤣ ᤗᤢᤱᤛᤢᤶᤔᤥᤒᤠ ᤏᤧᤵᤔᤠᤱ ᤗᤢᤱᤜᤠ᤹ ᤀᤡᤃᤪ ᤌᤠᤜᤠᤱᤒᤠ ᤗᤢᤱᤅᤡᤴᤏᤠᤱ ᤔᤧᤍᤣ᤹ᤖᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠ᤺ᤸᤗᤧ ᤁᤢᤛᤠᤵᤐᤥᤰ ᤜᤡᤱᤔᤧᤴᤏᤣ ᤋᤡᤰ ᤁᤧᤕᤢᤰᤂᤢᤶᤒᤠ ᤁᤢᤀᤡᤛᤡᤰ ᤐᤥᤱ᤹॥ 7 ᤁᤢᤓᤠᤖᤧ ᤀᤠᤳᤋᤡᤴ ᤀᤡᤛᤪᤠᤀᤡᤗᤡ ᤏᤢᤛᤠ᤹ᤀᤡᤴ ᤋᤧᤶᤛᤢ ᤋᤣ᤹ᤖᤢᤀᤠᤱ ᤂᤧᤴ ᤕᤥᤰ ᤆᤥᤃᤢ᤹ ᤀᤡᤃᤪ ᤛᤱᤄᤢᤍᤣᤛᤢᤏᤧᤓᤃᤪ. ᤂᤧᤴ ᤁᤧᤍᤧᤶᤒᤠ ᤁᤧᤍᤣ᤹ᤒᤠ ᤔᤏᤠᤴ ᤛᤧᤵᤔᤠ ᤐᤥᤱ᤹॥ ᤂᤡᤏᤡ᤹ ᤗᤢᤶᤔᤥᤗᤠᤶ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤧᤳᤋᤠᤶᤔᤧ᤹॥ 8 ᤗᤥᤃᤣ ᤋᤢᤰᤔᤧᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤜᤢ᤹ᤖᤡᤒᤠ ᤐᤠ᤺ᤴᤜᤠ᤹ ᤁᤢᤀᤡᤛᤡ᤺ᤰᤛᤡ᤺ᤰ ᤆᤥ᤺ᤰᤔᤠ ᤛᤡᤱᤛᤡᤱ ᤕᤧᤰᤕᤧᤰ ᤁᤧᤗ᤹ᤖᤡᤖ ᤐᤥᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤒᤠ ᤀᤡᤱᤈᤠᤱᤅᤡᤴ ᤂᤡᤏᤡ᤹ ᤏᤢᤖᤡᤰᤁᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ᤹॥ 9 ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤓᤧᤖᤡᤸᤗᤧ ᤗᤠᤶᤔᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤖᤡᤕᤶᤔᤡᤴ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹᥄ 10 ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤴ ᤁᤢᤓᤠ ᤐᤖᤡᤰᤐᤠ ᤛᤡᤱᤏᤠᤳ ᤁᤧᤒᤡᤖᤢᤶᤔᤡᤸᤗᤧ ᤂᤧᤸᤗᤧ ᤕᤢᤰᤂᤢᤒᤠ ᤋᤡᤰ ᤗᤠᤛᤧ ᤜᤡᤶᤔᤥ ᤂᤡᤏᤡ᤹ ᤑᤢᤖᤢᤳ ᤔᤧᤗᤠᤛᤧᤶᤔᤡᤴᤏᤧ᤹॥ 11 ᤜᤡᤶ ᤗᤠ᤺ᤰᤁᤠᤳᤋᤣ ᤂᤡᤏᤡ᤹ ᤜᤠᤱᤄᤠᤶᤔᤧ᤹. ᤜᤧᤰᤁᤩᤠᤱ ᤛᤡᤱᤏᤠᤳ ᤁᤧᤍᤣ᤹ᤒᤧᤸᤗᤧᤀᤣ ᤗᤠ᤺ᤰᤁᤠᤳ ᤗ᤺ᤳᤋᤢ ᤁᤧᤒᤡᤖᤡᤖ॥ 12 ᤂᤧᤴ ᤔᤏᤠᤴ ᤕᤠᤱᤃᤧᤛᤠ᤹ᤒᤠ ᤆᤥ᤺ᤰᤏᤧᤓᤃᤪ ᤂᤧᤸᤗᤧ ᤋᤡᤰ ᤕᤢᤰᤂᤢᤒᤠ ᤁᤢᤄᤠᤶᤍᤣ᤺ᤳᤋᤥ ᤔᤧᤀᤡᤵᤛᤧᤶᤔᤡᤴᤏᤧ᤹॥ 13 ᤏᤠᤶᤎᤠ ᤌᤠᤖᤡᤰᤗᤧ ᤂᤡᤏᤡ᤹ ᤂᤧᤴ ᤕᤢᤰᤂᤢᤒᤠ ᤋᤡ᤺ᤰᤁᤧᤴ ᤏᤢ᤺ᤰᤋᤧᤶ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤁᤢᤄᤠᤶᤍᤣ᤺ᤳᤋᤥ ᤀᤡᤶᤔᤠᤱ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤰᤛᤠᤀᤥ ᤁᤴ ᤂᤡᤏᤡ᤹ ᤗᤠᤃᤡ ᤛᤠᤶᤕᤥᤒᤠ ᤐᤥᤱᤗ॥ 14 ᤂᤡᤏᤡ᤹ ᤀᤡᤛᤪᤠᤀᤡᤗᤡ ᤏᤢᤛᤠ᤹ᤛᤠᤱ ᤀᤡᤃᤪ ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤍᤠᤒᤠᤀᤠᤱ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤛᤠᤱ. ᤁᤢᤓᤠ ᤕᤠᤱᤃᤧᤛᤠ᤹ᤒᤠ ᤌᤣᤀᤠᤱ ᤔᤧᤱᤃᤵᤔᤏᤠᤒᤠ ᤕᤠ᤺ᤸᤗᤣ᤺ᤰ ᤁᤧᤏᤧ᤹ᤒᤠ ᤁᤧᤈᤠᤒᤧᤴ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤏᤥ ᤔᤧᤄᤢᤶᤛᤧᤶᤔᤡᤴᤏᤧ᤹॥ 15 ᤏᤠᤶᤎᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤌᤡᤰᤕᤠ᤺ᤴᤎᤰ ᤂᤧᤸᤗᤧ ᤁᤢᤏᤡᤶᤔᤩᤠᤰᤁᤡᤴ ᤐᤡᤖᤧᤶᤍᤣᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤠᤱᤃᤧᤛᤠ᤹ᤒᤠ ᤆᤥᤰ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤶᤔᤩᤠᤰᤁᤥᤀᤣ ᤁᤢᤏᤡᤱᤘᤠ᤹ ᤀᤡᤃᤣ᤺ᤰ ᤐᤳ॥ ᤔᤣ᤺ᤴᤏᤧᤓᤃᤪ ᤂᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢᤏᤧᤓᤃᤪ. ᤗᤠᤕᤥᤸᤗᤧ ᤂᤡᤏᤡ᤹ ᤁᤧᤍᤧᤳᤋᤡ᤹॥ 16 ᤛᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤸᤗᤧ ᤗᤠᤃᤡ ᤐᤠᤔᤠᤜᤠ᤹ ᤛᤧᤵᤔᤠᤛᤡ ᤔᤧᤏᤢ᤹ᤏᤧᤴ ᤜᤧᤰᤁᤩᤠᤱ ᤐᤠᤔᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤸᤗᤧ ᤗᤠᤃᤡ ᤛᤠᤜᤠ᤹ ᤛᤧᤵᤔᤠᤛᤡ ᤔᤧᤏᤢ᤹ᤏᤧᤴ॥ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤔᤧᤛᤡᤖᤥ॥ 17 ᤘᤣ᤹ ᤗᤠᤈᤣ᤹ᤒᤠᤜᤠ᤹ ᤏᤢ ᤕᤧᤳᤇᤠ ᤜᤥ᤹ᤍᤥᤰᤜᤠ᤹ᤖᤧ ᤗᤠᤃᤡ ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴ ᤔᤧᤗᤥ᤺ᤴᤍᤧᤶᤔᤡᤴᤏᤧ᤹॥ ᤀᤠᤳᤋᤡᤴ ᤔᤣᤔᤣᤍᤢᤔᤠᤸᤗᤧ ᤁᤢᤄᤠᤶᤍᤣ᤺ᤳᤋᤡᤴᤏᤠᤱ ᤕᤠᤱᤅᤥ ᤔᤧᤕᤢᤰᤂᤧᤶᤔᤡᤴᤏᤧ᤹॥ 18 ᤔᤡᤛᤪᤀᤥ ᤂᤡᤏᤡ᤹ ᤕᤥᤰ ᤁᤧᤘᤕᤡᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤀᤰᤂᤣ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤏᤡᤱᤒᤠᤖᤥ॥ 19 ᤀᤡᤰᤋᤠᤵᤐᤥ ᤁᤢᤈᤠ ᤁᤧᤜᤧᤃᤢᤶᤔᤡᤸᤗᤧ ᤁᤢᤎ᤺ᤱᤔᤠ ᤌᤡᤰ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤏᤧᤓᤃᤪ. ᤂᤧᤸᤗᤧ ᤁᤢᤗᤠᤛᤧ ᤔᤧᤒᤣᤃᤧᤶᤔᤡᤴᤏᤧ᤹॥ ᤘᤣ᤹ ᤗᤠᤈᤣ᤹ᤒᤠ. ᤕᤧᤳᤇᤠᤒᤠ ᤜᤥ᤹ᤍᤥ᤺ᤰᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ᤖᤧ ᤗᤠᤃᤡ ᤂᤧᤴ ᤗᤧᤖᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤢᤰᤁᤥ ᤁᤧᤖᤧᤰ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖ॥ 20 ᤆᤤᤋᤢᤏ ᤛᤡᤱᤒᤢᤱᤅᤡᤴ ᤘᤍᤪᤠ᤺ᤸᤗᤧ ᤁᤧᤜᤡᤵᤋᤢᤶ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠ᤹ᤀᤡᤴ ᤁᤧᤎᤠᤛᤢᤶᤔᤠᤱ ᤀᤣᤃᤠᤱ ᤕᤠᤶᤔᤥ ᤏᤡᤗᤧᤱ ᤁᤢᤒᤥᤖᤠᤰᤁᤥᤗᤠᤶ ᤁᤢᤈᤠ᤹ᤀᤡᤴ ᤔᤧᤎᤠᤛᤧᤶᤔᤡᤴᤏᤧ᤹॥ ᤘᤣ᤹ ᤗᤠᤈᤣ᤹ᤒᤠ. ᤕᤧᤳᤇᤠ ᤜᤥ᤹ᤍᤥ᤺ᤰᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ᤖᤧ ᤗᤠᤃᤡ ᤂᤧᤴ ᤁᤧᤏᤶᤒᤠᤜᤠ᤹ ᤗᤧᤖᤧᤶ ᤐᤡᤖᤧᤶᤛᤡᤶᤔᤧ᤹॥ 21 ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥᤒᤠ ᤆᤧᤸᤗᤧᤰᤛᤣ᤹ ᤁᤧᤍᤢᤒᤢᤶᤔᤡᤸᤗᤧ ᤕᤠᤶᤔᤥ ᤏᤡᤗᤧᤱ ᤛᤢᤖᤢᤰ ᤘᤖᤢᤰ ᤔᤧᤛᤢ᤺ᤴᤍᤧᤶᤔᤡᤴᤏᤧ᤹॥ ᤘᤣ᤹ ᤗᤠᤈᤣ᤹ᤒᤠ. ᤕᤧᤳᤇᤠ ᤜᤥ᤹ᤍᤥ᤺ᤰᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ᤖᤧ ᤗᤠᤃᤡ ᤂᤧᤴ ᤁᤧᤏᤶᤒᤠᤜᤠ᤹ ᤗᤧᤖᤧᤶ ᤐᤡᤖᤧᤶᤛᤡᤶᤔᤧ᤹॥ 22 ᤔᤡᤛᤪ ᤗᤠᤈᤣ᤹ᤀᤥ ᤂᤡᤏᤡ᤹ ᤕᤥᤰ ᤁᤧᤘᤕᤡᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ ᤀᤠᤶᤓᤠ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤀᤰᤂᤣ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤏᤡᤱᤒᤠᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.