ᤛᤠᤶᤕᤥᤌᤡᤶ ᤀᤡᤱ 23 - LIFOTNTᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤗᤠᤶ ᤗ᤺ᤵᤔᤠᤍᤣᤔᤠ ᤁᤧᤒᤥᤱᤒᤠ ᤔᤏᤠ 1 ᤁᤢᤸᤎᤡ᤺ᤶᤒᤠ ᤔᤧᤓᤧ᤺ᤳᤇᤢᤒᤠ ᤀᤡᤃᤪ ᤁᤢᤈᤢᤳᤆᤢ᤹ᤒᤠ ᤔᤧᤄᤰᤋᤢᤒᤠ ᤕᤧᤶᤒᤡᤳᤇᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤗᤠ᤺ᤵᤔᤠ ᤔᤧᤏᤢ᤹ᤏᤧᤴ॥ 2 ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤔᤏᤠᤗᤠᤶ ᤀᤡᤃᤪ ᤁᤠ᤹ᤀᤡ ᤛᤥ᤹ᤎᤥ᤺ᤰᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠ ᤔᤏᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤗᤠ᤺ᤵᤔᤠ ᤔᤧᤏᤢ᤹ᤏᤧᤴ॥ ᤌᤡᤒᤥᤱ ᤌᤠ᤺ᤰ ᤌᤠᤖᤡᤰ ᤂᤧᤸᤗᤧ ᤀᤠᤳᤋᤡᤴ ᤁᤢᤔᤢ᤹ᤀᤡᤍᤠᤱᤛᤠ᤺ᤴᤏᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤗᤠ᤺ᤵᤔᤠ ᤔᤧᤏᤢ᤹ᤏᤧᤴ॥ 3 ᤀᤶᤔᤥᤏᤡ ᤀᤡᤃᤪ ᤔᤥᤀᤠᤒᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤗᤠ᤺ᤵᤔᤠ ᤔᤧᤱᤄᤥᤏᤧᤴ॥ ᤌᤡᤒᤥᤱ ᤌᤠ᤺ᤰ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤳᤋᤡᤴ ᤔᤢ᤹ᤀᤡᤍᤠᤱᤛᤠᤜᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤗᤠ᤺ᤵᤔᤠ ᤔᤧᤱᤄᤥᤏᤧᤴ॥ 4 ᤌᤣᤀᤠᤱᤓᤧᤸᤗᤧ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤓᤧᤖᤡᤸᤗᤧ ᤁᤢᤈᤠ ᤏᤢ ᤆᤫᤠ᤺ᤳ ᤁᤧᤔᤧᤶᤒᤡᤖᤡᤴ ᤜᤧᤰᤁᤩᤠᤱ ᤗᤠᤱᤍᤠ᤺ᤰ ᤁᤧᤔᤧᤶᤔᤧᤳᤋᤡᤴ॥ ᤂᤧᤱᤜᤠ᤹ᤖᤧ ᤀᤖᤠᤔ-ᤏᤠᤜᤠᤖᤤᤔᤒᤠ ᤐᤋᤥᤖᤀᤥ ᤁᤧᤕᤢᤱᤒᤠ ᤒᤀᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤶᤔᤡᤴ ᤂᤡᤏᤡ᤹ ᤔᤠᤱᤍᤣ ᤛᤠᤱᤃᤪᤠ ᤔᤧᤵᤔᤠᤖᤧ ᤗᤠᤃᤡ ᤕᤠᤱ ᤔᤧᤒᤡᤖᤢᤀᤠᤱ ᤔᤧᤀᤢ᤺ᤳᤋᤢ॥ 5 ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠᤗᤠᤔᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤴ. ᤁᤖ ᤂᤢᤏᤧ᤹ ᤂᤧᤴ ᤔᤠᤱᤍᤣᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤥ᤺ᤰᤂᤧᤖ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡ᤹॥ 6 ᤂᤡᤏᤡ᤹ ᤜᤡᤱᤜᤡᤱ ᤀᤶᤔᤥᤏᤡ ᤜᤧᤰᤁᤩᤠᤱ ᤔᤥᤀᤠᤒᤡᤜᤠ᤹ᤏᤢ ᤆᤢᤶᤍᤣᤱ ᤐᤥᤱᤔᤠᤖᤧ ᤗᤠᤃᤡ ᤏᤠᤍᤱ ᤔᤧᤈᤥᤃᤧᤶᤔᤡᤴᤏᤧ᤹॥ 7 ᤀᤠᤳᤋᤡᤴ ᤀᤣᤍᤥᤔᤡᤜᤠ᤹ᤀᤠᤱ ᤂᤡᤏᤡ᤹ ᤔᤧᤏᤠ᤹ᤖᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤂᤡᤏᤡ᤹ ᤑᤢ᤹ᤏᤢᤛᤠᤛᤡᤖᤥ॥ ᤀᤠᤳᤋᤡᤴ ᤔᤡᤛᤪᤡᤜᤠ᤹ᤀᤠᤱ ᤂᤡᤏᤡ᤹ ᤔᤧᤏᤠ᤹ᤖᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤂᤡᤏᤡ᤹ ᤘᤧᤵᤔᤡᤒᤠ ᤁᤧᤘᤕᤡᤖᤥ॥ 8 ᤂᤧᤱᤜᤠ᤹ᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠ ᤛᤢᤶᤛᤡᤃᤣᤰᤐᤠ ᤌᤠ᤺ᤰᤁᤥᤒᤠ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤈᤢᤶᤓᤥᤀᤥ ᤗᤠ᤺ᤵᤔᤠ ᤔᤧᤄᤥᤖᤥ॥ ᤛᤠ᤺ᤱᤃᤠᤜᤡᤶᤜᤠ᤹ ᤛᤢᤳᤌᤥ ᤆᤥ᤺ᤰᤔᤠ ᤕᤠ᤺ᤶᤒᤰ 9 ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤧᤴᤎᤱ ᤆᤥ᤺ᤰᤛᤧ ᤁᤧᤒᤣᤃᤡᤸᤗᤧ ᤁᤧᤖᤧᤰ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ᤗᤠᤶ ᤛᤧ᤺ᤵᤐᤠᤛᤡᤶᤔᤧ᤹ᤀᤠᤱ ᤘᤕᤧᤶᤔᤧ᤹॥ 10 ᤁᤢᤓᤠ ᤕᤧᤶᤒᤡᤳᤇᤠ ᤔᤏᤠᤴ ᤛᤧᤵᤔᤠᤱᤔᤥ ᤔᤧᤴᤇᤢᤔᤠᤏᤢ ᤏᤧᤒᤠ ᤛᤧᤵᤔᤠᤱ ᤔᤠᤰᤋᤢᤀᤠᤱ ᤀᤠᤛᤢᤳᤌᤥ ᤐᤥᤱᤏᤧᤓᤃᤪ. ᤂᤢᤏᤧ᤹ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤗ᤺ᤴᤒᤣ᤺ᤰᤗ ᤜᤧᤰᤁᤩᤠᤱ ᤜᤠᤒᤠ ᤂᤧᤵᤔᤥᤀᤣ ᤕᤢᤱᤗ॥ 11 ᤕᤢ᤺ᤴᤎᤥ ᤐᤥᤱᤗ ᤐᤣ᤺ᤰᤁᤡᤸᤗᤧ ᤘᤖᤢ᤺ᤶᤛᤡᤱᤗ ᤜᤧᤰᤁᤩᤠᤱ ᤏᤠᤶᤎᤠᤀᤠᤱ ᤀᤣᤃᤠᤱ ᤂᤢᤏᤧ᤹ ᤌᤰᤛᤢᤒᤠ ᤛᤠ᤺ᤱᤃᤠᤜᤡᤶᤔᤥ ᤋᤠᤔᤠ ᤛᤢᤰ॥ 12 ᤐᤠᤜᤠᤖᤠ ᤐᤣ᤺ᤰᤔᤠᤍᤧᤴᤏᤡᤴ ᤛᤠ᤺ᤱᤃᤠᤜᤡᤶᤜᤠ᤹ ᤗᤠ᤺ᤰᤁᤠᤳ ᤆᤥᤃᤧᤶᤔᤧ᤹॥ 13 ᤂᤡᤏᤡ᤹ ᤑᤣᤈᤢᤶᤓᤧᤕᤠ᤺ᤴᤏᤢ ᤁᤢᤍᤔᤠ ᤗᤰᤆᤢ ᤌᤡᤰᤁᤠᤱ ᤁᤳᤋᤧᤶᤔᤧ᤹. ᤜᤧᤰᤁᤩᤠᤱ ᤐᤠᤜᤠᤖᤠ ᤁᤧᤕᤢᤱᤅᤡ ᤁᤧᤛᤢ᤺ᤳᤋᤠᤛᤡᤀᤠᤱ ᤀᤠᤶᤓᤠ ᤂᤧᤸᤗᤧ ᤐᤠᤰᤐᤧᤵᤐᤠ ᤋᤕᤧᤶᤔᤧ᤹ᤀᤠᤱ ᤐᤠᤜᤠᤖᤠ᤺ᤴ ᤗᤢᤵᤋᤧᤶᤔᤧ᤹॥ 14 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤏᤢ ᤏᤡᤱᤔᤡᤜᤠ᤹ ᤜᤢᤰᤁᤥ ᤌᤠᤔᤠᤛᤡᤖᤧ ᤗᤠᤃᤡ ᤂᤡᤏᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤏᤠᤏᤠ ᤁᤳᤏᤠ ᤗᤠᤱᤄᤣ᤺ᤰᤁᤠᤱ ᤘᤠ᤹॥ ᤂᤡᤏᤡ᤹ ᤗᤢᤶᤔᤥ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤡᤔᤧᤎᤠ᤺ᤵᤏᤧᤴᤗ ᤑᤠ᤹ᤀᤠᤱ ᤂᤡᤏᤡ᤹ ᤌᤰᤛᤢᤒᤠ ᤛᤠ᤺ᤱᤃᤠᤜᤡᤶᤔᤡᤴ ᤛᤣᤛᤣ ᤐᤥᤱᤔᤠ ᤐᤥᤱ᤹. ᤔᤣ᤺ᤴᤏᤧᤓᤃᤪ ᤂᤢᤏᤧ᤹ ᤂᤡᤏᤡ᤹ᤗᤠᤶ ᤏᤢ᤺ᤱᤒᤣ᤺ᤰᤗᤥ॥ ᤕᤖᤡᤰ ᤐᤖᤡᤰᤐᤠ ᤌᤡᤶᤜᤠ᤹ 15 ᤁᤢᤓᤠ ᤕᤥ᤺ᤃ᤻ᤒᤠᤴ ᤂᤧᤳᤇᤡᤱᤅᤠᤱ ᤀᤡ᤺ᤶᤛᤡᤱᤔᤠᤖᤧ ᤗᤠᤃᤡ ᤂᤡᤏᤡ᤹ᤀᤥ ᤋᤠᤏᤧᤓᤃᤪ ᤂᤢᤏᤧ᤹ ᤁᤢᤴᤍᤠᤱᤒᤧᤴ ᤜᤢᤰᤔᤧᤛᤢᤵᤋᤧᤶᤔᤡᤴᤏᤧ᤹॥ 16 ᤂᤧᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤕᤧᤰᤕᤰᤁᤡᤸᤗᤧ ᤁᤢᤓᤠ ᤋᤧᤴᤏᤥ ᤂᤧᤴ ᤂᤡᤏᤡ᤹ ᤕᤢᤱᤔᤠ ᤑᤠ᤺ᤰᤋᤧᤶᤔᤧ᤹॥ ᤂᤡᤏᤡ᤹ ᤂᤧᤴ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤔᤡᤴᤏᤧ᤹॥ 17 ᤀᤠᤳᤋᤡᤴ ᤀᤡᤛᤪᤠᤀᤡᤗᤡ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ᤺ᤸᤗᤧᤀᤠᤱ ᤔᤠᤱᤎᤠ᤺ᤴᤏᤥᤒᤠ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗ॥ 18 ᤁᤢᤓᤠ ᤔᤠᤱᤜᤧᤰᤁᤡᤴ ᤁᤧᤵᤔᤠᤖᤧ ᤗᤠᤃᤡ ᤔᤧᤴᤇᤢᤔᤠ᤺ᤸᤗᤧ ᤀᤡᤃᤪ ᤕᤧᤶᤒᤡᤳᤇᤠ᤺ᤸᤗᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤗᤠᤶ ᤌᤃᤢ ᤋᤠᤖᤢᤒᤠ ᤀᤠᤳᤋᤡᤴ ᤕᤠᤱᤅᤡᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤧᤵᤔᤠᤱ ᤆᤡ᤺ᤳᤋᤢᤛᤡ᤹॥ 19 ᤁᤢᤛ᤻ᤛᤠ ᤕᤠᤱ ᤌᤰᤔᤠ ᤛᤢᤰᤁᤧᤍᤧᤵᤐᤠ ᤕᤠᤱ. ᤁᤢᤈᤠ ᤀᤡᤃᤪ ᤘᤣ᤹ ᤁᤢᤓᤠ ᤐᤠ᤺ᤴᤜᤠ᤹ ᤛᤡᤱᤏᤠᤳ ᤁᤧᤒᤡᤖᤢᤶᤛᤡᤶᤔᤡᤸᤗᤧ ᤑᤢ᤹ᤏᤢᤛᤠ᤹ᤗᤠᤶ ᤁᤢᤛ᤻ᤛᤠ ᤔᤧᤈᤩᤧᤶᤔᤡᤴᤏᤧ᤹॥ 20 ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤗᤠᤶᤒᤠ ᤁᤢᤛ᤻ᤛᤠ ᤋᤠ᤺ᤰᤔᤠ ᤁᤧᤛᤢᤰᤋᤢᤶ᤹. ᤁᤖ ᤀᤠᤵᤑᤣᤰ ᤑᤢ᤹ᤏᤢᤛᤠ᤹ ᤀᤡᤛᤪᤠᤀᤡᤗᤡᤜᤠ᤹ᤗᤠᤶᤒᤠ ᤔᤣ᤺ᤴ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖ॥ 21 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤁᤢᤓᤠ ᤔᤠᤱᤜᤢᤵ ᤁᤧᤈᤥᤃᤢᤶᤔᤠᤱ ᤂᤧᤴ ᤁᤧᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤔᤧᤛᤢᤛᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤴ ᤂᤡᤏᤡ᤹ ᤁᤧᤃᤧᤳᤋᤢᤶᤒᤠ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢ᤹॥ ᤔᤣ᤺ᤴᤏᤧᤓᤃᤪ ᤗᤠᤕᤥᤀᤥ ᤂᤡᤏᤡ᤹ ᤁᤧᤎᤩᤧ᤹ᤀᤡᤖᤥ॥ 22 ᤁᤖ ᤔᤠᤱᤜᤢᤵᤐᤣ ᤔᤧᤴᤈᤥ᤺ᤰᤁᤣ ᤁᤧᤘᤕᤡᤏᤧᤓᤃᤪ ᤗᤠᤕᤥᤀᤥ ᤂᤡᤏᤡ᤹ ᤁᤧᤴᤎᤩᤧ᤹ᤀᤡᤴ᤹॥ 23 ᤌᤧᤔᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤔᤢᤖᤠᤀᤥᤗᤠᤶ ᤗ᤺ᤴ ᤂᤧᤴ ᤂᤡᤏᤡ᤹ ᤁᤧᤵᤔᤠᤀᤣ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤗᤠᤶ ᤂᤡᤏᤡ᤹ ᤀᤠᤵᤑᤣᤰ ᤔᤢᤖᤠ᤺ᤸᤗᤧ ᤔᤠᤱᤜᤢᤵ ᤁᤧᤈᤥᤃᤢᤶᤒᤠᤖᤥ॥ 24 ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤁᤧᤗᤠᤛᤡᤏᤧᤓᤃᤪ ᤆᤠᤔᤠ ᤂᤡᤏᤡ᤹ ᤛᤡᤖᤠ᤹ᤌᤠᤱᤒᤠ ᤕᤠᤖᤡᤰ ᤆᤧᤸᤗᤧᤰᤛᤣ᤺ᤴ ᤆᤠᤔᤠ ᤁᤧᤛᤢᤰᤋᤢᤶ᤹. ᤁᤖ ᤂᤡᤏᤡ᤹ ᤏ᤹ᤀᤡᤔᤠᤀᤥ ᤌᤧᤔᤠᤀᤠᤱ ᤔᤧᤕᤠᤰᤋᤧᤶᤔᤡᤴᤏᤧ᤹॥ 25 ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤀᤡᤰᤋᤠᤵᤐᤥ ᤁᤧᤗᤠᤛᤡᤏᤧᤓᤃᤪ ᤆᤠ᤺ᤸᤗᤧ ᤁᤢᤍᤠᤵᤔᤠᤴ ᤜᤢᤰᤁᤡᤸᤗᤧ ᤂᤡᤔᤠ ᤁᤧᤛᤢᤰᤋᤢᤶ. ᤁᤖ ᤁᤧᤍᤢᤶᤒᤠ ᤀᤡᤰᤋᤠᤵᤐᤥ ᤁᤠᤳᤆᤩᤠ ᤕᤠᤱᤔᤠ ᤔᤧᤏᤠ᤹ᤏᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.