ᤛᤠᤶᤕᤥᤌᤡᤶ ᤀᤡᤱ 22 - LIFOTNT

¹ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤐᤡᤳ ᤀᤡᤃᤪ ᤔᤧᤸᤗᤢᤰᤁᤡᤴ ᤏᤠᤏᤠ ᤌᤥᤎᤥ ᤐᤣ᤺ᤰᤐᤠ ᤁᤧᤏᤡᤛᤢᤶᤔᤡᤸᤗᤧ ᤔᤧᤴᤏᤡ᤺ᤔᤏᤠᤒᤠ ᤔᤧᤗᤧᤱᤅᤠᤛᤡᤶᤔᤡᤴᤏᤧ᤹॥ ᤂᤧᤴ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤛᤠᤶᤎᤠᤶᤔᤧ᤹॥

² ᤁᤖ ᤂᤧᤴ ᤏᤢ᤹ᤛᤠ᤹ᤀᤡᤴ ᤏᤡ᤺ᤳᤋᤠᤱ ᤔᤧᤕᤢᤱᤏᤧᤴ ᤀᤡᤃᤪ ᤂᤧᤏᤧ᤹ ᤂᤧᤴ ᤁᤢᤛᤣ᤺ᤴ ᤁᤧᤴᤏᤡᤛᤢᤴᤏᤧᤓᤃᤪ. ᤂᤧᤸᤗᤧ ᤁᤢᤎᤰᤛᤠᤴ ᤂᤢᤏᤧ᤹ ᤔᤧᤃᤥ᤺ᤳᤋᤢᤴ ᤔᤧᤍᤠᤏᤧᤴᤗ ᤌᤠᤖᤡᤰ ᤂᤧᤏᤧ᤹ ᤁᤧᤜᤡᤶᤔᤥ ᤂᤧᤴ ᤋᤠᤖᤧ᤹ᤀᤠᤱ ᤁᤳᤋᤧ᤹॥ ᤂᤧᤴ ᤀᤣᤃᤠᤱ ᤁᤧᤴᤛᤠ᤹ ᤏᤢ᤺ᤰᤋᤧ ᤐᤡᤖᤧ᤹॥

³ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤀᤡᤸᤗᤧ ᤁᤢᤀᤍᤱ ᤀᤡᤃᤪ ᤁᤢᤈᤠᤱ ᤁᤡᤃᤪ ᤂᤧᤸᤗᤧ ᤔᤠᤛᤢᤒᤠ ᤌᤧᤔᤠᤛᤠᤱ ᤁᤧᤄᤥᤛᤢᤶᤔᤡᤸᤗᤧ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹. ᤛᤫᤠ᤺ᤳ ᤔᤧᤘᤕᤧᤶᤔᤡᤴᤏᤧ᤹॥

⁴ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤀᤡᤸᤗᤧ ᤁᤢᤀᤍᤱ ᤀᤡᤃᤪ ᤁᤢᤒᤡᤳᤋᤡᤴ ᤗᤠᤶᤔᤥ ᤁᤧᤅᤧᤒᤠ ᤁᤧᤏᤡᤛᤢᤶᤛᤠᤱ ᤔᤧᤴᤏᤡ᤺ᤔᤏᤠᤒᤠ ᤔᤧᤗᤧᤱᤅᤠᤛᤡᤶᤔᤡᤴᤏᤧ᤹॥ ᤂᤧᤴ ᤑᤥᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤑᤠ᤹ᤖᤧᤶᤔᤧ᤹॥

⁵ ᤕᤧᤶᤒᤡᤳᤇᤠᤖᤧ ᤆᤠᤱᤔᤏᤠᤒᤠ ᤆᤠᤱᤅᤡᤴ ᤔᤧᤴᤇᤢᤔᤠᤖᤧ ᤆᤠᤱᤔᤠ ᤔᤧᤏᤢ᤹ᤏᤧᤴ. ᤜᤧᤰᤁᤩᤠᤱ ᤔᤧᤴᤇᤢᤔᤠ᤺ᤸᤗᤧ ᤁᤢᤈᤠᤱᤅᤡᤴᤏᤠᤱ ᤕᤧᤶᤒᤡᤳᤇᤠᤖᤧ ᤆᤠᤱᤔᤠ ᤔᤧᤏᤢ᤹ᤏᤧᤴ॥ ᤀᤰᤂᤣ ᤁᤧᤈᤥ᤺ᤰᤐᤠᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤡ᤺ᤳᤋᤢ᤹॥

⁶ ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤛᤡᤱᤒᤢᤱᤅᤥ ᤀᤡᤃᤪ ᤂᤠᤶᤒᤠᤱᤅᤥ ᤀᤠᤳᤋᤡᤛᤠᤱ ᤐᤢᤈᤩᤠ᤺ᤰ ᤀᤡᤃᤪ ᤁᤢᤎᤡ᤺ᤴᤏᤡᤴ ᤁᤢᤶᤔᤠᤖᤧ ᤁᤢᤵᤋᤢᤀᤠᤱ ᤕᤢᤱᤒᤠ ᤐᤢᤜᤠᤵ ᤁᤧᤄᤥᤛᤢᤶᤏᤧᤓᤃᤪ. ᤐᤢᤈᤩᤠ᤺ᤰᤜᤠ᤹ᤏᤢ ᤛᤥᤛᤥᤖᤡᤰ ᤁᤢᤶᤔᤠᤴ ᤔᤧᤍᤣ᤹ᤖᤧᤶᤔᤡᤴᤏᤧ᤹॥

⁷ ᤁᤢᤶᤔᤠᤴ ᤗᤧᤵᤔᤠᤀᤠᤱ ᤐᤢᤈᤩᤠ᤺ᤰᤜᤠ᤹ ᤂᤡᤏᤡ᤹ ᤋᤣ᤹ᤔᤠ ᤁᤧᤛᤢᤰᤋᤢᤶᤛᤡᤶ᤹॥ ᤀᤰᤂᤣ ᤆᤥᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ. ᤜᤧᤰᤁᤩᤠᤱ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖ॥

⁸ ᤁᤢᤛᤱ ᤜᤡᤶ ᤁᤧᤈᤥᤃᤢᤶᤔᤡᤸᤗᤧ ᤂᤠᤶᤒᤢ ᤛᤶᤎᤠᤱ ᤁᤒᤪᤡᤱ ᤐᤡᤛᤠᤱ ᤑᤠᤅᤠᤶᤔᤧ᤹. ᤂᤶᤓᤩᤠᤱ ᤁᤢᤓᤠ ᤔᤏᤠ ᤔᤧᤃᤧᤱ ᤔᤧᤛᤡ᤺ᤸᤗᤧ ᤂᤡᤏᤡ᤹ ᤜᤡᤶᤔᤡᤴ ᤛᤡᤔᤧᤸᤗᤧ ᤀᤠᤵᤋᤡᤰ ᤔᤧᤎᤠᤏᤧᤴ॥

⁹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤏᤧᤳᤇᤡ ᤐᤖᤡᤰᤐᤠ ᤕᤠ᤹ᤖᤡ᤺ᤶᤒᤠ ᤔᤧᤗᤣ᤺ᤳᤋᤧᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤜᤧᤰᤁᤣ ᤁᤧᤈᤥᤃᤢᤶᤔᤡᤸᤗᤧ ᤂᤡᤏᤡ᤹ ᤁᤧᤗᤣ᤺ᤳᤋᤢᤶᤒᤠ ᤕᤠ᤹ᤖᤡ᤺ᤶᤒᤧᤴᤗᤰ ᤔᤣ᤺ᤴ ᤁᤖ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤈᤠ᤹ᤀᤡᤴᤏᤠᤱ ᤀᤠᤛᤢᤳᤌᤥ ᤐᤥᤱ᤹॥

¹⁰ ᤐᤡᤳᤋᤧᤴ ᤏᤢ ᤀᤍᤱᤅᤡᤴ ᤛᤥᤖᤡᤰ ᤛᤧ᤺ᤵᤔᤠᤛᤡᤀᤠᤱ ᤋᤥ᤺ᤱᤔᤠᤛᤡ ᤔᤧᤏᤢ᤹ᤏᤧᤴ॥

¹¹ ᤂᤡ ᤏᤢ ᤏᤤᤏᤠᤛᤢᤳ ᤑ᤺ᤶᤔᤏᤠᤀᤠᤱ ᤌᤠᤰᤔᤏᤠᤒᤠ ᤆᤠᤱ ᤆᤠᤱᤔᤠ ᤔᤧᤏᤢ᤹ᤏᤧᤴ॥

¹² ᤂᤡᤏᤡ᤹ ᤁᤧᤈᤠᤰᤂᤢᤶᤒᤠ ᤆᤠᤱᤅᤡᤸᤗᤧ ᤁᤢᤓᤧᤖᤠᤀᤥ ᤛᤩᤥ᤺ᤱᤛᤩᤥ᤺ᤱ ᤁᤧᤗ᤹ᤒᤠ ᤁᤢᤒᤥᤖᤠᤰ ᤑᤳᤇᤧᤶᤔᤧ᤹ᤀᤥ॥

ᤔᤧᤴᤇᤢᤔᤠ ᤏᤢ ᤕᤧᤶᤒᤡᤳᤇᤠ ᤛᤥᤖᤡᤰ ᤀᤡᤶᤔᤠ ᤌᤡᤶ

¹³ ᤁᤢᤓᤠ ᤋᤧᤴᤎᤠᤶ ᤔᤣ᤺ᤰᤂᤡᤶ ᤆᤥ᤺ᤰᤁᤠᤱ ᤁᤢᤔᤣ᤺ᤳᤋᤡᤴᤏᤢ ᤛᤥᤖᤡᤰ ᤀᤡᤶᤛᤧ ᤐᤣ᤺ᤰᤁᤡᤸᤗᤧ ᤂᤢᤏᤧ᤹ ᤏᤢᤒᤠ ᤐᤠᤴ ᤔᤧᤄᤥᤛᤢᤴ.

¹⁴ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤁᤢᤈᤠ᤺ᤳᤌᤡ ᤋᤣᤔᤠ ᤐᤡᤔᤠᤖᤧ ᤗᤠᤃᤡ ᤔᤧᤴᤘᤠ᤹ᤔᤏᤠᤒᤠ ᤀᤠᤵᤋᤡᤰ ᤁᤢ᤺ᤵᤔᤠᤖᤧ ᤗᤠᤃᤡ “ᤀᤠᤱᤃᤠ᤹ ᤋᤠᤖᤢᤱᤔᤠ ᤀᤠᤔᤣ᤺ᤳᤋᤡᤴᤏᤢ ᤀᤡᤵᤛᤠᤱᤅᤡᤸᤗᤧ ᤂᤢᤏᤧ᤹ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤜᤧᤰᤁᤣ ᤔᤧᤗ᤹ᤖᤧᤴ” ᤀᤰᤂᤣ ᤐᤠ᤺ᤳᤋᤢᤏᤧᤓᤃᤪ.

¹⁵ ᤂᤧᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠ᤺ᤸᤗᤧ ᤁᤢᤶᤔᤠ ᤁᤢᤶᤒᤠᤖᤧ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠᤛᤠᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤘᤠ᤹ᤒᤠ ᤏᤡ᤺ᤴᤎᤥ ᤐᤠᤴ ᤂᤱᤛᤢᤖ ᤐᤥᤱ᤹॥

¹⁶ ᤂᤧᤒᤩᤠᤱ ᤂᤧᤴ ᤔᤧᤴᤇ᤻ᤕᤠ᤺ᤸᤗᤧ ᤁᤢᤶᤒᤠᤖᤧ ᤗᤠᤶᤗᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ. “ᤀᤠᤱᤃᤠ᤹ ᤀᤠᤛ᤻ᤛᤠ ᤔᤧᤴᤇᤢᤔᤠᤴ ᤁᤴ ᤔᤏᤠᤴ ᤔᤣ᤺ᤳ ᤐᤡᤖᤢᤱ. ᤁᤖ ᤂᤧᤸᤗᤧ ᤁᤴ ᤀᤠᤛ᤻ᤛᤠᤴ ᤏᤠ᤹ᤖᤢ᤹॥

¹⁷ ᤁᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤀᤠᤱ ᤀᤠᤵᤋᤡᤰ ᤁᤢ᤺ᤳᤋᤢᤖ ᤐᤳ. ‘ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤆᤥᤃᤧᤒᤠ ᤐᤷᤔᤠ᤺ᤱᤃᤡ ᤔᤧᤱᤄᤥᤒᤠ’ ᤁᤖ ᤁᤴ ᤀᤠᤛ᤻ᤛᤠᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤆᤥ᤺ᤰᤐᤠ ᤐᤷᤔᤠ᤺ᤱᤃᤡ ᤁ᤹ᤕᤥ ᤘᤠ᤹॥” ᤂᤧᤒᤩᤠᤱ ᤔᤧᤴᤇ᤻ᤕᤠ᤺ᤸᤗᤧ ᤁᤢᤶᤒᤠᤖᤧ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤏᤧᤳᤏᤠᤴ ᤑᤧᤛᤢᤖ॥

¹⁸ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤧᤴ ᤔᤏᤠᤴ ᤔᤧᤍᤣ᤹ᤖᤢᤀᤠᤱ ᤂᤢᤶᤍᤡᤱ ᤔᤧᤒᤡᤖᤢᤖ.

¹⁹ ᤂᤶᤓᤩᤠᤱ ᤀᤡᤛᤪᤠᤀᤡᤗᤒᤠ ᤗᤳᤇᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤁᤢᤈᤠ᤺ᤳᤌᤡ ᤋᤣᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤁᤡᤵᤌᤡᤰ ᤕᤢᤵᤐᤠ ᤛᤣᤁᤣᤗ ᤔᤧᤴᤇ᤻ᤕᤠ᤺ᤸᤗᤧ ᤁᤢᤶᤒᤠᤀᤥ ᤛᤠᤶᤒᤠᤴ ᤜᤢᤅᤢᤖ. ᤜᤧᤰᤁᤩᤠᤱ ᤔᤧᤴᤇᤢᤔᤠᤴ ᤂᤧᤸᤗᤧ ᤁᤢᤔᤣᤳ ᤐᤥᤱᤅᤠᤱ ᤜᤠᤒᤠ ᤘᤠ᤹ᤖ॥ ᤂᤧᤴ ᤁᤢᤜᤡᤱᤜᤡᤱ ᤂᤢᤏᤧ᤹ ᤂᤧᤴ ᤔᤧᤴᤇ᤻ᤕᤠᤴ ᤏᤠ᤹ᤔᤠ ᤔᤧᤄᤥᤛᤢᤴ॥

²⁰ ᤁᤖ ᤀᤠᤵᤋᤡᤰᤁᤡᤴ ᤛᤧᤰᤂᤠ ᤐᤥ᤺ᤰᤂᤧ ᤜᤧᤰᤁᤩᤠᤱ ᤂᤧᤴ ᤔᤧᤴᤇ᤻ᤕᤠᤀᤥ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤔᤡᤰᤛᤣᤴ ᤘᤠ᤹ᤒᤠ ᤐᤷᤔᤠ᤺ᤱᤃᤡ ᤂᤥᤔᤧᤍᤧᤳᤋᤧᤴᤏᤧᤓᤃᤪ.

²¹ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤘᤕᤧᤸᤗᤧᤛᤠ ᤆᤧᤸᤗᤧᤰᤗᤧᤰ ᤗ᤹ᤖᤧᤀᤠᤱ ᤀᤡᤛᤪᤠᤀᤡᤗᤖᤧ ᤁᤢᤏᤠ ᤁᤢᤛᤠᤶ ᤌᤠᤔᤠ ᤕᤠ᤺ᤶᤒᤰ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤶᤒᤠᤖᤧᤀᤣ ᤁᤢᤜᤡᤶ ᤗᤠᤶᤎᤣ᤺ᤵᤐᤥ ᤔᤧᤍᤠᤖᤢᤀᤠᤱ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤖ॥ ᤂᤡᤏᤡ᤹ ᤗᤢᤶᤔᤥᤒᤠ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤧᤳᤋᤠᤶᤔᤧ᤹॥

²² ᤁᤢᤓᤠ ᤕᤧᤶᤒᤡᤳᤇᤠ ᤔᤏᤠᤴ ᤘᤣ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴᤏᤢ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢᤖ ᤐᤵᤐᤠ ᤁᤧᤍᤢᤔᤢᤶᤏᤧᤓᤃᤪ. ᤂᤧᤴᤏᤢ ᤁᤧᤀᤡᤶᤒᤠ ᤕᤧᤶᤒᤡᤳᤇᤠᤴ ᤏᤢ ᤂᤧᤴ ᤔᤧᤴᤇᤢᤔᤠᤴ ᤏᤧᤵᤔᤠᤱ ᤛᤧᤵᤔᤠᤛᤡ ᤐᤥᤱ᤹॥ ᤀᤡᤛᤪᤠᤀᤡᤗᤗᤠᤶ ᤂᤡᤏᤡ᤹ ᤀᤰᤋᤱᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤂᤧᤵᤔᤠ ᤐᤥᤱ᤹॥

²³ ᤐᤠ᤺ᤴᤔᤧᤓᤢ᤹ᤖᤢᤀᤠᤱ ᤁᤧᤕᤧᤵᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤁᤢᤓᤠ ᤕᤧᤶᤒᤡᤳᤇᤠ ᤌᤡᤰᤗᤧ ᤋᤢᤔᤢᤀᤠᤱ ᤕᤧᤰᤕᤰᤁᤥ ᤂᤧᤴ ᤀᤡᤵᤋᤢᤒᤠ ᤁᤧᤍᤢᤔᤢᤶᤏᤧᤓᤃᤪ.

²⁴ ᤂᤧᤱᤜᤠ᤹ ᤏᤧᤵᤔᤠᤱ ᤕᤧᤰᤕᤰ ᤗᤠᤶᤎᤣᤳ ᤗᤠ᤺ᤰᤁᤠᤳ ᤋᤣ᤹ᤖᤧᤶᤛᤡᤶᤔᤧ᤹ᤀᤠᤱ ᤗᤢᤱᤅᤡᤸᤗᤧ ᤗᤧᤵᤋᤧᤶ ᤛᤧᤖᤧᤶᤛᤡᤶᤔᤧ᤹. ᤕᤧᤰᤕᤰᤁᤥᤀᤣ ᤘᤕᤧᤛᤠᤱ ᤁᤢᤓᤠ᤹ᤖᤧ ᤗᤠᤃᤡ ᤔᤧᤀ᤺ᤰᤋᤧᤶᤒᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤛᤧᤖᤧᤶᤔᤧ᤹. ᤜᤧᤰᤁᤩᤠᤱ ᤘᤣ᤹ ᤕᤧᤶᤒᤡᤳᤇᤠ᤺ᤸᤗᤧ ᤁᤢᤔᤣ᤺ᤳᤋᤡᤴ ᤔᤣ᤺ᤳᤔᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤧᤶᤒᤡᤳᤇᤠ᤺ᤴᤏᤠᤱ ᤛᤧᤵᤔᤠ ᤐᤥᤱ᤹॥ ᤂᤡᤏᤡ᤹ ᤗᤢᤶᤔᤥᤗᤠᤶ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤧᤳᤋᤠᤶᤔᤧ᤹॥

²⁵ ᤁᤖ ᤁᤢᤓᤠ ᤕᤧᤶᤒᤡᤳᤇᤠ᤺ᤸᤗᤧ ᤐᤠ᤺ᤴᤔᤧᤓᤢ᤹ᤖᤢᤀᤠᤱ ᤁᤧᤕᤧᤵᤔᤠ ᤔᤧᤴᤇ᤻ᤕᤠᤴ ᤗᤠ᤺ᤰᤁᤠᤳ ᤆᤡᤈᤡ ᤂᤰᤂᤰᤐᤠ ᤋᤧᤴᤏᤥ ᤋᤢᤔᤢ᤹ ᤜᤧᤰᤁᤩᤠᤱ ᤀᤢ᤺ᤰᤂᤢᤀᤠᤱ ᤔᤣ᤺ᤳᤔᤧᤳᤋᤢᤏᤧᤓᤃᤪ ᤂᤧᤴ ᤕᤧᤶᤒᤡᤳᤇᤠ᤺ᤴᤗᤰ ᤛᤧᤖᤧᤶᤔᤧ᤹॥

²⁶ ᤁᤖ ᤂᤧᤴ ᤔᤧᤴᤇ᤻ᤕᤠᤴ ᤌᤣᤀᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹. ᤂᤧᤸᤗᤧ ᤛᤡᤔᤠ ᤕᤠᤖᤡᤰᤐᤠ ᤗᤠᤕᤥ ᤆᤥᤃᤢᤒᤠ ᤜᤥᤵ. ᤁᤴ ᤐᤠ᤺ᤴᤏᤡᤱᤃ ᤁᤢᤓᤠ ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤜᤡᤶᤒᤣᤛᤠᤱᤒᤧᤴ ᤑᤳᤋᤢᤀᤠᤱ ᤛᤧᤖᤢᤒᤠ ᤁᤢᤀᤡᤛᤡ᤺ᤰᤗᤥ॥

²⁷ ᤌᤣᤀᤠᤱᤓᤧᤸᤗᤧ ᤂᤧᤴ ᤐᤠ᤺ᤴᤔᤧᤓᤢ᤹ᤖᤢᤀᤠᤱ ᤁᤧᤕᤧᤵᤔᤠ ᤔᤧᤴᤇ᤻ᤕᤠᤴ ᤀ᤺ᤰᤋᤧᤛᤠᤱ ᤆᤡᤈᤡ ᤂᤰᤂᤰᤐᤠ ᤋᤧᤴᤏᤥ ᤂᤧᤸᤗᤧ ᤔᤣ᤺ᤳᤔᤧᤳᤋᤢᤸᤗᤧ ᤂᤧᤵᤔᤥ ᤂᤢᤏᤧ᤹ ᤁᤧᤓᤠ᤹ᤒᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧ॥

²⁸ ᤁᤢᤓᤠ ᤕᤧᤶᤒᤡᤳᤇᤠ᤺ᤸᤗᤧ ᤐᤠ᤺ᤴᤔᤧᤶᤓᤢ᤹ᤀᤣ ᤁᤧᤕᤧᤵᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤀᤢ᤺ᤰᤂᤢᤀᤠᤱ ᤔᤣ᤺ᤳᤔᤧᤳᤋᤢᤒᤠ ᤋᤢᤶᤍᤧᤳᤋᤧᤏᤧᤓᤃᤪ.

²⁹ ᤂᤧᤴ ᤕᤧᤶᤒᤡᤳᤇᤠ᤺ᤸᤗᤧ ᤂᤧᤴ ᤔᤧᤴᤇ᤻ᤕᤠ᤺ᤸᤗᤧ ᤁᤢᤶᤒᤠ ᤅᤠᤒᤥᤱ ᤛᤣᤁᤣᤗ ᤕᤢᤵᤐᤠ ᤐᤡᤖᤢᤖ ᤐᤥᤱ᤹॥ ᤂᤧᤴ ᤕᤧᤶᤒᤡᤳᤇᤠ᤺ᤸᤗᤧ ᤂᤧᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤀᤢ᤺ᤰᤂᤢᤀᤠᤱ ᤔᤣ᤺ᤳᤔᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤴ ᤁᤢᤔᤣᤳ ᤆᤥᤃᤢᤖ ᤐᤥᤱ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤱᤜᤡᤱ ᤂᤧᤴ ᤏᤠ᤹ᤔᤠ ᤔᤧᤄᤥᤛᤢᤴ᤹॥

³⁰ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤁᤢᤶᤒᤠᤖᤧ ᤁᤢᤔᤣ᤺ᤳᤋᤡᤴ ᤔᤧᤃᤳᤋᤢᤴᤗ. ᤜᤧᤰᤁᤩᤠᤱ ᤁᤢᤶᤒᤠᤖᤧ ᤁᤢᤀᤡᤵᤏᤠᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤴᤗᤖᤥ॥