ᤛᤠᤶᤕᤥᤌᤡᤶ ᤀᤡᤱ 21 - LIFOTNTᤔᤏᤠᤃᤧᤛᤧᤵᤐᤧᤴ ᤏᤡᤔᤧᤍᤧᤳᤏᤧᤴᤏᤡᤸᤗᤧᤒᤠ ᤌᤡᤶ 1 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰᤁᤥ ᤁᤧᤒᤡᤖᤡᤀᤠᤱ ᤏᤧᤒᤠ ᤗᤠᤈᤣ᤹ᤀᤥᤒᤠ ᤁᤢᤓᤠ ᤀᤡᤰᤋᤠᤵᤐᤥ ᤁᤢᤓᤠ ᤔᤧᤛᤧᤖᤢᤒᤠ ᤔᤏᤠ ᤁᤧᤄᤥᤛᤢᤶ ᤜᤧᤰᤁᤩᤠᤱ ᤁᤧᤛᤧᤵᤐᤠ ᤔᤏᤠᤴ ᤁᤧᤴᤕᤠᤱᤄᤢᤶᤔᤡᤴᤏᤧᤓᤃᤪ. 2 ᤗᤠᤶᤗᤥᤒᤠᤜᤠ᤹ ᤏᤢ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤔᤧᤒᤣ᤺ᤰᤁᤠᤱ ᤔᤧᤛᤧᤖᤢᤒᤠ ᤔᤏᤠ ᤁᤧᤏᤧᤒᤠᤍᤧᤴᤗᤠᤶ ᤀᤠᤳᤋᤡᤴ ᤕᤧᤰᤕᤰᤁᤡᤴ ᤏᤡ᤺ᤳᤋᤠᤱ ᤏᤧ ᤂᤧᤴ ᤏᤡᤱᤘᤠ᤹ ᤏᤡ᤺ᤴᤎᤥ ᤔᤧᤈᤥᤃᤢᤖ॥ 3 ᤂᤧᤴ ᤏᤡ᤺ᤳᤋᤠᤱᤒᤠ ᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤕᤠ᤺ᤶᤒᤰᤁᤥ ᤔᤧᤶᤓᤳᤇᤢᤶᤔᤠ ᤏᤢ ᤂᤧ᤺ᤵᤛᤡᤱ ᤔᤧᤴᤕᤠᤰᤋᤢᤶᤔᤠ ᤁᤖ᤺ᤱ ᤐᤡᤳᤔᤠᤎᤡᤰ ᤔᤧᤕᤠᤱᤛᤡᤱᤅᤠᤱ 4 ᤔᤧᤴᤎᤥ᤺ᤰᤂᤢᤶᤒᤠ ᤏᤢ ᤕᤠ᤹ᤖᤡ᤺ᤶᤒᤠ ᤔᤧᤴᤜᤣ᤹ᤖᤢᤶᤒᤠ ᤏᤧᤘᤠᤗᤠᤀᤥᤒᤠ ᤁᤢᤓᤠ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤧᤃᤧᤳᤋᤢᤀᤠᤱ ᤂᤧᤸᤗᤧ ᤁᤢᤛᤡᤳᤗᤠ᤺ᤴ ᤔᤧᤀᤧᤰᤂᤢ ᤔᤧᤒᤡᤖᤢᤖ ᤐᤥᤱ᤹॥ 5 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤃᤡ ᤁᤢᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤂᤢᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤔᤠᤛᤡᤖᤧ ᤗᤠᤃᤡ ᤜᤧᤰᤁᤩᤠᤱ ᤁᤧᤖᤧᤰ ᤂᤣᤔᤠ ᤌᤰᤔᤠᤜᤠ᤹ ᤜᤡᤵᤛᤡᤱᤔᤠ ᤌᤰᤛᤡᤱᤔᤠᤜᤠ᤹ ᤋᤱᤔᤠ ᤐᤡᤔᤠᤛᤡ ᤕᤠ᤺ᤶᤒᤰᤗᤧ ᤗᤠᤃᤡ ᤂᤢᤏᤧ᤹ ᤛᤣᤃᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤘᤠ᤹ᤖ॥ 6 ᤂᤧᤴ ᤔᤧᤛᤧᤖᤢᤒᤠ ᤆᤣ᤺ᤸᤗᤧ ᤛᤠ᤹ᤖᤡᤰ ᤁᤢᤒᤣᤛᤠᤱᤒᤠ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ᤖᤧ ᤘᤜ᤺ᤱᤅᤥ ᤁᤢᤏᤡᤃᤡ᤺ᤱᤔᤠ ᤔᤧᤀᤧᤰᤂᤢᤒᤠ ᤁᤖ᤺ᤱ ᤐᤡᤵᤔᤠ᤺ᤸᤗᤧ ᤁᤢᤛᤶᤎᤠᤱ ᤂᤢᤴᤇᤡ᤹ ᤜᤢᤰᤜᤠ᤹ ᤘᤠᤔᤧᤜᤵᤋᤢᤖ॥ 7 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ. “ᤁᤴ ᤔᤏᤠᤛᤧᤵᤔᤠ ᤕᤠ᤺ᤶᤒᤰᤁᤡᤴ ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤔᤣ᤺ᤴ. ᤀᤠᤏᤡᤃᤣ ᤔᤡᤰᤁᤡᤸᤗᤧᤀᤠᤱ ᤂᤧᤴ ᤜᤧᤰᤁᤣ ᤐᤥ᤺ᤰᤂᤧᤖ ᤐᤳᤇᤧᤒᤠ ᤏᤡᤛᤢᤒᤠ ᤔᤣ᤺ᤴ॥ 8 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤢᤛᤡᤒᤠ ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤠᤵᤋᤡᤰ ᤂᤧᤵᤔᤠ ᤁᤴ ᤛᤡᤍᤢᤱᤈᤓᤠᤴ ᤋᤠ᤺ᤰᤋᤧ᤹ᤀᤥ. ᤜᤧᤰᤁᤩᤠᤱ ᤁᤢᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤁᤴ ᤔᤧᤛᤧᤖᤢᤒᤠ ᤔᤏᤠ᤺ᤸᤗᤧ ᤁᤢᤀᤠᤵᤋᤡᤰᤁᤧᤸᤗᤧ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤔᤧᤍᤧᤳᤋᤢᤛᤡᤴᤗ॥” ᤜᤧᤰᤁᤩᤠᤱ ᤁᤴ ᤔᤧᤛᤧᤖᤢᤒᤠ ᤔᤏᤠᤗᤠᤶ ᤁᤧᤒᤥᤱᤒᤠ ᤀᤠᤵᤋᤡᤰᤁᤧᤴ ᤗᤧᤵᤔᤡ ᤏᤠ᤺ᤰᤔᤠ ᤐᤥᤱ᤹॥ 9 ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤂᤡᤏᤡ᤹ ᤁᤧᤗᤠ᤹ᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤗᤢᤶᤔᤥᤗᤠᤶ ᤂᤧᤴ ᤁᤢᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤏᤠ ᤔᤧᤛᤧᤖᤢᤒᤠᤸᤗᤧ ᤁᤢᤀᤠᤵᤋᤡᤰᤁᤡᤴ ᤂᤡᤏᤡ᤹ᤗᤠᤶ ᤗᤠ᤺ᤳᤗᤠ᤺ᤳ ᤐᤥᤱᤗᤥ॥ ᤔᤧᤍᤧᤶᤛᤢ ᤁᤧᤍᤠᤖᤢᤔᤠ ᤔᤧᤴᤇᤢᤔᤠ 10 ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤥᤀᤥ ᤁᤧᤒᤣᤃᤡᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤛᤡᤀᤠᤱ ᤂᤧᤱᤜᤠ᤹ ᤁᤧᤍᤧᤶᤛᤢᤶ ᤁᤧᤍᤠᤖᤢᤶᤛᤡᤶᤔᤡᤸᤗᤧ. 11 ᤁᤧᤍᤧᤶᤛᤢᤶ ᤁᤧᤍᤠᤖᤢᤶᤛᤡᤶᤔᤠᤜᤠ᤹ᤀᤥᤒᤠ ᤁᤢᤓᤠ ᤗᤳᤇᤠ ᤏᤢᤔᤠ ᤔᤧᤴᤇᤢᤔᤠᤴ ᤂᤡᤏᤡ᤹ ᤛᤡᤖᤠ᤹ᤌᤠᤱᤏᤧᤓᤃᤪ. ᤂᤡᤏᤡ᤹ ᤂᤧᤴ ᤔᤣ᤺ᤳ ᤆᤥ᤺ᤰᤔᤠ ᤁᤧᤛᤢᤰᤋᤢᤶ᤹॥ 12 ᤂᤧᤴ ᤂᤡᤏᤡ᤹ ᤜᤡᤶᤔᤥ ᤋᤣ᤹ᤖᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤁᤢᤎᤧᤃᤣᤰ ᤀᤡ᤺ᤴ ᤏ᤺ᤱᤔᤠ ᤏᤢ ᤁᤢᤛᤣ᤺ᤴᤍᤢ᤹ᤒᤠᤴ ᤂᤰᤔᤠ ᤐᤠᤱᤄᤧᤶᤔᤧ᤹. 13 ᤂᤧᤒᤩᤠᤱ ᤂᤧᤴ ᤁᤧᤍᤧᤶᤛᤢᤶᤔᤡᤸᤗᤧ ᤂᤧᤸᤗᤧ ᤆᤠᤰᤂᤢᤒᤠ ᤆᤠᤱᤅᤡᤴ ᤗᤧᤰᤛᤡᤱᤔᤠ ᤐᤠᤱᤄᤧᤶᤔᤧ᤹॥ ᤂᤡᤏᤡ᤹ ᤜᤡᤶᤔᤥ ᤕᤢᤱ ᤜᤧᤰᤁᤩᤠᤱ ᤂᤧᤸᤗᤧ ᤗᤳᤇᤠ ᤗᤠ ᤂᤠᤖᤠᤰ ᤁᤢᤶᤒᤠ ᤁᤢᤶᤔᤠᤖᤧᤛᤡᤖᤧ ᤗᤠᤃᤡ ᤔᤧᤖᤡᤱ ᤌᤰᤔᤠ ᤛᤢᤖᤢᤀᤠᤱ ᤀᤣᤃᤠᤱ ᤂᤡᤏᤡ᤹ ᤂᤧᤵᤔᤥ ᤐᤣ᤺ᤰᤔᤠ ᤏᤢ ᤂᤢᤏᤧ᤹ ᤁᤢᤕᤧᤶᤒᤠ ᤐᤥᤱᤔᤠ ᤁᤧᤛᤢᤰᤋᤡ᤹. ᤂᤧᤒᤩᤠᤱ ᤂᤧᤴ ᤂᤡᤏᤡ᤹ ᤔᤣ᤺ᤳ ᤐᤥᤱ᤹॥ 14 ᤋᤠ᤺ᤴᤍᤡ ᤂᤧᤴ ᤂᤡᤏᤡ᤹ ᤛᤡᤖᤠ᤹ᤔᤧᤎᤠᤱᤏᤧᤴᤏᤧᤓᤃᤪ. ᤂᤧᤸᤗᤧ ᤀᤠᤳᤋᤡ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤶᤔᤧ᤹ᤀᤥ॥ ᤂᤧᤏᤧ᤹ ᤂᤧᤴ ᤛᤱᤔᤠ ᤔᤧᤏᤢ᤹ᤏᤧᤴ ᤀᤡᤃᤪ ᤕᤥ᤺ᤃ᤻ᤔᤠ ᤜᤧᤰᤁᤣ ᤋᤠᤵᤑᤧ᤺ᤸᤗᤡᤰ ᤔᤧᤵᤔᤠ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤂᤧᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢᤀᤠᤱ ᤘᤠ᤹ᤖᤥ॥ ᤋᤢᤶᤒᤠ ᤛᤠ᤺ᤸᤗᤧ ᤁᤢᤄᤥᤔᤠ ᤗᤰ 15 ᤁᤢᤓᤠ ᤔᤏᤠ᤺ᤸᤗᤧ ᤁᤢᤔᤣᤳ ᤏᤧᤳᤇᤡ ᤘᤠ᤹ᤛᤡ. ᤗᤳᤇᤠ ᤗᤢᤱᤔᤠ᤹ ᤜᤡ᤺ᤵᤋᤢᤔᤠ ᤏᤢ ᤘᤣ᤹ᤀᤡᤴ ᤗᤢᤱᤔᤠ᤹ ᤔᤧᤜᤡ᤺ᤵᤋᤢᤶᤔᤠ ᤜᤧᤰᤁᤩᤠᤱ ᤂᤧᤴ ᤏᤧᤵᤔᤠᤱᤗᤧ ᤕᤧᤶᤒᤡᤳᤇᤠᤛᤠ ᤁᤳᤇᤢᤸᤗᤧ ᤗᤢᤱᤔᤠ᤹ ᤔᤧᤜᤡ᤺ᤵᤋᤢᤶᤔᤠᤸᤗᤧ ᤋᤢᤶᤒᤠ ᤛᤠ ᤕᤧᤶᤒᤡᤳᤇᤠ ᤁᤳᤋᤢᤏᤧᤓᤃᤪ. 16 ᤗᤠᤈᤣ᤹ᤛᤡᤱᤒᤢᤱ ᤔᤧᤓ᤺ᤰᤂᤢᤸᤗᤧ ᤗᤢᤱᤔᤠ᤹ ᤜᤡ᤺ᤵᤋᤢᤔᤠᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤑᤠ᤹ᤀᤠᤱ ᤗᤢᤱᤔᤠ᤹ ᤔᤧᤜᤡ᤺ᤵᤋᤢᤶᤔᤠᤸᤗᤧ ᤛᤧᤰᤂᤠᤒᤠ ᤁᤢᤛ᤻ᤛᤠ ᤋᤢᤶᤒᤠᤴ ᤁᤠ᤺ᤰᤋᤢᤀᤠᤱ ᤁᤢᤶᤒᤠᤖᤧ ᤑᤥ᤹ᤒᤠᤴ ᤕᤢᤰ ᤐᤡᤔᤠ ᤔᤧᤄᤥᤛᤢᤴ᤹॥ 17 ᤁᤖ ᤂᤧᤴ ᤗᤢᤱᤔᤠ᤹ ᤔᤧᤜᤡ᤺ᤵᤋᤢᤶᤔᤠᤸᤗᤧ ᤁᤢᤛ᤻ᤛᤠᤴᤏᤣ ᤂᤢᤏᤧ᤹ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ᤺ᤸᤗᤧ ᤏᤡᤗᤧᤱ ᤁᤢᤗᤰᤁᤡᤴ ᤐᤡᤖᤢᤖ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤁᤢᤶᤒᤠᤖᤧ ᤁᤢᤔᤢᤰᤁᤡᤸᤗᤧ ᤌᤡᤰᤛᤡᤃᤣᤰᤐᤠ ᤗᤰᤗᤥ॥ ᤜᤧᤰᤁᤩᤠᤱ ᤋᤢᤶᤒᤠ ᤑᤠ᤹ᤀᤠᤱ ᤋᤠ᤺ᤰᤋᤢᤖ ᤐᤥᤱ᤹॥ ᤋᤢᤶᤒᤠ ᤗᤰᤂᤥᤔᤠ ᤕᤢᤰᤁᤡᤴ ᤂᤧᤸᤗᤧᤴᤏᤣ ᤐᤥᤱᤗᤥ॥ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤕᤧᤶᤒᤡᤳᤇᤠᤛᤠ 18 ᤁᤢᤶᤒᤠ ᤁᤢᤶᤔᤠᤖᤧ ᤂᤢᤴᤇᤡ᤹ ᤀᤡᤱᤈᤠᤱ ᤔᤧᤱᤄᤧᤶᤔᤏᤠᤒᤠ ᤁᤢᤓᤠ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤁᤢ᤹ᤀᤡᤃᤧᤓᤧᤶᤒᤠ ᤕᤧᤶᤒᤡᤳᤇᤠ ᤛᤠᤴ ᤜᤧᤴᤌᤡᤶ ᤔᤧᤕᤠᤰᤋᤢᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴᤏᤧᤓᤃᤪ. 19 ᤂᤧᤸᤗᤧ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤧᤴ ᤔᤧᤍᤧᤶᤛᤢᤀᤠᤱ ᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ᤖᤧᤀᤥ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤔᤧᤍᤣ᤹ᤖᤢᤖ॥ 20 ᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ ᤀᤰᤂᤣ ᤔᤧᤳᤇᤢᤖ. “ᤁᤴ ᤀᤠᤴᤇᤡᤃᤣ ᤕᤧᤶᤒᤡᤳᤇᤠ ᤛᤠᤴ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤏᤢ ᤂᤠᤷᤔᤧᤴᤍᤰ ᤁᤧᤈᤥ᤺ᤰᤐᤠ ᤆᤥᤰ॥ ᤂᤧᤸᤗᤧ ᤀᤠᤴᤇᤡᤃᤣ ᤐᤠᤴ ᤔᤧᤄᤧᤵᤛᤢᤴ॥ ᤁᤴ ᤋ᤺ᤰᤌᤧ᤺ᤰᤁᤣ ᤏᤢ ᤌᤡᤔᤛᤠᤱ ᤆᤥᤰ॥” 21 ᤂᤧᤒᤩᤠᤱ ᤂᤧᤴ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤧᤴ ᤛᤡᤖ ᤌᤠᤖᤡᤰ ᤗᤢᤱᤅᤡᤸᤗᤧ ᤔᤧᤗᤧᤵᤋᤢᤖ॥ ᤂᤡᤏᤡ᤹ ᤗᤢᤶᤔᤥᤗᤠᤶ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤧᤳᤋᤠᤶᤔᤧ᤹. ᤂᤧᤒᤩᤠᤱ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤂᤧᤴ ᤁᤢ᤹ᤀᤡᤃᤧᤓᤧᤶᤒᤧᤴ ᤁᤧᤄᤧᤳᤋᤢᤶ᤹॥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰᤗᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢ᤹ ᤜᤧᤰᤁᤩᤠᤱ ᤔᤧᤃᤡᤖᤥ॥ ᤘᤣ᤹ ᤌᤡᤶᤜᤠ᤹ 22 ᤁᤢᤓᤠ ᤔᤏᤠ᤺ᤸᤗᤧ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠ ᤕᤠᤖᤡᤰᤐᤠ ᤗᤠᤕᤥ ᤆᤥᤃᤢᤸᤗᤧ ᤂᤡᤏᤡ᤹ ᤂᤧᤴ ᤁᤧᤛᤧᤖᤢᤶᤔᤠᤱ ᤂᤧᤸᤗᤧ ᤁᤢᤎᤰᤁᤡᤴ ᤛᤡᤱᤒᤢᤱᤅᤥ ᤁᤧᤓᤥ᤺ᤴᤍᤢᤶᤔᤡᤸᤗᤧ. 23 ᤂᤧᤸᤗᤧ ᤁᤢᤎᤰ ᤆᤣ᤺ᤴ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤛᤡᤱᤒᤢᤱᤅᤥ ᤔᤧᤓᤥ᤺ᤴᤍᤧᤶ ᤔᤧᤓᤳᤇᤧᤶᤔᤡᤴᤏᤧ᤹. ᤁᤖ ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤂᤧᤴ ᤗᤢᤵᤋᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤑᤥ᤺ᤶᤔᤏᤠᤒᤠ ᤔᤏᤠᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠᤱᤍᤣ ᤛᤠᤱᤃᤪᤠ᤺ᤸᤗᤧ ᤋᤧᤳᤋᤢᤒᤠ ᤐᤥᤱ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤰᤂᤥᤔᤠ ᤁᤧᤒᤡᤖᤡᤀᤠᤱ ᤏᤧᤒᤠ ᤗᤠᤈᤣᤴ ᤀᤠᤛᤢᤳᤌᤥ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.