ᤛᤠᤶᤕᤥᤌᤡᤶ ᤀᤡᤱ 20 - LIFOTNTᤋᤧᤴᤎᤱᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤈᤠᤱ 1 ᤂᤡᤏᤡ᤹ ᤋᤧᤴᤎᤱᤅᤥ ᤁᤧᤒᤣᤃᤡᤸᤗᤧ ᤏᤡᤱᤔᤡᤜᤠ᤹ᤖᤧ ᤀᤴᤜᤠ᤹. ᤀᤴᤗᤠᤎᤠᤜᤠ᤹ ᤜᤧᤰᤁᤩᤠᤱ ᤂᤡᤏᤡ᤹ᤏᤢ᤺ᤸᤗᤧ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠᤜᤠ᤹ ᤔᤧᤃᤳᤋᤢᤛᤡᤒᤠ ᤁᤧᤏᤡᤛᤢᤶᤔᤡᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹॥ 2 ᤌᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤀᤰᤂᤣ ᤐᤠ᤺ᤵᤔᤠ ᤐᤥᤱ᤹॥ 3 ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤥᤱ᤹. “ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤏᤠᤗᤡᤃᤧᤴ ᤌᤠᤱᤒᤧᤴ ᤔᤏᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹᥄ ᤀᤠᤀᤡᤴ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤁᤧᤒᤣᤃᤡᤖ ᤁᤧᤒᤳᤇᤡ॥ ᤂᤡᤏᤡ᤹ ᤏᤡᤱᤘᤠᤴ ᤁᤧᤎᤢᤶᤒᤠ ᤆᤥᤃᤧᤶᤔᤧ᤹. ᤔᤧᤃᤡᤛᤧᤶᤔᤡᤴᤏᤧ᤹. ᤔᤧᤏᤠᤰᤋᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤕᤱᤔᤠ ᤔᤧᤛᤩᤧ᤹ᤀᤡᤴᤏᤧ᤹॥ 4 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤧᤴᤎᤱ ᤆᤥ᤺ᤰᤁᤠᤱ ᤂᤡᤏᤡ᤹ ᤌᤱ ᤁᤧᤏᤠ᤺ᤶᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤛᤥᤛᤥᤖᤡᤰ ᤐᤣᤰ᥄” 5 ᤂᤧᤒᤩᤠᤱ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤖ. “ᤜᤡᤶ ᤁᤧᤈᤥ᤺ᤰᤐᤠᤀᤠᤱ ᤋᤥ᤺ᤶᤔᤠ ᤔᤧᤱᤄᤥᤶᤏᤠᤒᤠ ᤁᤢᤓᤠ ᤁ᤹ᤕᤥ ᤘᤠ᤹ᤏᤧᤓᤃᤪ. ᤂᤧᤴ ᤁᤢᤜᤡᤶᤔᤥ ᤏᤢ᤺ᤱᤅᤠᤱ ᤐᤣ᤺ᤰᤗ॥ ᤌᤱᤅᤥ ᤂᤧᤴ ᤔᤧᤛᤧᤖᤢᤏᤧᤓᤃᤪ. ᤘᤣ᤹ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤜᤡᤶᤔᤡᤴ ᤋᤥ᤺ᤴᤍᤢ᤹॥ 6 ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤁᤧᤗᤣ᤺ᤵᤐᤠᤀᤠᤱ ᤂᤧᤸᤗᤧ ᤁᤢᤈᤠ᤹ᤀᤡᤴ ᤋᤢᤵᤔᤠ ᤆᤠᤔᤠ ᤔᤧᤱᤄᤥᤶᤏᤠᤒᤠ ᤁᤢᤓᤠ ᤁ᤹ᤕᤥ ᤘᤠ᤹ᤏᤧᤓᤃᤪ. ᤂᤧᤴ ᤜᤡᤶᤔᤥ ᤏᤢ᤺ᤱᤅᤠᤱ ᤐᤣ᤺ᤰᤗ॥ ᤌᤱᤅᤥ ᤂᤧᤴ ᤔᤧᤛᤧᤖᤢᤏᤧᤓᤃᤪ. ᤘᤣ᤹ ᤔᤏᤠ᤺ᤸᤗᤧ ᤂᤧᤴ ᤋᤢᤒᤢ ᤆᤖᤥ॥ 7 ᤁᤢᤓᤠᤖᤧ ᤂᤠᤖᤰ ᤐᤠ᤺ᤴᤑᤢ᤹ᤖᤢᤀᤠᤱ ᤁᤧᤕᤧᤵᤔᤠ ᤔᤧᤴᤇ᤻ᤕᤠᤴ ᤜᤡᤶ ᤔᤧᤸᤗᤡ᤺ᤱᤅᤣ ᤁᤳᤋᤢᤏᤧᤓᤃᤪ. ᤂᤢᤏᤧ᤹ ᤁᤢᤜᤡᤶᤔᤥ ᤏᤢ᤺ᤱᤅᤠᤱ ᤐᤣ᤺ᤰᤗ॥ ᤂᤢᤏᤧ᤹ ᤌᤱᤅᤥ ᤔᤧᤛᤩᤧᤖᤢᤏᤧᤓᤃᤪ ᤘᤣ᤹ ᤕᤧᤶᤒᤡᤳᤇᤠ᤺ᤸᤗᤧ ᤂᤧᤴ ᤔᤧᤴᤇ᤻ᤕᤠᤴ ᤋᤣ᤹ᤖᤢ᤹॥” 8 ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤔᤏᤠᤜᤠ᤹ ᤀᤰᤂᤣᤀᤠᤱ ᤔᤧᤔᤧᤳᤋᤢᤛᤡᤖ. “ᤁ᤹ᤕᤥ ᤁᤢᤓᤠ ᤛᤠ᤹ᤖᤡᤰ ᤁᤧᤃᤡᤒᤠ ᤁᤧᤛᤡᤒᤠ ᤏᤢ ᤁᤢᤏᤧᤖᤧᤳ ᤆᤢ᤺ᤰᤐᤠ ᤘᤠ᤹ᤏᤧᤓᤃᤪ. ᤂᤧᤴ ᤁᤢᤜᤡᤶᤔᤥ ᤏᤢ᤺ᤱᤅᤠᤱ ᤐᤣ᤺ᤰᤗ॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤛᤠ᤹ᤀᤡ ᤕᤱ᤹॥” 9 ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤔᤏᤠᤜᤠ᤹ ᤔᤧᤔᤧᤳᤋᤢ ᤔᤧᤛᤧᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠ ᤗᤠᤶᤗᤥᤒᤠᤜᤠ᤹ ᤕᤢᤰᤋᤡᤱ ᤔᤧᤈᤥᤃᤢᤛᤡᤖ॥ 10 ᤌᤱ ᤆᤥ᤺ᤰᤛᤧ ᤁᤢᤓᤠ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤃᤧᤖᤡᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤱᤔᤠ ᤛᤏᤠᤖᤢᤱ ᤐᤠᤴ ᤕᤢᤰᤂᤧᤶᤔᤧ᤹॥ 11 ᤂᤡᤏᤡ᤹ ᤁᤧᤕᤢᤰᤂᤢᤶᤒᤠ ᤋᤱᤔᤠ ᤛᤏᤠᤖᤢᤱ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤴᤇᤡ᤹ ᤕᤶᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤔᤧᤜᤴᤍᤢ ᤁᤧᤶᤒᤡᤖᤡᤏᤧᤓᤃᤪ. ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰᤁᤥ ᤑᤳᤇᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤕᤠ᤺ᤶᤒᤰ ᤔᤧᤈᤥᤃᤢ ᤁᤧᤶᤒᤡᤖᤡᤖ ᤐᤥᤱ᤹॥ 12 ᤁᤖ ᤂᤧᤱᤜᤠ᤹ᤖᤧ ᤂᤡᤏᤡ᤹ᤏᤢ ᤔᤧᤴᤍᤱᤏᤧᤴᤏᤠᤱ ᤋᤧᤴᤎᤱᤅᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥ᤺ᤰᤔᤠ ᤔᤧᤃᤥ᤺ᤳᤏᤧᤓᤃᤪ. ᤂᤧᤴ ᤕᤧᤰᤕᤰᤁᤡᤴ ᤁᤡᤷᤃᤵ ᤁᤒᤧᤶᤔᤧ᤹॥ 13 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤂᤡᤏᤡ᤹ ᤜᤢᤰᤁᤧᤛᤢᤵᤋᤡᤀᤠᤱ ᤀᤣᤃᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤋᤠᤓᤣ᤺ᤸᤗᤧ ᤆᤩᤧᤵᤋᤧᤶ ᤛᤧᤖᤧᤶᤛᤡᤶᤔᤧ᤹॥ 14 ᤁᤖ ᤔᤧᤴᤇᤢᤔᤠ. ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹. ᤐᤡᤳᤌᤰᤛᤠᤜᤠ᤹ ᤏᤢ ᤂᤧᤴ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤘᤣ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤌᤱ ᤁᤧᤏᤠ᤺ᤴᤍᤢᤶᤒᤠ ᤆᤡᤃᤰᤘᤠ ᤁᤢᤀᤡᤛᤡᤰ ᤔᤧᤵᤔᤠᤛᤡᤱ ᤁᤧᤛᤢᤰᤁᤠᤛᤡ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤡᤱᤔᤡᤜᤠ᤹ᤗᤠᤶ ᤁᤧᤒᤡᤖᤡᤒᤠ ᤁᤧᤏᤠᤵᤋᤢᤶᤛᤡᤶᤒᤠ ᤆᤡᤃᤰᤘᤠᤴ ᤂᤡᤏᤡ᤹ ᤕᤠᤱᤔᤠ ᤁᤧᤛᤢᤰᤋᤢᤶ᤹॥ 15 ᤂᤡᤏᤡ᤹ᤗᤠᤶ ᤔᤠ᤺ᤱᤄᤠ ᤁᤧᤏᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤖᤰ ᤜᤧᤰᤁᤣ ᤆᤥᤃᤧᤶᤔᤧ᤹. ᤁᤢᤕᤠᤁᤢᤕᤠᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰᤜᤠ᤹ ᤔᤣ᤺ᤴ॥ 16 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤰᤂᤥᤔᤠ ᤁᤢᤀᤡᤛᤡᤰ ᤂᤡᤏᤡ᤹ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤁᤴ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤆᤠᤀᤣ ᤁᤢᤛᤰᤔᤠ ᤁᤧᤕᤠᤰᤐᤠ ᤌᤧᤔᤠ᤺ᤴᤏᤠᤱ ᤁᤢᤜᤡᤱᤘᤧᤳ ᤔᤧᤗᤧᤖᤧᤶᤔᤡᤴᤏᤧ᤹॥ 17 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤁᤧᤒᤡᤖᤡᤒᤠ ᤁᤢᤀᤡᤛᤡᤰ ᤜᤡᤳᤋᤡ. ᤀᤣᤔᤥᤖᤡ. ᤁᤏᤠᤏᤡ. ᤐᤖᤡᤈ᤻ᤈᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤂᤡᤏᤡ᤹ ᤘᤖᤧᤱᤗᤧᤱ ᤔᤧᤰᤂᤧᤶᤛᤡᤶᤔᤧ᤹॥ 18 ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤒᤠ ᤁᤧᤖᤧᤰ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤁᤧᤶᤜᤢ᤹ᤖᤡ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤗᤠᤕᤥ ᤁᤧᤈᤥᤃᤢᤶ᤹॥ 19 ᤁᤢᤓᤠ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤁᤧᤈᤥᤃᤡᤀᤠᤱ ᤕᤖᤡᤰ ᤕᤧᤶ ᤌᤠᤖᤡᤰ ᤁᤡᤷᤃᤵ ᤁᤧᤃᤒᤢᤶ ᤁᤧᤏᤧᤛ᤻ᤛᤢᤶᤔᤡᤸᤗᤧ. ᤂᤧᤵᤔᤥᤒᤠ ᤛᤡᤱᤒᤢᤱᤜᤠ᤹ ᤔᤧᤀᤠ᤺ᤳᤋᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤈᤠ᤹ᤜᤠ᤹ ᤂᤡᤏᤡ᤹ ᤆᤠᤔᤠ ᤁᤧᤛᤢᤰᤋᤢᤶ᤹॥ ᤁᤸᤗᤧᤆᤥᤃᤢᤸᤗᤧ ᤁᤴᤜᤠ᤹ ᤔᤧᤀᤠ᤺ᤳᤋᤠᤶ ᤔᤧᤍᤣᤛᤧᤶᤔᤡᤴᤏᤧ᤹॥ ᤌᤣ ᤋᤠᤶᤓᤢᤱᤅᤥᤒᤠ ᤛᤡᤱᤒᤢᤱᤜᤠ᤹ ᤔᤏᤠᤛᤡᤀᤠᤱ ᤂᤡᤏᤡ᤹ ᤂᤧᤱᤜᤠ᤹ ᤁᤧᤃᤒᤢᤶᤔᤠᤱ ᤁᤧᤔᤧᤰᤂᤢᤶᤒᤡ᥅ 20 ᤁᤖ ᤁᤢᤈᤠ᤹ ᤔᤧᤴᤎᤥ᤺ᤰᤔᤏᤠᤒᤠ ᤛᤡᤱᤒᤢᤱᤖᤧᤇ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤄᤥᤛᤢᤶᤔᤠᤱᤗᤰ ᤂᤡᤏᤡ᤹ ᤂᤧᤴ ᤛᤡᤱᤒᤢᤱᤜᤠ᤹ ᤋᤠᤱᤔᤠᤍᤣᤔᤠ ᤁᤧᤛᤢᤰᤋᤢᤶ᤹॥ ᤂᤡᤏᤡ᤹ᤏᤢ ᤌᤱ ᤁᤧᤈᤥ᤺ᤰᤐᤠ ᤕᤧᤰᤕᤰᤁᤡᤴ ᤔᤧᤴᤏᤠ᤺ᤴᤏᤣ ᤌᤠᤖᤡᤰ ᤁᤡᤷᤃᤵ ᤁᤵᤔᤠ ᤏᤧᤔᤠ ᤕᤠ᤺ᤶᤒᤰᤁᤥ ᤂᤧᤴ ᤛᤡᤱᤜᤠ᤹ ᤕᤠᤱᤔᤠ ᤁᤧᤛᤢᤰᤋᤢᤶᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.