ᤛᤠᤶᤕᤥᤌᤡᤶ ᤀᤡᤱ 2 - LIFOTNTᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤧᤒᤣ᤺ᤰᤐᤠ ᤋᤱᤒᤣᤜᤠ᤹ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤀᤠᤏᤡᤃᤣ ᤏᤢ᤺ᤰᤂᤡᤃᤧᤀᤠᤱ ᤜᤧ᤺ᤳᤋᤠᤱᤒᤠ ᤘᤖ᤺ᤱ ᤗᤧᤵᤔᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤐᤡᤛᤠᤱ ᤐᤣᤃᤡᤃᤧ. ᤜᤧᤰᤁᤩᤠᤱ ᤕᤖᤡᤰ ᤕᤧᤴ ᤌᤠᤖᤡᤰ ᤛᤣᤀᤡᤖᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣᤴ ᤁᤒᤢᤶᤒᤧ॥ 2 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. 3 “ᤂᤡᤏᤡ᤹ ᤁᤴ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣᤴ ᤁᤧᤃᤒᤢᤶᤒᤠ ᤕᤖᤡᤰ ᤕᤧᤴ ᤐᤥ᤺ᤰᤂᤧ॥ ᤀᤠᤸᤗ ᤌᤠᤱᤃᤧᤳ ᤗᤧᤵᤔᤠᤱ ᤌᤠᤀᤠᤛᤡᤶᤔᤧ᤹॥ 4 ᤂᤧᤏᤧ᤹ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹ᤀᤠᤱ ᤀᤡᤱᤈᤠᤱ ᤐᤡᤖᤧᤛᤧ᤹. ‘ᤂᤡᤏᤡ᤹ ᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤀᤠᤵᤑᤣᤰ ᤂᤡᤏᤡ᤹ ᤑᤢ᤹ᤏᤢᤛᤠ᤹ ᤛᤣᤀᤡᤖ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤁᤧᤒᤥ᤺ᤰᤂᤡᤀᤠᤱ ᤐᤣ᤺ᤰᤔᤠ ᤁᤧᤀᤡ᤺ᤳᤋᤡ᤹॥ ᤂᤧᤱᤜᤠ᤹ ᤂᤡᤏᤡ᤹ᤏᤢ ᤔᤧᤃᤡᤖᤥ. ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤕᤖᤡᤰ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹॥ 5 ᤂᤧᤱᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤛᤡᤰ ᤔᤧᤓᤥᤰᤂᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤗᤠᤱᤍᤠᤵᤐᤣ᤹ ᤕᤠ᤺ᤵᤐᤠ ᤌᤡᤰᤁᤠᤱ ᤗᤠᤈᤣ᤹ ᤔᤧᤒᤡᤏᤡᤱᤅᤡᤴ᤹॥ ᤛᤣᤀᤡᤖᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣᤴ ᤀᤠᤱᤃᤠ᤹ ᤀᤣᤛᤠᤒᤖᤧ ᤁᤢᤕᤢᤰᤁᤥ ᤐᤡᤖᤢᤱᤅᤠᤱ ᤏᤧᤖᤥ॥ 6 ᤆᤠᤔᤠ ᤁᤢᤈᤠ ᤏᤢ ᤌᤢᤱᤔᤠ ᤆᤫᤠ᤺ᤳᤗᤧ ᤗᤠᤃᤡ ᤂᤡᤏᤡ᤹ ᤂᤧᤱᤜᤠ᤹ ᤕᤢᤵᤐᤠᤕᤠᤱ ᤁᤧᤒᤡᤖᤢᤶᤛᤡᤶᤗ ᤐᤥᤱ᤹॥’” 7 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤖᤧᤰ ᤐᤖᤡᤰᤐᤠ ᤕᤠ᤺ᤶᤒᤰᤁᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤀᤠᤱ ᤘᤠ᤹॥ ᤁᤴ ᤕᤶᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤗᤠᤶᤍᤡᤰ ᤂᤠᤖᤠᤰ ᤂᤢᤏᤧ᤹ ᤂᤡᤏᤡ᤹ ᤋᤠᤵᤌᤣᤰ ᤕᤠᤶᤎᤣᤰ ᤁᤧᤃᤳᤋᤡᤀᤠᤱ ᤘᤠ᤹॥ ᤁᤴ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤛᤥᤖᤡᤰ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤌᤧᤔᤠ ᤐᤠ᤺ᤴᤏᤡᤴᤗᤧ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥᤀᤠᤱ ᤔᤧᤴᤎᤠᤀᤣ ᤁᤧᤘᤕᤡ᤹॥ 8 ᤁᤸᤗᤧᤆᤥᤃᤢᤸᤗᤧ ᤛᤣᤀᤡᤖᤀᤥ ᤁᤧᤕᤢᤱᤒᤠ ᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠ. ᤀᤠᤏᤡᤃᤣ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥᤗᤠᤶ ᤐᤣᤃᤡᤃᤧ॥ ᤕᤷᤍᤏ ᤏᤧᤏᤧᤒᤠᤍᤧᤴᤏᤥᤗᤠᤶ ᤔᤧᤶᤒᤣ᤺ᤰᤁᤣ ᤀᤣᤗᤠᤋ ᤏᤢ ᤀᤣᤛᤩᤥᤏ-ᤃᤣᤒᤣᤖᤗᤠᤶ ᤜᤡᤀᤠᤛᤡᤃᤧᤀᤠᤱ ᤌᤥ ᤔᤥᤀᤠᤒᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤗᤠᤶ ᤌᤠᤀᤠᤛᤡᤃᤧ॥ 9 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤔᤥᤀᤠᤒᤒᤠ ᤔᤏᤠᤜᤠ᤹ ᤋᤢᤰᤂᤣᤗᤠᤰᤂᤣ ᤔᤧᤈᤠ᤺ᤳᤋᤠᤶᤛᤡᤶᤔᤧᤴᤏᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤛᤡᤰ ᤔᤧᤓᤥᤰᤂᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤗᤠᤶ ᤌᤧᤔᤠᤀᤠᤱ ᤗᤠᤈᤣ᤹ᤛᤡᤱᤒᤢᤱ ᤔᤧᤒᤡᤏᤡᤱᤅᤡᤴ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤥᤀᤠᤒ ᤗᤠᤈᤣ᤹ᤒᤠ ᤜᤠᤱᤐᤠᤱ ᤀᤠᤖ ᤕᤧᤰᤕᤰᤁᤡᤴ ᤗᤥᤋᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤐᤡᤖᤢᤱᤛᤡᤱᤅᤠᤱ ᤏᤧᤖᤥ॥” 10 (ᤁᤢᤓᤠ ᤕᤧᤶ ᤂᤧᤵᤔᤥ ᤀᤣᤔᤡᤜᤠ᤹ ᤔᤧᤕᤢᤅᤧ. ᤂᤧᤱᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤔᤧᤕᤥᤖᤧ. ᤁᤢᤜᤠᤱᤘᤠ ᤁᤢᤔᤠᤱᤘᤠ ᤁᤧᤕᤠᤰᤐᤠ ᤏᤢ ᤀᤏᤠᤁᤡᤜᤠ᤹ ᤜᤧᤰᤁᤣ ᤁᤣ᤺ᤶᤒ ᤁᤣ᤺ᤶᤒᤠ ᤔᤧᤈᤥᤃᤧ॥ 11 ᤀᤏᤠᤁᤡᤜᤠ᤹ ᤜᤧᤰᤁᤣᤀᤣ ᤁᤴᤜᤠ᤹ᤀᤠᤱ ᤖᤐᤠᤀᤡᤀᤣ ᤔᤧᤗᤣ᤺ᤳᤋᤢᤛᤡ. ᤁᤖ ᤔᤥᤀᤠᤒᤡᤜᤠ᤹ᤖᤧᤃ ᤁᤴᤜᤠ᤹ ᤀᤣᤔᤡ ᤔᤧᤔᤧᤳᤋᤢᤛᤡ॥ 12 ᤀᤢᤴᤇᤥᤴ ᤀᤢᤴᤇᤥᤴ ᤜᤥᤖᤡᤜᤠ᤹ᤀᤠᤱ ᤛᤣᤀᤡᤖᤀᤥ ᤔᤧᤕᤢᤅᤧ. ᤁᤖ ᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤁᤴᤜᤠ᤹ ᤔᤧᤏᤠ᤺ᤳᤋᤢᤔᤧᤍᤣᤛᤢᤛᤡ॥ ᤕᤜᤘᤣ ᤍᤠᤱᤒᤧᤸᤗᤧ ᤕᤢᤰ ᤆᤥ᤺ᤰᤛᤧ ᤐᤡᤖᤢᤛᤡᤒᤠ ᤗᤠᤈᤣᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤣ᤹ᤖᤢᤒᤠ ᤜᤧᤰᤁᤣᤀᤣ ᤂᤧᤱᤜᤠᤖᤧ ᤁᤴᤜᤠ᤹ ᤔᤧᤔᤧᤰᤂᤢᤛᤡᤀᤠᤱ ᤂᤢᤴᤇᤡ᤹ ᤗᤧᤰᤘᤠᤀᤥ ᤁᤴᤜᤠ᤹ ᤔᤧᤕᤢᤱᤛᤡᤱ॥) 13 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤀᤠᤸᤗ ᤈᤣᤖᤣᤍ ᤏᤧᤏᤧᤒᤠᤍᤧᤴᤏᤡᤴ ᤁᤠ᤺ᤰᤋᤠᤶᤔᤧ᤹॥” ᤜᤧᤰᤁᤩᤠᤱ ᤀᤠᤏᤡᤃᤣ ᤈᤣᤖᤣᤍ ᤘᤜ᤺ᤱ ᤏᤠᤎᤠ᤺ᤶᤒᤡ ᤐᤣᤃᤡᤃᤧ॥ 14 ᤁᤠᤍᤣᤛ-ᤒᤷᤏᤣ ᤗᤧᤖᤢᤶᤒᤧᤀᤠᤱ ᤈᤣᤖᤣᤍ ᤘᤜ᤺ᤱᤅᤡᤴ ᤁᤠ᤺ᤰᤔᤠᤖᤧ ᤗᤠᤃᤡ ᤛᤢᤶᤒᤥᤱᤅᤠᤱ ᤕᤧᤳᤇᤡ ᤋᤱᤒᤣ ᤌᤖᤢ॥ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤴ ᤔᤠᤱᤜᤧᤰᤛᤡᤱᤒᤠ ᤜᤧᤰᤁᤣᤀᤣ ᤀᤠᤏᤡᤃᤣ ᤌᤰᤛᤢᤒᤠ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤌᤱ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤖᤧᤰ ᤔᤧᤔᤧᤃᤧ॥ 15 ᤌᤰᤛᤢᤒᤠ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤂᤧᤱᤜᤠ᤹ ᤁᤧᤖᤧᤰ ᤔᤧᤶᤔᤧᤃᤧᤴᤗ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤳᤇᤧ॥ 16 ᤔᤏᤠ ᤛᤱᤈᤢᤶᤓᤥᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥᤗᤠᤶ ᤌᤱ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤁᤧᤖᤧᤰ ᤔᤧᤔᤧᤃᤧᤀᤠᤱ ᤀᤣᤃᤠᤱ 17 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. 18 “ᤀᤠᤀᤡᤴ ᤂᤡᤏᤡ᤹ ᤔᤥᤀᤠᤒᤖᤧ ᤁᤢᤍᤧ᤺ᤱᤃᤵᤐᤥ ᤁᤧᤏᤧᤒᤠ ᤀᤠᤖ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤠ᤺ᤰᤔᤠᤀᤠᤱ ᤂᤡᤏᤡ᤹ ᤐᤣ᤺ᤰᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ 19 ᤀᤠᤸᤗ ᤂᤡᤏᤡ᤹ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤀᤥ ᤁᤧᤃᤧᤖᤡ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤂᤧᤱᤜᤠ᤹ ᤋᤢᤰᤂᤣᤗᤠᤰᤂᤣ ᤔᤧᤈᤠ᤺ᤳᤋᤧᤶᤛᤡᤶᤔᤧᤴᤏᤧ᤹॥ ᤂᤧᤱᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤛᤡᤰ ᤔᤧᤓᤥᤰᤂᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶ ᤕᤢᤰ ᤆᤥ᤺ᤰᤔᤠ ᤀᤠᤱᤃᤠ᤹ ᤂᤡᤏᤡ᤹ ᤌᤧᤔᤠᤀᤠᤱ ᤗᤰ ᤔᤧᤒᤡᤏᤡᤱᤅᤡᤴ᤹॥ ᤀᤠᤱᤃᤠ᤹ ᤂᤧᤴ ᤗᤠᤈᤣᤴ ᤗᤥᤋᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤐᤡᤖᤢᤱᤛᤡᤱᤅᤠᤱ ᤏᤧᤖᤥ॥” 20 (ᤂᤧᤴᤏᤠᤱ ᤖᤐᤠᤀᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤣ ᤔᤧᤗᤣ᤺ᤳᤋᤢᤀᤠᤱ ᤏᤧᤛ᤻ᤛᤧ॥ ᤀᤢᤴᤇᤥᤴ ᤂᤧᤵᤔᤥ ᤖᤐᤠᤀᤡᤜᤠ᤹ ᤔᤧᤕᤢᤅᤧ. ᤁᤖ ᤀᤶᤔᤥᤏᤡᤜᤠ᤹ᤖᤧ ᤁᤴᤜᤠ᤹ ᤈᤔᤈᤢᤶᤔᤡ ᤔᤧᤔᤧᤳᤋᤢᤛᤡ॥ 21 ᤁᤴᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤔᤧᤕᤥᤖᤧ ᤜᤧᤰᤁᤩᤠᤱ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤁᤧᤕᤠᤰᤐᤠ ᤏᤢ ᤀᤏᤠᤁᤡᤜᤠ᤹ ᤜᤧᤰᤁᤣ ᤁᤣ᤺ᤶᤒ ᤁᤣ᤺ᤶᤒᤠ ᤔᤧᤈᤥᤃᤧ॥ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤴᤜᤠ᤹ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤧᤰᤂᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤈᤔᤈᤢᤶᤔᤡᤜᤠ᤹ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤛᤡᤀᤠᤱ ᤀᤣᤃᤠᤱ ᤂᤢᤴᤇᤡ᤹ ᤗᤧᤰᤘᤠᤀᤥ ᤀᤶᤔᤥᤏᤡᤜᤠ᤹ ᤔᤧᤍᤩᤧᤀᤠᤱ ᤔᤧᤕᤢᤱᤛᤡᤱ॥ 22 ᤕᤜᤘᤣ ᤍᤠᤱᤒᤧᤸᤗᤧ ᤛᤣᤀᤡᤖᤀᤥ ᤁᤧᤕᤢᤱᤒᤠ ᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡᤀᤠᤱ ᤀᤰᤂᤣᤀᤣ ᤆᤥᤃᤢ. ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤥᤖᤡᤜᤠ᤹ ᤔᤧᤰᤂᤢᤛᤡᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤜᤥᤖᤡᤜᤠ᤹ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤛᤡᤀᤠᤱ ᤀᤠᤀᤡᤴ ᤌᤠᤖᤡᤰ ᤂᤢᤴᤇᤡ᤹ ᤋᤧᤴᤏᤥ ᤀᤣᤍᤥᤔᤡᤜᤠ᤹ ᤔᤧᤕᤢᤱ᤹॥ 23 ᤜᤧᤰᤁᤩᤠᤱ ᤃᤠᤈᤠ ᤌᤠᤖᤡᤰ ᤁᤧᤕᤢᤱᤒᤠ ᤀᤒ᤻ᤒᤡᤜᤠ᤹ ᤁᤵᤋᤥᤖᤗᤠᤶ ᤁᤧᤍᤠᤒᤠ ᤁᤵᤋᤥᤖᤡᤜᤠ᤹ᤖᤧ ᤔᤧᤔᤧᤰᤂᤢᤛᤡ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤧᤴᤏᤥ ᤁᤴᤜᤠ᤹ ᤔᤧᤕᤢᤱᤛᤡᤱ॥) ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤡᤜᤥᤏ ᤜᤠᤱᤅᤡᤴ ᤔᤧᤏᤠ᤺ᤴᤍᤢ ( ᤂᤠᤏᤡ᤺ᤳ ᥈᥇:᥈᥇-᥉᥆ ) 24 ᤕᤜᤘᤣ ᤍᤠᤱᤒᤧᤸᤗᤧ ᤕᤠᤶᤔᤥ ᤐᤠ᤺ᤳᤋᤢ. “ᤐᤥᤃᤧᤶᤔᤧ᤹. ᤗᤠᤶ ᤌᤠᤀᤠᤛᤡᤶᤔᤧ᤹. ᤜᤧᤰᤁᤩᤠᤱ ᤀᤷᤏᤥᤏ ᤜ᤺ᤱᤃᤢ ᤏᤠᤎᤠ᤺ᤶᤒᤡ ᤐᤣᤃᤧᤶᤔᤧ᤹॥ ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤜᤣᤛ᤻ᤒᤥᤏᤒᤠ ᤀᤣᤔᤥᤖᤡ ᤛᤡᤜᤥᤏᤧᤴ ᤏᤢ ᤂᤢᤏᤧ᤹ ᤁᤢᤗᤠᤈᤣᤴ ᤂᤡᤏᤡ᤹ ᤜᤢᤰᤁᤥ ᤐᤡᤏᤡᤱᤅᤠᤱ ᤏᤧᤖᤥ॥ ᤂᤧᤴ ᤗᤠᤈᤣᤴ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴᤏᤢ ᤌᤱ ᤆᤥᤃᤧᤶᤔᤧ᤹॥ 25 ᤀᤠᤀᤡᤴᤒᤠ ᤕᤧᤴ ᤋᤠᤱᤛᤠᤱᤒᤧᤸᤗᤧ ᤑᤳᤋᤢᤒᤠ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤡᤏᤡ᤹ᤏᤢ ᤔᤧᤃᤡᤖ ᤜᤧᤰᤁᤩᤠᤱ ᤕᤱᤔᤠ ᤔᤧᤛᤡᤖ ᤕᤠ᤺ᤴᤍᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤔᤧᤴᤏᤥ ᤔᤧᤄᤧᤵᤛᤢᤀᤠᤱ ᤌᤧᤃᤰᤁᤰᤏᤠ ᤔᤧᤕᤱ. ᤂᤧᤒᤩᤠᤱ ᤂᤢᤴᤇᤡ᤹ ᤕᤱᤔᤠ ᤁᤧᤳᤗᤥ॥” 26 ᤁᤍᤣᤔᤥᤋᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤗᤠᤶ ᤀᤠᤱᤃᤠ᤹ ᤋᤱᤔᤠ ᤐᤠ᤺ᤴᤗᤧ ᤛᤏᤠᤖᤢᤱ ᤐᤣᤗᤡᤏᤢ ᤀᤡᤱᤛᤠᤒᤠᤜᤠ᤹ ᤜᤣᤛ᤻ᤒᤥᤏᤒᤠ ᤜᤠᤱ ᤛᤡᤜᤥᤏᤀᤥ ᤐᤠᤱᤄᤢᤱᤛᤡᤱ. 27 “ᤂᤧᤏᤧ᤹ ᤁᤧᤜᤠᤱᤈᤢᤶᤔᤥᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤀᤠᤏᤡᤃᤣ ᤀᤠᤓᤠ᤺ᤰᤋᤧ᤹॥ ᤗᤠᤶᤔᤣ ᤗᤠᤶᤗᤰ ᤀᤠᤏᤡᤃᤣ ᤐᤣᤃᤡᤃᤧ᤹॥ ᤑᤧᤱᤘᤠ ᤆᤢᤰᤘᤠ ᤀᤠᤏᤡᤃᤣ ᤔᤧᤗ᤹ᤖᤡᤃᤧᤴ॥ 28 ᤆᤠᤔᤠ ᤁᤢᤈᤠ ᤏᤢ ᤌᤢᤱᤔᤠᤖᤧᤗᤠᤃᤡ ᤆᤫᤠ᤺ᤳᤋᤡᤴ ᤕᤢᤵᤐᤠᤕᤠᤱᤅᤥ ᤀᤠᤏᤡᤃᤧᤀᤥ ᤛᤱᤄᤧᤶᤔᤧ᤹॥ ᤂᤧᤏᤧ᤹ ᤁᤧᤗᤠᤈᤣ᤹ᤀᤥ ᤗᤠᤶᤗᤰ ᤀᤠᤏᤡᤃᤣ ᤗᤠᤱᤄᤣ᤺ᤰᤔᤠᤀᤠᤱ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹॥ 29 ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤐᤡᤔᤠ ᤀᤡ᤺ᤳᤋᤡᤃᤧᤒᤠ ᤗᤠᤈᤣ᤹ᤀᤥ ᤁᤧᤵᤔᤠᤖᤧ ᤗᤠᤃᤡ ᤕᤷᤍᤏ ᤘᤜ᤺ᤱᤅᤡᤴ ᤀᤠᤏᤡᤃᤣ ᤔᤧᤱᤃᤠ᤺ᤰᤁᤣ ᤌᤠᤖᤡᤰ ᤛᤣᤀᤡᤖᤀᤥ ᤁᤧᤕᤢᤱᤒᤠ ᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤏᤢ ᤀᤠᤖᤀᤥ ᤁᤧᤕᤢᤱᤒᤠ ᤔᤥᤀᤠᤒᤡᤜᤠ᤹ᤖᤧ ᤀᤠᤏᤡᤃᤣ ᤗᤠᤃᤡ ᤜᤧᤰᤁᤣ ᤔᤧᤈᤥᤃᤢᤀᤠᤱ ᤘᤕᤧ॥” 30 “ᤁᤖ ᤜᤣᤛ᤻ᤒᤥᤏᤒᤠ ᤜᤠᤱ ᤛᤡᤜᤥᤏᤖᤧ ᤀᤠᤏᤡᤃᤣ ᤐᤣ᤺ᤰᤔᤠ ᤔᤧᤓᤠ᤺ᤰᤋᤡᤃᤧᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤢᤰᤁᤥ ᤌᤠᤔᤠᤖᤧ ᤗᤠᤃᤡ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤏᤢ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤆᤥᤃᤢ ᤐᤡᤖᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤂᤧᤴ ᤂᤡᤏᤡ᤹ᤀᤣ ᤜᤢᤰᤁᤥ ᤘᤠ᤹॥” 31 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤛᤡᤜᤥᤏᤧᤴ ᤏᤢ ᤂᤢᤏᤧ᤹ ᤁᤢᤗᤠᤈᤣᤴ ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱ᤹॥ ᤀᤠᤸᤗ ᤂᤧᤸᤗᤧ ᤁᤢᤗᤠᤈᤣᤴ ᤕᤢᤰ ᤆᤥ᤺ᤰᤔᤠ ᤏᤢ ᤜᤢᤰᤁᤥ ᤌᤠᤔᤠ ᤜᤣ᤺ᤰᤋᤧᤶᤔᤧ᤹॥” 32 ᤛᤡᤜᤥᤏᤧᤴ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤕᤜᤛᤠ ᤔᤧᤵᤔᤏᤠᤒᤠᤍᤧᤴᤏᤥ ᤀᤠᤏᤡᤃᤧᤏᤢ ᤌᤰᤛᤧ ᤔᤧᤓᤧᤖᤧᤸᤗᤧ. 33 ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤀᤠᤏᤡᤃᤣ ᤜᤢᤰᤁᤥ ᤌᤠᤛᤢ. ᤜᤧᤰᤁᤩᤠᤱ ᤂᤧᤴ. ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤁᤧᤖᤧᤰ ᤀᤠᤏᤡᤃᤣ ᤛᤧᤖᤢᤶᤛᤡᤶᤒᤧ॥ 34 ᤂᤧᤴ ᤕᤧᤶᤔᤥ ᤂᤢᤏᤧ᤹ ᤁᤧᤖᤧᤰ ᤁᤢᤕᤧᤰᤕᤰᤜᤠ᤹ ᤀᤠᤏᤡᤃᤣ ᤜᤢᤰᤁᤠᤵ ᤆᤥᤃᤢᤶᤒᤧ. ᤜᤧᤰᤁᤩᤠᤱ ᤕᤧᤶᤒᤡᤳᤇᤠᤜᤠ᤹. ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ ᤛᤥᤛᤥᤖᤡᤰ ᤔᤏᤠᤜᤠ᤹ ᤔᤧᤕᤢᤅᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤶᤒᤧ॥ ᤀᤠᤏᤡᤃᤣ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤗᤧᤖᤢᤶᤛᤡᤶᤒᤧᤴ॥ 35 ᤀᤠᤏᤡᤃᤣ ᤜᤢᤰᤁᤠᤵ ᤆᤥᤃᤢᤶᤒᤧᤒᤠ ᤕᤧᤰᤕᤰᤜᤠ᤹ᤀᤥᤒᤠ ᤐᤡᤳᤌᤰᤛᤠᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣᤜᤠ᤹ᤖᤰ ᤀᤠᤏᤡᤃᤣ ᤀᤠᤵᤑᤣᤰ ᤗᤠᤃᤡ ᤌᤱ ᤏᤠ᤺ᤴᤍᤢᤶᤒᤧᤒᤠ ᤆᤡᤃᤰᤘᤠ ᤁᤢᤛᤡᤱ ᤔᤧᤳᤋᤠᤛᤡᤃᤧ॥ 36 ᤀᤷᤏᤥᤏ ᤜ᤺ᤱᤃᤢ᤺ᤸᤗᤧ ᤁᤢᤒᤣᤛᤠᤱ ᤁᤧᤏᤧᤒᤠ ᤀᤖᤥᤀᤣᤖᤗᤠᤶ ᤏᤢ ᤜ᤺ᤱᤃᤢᤀᤥ ᤁᤧᤏᤧᤒᤠ ᤕᤧᤰᤕᤰᤁᤠᤱ ᤁᤳᤏᤠ ᤃᤡᤗᤠᤍ ᤌᤠᤖᤡᤰ ᤀᤠᤏᤡᤃᤣ ᤜᤢᤰᤁᤥ ᤌᤠᤔᤠ ᤔᤧᤛᤢᤰᤋᤢᤶᤒᤧᤶᤒᤠ ᤔᤢᤰᤛᤠᤶᤒᤠ ᤕᤧᤰᤕᤰ ᤀᤠᤳᤋᤡᤀᤠᤱ ᤔᤧᤏᤧᤛ᤻ᤛᤧᤴ॥ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤀᤠᤏᤡᤃᤣ ᤜᤢᤰᤛᤢᤵᤋᤡᤃᤧ॥ 37 ᤀᤶᤔᤥᤏᤡᤜᤠ᤹ᤖᤧ ᤂᤢᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤸᤗᤧ ᤁᤢᤕᤠᤀᤥ. ᤕᤒ᤻ᤒᤥᤁ ᤘᤜ᤺ᤱᤅᤡᤸᤗᤧ ᤁᤧᤖᤧᤰ ᤁᤢᤕᤠᤜᤠ᤹ᤀᤥᤒᤠ ᤗᤠᤈᤣ᤹ᤀᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤒᤠ ᤕᤧᤰᤕᤰᤜᤠ᤹ᤀᤥᤖᤰ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤔᤧᤒᤣᤃᤡᤃᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.