ᤛᤠᤶᤕᤥᤌᤡᤶ ᤀᤡᤱ 19 - LIFOTNT

ᤀᤡ᤺ᤶᤛᤡᤱᤔᤠᤍᤧᤴ ᤕᤧᤰᤕᤰᤜᤠ᤹

¹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤰᤂᤢᤛᤡ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣᤴ ᤂᤡᤏᤡ᤹ ᤕᤢᤰᤁᤥ ᤁᤧᤒᤡᤖᤡ᤹ ᤂᤧᤒᤩᤠᤱ ᤂᤡᤏᤡ᤹ ᤂᤧᤱᤜᤠ᤹ ᤗᤠ᤺ᤰᤁᤠᤳ ᤁᤧᤏᤠ᤺ᤳᤋᤢᤶ ᤁᤧᤍᤣᤛᤢᤶᤔᤛᤡᤶ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ᤀᤥ ᤁᤧᤗᤠᤛᤡᤀᤠᤱ ᤁᤧᤕᤢᤅᤡ᤹.

² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰᤁᤥ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣ᤹ᤀᤥ ᤛᤢᤶᤛᤡ ᤕᤧᤰᤕᤰᤜᤠ᤹ ᤀᤣ᤺ᤰ ᤛᤧᤴᤍᤧᤶᤔᤧ᤹॥

³ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰᤁᤥ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣᤴ ᤐᤣᤃᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹ ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡ ᤆᤥᤃᤧᤶᤔᤧ᤹ ᤂᤧᤒᤩᤠᤱ ᤔᤏᤠ ᤁᤧᤛᤧᤵᤐᤠ ᤁᤢᤓᤠ ᤔᤏᤠᤴ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤀᤡ᤺ᤶᤛᤡᤱᤔᤠ ᤕᤧᤰᤕᤰᤜᤠ᤹ᤀᤥᤒᤠ ᤗᤳᤇᤠᤀᤥ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤛᤢᤰᤗ॥

⁴ ᤏᤡᤱᤔᤡ ᤔᤧᤴᤘᤠ᤹ᤀᤣ ᤀᤠᤳᤋᤡᤸᤗᤧ ᤁᤢᤜᤡᤶᤒᤣᤛᤠᤱᤒᤧᤴ ᤀᤠᤴᤈᤠᤏᤡ᤺ᤸᤗᤧ ᤛᤩᤧᤖᤢᤀᤠᤱ ᤀᤠᤵᤑᤣᤰ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤂᤧᤵᤔᤥ ᤁᤧᤄᤧᤳᤇᤡᤱᤒᤠ ᤁᤧᤒᤣ᤺ᤰᤐᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤡᤶ ᤜᤠᤒᤠ ᤁᤴᤗᤥ—

⁵ ᤗᤳᤇᤠ ᤁᤢᤒᤡᤖᤧ ᤗᤠᤃᤡ. ᤗᤳᤇᤠ ᤔᤏᤠᤴ ᤀᤠᤵᤑᤣᤰ ᤁᤢᤜᤡᤶᤒᤣᤛᤠᤱᤒᤧᤴᤏᤢ ᤋᤠᤶᤓᤢᤱᤅᤥ ᤛᤥᤖᤡᤰ ᤛᤡᤱ ᤁᤥ᤺ᤳᤇᤧ ᤐᤣᤰ ᤜᤧᤰᤁᤩᤠᤱ ᤛᤡᤱᤒᤢᤱᤅᤡᤴ ᤛᤥ᤺ᤶᤔᤠᤖᤧ ᤗᤠᤃᤡ ᤕᤠᤅᤢᤒᤠ ᤁᤢᤍ᤺ᤴᤍᤣᤴ ᤁᤢᤗᤠᤀᤥᤗᤠᤶ ᤋᤖᤵ ᤐᤡ᤺ᤱᤅᤠᤱ ᤂᤧᤴ ᤜᤡᤶᤒᤣᤛᤠᤱᤒᤠᤴ ᤕᤠᤱᤄᤢᤀᤠᤱ ᤛᤡ᤹᤺॥ ᤂᤧᤴ ᤔᤏᤠᤴ ᤁᤴ ᤕᤧᤰᤕᤰᤜᤠ᤹ᤀᤥᤒᤠ ᤁᤢᤓᤠ ᤗᤳᤇᤠᤀᤥ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤛᤢᤰ ᤜᤧᤰᤁᤩᤠᤱ ᤂᤧᤴ ᤋᤠᤱᤛᤧ᤺ᤵᤛᤡᤱᤔᤠ ᤛᤢᤰ॥

⁶ ᤔᤣ᤺ᤴᤏᤧᤓᤃᤪ ᤗᤳᤇᤠᤖᤰ ᤕᤧᤰᤕᤰ ᤏᤧᤀᤠᤱ ᤗᤠᤶᤔᤡᤴ ᤛᤠ᤹ᤖᤡᤰ ᤔᤠ᤺ᤱᤅᤠᤱ ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤁᤧᤏᤢ᤺ᤰᤐᤠᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤂᤧᤴ ᤏᤠ᤺ᤳᤋᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤗᤠᤶᤔᤥ ᤛᤡ᤹ᤖᤢᤀᤠᤱ ᤛᤧᤵᤔᤠ ᤛᤢᤰᤋᤢ᤹॥ ᤛᤧᤰᤂᤠ᤺ᤸᤗᤧ ᤂᤧᤴ ᤛᤧᤵᤔᤠᤃ ᤕᤠᤖᤢᤒᤠ ᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤛᤡᤰ ᤔᤧᤱᤃᤢᤀᤣ ᤂᤧᤸᤗᤧ ᤁᤢᤜᤡᤶᤒᤣᤛᤠᤱᤒᤧᤴ ᤛᤧᤖᤢᤀᤠᤱ ᤘᤕᤧ॥

⁷ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤗᤠᤃᤡ ᤛᤢᤶᤛᤡ ᤕᤧᤰᤕᤰ ᤀᤣ᤺ᤰ ᤛᤧᤴᤍᤧᤶᤔᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤗ ᤐᤳᤋᤠ॥

⁸ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤔᤠᤱᤜᤧᤰ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤗᤠᤈᤣ᤹ ᤕᤢᤰᤑᤢᤱᤅᤡᤴ ᤌᤥᤒᤥ ᤐᤥᤱᤗ ᤆᤥᤃᤢ᤹ᤀᤠᤱ ᤔᤠᤱᤜᤢᤵ ᤆᤥᤃᤢᤒᤠ ᤁᤧᤖᤧᤰ ᤁᤧᤒᤡᤖᤡᤸᤗᤧ.

⁹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤔᤧᤳᤋᤢᤶ᤹ ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤃᤧᤄᤣᤃᤡᤏᤧᤓᤃᤪ. ᤀᤠᤱᤃᤠ᤹ ᤀᤠᤀᤡᤴ ᤐᤡᤏᤡᤱᤒᤠ ᤌᤡᤶᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤂᤡᤏᤡ᤹ ᤘᤣ᤹ ᤛᤢᤶᤛᤡ ᤕᤧᤰᤕᤰᤜᤠ᤹ᤀᤠᤱ ᤕᤥ᤹ᤔᤠ ᤐᤥᤱ᤹॥

¹⁰ ᤔᤣ᤺ᤴᤏᤧᤓᤃᤪ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰᤁᤥ ᤐᤡᤔᤠ ᤁᤧᤈᤥᤃᤡᤒᤠ ᤗᤠᤈᤣ᤹ᤀᤥ ᤁᤢᤍᤥ᤺ᤵᤔᤠ ᤔᤏᤠ᤺ᤸᤗᤧ ᤁᤢᤔᤠᤰᤂᤡ᤹ ᤛᤧᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤠᤵᤋᤡᤰᤁᤡᤴ ᤂᤡᤏᤡ᤹ᤀᤥᤀᤣ ᤌᤠᤖᤥ॥

¹¹ ᤁᤖ ᤁᤢᤓᤠ ᤔᤏᤠ᤺ᤸᤗᤧ ᤛᤡᤰ ᤁᤢᤕᤢᤀᤠᤱᤅᤣ ᤁᤢᤜᤡᤶᤒᤣᤛᤠᤱᤒᤧᤴ ᤛᤢᤃᤢᤀᤠᤱ ᤜᤡᤵᤋᤢᤛᤧᤖᤢ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤜᤠ᤹ᤀᤥᤒᤠ ᤁᤢᤓᤠ ᤗᤳᤇᤠᤀᤥ ᤂᤧᤳᤇᤡᤱ ᤐᤣ᤺ᤰᤏᤧᤓᤃᤪ.

¹² ᤂᤢᤏᤧ᤹ ᤀᤠᤵᤑᤣᤰ ᤁᤢᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤔᤏᤠ ᤔᤧᤒᤠᤱᤄᤢ ᤔᤧᤍᤣᤛᤢᤛᤡᤖ ᤜᤧᤰᤁᤩᤠᤱ ᤂᤧᤴ ᤔᤧᤍᤠᤖᤢᤀᤠᤱ ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤔᤠᤰᤂᤡ᤹ ᤏᤢ᤺ᤰᤔᤠ ᤁᤧᤃᤥ᤺ᤵᤐᤠᤴ ᤜᤢᤰᤔᤧᤛᤢᤵᤋᤢᤖ॥

¹³ ᤂᤧᤴ ᤗᤢᤱᤔᤠ᤹ ᤔᤧᤍᤢᤰᤋᤧᤶᤔᤡᤴᤏᤧ᤹. ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤗᤠᤶ ᤁᤢᤍᤥ᤺ᤵᤔᤠ ᤔᤏᤠᤛᤧᤵᤔᤠ ᤀᤠᤵᤋᤡᤰᤁᤡᤴ ᤂᤧᤳᤋᤧᤶᤍᤣᤛᤧᤶᤔᤧ᤹ᤀᤥ॥

ᤋᤃᤡ ᤁᤧᤏᤧᤒᤠ ᤀᤡ᤺ᤴᤍᤥᤜᤠ᤹

¹⁴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰᤁᤥ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤀᤠᤵᤑᤣᤰ ᤗᤰᤁᤥ ᤐᤠᤎᤧᤒᤠᤜᤠ᤹ᤖᤧ ᤔᤧᤏᤧᤛ᤻ᤛᤢᤒᤠ ᤀᤡ᤺ᤴᤍᤥᤴ ᤔᤧᤃᤠ᤺ᤰᤋᤧᤶᤔᤡᤴᤏᤧ᤹ᤀᤠᤱ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤀᤡ᤺ᤴᤍᤥᤀᤥᤒᤠ ᤗᤢᤱᤅᤡᤴ ᤔᤧᤄᤧᤳᤋᤧᤶ ᤔᤧᤍᤣᤛᤧᤶᤔᤡᤴᤏᤧ᤹ᤀᤥ॥

ᤋᤥ᤺ᤴᤍᤡᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤈᤠᤱ

¹⁵ ᤁᤢᤓᤠᤖᤧ ᤁᤢᤀᤠᤵᤋᤡᤰ ᤀᤡᤃᤪ ᤁᤢᤓᤧᤴ ᤕᤠ᤺ᤶᤒᤰᤁᤥ ᤗᤳᤇᤠᤖᤰ ᤋᤥ᤺ᤴᤍᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤜᤠ᤺ᤳᤋᤠᤱ ᤛᤠᤶᤒᤠᤴ ᤔᤧᤃᤢ᤺ᤳᤋᤧᤶᤔᤡᤴᤏᤧ᤹॥ ᤏᤧᤳᤇᤡ ᤀᤡᤃᤪ ᤛᤢᤶᤛᤡ ᤋᤥ᤺ᤴᤍᤡᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥᤗᤠᤶᤒᤠᤖᤰ ᤀᤠᤵᤋᤡᤰᤁᤡᤴ ᤏᤡ᤺ᤴᤎᤥ ᤆᤥ᤺ᤰᤔᤠ ᤛᤢᤰᤋᤧᤳ॥

¹⁶ ᤁᤢᤓᤠ ᤔᤏᤠᤴ ᤀᤠᤵᤋᤡᤰ ᤁᤢ᤺ᤵᤔᤠᤖᤧ ᤗᤠᤃᤡ ᤁᤢᤓᤠ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤴ ᤕᤧᤶᤛᤡᤱᤏᤧᤓᤃᤪ.

¹⁷ ᤀᤠᤵᤋᤡᤰᤛᤠᤒᤠᤴ ᤜᤧᤰᤁᤩᤠᤱ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤴ ᤏᤧᤵᤔᤠᤱ ᤂᤧᤴ ᤕᤧᤶᤔᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤏᤢ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤠᤛᤡᤖ ᤐᤥᤱ᤹॥

¹⁸ ᤂᤧᤒᤩᤠᤱ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤂᤧᤴ ᤏᤧᤳᤇᤡ ᤔᤏᤠᤜᤠ᤹ ᤏᤢᤖᤡᤰ ᤋᤠᤖᤡᤰᤁᤠᤱ ᤐᤠᤴ ᤛᤣ᤺ᤴᤔᤧᤍᤥᤛᤢᤛᤡᤖ ᤐᤥᤱ᤹॥ ᤋᤥ᤺ᤴᤍᤡ ᤐᤠ᤺ᤴᤏᤡᤴ ᤀᤡᤱᤗᤧᤰᤐᤠ ᤆᤥᤰ ᤜᤧᤰᤁᤩᤠᤱ ᤀᤠᤵᤑᤣᤰ ᤏᤢᤛᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤴᤘᤠ᤹ᤔᤏᤠ ᤐᤠ᤺ᤳᤋᤢᤒᤠᤏᤧᤓᤃᤪ.

¹⁹ ᤂᤢᤏᤧ᤹ ᤀᤠᤵᤑᤣᤰ ᤁᤢᤴᤛᤠ᤹ᤀᤡᤴ ᤌᤧᤔᤠ ᤔᤧᤵᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤕᤧ ᤂᤧᤴᤏᤠᤱ ᤜᤠᤒᤠᤜᤧᤰᤁᤣ ᤔᤧᤳᤋᤧᤶᤔᤧ᤹॥ ᤂᤡᤏᤡ᤹ ᤗᤢᤶᤔᤥᤗᤠᤶ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤧᤳᤋᤠᤶᤔᤧ᤹॥

²⁰ ᤁᤴ ᤔᤧᤄᤧᤵᤛᤢᤀᤠᤱ ᤘᤣ᤹ᤜᤠ᤹ ᤔᤧᤃᤡᤖᤥ॥ ᤂᤧᤴ ᤀᤣᤃᤠᤱ ᤂᤡᤏᤡ᤹ ᤗᤢᤶᤔᤥ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤒᤥᤱᤏᤧᤴ॥

²¹ ᤀᤠᤵᤋᤡᤰᤁᤥ ᤁᤧᤎᤠᤒᤧᤴ ᤂᤡᤏᤡ᤹ ᤗᤢᤱᤔᤠ᤹ ᤔᤧᤍᤢᤰᤋᤧᤶᤔᤡᤴᤏᤧ᤹॥ ᤂᤧᤴ ᤂᤢᤶᤍᤡᤱ ᤁᤧᤒᤡᤖᤢᤶᤔᤡᤸᤗᤧ ᤌᤰᤁᤡᤸᤗᤧ ᤁᤢᤗᤧᤰᤘᤠ ᤌᤰ. ᤔᤡᤰᤁᤡᤸᤗᤧ ᤁᤢᤗᤧᤰᤘᤠ ᤔᤡᤰ. ᤜᤠᤒᤥ᤹ᤒᤠᤸᤗᤧ ᤁᤢᤗᤧᤰᤘᤠ ᤜᤠᤒᤥ᤹ᤒᤠ. ᤜᤢᤰᤁᤡᤸᤗᤧ ᤁᤢᤗᤧᤰᤘᤠ ᤜᤢᤰ ᤏᤢ ᤗᤠᤱᤅᤡᤸᤗᤧ ᤁᤢᤗᤧᤰᤘᤠ ᤗᤠᤱ ᤐᤥᤱᤔᤠ ᤐᤥᤱᤗᤥ॥