ᤛᤠᤶᤕᤥᤌᤡᤶ ᤀᤡᤱ 17 - LIFOTNT

¹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤢᤓᤠ ᤕᤠᤱᤄᤣ᤺ᤰ ᤀᤡᤃᤪ ᤁᤢᤕᤥᤰ ᤁᤧᤒᤵᤐᤠ ᤁᤢᤶᤒᤠᤒᤠ ᤐᤡᤳ ᤁᤡᤃᤪ ᤔᤧᤸᤗᤢᤰᤁᤡᤴ ᤛᤡᤍᤢᤱᤈᤓᤠ ᤔᤧᤈᤥᤃᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤂᤧᤴ ᤛᤡᤰᤁᤧᤗᤧ᤺ᤱᤒᤠ ᤆᤥᤰ॥

² ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤀᤠᤱ ᤏᤧᤒᤠ ᤁᤢᤓᤠ ᤕᤧᤰᤕᤰᤁᤥ ᤂᤡᤏᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤁᤢᤓᤠ ᤔᤧᤴᤇᤢᤔᤠ ᤀᤡᤃᤪ ᤕᤧᤶᤒᤡᤳᤇᤠ᤺ᤸᤗᤧ ᤘᤣ᤹ ᤔᤠᤱᤜᤠ᤹ ᤁᤡᤃᤪ ᤏᤠᤶ ᤗᤠᤒᤠ.

³ ᤀᤡᤃᤪ ᤋᤠᤱᤛᤠᤱᤒᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤛᤧᤘᤠ ᤔᤠᤱᤛᤧᤘᤠᤗᤠᤶ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵᤐᤡᤴ ᤑᤣ᤺ᤴᤍᤢᤀᤠᤱ ᤂᤢᤏᤧ᤹ ᤁᤢᤔᤡᤰᤛᤠᤀᤥ ᤑᤧᤴᤕᤠ᤺ᤶᤒᤰ ᤆᤥᤃᤢᤒᤠ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤏᤧᤓᤃᤪ.

⁴ ᤂᤡᤏᤡ᤹ ᤂᤧᤴ ᤏᤢᤖᤡᤰᤁᤠᤱ ᤛᤣ᤺ᤴᤍᤥᤔᤠ ᤁᤢᤛᤡᤱ ᤏᤡ᤺ᤵᤔᤠ ᤏᤢ ᤛᤠ᤹ᤔᤠ ᤐᤥᤱ᤹॥ ᤁᤴ ᤛᤧᤰᤂᤠ ᤏᤢ ᤀᤰᤋᤱᤒᤠ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰ ᤀᤡᤛᤪᤠᤀᤡᤗᤀᤥ ᤐᤥ᤺ᤰᤂᤧᤒᤠᤀᤣᤏᤣ ᤓᤃᤪ

⁵ ᤀᤰᤋᤱᤒᤠ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠᤴ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣᤳ ᤗᤠ᤺ᤰᤁᤠᤳ ᤋᤠᤖᤧᤶᤔᤧ᤹ᤀᤠᤱ ᤗᤢᤱᤅᤡᤸᤗᤧ ᤐ᤺ᤳᤋᤧᤶ ᤛᤧᤖᤧᤶᤔᤧ᤹॥

⁶ ᤛᤧᤵᤔᤏᤠᤒᤠ ᤔᤏᤠᤴ ᤏᤧᤳᤇᤡ ᤀᤡᤃᤪ ᤛᤢᤶᤛᤡ ᤁᤧᤏᤡᤒᤠ ᤋᤥ᤺ᤴᤍᤡᤀᤥᤖᤰ ᤛᤧᤖᤧᤶᤔᤧ᤹॥ ᤗᤳᤇᤠᤖᤰ ᤁᤧᤏᤡᤒᤠ ᤋᤥ᤺ᤴᤍᤡᤀᤥ ᤀᤠᤳᤋᤡᤴᤏᤠᤱ ᤔᤧᤛᤧᤖᤧᤶᤔᤡᤴᤏᤧ᤹॥

⁷ ᤂᤧᤴ ᤛᤧᤵᤔᤠᤖᤧ ᤗᤠᤃᤡ ᤁᤧᤏᤡᤒᤠ ᤋᤥ᤺ᤴᤍᤡᤜᤠ᤹ᤖᤧᤀᤣ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤜᤢᤰ ᤔᤧᤕᤠᤰᤋᤢᤖ॥ ᤂᤧᤴ ᤀᤣᤃᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤜᤢᤰ ᤔᤧᤃᤣ᤺ᤳᤋᤢᤖ॥ ᤂᤡᤏᤡ᤹ ᤗᤢᤶᤔᤥᤗᤠᤶ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤧᤳᤋᤠᤶᤔᤧ᤹॥

⁸ ᤁᤢᤓᤠ ᤔᤏᤠᤛᤧᤵᤔᤠ ᤏᤠᤶᤗᤠ. ᤁᤢᤓᤠᤱ ᤐᤠ᤺ᤴᤎᤱ ᤀᤡᤃᤪ ᤜᤡᤵᤛᤡᤱᤔᤠ ᤌᤰᤛᤡᤱᤔᤠ ᤏᤠᤶᤗᤠ ᤐᤠ᤺ᤴᤜᤠ᤹ ᤂᤣᤔᤠ ᤌᤰᤔᤠ ᤐᤠ᤺ᤴᤜᤠ᤹ ᤋᤱᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤧᤛᤠᤰᤐᤠ ᤁᤧᤍᤢᤔᤢᤶᤏᤧᤓᤃᤪ. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤰᤔᤠ ᤀᤡ᤺ᤳᤋᤢᤒᤠᤍᤧᤴᤏᤥ ᤐᤣᤃᤧᤶᤔᤧ᤹॥

⁹ ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤥ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤧᤶᤛᤡᤶᤔᤧ᤹. ᤂᤧᤒᤩᤠᤱ ᤂᤧᤴ ᤕᤧᤶᤔᤥᤒᤠ ᤂᤠᤛᤧᤴᤗᤥ᤺ᤶᤒᤠᤀᤥ ᤐᤣᤃᤧᤶᤔᤧ᤹ᤀᤠᤱ ᤛᤢᤈᤠ ᤏᤠ᤺ᤰᤋᤠᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤢᤵᤔᤠ ᤂᤠᤛᤧᤴ ᤗᤥ᤺ᤴᤍᤢᤖ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤰᤔᤠ ᤀᤡ᤺ᤳᤋᤢᤒᤠᤍᤧᤴᤏᤥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤏᤡ᤺ᤴᤎᤥ ᤁᤧᤶᤒᤡᤖᤡᤒᤠ ᤐᤠ᤺ᤴᤏᤡᤴ ᤁᤧᤈᤥᤃᤢᤶᤗ ᤐᤥᤱ᤹॥ ᤂᤧᤱᤜᤠ᤹ᤖᤧ ᤁᤧᤶᤒᤡᤖᤡᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤏᤡᤱᤘᤠ᤹ ᤐᤡᤖᤧᤶᤔᤧ᤹॥

¹¹ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤜᤢ᤹ᤖᤡᤒᤠ ᤛᤠᤶᤕᤥᤌᤡᤶ ᤏᤢ ᤁᤧᤶᤒᤡᤖᤡᤒᤠ ᤏᤡ᤺ᤴᤎᤥ ᤐᤠᤴ ᤀᤡᤛᤡ᤺ᤰ ᤂᤡᤏᤡ᤹ ᤆᤥᤃᤧᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤔᤧᤳᤋᤡᤒᤠ ᤐᤠ᤺ᤴᤜᤠ᤹ᤗᤠᤶ ᤆᤢᤰᤘᤠ ᤑᤧᤱᤘᤠ ᤗᤧᤵᤔᤠᤱ ᤔᤧᤒᤣᤃᤧᤶᤔᤡᤴᤏᤧ᤹॥

¹² ᤕᤶᤒᤠ ᤁᤧᤜᤧᤴᤇᤡᤱᤒᤠᤀᤠᤱ ᤂᤧᤵᤔᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤥ ᤁᤧᤍᤠᤒᤠ ᤁᤧᤈᤢᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤡᤃᤪ ᤂᤠᤛᤧᤴᤗᤥ᤺ᤶᤒᤧᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠ ᤔᤏᤠᤴ ᤂᤡᤏᤡ᤹ ᤛᤧᤖᤧᤶᤔᤧ᤹॥ ᤂᤡᤏᤡ᤹ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤗᤠᤶ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤔᤧᤱᤔᤠ ᤐᤥᤱ᤹॥

¹³ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢ᤹ ᤜᤧᤰᤁᤩᤠᤱ ᤁᤡᤔᤠ ᤕᤱᤔᤠ ᤔᤧᤎᤠᤖᤥ. ᤂᤧᤒᤩᤠᤱ ᤕᤠᤶᤔᤥ ᤁᤢᤏᤠᤔᤧᤴᤇᤠ᤹ ᤔᤧᤒᤥᤱᤏᤧᤴᤗᤥ॥

ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤈᤠᤱᤜᤠ᤹

¹⁴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤔᤠ ᤁᤧᤈᤥᤃᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤃᤧᤖᤡ᤹ ᤜᤧᤰᤁᤩᤠᤱ ᤂᤧᤴ ᤁᤧᤕᤢᤰᤋᤢᤶᤔᤠᤱ ᤂᤧᤵᤔᤥ ᤕᤢᤱᤔᤠ ᤁᤧᤜᤣ᤺ᤰᤋᤡ᤹ ᤂᤧᤴ ᤀᤣᤃᤠᤱ. “ᤀᤠᤏᤡ᤹ ᤁᤒᤪᤡᤱ ᤐᤡᤛᤠᤱᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤏᤡ᤹ᤀᤠᤱ ᤀᤠᤏᤡ᤹ᤀᤥ ᤗᤳᤇᤠ ᤜᤠᤱ ᤕᤢᤰᤋᤡᤱ ᤆᤥᤃᤢᤶ᤹” ᤁᤧᤗ᤹ᤖᤡᤏᤧᤓᤃᤪ

¹⁵ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤔᤏᤠ᤺ᤴᤏᤣ ᤂᤡᤏᤡ᤹ ᤏᤡ᤺ᤴᤎᤥ ᤆᤥᤃᤧᤶᤔᤧ᤹ᤀᤠᤱ ᤂᤡᤏᤡ᤹ ᤜᤠᤱ ᤗᤣ᤺ᤳᤋᤧᤶᤔᤧ᤹॥ ᤂᤧᤴ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤗᤠᤶ ᤌᤡᤰᤐᤠ ᤐᤥᤱᤔᤠ ᤐᤥᤱ᤹॥ ᤀᤡᤛᤪᤠᤀᤡᤗᤡ ᤏᤢᤛᤠ᤹ ᤔᤣ᤺ᤴᤒᤠ. ᤗᤳᤇᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤂᤡᤏᤡ᤹ ᤛᤶᤎᤠᤱ ᤕᤢᤰᤋᤡᤱ ᤔᤧᤈᤥᤃᤧᤶᤔᤡᤴᤏᤧ᤹॥

¹⁶ ᤂᤧᤴ ᤜᤠᤱᤅᤡᤸᤗᤧ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤀᤴᤜᤠ᤹ ᤔᤧᤓᤢᤰᤂᤢᤛᤡᤴᤗ. ᤀᤡᤃᤪ ᤀᤠᤸᤗ ᤕᤖᤡᤰ ᤀᤴᤜᤠ᤹ ᤑᤧᤵᤔᤠᤛᤡᤖᤧ ᤗᤠᤃᤡ ᤔᤏᤠᤜᤠ᤹ ᤔᤡᤛᤪ ᤗᤠᤈᤣ᤹ᤀᤥ ᤔᤧᤴᤏᤢ᤺ᤱᤏᤧᤴ ᤔᤧᤶᤒᤣ᤺ᤰᤏᤧᤴᤗ. ᤌᤣᤀᤠᤱᤓᤧᤸᤗᤧ “ᤂᤧᤴ ᤗᤠᤶᤔᤥ ᤕᤠᤶᤔᤥ ᤔᤧᤏᤢ᤺ᤰᤂᤧᤶ ᤔᤧᤒᤣᤃᤧᤶᤔᤡᤴᤏᤧ᤹” ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤔᤧᤳᤋᤡᤀᤠᤱ ᤘᤠ᤹॥

¹⁷ ᤂᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤕᤖᤡᤰ ᤔᤣ᤺ᤳᤜᤠ᤹ ᤔᤧᤍᤠᤖᤢᤛᤡᤴᤗ. ᤔᤣ᤺ᤴᤏᤧᤓᤃᤪ ᤂᤧᤸᤗᤧ ᤁᤢᤏᤡᤱᤘᤠ᤹ ᤆᤠᤖᤠᤶ॥ ᤂᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤕᤖᤡᤰ ᤛᤠᤶᤔᤩᤠᤱ ᤕᤢᤵᤐᤠᤀᤠᤱ ᤔᤧᤓᤢᤰᤂᤢᤴ ᤔᤧᤕᤢᤰᤂᤢᤴᤗ॥

¹⁸ ᤀᤠᤸᤗ ᤂᤧᤴ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤀᤥ ᤕᤢᤱ᤹. ᤂᤧᤒᤩᤠᤱ ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤂᤧᤸᤗᤧ ᤗᤳᤇᤠ ᤛᤠᤵᤐᤴᤏᤥ ᤗᤡᤱᤄᤢᤖ॥

¹⁹ ᤂᤧᤴ ᤛᤠᤶᤕᤥᤌᤡᤶᤔᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ ᤁᤴ ᤌᤡᤶᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤂᤧᤴ ᤛᤠᤵᤗᤠᤌ᤺ᤱᤔᤧᤴ ᤂᤢᤏᤧ᤹ ᤁᤳᤋᤢᤖ ᤂᤶᤓᤩᤠᤱ ᤂᤢᤏᤧ᤹ ᤁᤢᤜᤡᤱᤜᤡᤱ ᤌᤠᤖᤡᤰ ᤀᤠᤵᤑᤠᤸᤗᤧᤛᤠᤱ ᤏᤡᤖᤢᤖ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤵᤔᤠ ᤜᤢ᤹ᤛᤡᤱᤗ॥

²⁰ ᤂᤧᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤏᤢ᤺ᤸᤗᤧ ᤌᤥᤎᤥᤰᤐᤠ ᤔᤧᤗᤣ᤺ᤳᤇᤡᤱᤅᤡᤴᤗ. ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤔᤥᤗᤠᤶ ᤌᤡᤰᤏᤠᤜᤠᤱ ᤜᤡᤛᤡᤱᤅᤠᤱ ᤑᤧᤱᤘᤠ ᤀᤡᤃᤪ ᤆᤢᤰᤘᤠ ᤔᤧᤗ᤹ᤏᤧᤴᤗ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤏᤢ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤕᤖᤡᤰ ᤕᤧᤶ ᤌᤠᤖᤡᤰ ᤀᤡᤛᤪᤠᤀᤡᤗᤀᤥ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤕᤢᤰ ᤔᤧᤈᤥᤃᤢᤖᤥ॥