ᤛᤠᤶᤕᤥᤌᤡᤶ ᤀᤡᤱ 16 - LIFOTNTᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ( ᤗᤠ ᥇᥈:᥇-᥈᥆ ) 1 ᤀᤒᤡᤒ ᤗᤠ᤺ᤴ ᤏᤡᤱᤘᤠ᤹ᤛᤥᤰ ᤆᤥᤃᤧᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤁᤢᤍᤱᤏᤠᤶᤔᤡᤴ ᤋᤥᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤒᤡᤒ ᤗᤠᤀᤥᤀᤣ ᤂᤢᤏᤧ᤹ ᤂᤡᤏᤡ᤹ ᤛᤧᤴᤍᤡᤰ ᤔᤡᤛᤪᤗᤠᤶ ᤁᤧᤗ᤺ᤳᤋᤡ ᤁᤧᤓᤧᤳᤋᤡ॥ 2 ᤀᤠᤳᤋᤡᤴ ᤋᤧᤴᤏᤡᤴ ᤕᤜᤘᤣ ᤍᤠᤱᤒᤠ ᤀᤠᤵᤑᤣᤰ ᤁᤢᤔᤡᤱᤗᤧ ᤗᤠᤃᤡ ᤕᤢᤱᤍᤧᤴ ᤛᤣᤃᤢ᤹. ᤀᤠᤶᤓᤠ ᤂᤧᤵᤔᤥᤀᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤧᤸᤗᤢᤰ ᤔᤧ᤺ᤴᤍᤠ ᤏᤢ ᤐᤡᤳᤌᤰᤛᤠᤜᤠ᤹ᤗᤠᤶ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ 3 ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤂᤖᤧ᤺ᤱᤅᤡᤴᤏᤢ ᤂᤧᤴ ᤔᤧᤈᤧᤶᤔᤡᤴᤏᤧ᤹॥ ᤁᤖ ᤏᤢᤛᤡ ᤕᤧᤴ ᤌᤠᤖᤡᤰ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤆᤧᤶᤔᤧ᤹॥ ᤁᤴ ᤂᤖᤧ᤺ᤱᤅᤡᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤈᤩᤧ᤹ᤀᤡᤒᤠ ᤕᤧᤴᤜᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢ᤹. ᤌᤣᤀᤠᤱᤓᤧᤸᤗᤧ ᤔᤡᤛᤪᤗᤠᤶ ᤂᤡᤏᤡ᤹ ᤜᤠᤖᤠᤜᤠᤖᤠ ᤁᤧᤗ᤺ᤴᤍᤡ ᤁᤧᤓᤧᤖᤡ॥ ᤔᤡᤛᤪᤗᤠᤶ ᤁᤧᤗ᤺ᤴᤍᤡ ᤁᤧᤓᤧᤖᤡᤒᤠᤴ ᤂᤡᤏᤡ᤹ ᤜᤡᤱᤜᤡᤱ ᤏᤡᤱᤘᤠ᤹ ᤀᤡ᤺ᤵᤔᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤁᤴ ᤆᤠᤔᤠ ᤐᤥ᤺ᤰᤂᤧᤒᤠᤖᤥ॥ 4 ᤏᤢᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤴ ᤂᤥᤔᤧᤍᤧᤳᤏᤧᤴᤗ॥ ᤌᤡᤰᤛᤡᤃᤣᤰᤐᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤕᤢ᤺ᤴᤇᤡᤰ ᤂᤡᤏᤡ᤹ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤒᤠ ᤌᤰᤛᤠ ᤛᤠᤴ ᤜᤠᤒᤠ ᤂᤧᤴ ᤛᤧᤴᤍᤡᤰᤛᤠ ᤆᤠᤶᤍᤣᤛᤠᤶᤔᤧ᤹ ᤋᤠᤏᤠᤶ ᤌᤠᤖᤡᤰ ᤂᤧᤴ ᤔᤧᤃᤳᤋᤧᤶᤔᤡᤴᤏᤧ᤹॥ 5 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤀᤠᤱ ᤏᤧᤒᤠ ᤆᤩᤠᤈᤩᤠ ᤕᤧᤰᤕᤰᤜᤠ᤹ᤀᤥ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤡᤍᤢᤱᤈᤓᤠ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥ 6 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥᤒᤠ ᤕᤢᤱᤍᤧᤴᤏᤡᤸᤗᤧ ᤗᤠᤃᤡ ᤛᤣᤃᤢᤒᤠᤍᤧᤴᤏᤥᤀᤣ ᤏᤠᤶᤎᤠᤒᤠ ᤕᤧᤶᤔᤥ ᤔᤡᤛᤪᤗᤠᤶ ᤂᤡᤏᤡ᤹ ᤗᤠᤶ ᤁᤧᤎᤠᤀᤠᤛᤡᤒᤠ ᤕᤧᤶᤔᤥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤒᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤧᤶᤔᤧ᤹॥ 7 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠᤍᤧᤴᤏᤥ ᤂᤧᤴ ᤌᤥ᤺ᤰᤋᤧᤶᤔᤧ᤹ᤀᤠᤱ ᤆᤧᤶᤔᤧ᤹. ᤜᤧᤰᤁᤩᤠᤱ ᤋᤠᤏᤠᤶ ᤏᤢ᤺ᤰᤂᤧᤶᤔᤧ᤹ᤀᤠᤱ ᤀᤠᤵᤑᤣᤰ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤔᤥ ᤐᤣᤃᤧᤶᤔᤧ᤹॥ 8 ᤋᤢᤰᤛᤡ ᤕᤧᤴ ᤌᤠᤖᤡᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤆᤧᤶᤔᤧ᤹. ᤂᤧᤒᤩᤠᤱ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤗᤳᤇᤠ ᤆᤢᤶᤗᤢᤱ ᤆᤥᤃᤧᤶᤔᤧ᤹॥ ᤂᤧᤸᤗᤧ ᤕᤠ᤺ᤴᤍᤡᤰ ᤌᤧᤔᤠ ᤕᤠ᤺ᤶᤒᤰᤁᤠᤱ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤕᤧᤳᤏᤠᤶᤒᤠ ᤋᤱᤏᤠᤶᤜᤠ᤹ ( ᤗᤠ ᥉᥊:᥈᥈ ; ᤗᤧᤒᤡ ᥈᥉:᥇᥋-᥈᥇ ) 9 ᤁᤧᤍᤢᤶᤒᤠ ᤁᤢᤈᤠᤴ ᤜᤧᤰᤔᤠ ᤁᤧᤜᤣ᤺ᤰᤋᤢᤶᤒᤠ ᤕᤧᤶᤔᤠᤱᤎᤥ ᤏᤢᤛᤡ ᤕᤧᤳᤏᤠᤶ ᤏᤡᤖᤧᤶᤔᤧ᤹॥ 10 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤢᤀᤡᤛᤡᤰ ᤀᤠᤵᤑᤣᤰ ᤏᤡᤱᤘᤠ᤹ᤗᤠᤶ ᤁᤧᤍᤥ᤺ᤴᤍᤢᤶᤒᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤧᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤕᤧᤳᤏᤠᤶᤒᤠ ᤋᤱᤏᤠᤶᤜᤠ᤹ ᤋᤥᤛᤧᤶᤔᤧ᤹॥ 11 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤡᤱ ᤕᤢᤱᤍᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤛᤣᤃᤢᤒᤠᤍᤧᤴᤏᤥ ᤂᤡᤏᤡ᤹. ᤂᤡᤏᤡ᤹ ᤛᤠᤜᤠ᤹. ᤕᤥᤃ᤻ᤒᤠ ᤕᤥ᤺ᤃ᤻ᤔᤠ. ᤕᤧᤰᤕᤰᤁᤥ ᤁᤧᤕᤢᤱᤒᤠ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹. ᤕᤧᤳᤇᤠ ᤜᤥ᤹ᤍᤥ᤺ᤰᤜᤠ᤹ ᤏᤢ ᤂᤡᤏᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤔᤣᤔᤣᤍᤢᤔᤠ ᤁᤧᤖᤧᤰ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛ᤺ᤳᤋᤧᤶᤔᤧ᤹॥ 12 ᤏᤡᤱᤘᤠ᤹ ᤜᤧᤳᤋᤠᤛᤡᤶᤔᤧ᤹. ᤔᤡᤛᤪᤀᤥ ᤂᤡᤏᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤁᤧᤘᤕᤡ. ᤜᤧᤰᤁᤩᤠᤱ ᤁᤴ ᤌᤡᤶᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ᤀᤥ॥ ᤋᤰᤋᤰᤘᤠ ᤜᤡᤶ ᤋᤱᤏᤠᤶ ( ᤗᤧᤒᤡ ᥈᥉:᥉᥉-᥊᥉ ) 13 ᤂᤡᤏᤡ᤹ ᤆᤠᤎᤠᤶᤔᤠᤍᤧᤴᤏᤥ ᤏᤢ ᤆᤧᤰᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥᤗᤠᤶ ᤁᤧᤖᤧᤰ ᤁᤢᤈᤠᤜᤠ᤹ ᤛᤢᤶᤔᤠ ᤁᤧᤛᤢᤖᤢᤶᤔᤠᤱ ᤂᤡᤏᤡ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤋᤰᤋᤰᤘᤠ ᤜᤡᤶ ᤋᤱᤏᤠᤶ ᤋᤥᤛᤧᤶᤔᤧ᤹॥ 14 ᤂᤡᤏᤡ᤹. ᤂᤡᤏᤡ᤹ ᤛᤠᤜᤠ᤹. ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹. ᤕᤧᤳᤇᤠᤒᤠ ᤕᤧᤳᤇᤠᤔᤠᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤁᤧᤖᤧᤰᤗᤧ ᤋᤱᤏᤠᤶ ᤋᤥᤛᤧᤶᤔᤧ᤹ᤀᤠᤱ ᤛ᤺ᤳᤋᤧᤶᤔᤧ᤹॥ 15 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠᤍᤧᤴᤏᤥ ᤏᤢᤛᤡ ᤕᤧᤴ ᤌᤠᤖᤡᤰ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤋᤱᤏᤠᤶ ᤋᤥᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤢᤈᤠ ᤌᤥ᤺ᤰᤔᤠ ᤏᤢ ᤕᤠ᤺ᤶᤒᤰᤜᤠ᤹ ᤜᤧᤴᤕᤠᤜᤠ᤹ᤀᤥ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹ ᤂᤧᤒᤩᤠᤱ ᤂᤡᤏᤡ᤹ ᤛ᤺ᤵᤔᤧᤴ ᤁᤢᤗᤡᤱᤍᤥ ᤁᤧᤳ॥ 16 ᤀᤠᤳᤋᤡᤴ ᤋᤧᤴᤏᤡᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢ᤹. ᤂᤧᤵᤔᤥ ᤋᤱᤒᤣᤖᤧ ᤛᤢᤶᤗᤧᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤥ. ᤕᤧᤳᤏᤠᤶᤒᤠ ᤋᤱᤏᤠᤶᤔᤥ ᤏᤢ ᤋᤰᤋᤰᤘᤠ ᤜᤡᤶ ᤋᤱᤏᤠᤶᤔᤥ ᤂᤡᤏᤡ᤹ ᤁᤧᤖᤧᤰ ᤕᤧᤶᤒᤡᤳᤇᤠ ᤔᤏᤠᤜᤠ᤹ ᤂᤢᤏᤧ᤹ ᤁᤢᤍᤃᤡ ᤀᤥ᤺ᤴᤔᤧᤎᤠᤰᤛᤡᤱᤗ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤳᤋᤡᤴᤜᤠ᤹ᤀᤠᤱ ᤁᤢᤄᤠᤗᤧᤶ ᤜᤢᤰ ᤌᤣᤀᤠᤱ ᤔᤣ᤺ᤴᤏᤣ ᤀᤥ᤺ᤴᤔᤧᤴᤎᤠᤰᤛᤡᤱᤅᤡᤸᤗ॥ 17 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤒᤠ ᤁᤢᤀᤡᤛᤡᤰ ᤁᤧᤖᤧᤰᤗᤧ ᤂᤡᤏᤡ᤹ ᤜᤢᤰᤘᤠᤴ ᤋᤥ᤺ᤴᤍᤧᤶᤔᤧ᤹ᤀᤥ॥ ᤔᤏᤠᤜᤠ᤹ᤖᤧ ᤗᤠᤃᤡ ᤁᤢᤍᤥ᤺ᤵᤔᤠ ᤂᤠᤛᤧᤴᤗᤥᤶᤔᤠ 18 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤂᤡᤏᤡ᤹ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰ ᤁᤢᤀᤡᤛᤡᤰ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤏᤢ ᤕᤢᤰᤛᤠᤒᤠᤜᤠ᤹ ᤕᤢᤰᤋᤡᤱ ᤆᤥᤃᤧᤶᤛᤡᤶᤔᤧ᤹॥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤂᤧᤱᤜᤠ᤹ᤖᤧ ᤁᤧᤘᤠ᤹ᤒᤠ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤗᤥ᤺ᤴᤍᤢ᤹॥ 19 ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴ ᤔᤧᤗᤥ᤺ᤴᤍᤧᤶᤔᤡᤴᤏᤧ᤹. ᤀᤣ᤺ᤰ ᤐᤀᤣ᤺ᤰ ᤔᤧᤈᤥᤃᤧᤶᤔᤡᤴᤏᤧ᤹॥ ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤔᤧᤈᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤁᤧᤈᤠᤒᤧᤸᤗᤧ ᤂᤠᤛᤡᤱ ᤁᤧᤏᤡ᤺ᤵᤐᤧᤴ ᤔᤡᤰᤔᤧᤴᤏᤡᤔᤏᤠᤒᤠ ᤆᤥᤃᤢ᤹ ᤂᤶᤓᤩᤠᤱ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤐᤡᤷᤒᤣ᤺ᤶᤒᤠ ᤆᤠ᤺ᤳᤋᤢ᤹॥ 20 ᤂᤠᤛᤧᤴᤏᤡᤴ ᤋᤡᤶᤍᤧᤶ ᤏᤠ᤺ᤳᤋᤧᤶᤔᤧ᤹. ᤁᤢᤍᤥ᤺ᤵᤔᤠ ᤂᤠᤛᤧᤴᤗᤰ ᤆᤥᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣᤴ ᤕᤢᤰᤋᤧᤶᤔᤧ᤹ᤀᤠᤱ ᤂᤡᤏᤡ᤹ ᤁᤢᤜᤡᤱᤘᤧᤳ ᤘᤠ᤹ᤔᤠ ᤁᤧᤛᤢᤰᤋᤡᤖ॥ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤔᤧᤵᤔᤠᤛᤡ ᤔᤣ᤺ᤴ 21 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤧᤈᤥᤃᤢᤶᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤀᤥ ᤀᤛᤣᤖᤠ ᤔᤠᤱᤅᤡᤸᤗᤧᤴ ᤛᤡᤱ ᤛᤡᤳᤗᤠᤱᤅᤡᤴ ᤋᤰᤐᤧᤳ ᤔᤧᤜᤠᤰᤋᤧᤶᤔᤡᤴᤏᤧ᤹॥ 22 ᤂᤡᤏᤡ᤹ ᤁᤢᤓᤠ ᤛᤣᤛᤣᤒᤠ ᤗᤢᤱ ᤔᤧᤜᤠᤰᤋᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤡ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.