ᤛᤠᤶᤕᤥᤌᤡᤶ ᤀᤡᤱ 15 - LIFOTNT

ᤏᤢᤛᤡᤃᤣᤰᤐᤠ ᤋᤱᤒᤣ

¹ ᤏᤢᤛᤡ ᤋᤱᤒᤣ ᤁᤧᤳ ᤌᤰᤔᤠ ᤁᤢᤏᤢᤵᤔᤥ ᤛᤡᤱᤏᤠᤳ ᤁᤧᤍᤣ᤹ᤒᤠᤴ ᤗᤧᤵᤔᤠᤍᤣᤔᤠ ᤐᤥᤱ᤹॥

² ᤂᤧᤴ ᤁᤶᤓᤗ᤹ᤖᤡᤰ ᤆᤥ᤺ᤰᤔᤠ ᤐᤥᤱ᤹—ᤛᤡᤱᤏᤠᤳ ᤁᤧᤒᤡᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤁᤠ᤹ᤀᤡ ᤛᤥ᤹ᤎᤥᤰ ᤑᤢ᤹ᤏᤢᤛᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤒᤡᤖᤢᤛᤡᤒᤠ ᤛᤡᤱᤏᤠᤳᤋᤡᤴ ᤔᤧᤗᤧᤖᤢ ᤔᤧᤍᤣᤛᤢᤖ॥ ᤂᤧᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤗᤠᤈᤣ᤹ᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤛᤡᤱᤏᤠᤳ ᤏᤢ᤺ᤰᤔᤠᤖᤧ ᤗᤠᤃᤡ ᤁᤧᤛᤠᤰᤐᤠ ᤔᤧᤈᤠ᤺ᤳᤋᤢᤛᤡᤴᤗ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤱᤏᤠᤳ ᤗᤧᤵᤔᤡ ᤂᤥᤔᤠ ᤕᤧᤶ ᤀᤢᤘᤠ ᤐᤥ᤺ᤰᤂᤧᤀᤠᤱ ᤘᤠ᤹॥

³ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤏᤠ᤺ᤰᤔᤠ ᤁᤧᤛᤢᤰᤋᤢᤶ. ᤁᤖ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤧᤍᤣ᤹ᤖᤢᤒᤠ ᤛᤡᤱᤏᤠᤳᤋᤡᤴ ᤗᤧᤖᤧᤶᤍᤣᤛᤧᤶᤔᤧ᤹॥

⁴ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤢᤰᤁᤥ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤧᤰᤂᤠᤀᤣ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹. ᤂᤡᤏᤡ᤹ᤀᤥ ᤜᤠ᤺ᤳᤋᤠᤱ ᤕᤠᤱᤃᤧᤛᤠ᤹ᤒᤠ ᤔᤧᤒᤥᤱᤏᤧᤴ॥

⁵ ᤀᤠᤱᤃᤠ᤹ ᤀᤠᤀᤡᤴ ᤀᤡᤱᤈᤠᤱ ᤐᤡᤏᤡᤱᤒᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤂᤢᤏᤧ᤹ ᤁᤴ ᤆᤥᤃᤢ᤹॥

⁶ ᤂᤢᤏᤧ᤹ ᤁᤢᤔᤠᤱᤜᤢᤵ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤡᤱᤏᤠᤳ ᤁᤧᤒᤡᤖᤢᤶᤛᤡᤶ᤹. ᤁᤖ ᤂᤡᤏᤡ᤹ᤃ ᤛᤡᤱᤏᤠᤳ ᤋᤠ᤺ᤵᤔᤠ ᤔᤧᤒᤥᤱᤏᤧᤴ॥ ᤂᤡᤏᤡ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤶᤎᤠᤱ ᤕᤢᤰ ᤁᤧᤈᤥᤃᤢᤶ᤹. ᤁᤖ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤛᤶᤎᤠᤱ ᤕᤢᤰ ᤔᤧᤴᤈᤥᤃᤢᤴ᤹॥

⁷ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣ᤹ᤀᤥᤒᤠ ᤁᤢᤓᤠ ᤕᤧᤰᤕᤰᤁᤥ ᤁᤢᤓᤠ ᤑᤢ᤹ᤏᤢᤛᤠ᤹ᤜᤠ᤹ ᤕᤠᤱᤃᤧᤛᤠ᤹ᤒᤠ ᤔᤧᤘᤠ᤹ᤏᤧᤓᤃᤪ. ᤂᤡᤏᤡ᤹ ᤂᤧᤴ ᤏᤢᤛᤠ᤹ᤀᤡᤸᤗᤧ ᤁᤢᤗᤠᤃᤡ ᤏᤡᤱᤘᤠ᤹ ᤆᤢ᤺ᤰᤐᤠ ᤔᤧᤈᤥᤃᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤜᤢᤰ ᤔᤧᤶᤒᤠ᤺ᤱᤔᤏᤠᤒᤠ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥

⁸ ᤐᤖᤢᤔᤠᤸᤗᤧ ᤂᤡᤏᤡ᤹ ᤜᤢᤰᤁᤡᤴ ᤑᤠ᤺ᤰᤂᤧᤶᤔᤧ᤹ᤀᤠᤱ ᤂᤢᤏᤧ᤹ ᤆᤠᤜᤠ ᤆᤥ᤺ᤰᤐᤠ ᤕᤠᤖᤡᤰ ᤌᤧᤳᤗᤱ ᤐᤡᤖᤧᤶᤔᤧ᤹॥

⁹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹᥄ ᤛᤡᤱᤏᤠᤳ ᤗᤧᤵᤔᤠ ᤋᤱᤒᤣᤴ ᤋᤠᤔᤠ ᤀᤡ᤺ᤳᤋᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤢᤰᤐᤠ ᤁᤧᤈᤥᤃᤢᤶᤔᤠᤱ ᤕᤠᤱᤃᤧᤛᤠ᤹ᤒᤠ ᤀᤠᤵᤑᤣᤰ ᤑᤢ᤹ᤏᤢᤛᤠ᤹ᤜᤠ᤹ ᤑᤠ᤹ᤔᤠᤛᤡ ᤁᤧᤴᤍᤧᤴᤍᤡᤴᤏᤧᤓᤃᤪ. ᤂᤧᤴ ᤕᤠᤱᤃᤧᤛᤠ᤹ᤒᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤠᤀᤥ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ᤹. ᤜᤧᤰᤁᤩᤠᤱ ᤗᤠᤕᤥᤒᤠ ᤀᤠᤵᤋᤡᤰᤁᤥ ᤁᤧᤎᤩᤧ᤹ᤀᤡ॥

¹⁰ ᤂᤡᤏᤡ᤹ ᤂᤧᤴ ᤏᤡᤱᤘᤠ᤹ ᤔᤧᤴᤍᤢᤰᤁᤣ ᤐᤡᤖᤧᤶᤔᤧ᤹. ᤂᤧᤴ ᤂᤡᤏᤡ᤹ ᤁᤧᤒᤡᤖᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤧᤍᤢᤰᤏᤧᤴᤗ. ᤌᤣᤀᤠᤱᤓᤧᤸᤗᤧ ᤀᤠᤶᤓᤠ ᤁᤸᤗᤧ ᤆᤥᤃᤢᤸᤗᤧᤀᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤕᤠ᤺ᤶᤒᤰᤁᤥ ᤏᤢ ᤂᤡᤏᤡ᤹ ᤜᤢᤰ ᤁᤧᤕᤠᤰᤋᤢᤶᤒᤠ ᤁᤧᤖᤧᤰ ᤐᤠ᤺ᤴᤏᤥ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹॥

¹¹ ᤗᤠᤈᤣ᤹ᤀᤥ ᤀᤠᤓᤧᤸᤗᤧᤛᤠᤱ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ ᤔᤧᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤗ ᤐᤳᤋᤠ. ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤏᤢ ᤂᤡᤏᤡ᤹ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤏᤢ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤂᤡᤏᤡ᤹ ᤏᤡᤱᤘᤠ᤹ ᤕᤶᤒᤠ ᤆᤥᤃᤧᤶᤔᤧ᤹ᤀᤠᤱ ᤐᤡᤖᤧᤛᤡᤶᤔᤧ᤹ᤀᤥ॥

ᤕᤥ᤺ᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ

¹² ᤂᤡᤏᤡ᤹ ᤀᤠᤳᤋᤡᤴ ᤕᤜᤢᤍᤡ ᤏᤢᤛᤠ᤹ ᤏᤢᤛᤠ᤹ᤔᤠᤜᤠ᤹ ᤂᤡᤏᤡ᤹ ᤜᤢᤰᤁᤥ ᤀᤠᤵᤑᤣᤰ ᤔᤧᤛᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤱᤒᤣ ᤋᤢᤰᤛᤡ ᤌᤠᤖᤡᤰ ᤂᤡᤏᤡ᤹ ᤕᤠ᤺ᤶᤒᤰ ᤔᤧᤈᤥᤃᤢ ᤁᤧᤶᤒᤡᤖᤡᤏᤧᤓᤃᤪ. ᤏᤢᤛᤡᤃᤣᤰᤐᤠ ᤋᤱᤒᤣᤀᤥ ᤆᤥ᤺ᤰᤕᤢᤶᤓᤥ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤑᤠ᤺ᤰᤋᤧᤶᤔᤧ᤹॥

¹³ ᤂᤧᤴ ᤆᤥ᤺ᤰᤕᤢᤶᤓᤥ ᤐᤥᤱᤅᤠᤱ ᤐᤣ᤺ᤰᤁᤡᤸᤗᤧ ᤌᤧᤔᤠᤀᤠᤱ ᤔᤣ᤺ᤴᤏᤣ ᤔᤧᤒᤠᤱᤄᤠᤶ ᤔᤧᤍᤣᤛᤧᤶᤔᤡᤴᤏᤧ᤹.

¹⁴ ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤔᤧᤸᤗᤢᤰ ᤔᤧ᤺ᤴᤍᤠ. ᤆᤠᤎᤠᤶᤔᤠᤍᤧᤴᤏᤥ ᤏᤢ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥᤗᤠᤶ ᤁᤢᤕᤥᤕᤥ ᤐᤡᤖᤧᤶᤔᤧ᤹ᤀᤠᤱ ᤂᤧᤴ ᤐᤠᤱᤄᤧᤶᤍᤣᤛᤧᤶᤔᤧ᤹॥

¹⁵ ᤔᤡᤛᤪᤀᤥ ᤂᤡᤏᤡ᤹ ᤕᤥᤰ ᤁᤧᤘᤕᤡᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ ᤜᤠᤒᤠ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤁᤴ ᤀᤡᤱᤈᤠᤱᤅᤡᤴ ᤐᤡᤏᤡᤱᤗ ᤐᤳᤋᤠ॥

¹⁶ ᤁᤖ ᤂᤡᤏᤡ᤹ ᤕᤥ᤺ᤃ᤻ᤒᤧᤸᤗᤧ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤜᤡᤶᤛᤕᤱᤅᤡᤴ ᤗᤢᤱᤔᤠ᤹ ᤁᤧᤜᤡ᤺ᤵᤋᤡ᤹ ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤀᤠᤱ ᤀᤰᤂᤣ ᤐᤠ᤺ᤳᤋᤢ᤹ᤏᤧᤓᤃᤪ. “ᤀᤠᤱᤃᤠ᤹ ᤂᤧᤏᤧ᤹ᤀᤥᤗᤠᤶ ᤐᤣ᤺ᤰᤔᤠ ᤀᤠᤏᤡᤱᤘᤠ᤹ ᤜᤥᤵ”

¹⁷ ᤜᤧᤰᤁᤣᤏᤧᤓᤃᤪ ᤋᤠᤰᤁᤫᤠ ᤌᤡᤰ ᤕᤠᤱᤅᤠᤛᤡᤶᤔᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤗᤠᤶᤎᤣ᤺ᤵᤐᤥ ᤋᤣ᤹ᤖᤧᤶᤔᤧ᤹ᤀᤠᤱ ᤁᤢᤏᤧᤂᤥ᤹ᤀᤡᤴ ᤋᤠᤰᤁᤫᤠᤸᤗᤧ ᤕᤳᤋᤧᤶᤔᤧ᤹. ᤂᤧᤒᤩᤠᤱ ᤂᤧᤴ ᤁᤢᤜᤡᤱᤜᤡᤱ ᤌᤠᤖᤡᤰ ᤂᤡᤏᤡ᤹ ᤕᤥᤃ᤻ᤒᤠ ᤐᤥᤱ᤹॥ ᤂᤡᤏᤡ᤹ ᤕᤥ᤺ᤃ᤻ᤔᤠᤴᤏᤠᤱ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹॥

¹⁸ ᤂᤧᤴ ᤆᤥ᤺ᤰᤕᤢᤶᤓᤥ ᤐᤥᤱᤅᤠᤱ ᤐᤣ᤺ᤰᤔᤠ ᤁᤧᤓᤠ᤺ᤰᤋᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠᤴ ᤆᤢ᤺ᤰᤐᤠ ᤔᤧᤈᤥᤃᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤏᤡᤶᤕᤠᤰᤁᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤧᤘᤠᤖᤥᤒᤠᤸᤗᤧ ᤋᤠ᤺ᤰᤋᤢᤒᤠ ᤏᤡᤗᤧᤱ ᤁᤢᤏᤡᤶᤕᤠᤰᤁᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤕᤠ᤺ᤶᤒᤰ ᤂᤧᤴ ᤜᤡᤒᤪᤢ᤺ᤸᤗᤧ ᤋᤢᤰᤛᤡ ᤋᤱᤒᤣᤀᤥ ᤆᤥᤃᤢ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤖᤧᤰ ᤕᤠ᤺ᤶᤒᤰᤁᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖᤥ॥

ᤋᤃᤡ ᤁᤧᤎᤠᤵᤐᤠ ᤌᤰᤛᤠ

¹⁹ ᤂᤡᤏᤡ᤹ ᤐᤡᤳᤌᤰᤛᤠᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤗᤠᤶ ᤋᤃᤡ ᤁᤧᤎᤠᤵᤐᤠ ᤁᤧᤖᤧᤰ ᤐᤡᤳᤛᤠᤳ ᤀᤡᤃᤪ ᤔᤧ᤺ᤴᤍᤛᤠ᤺ᤳᤋᤡᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤧᤴᤍᤧᤶ ᤕᤧᤵᤛᤧᤶᤔᤧ᤹॥ ᤂᤡᤏᤡ᤹ ᤐᤡᤳᤌᤰᤛᤠᤜᤠ᤹ᤀᤥᤒᤠ ᤋᤃᤡ ᤁᤧᤎᤠᤵᤐᤠᤜᤠ᤹ᤗᤠᤶ ᤀᤠᤳᤋᤡᤴᤏᤠᤱ ᤕᤠ᤺ᤶᤒᤰᤁᤥ ᤔᤧᤕᤠᤰᤋᤠᤶᤛᤡᤶᤔᤧᤴᤏᤧ᤹. ᤜᤧᤰᤁᤩᤠᤱ ᤋᤃᤡ ᤁᤧᤎᤠᤵᤐᤠ ᤂᤡᤏᤡ᤹ ᤔᤧᤸᤗᤢᤰᤁᤡᤸᤗᤧ ᤁᤢᤶᤒᤪᤡᤰᤁᤧᤴ ᤔᤧᤄᤰᤋᤧᤶᤔᤡᤴᤏᤧ᤹॥

²⁰ ᤀᤠᤳᤋᤡᤴ ᤋᤧᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢ᤹ ᤂᤧᤵᤔᤥ ᤂᤡᤏᤡ᤹ ᤜᤡᤶᤛᤕᤱᤜᤠ᤹ᤏᤢ ᤋᤱᤒᤣ ᤌᤰᤔᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤴ ᤆᤧᤶᤔᤧ᤹॥

²¹ ᤁᤢᤓᤠ ᤁᤢᤗᤠᤱ ᤁᤧᤛᤰᤐᤠ ᤀᤡᤃᤪ ᤁᤢᤔᤡᤰ ᤁᤧᤓᤧᤰᤐᤠ ᤌᤰᤛᤠ ᤔᤧᤘᤠ᤹ᤏᤧᤓᤃᤪ. ᤁᤡᤃᤪ ᤘᤣ᤹ ᤐᤖᤡᤰᤐᤠ ᤕᤠᤱᤄᤣ᤺ᤰ ᤁᤧᤒᤵᤐᤠ ᤁᤧᤃᤠ᤺ᤶᤒᤠ ᤐᤳᤏᤧᤓᤃᤪ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤴ ᤛᤡᤍᤢᤱᤈᤓᤠ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥

²² ᤀᤠᤵᤑᤣᤰ ᤂᤡᤏᤡ᤹ ᤕᤧᤰᤕᤰᤁᤥᤀᤣ ᤂᤧᤴ ᤆᤧᤶᤔᤧ᤹॥ ᤐᤧ᤺ᤱᤘᤠ ᤀᤡᤃᤪ ᤛᤩᤠ᤺ᤰᤐᤠ ᤛᤠ ᤁᤧᤈᤠᤶᤒᤠ ᤁᤢᤀᤡᤛᤡᤰ ᤌᤡᤶ ᤁᤧᤵᤔᤠᤀᤠᤱ ᤛᤢᤳᤌᤥ ᤀᤡᤃᤪ ᤀᤠᤛᤢᤳᤌᤥ ᤔᤏᤠ᤺ᤸᤗᤧ ᤂᤧᤴ ᤆᤠᤔᤠ ᤛᤢᤰᤋᤢ᤹॥

²³ ᤁᤖ ᤂᤧᤸᤗᤧ ᤁᤢᤔᤠᤰᤂᤡᤴᤗᤰ ᤔᤧᤈᤧᤶᤔᤡᤴᤏᤧ᤹॥ ᤆᤫᤠ᤺ᤳ ᤁᤢᤀᤡᤛᤡᤰ ᤂᤠᤶᤒᤠᤱᤅᤥ ᤂᤧᤴ ᤜᤢᤰᤂᤧᤶᤍᤧᤛᤧᤶᤔᤧ᤹ᤀᤥ॥