ᤛᤠᤶᤕᤥᤌᤡᤶ ᤀᤡᤱ 14 - LIFOTNTᤔᤧᤖᤡᤱ ᤌᤰᤔᤠ ᤛᤠᤰᤌᤡᤶ 1 ᤂᤡᤏᤡ᤹ᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤏᤡᤱ॥ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤡᤏᤡ᤹ ᤔᤧᤖᤡᤱ ᤔᤧᤎᤰᤋᤧᤶᤔᤡᤴᤏᤧ᤹. ᤌᤧᤃᤣ᤺ᤰᤁᤥ ᤋᤃᤠᤱ ᤗᤧᤵᤔᤠᤱᤒᤠᤴ ᤔᤧᤏ᤺ᤰᤂᤧᤶᤔᤡᤴᤏᤧ᤹॥ 2 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤡᤒᤠ ᤛᤢᤘᤠᤱᤏᤡᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤂᤡᤏᤡ᤹ᤀᤣ ᤂᤢᤏᤧ᤹ ᤀᤡᤔᤧᤸᤗᤢᤱᤒᤠ ᤁᤢᤕᤠᤱᤛᤠᤁᤢᤴᤎᤣ ᤐᤥᤱᤛᤧ ᤁᤧᤛᤣᤃᤡᤀᤠᤱ ᤘᤠ᤹ᤖᤥ॥ ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤌᤰᤛᤠᤐᤢᤛᤠᤜᤠ᤹ ( ᤗᤧᤒᤡ ᥇᥇:᥇-᥊᥍ ) 3 ᤀᤠᤳᤋᤡᤴ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ᤀᤠᤱ ᤂᤡᤏᤡ᤹ ᤔᤧᤈᤧᤶᤔᤡᤴᤏᤧ᤹॥ 4 ᤂᤡᤏᤡ᤹ ᤆᤠᤔᤠ ᤁᤧᤏᤢ᤹ᤒᤠ ᤌᤰᤛᤠᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤁᤢᤶᤒᤠᤒᤠ ᤐᤡᤳ. ᤔᤧᤸᤗᤢᤰ. ᤔᤧ᤺ᤴᤍᤠ. 5 ᤐᤧ᤺ᤱᤘᤠ. ᤛᤩᤠ᤺ᤰᤐᤠ. ᤁᤢᤍᤠᤱ ᤁᤧᤕᤢᤱᤒᤠ ᤛᤩᤠ᤺ᤰᤐᤠ. ᤋᤠᤶᤓᤢᤱ ᤔᤧ᤺ᤴᤍᤠ. ᤋᤠᤶᤓᤢᤱ ᤌᤢ᤺ᤶᤒᤠ. ᤋᤠᤱᤃᤣ᤺ᤶᤒᤠ ᤛᤩᤠ᤺ᤰᤐᤠ ᤏᤢ ᤏᤠᤱᤈᤱᤗᤢᤱᤅᤥᤒᤠ ᤔᤧᤸᤗᤢᤰ॥ 6 ᤌᤰᤛᤠᤜᤠ᤹ᤀᤥᤒᤠ ᤏᤧᤳᤇᤡ ᤁᤢᤗᤰᤁᤥ ᤁᤢᤗᤠᤱ ᤋᤥ᤹ᤓᤣ᤺ᤳ ᤁᤧᤛᤧᤒᤠ ᤏᤢ ᤁᤢᤈᤠ ᤁᤧᤀᤶᤒᤠᤴ ᤂᤡᤏᤡ᤹ ᤆᤠᤔᤠ ᤏᤢ᤹॥ 7 ᤁᤖ ᤁᤢᤈᤠ ᤁᤧᤀᤶᤒᤠ ᤏᤢ ᤏᤢᤖᤡᤰ ᤁᤢᤗᤠᤱ ᤋᤥ᤹ᤓᤣ᤺ᤳ ᤔᤧᤴᤇᤧᤔᤏᤠᤒᤠᤜᤠ᤹ᤀᤥ ᤁᤴᤜᤠ᤹ ᤔᤧᤈᤩᤧᤶᤔᤡᤴᤏᤧ᤹—ᤀᤢᤔᤣ. ᤑᤋᤠ. ᤁᤢᤔᤡ ᤁᤧᤜᤥᤵᤐᤠ ᤛᤢᤒᤠ—ᤌᤣᤀᤠᤱᤓᤧᤸᤗᤧ ᤁᤴᤜᤠ᤹ᤖᤧ ᤁᤢᤈᤠᤃ ᤔᤧᤀᤴᤍᤢ ᤁᤖ ᤂᤢᤴᤇᤡ᤹ ᤗᤠᤱᤋᤥ᤹ᤓᤣᤳ ᤁᤧᤛᤧᤶᤒᤠ ᤔᤧᤒᤳᤏᤧᤴ॥ ᤁᤴᤜᤠ᤹ ᤂᤡᤏᤡ᤹ ᤗᤠᤃᤡ ᤌᤡᤶ ᤁᤢᤀᤡᤛᤡᤰ ᤀᤠᤛᤢᤳᤌᤥ ᤔᤧᤈᤥᤰ॥ 8 ᤑᤠᤰᤁᤡᤴᤏᤠᤱ ᤀᤠᤛᤢᤳᤌᤥ ᤆᤥᤰ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤗᤠᤱ ᤋᤥ᤹ᤓᤧ᤺ᤳᤋᤡᤴ ᤁᤧᤛᤧᤶᤒᤠᤃ ᤐᤳ ᤁᤖ ᤂᤧᤸᤗᤧ ᤁᤢᤈᤠ ᤔᤧᤀᤴᤍᤢᤴ᤹॥ ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤔᤧᤈᤥᤰ॥ ᤂᤧᤴ ᤌᤰᤛᤠ ᤛᤠᤜᤠ᤹ ᤂᤡᤏᤡ᤹ ᤔᤧᤈᤧᤶᤔᤡᤴᤏᤧ᤹. ᤂᤧᤴ ᤁᤢᤛᤡᤘᤧᤳ ᤌᤰᤛᤠᤜᤠ᤹ ᤔᤧᤛᤢᤛᤧᤶᤔᤡᤴᤏᤧ᤹॥ 9 ᤆᤫᤠ᤺ᤳᤋᤥ ᤁᤧᤕᤠᤰᤐᤠᤜᤠ᤹ᤀᤥ ᤁᤢᤗᤠᤵ ᤏᤢ ᤁᤢᤛᤣ᤺ᤰ ᤁᤧᤒᤵᤐᤠᤜᤠ᤹ ᤂᤡᤏᤡ᤹ ᤆᤠᤔᤠ ᤏᤢ᤹॥ 10 ᤁᤖ ᤁᤢᤗᤠᤵ ᤏᤢ ᤁᤢᤛᤣ᤺ᤰ ᤔᤧᤶᤒᤵᤔᤏᤠᤒᤠᤜᤠ᤹ ᤂᤡᤏᤡ᤹ ᤔᤧᤈᤧᤶᤔᤡᤴᤏᤧ᤹॥ ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤔᤧᤈᤥᤰ॥ 11 ᤛᤢᤳᤌᤥ ᤐᤢᤛᤠ ᤀᤠᤳᤋᤡᤴᤇᤠᤱ ᤂᤡᤏᤡ᤹ ᤆᤠᤔᤠ ᤏᤢ᤹॥ 12 ᤁᤖ ᤂᤡᤏᤡ᤹ ᤆᤠᤔᤠ ᤔᤧᤴᤏᤢ᤹ᤔᤏᤠᤒᤠᤜᤠ᤹ᤃ ᤁᤴᤜᤠ᤹ᤀᤣᤖᤥ—ᤁᤰᤁᤑᤡ᤺ᤰᤔᤠ. ᤁᤡᤌ ᤏᤢ ᤁᤢᤔᤠᤰᤗᤠ ᤁᤡᤌ. 13 ᤁᤧᤖᤧᤰ ᤐᤖᤡᤰᤐᤠ ᤁᤢᤜᤧ᤺ᤳᤗᤠ ᤔᤕᤠ. ᤜᤧᤰᤁᤩᤠᤱ ᤁᤢᤔᤠᤰᤗᤠ ᤁᤡᤌ. 14 ᤁᤧᤖᤧᤰ ᤐᤖᤡᤰᤐᤠ ᤁᤠ᤺ᤰᤘᤠ. 15 ᤕᤶᤒᤠ ᤑᤰᤌᤡ᤺ᤶᤒᤠ. ᤁᤢᤗᤢᤗᤢ ᤁᤧᤗ᤹ᤒᤠ ᤑᤰᤌᤡ᤺ᤶᤒᤠ. ᤏᤢ ᤘᤖ᤺ᤱᤅᤥᤒᤠ ᤐᤢ. ᤁᤧᤖᤧᤰ ᤐᤖᤡᤰᤐᤠ ᤑᤡ᤺ᤳᤆᤥ. 16 ᤆᤢᤰᤐᤠ ᤑᤰᤌᤡ᤺ᤶᤒᤠ. ᤕᤶᤒᤠ ᤑᤰᤌᤡ᤺ᤶᤒᤠ. ᤁᤢᤓᤖᤠ ᤑᤰᤌᤡ᤺ᤶᤒᤠ. 17 ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤑᤰᤌᤡ᤺ᤶᤒᤠ. ᤅᤠ ᤁᤧᤈᤠᤒᤠ ᤔᤕᤠ. ᤆᤫᤠ᤺ᤳᤋᤥ ᤁᤧᤕᤠᤰᤐᤠ ᤁᤠ᤺ᤰᤘᤠ. 18 ᤘᤖ᤺ᤱᤘᤠ. ᤁᤧᤖᤧᤰ ᤐᤖᤡᤰᤐᤠ ᤗᤡᤗᤡᤘᤠ. ᤛᤡᤱᤎᤰᤌᤰᤘᤠ ᤏᤢ ᤏᤧᤰᤘᤠ ᤔᤧᤘᤠᤖᤠᤵ॥ 19 ᤁᤢᤗᤢᤵ ᤁᤢᤗᤢᤵᤐᤥ ᤁᤧᤒᤧᤒᤠ ᤁᤧᤖᤧᤰ ᤑᤣ᤹ᤒᤠ᤺ᤳᤜᤠ᤹ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤔᤧᤈᤥᤰ॥ ᤂᤧᤱᤜᤠ᤹ ᤔᤧᤈᤧᤶᤛᤡᤶᤔᤡᤴᤏᤧ᤹॥ 20 ᤁᤖ ᤁᤢᤗᤠᤵ ᤁᤧᤒᤵᤐᤠ ᤁᤧᤖᤧᤰ ᤘᤖᤡ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤆᤠᤔᤠ ᤏᤢ᤹॥ 21 ᤂᤡᤏᤡ᤹ ᤌᤧᤔᤠ᤺ᤴ ᤁᤢᤛᤡᤘᤧᤳ ᤁᤧᤄᤥᤛᤢᤶ᤹. ᤂᤡᤏᤡ᤹ ᤂᤧᤴ ᤔᤧᤈᤧᤶᤔᤡᤴᤏᤧ᤹॥ ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤂᤧᤴ ᤐᤡᤔᤠ ᤁᤧᤛᤢᤰᤋᤢᤶ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤆ᤺ᤸᤗᤧ ᤏᤢ᤹. ᤀᤡᤃᤪ ᤂᤡᤏᤡ᤹ ᤂᤧᤴ ᤁᤧᤄᤥᤛᤢᤶᤒᤠ ᤁᤢᤛᤡᤘᤧᤳᤋᤧᤴ ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤀᤥ ᤛᤱᤔᤠ ᤁᤧᤛᤢᤰᤋᤢᤶ॥ ᤁᤖ ᤂᤡᤏᤡ᤹ᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤧᤛᤣ᤺ᤴᤍᤡᤒᤠ ᤛᤢᤘᤠᤱᤏᤡᤱᤗᤥ॥ ᤔᤧ᤺ᤴᤍᤛᤠ᤺ᤳ ᤛᤠᤴ ᤁᤢᤶᤔᤠᤖᤧ ᤁᤢᤏᤢᤀᤥ ᤔᤧᤎᤥ᤺ᤰᤋᤧᤶᤔᤡᤴᤏᤧ᤹ᤀᤥ॥ ᤌᤡᤒᤥᤱᤗᤰ ᤋᤥ᤺ᤶᤔᤠ ᤌᤡᤶ 22 ᤋᤱᤒᤣ ᤌᤰᤔᤠ ᤀᤡᤰᤋᤠᤵᤜᤠ᤹ᤀᤥ ᤁᤧᤎᤥ᤺ᤰᤐᤠ ᤁᤧᤖᤧᤰ ᤐᤥᤃᤢᤃᤧᤴ ᤁᤢᤈᤠᤜᤠ᤹ᤗᤠᤶ ᤂᤡᤏᤡ᤹ ᤌᤡᤒᤥᤱᤗᤰ ᤛᤧᤶᤔᤠ ᤂᤡᤏᤡ᤹ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹॥ 23 ᤀᤠᤳᤋᤡᤴ ᤋᤧᤴᤏᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤔᤡᤱᤅᤥ ᤁᤢᤕᤢᤱᤔᤠᤍᤧᤴᤏᤡᤸᤗᤧ ᤗᤠᤃᤡ ᤛᤣᤃᤢ. ᤀᤠᤶᤓᤠ ᤂᤧᤵᤔᤥ ᤂᤡᤏᤡ᤹ ᤁᤢᤈᤠ. ᤆᤧᤸᤗᤧᤰᤛᤣ᤹ ᤌᤡ ᤏᤢ ᤏᤡ᤺ᤱᤃᤣᤸᤗᤧ ᤌᤡᤒᤥᤱᤗᤰ ᤜᤧᤰᤁᤩᤠᤱ ᤂᤡᤏᤡ᤹ ᤐᤡᤳᤌᤰᤛᤠᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤖᤧ ᤋᤃᤡ ᤔᤧᤎᤠᤵᤋᤢᤛᤡᤒᤠ ᤛᤠᤜᤠ᤹ ᤂᤢᤏᤧ᤹ ᤁᤢᤍᤃᤡ ᤆᤧᤶᤔᤧ᤹॥ ᤁᤶᤓᤗ᤹ᤖᤡᤰᤁᤣ ᤀᤠᤵᤑᤠᤸᤗᤧᤛᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤁᤧᤜᤢ᤹ᤀᤠᤛᤡ᤹॥ 24 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤌᤡᤒᤥᤱᤗᤰᤁᤡᤴ ᤐᤱᤔᤠ ᤋᤣ᤹ᤔᤠ ᤁᤧᤴᤇᤢᤰᤋᤢᤶᤔᤡᤴ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤡᤒᤥᤱᤗᤰᤁᤡᤴ ᤋᤣ᤹ᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤣᤃᤢᤒᤠ ᤂᤢᤏᤧ᤹ ᤁᤢᤔᤡᤱᤅᤥᤒᤠ ᤕᤢᤱᤍᤧᤴᤏᤡᤴ ᤛᤠ᤹ᤖᤡᤰ ᤔᤠ᤺ᤱᤏᤧᤓᤃᤪ. 25 ᤂᤡᤏᤡ᤹ ᤌᤡᤒᤥᤱᤗᤰᤁᤡᤴ ᤛᤱᤄᤧᤶᤔᤧ᤹ᤀᤠᤱ ᤕᤠᤱᤅᤡᤴ ᤂᤡᤏᤡ᤹ ᤜᤢᤰᤁᤥ ᤕᤠᤱᤅᤠᤛᤡᤶᤔᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠᤍᤧᤴᤏᤥ ᤐᤣᤃᤧᤶᤔᤧ᤹॥ 26 ᤀᤠᤵᤑᤣᤰ ᤂᤡᤏᤡ᤹ ᤏᤡᤱᤘᤠ᤹ ᤀᤡᤛᤡ᤺ᤰ ᤐᤡᤳᤌᤰᤛᤠ. ᤔᤧᤸᤗᤢᤰ. ᤆᤧᤸᤗᤧᤰᤛᤣ᤹ ᤁᤧᤍᤢᤶᤒᤠ ᤌᤡ ᤀᤡᤃᤪ ᤘᤣ᤹ ᤌᤡ. ᤆᤩᤠᤛᤠᤱ ᤀᤠᤶᤓᤠ ᤂᤧᤴ ᤕᤠᤱᤅᤡᤸᤗᤧ ᤀᤡᤅᤧᤶᤔᤧ᤹ ᤂᤶᤓᤩᤠᤱ ᤂᤡᤏᤡ᤹ ᤜᤡᤶᤛᤕᤱᤜᤠ᤹ᤏᤢ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤆᤠᤶᤔᤧ᤹ᤀᤠᤱ ᤛᤥᤛᤥᤳᤗᤖᤠᤱ ᤆᤥᤃᤧᤶᤔᤧ᤹॥ 27 ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤌᤧᤔᤠᤀᤠᤱ ᤗᤰ ᤀᤡᤃᤪ ᤂᤥᤔᤠ ᤗᤰ ᤔᤧᤱᤃᤳᤋᤢᤴ᤹॥ 28 ᤋᤱᤒᤣ ᤛᤢᤶᤛᤡ ᤁᤧᤳ ᤌᤰᤔᤠ ᤁᤢᤏᤢᤵᤔᤥ ᤋᤱᤒᤣ ᤋᤱᤒᤣᤒᤠ ᤂᤡᤏᤡ᤹ ᤁᤧᤖᤧᤰ ᤐᤥᤃᤢᤃᤧᤴ ᤁᤢᤈᤠᤜᤠ᤹ᤖᤧᤴ ᤌᤡᤒᤥᤱᤗᤰᤁᤡᤴ ᤕᤧᤰᤕᤰᤁᤥᤒᤠ ᤆᤠᤎᤠ᤺ᤱᤅᤥ ᤕᤢᤰᤂᤧᤶᤔᤧ᤹. 29 ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤌᤧᤔᤠᤀᤠᤱ ᤗᤰ ᤀᤡᤃᤪ ᤂᤥᤔᤠ ᤗᤰ ᤔᤧᤱᤃᤵᤔᤏᤠᤒᤠ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ. ᤕᤧᤳᤇᤠ ᤜᤥ᤹ᤍᤥ᤺ᤰ ᤏᤢ ᤔᤣᤔᤣᤍᤢᤔᤠᤜᤠ᤹ ᤐᤡᤖᤧᤶᤛᤡᤶᤔᤧ᤹. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤖᤧᤰ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.