ᤛᤠᤶᤕᤥᤌᤡᤶ ᤀᤡᤱ 13 - LIFOTNT

ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤔᤣ᤺ᤴ ᤁᤧᤗ᤹ᤒᤠ ᤛᤠᤶᤍᤡᤱ

¹ ᤂᤡᤏᤡ᤹ ᤗᤢᤶᤔᤥ ᤁᤢᤓᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤡᤃᤪ ᤋᤠ᤹ᤍᤡ ᤛᤧᤵᤔᤠᤱ ᤁᤧᤔᤠᤰᤐᤠᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤀᤡᤃᤪ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤀᤥ᤺ᤴᤎᤠᤰᤔᤠ ᤋᤠᤶᤛᤡᤱ ᤆᤥᤰ.

² ᤜᤧᤰᤁᤩᤠᤱ ᤂᤧᤸᤗᤧ ᤐᤠ᤺ᤳᤋᤢᤒᤠ ᤔᤡᤰᤛᤣ᤺ᤴᤏᤡᤴ ᤀᤡᤃᤪ ᤏᤧᤜᤡᤏᤡᤱᤘᤠ᤹ᤖᤧ ᤔᤧᤴᤎᤠᤵᤔᤏᤠᤒᤠ ᤐᤠ᤺ᤴᤏᤡᤴ ᤐᤥᤱ᤹ ᤜᤧᤰᤁᤩᤠᤱ (ᤂᤡᤏᤡ᤹ ᤋᤃᤡ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤛᤡᤶᤔᤡᤴᤒᤠ) “ᤘᤣ᤹ ᤔᤠᤱᤛᤠᤶᤔᤠᤱᤜᤠ᤹ ᤋᤡᤶᤍᤢᤶᤛᤡᤶ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤔᤧᤳᤋᤢᤶᤛᤡᤶ” ᤂᤧᤸᤗᤧ ᤜᤧᤰᤁᤣ ᤐᤠ᤺ᤳᤋᤢᤏᤧᤓᤃᤪ.

³ ᤂᤡᤏᤡ᤹ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤡᤃᤪ ᤋᤠ᤹ᤍᤡ ᤛᤧᤵᤔᤠᤱ ᤁᤧᤔᤠᤰᤐᤧᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹॥ ᤂᤧᤱᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤏᤡᤱᤘᤠ᤺ᤸᤗᤧ ᤔᤡ᤺ᤶᤈᤡ ᤁᤧᤔᤧᤳᤋᤢᤶᤒᤡ ᤁᤧᤶᤔᤧᤳᤋᤢᤶᤔᤡᤴᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤢᤒᤠᤖᤥ॥

⁴ ᤂᤡᤏᤡ᤹ᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤥ ᤗᤠᤱᤄᤣᤃᤧᤶᤔᤧ᤹. ᤂᤢᤏᤧ᤹ᤏᤢ ᤁᤡᤛᤧᤶᤔᤧ᤹. ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤜᤠ᤹ ᤂᤧᤵᤛᤧᤶᤔᤧ᤹. ᤂᤢᤏᤧ᤹ ᤁᤢᤛᤧᤘᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤥᤀᤣ ᤂᤡᤶᤔᤠᤛᤡᤶᤔᤧ᤹॥

⁵ ᤁᤖ ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤡᤃᤪ ᤋᤠ᤹ᤍᤡ ᤛᤧᤵᤔᤠᤱ ᤁᤧᤔᤠᤰᤐᤧᤴ ᤛᤧᤵᤔᤠᤀᤣ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤕᤥᤰ ᤁᤧᤶᤈᤥᤃᤡᤒᤠ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠᤀᤠᤱ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤁᤧᤒᤡᤖᤡᤒᤠ ᤗᤠᤶᤔᤥᤗᤠᤶ ᤂᤡᤏᤡ᤹ ᤜᤢᤔᤠ ᤐᤱᤔᤠᤖᤧ ᤗᤠᤃᤡ ᤂᤧᤸᤗᤧ ᤂᤢᤏᤧ᤹ ᤁᤢᤒᤡᤑᤩᤢᤱ ᤆᤥ᤺ᤰᤔᤠ ᤁᤧᤜᤢᤛᤡ॥ ᤁᤶᤓᤗ᤹ᤖᤡᤰ ᤂᤡᤏᤡ᤹ ᤗᤢᤶᤔᤥᤗᤠᤶ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤧᤳᤋᤠᤶᤔᤧ᤹॥

⁶ ᤂᤡᤏᤡ᤹ ᤀᤠᤵᤑᤣᤰ ᤑᤢ᤹ᤏᤢᤛᤠ᤹. ᤂᤡᤏᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹. ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤔᤠ ᤔᤣ᤺ᤳᤜᤠ᤹ ᤀᤡᤃᤪ ᤏᤡ᤺ᤳᤋᤠᤱᤒᤠ ᤋᤧ᤺ᤱᤈᤢᤶᤜᤠ᤹ᤖᤧᤀᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤗᤠᤶ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤛᤡᤶᤔᤡᤴᤒᤠ ᤘᤣ᤹ ᤔᤠᤱᤜᤠ᤹ ᤔᤠᤱᤛᤧᤘᤠ ᤔᤧᤳᤋᤢᤶᤛᤡᤶ᤹ ᤑᤠ᤹ᤀᤠᤱ ᤂᤡᤏᤡ᤹ ᤛᤫᤠ᤺ᤳ ᤁᤧᤶᤗᤧᤔᤡᤏᤧᤓᤃᤪ—

⁷ ᤂᤡᤏᤡ᤹ ᤁᤒᤪᤡᤱ ᤐᤡᤛᤠᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡ᤺ᤳᤋᤠᤱᤒᤠ ᤔᤠᤱᤛᤡᤛᤠᤱ ᤔᤠ᤺ᤱᤄᤠᤒᤠᤛᤡᤛᤠᤱ. ᤗᤠᤈᤣ᤺ᤸᤗᤧ ᤗᤳᤇᤠ ᤁᤢᤕᤠᤀᤥᤒᤠ ᤐᤥᤱᤛᤠᤱ ᤁᤡᤃᤪ ᤘᤣ᤹ ᤁᤢᤕᤠᤀᤥᤒᤠ ᤐᤥᤱᤛᤠᤱ—

⁸ ᤂᤧᤴ ᤀᤡᤱᤗᤧᤰᤛᤫᤠᤒᤧᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹. ᤂᤧᤴ ᤔᤧᤍᤡᤶᤍᤧᤶᤔᤡᤴᤏᤧ᤹॥ ᤐᤖᤢᤔᤠᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤁᤣ. ᤔᤧᤶᤔᤠ᤹ᤀᤣ ᤀᤡᤃᤪ ᤔᤧᤴᤇᤧ᤺ᤵᤐᤣ

⁹ ᤂᤡᤏᤡ᤹ ᤂᤧᤴ ᤛᤧᤰᤂᤠᤛᤠᤱ ᤁᤧᤛᤧᤖᤢᤶᤗᤀᤣ ᤐᤥᤱ᤹॥ ᤂᤧᤏᤧ᤹ᤀᤣ ᤋᤃᤡ ᤂᤧᤴ ᤔᤏᤠᤴ ᤗᤢᤱᤅᤡᤸᤗᤧ ᤗᤧᤵᤋᤧ᤹ ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧᤀᤠᤱ ᤗᤢᤱᤅᤡᤸᤗᤧ ᤔᤧᤗᤧᤵᤋᤢᤖ॥

¹⁰ ᤂᤡᤏᤡ᤹ ᤂᤧᤴ ᤜᤍ᤹ ᤛᤡᤖ ᤌᤠᤖᤡᤰ ᤗᤢᤱᤅᤡᤸᤗᤧ ᤗᤧᤵᤋᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤥᤰ ᤗᤠᤈᤣ᤹ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤧᤸᤗᤧ ᤂᤡᤏᤡ᤹ ᤗᤠᤶᤓᤥ᤺ᤵᤔᤠ ᤁᤧᤃᤥ᤺ᤳᤋᤡ॥

¹¹ ᤁᤶᤓᤗ᤹ᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤔᤧᤃᤡᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠᤶᤔᤥ ᤜᤠ᤺ᤳᤗᤧᤀᤠᤱ ᤔᤧᤈᤥᤃᤢᤴ᤹॥

¹² ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤱᤔᤠᤖᤧ ᤗᤠᤃᤡ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤁᤢᤓᤠ ᤕᤧᤰᤕᤰᤁᤥ

¹³ ᤁᤢᤓᤠ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤏᤠᤜᤠ᤹ ᤔᤧᤕᤧᤶᤛᤡᤱᤅᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ “ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤔᤠᤱᤜᤠ᤹ ᤔᤠᤱᤛᤧᤘᤠ ᤔᤧᤳᤋᤢᤶᤛᤡᤶ” ᤔᤧᤔᤧᤳᤋᤢᤛᤡᤀᤠᤱ ᤔᤧᤜᤢᤛᤢᤛᤡᤒᤠ ᤂᤡᤏᤡ᤹ ᤁᤧᤄᤧᤵᤛᤢᤶᤏᤧᤓᤃᤪ.

¹⁴ ᤛᤣ᤺ᤴᤍᤥᤛᤧᤶᤛᤧ᤹. ᤜᤰᤛᤠᤶᤔᤧ᤹ ᤁᤥ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤛᤠ᤹ᤖᤠᤶᤔᤧ᤹. ᤂᤧᤶᤒᤩᤠᤱ ᤜᤧᤰᤋᤱᤒᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤂᤡᤏᤡ᤹ ᤗᤢᤶᤔᤥ ᤛᤧᤰᤂᤠᤀᤣ ᤐᤥ᤺ᤰᤂᤧᤒᤠᤏᤧᤓᤃᤪ.

¹⁵ ᤂᤡᤏᤡ᤹ ᤂᤧᤴ ᤕᤧᤰᤕᤰᤁᤥ ᤁᤧᤕᤢᤱᤒᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤐᤡᤳᤌᤰᤛᤠᤜᤠ᤹ ᤋᤠᤓᤣ᤺ᤸᤗᤧ ᤆᤩᤧᤵᤋᤧᤶ ᤛᤧᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤘᤖᤧᤱᤗᤧᤱ ᤔᤧᤰᤂᤧᤶᤔᤧ᤹॥

¹⁶ ᤂᤧᤵᤔᤥᤒᤠ ᤁᤧᤖᤧᤰ ᤛᤠᤔᤠᤐᤢᤔᤠᤜᤠ᤹ᤀᤠᤱ ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥ ᤑᤢᤰᤂᤧᤶᤔᤧ᤹ᤀᤠᤱ ᤂᤧᤴ ᤕᤧᤰᤕᤰᤁᤡᤴ ᤏᤢ ᤛᤠᤔᤠᤐᤢᤔᤠᤜᤠ᤹ ᤛᤥᤛᤥᤖᤡᤰ ᤂᤠᤵᤐᤢᤌᤩ᤺ᤱ ᤔᤡᤎᤡᤰᤂᤧᤶᤍᤣᤛᤧᤶᤔᤧ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤐᤥᤱ᤹॥ ᤂᤧᤴ ᤛᤍᤠᤍᤡᤱᤗᤧ ᤗᤠᤃᤡ ᤂᤠᤵᤐᤢᤌᤩ᤺ᤱ ᤐᤥᤱᤗ ᤜᤧᤰᤁᤩᤠᤱ ᤂᤧᤴ ᤕᤠᤶᤔᤥ ᤔᤧᤴᤈᤥᤃᤢᤴᤗ॥

¹⁷ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠᤖᤧ ᤗᤠᤃᤡ ᤛᤧᤶᤔᤏᤠᤒᤠ ᤌᤧᤔᤠ ᤐᤠ᤺ᤴᤜᤠ᤹ᤀᤠᤱ ᤂᤡᤏᤡ᤹ ᤔᤧᤍᤣ᤹ᤖᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤁᤢᤛ᤻ᤛᤠᤰᤁᤧᤴᤏᤡᤴ ᤆᤡᤵᤋᤢ᤹॥ ᤂᤢᤏᤧ᤹ ᤂᤡᤏᤡ᤹ ᤗᤢᤱᤃᤢᤶ ᤀᤥ᤺ᤴᤃᤧᤎᤠᤰᤋᤡ᤹ ᤜᤧᤰᤁᤩᤠᤱ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤁᤢᤔᤠᤱᤜᤢᤵ ᤀᤡᤛᤡ᤺ᤰ ᤂᤢᤏᤧ᤹ ᤂᤡᤏᤡ᤹ ᤕᤖᤡᤰ ᤁᤧᤓᤥᤛᤡ᤹.

¹⁸ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠᤴ ᤁᤧᤄᤧᤶᤒᤠ ᤁᤧᤒᤥ᤺ᤰᤂᤡᤀᤠᤱ ᤀᤠᤀᤡᤴ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤗ ᤐᤳᤋᤠᤒᤠ ᤀᤠᤀᤡᤱᤈᤠᤱ ᤁᤢᤀᤡᤛᤡᤰ ᤂᤢᤏᤧ᤹ ᤁᤧᤖᤧᤰ ᤁᤢᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤰᤛᤠᤀᤥ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤗᤥ॥