ᤛᤠᤶᤕᤥᤌᤡᤶ ᤀᤡᤱ 12 - LIFOTNTᤗᤳᤇᤠᤖᤰ ᤔᤠᤱᤛᤧᤘᤠ ᤆᤥ᤺ᤰᤔᤠᤍᤧᤴ 1 ᤂᤡᤏᤡ᤹ ᤐᤠᤎᤧᤜᤠ᤹ᤖᤧ ᤂᤢᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤜᤡᤱᤜᤡᤱ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤒᤥᤱᤒᤠ ᤌᤡᤶᤜᤠ᤹ ᤏᤢ ᤛᤠᤶᤕᤥᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ 2 ᤂᤡᤏᤡ᤹ ᤕᤢᤰᤁᤥ ᤋᤠ᤺ᤵᤔᤠ ᤁᤧᤈᤥᤃᤢᤶᤛᤡᤶᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤁᤣ᤺ᤶᤒᤠ ᤁᤥ᤺ᤰᤔᤠ ᤏᤢ ᤌᤧᤃᤢ ᤔᤠᤱᤘᤠᤀᤥ ᤁᤧᤏᤧᤒᤠ ᤂᤢᤴᤇᤡ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤒᤠᤍᤧᤴᤜᤠ᤹ ᤏᤢ ᤜᤢᤶᤒᤧᤳ ᤁᤢᤒᤥᤖᤠᤰ ᤁᤧᤛᤧᤒᤠ ᤛᤡᤱᤒᤢᤱ ᤛᤡᤃᤠᤱᤒᤠ ᤁᤧᤖᤧᤰ ᤋᤧᤴᤜᤠ᤹ ᤂᤡᤏᤡ᤹ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤆᤥᤃᤧᤶᤔᤧ᤹॥ 3 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤜᤧᤖᤧᤶ ᤐᤡᤖᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤢᤳᤌᤥᤒᤠ ᤗᤢᤱᤜᤠ᤹ ᤑᤕ᤺ᤵᤑᤕ᤺ᤵ ᤕ᤺ᤵᤛᤧᤶ ᤐᤡᤖᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤛᤣᤖᤠ ᤔᤠᤱᤅᤡᤸᤗᤧ ᤁᤢᤛᤡᤳᤗᤠᤱᤜᤠ᤹ ᤔᤡᤀᤥ ᤜᤠ᤺ᤴᤍᤠᤶᤍᤧᤛᤧᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤛᤥ᤺ᤴᤍᤧᤶ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤋᤧᤴᤜᤠ᤹ᤗᤠᤶ ᤂᤢᤴᤇᤡ᤹ ᤔᤡᤱ ᤔᤠᤛᤧᤶ ᤐᤡᤖᤧᤶᤛᤡᤶᤔᤧ᤹॥ 4 ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤐᤖᤡᤰᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤔᤧᤳᤋᤧᤶᤔᤡᤴᤏᤧ᤹॥ 5 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤡᤱ ᤕᤢᤱᤔᤠ ᤏᤢ ᤂᤢᤏᤧ᤹ ᤀᤠᤵᤑᤣᤰ ᤕᤠᤱᤎᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤧᤖᤧᤰ ᤌᤠ᤺ᤰᤜᤠ᤹ᤀᤥᤗᤠᤶᤒᤠ ᤗᤳᤇᤠ ᤋᤧᤴᤎᤡᤰ ᤛᤣᤃᤢ᤹॥ ᤂᤡᤏᤡ᤹ ᤀᤠᤶᤓᤠ ᤂᤧᤴ ᤋᤧᤴᤏᤥ ᤐᤣᤃᤧᤶᤔᤧ᤹॥ 6 ᤜᤠᤒᤠ ᤂᤧᤵᤔᤥᤀᤣ ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤛᤡᤍᤢᤱᤈᤓᤠ. ᤌᤡᤒᤥᤱᤗᤰ ᤏᤢ ᤔᤧᤴᤍᤥ᤺ᤴᤏᤣ ᤔᤧᤶᤒᤥᤱᤔᤏᤠᤒᤠ ᤜᤢᤰᤘᤠ. ᤔᤠᤱᤜᤢᤵ ᤁᤧᤈᤥᤃᤢᤶᤒᤠ ᤛᤡᤍᤢᤱᤈᤓᤠ. ᤀᤠᤵᤑᤣᤰ ᤏᤡᤱᤘᤠ᤹ᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ. ᤜᤧᤰᤁᤩᤠᤱ ᤐᤡᤳᤌᤰᤛᤠ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤥᤒᤠ ᤋᤃᤡ ᤁᤧᤎᤠᤵᤐᤠ ᤌᤰᤛᤠᤜᤠ᤹ ᤋᤠᤖᤧᤶᤛᤧ᤹॥ 7 ᤀᤠᤶᤓᤠ ᤂᤧᤵᤔᤥᤀᤣ ᤂᤡᤏᤡ᤹ ᤏᤢ ᤂᤡᤏᤡ᤹ ᤜᤡᤶᤛᤕᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤈᤠᤶ ᤁᤧᤎᤢᤅᤢᤶ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤁᤧᤛ᤺ᤳᤋᤡ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤀᤠᤱ ᤘᤠ᤹॥ 8 ᤀᤠᤀᤡᤴ ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤵᤑᤣᤰ ᤔᤡᤰᤛᤠᤀᤥ ᤁᤢᤍᤥ᤺ᤵᤔᤠ ᤀᤠᤗᤣ᤺ᤳᤋᤢᤶᤒᤠ ᤔᤠᤱᤛᤧᤘᤠ ᤆᤥ᤺ᤰᤔᤏᤠ ᤜᤧᤰᤋᤱᤒᤠ ᤐᤠᤴ ᤂᤧᤵᤔᤥ ᤔᤧᤈᤥᤃᤧᤶᤔᤡᤴᤏᤧ᤹. 9 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤠ᤺ᤶᤛᤡᤱᤔᤠᤍᤧᤴ ᤏᤢ ᤗᤰᤂᤥᤔᤠ ᤐᤡᤔᤠ ᤁᤧᤈᤥᤃᤡᤀᤠᤱ ᤏᤧᤖᤥ. ᤂᤧᤵᤔᤥ ᤀᤠᤸᤗᤛᤠᤱ ᤂᤡᤏᤡ᤹ ᤔᤧᤱᤃᤧᤳᤋᤣ ᤁᤧᤘᤕᤡ᤹॥ 10 ᤁᤖ ᤕᤷᤍᤏ ᤘᤜ᤺ᤱᤅᤡᤴ ᤏᤠᤎᤠ᤺ᤶᤒᤡ ᤁᤧᤃᤠ᤺ᤰᤋᤢᤶᤔᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣᤴ ᤁᤧᤕᤢᤰᤋᤢᤶᤔᤠᤱ ᤂᤧᤵᤔᤥ ᤁᤧᤕᤢᤅᤡ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤋᤠᤵᤌᤣᤰ ᤕᤠᤶᤎᤣᤰ ᤁᤧᤕᤢᤰᤂᤡᤀᤠᤱ ᤁᤧᤖᤧᤰ ᤐᤡᤛᤠᤱᤒᤠ ᤏᤡᤱᤔᤡᤜᤠ᤹ᤗᤠᤶ ᤂᤡᤏᤡ᤹ ᤏᤠ᤺ᤶᤛᤡᤱᤔᤠ ᤁᤧᤒᤡᤖᤡ᤹॥ 11 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤣᤰ ᤁᤢᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤣᤃᤢᤒᤠ ᤋᤧᤴᤏᤥ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤀᤡᤱᤈᤠᤱ ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹. ᤂᤡᤏᤡ᤹ ᤌᤡᤒᤥᤱᤗᤰ. ᤋᤥ᤺ᤶᤔᤠᤀᤣ ᤁᤧᤒᤥᤱᤒᤠ ᤜᤢᤰᤘᤠᤜᤠ᤹ ᤏᤢ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤠᤱᤜᤢᤵ ᤁᤧᤈᤥᤃᤢᤶᤒᤠ ᤏᤢ᤺ᤒ᤻ᤏᤢᤒᤠ ᤐᤠ᤺ᤴᤜᤠ᤹ ᤋᤠᤖᤧᤶᤔᤧ᤹॥ 12 ᤜᤧᤰᤁᤩᤠᤱ ᤂᤡᤏᤡ᤹. ᤂᤡᤏᤡ᤹ ᤛᤠᤜᤠ᤹. ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤏᤢ ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤀᤠᤵᤑᤣᤰ ᤂᤢᤴᤇᤡ᤹ ᤗᤰ ᤏᤢ ᤗᤠᤈᤣ᤹ᤛᤡᤱᤒᤢᤱ ᤔᤧᤱᤃᤵᤔᤏᤠᤒᤠ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤥᤛᤥᤳᤗᤖᤠᤱ ᤆᤥᤃᤧᤶᤔᤧ᤹॥ 13 ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤘᤕᤧᤶᤔᤧ᤹॥ ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤆᤩᤠᤈᤩᤠ ᤂᤡᤏᤡ᤹ ᤛᤡᤖᤠ᤹ᤃᤧᤎᤠᤱᤒᤠᤍᤧᤴᤏᤥ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥ 14 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤌᤠ᤺ᤰᤁᤥᤗᤠᤶ ᤛᤣᤃᤢᤒᤠᤍᤧᤴᤏᤥᤖᤰ ᤋᤥ᤺ᤴᤍᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤡᤱᤗ ᤐᤳᤋᤠᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤀᤠᤱ ᤂᤧᤵᤔᤥ ᤆᤥᤃᤧᤶᤔᤧ᤹॥ 15 ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤢᤀᤡᤛᤡᤰ ᤂᤡᤏᤡ᤹ ᤀᤠᤳᤋᤡᤴ ᤕᤧᤰᤕᤰᤁᤥᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤕᤠᤖᤡᤰ ᤂᤡᤏᤡ᤹ ᤛᤢᤳᤌᤥ ᤌᤰᤛᤠᤜᤠ᤹ ᤛᤧᤵᤔᤠᤛᤡᤀᤠᤱ ᤆᤠᤔᤠ ᤁᤧᤛᤢᤰᤋᤢᤶ᤹॥ ᤛᤩᤠ᤺ᤰᤐᤠ ᤏᤢ ᤐᤧ᤺ᤱᤘᤠ ᤛᤠ ᤁᤧᤈᤠᤶᤒᤠ ᤁᤢᤀᤡᤛᤡᤰ. ᤌᤡᤶ ᤁᤧᤳᤗ ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤀᤠᤳᤋᤡᤴ ᤔᤏᤠ᤺ᤸᤗᤧᤛᤠᤱ ᤂᤧᤴ ᤆᤠᤔᤠ ᤛᤢᤰᤋᤢ᤹॥ 16 ᤔᤠᤰᤂᤡᤴᤗᤰ ᤔᤧᤈᤠᤶᤔᤡᤴᤏᤧ᤹॥ ᤂᤧᤴ ᤆᤫᤠ᤺ᤳ ᤁᤢᤀᤡᤛᤡᤰ ᤂᤠᤶᤒᤠᤱᤅᤥ ᤜᤢᤰᤂᤧᤶᤍᤣᤛᤧᤶᤔᤧ᤹॥ 17 ᤂᤡᤏᤡ᤹ ᤀᤠᤵᤑᤣᤰ ᤕᤧᤰᤕᤰᤁᤥ ᤐᤥᤃᤢᤃᤧᤴ ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤏᤡ᤺ᤱᤃᤣ᤺ᤸᤗᤧ ᤌᤡᤒᤥᤱᤗᤰ. ᤀᤡᤃᤪ ᤐᤡᤳᤌᤰᤛᤠ ᤁᤡᤃᤪ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤗᤠᤶ ᤋᤃᤡ ᤁᤧᤎᤠᤵᤐᤠ ᤌᤰᤛᤠ. ᤀᤡᤃᤪ ᤔᤠᤱᤜᤢᤵ ᤁᤧᤈᤥᤃᤢᤶᤒᤠ ᤁᤢᤓᤠ ᤐᤠᤴ ᤁᤡᤃᤪ ᤀᤠᤵᤑᤣᤰ ᤏᤡᤱᤘᤠ᤹ᤀᤥᤒᤠ ᤛᤡᤍᤢᤱᤈᤓᤠ ᤀᤡᤃᤪ ᤋᤥ᤺ᤶᤔᤠᤀᤣ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤴ ᤂᤡᤏᤡ᤹ ᤀᤠᤵᤑᤣᤰ ᤕᤧᤰᤕᤰᤁᤥ ᤔᤧᤈᤠᤶᤔᤡᤴᤏᤧ᤹॥ 18 ᤐᤖᤢᤔᤠᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠᤍᤧᤴᤏᤥ ᤂᤢᤏᤧ᤹ ᤁᤢᤍᤃᤡ ᤂᤡᤏᤡ᤹. ᤂᤡᤏᤡ᤹ ᤛᤠᤜᤠ᤹. ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤏᤢ ᤂᤡᤏᤡ᤹ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤧᤱᤜᤠ᤹ ᤆᤧᤶᤔᤧ᤹. ᤂᤧᤒᤩᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤥᤛᤥᤳᤗᤖᤠᤱ ᤆᤥᤃᤧᤶᤔᤧ᤹॥ 19 ᤛᤡᤱᤛᤡᤱ ᤕᤧᤰᤕᤧᤰ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤗᤠᤈᤣ᤹ᤀᤥ ᤁᤧᤘᤕᤡᤖ ᤌᤠᤖᤡᤰ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤐᤧᤸᤗᤧᤱ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹॥ 20 ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤁᤢᤀᤡᤛᤡᤰ ᤂᤡᤏᤡ᤹ ᤀᤡ᤺ᤴᤍᤥᤴ ᤑᤥᤛᤢ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤠ ᤆᤠᤶᤒᤧᤃᤥ ᤁᤧᤗ᤹ᤖᤡᤀᤠᤱ ᤀᤰᤂᤣ ᤁᤧᤒᤠ᤺ᤳᤋᤢᤶ᤹. “ᤀᤠᤏᤡᤃᤣ ᤛᤠ ᤆᤠᤶᤒᤧ.” ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤆᤠᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤕᤠᤖᤡᤰ ᤆᤧᤶᤔᤧ᤹॥ 21 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤣᤰ ᤁᤢᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤗᤳᤇᤠ ᤋᤧᤴ ᤂᤢᤏᤧ᤹ ᤛᤣᤃᤢ᤹. ᤂᤧᤴ ᤔᤠ᤺ᤱᤏᤧᤓᤃᤪ. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤐᤡᤳᤌᤰᤛᤠ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤛᤧᤖᤧᤶᤛᤡᤶᤔᤧ᤹. ᤂᤧᤒᤩᤠᤱ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤡᤱᤒᤠ ᤁᤢᤀᤡᤛᤡᤰ ᤀᤠᤵᤑᤣᤰ ᤕᤧᤰᤕᤰᤁᤥ ᤆᤠᤜᤠ ᤁᤧᤈᤥᤃᤡᤒᤠ ᤕᤠᤖᤡᤰ ᤆᤧᤶᤔᤧ᤹॥ 22 ᤛᤩᤠ᤺ᤰᤐᤠ ᤀᤡᤃᤪ ᤐᤧ᤺ᤱᤘᤠ ᤁᤧᤈᤠᤶᤒᤠ ᤀᤡᤛᤡ᤺ᤰ ᤂᤧᤱᤜᤠ᤹ᤀᤠᤱ ᤆᤧᤶᤔᤧ᤹—ᤌᤡᤶ ᤁᤧᤳᤗ ᤛᤢᤳᤌᤥ ᤀᤡᤃᤪ ᤀᤠᤛᤢᤳᤌᤥ ᤔᤏᤠ ᤜᤠ᤺ᤳᤗᤧᤛᤠᤱ ᤂᤧᤴ ᤆᤠᤔᤠ ᤛᤢᤰᤋᤢ᤹॥ 23 ᤔᤠᤰᤂᤡ᤹ᤀᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤈᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤔᤠᤰᤂᤡᤱᤃ ᤜᤡᤱᤔᤴᤗᤥ. ᤜᤧᤰᤁᤩᤠᤱ ᤛᤠ᤺ᤴᤏᤢ ᤛᤥᤖᤡᤰ ᤜᤡᤱᤔᤴ ᤆᤠᤔᤠ ᤔᤧᤏᤢ᤹ᤏᤧᤴ॥ 24 ᤂᤡᤏᤡ᤹ ᤂᤧᤴ ᤔᤠᤰᤂᤡᤴ ᤆᤠᤔᤠ ᤔᤧᤏᤢ᤹ᤏᤧᤴ॥ ᤆᤫᤠ᤺ᤳ ᤜᤧᤰᤁᤣ ᤂᤧᤴ ᤂᤠᤶᤒᤠᤱᤅᤥ ᤜᤢᤰᤂᤧᤶᤍᤣᤛᤧᤶᤔᤧ᤹॥ 25 ᤂᤡᤏᤡ᤹ ᤂᤧᤴ ᤔᤧᤈᤠᤶᤔᤧᤴᤏᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤰᤛᤠᤀᤥ ᤌᤣ᤺ᤴ ᤁᤢᤍᤥ᤺ᤵᤔᤠ ᤘᤠ᤹ ᤂᤧᤴ ᤂᤡᤏᤡ᤹ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤢ ᤂᤡᤏᤡ᤹ ᤕᤠᤱᤛᤡᤒᤠ ᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤏᤢ᤹ᤔᤧᤍᤠᤖ॥ 26 ᤂᤡᤏᤡ᤹ ᤁᤧᤍᤥ᤺ᤴᤍᤢᤶᤒᤠ ᤜᤢᤰᤘᤠᤜᤠ᤹ ᤏᤢ ᤔᤠᤱᤜᤢᤵ ᤁᤧᤈᤥᤃᤢᤶᤒᤠ ᤛᤡᤍᤢᤱᤈᤓᤠᤜᤠ᤹ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠᤍᤧᤴᤏᤥ ᤐᤣᤃᤧᤶᤔᤧ᤹॥ 27 ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤛᤠᤜᤠ᤹ ᤏᤢ ᤔᤠᤰᤂᤡᤴ ᤏᤧᤵᤔᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤥ᤺ᤴᤍᤧᤶᤔᤧ᤹॥ ᤛᤡᤍᤢᤱᤈᤓᤠ ᤔᤠᤰᤂᤡᤴ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤁᤧᤜᤢᤰᤂᤢᤶ ᤁᤧᤍᤣᤛᤢᤶᤗ ᤐᤥᤱ᤹॥ ᤛᤠᤴ ᤆᤠᤀᤣ ᤂᤡᤏᤡ᤹ ᤆᤠᤔᤠ ᤁᤧᤛᤢᤰᤋᤢᤶ᤹॥ 28 ᤀᤠᤱᤃᤠ᤹ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤗ ᤐᤳᤋᤠᤒᤠ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤰᤛᤠᤀᤥ ᤌᤣ᤺ᤴ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤆᤥᤰ ᤂᤧᤴ ᤂᤡᤏᤡ᤹ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤢ ᤕᤠᤱᤛᤡᤒᤠ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤏᤢ᤹ᤔᤧᤍᤠᤖᤖᤥ॥ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤵᤔᤠᤛᤡ ᤔᤧᤏᤢ᤹ᤏᤧᤴ 29 ᤂᤡᤏᤡ᤹ ᤋᤧᤴᤎᤱ ᤁᤧᤈᤥᤃᤡᤀᤠᤱ ᤏᤠ᤺ᤵᤔᤠᤍᤣᤔᤠ ᤁᤧᤈᤥᤃᤢᤶᤛᤡᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤂᤡᤏᤡ᤹ ᤋᤃᤠᤱᤅᤣ ᤔᤧᤰᤂᤢᤛᤡ᤹॥ ᤁᤖ ᤂᤧᤱᤜᤠ᤹ ᤁᤧᤏᤠ᤺ᤳᤋᤢᤶ ᤁᤧᤍᤣᤛᤢᤶᤛᤡᤶᤔᤠᤱ ᤀᤠᤸᤗ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤁᤧᤕᤢᤅᤡ᤹. 30 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤕᤢᤅᤧᤶᤔᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤔᤧᤰ ᤔᤧᤈᤢ᤺ᤳᤋᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤰᤌᤡᤶᤔᤥ ᤂᤡᤏᤡ᤹ ᤔᤧᤎᤩᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤀᤰᤂᤣ ᤔᤧᤗ᤹ᤖᤧᤶᤔᤡᤴᤏᤧ᤹. “ᤁᤴ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤛᤠᤶᤔᤠᤱᤜᤠ᤹ ᤀᤠᤰᤂᤣᤗ᤹ᤖᤡᤰᤏᤣ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤒᤣ᥅” ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤛᤠᤶᤔᤠᤱᤜᤠ᤹ᤖᤧ ᤐᤠ᤺ᤴᤏᤥ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤔᤧᤈᤥᤃᤧᤶᤔᤡᤴᤏᤧ᤹॥ ᤀᤠᤏᤡᤃᤧᤀᤠᤱ ᤜᤧᤰᤁᤣᤀᤣ ᤆᤥᤃᤢᤶᤒᤧ ᤔᤧᤗ᤹ᤖᤧᤶᤔᤡᤴᤏᤧ᤹॥ 31 ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤔᤧᤳᤋᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤛᤠᤶᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤁᤧᤖᤧᤰ ᤐᤖᤡᤰᤐᤠ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢ᤹. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤆᤡ᤺ᤳᤋᤢ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤛᤠᤜᤠ᤹ᤀᤠᤱ ᤔᤡᤀᤥ ᤛᤡᤍᤢᤱᤈᤓᤠ ᤔᤧᤈᤥᤃᤢᤛᤡ᤹॥ 32 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤐᤡᤏᤡᤱᤗ ᤐᤳᤋᤠᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹॥ ᤂᤧᤱᤜᤠ᤹ᤀᤥ ᤁᤢᤓᤠ ᤌᤧᤔᤠᤀᤠᤱ ᤔᤧᤕᤥ᤹ᤖᤧᤶᤔᤡᤴᤏᤧ᤹. ᤀᤡᤃᤪ ᤁᤢᤓᤠ ᤌᤧᤔᤠᤀᤠᤱ ᤔᤧᤄᤧ᤺ᤰᤂᤧᤶᤔᤡᤴᤏᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.