ᤛᤠᤶᤕᤥᤌᤡᤶ ᤀᤡᤱ 11 - LIFOTNTᤕᤜᤘᤣ ᤍᤠᤱᤒᤧᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ 1 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶ ᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤠᤱᤜᤠ᤹. ᤁᤢᤀᤡᤱᤍᤳᤜᤠ᤹. ᤁᤢᤎᤡᤶᤜᤠ᤹ ᤏᤢ ᤁᤢᤀᤡᤱᤈᤠᤱᤜᤠ᤹ ᤀᤠᤓᤧᤸᤗᤧᤛᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ 2 ᤀᤠᤀᤡᤴ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤧᤴᤌᤡᤶᤔᤡᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ ᤁᤖ ᤂᤡᤏᤡ᤹ ᤛᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤧᤃᤳᤋᤢ᤹॥ ᤂᤢᤏᤧ᤹ ᤁᤢᤜᤠᤱᤘᤠ ᤁᤢᤔᤠᤱᤘᤠ. ᤂᤢᤏᤧ᤹ ᤔᤢᤰᤛᤠᤶᤒᤠ ᤁᤢᤜᤢᤰᤁᤡᤴ ᤏᤢ ᤛᤴᤇᤢᤒᤠ ᤁᤢᤜᤢᤰᤁᤡᤴ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱᤅᤣ ᤘᤠ᤹॥ 3 ᤔᤡᤛᤪ ᤗᤠᤈᤣ᤹ ᤗᤢᤶᤔᤥ. ᤔᤡᤛᤪᤒᤠ ᤜᤠᤱ ᤑᤠᤖᤥ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤈᤣ᤹ ᤁᤢᤗᤧ᤺ᤶ ᤂᤢᤏᤧ᤹ ᤀᤥᤛᤣ᤺ᤴᤎᤠᤱ ᤆᤥᤃᤢᤒᤠ ᤔᤡᤰᤛᤣᤴ ᤏᤢ ᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱᤅᤣ ᤘᤠ᤹॥ 4 ᤔᤡᤛᤪᤒᤠ ᤌᤰᤛᤢᤒᤠᤜᤠ᤹. ᤀᤴᤜᤠ᤹ ᤏᤢ ᤀᤴᤗᤠᤎᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤏᤠ᤺ᤳᤋᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥᤒᤠ ᤆᤫᤠ᤺ᤳᤋᤥ ᤂᤧᤱᤜᤠ᤹ ᤜᤢᤶᤛᤢᤛᤡᤀᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤔᤧᤰᤂᤢᤛᤡᤒᤠ ᤐᤠ᤺ᤴᤏᤡᤴᤏᤠᤱ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹॥ 5 ᤁᤴ ᤋᤧᤴᤏᤥ ᤂᤡᤏᤡ᤹ ᤔᤧᤱᤃᤧᤳ ᤔᤧᤶᤓᤧᤴᤏᤣ ᤌᤠᤖᤡᤰ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤢᤏᤧ᤹ ᤌᤧᤔᤠ ᤌᤧᤔᤠ ᤆᤥᤃᤢ ᤂᤧᤴ ᤁᤧᤏᤡᤒᤠ ᤂᤡᤏᤡ᤹ ᤛᤠᤜᤠ᤹ ᤔᤣ᤺ᤴ॥ 6 ᤜᤧᤰᤁᤩᤠᤱ ᤂᤠᤶᤒᤠᤱᤅᤡᤴ ᤔᤢᤖᤠᤴ ᤜᤠ ᤔᤧᤵᤔᤏᤠᤒᤠ ᤁᤢᤛᤡᤱ ᤐ᤺ᤰᤂᤧᤀᤠᤱ ᤀᤠᤰᤂᤣᤗ᤹ᤖᤡᤰ ᤖᤢᤒᤣᤏ ᤌᤠ᤺ᤰᤁᤥᤒᤠ ᤀᤣᤗᤡᤀᤠᤒᤖᤧ ᤁᤢᤛ᤻ᤛᤠ ᤍᤠᤋᤠᤏ ᤏᤢ ᤀᤒᤡᤖᤠᤔᤧᤴ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹. ᤛᤠ᤺ᤱᤃᤠᤜᤡᤶᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤛᤥᤛᤥᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤱᤜᤠ᤹ ᤗᤖᤢᤍᤣᤛᤢᤛᤡᤒᤠᤴᤏᤠᤱ ᤂᤡᤏᤡ᤹ᤀᤣ ᤁᤧᤏᤡᤛᤢᤶᤔᤠᤱ ᤘᤠ᤹॥ 7 ᤂᤡᤏᤡ᤹ ᤀᤠᤵᤑᤣᤰ ᤔᤡᤰᤁᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤁᤴ ᤁᤧᤖᤧᤰ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤘᤠ᤹ᤖᤥ॥ ᤔᤠᤱᤜᤢᤵ ᤁᤧᤒᤥᤱᤒᤠ ᤗᤠᤈᤣ᤹ᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ 8 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤀᤡᤴ ᤀᤡᤱᤈᤠᤱ ᤐᤡᤏᤡᤱᤗ ᤐᤳᤋᤠ ᤂᤧᤱᤜᤠ᤹ ᤁᤧᤖᤧᤰ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤕᤷᤍᤏ ᤘᤜ᤺ᤱᤅᤡᤴ ᤁᤠ᤺ᤰᤋᤠᤶᤔᤧ᤹ ᤜᤧᤰᤁᤩᤠᤱ ᤕᤢᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤗᤠᤈᤣᤴ ᤀᤠᤵᤑᤣᤰ ᤗᤠᤈᤣ᤹ ᤆᤥ᤺ᤰᤔᤠ ᤛᤢᤰᤋᤧᤶᤔᤧ᤹॥ 9 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤔᤠᤛᤡ ᤔᤠᤱᤜᤧᤰ ᤆᤥᤃᤢᤒᤠ ᤘᤧᤳᤋᤧᤛᤖᤧ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤌᤠ᤺ᤰ ᤆᤠ᤹ᤖ॥ 10 ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠ ᤁᤧᤈᤥᤃᤢᤶᤒᤠ ᤗᤠᤈᤣᤴ ᤂᤡᤏᤡ᤹ ᤁᤧᤗ᤺ᤴᤍᤡ ᤁᤧᤓᤧᤖᤡᤒᤠ ᤔᤡᤛᤪ ᤗᤠᤈᤣ᤹ ᤜᤧᤰᤋᤱᤒᤠ ᤔᤧᤈᤥᤰᤏᤧᤴ. ᤂᤧᤶᤔᤥᤃ ᤂᤡᤏᤡ᤹ ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤖᤢᤶᤔᤠᤱ ᤏᤢᤎᤡ ᤀᤡᤰᤋᤠᤵᤐᤥ ᤜᤧᤰᤁᤣ ᤗᤠᤱᤅᤡᤸᤗᤧ ᤆᤫᤠ᤺ᤳ ᤁᤧᤛᤠ᤺ᤳᤋᤢᤶ ᤁᤧᤕᤠᤰᤋᤢᤶ॥ 11 ᤁᤖ ᤂᤡᤏᤡ᤹ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤒᤣᤃᤡᤖ ᤁᤧᤒᤳᤇᤡᤒᤠ ᤗᤠᤈᤣ᤺ᤱᤃ ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤏᤧᤏᤧᤒᤠᤍᤧᤴᤏᤥᤒᤠ ᤗᤠᤈᤣ᤹ᤖᤥ. ᤂᤧᤵᤔᤥᤃ ᤋᤠᤱᤛᤠᤱᤒᤥᤒᤠ ᤆᤫᤠ᤺ᤳᤋᤡᤸᤗᤧ ᤂᤠᤶᤒᤣ᤺ᤰᤁᤡᤴ ᤘᤠᤖᤰᤂᤢ᤹॥ 12 ᤂᤧᤴ ᤗᤠᤈᤣᤴ ᤀᤥᤔᤧᤵᤔᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤱᤃ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤆᤥᤃᤢ᤹॥ ᤋᤱᤒᤣ᤺ᤸᤗᤧ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤋᤱᤒᤣ᤺ᤸᤗᤧ ᤁᤢᤏᤢᤵᤔᤠ ᤌᤠᤖᤡᤰᤁᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤖᤡᤰ ᤋᤠᤖᤡᤰᤁᤠᤱ ᤂᤧᤴ ᤀᤥᤔᤧᤳᤋᤢ᤹॥ 13 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤀᤡᤱᤈᤠᤱᤜᤠ᤹ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤡᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤔᤧᤳᤋᤢᤶ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤛᤰᤔᤠ ᤛᤠᤶᤔᤡᤸᤗᤧ ᤁᤢᤛᤧᤘᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤏᤧᤓᤃᤪ. 14 ᤀᤠᤱᤃᤠ᤹ ᤘᤕᤠᤶ ᤁᤢᤀᤡᤛᤡᤰ ᤆᤢᤱᤘᤠ᤺ᤶᤔᤠ ᤏᤢ ᤜᤠᤱᤘᤠ᤺ᤶᤔᤥᤒᤠ ᤘᤜᤡᤳᤜᤠ᤹ ᤌᤠᤛᤢᤖ ᤕᤠ᤺ᤴᤍᤢᤱ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤏᤡ᤺ᤱᤃᤣ᤹ ᤛᤢᤶᤔᤠ ᤁᤧᤛᤢᤰᤋᤢᤶᤗ॥ 15 ᤀᤠᤱᤃᤠ᤹ ᤂᤡᤏᤡ᤹ ᤐᤡᤳ ᤌᤰᤛᤠᤜᤠ᤹ᤖᤧ ᤗᤠᤃᤡᤀᤠᤱ ᤌᤰᤛᤠ ᤆᤠᤖᤠᤶᤔᤠᤍᤧᤴᤏᤥ ᤕᤠᤴ ᤐᤡᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤜᤠ ᤁᤧᤈᤥᤃᤡᤒᤠ ᤁᤧᤖᤧᤰ ᤁᤢᤈᤠᤜᤠ᤹ ᤂᤡᤏᤡ᤹ ᤁᤧᤄᤥᤛᤢᤶ᤹॥ 16 ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤁᤧᤔᤧᤳᤋᤠᤛᤡᤀᤠᤱ ᤘᤣ᤹ ᤔᤠᤱᤛᤠᤶᤔᤠᤱᤜᤠ᤹ ᤛᤧᤘᤠ ᤏᤢ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤛᤡᤶᤒᤡᤗᤠ. 17 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤌᤠᤖᤥ. ᤂᤧᤒᤩᤠᤱ ᤘᤜᤡᤳ ᤔᤧᤎᤠᤏᤧᤴᤗ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤁᤥ ᤐᤥᤃᤢᤃᤧᤴ ᤁᤢᤈᤠ ᤔᤧᤎᤥ᤺ᤰᤏᤧᤴᤗ ᤑᤠ᤹ᤀᤠᤱ ᤂᤢᤏᤧ᤹ ᤋᤠᤱᤛᤠᤱᤒᤥᤒᤠ ᤘᤃᤣ᤺ᤱᤔᤠᤴᤏᤣ ᤛᤠᤰᤋᤢ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤂᤧᤴ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤜᤠᤖᤠᤀᤣ ᤁᤧᤔᤧᤃᤡ ᤁᤧᤔᤠᤖᤡ᤹॥ 18 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤴ ᤀᤠᤒᤠ᤺ᤴᤈᤠ᤺ᤰᤜᤠ᤹ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤏᤢ ᤛᤡᤰᤗᤢᤱᤔᤠ᤹ᤀᤥ ᤕᤢᤰᤂᤧᤶᤔᤧ᤹॥ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤜᤠ᤹ᤀᤥ ᤏᤢ ᤋᤫᤠᤒᤥ ᤔᤡᤰᤛᤣᤴ ᤁᤢᤀᤡᤛᤡᤰ ᤂᤣ᤺ᤰᤂᤧᤶᤔᤧ᤹॥ 19 ᤂᤡᤏᤡ᤹ ᤜᤡᤶᤔᤥ ᤁᤧᤘᤕᤡᤸᤗᤧ. ᤗᤠᤶᤔᤥ ᤗᤠᤱᤃᤧᤄᤣᤃᤡᤸᤗᤧ. ᤁᤧᤏᤠ᤺ᤶᤔᤠᤛᤡᤸᤗᤧ ᤏᤢ ᤁᤧᤒᤥᤃᤡᤸᤗᤧ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤇᤢᤶ ᤀᤡᤱᤛᤢᤶ ᤋᤠᤖᤧᤶᤔᤧ᤹ ᤂᤶᤓᤩᤠᤱ ᤂᤡᤏᤡ᤹ ᤛᤠᤜᤠ᤹ ᤜᤢ᤹ᤖᤧᤶᤛᤡᤶᤔᤧ᤹॥ 20 ᤂᤡᤏᤡ᤹ ᤜᤡᤶᤔᤥᤒᤠ ᤗᤠᤶᤎᤣ᤺ᤳᤐᤢᤱ ᤏᤢ ᤔᤠᤗᤠᤶᤎᤣ᤺ᤳᤜᤠ᤹ᤀᤥ ᤂᤧᤱᤜᤠ᤹ ᤛᤠᤵᤋᤧᤶᤔᤧ᤹. 21 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ ᤐᤡᤔᤠᤛᤡ ᤔᤠᤱᤜᤧᤰ ᤆᤥᤃᤢᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤛᤶᤎᤠᤱ ᤋᤠᤱᤛᤠᤱᤒᤧᤴ ᤐᤳᤗ ᤌᤠᤖᤡᤰ ᤂᤢᤏᤡ᤹ ᤌᤠ᤺ᤰ ᤆᤠ᤹ᤖ॥ 22 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ. ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤏᤢ ᤂᤢᤏᤧ᤹ᤀᤥ ᤂᤡᤶᤛᤡᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤐᤡᤏᤡᤱᤗ ᤐᤳᤋᤠᤒᤠ ᤁᤴ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ. 23 ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤧᤖᤧᤰ ᤛᤢᤘᤠᤱᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤢᤍᤣᤛᤢᤛᤡ᤹. ᤜᤧᤰᤁᤩᤠᤱ ᤂᤡᤏᤡ᤹ᤏᤢ᤺ᤸᤗᤧ ᤕᤶᤒᤠ ᤏᤢ ᤁᤧᤎᤢᤶᤒᤠ ᤛᤢᤘᤠᤱᤜᤠ᤹ ᤂᤡᤏᤡ᤹ ᤁᤧᤏᤠ᤺ᤴᤍᤢᤶᤛᤡᤶ᤹॥ 24 ᤂᤡᤏᤡ᤹ ᤗᤠᤱᤍᤠᤵᤐᤣᤸᤗᤧ ᤁᤧᤍᤥ᤹ᤖᤢᤶᤒᤠ ᤁᤧᤖᤧᤰ ᤋᤧᤴᤜᤠ᤹ ᤂᤡᤏᤡ᤹ᤀᤡᤴ ᤐᤥᤱ᤹—ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤠᤱᤎᤥ ᤗᤣᤒᤏᤠᤏ ᤌᤠᤖᤡᤰ. ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤘᤜ᤺ᤱ ᤕᤢᤑᤪᤣᤋᤡᤛᤀᤠᤱ ᤁᤳᤏᤠ ᤏᤠᤶᤎᤠ ᤐᤡᤛᤠᤱᤒᤠ ᤗᤢᤶᤒᤠ ᤘᤖ᤺ᤱ ᤌᤠᤖᤡᤰᤁᤣ ᤂᤡᤏᤡ᤹ ᤀᤡ᤺ᤴᤍᤥ ᤐᤥᤱ᤹॥ 25 ᤂᤡᤏᤡ᤹ ᤋᤃᤡ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤎᤖᤢᤴ᤹॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤔᤧᤳᤋᤡᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤀᤠᤳᤋᤠᤴ ᤁᤧᤒᤣᤃᤡᤛᤠᤱ ᤁᤧᤖᤧᤰ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤶᤃᤡᤖᤡᤀᤠᤱ ᤕᤱᤔᤠ ᤔᤧᤛᤡ॥ 26 ᤀᤥᤔᤧᤳᤋᤧᤶᤔᤧ᤹. ᤀᤠᤀᤡᤴ ᤀᤠᤱᤃᤠ᤹ ᤂᤡᤏᤡ᤹ ᤋᤃᤡ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤏᤢ ᤔᤠᤱᤍᤣ ᤛᤠᤱᤃᤪᤠ ᤛᤣ᤺ᤰᤔᤠ ᤛᤢᤕᤧᤶ ᤐᤡᤏᤡᤱᤗ ᤐᤳᤋᤠ॥ 27 ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤗ ᤐᤳᤋᤠᤒᤠ ᤀᤡᤱᤈᤠᤱᤜᤠ᤹ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤄᤥᤛᤢᤶ᤹॥ 28 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤁᤧᤴᤀᤡ᤺ᤳᤋᤢᤶ ᤁᤧᤴᤏᤠ᤺ᤳᤋᤢᤶᤔᤡᤴᤏᤠᤱ ᤂᤡᤏᤡ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤛᤡᤶᤔᤧᤴᤒᤠ ᤔᤠᤱᤜᤠ᤹ ᤁᤧᤍᤡᤶᤍᤢᤶᤛᤡᤶ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤴ ᤀᤡᤱᤈᤠᤱ ᤐᤡᤏᤡᤱᤒᤠ ᤗᤠᤶᤔᤡᤴ ᤁᤧᤗᤧᤖᤢᤶᤏᤧᤓᤃᤪ ᤔᤠᤱᤍᤣ ᤛᤠᤱᤃᤪᤠ᤺ᤸᤗᤧ ᤂᤡᤏᤡ᤹ ᤁᤧᤍᤧᤳᤋᤡ᤹॥ 29 ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤗᤠᤛᤡᤒᤠ ᤗᤠᤈᤣ᤹ᤀᤥ ᤁᤧᤓᤧᤳᤋᤡ᤹. ᤂᤧᤒᤩᤠᤱ ᤂᤡᤏᤡ᤹ ᤔᤢ᤹ᤀᤡᤛᤠᤶᤔᤡᤴ ᤃᤡᤖᤡᤈ᤻ᤈᤡᤔ ᤌᤧᤃᤢ ᤛᤶᤎᤠᤱ ᤜᤧᤰᤁᤩᤠᤱ ᤔᤠᤱᤍᤣ ᤛᤠᤱᤃᤪᤠ᤺ᤴ ᤆᤠᤀᤣ ᤀᤣᤒᤠᤗ ᤌᤧᤃᤢ ᤛᤶᤎᤠᤱ ᤀᤢᤘᤠ ᤆᤥᤃᤧᤶᤔᤧ᤹॥ 30 (ᤀᤥᤔᤧᤳᤋᤧᤶᤔᤧ᤹. ᤁᤴ ᤏᤧᤳᤇᤡ ᤁᤥ᤺ᤰᤔᤠᤜᤠ᤹ ᤕᤷᤍᤏ ᤏᤠᤶᤎᤠ ᤐᤡᤛᤠᤱ. ᤕᤷᤍᤏ ᤏᤧᤏᤧᤒᤠᤍᤧᤴᤏᤥ ᤁᤧᤕᤢᤱᤒᤠ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤕᤢᤱ. ᤃᤡᤗᤃᤠᤗ ᤕᤧᤰᤕᤰ ᤏᤡ᤺ᤳᤋᤠᤱ ᤔᤥᤖᤣᤒᤠ ᤕᤜᤡᤒᤠ ᤛᤡᤱᤒᤢᤱᤗᤠᤶ ᤔᤠ᤺ᤱᤄᤠ ᤔᤧᤈᤥᤰᤏᤧᤴ॥) 31 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤡᤔᤠ ᤁᤧᤀᤡ᤺ᤳᤋᤡᤒᤠ ᤗᤠᤈᤣᤴ ᤕᤢᤰᤔᤠᤖᤧ ᤗᤠᤃᤡ ᤕᤷᤍᤏ ᤏᤠᤎᤠ᤺ᤶᤒᤡ ᤂᤡᤏᤡ᤹ ᤐᤣ᤺ᤰᤔᤠ ᤁᤧᤈᤥᤃᤡ᤹॥ ᤀᤠᤸᤗ ᤂᤧᤴ ᤋᤧᤴᤏᤡᤴ ᤂᤡᤏᤡ᤹ ᤕᤢᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤂᤧᤵᤔᤥ ᤁᤧᤕᤢᤅᤡ ᤁᤧᤃᤖᤡ. 32 ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤐᤡᤏᤡᤱᤒᤠ ᤁᤴ ᤁᤧᤖᤧᤰ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤧᤶᤔᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.