ᤛᤠᤶᤕᤥᤌᤡᤶ ᤀᤡᤱ 10 - LIFOTNTᤔᤥᤛᤠ᤺ᤸᤗᤧ ᤌᤡᤒᤥᤱ ᤀᤡᤱᤈᤠᤱᤅᤡᤴ ᤕᤠᤶᤔᤥ ᤂᤥᤛᤢ ( ᤗᤠ ᥉᥊:᥇-᥇᥆ ) 1 ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤋᤃᤡᤒᤠ ᤜᤧᤰᤁᤣᤀᤣ ᤗᤢᤱᤅᤡᤸᤗᤧᤴ ᤛᤠᤵᤗᤢᤱ ᤏᤧᤳᤇᤡ ᤂᤧᤖᤧ᤹. ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤅᤥ ᤌᤥ᤺ᤰᤛᤡᤱᤅᤧ᤹ᤀᤠᤱ ᤀᤠᤱᤃᤠ᤹ᤀᤥ ᤌᤠᤅᤧ᤹॥ ᤗᤳᤇᤠ ᤛᤡᤱᤅᤡᤸᤗᤧᤴ ᤛᤴᤍᤥᤰ ᤌᤡᤰᤁᤠᤱ ᤆᤥᤃᤧ᤹॥ 2 ᤂᤧᤏᤧ᤹ ᤁᤧᤜᤧᤖᤢᤒᤠ ᤋᤃᤡᤒᤠ ᤛᤠᤵᤗᤢᤱᤅᤥ ᤁᤧᤒᤵᤐᤠ ᤐᤠ᤺ᤴᤈᤠ᤺ᤰᤜᤠ᤹ ᤀᤠᤱᤃᤠ᤹ ᤁᤴ ᤛᤠᤵᤗᤢᤱᤜᤠ᤹ᤀᤥ ᤛᤠᤵᤋᤢᤱ ᤐᤡᤏᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤏᤧ᤹ ᤛᤴᤍᤥᤰᤁᤥ ᤁᤧᤕᤠᤰᤋᤢᤖ ᤐᤥᤱ᤹॥” 3 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤒᤒᤢᤗ ᤛᤡᤱᤅᤡᤸᤗᤧᤴ ᤛᤴᤍᤥᤰ ᤆᤥᤃᤢ. ᤋᤃᤡᤒᤠ ᤜᤧᤰᤋᤱᤒᤠ ᤗᤢᤱᤅᤡᤸᤗᤧᤴ ᤛᤠᤵᤗᤢᤱ ᤏᤧᤳᤇᤡ ᤂᤰᤋᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤋᤠᤏᤠᤶᤛᤠ ᤐᤥᤃᤧ᤹ᤀᤠᤱ ᤛᤡᤏᤤ ᤁᤥ᤺ᤰᤔᤠᤀᤥ ᤌᤥ᤺ᤰᤛᤡᤱ॥ ᤂᤢᤏᤧ᤹ ᤁᤢᤜᤢᤰᤁᤥ ᤂᤧᤴ ᤏᤧᤳᤇᤡ ᤛᤠᤵᤗᤢᤱᤜᤠ᤹ᤀᤠᤱ ᤋᤣ᤹ᤖᤢᤀᤠᤱ ᤐᤣ॥ 4 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤆᤢᤶᤓᤥ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤁᤥ᤺ᤰᤔᤠ ᤑᤠᤱᤈᤱᤅᤥ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤗᤢᤶᤔᤥᤗᤠᤶ ᤂᤡᤏᤡ᤹ ᤁᤧᤒᤡᤖᤡᤒᤠ ᤌᤡᤒᤥᤱ ᤀᤡᤱᤈᤠᤱᤅᤡᤴ ᤋᤃᤡ ᤜᤧᤰᤁᤣᤀᤣ ᤜᤠᤒᤠ ᤂᤧᤴ ᤐᤠ᤺ᤴᤈᤠ᤺ᤰᤜᤠ᤹ ᤂᤧᤴ ᤛᤠᤵᤗᤢᤱᤜᤠ᤹ᤀᤥ ᤛᤠᤵᤋᤢᤀᤠᤱ ᤀᤠᤱᤃᤠ᤹ ᤐᤡᤖᤠᤱ॥ 5 ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤁᤥ᤺ᤰᤔᤠ ᤑᤠᤱᤈᤱᤗᤠᤶ ᤕᤥ ᤌᤠᤛᤡᤱᤅᤠ. ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤖᤠᤱᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤛᤴᤍᤥᤰᤁᤥ ᤂᤧᤴ ᤛᤠᤵᤗᤢᤱᤜᤠ᤹ ᤁᤣ᤺ᤳᤋᤢᤱ. ᤂᤧᤒᤩᤠᤱ ᤀᤠᤸᤗᤥ ᤂᤧᤴ ᤛᤠᤵᤗᤢᤱᤜᤠ᤹ ᤂᤧᤵᤔᤥ ᤕᤠᤰ॥ 6 (ᤀᤡᤛᤪᤀᤡᤗᤡᤜᤠ᤹ ᤕᤠᤁᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤘᤠᤒᤠᤰᤜᤠ᤹ᤀᤥᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤔᤥᤛᤣᤖᤠᤀᤥ ᤔᤧᤃᤧᤖᤧ ᤔᤧᤓᤧᤖᤧ॥ ᤂᤧᤵᤔᤥ ᤜᤠᤖᤢᤏᤧᤴ ᤔᤠᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤔᤧᤈᤡᤰᤂᤢ॥ ᤂᤧᤒᤩᤠᤱ ᤂᤢᤏᤧ᤹ ᤁᤢᤍᤠᤰᤑᤠᤀᤥ ᤁᤢᤛ᤻ᤛᤠ ᤀᤣᤗᤠᤈᤠᤖᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥ 7 ᤂᤧᤵᤔᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤃᤢᤍᤃᤢᤍᤠ ᤌᤠᤖᤡᤰ ᤗᤠᤱᤔᤧᤄᤣᤃᤧ. ᤜᤧᤰᤁᤩᤠᤱ ᤃᤢᤍᤃᤢᤍᤠᤗᤠᤶ ᤘᤜ᤺ᤱᤜᤠ᤹ ᤁᤧᤏᤧᤒᤠ ᤕᤥᤋᤒᤠᤋᤠᤀᤥ ᤔᤧᤒᤣ॥ 8 ᤀᤠᤀᤡᤴ ᤌᤠᤖᤡᤰ ᤁᤧᤒᤥᤱᤒᤠ ᤁᤧᤕᤢᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤐᤱᤔᤠᤖᤧ ᤗᤠᤃᤡ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤧᤵᤔᤠᤀᤠᤱ ᤂᤢᤏᤧ᤹ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤂᤢᤏᤧ᤹ ᤁᤢᤔᤡᤱᤅᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤔᤠᤖᤧ ᤗᤠᤃᤡ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤗᤧᤒᤡ ᤌᤠ᤺ᤰᤁᤡᤴ ᤛᤧᤴᤍᤢ॥ 9 ᤁᤸᤗᤧᤆᤥᤃᤢᤸᤗᤧ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤗᤠᤶ ᤗᤠᤈᤣ᤹ᤛᤡᤱᤒᤢᤱ ᤗᤰ ᤂᤥᤔᤠ ᤀᤡᤃᤪ ᤗᤰᤂᤥᤔᤠ ᤔᤧᤱᤃᤳᤋᤢᤴ᤹॥ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤴᤏᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤗᤰᤗᤥ॥) 10 ᤋᤃᤡᤒᤠ ᤜᤧᤰᤁᤣᤀᤣ. ᤀᤠᤱᤃᤠ᤹ ᤁᤥ᤺ᤰᤔᤠ ᤑᤠᤱᤈᤱᤅᤥ ᤗᤡᤒᤥᤱ ᤕᤧᤴ ᤌᤠᤖᤡᤰ ᤛᤧᤴᤍᤡᤰ ᤗᤧᤴᤍᤡᤰ ᤘᤕᤠᤱ॥ ᤁᤴ ᤗᤠᤶᤒᤠᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤒᤣ᤺ᤸᤗᤡᤴ ᤂᤧᤵᤛᤢ॥ ᤂᤢᤏᤧ᤹ ᤂᤡᤏᤡ᤹ ᤔᤧᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴ॥ 11 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤐᤥᤃᤧ᤹. ᤔᤏᤠᤜᤠ᤹ ᤗᤠᤶᤗᤥᤛᤧᤛᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤐᤡᤏᤡᤱ ᤔᤧᤳᤋᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤔᤧᤗᤠ᤺ᤳᤋᤠᤱ ᤂᤧᤴ ᤗᤠᤈᤣᤴ ᤕᤢᤰ ᤔᤧᤈᤥᤃᤢᤖᤖᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤵᤔᤠ ᤐᤥᤱ᤹ 12 ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤡᤛᤪᤠᤀᤡᤗᤡᤛᤣ. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤗᤠᤶ ᤂᤥᤔᤠ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤜᤠᤒᤠ ᤁᤴᤗᤥ—ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤂᤡᤏᤡ᤹ ᤁᤡᤛᤧᤶᤔᤧ᤹. ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤶᤜᤠ᤹ᤀᤥ ᤗᤠᤱᤄᤣᤃᤧᤶᤔᤧ᤹. ᤂᤢᤏᤧ᤹ ᤔᤡ᤺ᤶᤈᤡ ᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤛᤰᤔᤠ ᤛᤠᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹. 13 ᤜᤧᤰᤁᤩᤠᤱ ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤜᤠ᤹ ᤏᤢ ᤁᤢᤎᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ 14 ᤋᤠᤱᤛᤠᤱᤒᤠᤜᤠ᤹. ᤋᤠᤱᤛᤠᤱᤒᤠᤴᤏᤢ᤺ᤸᤗᤧᤀᤠᤱ ᤌᤠ᤺ᤱᤎᤠᤰᤐᤠ ᤐᤠ᤺ᤴᤜᤠ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤣᤖᤥ॥ 15 ᤜᤧᤰᤁᤣᤛᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤀᤣ ᤂᤢᤏᤧ᤹ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤗ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤡᤛᤢᤶᤒᤠ ᤜᤧᤰᤁᤣᤀᤣ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠ ᤂᤡᤏᤡ᤹ᤀᤣ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡ ᤗᤢᤶᤔᤥᤗᤠᤶ ᤂᤢᤏᤧ᤹ ᤁᤧᤛᤣᤃᤡ॥ 16 ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤜᤷᤍᤥ ᤁᤧᤜᤧᤰᤐᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ 17 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤔᤠᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤜᤘᤣ ᤍᤠᤱᤒᤠ. ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱ. ᤔᤢᤰᤛᤠᤶᤛᤠᤒᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤆᤥᤰᤗᤥ॥ ᤂᤢᤏᤧ᤹ ᤀᤠᤳᤋᤡᤴᤜᤠ᤹ᤀᤠᤱ ᤀᤣ᤺ᤰ ᤐᤀᤣ᤺ᤰ ᤔᤧᤈᤥᤃᤢᤛᤡᤴ᤹. ᤂᤧᤒᤩᤠᤱ ᤂᤢᤏᤧ᤹ ᤀᤠᤵᤑᤠᤸᤗᤧᤀᤠᤱ ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤔᤧᤍᤠ᤺ᤰᤋᤢᤴ᤹॥ 18 ᤂᤢᤏᤧ᤹ ᤕᤧᤳᤇᤠᤒᤠᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤂᤢᤴᤇᤡ᤹ ᤗᤧᤵᤔᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡ᤹. ᤜᤧᤰᤁᤩᤠᤱ ᤘᤧᤵᤔᤡᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ ᤂᤧᤒᤩᤠᤱ ᤂᤢᤏᤧ᤹ ᤁᤢᤈᤠ ᤏᤢ ᤆᤠᤱ ᤐᤡᤖᤢᤛᤡ᤹॥ 19 ᤂᤡᤏᤡ᤹ᤀᤠᤱ ᤔᤡᤛᤪᤀᤥ ᤘᤧᤵᤔᤡᤒᤠ ᤁᤧᤘᤕᤡ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤘᤧᤵᤔᤡᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤐᤥᤱ᤹॥ 20 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧᤶᤔᤧ᤹. ᤂᤢᤏᤧ᤹ ᤁᤢᤛᤧᤘᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹. ᤂᤢᤏᤧ᤹ ᤜᤧᤵᤋᤠᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤔᤠᤱᤁᤧᤜᤧᤰᤁᤠᤛᤡᤸᤗᤧ ᤂᤢᤏᤧ᤹ ᤁᤢᤔᤡᤱᤅᤥᤀᤣ ᤔᤠᤱᤜᤧᤰᤁᤠᤛᤡᤶᤔᤧ᤹॥ 21 ᤂᤢᤏᤧ᤹ᤀᤣ ᤂᤡᤏᤡ᤹ ᤏᤠᤖᤠᤑᤥᤔᤠ ᤗᤠᤶᤗᤥ॥ ᤂᤢᤏᤧ᤹ᤀᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ. ᤂᤢᤏᤧ᤹ᤀᤣ ᤂᤡᤏᤡ᤹ ᤗᤠᤃᤡ ᤂᤡᤏᤡ᤹ ᤔᤡᤰᤁᤡᤸᤗᤧ ᤏᤡᤛᤢᤒᤠ ᤂᤧᤴ ᤐᤕᤶ ᤕᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢ॥ 22 ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤃ ᤏᤢᤒᤥᤱᤖᤰ ᤔᤡᤛᤪ ᤔᤧᤒᤣᤀᤠᤱ ᤔᤧᤘᤕᤧ. ᤁᤖ ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤱᤛᤠᤱᤒᤥᤒᤠ ᤂᤣᤛᤣᤒᤠᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤁᤧᤈᤥᤃᤡᤀᤠᤱ ᤘᤠ᤹ᤖᤥ᥄ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.