ᤍᤠᤏᤡᤀᤧᤗ 9 - LIFOTNTᤍᤠᤏᤡᤀᤧᤗᤖᤧ ᤀᤠᤒᤠᤅᤣ ᤁᤢᤗᤠᤃᤡ ᤋᤢᤘᤠ ᤆᤥᤃᤢ 1 ᤀᤜᤠᤛᤢᤖᤛᤖᤧ ᤁᤢᤛ᤻ᤛᤠ ᤍᤠᤖᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤒᤣᤒᤡᤗᤥᤏᤒᤠ ᤜᤠᤱᤈᤢᤶᤔᤥ ᤕᤢᤰᤛᤠᤒᤠ ᤔᤧᤈᤥᤃᤢ. ᤂᤢᤏᤧ᤹ ᤔᤠᤍᤡ ᤌᤠ᤺ᤰᤁᤥᤒᤠ ᤘᤕᤧ— 2 ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤔᤧᤒᤡᤖᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤛᤠᤶᤕᤥ ᤛᤠᤵᤗᤠᤀᤥᤗᤠᤶ ᤀᤠᤱᤃᤠ᤹ ᤍᤠᤏᤡᤀᤧᤗᤖᤧ ᤕᤖᤢᤛᤗᤧ᤺ᤶᤔᤡᤴ ᤏᤢᤒᤥᤱ ᤋᤱᤒᤣ ᤌᤠᤖᤡᤰ ᤂᤠᤵᤐᤢᤌᤩ᤺ᤱ ᤐᤥᤱ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱ॥ 3 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤋ᤺ᤰᤏᤧᤳ ᤕᤢᤅᤠᤱᤗ ᤛᤠᤃᤡ ᤋᤣᤳ ᤆᤠᤰᤂᤢᤱᤅᤠᤱ ᤂᤠᤵᤐᤢ ᤜᤢ᤺ᤳᤇᤡᤱᤅᤠ ᤜᤧᤰᤁᤩᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤏᤢ ᤐᤣᤗᤡ ᤑᤠᤰᤏᤢ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤏᤢ᤺ᤰᤂᤠᤱ॥ 4 ᤀᤠᤱᤃᤠ᤹ ᤗᤠᤕᤥᤗᤠᤶ ᤜᤡᤴᤍᤠᤱᤗ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤱᤗᤥ— “ᤍᤠᤱᤒᤠᤀᤣ. ᤐᤕᤶ ᤕᤶᤒᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤔᤡ᤺ᤶᤈᤡ ᤁᤧᤔᤧᤵᤐᤠ ᤏᤢ ᤂᤧᤏᤧ᤹ ᤁᤧᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤧᤖᤧᤰᤁᤥ ᤂᤧᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤔᤠᤱᤜᤢᤵᤐᤡᤴ ᤁᤧᤃᤧᤳᤋᤢ᤹. 5 ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧ ᤜᤧᤰᤁᤩᤠᤱ ᤕᤠ᤺ᤶᤒᤰ ᤑᤣ᤺ᤴᤍᤢᤶᤒᤧᤀᤠᤱ ᤘᤕᤡᤃᤧ॥ ᤀᤠᤏᤡᤃᤣ ᤁᤢ᤹ᤀᤡᤃᤧᤓᤧᤶᤒᤠ ᤏᤢ ᤐᤡᤑᤩᤢᤱᤒᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧ. ᤂᤧᤏᤧ᤹ ᤁᤧᤀᤡᤱᤈᤠᤱ ᤏᤢ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ᤗᤠᤶ ᤀᤠᤏᤡᤃᤣ ᤔᤠ᤺ᤱᤄᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧ॥ 6 ᤀᤠᤏᤡᤃᤣ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤔᤧᤒᤡᤖᤢᤶᤒᤧᤴ. ᤂᤧᤏᤧ᤹ ᤁᤧᤔᤡᤱᤅᤥ ᤂᤧᤱᤜᤠ᤹ ᤀᤠᤏᤡᤃᤣ ᤜᤠᤱᤜᤠ᤹. ᤀᤠᤏᤡᤃᤣ ᤕᤢᤰᤛᤠᤒᤠᤜᤠ᤹ ᤏᤢ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤜᤧᤰᤁᤩᤠᤱ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤔᤧᤒᤠᤖᤧᤀᤠᤱ ᤔᤧᤘᤕᤧ॥ 7 “ᤍᤠᤱᤒᤠᤀᤣ. ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥᤰ. ᤁᤖ ᤂᤧᤏᤧ᤹ ᤗᤧᤵᤔᤠᤱ ᤏᤛᤠᤴ ᤗᤧᤱᤔᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤑᤢᤳᤇᤡᤱᤈᤩᤠᤱ ᤁᤧᤒᤥᤱᤒᤠ ᤏᤡ᤺ᤳᤋᤠᤱ ᤏᤢ ᤔᤠ᤺ᤱᤄᤠ ᤁᤧᤕᤢᤱᤒᤠ. ᤀᤠᤏᤡᤃᤣ ᤕᤜᤢᤍᤠᤒᤠ ᤔᤏᤠᤜᤠ᤹ ᤏᤢ ᤕᤖᤢᤛᤗᤧᤔ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤛᤡᤖᤡᤱᤔᤔᤥ ᤌᤩᤧ᤹ᤀᤡᤃᤧᤀᤠᤱ ᤘᤕᤡᤃᤧ॥ 8 ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤜᤠᤱᤜᤠ᤹. ᤀᤠᤏᤡᤃᤣ ᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤛᤡᤖᤡᤱᤔᤔᤥ ᤌᤩᤧ᤹ᤀᤡᤃᤡᤀᤠᤱ ᤘᤕᤡᤃᤧ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤠ᤹॥ 9 ᤀᤠᤏᤡᤃᤣ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤐᤡᤵᤑᤩᤢᤱᤒᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧ. ᤜᤧᤰᤁᤣᤛᤠᤱ ᤀᤠᤏᤡᤃᤣ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤏᤢ ᤗᤧᤵᤔᤡ ᤀᤠᤒᤡᤒᤡᤒᤠ ᤁᤧᤈᤥ᤺ᤰᤗᤥ॥ 10 ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤀᤡᤱᤈᤠ᤺ᤅᤅᤡᤴ ᤀᤠᤏᤡᤃᤣ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤘᤕᤡᤃᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤗᤠᤶᤒᤠ ᤕᤠᤵᤔᤡ ᤁᤧᤒᤡᤖᤧᤒᤠ ᤌᤡᤶᤜᤠ᤹ᤀᤠᤱ ᤀᤠᤏᤡᤃᤣ ᤔᤧᤴᤏᤠ᤺ᤳᤋᤣ ᤔᤧᤴᤍᤡᤶᤔᤣ ᤘᤕᤡᤃᤧ॥ 11 ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤏᤧᤴᤏᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤔᤧᤓᤣ᤺ᤴᤍᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤧᤏᤧ᤹ᤗᤠᤶ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ “ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤰᤔᤢᤖᤠ ᤔᤠᤱᤍᤣᤜᤠ᤹ ᤏᤢ ᤔᤠᤱᤜᤧᤰ ᤏᤡ᤺ᤴᤎᤥ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤛᤶᤎᤠᤱ ᤌᤩᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤠ᤹॥ 12 ᤀᤠᤏᤡᤃᤣ ᤛᤶᤎᤠᤱ ᤕᤶᤒᤠ ᤋᤢᤰᤂᤣ ᤗᤠᤰᤂᤣ ᤁᤧᤍᤠᤖᤢᤀᤠᤱ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤏᤢ ᤀᤠᤏᤡᤃᤣ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤧᤃᤧᤳᤋᤢᤀᤠᤱ ᤘᤠ᤹॥ ᤕᤖᤢᤛᤗᤧ᤺ᤶᤔᤡᤴ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤳᤋᤢᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤋᤠᤱᤛᤠᤱᤒᤧᤸᤗᤧ ᤁᤢᤛᤡᤃᤠᤱ ᤀᤠᤓᤧᤸᤗᤧᤀᤠᤱ ᤔᤧᤴᤈᤥ᤺ᤰᤁᤣ ᤁᤧᤘᤠ᤹॥ 13 ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤢᤀᤡᤛᤡᤰ ᤁᤴ ᤁᤧᤖᤧᤰ ᤋᤢᤰᤂᤣ ᤗᤠᤰᤂᤣᤜᤠ᤹ ᤀᤠᤏᤡᤃᤣ ᤛᤶᤎᤠᤱ ᤌᤩᤧᤀᤠᤱ ᤘᤠ᤹. ᤜᤧᤰᤁᤣᤛᤠᤱ ᤀᤠᤏᤡᤃᤣ ᤗᤠᤕᤥᤗᤠᤶ ᤏᤢ᤺ᤰᤂᤡᤃᤧᤀᤠᤱ ᤂᤧᤏᤧ᤹ ᤁᤧᤛᤧᤰᤂᤠᤴ ᤏᤡᤱᤘᤠ᤹ ᤐᤡᤖᤢᤶᤒᤧᤒᤠ ᤜᤥᤵ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤢᤱᤔᤠ᤹ ᤀᤠᤃᤧᤋᤢᤰᤐᤠ ᤐᤠ᤺ᤴᤏᤡᤴ ᤁᤥ᤺ᤳᤋᤢᤶᤒᤧᤒᤠ ᤜᤥᤵ॥ 14 ᤀᤠᤏᤡᤃᤣ ᤛᤶᤎᤠᤱ ᤋᤢᤰᤂᤣ ᤗᤠᤰᤂᤣ ᤋᤠ᤺ᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤏᤡᤱᤘᤠ᤹ ᤔᤧᤕᤠᤛᤧᤴ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤏᤥ ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥᤰ॥ ᤜᤧᤰᤁᤣᤛᤠᤱ ᤀᤠᤏᤡᤃᤣ ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤀᤡ᤺ᤳᤋᤢᤶᤒᤧ ᤏᤠ᤺ᤳᤋᤢᤶᤒᤧᤒᤠ ᤜᤥᤵ॥ 15 “ᤀᤠᤸᤗ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤀᤠᤵᤑᤣᤰ ᤁᤧᤔᤏᤠᤜᤠ᤹ ᤔᤢᤰᤛᤠᤶᤛᤠᤒᤠ ᤁᤧᤜᤢᤰᤁᤡᤸᤗᤧ ᤔᤡᤛᤪ ᤗᤠᤈᤣ᤹ᤗᤠᤶ ᤁᤧᤎᤧ᤹ᤖᤢᤛᤡᤀᤠᤱ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤂᤧᤏᤧ᤹ ᤁᤧᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱᤒᤠ ᤁᤧᤈᤥᤃᤢᤀᤠᤱ ᤘᤠ᤹. ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤠ᤹. ᤀᤠᤏᤡᤃᤣ ᤕᤠ᤺ᤶᤒᤰ ᤑᤣ᤺ᤴᤍᤢᤶᤒᤧᤀᤠᤱ ᤘᤠ᤹॥ 16 ᤍᤠᤱᤒᤣ. ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤛᤠᤰᤁᤧᤴᤏᤡᤴ ᤏᤢ ᤁᤧᤛᤡᤰ ᤐᤥ᤺ᤰᤔᤠᤴ ᤂᤧᤏᤧ᤹ ᤁᤧᤕᤧᤰᤕᤰ. ᤁᤧᤛᤣᤛᤣ ᤁᤥ᤺ᤰᤔᤠ ᤕᤖᤢᤛᤗᤧᤔᤗᤠᤶ ᤂᤧᤳᤋᤧᤍᤣᤛᤧ᤹ᤀᤥ॥ ᤀᤠᤏᤡᤃᤣ ᤗᤠᤕᤥ ᤏᤢ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤁᤒᤪᤡᤱ ᤐᤡᤛᤠᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤖᤢᤛᤗᤧᤔ ᤏᤢ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥ 17 “ᤀᤠᤸᤗ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤸᤗᤧ ᤆᤥᤃᤢᤒᤠ ᤋᤢᤘᤠᤴ ᤏᤢ ᤁᤢᤒᤣᤗᤡᤴ ᤂᤧᤵᤛᤧ᤹ᤀᤥ॥ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤵᤑᤣᤰ ᤁᤧᤗᤠᤃᤡ ᤔᤢᤖᤧᤰ ᤂᤠᤖᤧᤰ ᤁᤧᤒᤥᤱᤒᤠ ᤛᤣᤛᤣᤍᤧᤴᤏᤡᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ॥ 18 “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤵᤛᤧ᤹ᤀᤥ ᤜᤧᤰᤁᤩᤠᤱ ᤀᤥᤔᤕᤧ᤹ᤀᤥ ᤂᤧᤶᤒᤩᤠᤱ ᤁᤧᤔᤡᤱ ᤁᤧᤍᤡ᤺ᤵᤐᤠ ᤔᤢᤖᤧᤰ ᤂᤠᤖᤧᤰ ᤁᤧᤒᤥᤱᤒᤠ ᤕᤧᤰᤕᤰᤁᤡᤴ ᤀᤥᤔᤧᤳᤋᤧ᤹ᤀᤥ॥ ᤀᤠᤏᤡᤃᤣ ᤛᤠᤶᤕᤥᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤁᤴ ᤐᤣᤗᤡ ᤑᤠᤰᤁᤠᤛᤡᤃᤧᤒᤠ ᤔᤣ᤺ᤴ. ᤁᤖ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤏᤢ᤹ᤒᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤐᤣᤗᤡ ᤑᤠᤰᤁᤠᤛᤡᤃᤧᤒᤠᤖᤥ॥ 19 “ᤍᤠᤱᤒᤠᤀᤣ. ᤂᤧᤵᤛᤧ᤹ᤀᤥ᥄ ᤍᤠᤱᤒᤠᤀᤣ. ᤗᤧᤵᤔᤡ ᤀᤠᤒᤡᤖᤧ᤹ᤀᤥ᥄ ᤍᤠᤱᤒᤠᤀᤣ. ᤏᤡᤱᤘᤠ᤹ ᤐᤡᤖᤧ᤹ᤀᤥ ᤜᤧᤰᤁᤩᤠᤱ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤵᤑᤣᤰ ᤁᤧᤗᤠᤃᤡ ᤔᤧᤛᤢᤛᤧᤴᤏᤣ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤕᤧᤰᤕᤰᤁᤡᤴ ᤁᤧᤔᤡᤱᤅᤥ ᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤧᤔᤡᤱᤅᤥ ᤔᤧᤘᤠ᤹ᤖᤥ॥” ᤃᤠᤒᤪᤡᤀᤣᤗᤖᤧ ᤔᤠᤱᤏᤡᤱᤘᤠ᤹ᤐᤠᤴᤏᤡᤸᤗᤧ ᤁᤢᤒᤣ ᤜᤴᤍᤢ 20 ᤀᤠᤸᤗ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤕᤥ ᤏᤢ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤗᤠᤶ ᤜᤡᤴᤍᤠᤱᤗ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤣᤛᤣ ᤁᤥ᤺ᤰᤔᤠᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤐᤣᤗᤡ ᤑᤠᤰᤋᤢᤱ॥ 21 ᤐᤣᤗᤡ ᤑᤠᤰᤋᤢᤱᤗ ᤕᤠᤃᤠᤱᤅᤡᤸᤗᤧᤀᤣ. ᤀᤠᤱᤃᤠ᤹ ᤋᤃᤡᤒᤠ ᤛᤢᤑᤥᤀᤥ ᤏᤡᤛᤢᤱᤒᤠ ᤃᤒᤪᤡᤀᤣᤗᤧᤴ ᤕᤢ᤺ᤴᤎᤥᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤧᤶᤔᤥ ᤛᤠ᤹ᤖᤡᤰ ᤆᤠᤳᤋᤧᤖ ᤐᤧᤖᤧᤀᤠᤱ ᤀᤠᤱᤃᤠ᤹ᤀᤥ ᤕᤧ॥ 22 ᤂᤢᤏᤧ᤹ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤖᤠᤱᤅᤠᤱ ᤔᤧᤳᤋᤠᤱ. “ᤍᤠᤏᤡᤀᤧᤗᤀᤣ. ᤀᤠᤸᤗᤥ ᤀᤠᤱᤃᤠ᤹ ᤂᤧᤏᤧ᤹ ᤀᤡ᤺ᤳᤇᤡᤱᤛᤠᤶ ᤏᤢ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ ᤐᤡᤛᤧ ᤕᤩᤠᤱᤀᤠᤱ ᤘᤠ᤹ᤀᤠ॥ 23 ᤂᤧᤏᤧ᤹ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤔᤠ ᤁᤧᤜᤣ᤺ᤰᤋᤧᤏᤢᤔᤧ᤺ᤴᤏᤣ ᤁᤧᤒᤣᤗᤡᤃᤧᤴ ᤋᤢᤘᤠ᤺ᤸᤗᤧ ᤏᤢᤃᤵ ᤁᤧᤶᤒᤡᤖᤧ. ᤂᤧᤴ ᤀᤠᤱᤃᤠ᤹ ᤂᤧᤏᤧ᤹ ᤔᤧᤵᤔᤠᤖᤧ ᤗᤠᤃᤡ ᤕᤩᤠᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤧᤏᤧ᤹ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤁᤧᤈᤥᤰ॥ ᤁᤸᤗᤧᤆᤥᤃᤢᤸᤗᤧ ᤀᤡᤱᤄᤱᤅᤡᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ ᤂᤶᤓᤩᤠᤱ ᤛᤢᤑᤥᤴ ᤁᤢᤛᤡᤱᤏᤡ᤺ᤳᤋᤧ᤹॥ 24 “ᤂᤧᤏᤧ᤹ ᤁᤧᤔᤏᤠ ᤏᤢ ᤁᤧᤛᤣᤛᤣ ᤕᤧᤰᤕᤰᤁᤡᤸᤗᤧ ᤗᤠᤃᤡ ᤑᤧᤴᤕᤠ᤺ᤶᤒᤰᤁᤡᤴ ᤔᤧᤱᤛᤧ. ᤗᤠᤕᤥᤴ ᤏᤢᤶᤛᤧ. ᤁᤢ᤹ᤀᤡᤃᤧᤓᤧᤶᤒᤠᤴ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤛᤧ. ᤏᤢᤵᤔᤧᤴᤍᤡᤱ ᤛᤠᤶᤕᤥᤒᤠ ᤕᤠ᤺ᤶᤒᤰ ᤋᤠ᤺ᤳᤇᤧ. ᤛᤢᤑᤥ ᤏᤢ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤏᤡ᤺ᤴᤎᤥ ᤆᤥ᤺ᤰᤛᤧ ᤜᤧᤰᤁᤩᤠᤱ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤡᤴ ᤔᤠᤱᤌᤥ᤺ᤰᤏᤠ ᤆᤥ᤺ᤰᤛᤧ ᤏᤢᤒᤥᤱ ‘ᤏᤢᤛᤡᤜᤠ᤹’ ᤀᤡᤱᤈᤠᤱ ᤐᤥ᤺ᤰᤂᤧᤀᤠᤱ ᤘᤠ᤹॥ 25 ᤁᤴ ᤐᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧ᤹ ᤜᤧᤰᤁᤩᤠᤱ ᤁᤢᤛᤡᤱᤏᤡ᤺ᤳᤋᤧ᤹. ᤕᤖᤢᤛᤗᤧ᤺ᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ ᤏᤢ ᤕᤠᤶᤔᤥ ᤋᤥ᤺ᤶᤔᤠᤖᤧ ᤗᤠᤃᤡ ᤁᤴ ᤀᤡᤱᤈᤠᤱᤅᤡᤴ ᤀᤡᤱᤓᤴ ᤐᤥ᤺ᤰᤂᤧᤒᤠ ᤕᤧᤶᤔᤠᤱᤎᤥ ᤔᤠᤱᤌᤥ᤺ᤰᤏᤠ ᤁᤧᤒᤥᤱᤒᤠ ᤔᤏᤠᤴ. ᤀᤡᤃᤪ ᤕᤢᤰᤛᤠᤒᤠ ᤌᤡᤰ ᤔᤧᤴᤍᤠᤀᤣ ᤌᤠᤖᤡᤰ. ᤏᤢᤛᤡ ‘ᤏᤢᤛᤡᤜᤠ᤹’ ᤏᤢ ᤋᤢᤰᤐᤥᤱᤅᤠᤱ ᤏᤧᤳᤇᤡ ‘ᤏᤢᤛᤡᤜᤠ᤹’ ᤐᤥᤱ᤹॥ ᤔᤠᤖᤠᤶᤜᤠ᤹ ᤏᤢ ᤕᤧᤰᤕᤰ ᤁᤒᤪᤡᤱ ᤐᤠᤰᤗᤢᤶ ᤁᤧᤗ᤹ᤒᤠ ᤋᤧᤴᤜᤠ᤹ ᤛᤥᤛᤥᤖᤡᤰ ᤁᤴ ᤕᤠᤶᤔᤥ ᤔᤧᤈᤥᤃᤢ᤹. ᤁᤖ ᤋᤢᤰᤂᤣᤗᤠᤰᤂᤣᤒᤠ ᤕᤧᤶ ᤐᤥᤱ᤹॥ 26 “ᤋᤢᤰᤐᤥᤱᤅᤠᤱ ᤏᤧᤳᤇᤡ ‘ᤏᤢᤛᤡᤜᤠ᤹’ ᤀᤣᤃᤠᤱ ᤂᤧᤴ ᤔᤠᤱᤌᤥ᤺ᤰᤏᤠ ᤁᤧᤒᤥᤱᤒᤠ ᤔᤏᤠᤴ ᤔᤧᤛᤧᤖᤢ᤹ ᤂᤧᤴᤏᤢ ᤌᤣᤎᤡᤰᤁᤠᤱ ᤔᤧᤕᤠ᤺ᤰᤏᤧᤴ॥ ᤕᤢᤰᤛᤠᤒᤠ ᤔᤏᤠᤜᤠ᤹ ᤔᤧᤍᤠᤀᤠᤱ ᤂᤧᤴ ᤕᤧᤰᤕᤰᤁᤡᤴ ᤏᤢ ᤛᤣᤛᤣᤍᤧᤴᤏᤡᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ᤹॥ ᤘᤜᤡᤳ ᤌᤠᤔᤠ ᤕᤧᤶᤔᤥ ᤁᤧᤃᤢᤱᤒᤠ ᤆᤫᤠ᤺ᤳ ᤜᤧᤰᤁᤣ ᤁᤢᤏᤢᤵᤔᤠᤴ ᤋᤠᤖᤥ—ᤁᤢᤏᤢᤵᤔᤥ ᤌᤠᤖᤡᤰᤁᤣ ᤌᤱ ᤐᤥᤱᤅᤠᤱ ᤐᤳ. ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤐᤥᤱᤔᤠ ᤀᤡᤱᤈᤠᤱᤅᤡᤴ ᤀᤡᤱᤓᤴ ᤐᤥ᤺ᤰᤂᤧᤀᤠᤱ ᤘᤠ᤹॥ 27 ᤗᤳᤇᤠ ‘ᤏᤢᤛᤡ’ ᤖᤧ ᤗᤠᤃᤡ ᤕᤖᤡᤰ ᤔᤏᤠᤜᤠ᤹ᤏᤢ ᤂᤧᤸᤗᤧ ᤔᤠᤱᤜᤢᤵ ᤌᤡᤰ ᤏᤡ᤺ᤴᤎᤥ ᤆᤥᤃᤢ᤹॥ ‘ᤏᤢᤛᤡ’ ᤗᤢᤶᤔᤥ ᤂᤧᤸᤗᤧ ᤛᤡᤍᤢᤱᤈᤓᤠ ᤏᤢ ᤜᤢᤰᤘᤠᤜᤠ᤹ ᤏᤢᤵᤛᤢ᤹॥ ᤜᤧᤰᤁᤩᤠᤱ ᤁᤢᤔᤧᤰᤔᤠ ᤏᤡ᤺ᤴᤎᤥ ᤁᤧᤒᤥᤱᤒᤠ ᤀᤡᤱᤈᤠᤱᤅᤡᤴ ᤂᤧᤸᤗᤧ ᤁᤢᤛᤶᤎᤠᤱ ᤔᤧᤴᤎᤠᤀᤣ ᤌᤠᤖᤡᤰ ᤂᤧᤸᤗᤧ ᤔᤠᤱᤜᤡᤶᤔᤥᤒᤠ ᤗᤳᤇᤠ ᤁᤢᤗᤰᤁᤥ ᤀᤠᤔᤧᤱᤔᤧᤱᤒᤠ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠ ᤌᤡᤰ ᤕᤧᤵᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.