ᤍᤠᤏᤡᤀᤧᤗ 8 - LIFOTNTᤍᤠᤏᤡᤀᤧᤗᤖᤧ ᤛᤢᤑᤥᤀᤥ ᤏᤡᤛᤢᤒᤠ ᤌᤢ᤺ᤶᤒᤠ ᤏᤢ ᤔᤧ᤺ᤴᤍᤒᤁᤠ 1 ᤋᤃᤡᤒᤠ ᤛᤢᤑᤥᤴ ᤀᤠᤱᤃᤠ᤹ᤀᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧᤀᤠᤱ ᤀᤣᤃᤠᤱ. ᤜᤠᤱ ᤒᤣᤗᤛᤈᤖᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ. ᤀᤠᤱᤃᤠ᤹ ᤍᤠᤏᤡᤀᤧᤗᤖᤧ ᤗᤳᤇᤠ ᤘᤣ᤹ ᤛᤢᤑᤥᤎᤡᤰ ᤏᤡᤛᤢᤱ॥ 2 ᤀᤠᤱᤃᤠ᤹ ᤀᤠᤛᤢᤑᤥᤀᤥ ᤀᤠᤱᤃᤠ᤹ ᤀᤠᤵᤑᤣᤰ ᤀᤣᤗᤠᤔ ᤋᤧᤱᤃᤵᤐᤥᤒᤠ ᤛᤢᤛᤏ ᤜᤠᤱᤕᤰᤁᤥ ᤘᤕᤠᤱᤒᤠ ᤏᤡᤛᤢᤱ. ᤛᤢᤑᤥᤀᤥ ᤀᤠᤱᤃᤠ᤹ ᤀᤢᤗᤤ ᤘᤠᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤘᤕᤠᤱ॥ 3 ᤀᤠᤱᤃᤠ᤹ ᤌᤥ ᤀᤥᤔᤕᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤂᤠᤘᤠ᤺ᤸᤗᤧ ᤁᤢᤒᤣᤛᤠᤱ ᤁᤣ᤺ᤶᤒ ᤁᤣ᤺ᤶᤒᤠ ᤁᤢᤍᤠᤱ ᤏᤧᤳᤇᤡ ᤁᤧᤕᤢᤱᤒᤠ ᤌᤢ᤺ᤶᤒᤠ ᤌᤡᤰ ᤕᤧᤒᤧᤒᤠ ᤏᤡᤛᤢᤱ॥ ᤂᤧᤴ ᤁᤢᤍᤠᤱᤜᤠ᤹ᤀᤥ ᤕᤠᤱᤛᤡ ᤁᤧᤗᤡᤱᤒᤧᤴ ᤘᤣ᤹ᤀᤡᤴᤏᤢ᤺ᤸᤗᤧ ᤁᤣ᤺ᤶᤒᤠ ᤆᤥᤃᤧ॥ 4 ᤂᤧᤴ ᤌᤢ᤺ᤶᤒᤠ᤺ᤸᤗᤧ ᤏᤠᤶᤎᤠ ᤏᤢ ᤌᤠᤱᤃᤧᤳ ᤜᤧᤰᤁᤩᤠᤱ ᤗᤠᤱᤃᤧᤳ ᤐᤡᤛᤠᤱ ᤌᤥ᤺ᤰᤂᤢᤖ ᤕᤠᤃᤧᤒᤠ ᤀᤠᤱᤃᤠ᤹ ᤀᤥᤔᤧᤳᤋᤢᤱ॥ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤜᤠ᤺ᤳᤋᤠᤱ ᤕᤧᤵᤔᤠ ᤔᤧᤛᤢᤰᤋᤧᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤢᤰᤛᤠᤶᤗᤠᤶ ᤀᤠᤳᤋᤡᤴᤏᤠᤱ ᤛᤧ᤺ᤵᤛᤡᤱᤔᤠ ᤔᤧᤛᤢᤰᤋᤧᤴ॥ ᤂᤧᤸᤗᤧ ᤌᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤀᤡ᤺ᤳᤋᤢ. ᤜᤠᤒᤠ ᤂᤧᤴᤏᤣ ᤆᤥᤃᤢᤀᤠᤱ ᤐᤕᤶ ᤕᤶᤒᤠ ᤐᤥ᤺ᤰᤂᤧ॥ 5 ᤀᤠᤱᤃᤠ᤹ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤀᤡ᤺ᤳᤇᤡᤱᤅᤠᤖ ᤘᤕᤠᤱᤅᤡᤸᤗᤧ. ᤆᤄᤵ ᤔᤡᤰᤜᤠ᤹ᤖᤧ ᤁᤢᤗᤢᤶᤔᤥ ᤗᤳᤇᤠ ᤔᤡᤰᤁᤧᤍᤥ᤺ᤰᤐᤠ ᤁᤢᤍᤠᤱ ᤁᤧᤕᤢᤱᤒᤠ ᤔᤧ᤺ᤴᤍᤒᤁᤠ ᤌᤡᤰ ᤂᤠᤶᤒᤠᤱᤅᤡᤴ ᤔᤧᤴᤇᤢᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤁᤠ᤺ᤰᤋᤢᤖ ᤏᤠᤶᤎᤠ ᤐᤡᤛᤠᤱᤗᤠᤶ ᤑᤧᤖᤧ॥ 6 ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤧᤵᤐᤠ ᤁᤢᤍᤠᤱ ᤏᤧᤳᤇᤡ ᤁᤧᤕᤢᤱᤒᤠ ᤀᤠᤱᤃᤠ᤹ ᤏᤡᤛᤢᤱᤒᤠ ᤔᤧᤸᤗᤢᤰ ᤗᤧᤵᤔᤠᤱ ᤂᤧᤴ ᤑᤧᤖᤧ ᤜᤧᤰᤁᤩᤠᤱ ᤛᤠ᤹ᤖᤡᤰ ᤛᤠ᤺ᤶᤛᤡᤱᤅᤠᤱ ᤂᤧᤴ ᤌᤥ᤺ᤰᤂᤢ॥ 7 ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧᤀᤠᤱ ᤂᤧᤸᤗᤧ ᤔᤧᤸᤗᤢᤰᤁᤧᤴ ᤆᤡᤎᤥ᤺ᤱ ᤆᤡᤎᤥ᤺ᤱ ᤌᤥ᤺ᤰᤂᤢ ᤜᤧᤰᤁᤩᤠᤱ ᤁᤢᤍᤠᤱᤜᤠ᤹ ᤏᤧᤵᤔᤠᤱ ᤀᤧᤰᤂᤢ ᤐᤡᤖᤢᤒᤠ ᤀᤠᤱᤃᤠ᤹ ᤏᤡᤛᤢᤱ॥ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤕᤧᤵᤔᤠᤖᤧ ᤗᤠᤃᤡ ᤂᤧᤴ ᤔᤧᤸᤗᤢᤰᤁᤧᤴ ᤔᤧᤴᤎᤢᤶᤔᤏᤠᤒᤠ ᤐᤥ᤺ᤰᤂᤧ॥ ᤂᤧᤴ ᤔᤧ᤺ᤴᤍᤒᤁᤠ᤺ᤸᤗᤧ ᤂᤠᤶᤒᤠᤱᤅᤥ ᤂᤧᤴ ᤌᤠᤵᤛᤢᤀᤠᤱ ᤆᤡᤖᤠᤰ ᤆᤡᤖᤠᤰ ᤗᤠ᤺ᤰᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤢᤰᤛᤠᤶᤗᤠᤶ ᤔᤧᤸᤗᤢᤰᤁᤧᤴ ᤛᤧᤶᤔᤠ ᤜᤠ᤺ᤳᤗᤧᤀᤠᤱ ᤔᤧᤛᤢᤰᤋᤢᤴ॥ 8 ᤂᤧᤴ ᤔᤧ᤺ᤴᤍᤒᤁᤠᤴ ᤛᤠ᤹ᤖᤡᤰ ᤕᤶᤒᤠ ᤐᤥ᤺ᤰᤂᤧ. ᤁᤖ ᤁᤢᤔᤢᤰᤛᤠᤶᤔᤡᤸᤗᤧ ᤘᤧᤴᤍᤢᤒᤠ ᤕᤧᤶᤔᤥ ᤂᤧᤸᤗᤧ ᤛᤠ᤹ᤖᤡᤰ ᤁᤧᤎᤢᤶᤒᤠ ᤁᤢᤍᤠᤱᤅᤡᤴ ᤑᤸᤗᤰ ᤀᤧᤃᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤋᤠᤱᤛᤠᤱᤒᤥ ᤁᤧᤖᤧᤰ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤀᤣ᤺ᤰᤛᤔᤠ ᤐᤖᤡᤰᤐᤠ ᤔᤡᤰᤁᤧᤍᤥ᤺ᤰᤐᤠ ᤗᤡᤛᤡ ᤁᤢᤍᤠᤱᤜᤠ᤹ ᤗᤡᤅᤧ॥ 9 ᤗᤡᤛᤡ ᤁᤢᤍᤠᤱᤜᤠ᤹ᤀᤥᤒᤠ ᤌᤡᤰᤗᤠᤶ ᤘᤣ᤹ ᤁᤢᤍᤠᤱ ᤌᤡᤰ ᤗᤡᤱᤛᤧ ᤌᤠᤅᤧ. ᤂᤧᤴ ᤆᤢᤰᤛᤠ ᤗᤡᤱᤔᤠ ᤜᤣ᤺ᤰᤋᤧ ᤁᤖ ᤗᤠᤱᤃᤧᤳ ᤐᤡᤛᤠᤱ ᤏᤢ ᤏᤠᤱᤃᤧᤴ ᤐᤡᤛᤠᤱ ᤜᤧᤰᤁᤩᤠᤱ ᤏᤢᤒᤠ ᤗᤠᤈᤣᤴ ᤗᤧᤵᤔᤠᤱ ᤁᤧᤎᤢᤶᤒᤠ ᤐᤥ᤺ᤰᤂᤧᤖ ᤐᤥᤖᤧᤖ ᤐᤣ॥ 10 ᤛᤠᤱᤃᤪᤠᤶᤐᤣᤍᤠᤱᤒᤠ ᤌᤰᤛᤢᤒᤠᤜᤠ᤹ᤀᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤴ ᤐᤥᤖᤧᤖ ᤐᤣ. ᤜᤧᤰᤁᤩᤠᤱ ᤂᤧᤸᤗᤧ ᤂᤣ᤺ᤶᤛᤡᤰᤐᤠ ᤗᤢᤵᤜᤠ᤹ ᤑᤳᤋᤢᤛᤡᤀᤠᤱ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤔᤰᤌᤠᤛᤢᤛᤡ ᤜᤧᤰᤁᤩᤠᤱ ᤗᤠᤱᤅᤡᤸᤗᤧ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤖᤢᤛᤡ॥ 11 ᤂᤧᤴ ᤀᤠᤵᤑᤣᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤕᤠᤖᤡᤰ ᤕᤶᤒᤠ ᤆᤥ᤺ᤰᤛᤡᤱ॥ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤌᤡᤰᤕᤠ᤺ᤴᤎᤰᤐᤠ ᤁᤢᤛᤡᤍᤢᤱᤈᤓᤠ᤺ᤴ ᤏᤠᤵᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤣᤛᤣᤍᤧᤴᤏᤡᤴ ᤕᤥ ᤔᤰᤌᤠᤛᤢ॥ 12 ᤐᤡᤑᤩᤢᤱᤅᤡᤸᤗᤧ ᤆᤥᤃᤢᤸᤗᤧ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤏᤢ ᤌᤡᤰᤕᤠ᤺ᤴᤎᤰᤐᤠ ᤛᤡᤍᤢᤱᤈᤓᤠᤴ ᤂᤧᤴ ᤜᤢᤰᤔᤧᤛᤢᤵᤋᤢᤀᤠᤱ ᤘᤕᤧ॥ ᤂᤧᤸᤗᤧ ᤛᤧᤰᤂᤠᤴ ᤂᤠᤶᤒᤠᤱᤅᤥ ᤗᤠᤵᤑᤢᤛᤢ ᤜᤧᤰᤁᤩᤠᤱ ᤂᤧᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤂᤧᤴ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥ᤺ᤰᤂᤧ॥ 13 ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤛᤣᤛᤣ ᤔᤠᤱᤗᤠᤀᤡᤱᤒᤠ ᤏᤧᤳᤇᤡ ᤐᤠᤖᤧᤛᤡᤒᤠ ᤂᤧᤵᤛᤢᤱ. ᤌᤡᤰᤐᤠᤖᤧ ᤘᤣ᤹ ᤛᤣᤛᤣ ᤔᤠᤱᤗᤠᤀᤡᤱᤒᤧᤴ ᤀᤰᤂᤣ ᤔᤧᤳᤋᤢ. “ᤌᤡᤰᤕᤠ᤺ᤴᤎᤰᤐᤠ ᤛᤡᤍᤢᤱᤈᤓᤠ. ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠ ᤐᤡᤑᤩᤢᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ. ᤜᤧᤰᤁᤩᤠᤱ ᤛᤣᤛᤣᤍᤧᤴ ᤏᤢ ᤌᤰᤛᤢᤒᤠᤜᤠ᤹ ᤗᤠᤱᤅᤡᤸᤗᤧ ᤔᤧᤍᤥ᤹ᤖᤢᤛᤡᤒᤠ ᤛᤢᤑᤥᤴ ᤁᤧᤵᤔᤠᤖᤧ ᤗᤠᤃᤡ ᤀᤠᤰᤂᤧᤴ ᤕᤧᤶ ᤌᤖᤢᤒᤣ᥅” 14 ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “᥈.᥉᥆᥆ ᤕᤢ᤺ᤴᤎᤥ ᤜᤧᤰᤁᤩᤠᤱ ᤋᤠᤏᤠᤶ ᤌᤠᤖᤡᤰ ᤌᤖᤢ᤹. ᤂᤧᤒᤩᤠᤱ ᤛᤣᤛᤣᤍᤧᤴᤏᤡᤴ ᤕᤠᤶᤔᤥ ᤔᤧᤍᤥᤴᤍᤢᤖᤥ॥” ᤃᤒᤪᤡᤀᤣᤗ ᤔᤠᤱᤗᤠᤀᤡᤱᤒᤧᤸᤗᤧ ᤛᤢᤑᤥ᤺ᤸᤗᤧ ᤁᤢᤒᤣ ᤜᤴᤍᤢ 15 ᤀᤠᤸᤗ ᤀᤠᤱᤃᤠ᤹. ᤍᤠᤏᤡᤀᤧᤗᤖᤧ ᤛᤢᤑᤥᤴ ᤀᤥᤔᤧᤳᤋᤢᤱᤗ ᤐᤳᤇᤠᤱ ᤜᤧᤰᤁᤩᤠᤱ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗ ᤐᤳᤇᤠᤱᤅᤡᤸᤗᤧ ᤔᤏᤠ ᤜᤧᤰᤋᤱᤒᤠ ᤏᤡᤃᤧᤍᤧᤵᤐᤠ ᤌᤡᤰ ᤀᤠᤱᤃᤠ᤹ ᤀᤠᤍᤃᤡ ᤕᤧᤶᤛᤡᤱ॥ 16 ᤜᤧᤰᤁᤩᤠᤱ ᤀᤢᤗᤤ ᤘᤠᤗᤠᤶ ᤀᤰᤂᤣᤗ᤹ᤖᤡᤰ ᤀᤡᤱ ᤁᤧᤓᤥᤒᤠ ᤔᤏᤠ᤺ᤸᤗᤧ ᤁᤢᤀᤡᤰᤗᤠᤎᤡᤰ ᤀᤠᤱᤃᤠ᤹ ᤂᤧᤵᤛᤢᤱ. “ᤃᤒᤪᤡᤀᤣᤗᤀᤣ. ᤁᤴ ᤔᤏᤠᤴ ᤛᤢᤑᤥ᤺ᤸᤗᤧ ᤁᤢᤒᤣᤴ ᤆᤧᤰᤋᤧ᤹॥” 17 ᤀᤠᤸᤗ ᤂᤧᤴ ᤀᤠᤱᤃᤠ᤹ ᤕᤧᤒᤠᤱᤒᤠᤍᤧᤴ ᤏᤡ᤺ᤳᤋᤠᤱ ᤑᤧᤖᤧᤸᤗᤧ. ᤀᤠᤱᤃᤠ᤹ ᤛᤠ᤹ᤖᤡᤰ ᤁᤡᤛᤠᤱᤅᤠᤱ ᤂᤠᤶᤒᤠᤱᤅᤥ ᤛᤶᤒᤧᤳ ᤏᤧᤛ᤻ᤛᤠᤱ॥ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤱᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤁᤴ ᤛᤢᤑᤥ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠ ᤕᤧᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢ᤹ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱᤏᤡ᤺ᤳᤋᤧ᤹॥” 18 ᤂᤢᤏᤧ᤹ ᤀᤠᤱᤃᤠ᤹ᤏᤢ ᤐᤠᤖᤧᤖ ᤐᤳᤇᤧᤸᤗᤧ. ᤀᤠᤱᤃᤠ᤹ ᤀᤠᤏᤠᤖᤠᤴ ᤂᤠᤶᤒᤠᤱᤅᤥ ᤜᤡᤛᤢᤱᤅᤠᤱ ᤔᤢᤖᤢᤰᤂᤢᤖᤢᤰ ᤀᤡᤵᤛᤠᤱᤅᤠᤱ ᤐᤳᤇᤠᤱ॥ ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤛᤢᤛᤠᤱᤅᤠᤱ ᤕᤧᤵᤛᤠᤱ॥ 19 ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤐᤥ᤺ᤰᤔᤠ ᤕᤧᤶᤔᤥ ᤌᤣ ᤐᤥᤱ᤹. ᤂᤧᤴ ᤀᤠᤱᤃᤠ᤹ ᤂᤧᤏᤧ᤹ ᤆᤧᤰᤏᤧᤖ ᤐᤳᤏᤧ. ᤌᤣᤀᤠᤱᤓᤧᤸᤗᤧ ᤛᤢᤑᤥ᤺ᤸᤗᤧ ᤏᤡ᤺ᤴᤎᤥ ᤁᤧᤒᤥᤱᤒᤠ ᤁᤢᤏᤢᤵᤔᤠ ᤕᤧᤶᤔᤡᤴ ᤐᤠ᤺ᤳᤋᤢ᤹॥ 20 ᤂᤧᤏᤧ᤹ ᤁᤧᤏᤡᤛᤢᤒᤠ ᤂᤧᤴ ᤏᤧᤳᤇᤡ ᤁᤢᤍᤠᤱ ᤁᤧᤕᤢᤱᤒᤠ ᤔᤧᤸᤗᤢᤰᤁᤡᤸᤗᤧ ᤔᤠᤍᤡ ᤏᤢ ᤑᤠᤖᤛᤒᤠ ᤜᤠᤱᤈᤢᤶᤜᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢ᤹॥ 21 ᤂᤧᤴ ᤁᤢᤶᤒᤪᤡᤰᤁᤡᤸᤗᤧ ᤁᤧᤍᤧᤵᤐᤠ ᤔᤧ᤺ᤴᤍᤒᤁᤠ᤺ᤱᤃ ᤃᤪᤡᤛᤒᤠ ᤜᤠᤱᤈᤢᤶᤔᤡᤴᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤰᤁᤡᤸᤗᤧ ᤁᤢᤗᤢᤶᤔᤥ ᤁᤧᤕᤢᤱᤒᤠ ᤕᤶᤒᤠ ᤁᤢᤍᤠᤱᤅᤡᤴ ᤂᤧᤸᤗᤧ ᤌᤡᤰᤛᤡᤃᤣᤰᤐᤠ ᤁᤢᤜᤠᤱᤗᤥ॥ 22 ᤂᤧᤴ ᤁᤧᤀᤧᤰᤐᤠ ᤁᤢᤍᤠᤱᤅᤡᤸᤗᤧ ᤁᤢᤗᤧᤰᤘᤠ ᤁᤧᤗᤡᤱᤒᤠ ᤗᤡᤛᤡ ᤁᤢᤍᤠᤱᤜᤠ᤹ᤃ ᤂᤧᤵᤔᤥᤗᤠᤶᤔᤣ ᤁᤧᤗ᤺ᤶᤒᤠ ᤗᤡᤛᤡ ᤜᤠᤱᤈᤢᤶᤜᤠ᤹ᤖᤥ. ᤁᤖ ᤌᤡᤰᤛᤡᤃᤣᤰᤐᤠ ᤜᤠᤱᤈᤢᤶᤔᤡᤴ ᤁᤢᤀᤡᤛᤡᤰ ᤂᤧᤱᤜᤠ᤹ ᤔᤢᤰᤁᤧᤃᤢᤒᤠ ᤔᤧᤶᤒᤥᤱᤏᤧᤴ॥ 23 “ᤂᤧᤴ ᤜᤠᤈᤢᤶᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤕᤢᤰ ᤆᤥ᤺ᤰᤔᤠ ᤕᤧᤶᤔᤥᤒᤠ ᤕᤠᤱᤛᤡᤒᤠ ᤕᤧᤴᤜᤠ᤹ᤀᤥ ᤀᤠᤸᤗ ᤐᤡᤑᤩᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤛᤠ᤹ᤖᤡᤰᤁᤣ ᤔᤧᤴᤘᤠ᤹ᤔᤏᤠᤒᤠ ᤐᤥᤱ᤹. ᤂᤧᤒᤩᤠᤱ ᤗᤳᤇᤠ ᤁᤡᤵᤔᤠ ᤁᤧᤄᤢᤒᤠ. ᤀᤡᤱᤗᤧᤰ ᤁᤧᤈᤥ᤺ᤰᤐᤠ ᤜᤠᤱᤎᤡᤰ ᤐᤥᤰ॥ 24 ᤂᤧᤴ ᤛᤠ᤹ᤖᤡᤰ ᤁᤧᤎᤢᤶᤒᤠ ᤐᤥᤱ᤹. ᤁᤖ ᤂᤧᤴ ᤀᤠᤵᤑᤣᤰ ᤁᤢᤔᤢᤰᤛᤠᤶᤔᤡᤸᤗᤧᤃ ᤔᤣ᤺ᤴ॥ ᤂᤧᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤧᤰᤔᤠᤛᤡᤔᤧᤴ ᤋᤠᤖᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤌᤧᤔᤠ ᤕᤠ᤺ᤶᤒᤰᤁᤥᤛᤠᤱ ᤁᤢᤛᤠᤱ ᤁᤧᤗᤒᤠ ᤐᤥᤱ᤹॥ ᤂᤧᤸᤗᤧ ᤔᤢᤰᤛᤠᤶᤛᤠᤒᤠ ᤔᤏᤠᤜᤠ᤹ ᤏᤢ ᤛᤣᤛᤣ ᤔᤏᤠᤜᤠ᤹ ᤔᤧᤰᤂᤢᤛᤡ॥ 25 ᤂᤧᤸᤗᤧ ᤀᤡᤱᤗᤧᤰᤁᤡᤴ ᤁᤢᤗᤡᤱᤍᤥ ᤁᤧᤳᤗ ᤕᤠ᤺ᤴᤍᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤣᤰ ᤕᤶᤒᤠ ᤗᤣ᤺ᤳᤇᤡᤱ᤹॥ ᤀᤠᤸᤗ ᤂᤧᤱᤜᤠ᤹ᤖᤧ ᤁᤶᤒᤪᤠᤱᤅᤥ ᤔᤧᤘᤠ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤸᤗᤧ ᤂᤧᤸᤗᤧ ᤕᤖᤡᤰ ᤔᤧᤰᤂᤢᤛᤡ᤹ ᤜᤧᤰᤁᤩᤠᤱ ᤁᤧᤖᤧᤰ ᤜᤠᤱᤜᤠ᤹ᤏᤢ᤺ᤸᤗᤧ ᤕᤶᤒᤠ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤴ ᤐᤥᤰ॥ ᤜᤧᤰᤁᤣᤛᤠᤱ ᤂᤧᤴ ᤔᤧᤰ. ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤔᤢᤰᤛᤠᤶᤗᤠᤶᤔᤠᤱ ᤔᤣ᤺ᤴ॥ 26 “ᤂᤧᤏᤧ᤹ᤀᤥ ᤀᤥᤛᤣ᤺ᤴᤎᤠᤱ ᤁᤧᤒᤥᤱᤒᤠ ᤋᤠᤏᤠᤶ ᤏᤢ ᤕᤢ᤺ᤴᤇᤡᤰᤐᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤑᤥᤴ ᤛᤧᤰᤂᤠᤒᤠ ᤆᤥᤰ. ᤁᤖ ᤂᤧᤴ ᤛᤢᤑᤥᤴ ᤛᤫᤠ᤺ᤳ ᤁᤳᤋᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤕᤖᤡᤰ ᤀᤣᤃᤠᤱ ᤋᤠ᤺ᤴᤍᤡ ᤁᤧᤳ॥” 27 ᤀᤠᤱᤃᤠ᤹. ᤍᤠᤏᤡᤀᤧᤗᤧᤴ. ᤛᤠ᤹ᤖᤡᤰ ᤐᤏᤠ ᤏᤠᤛᤠᤱ ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤌᤠᤖᤡᤰ ᤀᤠᤕᤠᤶ ᤋᤢᤃᤧᤀᤠᤱ ᤏᤧᤛ᤻ᤛᤠᤱ॥ ᤂᤧᤒᤩᤠᤱ ᤀᤠᤱᤃᤠ᤹ ᤐᤥᤃᤠᤱᤅᤠᤱ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤢᤱ॥ ᤛᤢᤑᤥ᤺ᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤌᤩᤠᤱ. ᤁᤴ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠᤴ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.