ᤍᤠᤏᤡᤀᤧᤗ 6 - LIFOTNTᤍᤠᤏᤡᤀᤧᤗᤧᤴ ᤂᤡᤖᤡᤱᤒᤠ ᤂᤖᤀᤥ 1 ᤜᤠᤱᤈᤢᤶᤔᤥ ᤁᤧᤖᤧᤰ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᥇᥈᥆ ᤔᤏᤠᤜᤠ᤹ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹ ᤜᤠᤱᤅᤡᤸᤗᤧ ᤕᤢᤰᤋᤡᤱ ᤆᤥᤃᤢᤛᤡ॥ 2 ᤍᤠᤖᤠ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤛᤢᤶᤛᤡ ᤕᤢᤰᤛᤠᤒᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ. ᤂᤧᤱᤜᤠ᤹ᤀᤥ ᤗᤳᤇᤠ ᤍᤠᤏᤡᤀᤧᤗᤧᤴ ᤘᤕᤧ॥ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤥ ᤜᤠᤴᤋᤡ ᤔᤧᤒᤥᤱᤏᤧᤴᤗ ᤑᤠ᤹ᤀᤠᤱ ᤂᤧᤴ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤗᤰᤐᤧᤴᤛᤠᤒᤠ ᤆᤥᤃᤢᤛᤡ॥ 3 ᤀᤠᤸᤗ ᤍᤠᤏᤡᤀᤧᤗᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤛᤢᤳᤏᤠᤗᤠᤶ ᤂᤢᤏᤧ᤹ ᤀᤠᤵᤑᤣᤰ ᤂᤧᤴ ᤕᤢᤰᤛᤠᤒᤠᤜᤠ᤹ ᤏᤢ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤣ᤺ᤰ ᤐᤖᤡᤰᤐᤠ ᤀᤠᤸᤗᤛᤠᤱ ᤏᤢᤒᤠ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤡᤱ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤧᤖᤧᤰ ᤜᤠᤱᤈᤢᤶᤔᤥᤒᤠ ᤕᤢᤰᤛᤠᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥ 4 ᤂᤧᤒᤩᤠᤱ ᤕᤢᤰᤛᤠᤒᤠᤜᤠ᤹ ᤏᤢ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤍᤠᤏᤡᤀᤧᤗᤧᤴ ᤀᤠᤵᤋᤡᤰ ᤁᤢ᤺ᤵᤔᤠᤖᤧ ᤗᤠᤃᤡ ᤜᤠᤱᤈᤢᤶᤒᤠ ᤕᤠ᤺ᤶᤒᤰᤜᤠ᤹ᤀᤥ ᤂᤢᤏᤧ᤹ ᤑᤣ᤺ᤴᤍᤢᤒᤠ ᤐᤠ᤺ᤴᤜᤠ᤹ ᤁᤥ᤺ᤵᤔᤠ ᤔᤧᤜᤣ᤺ᤰᤋᤢ. ᤁᤖ ᤂᤧᤱᤜᤠ᤹ᤖᤧ ᤜᤧᤰᤁᤣ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ᤀᤥ ᤌᤧᤔᤠᤀᤠᤱ ᤑᤧᤴᤕᤠ᤺ᤶᤒᤰ ᤂᤥᤔᤠ ᤔᤧᤴᤇᤢᤰᤋᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤁᤢᤒᤠ᤺ᤵᤐᤠ᤺ᤳ ᤐᤧᤷᤃᤧᤰ ᤘᤷᤃᤧᤰᤁᤠᤱ ᤔᤧᤴᤈᤥ᤺ᤰᤔᤏᤠᤒᤠ ᤘᤕᤧ॥ 5 ᤁᤢᤏᤢᤵᤔᤥ ᤂᤧᤴ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤍᤠᤏᤡᤀᤧᤗᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤏᤡ᤹ ᤀᤠᤵᤋᤡᤰ ᤁᤢ᤺ᤵᤔᤠᤖᤧ ᤗᤠᤃᤡ. ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤡᤶᤜᤠ᤹ᤏᤢ᤺ᤸᤗᤧ ᤘᤣ᤹. ᤀᤠᤓᤧᤸᤗᤧᤀᤠᤱ ᤌᤧᤔᤠ ᤗᤠᤶᤔᤠᤱ ᤀᤠᤵᤋᤡᤰ ᤁᤢ᤺ᤵᤔᤠ ᤀᤠᤴᤇᤢᤰᤋᤢᤶᤔᤡᤴ॥” 6 ᤁᤸᤗᤧᤆᤥᤃᤢᤸᤗᤧ ᤕᤢᤰᤛᤠᤒᤠᤜᤠ᤹ ᤏᤢ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹ ᤁᤢᤗᤢᤵ ᤌᤡᤰ ᤔᤧᤒᤥ᤺ᤰᤂᤧ ᤜᤧᤰᤁᤩᤠᤱ ᤔᤧᤒᤣᤀᤠᤱ ᤜᤠᤱᤅᤡᤴ ᤔᤧᤔᤧᤳᤋᤢ. “ᤐᤕᤶ ᤍᤠᤖᤠ ᤜᤠᤱᤅᤣ. ᤁᤧᤎᤠ᤺ᤰ ᤆᤠ᤹ᤖᤖᤥ᥄ 7 ᤜᤠᤱ ᤕᤢᤰᤛᤠᤒᤠᤜᤠ᤹. ᤌᤢᤶ ᤕᤢᤰᤛᤠᤒᤠᤜᤠ᤹. ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹. ᤛᤢᤈᤠᤛᤠᤒᤠᤜᤠ᤹. ᤆᤢᤰᤛᤠ ᤜᤠᤱᤜᤠ᤹ ᤏᤢ ᤁᤧᤖᤧᤰ ᤁᤴ ᤐᤠ᤺ᤴᤏᤥ ᤔᤧᤍᤧᤴᤍᤧᤀᤠᤱ ᤔᤧᤘᤠ᤹. ᤜᤠᤱᤅᤡᤸᤗᤧ ᤗᤳᤇᤠ ᤀᤡᤱᤈᤠᤱ ᤁᤧᤗ᤺ᤳᤋᤢᤖ ᤐᤥᤱ᤹ ᤜᤧᤰᤁᤩᤠᤱ ᤂᤧᤴ ᤀᤡᤱᤈᤠᤱᤅᤡᤴ ᤁᤧᤖᤧᤰᤗᤧ ᤔᤧᤏᤠ᤺ᤳᤋᤢ ᤔᤧᤀᤡ᤺ᤳᤋᤢᤖ ᤐᤥᤱ᤹. ᤂᤧᤴ ᤁᤢᤀᤡᤛᤡᤰ ᤁᤧᤍᤠᤒᤠ ᤛᤢᤶᤒᤥᤱ ᤕᤧᤴ ᤌᤠᤖᤡᤰ ᤀᤠᤍᤠᤱᤒᤠᤏᤢ᤺ᤸᤗᤧ ᤘᤣ᤹ ᤁᤢᤓᤠ ᤔᤠᤱ ᤀᤡᤃᤪ ᤔᤏᤠᤴ ᤁᤢᤓᤠᤖᤧ ᤐᤣᤗᤡ ᤑᤠᤰᤋᤢᤏᤧᤓᤃᤪ. ᤐᤕᤶ ᤜᤠᤱ ᤜᤧᤰᤋᤱᤒᤠ ᤔᤏᤠᤴ ᤌᤧᤖᤡᤱᤒᤧᤸᤗᤧ ᤁᤢᤄᤖᤀᤥ ᤗᤠᤵᤑᤢᤔᤠ ᤐᤥᤱᤗᤥ॥ 8 ᤀᤠᤸᤗ ᤐᤕᤶ ᤜᤠᤱᤅᤣ. ᤁᤴ ᤀᤡᤱᤈᤠᤱᤅᤡᤴ ᤛᤠᤵᤔᤏᤠᤒᤠᤀᤣ ᤗ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥᤱᤔᤠ ᤔᤧᤴᤇᤢᤰᤔᤏᤠᤒᤠ ᤔᤠᤍᤡ ᤏᤢ ᤑᤠᤖᤛᤡᤜᤠ᤹ᤖᤧ ᤂᤢᤴᤇᤡ᤹ ᤂᤠᤛᤧᤴᤌᤡᤶ ᤁᤢᤀᤡᤛᤡᤰ ᤁᤴ ᤗᤧᤱᤔᤠ ᤔᤧᤛᤢᤰᤏᤧᤴ॥” 9 ᤁᤸᤗᤧᤆᤥᤃᤢᤸᤗᤧ ᤍᤠᤖᤠ ᤜᤠᤱᤅᤡᤸᤗᤧ ᤁᤴ ᤀᤡᤱᤈᤠᤱᤅᤡᤴ ᤛᤠᤵᤔᤏᤠᤒᤠᤀᤣ ᤗ᤺ᤳᤋᤢ॥ 10 ᤀᤠᤸᤗ ᤍᤠᤏᤡᤀᤧᤗᤖᤧ ᤂᤧᤴ ᤀᤡᤱᤈᤠᤱᤅᤡᤴ ᤗ᤺ᤴᤍᤧᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤌᤥᤛᤔᤠ ᤁᤢᤍᤠ᤺ᤳᤗᤠᤀᤥᤒᤠ ᤕᤠᤰᤑᤠᤱᤅᤥ ᤐᤣ. ᤂᤧᤵᤔᤥ ᤐᤣᤎᤠ᤺ᤵᤜᤠ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤜᤱᤒᤧᤳ ᤐᤳᤇᤧ॥ ᤋᤃᤡ ᤜᤧᤰᤁᤣᤀᤣ ᤂᤢᤏᤧ᤹ ᤌᤡᤰᤕᤠ᤺ᤴᤗᤧ ᤛᤢᤶᤗᤧᤱ ᤌᤢᤱᤒᤥ᤹ᤜᤈ᤹ ᤕᤢᤱᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢᤃᤧᤴ ᤐᤡᤖᤢᤖ ᤐᤣᤗᤡ ᤑᤠᤰᤋᤢ॥ 11 ᤂᤧᤒᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤁᤢᤗᤢᤵ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤒᤣ ᤜᤧᤰᤁᤩᤠᤱ ᤁᤢᤓᤠ᤹ᤖᤧ ᤗᤠᤃᤡ ᤍᤠᤏᤡᤀᤧᤗᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤖ ᤕᤠᤃᤧᤒᤠ ᤂᤧᤱᤜᤠ᤹ᤖᤧ ᤔᤧᤍᤢᤔᤢ॥ 12 ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤜᤠᤱᤅᤧᤀᤥ ᤔᤧᤒᤣᤀᤠᤱ ᤂᤢᤏᤧ᤹ ᤗ᤺ᤳᤋᤢᤒᤠ ᤜᤠᤱ ᤀᤡᤈᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤔᤧᤳᤋᤢ. “ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤍᤠᤒᤠ ᤛᤢᤶᤒᤥᤱ ᤕᤧᤴ ᤌᤠᤖᤡᤰ ᤀᤠᤍᤠᤱᤒᤠᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤸᤗᤧ ᤁᤢᤓᤠ ᤔᤠᤱ ᤀᤡᤃᤪ ᤔᤏᤠᤴ ᤐᤣᤗᤡ ᤑᤠᤰᤋᤢ᤹. ᤂᤡᤖᤡᤱᤒᤠᤸᤗᤧ ᤁᤢᤄᤠᤀᤥ ᤂᤧᤴ ᤗᤠᤵᤑᤢᤔᤠ ᤐᤥᤱ ᤑᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤗᤳᤇᤠ ᤀᤡᤱᤈᤠᤱ ᤁᤧᤗ᤺ᤳᤋᤢᤀᤠᤱ ᤔᤧᤘᤠ᤹ᤏᤧᤶᤒᤡ᥅” ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤥᤖᤥ. ᤔᤠᤍᤡᤜᤠ᤹ ᤏᤢ ᤑᤠᤖᤛᤡᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤠᤱ ᤁᤢᤀᤡᤛᤡᤰ. ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥᤱᤔᤠ ᤔᤧᤛᤢᤰᤏᤧᤴ. ᤂᤧᤴ ᤀᤡᤱᤈᤠᤱᤅᤡᤴ ᤗᤧᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤥᤰᤗᤥ॥” 13 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤜᤠᤱᤅᤡᤴ ᤔᤧᤔᤧᤳᤋᤢ. “ᤐᤕᤶ ᤜᤠᤱᤅᤣ. ᤕᤜᤢᤍᤠ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢᤛᤡᤒᤠᤜᤠ᤹ᤀᤥ ᤗᤳᤇᤠ ᤍᤠᤏᤡᤀᤧᤗᤖᤧ ᤀᤠᤍᤠᤱᤒᤠ ᤀᤡᤃᤪ ᤀᤠᤍᤠᤱᤒᤠᤖᤧ ᤁᤧᤗ᤺ᤳᤋᤢᤒᤠ ᤛᤠᤵᤔᤏᤠᤒᤠ ᤀᤡᤱᤈᤠᤱᤅᤡᤴ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ᤹॥ ᤂᤢᤏᤧ᤹ ᤀᤠᤸᤗᤛᤠᤱ ᤌᤡᤰᤕᤠ᤺ᤴᤎᤰ ᤛᤢᤶᤗᤧᤱ ᤐᤣᤗᤡᤃᤧᤴ ᤋᤢᤘᤠ ᤆᤥᤰ॥” 14 ᤀᤠᤸᤗ ᤁᤴ ᤐᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ॥ ᤂᤢᤏᤧ᤹ ᤍᤠᤏᤡᤀᤧᤗᤧᤴ ᤛᤧᤶᤔᤠ ᤏᤡ᤺ᤴᤎᤥ ᤆᤥᤃᤢ ᤜᤧᤰᤁᤩᤠᤱ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤏᤠᤶᤎᤩᤧᤖ ᤌᤠᤖᤡᤰᤁᤣ ᤂᤢᤏᤧ᤹ ᤁᤢᤛᤢᤰᤛᤢᤰ ᤋᤶᤛᤡᤱ ᤆᤥᤃᤢ॥ 15 ᤂᤧᤴ ᤀᤣᤃᤠᤱ ᤂᤧᤴ ᤛᤢᤜᤠᤱᤕᤢᤰᤐᤠᤜᤠ᤹ ᤁᤢᤗᤢᤵ ᤔᤧᤒᤥ᤺ᤰᤂᤧ ᤜᤧᤰᤁᤩᤠᤱ ᤜᤠᤱᤅᤧᤀᤥ ᤔᤧᤒᤣᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤁᤢᤛᤡᤱᤏᤡ᤺ᤳᤋᤧ᤹ ᤔᤠᤍᤡ ᤏᤢ ᤑᤠᤖᤛᤡᤜᤠ᤹ᤖᤧ ᤂᤢᤴᤇᤡ᤹ ᤂᤠᤛᤧᤴᤌᤡᤶ ᤁᤢᤀᤡᤛᤡᤰ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡᤃᤪ ᤁᤢᤀᤡᤱᤈᤠᤱᤅᤡᤴᤏᤠᤱ ᤗᤧᤱᤔᤠ ᤛᤢᤰᤔᤧᤍᤧᤳᤏᤧᤴ॥” 16 ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤍᤠᤏᤡᤀᤧᤗᤧᤴ ᤔᤧᤍᤧᤶᤛᤢᤀᤠᤱ ᤌᤧᤖᤡᤱᤒᤧᤸᤗᤧ ᤁᤢᤄᤖᤀᤥ ᤗᤠᤵᤔᤧᤓᤢᤛᤢ ᤔᤧᤕᤠᤰᤋᤢ॥ ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤆᤰᤔᤧᤸᤗ᤹ᤀᤣ ᤔᤠᤱᤛᤧᤘᤠ ᤁᤧᤔᤧᤳᤋᤢᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤋᤠᤱᤃᤧᤛᤧ᤺ᤵᤗᤖᤥ᥄” 17 ᤂᤡᤖᤡᤱᤒᤠ ᤂᤠ᤺ᤸᤗᤧ ᤁᤢᤗᤠᤶᤔᤥ ᤕᤶᤒᤠ ᤗᤢᤱᤎᤡᤰ ᤔᤧᤍᤠᤖᤢᤀᤠᤱ ᤔᤧᤕᤧᤵᤛᤢ. ᤜᤧᤰᤁᤩᤠᤱ ᤍᤠᤏᤡᤀᤧᤗᤖᤧ ᤁᤢᤕᤠᤰᤏᤠᤶᤔᤥ ᤌᤧᤔᤠᤀᤠᤱ ᤐᤠᤴ ᤔᤧᤗᤧᤱᤏᤧᤴᤗ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤁᤢᤛᤫᤠᤃᤣ᤺ᤵ ᤀᤣ᤺ᤵᤛᤠᤵᤐᤡᤴ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤫᤠᤃᤣᤵ ᤀᤣ᤺ᤵᤛᤠᤵᤐᤡᤴ ᤂᤧᤴ ᤗᤢᤱᤅᤥ ᤔᤧᤕᤢᤰᤋᤢ॥ 18 ᤂᤧᤒᤩᤠᤱ ᤜᤠᤱᤅᤡᤴ ᤜᤠᤱᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤂᤢᤏᤧ᤹ ᤁᤢᤍᤃᤡ ᤔᤧᤕᤢᤰᤂᤢᤒᤠ ᤁᤢᤈᤠᤜᤠ᤹ ᤔᤧᤈᤏᤧᤴ ᤜᤧᤰᤁᤩᤠᤱ ᤌᤧᤔᤠᤀᤠᤱ ᤏᤡᤱᤘᤠ᤹ ᤋᤠᤔᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤕᤢᤅᤧ॥ ᤂᤢᤏᤧ᤹ ᤁᤢᤔᤡᤰᤁᤣ ᤔᤧᤕᤢᤛᤧᤴ॥ 19 ᤋᤠᤏᤠᤶ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧᤛᤠ ᤜᤠᤱᤅᤡᤴ ᤐᤥᤃᤧᤀᤠᤱ ᤜᤠᤖᤠᤘᤖᤠ ᤌᤧᤖᤡᤱᤒᤧᤸᤗᤧ ᤁᤢᤄᤖᤀᤥ ᤗᤧᤵᤔᤠᤱ ᤐᤣ॥ 20 ᤀᤠᤸᤗ ᤂᤢᤏᤧ᤹ ᤌᤧᤖᤡᤱᤒᤧᤸᤗᤧ ᤁᤢᤄᤖ ᤏᤡ᤺ᤳᤋᤠᤱ ᤁᤧᤖᤧᤀᤠᤱ ᤁᤢᤕᤥᤶ ᤐᤢ᤹ᤖᤧᤖ ᤂᤢᤏᤧ᤹ ᤍᤠᤏᤡᤀᤧᤗᤧᤴ ᤔᤧᤳᤋᤢ. “ᤍᤠᤏᤡᤀᤧᤗᤀᤣ. ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤣ. ᤌᤣ ᤂᤧᤏᤧ᤹ ᤆᤰᤔᤧᤸᤗ᤹ᤀᤣ ᤔᤠᤱᤛᤧᤘᤠ ᤁᤧᤔᤧᤳᤋᤢᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤖᤡᤱᤒᤠᤜᤠ᤹ᤗᤠᤶ ᤂᤧᤏᤧ᤹ ᤋᤠᤱᤃᤧᤛᤧ᤺ᤵᤋᤧᤒᤡ᥅” 21 ᤍᤠᤏᤡᤀᤧᤗᤖᤧ ᤏᤢᤃᤵ ᤐᤡᤖᤢ. “ᤐᤕᤶ ᤜᤠᤱᤅᤡᤴ ᤁᤧᤎᤠ᤺ᤰ ᤆᤠ᤹ᤖᤖᤥ᥄ 22 ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤐᤠᤱᤄᤢᤕᤢᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤂᤡᤖᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤴ ᤜᤢ᤹ᤖᤢ ᤐᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤆᤒᤧ᤺ᤳᤇᤡᤰᤁᤠᤱ ᤔᤧᤄᤠ᤺ᤴᤍᤠᤱᤒᤠ ᤜᤥᤵ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤏᤡᤔᤥ ᤀᤠᤱᤃᤠ᤹ ᤁᤢᤍᤥ᤺ᤵᤔᤠ ᤆᤥᤃᤠᤱ॥ ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤍᤃᤡᤀᤠᤱ ᤀᤠᤱᤃᤠ᤹ ᤌᤣᤀᤠᤱ ᤑᤧᤳᤗᤠ᤺ᤴᤍᤢᤱᤒᤠ ᤜᤥᤵ॥” 23 ᤜᤠᤱᤅᤡᤴ ᤛᤠ᤹ᤖᤡᤰ ᤐᤛ᤺ᤳ ᤛ᤺ᤳᤋᤧᤀᤠᤱ ᤍᤠᤏᤡᤀᤧᤗᤧᤴ ᤂᤡᤖᤡᤱᤒᤠᤸᤗᤧ ᤁᤢᤄᤖᤀᤥᤗᤠᤶ ᤗᤠ᤺ᤰᤁᤠᤳ ᤗ᤺ᤵᤔᤠ ᤀᤡᤱᤈᤠᤱ ᤐᤡᤖᤢᤛᤡ॥ ᤀᤠᤸᤗ ᤍᤠᤏᤡᤀᤧᤗᤧᤴ ᤂᤡᤖᤡᤱᤒᤠᤸᤗᤧ ᤁᤢᤄᤠᤀᤥᤗᤠᤶ ᤔᤧᤗ᤺ᤳᤋᤢᤸᤗᤧ ᤂᤢᤏᤧ᤹ᤀᤥ ᤌᤣᤀᤠᤱ ᤁᤠ᤺ᤴᤍᤧᤒᤠ ᤜᤥ᤺ᤵᤋᤧ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤢᤏᤡᤱᤘᤠ᤹ ᤕᤢᤰᤂᤢᤀᤠᤱ ᤘᤕᤧ॥ 24 ᤍᤠᤏᤡᤀᤧᤗᤖᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤺ᤸᤗᤧ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤔᤏᤠᤜᤠ᤹ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤥ ᤛᤡᤃᤠᤱ ᤔᤧᤍᤠᤖᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤛᤥᤛᤥᤖᤡᤰ ᤂᤡᤖᤡᤱᤒᤠᤸᤗᤧ ᤁᤢᤄᤖᤀᤥ ᤗᤠᤵᤔᤧᤓᤢᤛᤢ ᤔᤧᤕᤠᤰᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤡᤖᤡᤱᤒᤠᤸᤗᤧ ᤁᤢᤄᤖᤀᤥᤒᤠ ᤂᤠᤶᤒᤠᤱᤅᤥ ᤆᤢᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤖᤡᤱᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤳᤋᤢᤛᤡᤀᤠᤱ ᤂᤢᤴᤇᤡ᤹ ᤕᤧᤵᤐᤠᤜᤠ᤹ᤏᤢ ᤛᤥᤛᤥᤖᤡᤰ ᤕᤢᤖᤢᤵ ᤘᤖᤢᤵ ᤔᤧᤕᤧ᤺ᤰᤂᤢ ᤔᤧᤍᤣᤛᤢᤛᤡ॥ 25 ᤂᤧᤒᤩᤠᤱ ᤍᤠᤖᤠ ᤜᤠᤱᤅᤡᤸᤗᤧ ᤜᤠᤱᤈᤢᤶ ᤁᤧᤖᤧᤰᤐᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤘᤣ᤹ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹. ᤀᤰᤋᤱᤒᤠ ᤛᤠᤵᤋᤢᤀᤠᤱ ᤜᤠᤰᤋᤢᤛᤡᤖᤥ— “ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖᤖᤥ᥄ 26 “ᤀᤠᤱᤃᤠ᤹ ᤀᤠᤜᤠᤱᤈᤢᤶ ᤁᤧᤖᤧᤰᤐᤠ ᤔᤏᤠᤜᤠ᤹ᤖᤧ ᤍᤠᤏᤡᤀᤧᤗᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤃᤡᤖᤢᤖ ᤜᤧᤰᤁᤩᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤴ ᤀᤡᤱᤈᤠᤱᤅᤡᤴ ᤀᤢᤘᤠ ᤆᤥᤃᤢᤱᤗᤥ॥ “ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤔᤧᤔᤧᤰᤏᤧᤴᤗᤥ ᤂᤢᤏᤧ᤹ ᤁᤢᤜᤠᤱᤕᤢᤰᤁᤡᤴ ᤀᤠᤓᤧᤸᤗᤧᤀᤠᤱ ᤔᤧᤏᤢᤵᤏᤧᤴᤗᤥ॥ 27 ᤂᤢᤏᤧ᤹ ᤁᤢᤔᤏᤠᤜᤠ᤹ ᤋᤠᤱᤛᤧ᤺ᤵᤋᤢᤛᤡᤀᤠᤱ ᤛᤧ᤺ᤵᤋᤢᤛᤡᤖᤥ ᤂᤢᤏᤧ᤹ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤖᤥ॥ ᤂᤡᤖᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤰᤛᤠᤶᤔᤥᤗᤠᤶ ᤂᤢᤏᤧ᤹ ᤍᤠᤏᤡᤀᤧᤗᤧᤴ ᤋᤠᤱᤛᤧ᤺ᤵᤋᤢᤀᤠᤱ ᤘᤠ᤹ᤖᤥ॥” 28 ᤁᤸᤗᤧᤆᤥᤃᤢᤸᤗᤧ ᤍᤠᤖᤠ᤺ᤸᤗᤧ ᤁᤢᤜᤠᤱᤕᤢᤰ ᤏᤢ ᤑᤠᤖᤛᤡ ᤁᤥᤖᤣᤛᤖᤧ ᤁᤢᤜᤠᤱᤕᤢᤰᤁᤥ ᤍᤠᤏᤡᤀᤧᤗᤖᤧ ᤁᤢᤏᤢ᤹ᤔᤠ ᤁᤢᤍᤠᤔᤠ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.