ᤍᤠᤏᤡᤀᤧᤗ 5 - LIFOTNTᤗᤢᤱᤎᤠᤰᤁᤥ ᤔᤧᤛᤠᤵᤋᤢᤀᤠᤱ ᤁᤧᤒᤵᤐᤠ ᤛᤰᤛᤰᤜᤠ᤹ 1 ᤕᤖᤡᤰ ᤋᤱᤒᤣ ᤀᤣᤃᤠᤱ ᤒᤣᤗᤛᤈᤖ ᤜᤠᤱᤅᤡᤸᤗᤧ ᥇.᥆᥆᥆ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤗᤳᤇᤠ ᤕᤶᤒᤠ ᤛᤠᤓ᤺ᤱᤈᤠ ᤆᤠ᤺ᤳᤋᤢᤛᤡ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤛᤥᤖᤡᤰ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤅᤢ॥ 2 ᤒᤣᤗᤛᤈᤖᤧᤸᤗᤧ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤅᤢᤖ ᤕᤢᤅᤧᤸᤗᤧ ᤜᤠᤱᤅᤡᤸᤗᤧ ᤏᤢ ᤂᤢᤏᤧ᤹ ᤁᤢᤛᤢᤜᤠᤱ ᤕᤢᤰᤐᤠᤜᤠ᤹ᤖᤧ. ᤂᤢᤏᤧ᤹ ᤁᤢᤔᤣ᤺ᤳᤜᤠ᤹ᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤰᤔᤣ᤺ᤳᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤱᤔᤠᤖᤧᤗᤠᤃᤡ ᤂᤢᤏᤧ᤹ ᤁᤢᤶᤒᤠ ᤏᤒᤢᤁᤍᤏᤣᤛᤖᤧᤸᤗᤧ ᤕᤖᤢᤛᤗᤧ᤺ᤶᤒᤠ ᤔᤠᤱᤜᤡᤶᤔᤥᤗᤠᤶ ᤑᤧᤳᤋᤢᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤂᤢᤏᤧ᤹ ᤂᤧᤵᤔᤥ ᤋᤠ᤺ᤵᤔᤠ ᤀᤡᤱᤈᤠᤱ ᤐᤡᤖᤢᤛᤡ॥ 3 ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤔᤧᤍᤠᤖᤢ. ᤂᤧᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤔᤠᤱᤜᤡᤶ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤗᤠᤶ ᤔᤧᤓᤧᤳᤋᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ. ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ. ᤂᤢᤏᤧ᤹ ᤁᤢᤔᤣ᤺ᤳᤜᤠ᤹ᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤰᤔᤣ᤺ᤳᤜᤠ᤹ᤖᤧ ᤂᤧᤱᤜᤠ᤹ᤗᤠᤶ ᤔᤧᤎᤢᤅᤢ॥ 4 ᤀᤠᤸᤗ ᤂᤧᤱᤜᤠ᤹ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤏᤢ ᤔᤧᤕᤢᤅᤧᤸᤗᤧ. ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱ. ᤕᤢᤵᤐᤠ. ᤁᤠᤛᤠ. ᤑᤧᤴᤈᤣ᤹. ᤛᤡᤱ ᤏᤢ ᤗᤢᤱ ᤔᤠᤱᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤛᤡ॥ 5 ᤆᤄᤵ ᤜᤠᤱᤜᤡᤶᤔᤥ ᤁᤧᤕᤢᤱᤒᤠ ᤇᤰᤁᤱᤅᤡᤸᤗᤧ ᤁᤢᤒᤣᤛᤠᤱ ᤗᤳᤇᤠ ᤔᤧᤴᤇᤠᤶ ᤕᤠᤵᤔᤡ ᤜᤢᤰᤆᤥ᤺ᤰᤜᤠ᤹ ᤏᤡᤎᤠᤒᤧ ᤜᤧᤰᤁᤩᤠᤱ ᤗᤧᤱᤔᤏᤠᤒᤠ ᤗᤢᤱᤎᤠᤰᤁᤥ ᤛᤠᤵᤔᤠ ᤜᤣ᤺ᤰᤋᤢ॥ ᤂᤧᤴ ᤁᤧᤛᤠᤵᤐᤠᤖ ᤁᤧᤒᤵᤐᤠ ᤜᤢᤰᤁᤡᤴ ᤜᤠᤱᤅᤡᤸᤗᤧ ᤏᤡᤛᤢ॥ 6 ᤂᤢᤏᤧ᤹ ᤁᤢᤏᤠᤖᤠᤴ ᤀᤶᤍᤠᤱᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤐᤃᤡ ᤁᤡᤛᤧᤀᤠᤱ ᤌᤧᤃᤰᤁᤰᤏᤠ ᤕᤰᤂᤧᤸᤗᤧ ᤂᤢᤏᤧ᤹ ᤁᤢᤎᤢᤱᤒᤥᤜᤠ᤹ ᤌᤰᤔᤠ ᤜᤣ᤺ᤰᤋᤧᤀᤠᤱ ᤁᤢᤗᤠᤱᤜᤠ᤹ ᤗᤧᤒ᤻ᤈᤢᤈᤢᤒᤠ ᤐᤥ᤺ᤰᤂᤧ॥ 7 ᤜᤠᤱᤅᤡᤸᤗᤧ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠᤜᤠ᤹. ᤂᤠᤃᤧᤀᤡᤰᤐᤠᤜᤠ᤹ ᤏᤢ ᤌᤢᤶᤔᤩᤠ ᤁᤧᤀᤡᤒᤠᤜᤠ᤹ ᤀᤢ᤺ᤵᤔᤠ ᤋᤠ᤺ᤵᤔᤠ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤒᤣᤒᤡᤗᤥᤏᤒᤠ ᤁᤴ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤁᤴ ᤛᤠᤵᤔᤏᤠᤒᤠᤴ ᤏᤡᤖᤢᤀᤠᤱ ᤁᤸᤗᤧ ᤁᤢᤒᤣᤴ ᤀᤠᤱᤃᤠ᤹ ᤆᤧᤰᤁᤠ. ᤂᤧᤴ ᤐᤖᤠᤴᤗᤠ ᤜᤠᤱᤍᤣᤳ ᤆᤠᤰᤔᤠ ᤐᤥᤱ᤹. ᤂᤧᤸᤗᤧ ᤁᤢᤏᤡ᤺ᤱᤔᤥ ᤛᤠᤶᤔᤩᤠᤱ ᤛᤡᤰᤁᤪᤡ᤺ᤴ ᤘᤠ᤺ᤵᤔᤠ ᤐᤥᤱ᤹ ᤂᤧᤒᤩᤠᤱ ᤁᤴ ᤜᤠᤱᤈᤢᤶᤒᤠ ᤛᤢᤶᤛᤡᤃᤣᤰᤐᤠ ᤋᤠᤰᤑᤠᤀᤥᤒᤠ ᤕᤶᤒᤠ ᤕᤢᤰᤛᤠᤒᤠ ᤆᤥ᤺ᤰᤔᤠ ᤐᤥᤱ᤹॥” 8 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤃᤧᤖᤧᤰ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤔᤧᤍᤩᤧ. ᤁᤖ ᤂᤧᤱᤜᤠ᤹ᤖᤧ ᤁᤴ ᤛᤠᤵᤋᤧᤀᤠᤱ ᤁᤧᤒᤵᤐᤠᤴ ᤏᤡ᤺ᤵᤔᤠ ᤏᤢ ᤂᤧᤸᤗᤧ ᤁᤢᤒᤣᤴ ᤜᤠᤱᤅᤡᤴ ᤆᤧᤰᤔᤠ ᤔᤧᤴᤇᤢᤰᤋᤢᤴ॥ 9 ᤁᤸᤗᤧᤆᤥᤃᤢᤸᤗᤧ ᤒᤣᤗᤛᤈᤖ ᤜᤠᤱᤅᤡᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤡᤛᤧᤀᤠᤱ ᤁᤢᤏᤠᤖᤠᤴ ᤀᤶᤃᤧᤗ᤹ᤒᤠ ᤐᤥ᤺ᤰᤂᤧᤖ ᤐᤣ॥ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤏᤠᤰᤋᤧᤔᤧᤒᤣ॥ 10 ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤜᤠᤱᤅᤡᤸᤗᤧ ᤁᤢᤶᤔᤠᤖᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤛᤠᤓ᤺ᤱᤈᤠ ᤆᤠᤔᤠ ᤕᤠᤰᤑᤠᤱᤅᤥ ᤗᤠᤛᤧᤍᤩᤧ ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱᤅᤡᤴ ᤔᤧᤳᤋᤢ. “ᤐᤕᤶ ᤜᤠᤱᤅᤣ ᤁᤧᤎᤠ᤺ᤰ ᤆᤠ᤹ᤖᤖᤥ᥄ ᤂᤧᤏᤧ᤹ ᤁᤧᤕᤱᤔᤠ ᤔᤧᤃᤧᤖᤧᤴᤏᤧ᤹॥ ᤁᤶᤓᤗ᤹ᤖᤡᤰ ᤁᤧᤏᤠᤖᤠᤴ ᤀᤶᤃᤧᤗ᤹ᤒᤠ ᤔᤧᤈᤥᤃᤧᤴᤏᤧ᤹॥ 11 ᤂᤧᤏᤧ᤹ ᤁᤧᤜᤠᤱᤈᤢᤶᤔᤥ ᤔᤏᤠᤎᤡᤰ ᤘᤠ᤹. ᤛᤣᤛᤣ ᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤂᤧᤸᤗᤧ ᤁᤳᤋᤢ᤹॥ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤕᤧᤶᤔᤥ ᤔᤠᤱᤜᤠ᤹ ᤁᤢᤀᤡᤛᤡᤰ ᤂᤢᤏᤧ᤹ᤀᤥ ᤀᤡ᤺ᤳᤇᤡᤱᤛᤠᤶ. ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤧᤜᤡᤏᤡᤱᤘᤠ᤹ ᤂᤥᤔᤏᤠᤀᤠᤱ ᤘᤕᤧ॥ ᤁᤧᤶᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤂᤢᤏᤧ᤹ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹. ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠᤜᤠ᤹. ᤂᤠᤃᤧᤀᤡᤰᤐᤠᤜᤠ᤹ ᤏᤢ ᤌᤢᤶᤔᤩᤠ ᤁᤧᤀᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤠ ᤔᤏᤠ ᤕᤢᤰᤋᤡᤱ ᤆᤥᤃᤢᤀᤠᤱ ᤘᤕᤧ॥ 12 ᤁᤴ ᤍᤠᤏᤡᤀᤧᤗ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤴ ᤜᤠᤱᤅᤡᤸᤗᤧ ᤂᤢᤏᤧ᤹ ᤒᤣᤗᤋᤛᤈᤖ ᤔᤧᤳᤋᤢ. ᤁᤢᤏᤡᤱᤘᤠ ᤜᤠᤃᤧᤛᤢᤰᤐᤠ ᤏᤢ ᤛᤡᤰᤁᤢᤶᤛᤠᤒᤠ ᤜᤧᤰᤁᤩᤠᤱ ᤂᤠᤛᤡᤱᤃᤧᤏᤡ᤺ᤵᤐᤠ ᤆᤥᤃᤧᤒᤠ ᤂᤥᤍᤧᤳᤋᤧ ᤜᤧᤰᤁᤩᤠᤱ ᤂᤧᤴᤏᤢ ᤛᤥᤛᤥᤖᤡᤰ ᤂᤧᤸᤗᤧ ᤛᤧᤵᤔᤠᤱᤅᤡᤸᤗᤧ ᤁᤢᤒᤣ ᤜᤶᤔᤠ. ᤀᤠᤵᤋᤥᤜᤠ᤹ ᤑᤠ᤺ᤱᤔᤠ ᤜᤧᤰᤁᤩᤠᤱ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤋᤱᤔᤠᤀᤠᤱ ᤛᤢᤰᤋᤢ॥ ᤍᤠᤏᤡᤀᤧᤗᤧᤴ ᤀᤢ᤺ᤳᤋᤧ᤹. ᤂᤧᤒᤩᤠᤱ ᤂᤢᤏᤧ᤹ ᤁᤴ ᤛᤠᤵᤋᤧᤀᤠᤱ ᤁᤧᤒᤵᤐᤧᤸᤗᤧ ᤁᤢᤒᤣᤴ ᤂᤧᤏᤧ᤹ ᤔᤧᤵᤔᤠ ᤁᤧᤛᤢᤰᤗᤥ॥” ᤍᤠᤏᤡᤀᤧᤗᤖᤧ ᤛᤠᤵᤔᤏᤠᤒᤧᤸᤗᤧ ᤁᤢᤒᤣᤴ ᤜᤴᤍᤢ 13 ᤁᤸᤗᤧᤆᤥᤃᤢᤸᤗᤧ ᤍᤠᤏᤡᤀᤧᤗᤧᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤧᤍᤠᤖᤢ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤶᤒᤠ ᤜᤠᤱᤅᤡᤸᤗᤧ. ᤕᤜᤢᤍᤠ ᤗᤠᤈᤣ᤹ᤗᤠᤶ ᤗ᤺ᤳᤋᤢ ᤑᤧᤳᤋᤢᤛᤡᤀᤠᤱ ᤔᤧᤘᤕᤧᤒᤠᤜᤠ᤹ᤀᤥᤒᤠ ᤂᤧᤏᤧ᤹ ᤍᤠᤏᤡᤀᤧᤗᤧᤴ ᤔᤣ᤺ᤶᤒᤡ᥅ 14 ᤂᤧᤏᤧ᤹ᤀᤥ ᤛᤣᤛᤣ ᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤘᤠ᤹ ᤁᤧᤗ᤹ᤒᤠ ᤀᤠᤱᤃᤠ᤹ ᤂᤧᤵᤛᤢᤱ. ᤜᤧᤰᤁᤩᤠᤱ ᤂᤧᤏᤧ᤹ ᤀᤡ᤺ᤳᤇᤡᤱᤛᤠᤶ. ᤛᤡᤰᤁᤢᤶᤛᤠᤒᤠ ᤏᤢ ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠ ᤁᤧᤈᤥ᤺ᤰᤔᤢ॥ 15 ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠᤜᤠ᤹ ᤁᤴ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤏᤡ᤺ᤵᤔᤠ ᤜᤧᤰᤁᤩᤠᤱ ᤁᤸᤗᤧ ᤁᤢᤒᤣᤴ ᤀᤠᤱᤃᤠ᤹ ᤆᤧᤰᤔᤠᤖᤧ ᤗᤠᤃᤡ ᤀᤠᤍᤃᤡ ᤔᤧᤍᤠᤖᤢᤛᤡ॥ ᤁᤖ ᤂᤧᤱᤜᤠ᤹ᤖᤧ ᤁᤢᤒᤣᤴ ᤜᤶᤔᤠ ᤔᤧᤴᤇᤢᤰᤋᤢᤴ॥ 16 ᤀᤠᤸᤗ ᤂᤧᤏᤧ᤹ ᤁᤢᤒᤣ ᤜᤶᤔᤠ ᤏᤢ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤋᤱᤔᤠ ᤁᤧᤛᤢᤰᤋᤢᤔᤢ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹॥ ᤂᤧᤏᤧ᤹ ᤁᤴ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤏᤡ᤺ᤵᤔᤠ ᤏᤢ ᤁᤸᤗᤧ ᤁᤢᤒᤣᤴ ᤜᤶᤔᤠ ᤁᤧᤛᤢᤰᤋᤢᤏᤧᤓᤃᤪ. ᤂᤧᤏᤧ᤹ ᤐᤖᤠᤴᤗᤠ ᤆᤠᤱ ᤁᤧᤶᤈᤠᤰ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡ᤺ᤱᤔᤥ ᤛᤠᤶᤔᤩᤠᤱ ᤛᤡᤰᤁᤪᤡ ᤁᤧᤔᤫᤠᤳ ᤂᤧᤒᤩᤠᤱ ᤗᤠᤈᤣ᤹ᤀᤥ ᤂᤧᤏᤧ᤹ ᤛᤢᤶᤛᤡᤃᤣᤰᤐᤠ ᤋᤠᤰᤑᤠᤀᤥ ᤕᤶᤒᤠ ᤁᤧᤒᤥᤱ᤹॥” 17 ᤂᤧᤒᤩᤠᤱ ᤍᤠᤏᤡᤀᤧᤗᤖᤧ ᤜᤠᤱᤅᤡᤴ ᤏᤢᤃᤵ ᤐᤡᤖᤢ. “ᤀᤠᤍᤠᤱᤒᤠᤖᤧ ᤁᤧᤔᤡᤰᤋᤥᤰᤜᤠ᤹ ᤀᤠᤍᤠᤱᤒᤠᤖᤧ ᤀᤠᤵᤑᤣᤰ ᤁᤳᤋᤧ᤹ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤜᤠᤱᤛᤧᤶᤜᤠ᤹ ᤘᤣ᤹ ᤔᤏᤠᤜᤠ᤹ ᤐᤡᤖᤧᤛᤧ᤹॥ ᤜᤧᤰᤁᤣᤛᤠᤱ ᤐᤕᤶ ᤜᤠᤱᤅᤡᤸᤗᤧ ᤁᤧᤗᤠᤃᤡ ᤁᤴ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤏᤡᤖᤢᤱ ᤐᤡᤏᤧ ᤜᤧᤰᤁᤩᤠᤱ ᤁᤸᤗᤧ ᤁᤢᤒᤣᤴ ᤜᤴᤍᤢᤱ ᤐᤡᤏᤧᤖᤥ॥ 18 “ᤐᤕᤶ ᤜᤠᤱᤅᤣ. ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠᤖᤧ ᤁᤧᤶᤒᤠ ᤏᤒᤢᤁᤍᤏᤣᤛᤖᤧᤴ ᤗᤳᤇᤠ ᤜᤠᤱᤈᤢᤶᤜᤠ᤹ᤀᤥ ᤕᤢᤰ ᤏᤢ ᤐᤕᤶ ᤕᤶᤒᤠ ᤜᤧᤰᤁᤩᤠᤱ ᤔᤡᤔᤡᤍᤡᤱ ᤏᤢ ᤜᤠᤱᤘᤠ ᤔᤠᤱᤘᤠ ᤐᤡᤖᤢ॥ 19 ᤂᤢᤏᤧ᤹ ᤂᤧᤴ ᤕᤶᤒᤠ ᤋᤠᤰᤑᤠ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤘᤣ᤹ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤧ᤹ ᤔᤧᤃᤡᤖᤢᤀᤠᤱ ᤔᤧᤕᤰᤂᤧ॥ ᤜᤠᤱᤅᤡᤸᤗᤧ ᤀᤠᤳᤋᤡᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢ. ᤂᤧᤴ ᤛᤧᤖᤢ ᤜᤧᤰᤁᤩᤠᤱ ᤀᤠᤳᤋᤡᤴ ᤋᤠᤱᤔᤠ ᤏᤡᤱᤘᤠ᤹ ᤆᤥᤃᤢ. ᤂᤧᤴ ᤋᤠᤱᤄᤢ. ᤀᤠᤳᤋᤡᤴ ᤕᤶᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ. ᤂᤧᤴ ᤕᤶᤒᤠ ᤆᤥᤃᤢ. ᤂᤶᤓᤩᤠᤱ ᤀᤠᤳᤋᤡᤴ ᤆᤢᤰᤐᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ. ᤂᤧᤴ ᤆᤢᤰᤐᤠ ᤆᤥᤃᤢ॥ 20 ᤁᤖ ᤂᤢᤏᤧ᤹ ᤁᤢᤏᤡᤱᤘᤠᤴ ᤕᤶᤒᤠ ᤜᤧᤴᤇᤡᤱᤔᤠᤖᤧ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤏᤢ ᤀᤠᤱᤍᤡᤱ ᤁᤧᤗ᤹ᤒᤠ ᤐᤥ᤺ᤰᤂᤧᤀᤠᤱ ᤜᤠᤱᤕᤢᤰᤏᤠᤀᤥᤗᤠᤶ ᤂᤢᤏᤧ᤹ ᤔᤧᤗ᤺ᤳᤋᤢ ᤔᤧᤍᤣᤛᤢ ᤜᤧᤰᤁᤩᤠᤱ ᤁᤢᤔᤡᤔᤡᤍᤡᤱᤅᤡᤴ ᤂᤢᤏᤧ᤹ ᤔᤧᤏᤠᤵᤋᤢ॥ 21 ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤈᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤁᤠᤰ ᤕᤢᤰ ᤁᤳᤋᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤧᤴ ᤀᤠᤳᤋᤡᤴᤇᤠᤱ ᤂᤧᤴ ᤜᤠᤱᤈᤢᤶᤜᤠ᤹ ᤐᤡᤖᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤔᤧᤴᤍᤧᤴᤏᤣ ᤌᤠᤖᤡᤰ ᤂᤢᤏᤧ᤹ ᤔᤏᤠᤜᤠ᤹ᤗᤠᤶ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤀᤠᤱ ᤗᤳᤇᤠ ᤌᤰᤛᤠ ᤏᤡᤱᤘᤠ᤹ ᤔᤧᤒᤡᤖᤢ॥ ᤂᤢᤏᤧ᤹ ᤋᤠᤶᤓᤢᤱᤅᤥᤒᤠ ᤀᤍᤱᤜᤠ᤹ᤏᤢ ᤘᤕᤧ ᤜᤧᤰᤁᤩᤠᤱ ᤐᤡᤳᤌᤰᤛᤠ ᤀᤡᤛᤡ᤺ᤰ ᤕᤠ᤺ᤴᤛᤢᤱᤜᤠ᤹ ᤆᤀᤠᤱ ᤘᤕᤧ. ᤂᤶᤓᤩᤠᤱ ᤂᤢᤏᤧ᤹ ᤁᤢᤎᤰᤁᤡᤴ ᤋᤠᤱᤛᤠᤱᤒᤥᤒᤠ ᤛᤣ᤺ᤰᤘᤠ᤺ᤸᤗᤧ ᤘᤠᤖᤰᤋᤧ॥ 22 “ᤁᤖ ᤂᤢᤏᤧ᤹ ᤁᤢᤛ᤻ᤛᤠ. ᤀᤠᤍᤠᤱᤒᤠ ᤒᤣᤗᤛᤈᤖᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤕᤧᤛᤠᤱ ᤀᤠᤵᤑᤣᤰ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤁᤧᤴᤈᤥ᤺ᤰᤛᤡᤱᤅᤡᤴ॥ 23 ᤂᤧᤴᤏᤢ᤺ᤸᤗᤧᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤵᤑᤣᤰ ᤁᤧᤒᤥᤃᤧᤀᤠᤱ ᤁᤧᤘᤠ᤹॥ ᤀᤠᤍᤠᤱᤒᤠᤖᤧ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤂᤧᤏᤧ᤹ᤀᤥ ᤋᤠ᤺ᤵᤔᤠ ᤁᤧᤒᤠᤱᤄᤢᤛᤡ. ᤜᤧᤰᤁᤩᤠᤱ ᤀᤠᤍᤠᤱᤒᤠ ᤏᤢ ᤀᤠᤍᤠᤱᤒᤠᤖᤧ ᤁᤧᤛᤢᤜᤠᤱᤕᤢᤰᤐᤠᤜᤠ᤹. ᤀᤠᤍᤠᤱᤒᤠᤖᤧ ᤁᤧᤔᤣ᤺ᤳᤜᤠ᤹ ᤏᤢ ᤁᤧᤈᤰᤔᤣ᤺ᤳᤜᤠ᤹ᤖᤧ ᤂᤧᤴ ᤛᤠᤔᤠᤜᤠ᤹ᤀᤥ ᤆᤧᤸᤗᤧᤰᤛᤣ᤹ ᤌᤡ ᤁᤧᤎᤢᤅᤢᤶ॥ ᤂᤧᤒᤩᤠᤱ ᤔᤡᤰᤔᤧᤴᤏᤡᤔᤏᤠᤒᤠ. ᤏᤠᤔᤧᤱᤄᤧᤶᤔᤏᤠᤒᤠ ᤏᤢ ᤂᤠᤛᤡᤱ ᤔᤧᤴᤏᤡ᤺ᤵᤏᤠᤒᤠ ᤕᤢᤵᤐᤠ. ᤛᤠᤶᤔᤩᤠᤱ ᤁᤠᤛᤠ. ᤑᤧᤴᤈᤣ᤹. ᤛᤡᤱ ᤏᤢ ᤗᤢᤱ ᤔᤠᤱᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤖᤢᤶᤛᤡᤶ॥ ᤁᤖ ᤀᤠᤍᤠᤱᤒᤠᤖᤧ ᤁᤧᤜᤡᤱᤔᤴ ᤏᤢ ᤀᤠᤍᤠᤱᤒᤠᤖᤧ ᤁᤧᤗᤠᤶᤜᤠ᤹ ᤜᤢᤰᤁᤥ ᤁᤧᤃᤵᤐᤠ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤍᤠᤱᤒᤠᤖᤧ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤢᤴ॥ 24 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤴ ᤛᤢᤳᤗᤠ ᤁᤧᤛᤠᤵᤐᤠ ᤜᤢᤰᤁᤡᤴ ᤐᤠᤱᤄᤢ ᤕᤢᤛᤢᤖᤥ॥ 25 “ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤢᤳᤗᤠᤴ ᤀᤰᤋᤱᤒᤠ ᤐᤳᤗᤥ—ᤔᤣᤏᤣ. ᤔᤣᤏᤣ. ᤋᤣᤁᤣᤗ. ᤐᤷᤛᤡᤏ 26 ᤁᤴ ᤛᤢᤳᤗᤠᤜᤠ᤹ᤖᤧ ᤁᤢᤒᤣ᤺ᤱᤃ ᤜᤠᤒᤠ ᤁᤴᤗᤥ— ᤔᤣᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠᤖᤧ ᤁᤧᤜᤠᤱᤕᤢᤰ ᤆᤥ᤺ᤰᤔᤠ ᤕᤧᤴᤜᤠ᤹ ᤏᤡᤖᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤴ ᤏᤢᤵᤛᤢᤀᤠᤱ ᤘᤠ᤹ᤖᤥ॥ 27 ᤋᤣᤁᤣᤗ ᤀᤠᤍᤠᤱᤒᤠ ᤐᤠᤛᤠᤱᤃᤠᤀᤥ ᤁᤧᤶᤎᤠᤱᤄᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤱᤕᤠᤱᤒᤠ ᤁᤧᤒᤥ᤺ᤰᤂᤧᤒᤠ ᤔᤧᤏᤡᤛᤢᤀᤠᤱ ᤘᤠ᤹ᤖᤥ॥ 28 ᤐᤣᤖᤣᤛ ᤀᤠᤍᤠᤱᤒᤠᤖᤧ ᤁᤧᤜᤠᤱᤈᤢᤶᤔᤡᤴ ᤐ᤺ᤰᤂᤧ ᤜᤧᤰᤁᤩᤠᤱ ᤔᤠᤍᤡ ᤏᤢ ᤑᤠᤖᤛᤡᤜᤠ᤹ ᤔᤧᤒᤡᤖᤢᤛᤡᤀᤠᤱ ᤏᤧᤖᤥ॥” 29 ᤂᤧᤴ ᤀᤣᤃᤠᤱ ᤒᤣᤗᤛᤈᤖᤖᤧ ᤁᤢᤀᤡᤱᤈᤠᤱᤅᤥ ᤍᤠᤏᤡᤀᤧᤗᤧᤴ ᤐᤖᤠᤴᤗᤠ ᤆᤠᤱ ᤔᤧᤈᤠᤰᤋᤢ॥ ᤁᤢᤛᤡᤳᤗᤠᤀᤥ ᤔᤡᤱᤛᤥ ᤛᤠᤶᤔᤩᤠᤱ ᤛᤡᤰᤁᤪᤡ ᤔᤧᤘᤠ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱᤈᤢᤶᤔᤥᤒᤠ ᤛᤢᤶᤛᤡᤃᤣᤰᤐᤠ ᤕᤶᤒᤠ ᤋᤠᤰᤑᤠᤀᤥᤒᤠ ᤕᤢᤰᤛᤠᤒᤠ ᤑᤠ᤹ᤀᤠᤱ ᤀᤢᤘᤠ ᤔᤧᤈᤥᤃᤢ॥ 30 ᤀᤠᤶᤓᤠ ᤂᤧᤴ ᤛᤧᤴᤍᤡᤰᤛᤠ ᤜᤠᤱ ᤒᤣᤗᤛᤈᤖᤧᤴ ᤔᤧᤛᤧᤖᤢ. 31 ᤜᤧᤰᤁᤩᤠᤱ ᤔᤠᤍᤡ ᤍᤠᤖᤠᤴ ᤋᤢᤰᤐᤥᤱᤅᤠᤱ ᤋᤱᤒᤣ ᤏᤧᤳᤇᤡ ᤕᤥᤖᤧᤸᤗᤧ ᤂᤢᤏᤧ᤹ ᤂᤧᤴ ᤜᤠᤱᤈᤢᤶᤔᤡᤴ ᤔᤧᤳᤇᤡᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.