ᤍᤠᤏᤡᤀᤧᤗ 4 - LIFOTNTᤜᤠᤱᤅᤡᤸᤗᤧ ᤏᤡᤛᤡᤃᤣᤰᤐᤠ ᤁᤢᤛᤧᤵᤔᤠᤱ 1 ᤀᤠᤱᤃᤠ᤹ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ. ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤕᤢᤱᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤘᤣ᤹ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤏᤡᤱᤗᤥ— ᤂᤡᤏᤡ᤹ ᤛᤠ᤹ᤖᤡᤰ ᤁᤧᤏᤢᤖᤡ ᤁᤧᤍᤠᤛᤡᤖᤖᤥ᥄ 2 ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤏᤧᤜᤡᤖᤧ ᤔᤧᤴᤎᤠᤵᤔᤏᤠᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤂᤡᤏᤡ᤹ ᤔᤧᤵᤔᤠ ᤂᤥᤏᤡᤱᤅᤡᤸᤗᤧ ᤀᤠᤱᤃᤠ᤹ ᤛ᤺ᤳᤋᤠᤖᤥ॥ 3 ᤂᤢᤏᤧ᤹ ᤁᤢᤔᤡᤰᤛᤣ᤺ᤴᤜᤠ᤹ ᤛᤠ᤹ᤖᤡᤰ ᤕᤶᤒᤠ ᤆᤥᤰᤗᤥ. ᤂᤢᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤁᤢᤕᤠ᤺ᤶᤒᤰᤜᤠ᤹ ᤆᤠ᤹ᤖᤡᤰ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ᥄ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤱᤃ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤠᤱᤈᤢᤶᤗᤥ. ᤂᤢᤏᤧ᤹ ᤁᤢᤜᤠᤱᤕᤢᤰᤁᤡᤴ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤜᤠᤒᤠ ᤘᤠ᤹ᤖᤥ॥ 4 ᤀᤠᤱᤃᤠ᤹ ᤏᤒᤢᤁᤍᤏᤣᤛᤖᤧᤴ ᤀᤠᤏᤡᤱᤘᤠ᤹ ᤋᤠᤔᤠ ᤏᤢ ᤀᤠᤏᤢ᤹ᤔᤠ ᤀᤠᤍᤠᤔᤠᤀᤥ ᤀᤠᤱᤃᤠ᤹ ᤀᤠᤜᤠᤱᤜᤡᤶᤔᤥ ᤕᤢᤅᤠᤱᤗ ᤘᤕᤠᤱ॥ 5 ᤀᤠᤱᤃᤠ᤹ ᤁᤡᤔᤠ ᤕᤱᤔᤠᤀᤥ ᤀᤠᤎᤠᤎᤠᤒᤠ ᤛᤧᤵᤔᤠᤱ ᤌᤡᤰ ᤔᤠᤰᤋᤢᤱ॥ ᤀᤠᤱᤃᤠ᤹ ᤀᤡᤵᤏᤠᤀᤥ ᤛᤥ᤺ᤴᤇᤡᤱᤅᤠᤀᤠᤱ ᤏᤧᤛ᤻ᤛᤠᤱᤅᤡᤸᤗᤧ. ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤏᤢ ᤛᤢᤑᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤆᤡᤈᤡᤱ ᤕᤱᤔᤠ ᤛᤩᤧ᤹ᤀᤠᤱ॥ 6 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤛᤧᤵᤔᤠᤱᤅᤡᤸᤗᤧ ᤁᤢᤒᤣ ᤜᤶᤔᤠᤖᤧ ᤗᤠᤃᤡ ᤒᤣᤒᤡᤗᤥᤏᤒᤠ ᤁᤧᤖᤧᤰ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤀᤠᤱᤃᤠ᤹ ᤀᤠᤍᤃᤡ ᤋᤠ᤺ᤵᤔᤠᤛᤡᤖᤧ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤱᤛᤡᤱ॥ 7 ᤀᤠᤸᤗ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹. ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠᤜᤠ᤹. ᤂᤠᤃᤧᤀᤡᤰᤐᤠᤜᤠ᤹ ᤏᤢ ᤌᤢᤶᤕᤠ ᤁᤧᤀᤡᤒᤠᤜᤠ᤹ ᤔᤧᤍᤩᤧᤀᤠᤱ ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤴ ᤂᤧᤱᤜᤠ᤹ ᤆᤧᤰᤋᤢᤱᤛᤡᤱ. ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤆᤧᤰᤔᤠ ᤔᤧᤴᤇᤢᤰᤋᤠᤱᤅᤡᤴ॥ 8 ᤁᤢᤏᤢᤵᤔᤥ ᤍᤠᤏᤡᤀᤧᤗᤧᤴ ᤀᤠᤱᤃᤠ᤹ᤀᤥ ᤋᤩᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤴ ᤂᤢᤏᤧ᤹ ᤆᤧᤰᤋᤢᤱ॥ (ᤂᤢᤏᤧ᤹ ᤁᤢᤔᤡᤱᤅᤡᤴ ᤀᤠᤱᤃᤠ᤹ ᤀᤠᤔᤠᤱᤅᤡᤸᤗᤧ ᤁᤢᤔᤡᤱ ᤁᤢᤀᤡᤛᤡᤰ ᤒᤣᤗᤋᤛᤈᤖ ᤘᤕᤧ. ᤛᤣᤛᤣ ᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤂᤢᤏᤧ᤹ᤀᤥ ᤘᤠ᤹॥) 9 ᤀᤠᤱᤃᤠ᤹ ᤂᤢᤏᤧ᤹ ᤔᤧᤳᤋᤢᤱ. “ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤠ ᤔᤏᤠ. ᤒᤣᤗᤋᤛᤈᤖᤀᤣ. ᤛᤣᤛᤣ ᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤂᤧᤏᤧ᤹ᤀᤥ ᤘᤠ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤃᤡ ᤌᤧᤔᤠ ᤛᤡᤒᤡ᤹ ᤐᤠ᤺ᤴᤏᤡᤴᤏᤠᤱ ᤁᤧᤛᤠᤰᤐᤠ ᤔᤧᤈᤥᤰᤏᤧᤴ॥ ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤴ ᤀᤰᤋᤱᤒᤠ ᤆᤥᤰ. ᤁᤸᤗᤧ ᤁᤢᤒᤣᤴ ᤀᤠᤱᤃᤠ᤹ ᤜᤴᤍᤠᤱ ᤐᤡᤖᤠᤱᤅᤧ᤹॥ 10 ᤀᤡᤵᤏᤠᤀᤥ ᤏᤧᤛ᤻ᤛᤠᤱᤃᤖᤠᤱᤅᤡᤸᤗᤧ ᤀᤠᤱᤃᤠ᤹ ᤏᤡᤛᤢᤱᤒᤠ ᤛᤢᤑᤥᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤀᤠᤱᤃᤠ᤹ ᤀᤰᤋᤱᤒᤠ ᤏᤡᤛᤢᤱ᤹. ᤀᤠᤱᤃᤠ᤹ ᤀᤠᤍᤃᤡ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤗᤢᤶᤔᤥ ᤕᤶᤒᤠ ᤛᤡᤱᤒᤢᤱᤎᤡᤰ ᤋᤰᤐᤧᤳ ᤕᤢᤅᤧ॥ ᤂᤧᤴ ᤀᤠᤳᤋᤠᤋᤠᤴᤏᤣ ᤁᤣ᤺ᤶᤒᤠ ᤆᤥᤃᤧ॥ 11 ᤂᤧᤴ ᤛᤡᤱᤒᤢᤱᤅᤡᤴ ᤕᤶᤒᤠ ᤏᤢ ᤁᤧᤎᤢᤶᤒᤠ ᤐᤥ᤺ᤰᤂᤧᤖ ᤐᤣ ᤂᤶᤓᤩᤠᤱ ᤁᤢᤛᤶᤔᤡᤸᤗᤧ ᤋᤠᤱᤛᤠᤱᤒᤧᤴ ᤛᤢᤛᤢ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤁᤢᤕᤠᤀᤥ ᤌᤠᤖᤡᤰ ᤀᤠᤳᤋᤡᤛᤠᤱ ᤂᤧᤴ ᤏᤡᤍᤧᤳᤋᤧ॥ 12 ᤂᤧᤸᤗᤧ ᤁᤢᤓᤧᤰᤘᤠᤜᤠ᤹ ᤏᤢᤒᤠ ᤏᤢ ᤂᤧᤸᤗᤧ ᤁᤢᤈᤠ᤹ᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤐᤳᤇᤧ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤖᤧᤰᤗᤧ ᤗᤠᤃᤡ ᤁᤢᤈᤠᤔᤠ ᤆᤠᤜᤠ᤹ ᤐᤳᤇᤧ॥ ᤂᤧᤸᤗᤧ ᤁᤢᤛᤡᤃᤠᤱ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤏᤧᤳᤏᤠᤍᤧᤴ ᤔᤧᤄᤥᤛᤢᤀᤠᤱ ᤘᤕᤧ. ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ᤀᤥ ᤐᤢᤜᤠ᤹ ᤔᤧᤕᤢᤅᤧ. ᤂᤧᤵᤔᤥᤗᤠᤶ ᤁᤧᤖᤧᤰ ᤌᤰᤛᤠ ᤐᤢᤛᤠᤜᤠ᤹ᤖᤧ ᤆᤠᤔᤠ ᤔᤧᤄᤥᤛᤢ॥ 13 “ᤀᤡᤵᤏᤠᤀᤥ ᤛᤥ᤺ᤴᤇᤡᤱᤅᤠᤀᤠᤱ ᤏᤧᤛ᤻ᤛᤠᤱᤅᤡᤸᤗᤧ ᤀᤠᤱᤃᤠ᤹ ᤛᤢᤑᤥᤀᤥ ᤀᤠᤍᤃᤡ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤗᤳᤇᤠ ᤔᤠᤱᤗᤠᤀᤡᤱᤒᤠ ᤀᤡᤱᤄᤱᤛᤠᤒᤠ. ᤛᤣᤛᤣ ᤔᤏᤠᤎᤡᤰ ᤕᤥ ᤕᤧᤖ ᤐᤳᤇᤧᤒᤠ ᤏᤡᤛᤢᤱ॥ 14 ᤂᤧᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤀᤠᤱ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤧᤴ ᤛᤡᤱᤒᤢᤱᤅᤡᤴ ᤋᤠᤅᤧᤶᤔᤧ᤹ᤀᤠᤱ ᤛᤥ᤺ᤴᤍᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤁᤢᤒᤥᤖᤠᤰᤜᤠ᤹ ᤂᤰᤋᤧᤶᤍᤣᤛᤧᤶᤔᤧ᤹ᤀᤥ. ᤂᤧᤸᤗᤧ ᤁᤢᤓᤧᤰᤘᤠᤜᤠ᤹ ᤗᤢ᤺ᤰᤛᤧᤶᤍᤣᤛᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠ᤹ᤜᤠ᤹ ᤜᤳᤇᤧ ᤜᤳᤇᤧ ᤛᤧᤛᤧᤶᤍᤣᤛᤧᤶᤔᤧ᤹ᤀᤥ॥ ᤂᤧᤸᤗᤧ ᤁᤢᤛᤡᤃᤠᤱᤗᤠᤶᤒᤠ ᤌᤰᤛᤠᤜᤠ᤹ ᤏᤢ ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ᤀᤥᤗᤠᤶ ᤐᤢᤜᤠ᤹ ᤔᤧᤄᤧᤳᤇᤡᤱᤗᤖᤥ॥ 15 ᤁᤖ ᤑᤧᤴᤈᤣ᤹ ᤏᤢ ᤁᤠᤛᤠ᤺ᤸᤗᤧ ᤂᤣ᤺ᤱᤔᤏᤠᤒᤠ ᤂᤧᤸᤗᤧ ᤁᤢᤔᤢ᤺ᤳᤋᤧᤴ ᤏᤢ ᤁᤢᤛᤠ᤺ᤵᤜᤠ᤹ ᤂᤠᤶᤒᤠᤱᤅᤥ ᤀᤡᤰᤋᤠᤵᤐᤥᤒᤠ ᤕᤠᤴ ᤁᤢᤀᤡᤛᤡᤰ ᤕᤢᤰᤂᤧᤶᤔᤧ᤹ᤀᤥ॥ ᤋᤠᤱᤛᤠᤰᤐᤥᤒᤠ ᤛᤣ᤺ᤰᤘᤠ᤺ᤸᤗᤧ ᤂᤧᤴ ᤘᤠᤖᤰᤂᤢᤖᤖᤥ. ᤜᤧᤰᤁᤩᤠᤱ ᤌᤰᤛᤠᤜᤠ᤹ᤏᤢ ᤛᤥᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤡᤱᤓᤧᤰᤘᤠ ᤕᤠ᤺ᤴᤜᤠ᤹ᤖᤧ ᤁᤢᤗᤢᤶᤔᤥ ᤕᤢᤱᤕᤠ᤺ᤰᤗᤖᤥ॥ 16 ᤏᤢᤛᤡᤗᤧᤱ ᤕᤧᤶ ᤁᤢᤃᤵ ᤔᤧᤗᤧᤰᤏᤧᤸᤗ ᤌᤠᤖᤡᤰ ᤂᤧᤸᤗᤧ ᤁᤢᤏᤡᤱᤘᤠᤴ ᤔᤏᤠᤗᤠᤶ ᤔᤧᤗᤧᤰᤂᤢᤖᤖᤥ ᤜᤧᤰᤁᤩᤠᤱ ᤌᤰᤛᤠ ᤏᤡᤱᤘᤠ᤹ ᤔᤧᤒᤡᤖᤢᤖᤖᤥ॥ 17 ᤀᤡᤱᤄᤱ ᤁᤧᤛᤠᤒᤠᤜᤠ᤹ᤖᤧ ᤏᤡ᤺ᤴᤎᤥ ᤐᤠ᤺ᤴᤏᤡᤴ ᤔᤧᤔᤧᤳᤋᤢᤛᤡᤀᤠᤱ ᤘᤠ᤹ᤖᤥ. ᤛᤣᤛᤣ ᤔᤏᤠᤜᤠ᤹ᤖᤧ ᤁᤢᤏᤢᤵᤔᤠ ᤐᤠ᤺ᤴᤏᤡᤴ ᤀᤢᤘᤠ ᤔᤧᤈᤥᤃᤢᤖᤥ. ᤜᤧᤰᤁᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤈᤢᤶᤜᤠ᤹ᤀᤥᤒᤠ ᤁᤠᤰ ᤕᤢᤰᤁᤡᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤁᤳᤋᤢ ᤑᤠ᤹ᤀᤠᤱ ᤁᤢᤜᤡᤱᤘᤧᤳᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤠᤜᤠ᤹ ᤂᤧᤴ ᤜᤠᤱᤈᤢᤶᤜᤠ᤹ ᤐᤡᤖᤢᤛᤡᤖᤥ ᤔᤏᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤏ᤺ᤶᤏ᤺ᤶᤒᤠᤜᤠ᤹ ᤂᤧᤴ ᤜᤠᤱᤈᤢᤶᤜᤠ᤹ᤀᤥ ᤑᤥ᤺ᤰᤂᤢᤛᤡᤖᤥ॥ 18 “ᤀᤠᤱᤃᤠ᤹ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤔᤠᤰᤋᤢᤱᤒᤠ ᤛᤧᤵᤔᤠᤱᤅᤡᤴ ᤜᤠᤒᤠ ᤁᤴᤗᤥ॥ ᤀᤠᤸᤗ ᤒᤣᤗᤋᤛᤈᤖᤀᤣ. ᤁᤸᤗᤧ ᤁᤢᤒᤣᤴ ᤀᤠᤱᤃᤠ᤹ ᤜᤴᤍᤠᤱ ᤐᤡᤖᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤜᤠᤱᤈᤢᤶᤔᤥ ᤁᤧᤘᤠ᤹ᤒᤠ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ᤀᤥ ᤀᤠᤳᤋᤡᤸᤗᤧᤀᤠᤱ ᤁᤸᤗᤧ ᤁᤢᤒᤣᤴ ᤜᤶᤔᤠ ᤔᤧᤛᤢᤰᤋᤢᤴ॥ ᤁᤖ ᤂᤧᤏᤧ᤹ ᤁᤧᤛᤢᤰᤋᤢ᤹. ᤌᤣᤀᤠᤱᤓᤧᤸᤗᤧ ᤛᤣᤛᤣ ᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤂᤧᤏᤧ᤹ᤀᤥ ᤘᤠ᤹ᤖᤥ॥” ᤍᤠᤏᤡᤀᤧᤗᤖᤧ ᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤜᤴᤍᤢ 19 ᤍᤠᤏᤡᤀᤧᤗ (ᤂᤢᤏᤧ᤹ ᤒᤣᤗᤋᤛᤈᤖᤀᤠᤱ ᤔᤧᤔᤧᤳᤋᤢ) ᤛᤵᤑᤠ ᤌᤠᤖᤡᤰᤁ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤖᤧ ᤁᤡᤔᤠ ᤕᤱᤔᤠᤀᤥ ᤌᤠᤛᤢ॥ ᤁᤸᤗᤧᤆᤥᤃᤢᤸᤗᤧ ᤔᤧᤳᤋᤢ. “ᤒᤣᤗᤋᤛᤈᤖᤀᤣ. ᤛᤧᤵᤔᤠᤱᤅᤡᤴ ᤏᤢ ᤂᤧᤸᤗᤧ ᤁᤢᤒᤣ᤺ᤸᤗᤧ ᤂᤧᤏᤧ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤁᤧᤴᤎᤠᤏᤧᤴᤗ॥” ᤒᤣᤗᤋᤛᤈᤖᤗᤧ ᤏᤢᤃᤵ ᤐᤡᤖᤢ. “ᤐᤕᤶ ᤜᤠᤱᤅᤣ. ᤁᤴ ᤛᤧᤵᤔᤠᤱᤅᤡᤴ ᤀᤠᤍᤠᤱᤒᤠᤖᤧ ᤁᤧᤏᤡᤱᤔᤡᤜᤠ᤹ ᤏᤢ ᤁᤸᤗᤧ ᤁᤢᤒᤣ᤺ᤸᤗᤧ ᤀᤠᤍᤠᤱᤒᤠ ᤁᤧᤀᤵᤐᤠᤜᤠ᤹ ᤕᤠᤱᤄᤢᤛᤡᤸᤗᤧᤃ ᤏᤢ᤹ᤒᤠ ᤘᤕᤧᤔᤧᤴ॥ 20 ᤀᤠᤍᤠᤱᤒᤠᤖᤧ ᤁᤧᤏᤡᤛᤢᤒᤠ ᤂᤧᤴ ᤛᤡᤱᤒᤢᤱᤅᤡᤴ ᤐᤥᤖᤧᤀᤠᤱ ᤛᤠ᤹ᤖᤡᤰ ᤕᤶᤒᤠ ᤏᤢ ᤁᤧᤎᤢᤶᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤏᤡᤍᤧᤳᤋᤧᤖ ᤌᤠᤖᤡᤰ ᤂᤧᤸᤗᤧ ᤁᤢᤛᤶᤔᤡᤸᤗᤧ ᤋᤠᤱᤛᤠᤱᤒᤧᤴ ᤛᤢᤛᤢ. 21 ᤐᤏᤢᤏᤢᤒᤠ ᤁᤢᤓᤧᤰᤘᤠᤜᤠ᤹ ᤏᤢ ᤕᤖᤡᤰ ᤁᤢᤈᤠ᤹ᤜᤠ᤹ᤖᤧ ᤁᤧᤖᤧᤰ ᤆᤠᤔᤠ ᤐᤡᤖᤢᤛᤡ. ᤋᤠᤶᤓᤢᤱ ᤌᤰᤛᤠᤜᤠ᤹ ᤏᤠᤶᤀᤡ᤺ᤰᤂᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ᤀᤥ ᤋᤠᤱᤛᤠᤱᤒᤥᤒᤠ ᤐᤢᤜᤠ᤹ᤖᤧ ᤂᤢᤴᤇᤡ᤹ ᤜᤠᤵᤜᤠ᤹ ᤕᤢᤅᤧ. 22 ᤐᤕᤶ ᤜᤠᤱᤅᤣ. ᤂᤧᤴ ᤛᤡᤱᤒᤢᤱᤅᤡᤴᤃ ᤀᤠᤍᤠᤱᤒᤠ ᤂᤧᤏᤧ᤹ᤀᤣᤖᤥ॥ ᤀᤠᤍᤠᤱᤒᤠ ᤐᤕᤶ ᤕᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹. ᤀᤠᤍᤠᤱᤒᤠ ᤐᤕᤶ ᤕᤶᤒᤠ ᤁᤧᤒᤥᤰᤂᤧᤒᤠᤴ ᤐᤥᤖᤧᤀᤠᤱ ᤋᤠᤱᤛᤠᤰᤐᤥ ᤌᤠᤖᤡᤰᤁᤣ ᤁᤧᤃᤧᤖᤧᤀᤠᤱ ᤘᤠ᤹. ᤂᤶᤓᤩᤠᤱ ᤀᤠᤍᤠᤱᤒᤠᤖᤧ ᤁᤧᤕᤢᤰᤁᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤛᤔᤠ ᤁᤢᤕᤠᤀᤥ ᤌᤠᤖᤡᤰᤁᤣ ᤘᤠ᤹॥ 23 “ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤗᤳᤇᤠ ᤔᤠᤱᤗᤠᤀᤡᤱᤒᤠ ᤀᤡᤱᤛᤠᤒᤠ. ᤛᤣᤛᤣ ᤔᤏᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤥ ᤌᤠᤛᤡᤱᤅᤠᤱ ᤀᤰᤂᤣ ᤐᤠ᤺ᤳᤋᤢᤖ ᤐᤳᤇᤧᤒᤠ ᤁᤧᤏᤡᤛᤢ. ‘ᤂᤧᤴ ᤛᤡᤱᤒᤢᤱᤅᤡᤴ ᤋᤠᤅᤧᤶᤔᤧ᤹ᤀᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤧᤶᤔᤧ᤹. ᤁᤖ ᤀᤡᤰᤋᤠᤵᤐᤥᤒᤠ ᤕᤠ᤺ᤴᤛᤢᤱᤜᤠ᤹ᤀᤥ ᤑᤧᤴᤈᤣ᤹ ᤏᤢ ᤁᤠᤛᤠ᤺ᤸᤗᤧ ᤀᤡᤄᤣ᤺ᤱᤔᤏᤠ ᤕᤢᤱᤔᤏᤠᤒᤠ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤢ᤺ᤳᤋᤧᤴ ᤗᤧᤖᤧᤶ ᤕᤢᤰᤂᤧᤶᤔᤧ᤹. ᤂᤧᤸᤗᤧ ᤁᤢᤛᤠ᤺ᤵᤜᤠ᤹ ᤂᤠᤶᤒᤠᤱᤅᤥᤀᤣ ᤗᤠ᤺ᤳᤋᤠᤱ ᤕᤢᤱ॥ ᤋᤠᤱᤛᤠᤰᤐᤥᤒᤠ ᤛᤣ᤺ᤰᤘᤠ᤺ᤸᤗᤧ ᤂᤧᤴ ᤘᤠᤒᤡ᤺ᤴᤗ. ᤂᤧᤸᤗᤧ ᤁᤢᤗᤠᤃᤡ ᤁᤢᤃᤵ ᤏᤢᤛᤡ ᤕᤧᤶ ᤔᤧᤸᤗᤧᤰᤁᤣ ᤌᤠᤖᤡᤰ ᤋᤠᤶᤓᤢᤱ ᤌᤰᤛᤠᤜᤠ᤹ ᤁᤢᤀᤡᤛᤡᤰ ᤐᤥᤱᤅᤠᤱ ᤁᤢᤜᤡᤱᤘᤧᤳ ᤕᤢᤱᤗ॥’ 24 “ᤐᤕᤶ ᤜᤠᤱᤅᤣ. ᤂᤧᤸᤗᤧ ᤁᤢᤒᤣ᤺ᤱᤃ ᤜᤠᤒᤠ ᤁᤴᤗᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠ ᤐᤕᤶ ᤜᤠᤱᤅᤡᤸᤗᤧ ᤁᤧᤍᤰᤗᤧᤱᤘᤠᤀᤥ ᤁᤧᤒᤡᤖᤧᤒᤠ ᤀᤡᤱᤈᤠᤱᤅᤡᤴ ᤀᤠᤶᤓᤠ ᤁᤴᤗᤥ— 25 ᤔᤏᤠᤜᤠ᤹ᤗᤠᤶ ᤀᤠᤍᤠᤱᤒᤠ ᤁᤧᤶᤗᤳ ᤁᤧᤶᤍᤣ. ᤜᤧᤰᤁᤩᤠᤱ ᤋᤠᤶᤓᤢᤱ ᤌᤰᤛᤠᤜᤠ᤹ᤏᤢ ᤁᤧᤘᤠ᤹ ᤁᤧᤕᤢᤱ. ᤐᤡᤳᤌᤰᤛᤠᤜᤠ᤹ ᤁᤢᤀᤡᤛᤡᤰ ᤕᤠ᤺ᤴᤛᤢᤱᤜᤠ᤹ ᤁᤧᤈᤖᤥ. ᤜᤧᤰᤁᤩᤠᤱ ᤋᤠᤱᤛᤠᤱᤒᤥᤒᤠ ᤛᤣ᤺ᤰᤘᤠ᤺ᤸᤗᤧ ᤀᤠᤍᤠᤱᤒᤠ ᤘᤠᤃᤧᤖᤰ॥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤈᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤁᤠᤰ ᤕᤢᤰ ᤁᤳᤋᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤧᤴ ᤀᤠᤳᤋᤡᤴᤇᤠᤱ ᤂᤧᤴ ᤜᤠᤱᤈᤢᤶᤜᤠ᤹ ᤐᤡᤖᤢ᤹ ᤑᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤏᤡᤱᤘᤠ᤹ ᤁᤧᤱᤄᤥᤛᤢᤴᤗ ᤌᤠᤖᤡᤰ ᤀᤠᤍᤠᤱᤒᤠᤖᤧ ᤁᤧᤗᤠᤃᤡ ᤁᤢᤃᤵ ᤏᤢᤛᤡ ᤕᤧᤶ ᤗᤧᤰᤐᤣᤰ॥ 26 ᤁᤢᤛᤠ᤺ᤵᤜᤠ᤹ᤏᤢ ᤛᤥᤖᤡᤰ ᤁᤢᤔᤢ᤺ᤳᤋᤡᤴ ᤕᤢᤱᤕᤠ᤺ᤰᤗ ᤁᤧᤗ᤹ᤒᤠ ᤀᤡᤱᤈᤠᤱᤅᤡᤸᤗᤧ ᤁᤢᤒᤣᤴ ᤜᤠᤒᤠ ᤁᤴᤗᤥ—ᤀᤠᤸᤗ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤢᤰ ᤆᤥᤃᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤀᤠᤍᤠᤱᤒᤠ ᤁᤧᤍᤧᤴᤏᤠᤱᤗᤰ ᤀᤠᤍᤠᤱᤒᤠᤖᤧ ᤁᤧᤜᤠᤱᤈᤢᤶᤔᤡᤴ ᤀᤠᤍᤠᤱᤒᤠ ᤁᤧᤶᤏᤢ᤺ᤰ ᤁᤧᤶᤒᤡᤖᤥ॥ 27 ᤁᤸᤗᤧᤆᤥᤃᤢᤸᤗᤧ ᤐᤕᤶ ᤜᤠᤱᤅᤣ. ᤀᤠᤱᤃᤠ᤹ ᤐᤡᤏᤧᤒᤠ ᤛᤢᤈᤠ ᤐᤠ᤺ᤴᤏᤥ ᤀᤠᤍᤠᤱᤒᤠ ᤋᤧᤴᤍᤧ᤹. ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤧ᤹ᤀᤠᤱ ᤗᤠᤕᤥ ᤆᤥ᤺ᤰᤔᤠ ᤗᤧᤖᤧ᤹ ᤜᤧᤰᤁᤩᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤠᤱ ᤁᤧᤓᤧᤴ ᤕᤠ᤺ᤶᤒᤰᤜᤠ᤹ ᤗᤧᤖᤧ᤹॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤁᤧᤏᤢ᤹ᤔᤠ ᤁᤧᤍᤠᤔᤠ ᤆᤰᤔᤧᤸᤗ᤹ᤀᤣ ᤐᤥᤱᤗ ᤐᤣ᤺ᤰᤗᤥ॥” ᤛᤧᤵᤔᤠᤱᤅᤡᤴ ᤁᤧᤖᤧ 28 ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤒᤢᤁᤍᤏᤣᤛᤖ ᤜᤠᤱᤅᤥ ᤁᤧᤖᤧ॥ 29 ᤌᤡᤒᤥᤱᤅᤠᤱ ᤏᤧᤳᤇᤡ ᤗᤠ ᤁᤢᤀᤣᤃᤠᤱ ᤀᤠᤸᤗ ᤒᤣᤒᤡᤗᤥᤏ ᤜᤠᤱᤜᤡᤶᤔᤥᤒᤠ ᤁᤦᤛᤡᤀᤥ ᤜᤠᤱᤅᤡᤴ ᤏᤠᤏᤠ ᤁᤳᤏᤠ ᤕᤠᤃᤧᤃᤖᤧᤸᤗᤧ. 30 ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤠᤎᤠᤱᤛᤥᤒᤠ ᤀᤠᤜᤠᤱᤘᤠ ᤀᤠᤔᤠᤱᤘᤠᤖᤧ ᤗᤠᤃᤡ ᤕᤶᤒᤠ ᤀᤠᤔᤢᤰᤛᤠᤶᤗᤠᤶ ᤀᤠᤜᤠᤱ ᤕᤢᤰᤏᤠᤍᤧᤴᤏᤥ ᤆᤥᤃᤢᤱᤅᤠᤱ ᤏᤧᤒᤠ ᤌᤣ ᤁᤴ ᤐᤕᤶ ᤕᤶᤒᤠ ᤒᤣᤒᤡᤗᤥᤏᤧᤴ ᤔᤣ᤺ᤶᤒᤡ᥅” 31 ᤁᤴ ᤐᤠ᤺ᤴᤇᤣ᤺ᤰᤘᤠᤜᤠ᤹ ᤂᤢᤏᤧ᤹ ᤁᤢᤶᤒᤪᤠᤀᤥᤗᤠᤶ ᤗ᤺ᤶᤔᤠᤀᤣ ᤔᤧᤴᤈᤢ᤺ᤳᤋᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤀᤰᤋᤱᤒᤠ ᤀᤡᤱᤄᤱ ᤕᤧ. “ᤏᤒᤢᤁᤍᤏᤣᤛᤖ ᤜᤠᤱᤅᤣ. ᤂᤧᤏᤧ᤹ ᤁᤧᤗᤠᤃᤡ ᤁᤴ ᤁᤢᤏᤢᤵᤔᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤐᤥ᤺ᤰᤂᤧᤀᤠᤱ ᤘᤠ᤹—ᤂᤧᤏᤧ᤹ ᤁᤧᤜᤠᤱᤕᤢᤰᤁᤡᤴ ᤂᤧᤏᤧ᤹ᤗᤠᤶ ᤁᤧᤶᤏᤠᤵᤋᤧᤀᤠᤱ ᤘᤠ᤹॥ 32 ᤔᤏᤠᤜᤠ᤹ᤗᤠᤶ ᤂᤧᤏᤧ᤹ ᤁᤧᤶᤏᤠᤳ ᤁᤧᤶᤍᤣᤖᤥ ᤜᤧᤰᤁᤩᤠᤱ ᤋᤠᤶᤓᤢᤱ ᤌᤰᤛᤠᤜᤠ᤹ᤏᤢ ᤁᤧᤘᤠ᤹ ᤁᤧᤕᤢᤱ᤹. ᤐᤡᤳᤌᤰᤛᤠᤜᤠ᤹ ᤁᤢᤀᤡᤛᤡᤰ ᤂᤧᤏᤧ᤹ ᤕᤠ᤺ᤴᤛᤢᤱᤜᤠ᤹ ᤁᤧᤈᤖᤥ॥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤈᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤁᤠᤰ ᤕᤢᤰ ᤁᤳᤋᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤧᤴ ᤀᤠᤳᤋᤡᤴᤇᤠᤱ ᤂᤧᤴ ᤜᤠᤱᤈᤢᤶᤜᤠ᤹ ᤐᤡᤖᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤂᤧᤏᤧ᤹ ᤁᤧᤴᤍᤧᤴᤏᤧᤸᤗ ᤌᤠᤖᤡᤰ ᤂᤧᤏᤧ᤹ ᤁᤧᤗᤠᤃᤡ ᤁᤢᤃᤵ ᤏᤢᤛᤡ ᤕᤧᤶ ᤗᤧᤰᤐᤣᤰ॥” 33 ᤏᤒᤢᤁᤍᤏᤣᤛᤖᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤀᤠᤱ ᤘᤕᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤔᤥ ᤁᤧᤖᤧ॥ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤠ᤺ᤳᤋᤢ ᤔᤧᤍᤣᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤐᤡᤳᤌᤰᤛᤠᤜᤠ᤹ ᤁᤢᤀᤡᤛᤡᤰ ᤕᤠ᤺ᤴᤜᤠ᤹ ᤆᤠᤔᤠ ᤜᤣ᤺ᤰᤋᤢ॥ ᤂᤢᤏᤧ᤹ ᤁᤢᤈᤢᤱ ᤔᤢᤖᤡᤰᤜᤠ᤹ ᤔᤕᤠ᤺ᤸᤗᤧ ᤁᤢᤔᤪᤡᤰ ᤜᤧᤰᤋᤱᤒᤠ ᤏᤢ ᤁᤢᤛᤣ᤺ᤴᤍᤢ᤹ᤒᤠᤴ ᤐᤢ᤺ᤸᤗᤧ ᤁᤢᤛᤣ᤺ᤴᤍᤢ᤹ᤒᤠ ᤁᤢᤀᤡᤛᤡᤰ ᤁᤣ᤺ᤶᤒᤠ ᤔᤧᤶᤒᤥᤱᤅᤣ ᤌᤠᤖᤡᤰ ᤁᤢᤎᤰᤁᤡᤴ ᤋᤠᤱᤛᤠᤱᤒᤥᤒᤠ ᤛᤣ᤺ᤰᤘᤠ᤺ᤸᤗᤧ ᤘᤠᤒᤡ᤺ᤴᤍᤧᤖᤥ॥ ᤏᤒᤢᤁᤍᤏᤣᤛᤖᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢ 34 ᤂᤧᤴ ᤕᤧᤶᤔᤡᤸᤗᤧ ᤁᤢᤏᤢᤵᤔᤥ. ᤀᤠᤱᤃᤠ᤹ ᤏᤒᤢᤁᤍᤏᤣᤛᤖᤖᤧ ᤀᤠᤔᤡᤰᤁᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ ᤛᤣᤖᤧ॥ ᤂᤧᤒᤩᤠᤱ ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤱ. ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤧᤴ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤏᤢ ᤔᤡᤔᤡᤍᤡᤱ ᤐᤡᤖᤢᤱᤗᤥ॥ ᤂᤢᤏᤧ᤹ ᤁᤢᤕᤢᤰᤁᤡᤱᤃ ᤛᤍᤠᤍᤡᤱ ᤁᤧᤘᤠ᤹ᤒᤠ ᤕᤢᤰᤗᤥ. ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤏᤧᤖᤥ॥ 35 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤛᤢᤶ ᤔᤧᤴᤍᤶᤔᤏᤠ ᤌᤣᤏᤠᤎᤣᤒᤠ ᤗᤣ᤺ᤳᤋᤢᤛᤡᤖᤥ॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤢᤰᤛᤠᤶᤜᤠ᤹ ᤏᤢ ᤂᤠᤶᤒᤣ᤺ᤰᤁᤥᤒᤠ ᤔᤏᤠᤜᤠ᤹ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤁᤢᤀᤡᤛᤡᤰ ᤆᤥᤃᤢᤛᤡᤖᤥ॥ ᤀᤠᤳᤋᤡᤸᤗᤧᤀᤠᤱ ᤂᤢᤏᤧ᤹ ᤁᤢᤜᤢᤰᤁᤡᤴ ᤌᤣ᤺ᤰᤔᤠ ᤔᤧᤛᤢᤰᤋᤢᤴᤗᤥ. ᤀᤡᤃᤪ ᤜᤠ᤺ᤳᤗᤧᤀᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤔᤠ ᤔᤧᤛᤢᤰᤋᤢᤴᤗᤥ. “ᤂᤧᤏᤧ᤹ ᤌᤧᤔᤠ ᤁᤧᤈᤥᤃᤢᤀᤠᤱ ᤘᤠ᤹ᤒᤣ᥅” 36 ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤛᤣᤖᤧᤒᤠ ᤕᤧᤶᤔᤥ. ᤀᤠᤜᤠᤱᤈᤢᤶᤔᤥᤒᤠ ᤔᤡᤔᤡᤍᤡᤱᤗᤧ ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤠᤎᤠ᤺ᤱᤛᤥ ᤏᤢ ᤀᤠᤜᤠᤱᤘᤠ ᤀᤠᤔᤠᤱᤘᤠᤴ ᤀᤠᤱᤃᤠ᤹ᤀᤥ ᤏᤢ᤺ᤰᤂᤧᤍᤩᤧ॥ ᤀᤠᤱᤃᤠ᤹ ᤀᤠᤛᤢᤈᤠᤍᤠᤱᤒᤠᤜᤠ᤹ ᤏᤢ ᤀᤠᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤠᤱᤃᤠ᤹ ᤁᤥ᤺ᤵᤔᤠ ᤔᤧᤜᤣ᤺ᤰᤋᤠᤱ. ᤜᤧᤰᤁᤩᤠᤱ ᤀᤠᤜᤠᤱᤕᤢᤰᤏᤠᤀᤥ ᤏᤢ᤺ᤰᤂᤠᤱᤅᤠᤱ ᤋᤃᤡᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤐᤥ᤺ᤰᤂᤠᤱ॥ 37 ᤀᤠᤸᤗ ᤀᤠᤱᤃᤠ᤹. ᤏᤒᤢᤁᤍᤏᤣᤛᤖᤖᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤐᤕᤶ ᤜᤠᤱᤅᤡᤸᤗᤧ ᤁᤢᤏᤠᤖᤠ. ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤑᤥᤛᤢᤱ᤹ ᤜᤧᤰᤁᤩᤠᤱ ᤔᤡᤔᤡᤍᤡᤱ ᤐᤡᤖᤢᤱ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤌᤧᤔᤠ ᤆᤥᤃᤢᤛᤠᤱ ᤏᤢᤒᤠ ᤆᤥᤃᤢ᤹. ᤜᤧᤰᤁᤩᤠᤱ ᤁᤢᤕᤠ᤺ᤶᤒᤰᤜᤠ᤹ ᤁᤧᤖᤧᤰ ᤁᤢᤍᤥ᤺ᤵᤔᤠ ᤆᤥᤰ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤶᤒᤠ ᤁᤧᤜᤧᤴᤇᤡᤱᤒᤠᤜᤠ᤹ ᤏ᤺ᤶᤏ᤺ᤶᤒᤠ ᤆᤥ᤺ᤰᤔᤠ ᤛᤢᤰᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.