ᤍᤠᤏᤡᤀᤧᤗ 3 - LIFOTNTᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠ ᤏᤢ ᤔᤡᤖᤠ᤺ᤰ 1 ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤋᤢᤰᤐᤥᤱ ᤜᤢᤰᤛᤡᤰ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤏᤢ ᤜᤢᤰᤛᤡᤰ ᤋᤢᤰᤛᤡ ᤁᤢᤓᤧᤖᤧᤒᤠ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠ ᤌᤡᤰ ᤆᤥᤃᤢ ᤜᤧᤰᤁᤩᤠᤱ ᤒᤣᤒᤡᤗᤥᤏ ᤋᤧᤱᤃᤵᤐᤥ ᤁᤧᤏᤧᤒᤠ ᤍᤢᤖᤠ ᤔᤧᤵᤔᤏᤠᤒᤠ ᤏᤧᤏᤧᤒᤠᤍᤧᤴᤏᤥ ᤂᤧᤴ ᤕᤧᤵᤛᤢ॥ 2 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤂᤧᤴ ᤏᤠᤘᤠᤀᤡᤳᤗᤠᤴ ᤋᤥ᤺ᤶᤔᤠᤖᤧ ᤗᤠᤃᤡ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹. ᤋᤧᤱᤃᤵᤜᤠ᤹ᤀᤥᤒᤠ ᤕᤢᤰᤛᤠᤒᤠᤜᤠ᤹. ᤌᤢᤶᤜᤠ᤹ᤀᤥᤒᤠ ᤆᤢᤰᤛᤠ ᤜᤠᤱᤜᤠ᤹. ᤛᤢᤈᤠᤛᤠᤒᤠᤜᤠ᤹. ᤕᤠᤱᤛᤢᤶᤒᤠᤜᤠ᤹. ᤂᤠᤛᤧᤴᤗᤥ᤺ᤶᤒᤠᤜᤠ᤹. ᤕᤥᤛᤔᤠ ᤂᤠᤛᤧᤴᤜᤡᤶᤔᤥᤒᤠ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤏᤢ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤆᤢᤶᤔᤠᤖᤧ ᤗᤠᤃᤡ ᤀᤢ᤺ᤳᤋᤢᤛᤡ॥ 3 ᤁᤸᤗᤧᤆᤥᤃᤢᤸᤗᤧ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹. ᤋᤧᤱᤃᤵᤜᤠ᤹ᤀᤥᤒᤠ ᤕᤢᤰᤛᤠᤒᤠᤜᤠ᤹. ᤌᤢᤶᤜᤠ᤹ᤀᤥᤒᤠ ᤆᤢᤰᤛᤠ ᤜᤠᤱᤜᤠ᤹. ᤛᤢᤈᤠᤛᤠᤒᤠᤜᤠ᤹. ᤕᤠᤱᤛᤢᤶᤒᤠᤜᤠ᤹. ᤋᤢᤶ ᤂᤠᤛᤧᤴᤗᤥ᤺ᤶᤒᤠᤜᤠ᤹. ᤕᤥᤛᤔᤠ ᤂᤠᤛᤧᤴᤜᤡᤶᤔᤥᤒᤠ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤏᤢ ᤋᤧᤱᤃᤵᤐᤥᤒᤠ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤂᤧᤴ ᤏᤠᤘᤠᤀᤡᤳᤗᤠᤴ ᤋᤥ᤺ᤶᤔᤠᤖᤧ ᤗᤠᤃᤡ ᤔᤧᤈᤢᤵᤛᤧᤀᤠᤱ ᤂᤧᤸᤗᤧ ᤁᤢᤍᤃᤡ ᤔᤧᤕᤧᤶᤛᤡᤱ॥ 4 ᤂᤧᤒᤩᤠᤱ ᤁᤴ ᤐᤠ᤺ᤴᤏᤡᤴ ᤀᤡᤱᤓᤴ ᤁᤧᤈᤥᤰᤐᤧᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤀᤠᤱ ᤐᤠ᤺ᤳᤋᤢ. “ᤔᤧᤴᤇᤠᤶ ᤕᤠᤵᤔᤡᤛᤣ. ᤔᤧᤴᤇᤠᤶ ᤛᤢᤘᤠᤱᤛᤣ ᤜᤧᤰᤁᤩᤠᤱ ᤘᤣ᤹ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤛᤣ. ᤂᤡᤏᤡ᤹ ᤗᤠᤃᤡ ᤀᤰᤋᤱᤒᤠ ᤀᤡᤱᤈᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ— 5 ᤌᤢᤳᤋᤢᤖᤡ᤺ᤵᤐᤠ. ᤔᤢᤵᤑᤪᤠᤔᤠ. ᤋᤢ᤺ᤱᤃᤣ. ᤁᤱᤏᤡ. ᤀᤴᤔᤣ. ᤋᤧ᤺ᤳᤋᤧ᤺ᤵᤐᤠ ᤏᤢ ᤁᤧᤖᤧᤰ ᤐᤖᤡᤰᤐᤠ ᤔᤢᤰᤗᤠᤜᤠ᤹ ᤔᤢᤰᤐᤠ ᤂᤡᤏᤡ᤹ ᤁᤧᤄᤧᤵᤛᤢᤶᤏᤢᤔᤧ᤺ᤴᤏᤣ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤕᤧᤵᤛᤢᤒᤠ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠᤴ ᤂᤡᤏᤡ᤹ ᤛᤠᤶᤒᤥᤴ ᤜᤒᤳ ᤑᤴᤏᤠᤛᤡᤶᤔᤧ᤹ᤀᤠᤱ ᤁᤧᤖᤧᤰᤗᤧ ᤛᤧᤘᤠ ᤁᤧᤔᤧᤳᤋᤢᤶᤗ ᤐᤥᤱ᤹॥ 6 ᤛᤠᤶᤒᤥᤴ ᤜᤒᤳ ᤔᤧᤶᤒᤵᤔᤏᤠᤀᤠᤱ ᤛᤧᤘᤠ ᤔᤧᤴᤈᤥ᤺ᤰᤔᤏᤠᤒᤠ ᤀᤠᤳᤋᤡᤴᤇᤠᤱ ᤂᤡᤔᤥ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤥ ᤗᤠᤵᤑᤢᤔᤠ ᤕᤠᤰᤔᤠ ᤐᤥᤱ᤹॥” 7 ᤁᤸᤗᤧᤆᤥᤃᤢᤸᤗᤧ ᤌᤢᤳᤋᤢᤖᤡ᤺ᤵᤐᤠ. ᤔᤢᤵᤑᤪᤠᤔᤠ. ᤋᤢ᤺ᤱᤃᤣ. ᤁᤱᤏᤡ. ᤀᤴᤔᤣ. ᤋᤧ᤺ᤳᤋᤧ᤺ᤵᤐᤠ ᤏᤢ ᤁᤧᤖᤧᤰ ᤐᤖᤡᤰᤐᤠ ᤔᤢᤰᤗᤠᤜᤠ᤹ ᤔᤢᤰᤋᤧᤒᤠ ᤔᤧᤄᤧᤵᤛᤢᤏᤢᤔᤧ᤺ᤴᤏᤣ ᤔᤧᤴᤇᤠᤶ ᤕᤠᤵᤔᤡᤜᤠ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤘᤣ᤹ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱᤅᤠᤱ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤕᤧᤵᤛᤢᤒᤠ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠᤴ ᤛᤧᤘᤠ ᤔᤧᤔᤧᤳᤋᤢᤖᤥ॥ ᤛᤢᤶᤛᤡ ᤕᤜᤢᤍᤡ ᤌᤠᤱᤒᤧᤴᤜᤠ᤹ ᤐᤠ᤺ᤴᤔᤧᤎᤡᤰᤋᤢᤛᤡ 8 ᤀᤠᤶᤓᤠ ᤁᤴ ᤕᤧᤶᤔᤥ ᤂᤠᤃᤧᤀᤡᤰᤐᤠᤜᤠ᤹ ᤔᤧᤗ᤺ᤴᤍᤧ ᤔᤧᤍᤩᤧᤀᤠᤱ ᤕᤜᤢᤍᤡᤜᤠ᤹ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤺ᤸᤗᤧ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤛᤡ॥ 9 ᤂᤧᤱᤜᤠ᤹ᤖᤧ ᤏᤒᤢᤁᤍᤏᤣᤛᤖ ᤜᤠᤱᤅᤡᤴ ᤔᤧᤔᤧᤳᤋᤢ. “ᤐᤕᤶ ᤜᤠᤱᤅᤣ. ᤁᤧᤎᤠ᤺ᤰ ᤆᤠ᤹ᤖᤖᤥ᥄ 10 ᤀᤠᤳᤋᤡᤴᤜᤠ᤹ᤖᤧ ᤌᤢᤳᤋᤢᤖᤡ᤺ᤵᤐᤠ. ᤔᤢᤵᤑᤪᤠᤔᤠ. ᤋᤢ᤺ᤱᤃᤣ. ᤁᤱᤏᤡ. ᤀᤴᤔᤣ. ᤋᤧ᤺ᤳᤋᤧ᤺ᤵᤐᤠ ᤏᤢ ᤁᤧᤖᤧᤰ ᤐᤖᤡᤰᤐᤠ ᤔᤢᤰᤗᤠᤜᤠ᤹ ᤔᤢᤰᤐᤠ ᤔᤧᤄᤧᤵᤛᤢ᤹. ᤂᤧᤱᤜᤠ᤹ ᤁᤧᤖᤧᤰᤗᤧ ᤛᤠᤶᤒᤥᤴ ᤐᤵᤔᤠᤀᤠᤱ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠᤴ ᤛᤧᤘᤠ ᤔᤧᤵᤔᤠ ᤐᤥᤱ᤹ ᤑᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤀᤡᤱᤈᤠᤱ ᤁᤧᤈᤥᤃᤢᤀᤠᤱ ᤘᤠ᤹॥ 11 ᤜᤧᤰᤁᤩᤠᤱ ᤀᤠᤳᤋᤡᤴ ᤛᤠᤶᤒᤥᤴ ᤔᤧᤒᤳᤏᤧᤴᤏᤠᤱ ᤛᤧᤘᤠ ᤔᤧᤈᤥᤰᤏᤧᤴ. ᤂᤢᤏᤧ᤹ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤥ ᤗᤠᤵᤐᤢᤱ ᤐᤣᤰ॥ 12 ᤁᤖ ᤒᤣᤒᤡᤗᤥᤏᤒᤠ ᤋᤧᤱᤃᤵᤐᤥ ᤜᤠᤱᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤍᤠᤱᤒᤠᤖᤧ ᤕᤢᤰᤋᤡᤱ ᤁᤧᤈᤥᤃᤢᤛᤡᤒᤠ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥ ᤁᤢᤓᤠ ᤕᤜᤢᤍᤡᤜᤠ᤹ ᤔᤧᤘᤠ᤹॥ ᤐᤕᤶ ᤜᤠᤱᤅᤣ. ᤁᤴᤜᤠ᤹ᤖᤧ ᤀᤠᤍᤠᤱᤒᤠ ᤂᤧᤶᤄᤧᤶ ᤁᤧᤔᤧᤸᤗᤠᤵᤏᤧᤴ᤹॥ ᤁᤴᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤔᤠᤱᤜᤠ᤹ᤀᤠᤱ ᤛᤧᤘᤠ ᤔᤧᤶᤔᤧᤳᤋᤢᤛᤡᤴ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤕᤧᤵᤛᤢᤒᤠ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠᤴ ᤛᤠᤶᤒᤥᤴ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤶᤔᤧᤳᤋᤢᤴ᤹॥” 13 ᤜᤠᤱᤅᤡᤴ ᤁᤢᤛᤠᤰᤁᤧᤴᤏᤡᤸᤗᤧ ᤁᤢᤔᤡᤰᤁᤧᤴ ᤂᤠᤎᤠᤵᤋᤢᤀᤠᤱ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤴ ᤋᤠ᤺ᤵᤔᤠ ᤀᤡᤱᤈᤠᤱ ᤐᤡᤖᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤁᤴ ᤔᤏᤠᤜᤠ᤹ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤧᤍᤠᤖᤢᤛᤡ. 14 ᤜᤧᤰᤁᤩᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤀᤣ. ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤠᤱᤜᤠ᤹ ᤛᤧᤘᤠ ᤁᤧᤶᤔᤧᤳᤋᤢᤶᤛᤡᤶᤔᤧᤴ ᤀᤡᤃᤪ ᤀᤠᤱᤃᤠ᤹ ᤕᤧᤵᤛᤢᤱᤒᤠ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠ᤺ᤴᤏᤠᤱ ᤛᤠᤶᤒᤥᤴ ᤁᤧᤓᤴᤏᤠᤛᤡᤀᤠᤱ ᤛᤧᤘᤠ ᤁᤧᤶᤔᤧᤳᤋᤢᤶᤔᤡᤴᤔᤢ ᤌᤣ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤒᤡ᥅ 15 ᤀᤠᤸᤗ ᤂᤡᤏᤡ᤹ ᤌᤢᤳᤋᤢᤖᤡ᤺ᤵᤐᤠ. ᤔᤢᤵᤑᤪᤠᤔᤠ. ᤋᤢ᤺ᤱᤃᤣ. ᤁᤱᤏᤡ. ᤀᤴᤔᤣ. ᤋᤧ᤺ᤳᤋᤧ᤺ᤵᤐᤠ ᤏᤢ ᤁᤧᤖᤧᤰ ᤐᤖᤡᤰᤐᤠ ᤔᤢᤰᤗᤠᤜᤠ᤹ ᤔᤢᤰᤐᤠ ᤁᤧᤄᤧᤵᤛᤢᤶᤏᤢᤔᤧ᤺ᤴᤏᤣ ᤀᤠᤱᤃᤠ᤹ ᤆᤥᤃᤢᤱᤒᤠ ᤏᤠᤘᤠᤀᤡᤳᤗᤠᤴ ᤛᤠᤶᤒᤥᤴ ᤑᤴᤇᤡᤱᤔᤠᤀᤠᤱ ᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤕᤠᤖᤡᤵ ᤁᤧᤒᤥᤰᤂᤡᤏᤧᤓᤃᤪ ᤏᤢᤒᤠᤀᤣ ᤐᤥᤱ᤹॥ ᤁᤖ ᤂᤡᤏᤡ᤹ ᤁᤴ ᤛᤧᤘᤠ ᤁᤧᤶᤔᤧᤳᤋᤢᤶᤔᤡᤴᤏᤧᤓᤃᤪ. ᤂᤡᤶᤔᤥ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡᤀᤥ ᤗᤠᤵᤁᤧᤶᤓᤢᤛᤡ᤹॥ ᤂᤧᤒᤩᤠᤱ ᤀᤠᤳᤋᤡᤴ ᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤂᤡᤏᤡ᤹ ᤋᤠᤱᤛᤧ᤺ᤵᤔᤠ ᤁᤧᤛᤢᤰᤋᤡᤒᤣ᥅” 16 ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤖᤧ ᤜᤠᤱᤅᤡᤴ ᤏᤢᤃᤵ ᤔᤧᤒᤡᤖᤢ. “ᤏᤒᤢᤁᤍᤏᤣᤛᤖ ᤜᤠᤱᤅᤣ. ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤀᤠᤏᤡᤃᤣ ᤗᤧᤵᤔᤠᤱ ᤐᤠ᤺ᤵᤔᤠ ᤁᤧᤒᤥᤱᤒᤠ ᤐᤠᤴ ᤌᤣᤀᤠᤱ ᤜᤥᤵᤗᤥ॥ 17 ᤐᤕᤶ ᤜᤠᤱᤅᤣ. ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤔᤠ ᤔᤡᤀᤥ ᤀᤠᤏᤡᤃᤣ ᤗᤠᤵᤔᤧᤓᤢᤛᤡᤃᤧᤏᤧᤓᤃᤪ. ᤀᤠᤏᤡᤃᤣ ᤔᤠᤱᤛᤧᤘᤠ ᤔᤧᤳᤋᤢᤶᤒᤧᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤁᤴ ᤗᤠᤶᤒᤠ ᤛᤧ᤺ᤵᤔᤠ ᤛᤢᤰᤋᤡᤃᤧ᤹ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤜᤢᤰᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤡᤃᤧ॥ 18 ᤁᤖ ᤀᤠᤏᤡᤃᤣ ᤂᤢᤏᤧ᤹ ᤋᤠᤱᤔᤧᤛᤧ᤺ᤵᤋᤡᤃᤧᤴᤇᤠᤱ. ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤔᤠᤱᤜᤠ᤹ ᤀᤠᤏᤡᤃᤣ ᤛᤧᤘᤠ ᤔᤧᤔᤧᤳᤋᤢᤶᤛᤡᤶᤒᤧᤴ᤹ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤕᤧᤵᤛᤢᤒᤠ ᤛᤠᤶᤔᤩᤠᤱ ᤏᤠᤘᤠᤀᤡᤳᤗᤠ᤺ᤴᤏᤠᤱ ᤛᤠᤶᤒᤥᤴᤏᤠᤱ ᤛᤧᤘᤠ ᤔᤧᤔᤧᤳᤋᤢᤶᤒᤧᤴ᤹ ᤁᤧᤗ᤹ᤒᤠ ᤀᤠᤍᤠᤱᤒᤠᤖᤧ ᤏᤡᤱᤘᤠ᤹ ᤁᤧᤄᤥᤛᤢᤖ ᤑᤠ᤹ᤀᤠᤱ ᤀᤠᤏᤡᤃᤣ ᤀᤡ᤺ᤳᤋᤢᤶᤒᤧᤖᤥ॥” ᤕᤜᤢᤍᤡ ᤌᤠᤱᤒᤧᤴᤜᤠ᤹ ᤂᤢᤶᤍᤡᤱ ᤔᤧᤒᤡᤖᤢᤛᤡ 19 ᤂᤧᤒᤩᤠᤱ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤴᤏᤢ ᤏᤒᤢᤁᤍᤏᤣᤛᤖᤧᤴ ᤁᤢᤛᤠᤰᤁᤧᤴᤏᤡᤸᤗᤧ ᤁᤢᤔᤡᤰᤁᤧᤴ ᤂᤠᤎᤠᤵᤋᤢ. ᤜᤧᤰᤁᤩᤠᤱ ᤁᤢᤏᤠᤖᤠᤴ ᤔᤖᤠ᤺ᤰ ᤕᤠᤖᤡᤰ ᤔᤡ ᤜᤧᤰᤋᤱᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤂᤧᤴ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤧᤴ ᤏᤢᤛᤡᤗᤧᤱ ᤕᤠᤖᤡᤰ ᤐᤕᤧᤶ ᤁᤧᤕᤧᤶᤒᤠ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤛᤡ. 20 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤢᤖᤠᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤧᤎᤢᤶᤒᤠ ᤁᤢᤓᤠ ᤌᤰᤛᤢᤒᤠᤜᤠ᤹ᤖᤧ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤴ ᤀᤡᤄᤣ᤺ᤱᤔᤠᤛᤡᤀᤠᤱ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡᤀᤥ ᤗᤠᤵᤑᤢᤔᤠᤛᤡ ᤀᤡᤱᤈᤠᤱ ᤐᤡᤖᤢᤛᤡ॥ 21 ᤂᤧᤸᤗᤧᤆᤥᤃᤢᤸᤗᤧ ᤁᤴ ᤔᤏᤠᤜᤠ᤹ ᤋᤣᤳ. ᤛᤢ᤺ᤶᤒᤠ. ᤐᤠᤃᤖᤡ ᤜᤧᤰᤁᤩᤠᤱ ᤘᤣ᤹ ᤆᤠᤱᤜᤠ᤹ᤏᤢ ᤛᤥᤖᤡᤰ ᤀᤡᤔᤧᤄᤣ᤺ᤰᤂᤢᤛᤡᤀᤠᤱ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡᤀᤥ ᤗᤠᤵᤔᤧᤓᤢᤛᤢ ᤔᤧᤕᤠᤰᤋᤢᤛᤡ॥ 22 ᤜᤠᤱᤅᤡᤸᤗᤧ ᤁᤧᤀᤠ᤺ᤵᤐᤠ ᤁᤢᤀᤡᤱᤈᤠᤱᤅᤡᤴ ᤔᤧᤱᤄᤧᤶᤔᤣ ᤔᤧᤴᤏᤢ᤹ᤔᤏᤠᤒᤠ ᤘᤕᤧ ᤜᤧᤰᤁᤩᤠᤱ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡᤴ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤕᤧᤶᤍᤧ. ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡ᤺ᤸᤗᤧ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤴ ᤔᤡᤀᤥ ᤁᤧᤍᤣ᤹ᤒᤠ ᤌᤰᤛᤢᤒᤠᤜᤠ᤹ ᤜᤍ᤹ ᤔᤧᤛᤩᤧ॥ 23 ᤜᤧᤰᤁᤩᤠᤱ ᤁᤴ ᤛᤢᤶᤛᤡ ᤔᤏᤠᤜᤠ᤹ ᤆᤡᤃᤧᤰ ᤆᤡᤃᤧᤰ ᤔᤧᤶᤒᤠ᤺ᤱᤅᤣ ᤀᤡᤔᤧᤄᤣ᤺ᤰᤂᤢᤛᤡᤒᤠᤀᤣ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡᤀᤥ ᤔᤧᤗᤠᤛᤧ॥ 24 ᤂᤧᤴ ᤀᤣᤃᤠᤱ ᤏᤒᤢᤁᤍᤏᤣᤛᤖ ᤜᤠᤱᤅᤡᤴ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤐᤡᤳᤆᤠᤰ ᤐᤡᤳᤆᤠᤰ ᤐᤡᤴᤍᤧᤖ ᤂᤢᤏᤧ᤹ ᤁᤢᤛᤢᤈᤠᤛᤠᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤌᤣ ᤀᤠᤏᤡ᤹ ᤀᤡᤀᤠᤄᤣ᤺ᤰᤂᤢᤶᤛᤡᤶᤔᤠᤱ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡᤀᤥ ᤗᤠᤵᤀᤠᤓᤢᤛᤢᤶᤛᤡᤶᤒᤠ ᤔᤏᤠᤜᤠ᤹ ᤛᤢᤶᤓᤢᤛᤡ ᤔᤣ᤺ᤶᤒᤡ᥅” ᤂᤧᤱᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢ. “ᤛᤧᤰᤂᤠᤀᤣᤖᤥ. ᤐᤕᤶ ᤜᤠᤱᤅᤣ॥” 25 ᤂᤢᤏᤧ᤹ ᤐᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹. ᤔᤡᤀᤥ ᤗᤡᤛᤡ ᤔᤏᤠᤜᤠ᤹ ᤏᤠ ᤏᤢ ᤁᤳᤏᤠ ᤗᤠᤱᤔᤧᤄᤣ᤺ᤰᤗ ᤔᤧᤕᤠᤰᤐᤠ ᤏᤡᤛᤢᤱᤛᤡᤱᤗ ᤐᤳᤋᤠ. ᤂᤧᤱᤜᤠ᤹ ᤀᤡᤔᤧᤱᤄᤣ᤺ᤱᤛᤡᤱᤅᤣᤒᤠ ᤏᤢ ᤀᤠᤈᤧ᤺ᤳᤇᤡᤰᤁᤠᤱ ᤔᤡᤔᤧᤴᤍᤡᤰᤁᤣᤒᤠ ᤏᤡᤔᤧᤍᤧᤳ. ᤜᤧᤰᤁᤩᤠᤱ ᤗᤡᤛᤡᤃᤣᤰᤐᤠ ᤔᤏᤠ᤺ᤱᤃ ᤔᤠᤱᤛᤠ ᤜᤧᤰᤋᤱᤒᤠ ᤏᤡᤎᤠ᤺ᤵᤗᤥ॥” ᤕᤜᤢᤍᤡ ᤌᤠᤱᤒᤧᤴᤜᤠ᤹ ᤌᤥ ᤕᤶᤒᤠ ᤔᤧᤒᤥ᤺ᤰᤂᤧ 26 ᤂᤧᤒᤩᤠᤱ ᤏᤒᤢᤁᤍᤏᤣᤛᤖᤧᤴ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤔᤡᤀᤥ ᤗᤠ᤺ᤵᤔᤠ ᤗᤠᤶᤔᤥ ᤏᤡ᤺ᤳᤋᤠᤱ ᤐᤣᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. “ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤛᤣ. ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤛᤣ. ᤗᤠ᤺ᤰᤁᤠᤳ ᤗ᤺ᤴᤍᤧᤶ ᤑᤧᤖᤧᤶᤔᤧ᤹ᤀᤥ॥” ᤂᤧᤒᤩᤠᤱ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤴ ᤔᤡᤀᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ ᤔᤧᤓᤧᤖᤧ. 27 ᤜᤧᤰᤁᤩᤠᤱ ᤜᤠᤱᤈᤢᤶᤔᤥᤒᤠ ᤕᤶᤒᤠ ᤛᤢᤜᤠᤱᤃᤧᤶᤒᤠᤜᤠ᤹. ᤋᤧᤱᤃᤵ ᤕᤢᤰᤛᤠᤒᤠᤜᤠ᤹. ᤆᤢᤰᤛᤠ ᤜᤠᤱᤜᤠ᤹ ᤏᤢ ᤜᤠᤱ ᤛᤢᤈᤠᤛᤠᤒᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤒᤪᤡᤱ ᤐᤡᤛᤠᤱ ᤆᤡᤜᤢ᤹ ᤆᤡᤜᤢ᤹ ᤔᤧᤈᤢᤵᤛᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤡᤴ ᤔᤡ᤺ᤸᤗᤧ ᤀᤠᤈᤧ᤺ᤳᤇᤡᤰᤁᤠᤱ ᤔᤡᤔᤧᤍᤡᤃᤧᤴᤒᤠ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤛᤡ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤥᤒᤠ ᤔᤢᤖᤡᤰ ᤌᤡᤰᤁᤠᤱ ᤔᤧᤱᤃᤡᤰᤁᤣ ᤐᤳᤇᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ ᤔᤡ᤺ᤸᤗᤧ ᤔᤧᤴᤇᤢᤀᤣ ᤐᤳᤇᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤔᤡ᤺ᤸᤗᤧ ᤁᤢᤏᤠᤶ ᤌᤡᤰᤁᤠᤱ ᤜᤥ᤺ᤵᤋᤧ॥ 28 ᤂᤧᤴ ᤀᤣᤃᤠᤱ ᤏᤒᤢᤁᤍᤏᤣᤛᤖᤖᤧ ᤔᤧᤳᤋᤢᤛᤡ. “ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤂᤢᤏᤧ᤹ ᤁᤢᤔᤠᤱᤗᤠᤀᤡᤱᤒᤧᤴ ᤐᤠᤱᤄᤢᤀᤠᤱ ᤁᤢᤛᤧᤘᤠᤖᤥᤒᤠᤜᤠ᤹ ᤋᤠᤱᤛᤧ᤺ᤵᤋᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤛᤠᤴ ᤔᤧᤈᤥᤃᤢ. ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤂᤧᤶᤔᤠ ᤔᤧᤴᤍᤧᤴᤍᤧᤴ ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤡᤱᤔᤧᤴ ᤀᤠᤵᤑᤣᤰ ᤁᤧᤛᤠᤰᤐᤥ ᤔᤧᤎᤠᤛᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱᤎᤥ ᤘᤣ᤹ ᤀᤠᤳᤋᤡᤴ ᤔᤠᤱᤅᤡᤴᤏᤠᤱ ᤛᤠᤒᤴ ᤔᤧᤓᤴᤇᤡᤱᤅᤠᤱ ᤔᤠᤱᤛᤧᤘᤠ ᤔᤧᤶᤔᤧᤳᤋᤢᤴ॥ 29 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤀᤢᤘᤠ ᤆᤥᤃᤢᤱᤗ ᤐᤳᤋᤠ. ᤀᤠᤳᤋᤡᤴ ᤛᤢᤘᤠᤱᤜᤠ᤹ᤖᤧ ᤀᤡᤃᤪ ᤀᤠᤳᤋᤡᤴ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤖᤧ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤢᤓᤠ ᤐᤠᤴ ᤔᤧᤒᤠ᤺ᤳᤋᤢᤏᤧᤓᤃᤪ. ᤂᤧᤱᤜᤠ᤹ ᤁᤢᤈᤰᤋᤠ ᤁᤢᤗᤧᤶᤍᤠ ᤔᤧᤒᤥᤱᤗ ᤆᤩᤧᤵᤔᤠᤛᤡ ᤐᤥᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤎᤠ᤺ᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤀᤰᤂᤣᤗ᤹ᤖᤡᤰ ᤘᤣ᤹ ᤀᤠᤳᤋᤡᤴ ᤔᤠᤱᤅᤡᤸᤗᤧᤀᤠᤱ ᤋᤠᤱᤛᤧ᤺ᤵᤔᤠ ᤀᤠᤴᤇᤢᤰᤏᤧᤴ॥” 30 ᤂᤧᤴ ᤀᤣᤃᤠᤱ ᤜᤠᤱᤅᤡᤸᤗᤧ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤴ ᤒᤣᤒᤡᤗᤥᤏ ᤋᤧᤱᤃᤵᤐᤥ ᤕᤶᤒᤠ ᤆᤥᤃᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.