ᤍᤠᤏᤡᤀᤧᤗ 12 - LIFOTNT

ᤁᤢᤏᤢᤵᤔᤥᤒᤠ ᤕᤧᤶ

¹ “ᤂᤧᤴ ᤕᤧᤶᤔᤥ ᤋᤢᤶ ᤔᤠᤱᤗᤠᤀᤡᤱᤒᤠ ᤔᤡᤂᤠᤀᤣᤗᤧᤴ ᤀᤥᤛᤣ᤺ᤴᤎᤠᤱ ᤐᤥᤱᤅᤠᤱ ᤂᤢᤏᤧ᤹ ᤁᤧᤔᤏᤠᤜᤠ᤹ ᤋᤠᤱᤛᤧ᤺ᤵᤋᤢᤛᤡ᤹॥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤣ᤺ᤰᤛᤡᤱᤔᤠ ᤐᤥ᤺ᤰᤂᤧᤀᤠᤱᤎᤥ ᤂᤧᤴ ᤕᤧᤶᤔᤥ ᤌᤠᤖᤡᤰ ᤜᤧᤰᤋᤱᤒᤠ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥᤱᤅᤣ ᤁᤧᤘᤠ᤹ᤒᤠ ᤀᤰᤋᤱᤒᤠ ᤛᤠ᤹ᤖᤡᤰ ᤋᤢᤰᤂᤣ ᤗᤠᤰᤂᤣᤖᤧ ᤕᤧᤶ ᤋᤠᤖᤥ—ᤁᤖ ᤛᤠᤵᤐᤴᤏᤥ ᤔᤡᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤁᤧᤔᤏᤠᤜᤠ᤹ ᤋᤠᤱᤔᤧᤛᤧ᤺ᤵᤗᤥ॥

² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤂᤠᤶᤜᤡ᤺ᤰᤁᤥ ᤁᤧᤏᤧᤒᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤏᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤔᤧᤒᤥᤱ᤹. ᤁᤢᤓᤠ ᤏᤢᤵᤔᤧᤴᤍᤡᤱ ᤜᤡᤱᤔᤴᤗᤧ ᤗᤠᤃᤡ ᤜᤧᤰᤁᤩᤠᤱ ᤁᤢᤓᤠᤃ ᤛᤡᤖᤡᤱᤔᤔᤠ ᤏᤢ ᤛᤍᤠᤍᤡᤱ ᤀᤠᤵᤋᤡᤰᤗᤧ ᤗᤠᤃᤡ ᤔᤧᤒᤥᤰ॥

³ ᤛᤡᤰᤁᤢᤶᤛᤠᤒᤠᤜᤠ᤹ ᤋᤠᤱᤛᤠᤱᤒᤥ ᤛᤧᤸᤗᤧᤱ ᤁᤧᤗᤧᤰᤐᤠ ᤀᤥ᤺ᤳᤋᤡ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤛᤠᤶᤕᤥᤒᤠ ᤗᤠᤶᤔᤥ ᤗᤠᤶᤃᤧᤗᤥᤒᤠᤜᤠ᤹ᤃ ᤂᤣ᤺ᤶᤛᤡᤰᤐᤠᤜᤠ᤹ ᤜᤧᤰᤁᤣ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤔᤧᤀᤥᤳ॥

⁴ ᤁᤖ ᤂᤧᤏᤧ᤹ᤃ ᤍᤠᤏᤡᤀᤧᤗᤀᤣ. ᤁᤴ ᤛᤡᤜᤥ᤹ᤒᤠ ᤛᤠᤵᤗᤠᤌ᤺ᤱᤔᤥᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤁᤢᤏᤢᤵᤔᤠ ᤕᤧᤶᤔᤥ ᤌᤠᤖᤡᤰ ᤀᤣ᤺ᤵᤛᤠᤵ ᤀᤣ᤺ᤵᤋᤧ ᤏᤧᤛ᤻ᤛᤧ᤹॥ ᤛᤡᤰᤁᤢᤶ ᤏᤡᤱᤘᤠ᤹ ᤑᤥᤔᤠᤖᤧ ᤗᤠᤃᤡ ᤕᤖᤡᤰ ᤔᤏᤠᤜᤠ᤹ ᤏᤠ ᤏᤢ ᤁᤳᤏᤠ ᤔᤧᤗᤥ᤺ᤰᤗᤥ॥”

⁵ ᤂᤧᤒᤩᤠᤱ ᤀᤠᤱᤃᤠ᤹. ᤍᤠᤏᤡᤀᤧᤗᤧᤴ ᤀᤥᤔᤕᤠᤱ ᤜᤧᤰᤁᤩᤠᤱ ᤀᤠᤍᤃᤠᤱ ᤔᤏᤠ ᤏᤧᤳᤇᤡ ᤕᤧᤶᤏᤧᤳᤇᤡ. ᤌᤡᤰᤐᤠ ᤘᤜ᤺ᤱ ᤁᤳᤏᤠᤜᤠᤱ ᤗᤧᤵᤔᤠᤱ ᤁᤢᤕᤠᤀᤥ ᤕᤧᤶᤛᤡᤱ ᤜᤧᤰᤁᤩᤠᤱ ᤌᤡᤰᤐᤠ ᤏᤠᤜᤠᤱᤍᤠᤱ ᤗᤧᤵᤔᤠᤱ ᤁᤢᤕᤠᤀᤥ ᤕᤧᤶᤛᤡᤱ॥

⁶ ᤂᤧᤴ ᤏᤧᤵᤑᤢᤜᤠ᤹ᤀᤥ ᤌᤡᤰᤐᤠᤖᤧ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤸᤗᤧ ᤁᤢᤛᤶᤎᤠᤱ ᤁᤧᤕᤧᤵᤐᤠ ᤏᤤᤏᤠᤛᤢᤳ ᤆᤠᤱ ᤁᤧᤈᤠᤱᤒᤧᤴ ᤔᤧᤳᤋᤢ. “ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤁᤧᤵᤔᤠᤖᤧ ᤗᤠᤃᤡ ᤀᤠᤰᤂᤧᤴ ᤕᤧᤶ ᤌᤖᤢᤒᤣ᥅”

⁷ ᤂᤧᤴ ᤘᤜ᤺ᤱᤅᤥᤒᤠ ᤆᤫᤠ᤺ᤳ ᤛᤶᤎᤠᤱ ᤁᤧᤕᤧᤵᤐᤠ ᤏᤤᤏᤠᤛᤢᤳ ᤆᤠᤱ ᤁᤧᤈᤠᤱᤒᤠ ᤔᤏᤠ᤺ᤸᤗᤧ ᤁᤢᤈᤢᤰᤘᤠ ᤏᤢ ᤁᤢᤓᤧᤱᤘᤠ ᤜᤢᤰᤜᤠ᤹ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤑᤥ᤺ᤰᤂᤢ. ᤜᤧᤰᤁᤩᤠᤱ ᤛᤍᤠᤍᤡᤱ ᤁᤧᤘᤠ᤹ᤒᤧᤸᤗᤧ ᤁᤢᤔᤡᤱᤅᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤔᤠᤱᤜᤧᤰᤛᤡᤱᤒᤧᤴ ᤀᤠᤱᤃᤠ᤹ ᤂᤧᤵᤛᤢᤱ. “ᤁᤴ ᤕᤧᤶ. ᤕᤧᤶᤜᤠ᤹ ᤏᤢ ᤁᤢᤓᤪᤧ᤺ᤱ ᤕᤧᤶᤗᤧ ᤗᤠᤃᤡ ᤐᤥᤱ᤹॥ ᤀᤠᤸᤗ ᤛᤣᤛᤣ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤰᤛᤠᤶᤔᤡᤴ ᤁᤢᤏᤢᤵᤔᤥ ᤏᤢᤵ. ᤂᤧᤒᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗᤥ॥”

⁸ ᤀᤠᤱᤃᤠ᤹ ᤂᤧᤵᤔᤠᤃ ᤂᤧᤵᤛᤢᤱ ᤁᤖ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤛᤣ᤺ᤴᤍᤥᤛᤢᤱ. “ᤀᤠᤍᤠᤱᤒᤣ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤏᤢᤵᤔᤠᤴ ᤀᤠᤰᤋᤱᤒᤠ ᤐᤥᤱᤒᤣ᥅”

⁹ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤍᤠᤏᤡᤀᤧᤗᤀᤣ. ᤂᤧᤏᤧ᤹ ᤀᤠᤵᤑᤣᤰ ᤁᤧᤗᤠᤶ ᤏᤠ᤺ᤳᤋᤧ᤹ᤀᤠᤱ ᤌᤠᤛᤡᤱᤅᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤢᤏᤢᤵᤔᤠ ᤕᤧᤶ ᤌᤠᤖᤡᤰ ᤔᤧᤛᤢᤒᤢᤀᤠᤱ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤀᤠᤱ ᤏᤧᤖᤥ॥

¹⁰ ᤕᤖᤡᤰ ᤔᤏᤠᤜᤠ᤹ ᤛᤢᤳᤌᤥ ᤔᤧᤈᤥᤃᤢᤛᤡ᤹. ᤑᤥᤋᤩᤠ ᤔᤣ᤺ᤴᤏᤣᤒᤠ ᤏᤢ ᤛᤣᤛᤣ ᤔᤧᤈᤥᤃᤢᤛᤡ᤹. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤖ ᤔᤧᤍᤣ᤹ᤖᤢ॥ ᤋᤠᤰᤁᤧᤓᤧ᤹ᤒᤠᤜᤠ᤹ᤀᤥ ᤀᤠᤳᤋᤡᤸᤗᤧᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴ᤹. ᤁᤖ ᤛᤡᤰᤁᤢᤶᤛᤠᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ᤹॥

¹¹ “ᤌᤡᤰᤕᤠ᤺ᤴᤎᤰᤐᤠ ᤛᤡᤍᤢᤱᤈᤓᤠᤜᤠ᤹ ᤔᤧᤛᤠᤰᤋᤢᤀᤠᤱ ᤀᤠᤔᤧᤱᤔᤧᤱᤒᤠ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤏᤡᤴ ᤔᤧᤕᤢᤰᤂᤢᤒᤠ ᤕᤧᤶᤔᤠᤱᤎᤥ ᤁᤧᤖᤧᤰᤗᤧ ᥇.᥈᥏᥆ ᤕᤧᤴ ᤐᤥᤱ᤹॥

¹² ᥇.᥉᥉᥋ ᤕᤧᤴ ᤌᤠᤖᤡᤰ ᤁᤧᤜᤠᤱᤒᤠᤀᤠᤱ ᤁᤢᤏᤢᤵᤔᤥ ᤌᤠᤖᤡᤰ ᤁᤧᤃᤧᤵᤐᤠ ᤔᤏᤠ᤺ᤱᤃ ᤔᤢ᤹ᤀᤡᤛᤠᤒᤠᤖᤥ᥄

¹³ “ᤂᤧᤏᤧ᤹ᤃ ᤁᤢᤏᤢᤵᤔᤠ ᤌᤠᤖᤡᤰᤁᤣ ᤁᤧᤗᤠᤶᤔᤥ ᤌᤠᤛᤡᤱᤅᤧ᤹॥ ᤂᤧᤏᤧ᤹ ᤏᤠ᤺ᤶᤛᤡᤱᤔᤠ ᤁᤧᤄᤥᤛᤢ᤹. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤏᤡ᤺ᤴᤎᤥ ᤁᤧᤒᤥᤱᤒᤠ ᤁᤧᤗᤰᤂᤥᤔᤧᤴ ᤋᤠ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤕᤧᤴᤜᤠ᤹ᤖᤧ ᤁᤢᤏᤢᤵᤔᤥ ᤕᤠᤶᤔᤥ ᤁᤧᤒᤥ᤺ᤰᤗᤥ॥”