ᤍᤠᤏᤡᤀᤧᤗ 11 - LIFOTNT1 ᤔᤠᤍᤡ ᤜᤠᤱ ᤍᤠᤖᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ ᤏᤢ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤐᤥᤃᤠᤱ॥) ᤔᤡᤛᤪ ᤏᤢ ᤛᤡᤖᤡᤕᤠ ᤗᤠᤈᤣ᤹ᤒᤠ ᤜᤠᤱᤈᤢᤶᤜᤠ᤹ 2 “ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤔᤧᤳᤏᤧᤖᤥ—ᤑᤠᤖᤛᤒᤠ ᤘᤣ᤹ ᤛᤢᤶᤛᤡ ᤜᤠᤱᤜᤠ᤹ ᤀᤥᤛᤣ᤺ᤴᤎᤠᤱ ᤔᤧᤒᤥᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤠᤱᤛᤠᤁᤢᤴᤎᤣᤛᤠᤒᤠ ᤘᤣ᤹ ᤗᤡᤛᤡᤃᤣ᤺ᤰᤐᤧᤴᤏᤠᤱ ᤀᤥᤛᤣ᤺ᤴᤎᤠᤱ ᤐᤥᤱ᤹॥ ᤀᤠᤸᤗ ᤂᤢᤏᤧ᤹ ᤁᤢᤕᤠᤱᤛᤠ ᤁᤢᤴᤎᤣᤗᤠᤶ ᤔᤢᤰᤛᤠᤶ ᤂᤥᤛᤢᤀᤠᤱ ᤂᤢᤏᤧ᤹ ᤃᤪᤡᤛ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤖᤧᤰ ᤜᤢᤛᤢᤛᤡᤖᤥ॥ 3 “ᤂᤧᤴ ᤀᤣᤃᤠᤱ ᤔᤢᤰᤁᤧᤃᤢᤒᤠ ᤜᤠᤱᤎᤡᤰ ᤐᤥᤰ. ᤂᤢᤏᤧ᤹ ᤕᤶᤒᤠ ᤔᤢᤰᤛᤠᤶᤏᤢ ᤜᤠᤱᤕᤢᤰ ᤆᤥᤃᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤌᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤀᤡ᤺ᤳᤋᤢ. ᤜᤠᤒᤠ ᤂᤧᤴ ᤆᤥᤃᤢ᤹॥ 4 ᤂᤢᤏᤧ᤹ ᤁᤢᤔᤢᤰᤛᤠᤶᤔᤥ ᤐᤥ᤺ᤰᤁᤠᤱ ᤀᤣᤃᤠᤱ. ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤂᤧ᤺ᤰᤁᤠᤱ ᤁᤢᤗᤰ ᤗᤡᤛᤡᤀᤥ ᤐ᤺ᤱ᤹॥ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤧᤴ ᤔᤧᤱᤄᤥᤛᤢᤴ᤹. ᤂᤢᤏᤧ᤹ ᤕᤢᤰ ᤆᤥᤃᤢ ᤁᤳᤋᤢᤒᤧᤴᤏᤠᤱ ᤁᤢᤛ᤻ᤛᤠᤜᤠ᤹ᤖᤧ ᤔᤧᤱᤄᤥᤛᤢᤴ᤹. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤸᤗᤧ ᤜᤠᤱᤈᤢᤶᤔᤡᤴ ᤁᤢᤔᤢᤰ ᤕᤠᤃᤧᤒᤠ ᤜᤧᤰᤁᤣ ᤁᤢᤔᤢᤰ ᤁᤧᤕᤠᤰᤐᤠ ᤔᤧᤒᤥᤱᤏᤧᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤁᤢᤛᤠ᤺ᤵᤐᤥᤏᤢᤀᤣ ᤜᤠ᤹ᤕᤠᤰ ᤔᤧᤀᤠ᤺ᤰᤂᤢᤀᤠᤱ ᤘᤣ᤹ᤜᤠ᤹ ᤔᤧᤒᤡᤖᤢᤛᤡ᤹॥ 5 “ᤗᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤴ ᤔᤢᤰᤛᤠᤶᤛᤠᤒᤠ ᤐᤥᤱ᤹. ᤂᤢᤏᤧ᤹ ᤁᤢᤎᤰᤔᤥᤒᤠᤜᤠ᤹ᤀᤥ ᤌᤡᤰᤐᤠ ᤀᤠᤸᤗᤛᤠᤱ ᤂᤢᤏᤧ᤹ᤏᤢ᤺ᤸᤗᤧ ᤔᤢᤰᤛᤠᤶᤛᤠᤒᤠ ᤐᤥᤱ᤹ ᤜᤧᤰᤁᤩᤠᤱ ᤂᤧᤸᤗᤧ ᤕᤶᤒᤠ ᤔᤢᤰᤛᤠᤶᤗᤠᤶ ᤀᤠᤵᤑᤣᤰ ᤁᤢᤜᤠᤱᤈᤢᤶᤔᤥ ᤕᤢᤰ ᤆᤥᤃᤢ᤹॥ 6 “ᤁᤢᤓᤠ ᤋᤱᤒᤣ ᤀᤣᤃᤠᤱ ᤂᤧᤱᤜᤠ᤹ ᤋᤣ᤺ᤱᤈᤢᤶ ᤗᤠᤈᤣ᤹ ᤔᤧᤒᤥᤱ᤹॥ ᤗᤳᤇᤠ ᤏᤠᤍᤱ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤜᤠᤱᤅᤡᤴᤏᤢ ᤐᤣᤰ. ᤁᤖ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤔᤢᤰᤛᤠᤶᤔᤡᤴ ᤜᤠᤒᤠ ᤔᤧᤘᤠ᤹ᤏᤧᤴ. ᤂᤧᤒᤩᤠᤱ ᤂᤧᤴ ᤜᤠᤱᤅᤡᤴ ᤏᤢ ᤁᤢᤔᤢᤰᤛᤠᤶᤔᤡᤴ ᤀᤡᤖᤡᤰ ᤔᤧᤘᤠ᤹ᤏᤧᤴ॥ ᤂᤧᤴ ᤕᤧᤴᤜᤠ᤹ᤀᤥ ᤂᤧᤸᤗᤧ ᤁᤢᤜᤠᤱ ᤁᤶᤒᤪᤠᤱᤒᤠᤜᤠ᤹ ᤏᤢ ᤂᤢᤏᤧ᤹ ᤁᤢᤶᤒᤠ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤠ᤹ᤒᤠᤱᤜᤠ᤹ᤏᤢ ᤛᤥᤛᤥᤖᤡᤰ ᤂᤢᤏᤧ᤹ ᤜᤢᤰᤔᤧᤛᤢᤵᤋᤢ᤹॥ 7 ᤂᤧᤸᤗᤧ ᤁᤢᤕᤢᤰᤏᤠᤴ ᤔᤧᤳᤇᤡᤱᤔᤠᤖᤧ ᤗᤠᤃᤡ ᤂᤢᤏᤧ᤹ᤀᤣ ᤁᤢᤜᤡᤶᤛᤕᤱᤗᤠᤶ ᤌᤡᤰᤐᤠ ᤐᤥᤰ॥ ᤂᤢᤏᤧ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤸᤗᤧ ᤁᤧᤎᤢᤶᤒᤠ ᤁᤢᤎᤰᤛᤢᤒᤠᤜᤠ᤹ ᤌᤱᤅᤥ ᤑᤳᤋᤢᤛᤡ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤠᤱᤕᤰᤁᤡᤴ ᤑᤢᤖᤢᤳ ᤗᤡᤛᤢ᤹॥ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤁᤠᤱ ᤂᤧᤱᤜᤠ᤹ ᤏᤠ᤺ᤴᤍᤢᤛᤡ᤹॥ 8 ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱ ᤛᤠᤶᤔᤠᤱ. ᤂᤢᤴᤇᤡ᤹ ᤑᤧᤴᤈᤣ᤹ ᤏᤠᤘᤠᤀᤡᤳᤗᤠᤜᤠ᤹ ᤜᤧᤰᤁᤩᤠᤱ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤁᤢᤔᤧᤴ ᤁᤧᤄᤡ᤺ᤰᤐᤠ ᤂᤵᤐᤩᤠ ᤛᤠᤔᤠᤜᤠ᤹ᤀᤠᤱ ᤔᤧᤳᤇᤡᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ ᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤐᤣᤰ॥ ᤁᤢᤓᤠ ᤋᤱᤒᤣᤖᤧ ᤗᤠᤃᤡ ᤂᤢᤏᤧ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤴ ᤗᤧᤖᤢ᤹॥ 9 “ᤂᤧᤒᤩᤠᤱ ᤌᤥ ᤌᤠᤱᤃᤧᤵᤐᤠ ᤜᤠᤱᤅᤡᤸᤗᤧ ᤕᤥ ᤗᤠᤱᤃᤧᤵᤐᤠ ᤜᤠᤱᤅᤡᤸᤗᤧ ᤁᤢᤜᤠᤱᤈᤢᤶᤔᤡᤴ ᤌᤱᤅᤥ ᤑᤳᤋᤢ᤹ ᤁᤖ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤏᤢ᤺ᤱ᤹॥ 10 ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥᤱ᤹ ᤜᤧᤰᤁᤩᤠᤱ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠᤜᤠ᤹ ᤔᤧᤛᤢᤵᤛᤢᤛᤡ᤹. ᤂᤧᤱᤜᤠ᤹ᤖᤧ ᤛᤠᤰᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤁᤧᤃᤢᤱᤒᤠ ᤆᤫᤠ᤺ᤳ ᤁᤢᤀᤡᤛᤡᤰ ᤔᤧᤏᤠ᤺ᤴᤍᤢᤛᤡᤖ ᤌᤱᤅᤡᤴ ᤜᤠᤱᤕᤰᤁᤥ ᤌᤠᤖᤡᤰ ᤔᤧᤃᤧᤳᤋᤢ᤹॥ 11 “ᤂᤧᤒᤩᤠᤱ ᤗᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤴ ᤁᤢᤛᤡᤰ ᤐᤥ᤺ᤰᤁᤠᤱ ᤌᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤌᤠᤱ᤹. ᤜᤧᤰᤁᤩᤠᤱ ᤌᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤸᤗᤧ ᤕᤖᤡᤰ ᤌᤰᤛᤢᤒᤠᤜᤠ᤹ ᤑᤥ᤺ᤰᤂᤢᤛᤡ᤹ ᤁᤖ ᤂᤧᤴ ᤌᤰᤛᤢᤒᤠᤜᤠ᤹ ᤜᤠᤖᤡᤔᤧᤍᤠᤖᤥ॥ 12 ᤀᤠᤸᤗ ᤂᤧᤴ ᤌᤰᤛᤢᤒᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤸᤗᤧ ᤕᤥ ᤗᤠᤱᤃᤧᤵᤐᤠ ᤜᤠᤱᤅᤡᤴ ᤀᤠᤱᤍᤡᤱ ᤗ᤹ᤀᤠᤱ ᤕᤖᤡᤰ ᤜᤧᤴᤇᤡᤱ ᤌᤰᤛᤢᤒᤠᤜᤠ᤹ ᤛᤧᤖᤢᤛᤡ᤹. ᤜᤧᤰᤁᤣᤛᤠᤱ ᤂᤢᤏᤧ᤹ ᤌᤱ ᤁᤧᤏᤠ᤺ᤶᤒᤠ ᤔᤧᤒᤥᤱᤏᤧᤴ᤹॥ 13 “ᤌᤣᤀᤠᤱᤓᤧᤸᤗᤧ ᤌᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤸᤗᤧ ᤋᤃᤡᤏᤢ᤺ᤸᤗᤧᤀᤠᤱ ᤕᤖᤡᤰ ᤌᤰᤛᤢᤒᤠᤜᤠ᤹ ᤛᤢᤵᤛᤢᤛᤡ᤹ ᤜᤧᤰᤁᤩᤠᤱ ᤁᤢᤓᤠ ᤕᤧᤶ ᤀᤣᤃᤠᤱ ᤑᤧᤈᤢᤶᤓᤧᤕᤠᤖᤧ ᤁᤠᤵᤋᤢᤛᤡᤒᤠ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤕᤖᤡᤰ ᤌᤰᤛᤢᤒᤠᤜᤠ᤹ᤏᤢ ᤋᤃᤡ ᤌᤠᤛᤡᤱ ᤕᤢᤖᤥ॥ 14 ᤂᤧᤴ ᤕᤧᤴᤜᤠ᤹ᤀᤥ ᤕᤖᤡᤰ ᤔᤏᤠᤜᤠ᤹ ᤗᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤥᤰ॥ ᤁᤴ ᤛᤢᤑᤥᤴ ᤁᤧᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤠᤵᤑᤣᤰ ᤁᤧᤛᤢᤘᤠᤱᤜᤠ᤹ᤀᤥ ᤗᤠᤶᤒᤠᤀᤣ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤔᤧᤗ᤺ᤴ᤹ ᤁᤖ ᤂᤧᤱᤜᤠ᤹ ᤁᤢᤗᤡᤱᤍᤥ ᤔᤧᤱᤃᤧᤳᤏᤧᤴ᤹॥ 15 ᤂᤧᤴ ᤀᤣᤃᤠᤱ ᤌᤥ ᤌᤠᤱᤃᤧᤵᤐᤠ ᤜᤠᤱᤅᤡᤴ ᤕᤢᤀᤠᤱ ᤗᤢᤱᤎᤠᤰ ᤗᤢ᤺ᤶᤔᤠᤖᤧ ᤗᤠᤃᤡ ᤀᤢ᤺ᤰᤆᤶᤈᤶᤒᤠ ᤋᤧᤴᤜᤠ᤹ ᤆᤥᤃᤢ᤹ ᤜᤧᤰᤁᤩᤠᤱ ᤗᤢᤱᤎᤠᤰᤁᤡᤸᤗᤧ ᤁᤒᤢᤒᤠ ᤕᤧᤰᤕᤰᤌᤡᤰ ᤜᤢᤰᤁᤠᤵ ᤆᤥᤃᤢ᤹॥ ᤗᤠᤱᤃᤧᤳᤐᤠ ᤌᤰᤛᤢᤒᤠᤜᤠ᤹ ᤂᤧᤴᤏᤢ ᤌᤰᤔᤠᤖᤧ ᤗᤠᤃᤡ ᤔᤢᤰᤛᤠᤶ ᤔᤣ᤺ᤴᤏᤣᤒᤠ ᤔᤧᤒᤥᤱ᤹. ᤂᤧᤱᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤏᤢᤖᤡᤰ ᤁᤧᤎᤰᤐᤠ ᤌᤰᤛᤢᤒᤠᤜᤠ᤹ᤀᤠᤱ ᤌᤰᤔᤠ ᤔᤧᤴᤇᤢᤰᤔᤏᤠᤒᤠ ᤔᤧᤒᤥᤱ᤹॥ 16 “ᤌᤱ ᤁᤧᤈᤥ᤺ᤰᤐᤧᤸᤗᤧ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤆᤥᤃᤢ᤹. ᤀᤠᤳᤋᤡᤴᤏᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤔᤠ ᤔᤧᤛᤢᤰᤏᤧᤴ᤹॥ ᤂᤢᤏᤧ᤹ ᤀᤠᤵᤑᤣᤰ ᤂᤧᤴ ᤏᤢᤒᤠ ᤗᤠᤈᤣ᤹ᤀᤥ ᤕᤢᤱᤛᤡᤱ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤧᤴ ᤗᤠᤈᤣᤴ ᤔᤧᤱᤔᤠ ᤔᤢᤰᤛᤠᤶ ᤁᤳᤋᤢ᤹॥ 17 ᤂᤢᤏᤧ᤹ ᤁᤢᤜᤠᤱᤈᤢᤶᤔᤥᤒᤠ ᤁᤧᤖᤧᤰ ᤔᤢᤰᤛᤠᤶᤏᤢ ᤛᤥᤖᤡᤰ ᤕᤢᤔᤠ ᤏᤡ᤺ᤴᤎᤥ ᤆᤥᤃᤢ᤹॥ ᤂᤧᤒᤩᤠᤱ ᤂᤧᤴ ᤜᤠᤱᤈᤢᤶᤔᤡᤴ ᤏᤠ᤺ᤶᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤵᤑᤣᤰ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤂᤧᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤑᤠ᤺ᤰᤋᤢᤀᤠᤱ ᤏᤠᤍᤱ ᤆᤥᤃᤢ᤹. ᤁᤖ ᤂᤢᤏᤧ᤹ ᤛᤥ᤺ᤰᤋᤢᤒᤠ ᤐᤠ᤺ᤴᤏᤡᤴ ᤁᤢᤗᤡᤱᤍᤥ ᤔᤧᤃᤧᤳᤏᤧᤴ᤹. ᤁᤢᤓᤠ᤹ᤀᤠᤱ ᤔᤧᤒᤥᤱᤏᤧᤴ॥ 18 “ᤂᤧᤒᤩᤠᤱ ᤂᤢᤏᤧ᤹ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤗᤠᤈᤣ᤹ᤜᤠ᤹ ᤗᤧᤵᤔᤠᤱ ᤏᤡᤱᤘᤠ᤹ ᤐᤡᤔᤠ ᤜᤣ᤺ᤰᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥᤒᤠ ᤕᤖᤡᤰᤋᤱᤒᤠ ᤂᤢᤏᤧ᤹ ᤁᤢᤕᤢᤰᤁᤥ ᤌᤠᤛᤢᤛᤡ᤹. ᤁᤖ ᤌᤰᤔᤥᤒᤠ ᤌᤡᤰᤗᤧ ᤂᤢᤏᤧ᤹ ᤁᤢᤜᤧᤴᤇᤡᤱᤔᤧᤴ ᤏᤢᤵᤛᤢ ᤐᤡᤖᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤶᤎᤠᤱᤅᤣ ᤁᤢᤜᤧᤴᤇᤡᤱᤔᤧᤴ ᤏᤢ᤺ᤰᤋᤢ ᤐᤡᤖᤢ᤹॥ 19 ᤁᤴ ᤀᤣᤃᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥᤒᤠ ᤜᤠᤱᤕᤰᤜᤠ᤹ᤀᤥ ᤏᤢ᤺ᤱᤒᤣᤰ. ᤁᤖ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤏᤡᤔᤧᤴᤍᤧᤳᤋᤣ ᤌᤠᤖᤡᤰ ᤂᤢᤏᤧ᤹ ᤆᤥ᤺ᤴᤏᤠᤱ ᤜᤷᤃᤢᤵ ᤔᤧᤰ॥ 20 “ᤜᤠᤱ ᤜᤠᤱᤘᤠ ᤔᤠᤱᤘᤠᤴ ᤜᤠᤒᤠ ᤁᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤗᤰᤂᤥᤒᤧᤸᤗᤧ ᤀᤣ᤺ᤱᤕᤠᤱ ᤁᤧᤓᤥᤱᤒᤠ ᤔᤏᤠᤎᤡᤰ ᤐᤠᤱᤄᤢᤕᤢᤛᤢ᤹॥ ᤁᤖ ᤁᤢᤓᤠ ᤋᤱᤒᤣᤖᤧᤛᤠ ᤛᤡᤰᤐᤥ᤺ᤰᤔᤥ ᤀᤡᤃᤪ ᤌᤱᤅᤥ ᤔᤧᤴᤎᤠᤀᤣ ᤁᤴ ᤔᤧᤔᤧᤰᤂᤢᤖᤥ॥” ᤛᤡᤖᤡᤕᤠᤒᤠ ᤋᤠᤰᤁᤧᤓᤧ᤹ᤒᤠ ᤜᤠᤱ 21 “ᤜᤠᤱ ᤔᤡᤱᤛᤥ ᤌᤠᤱᤛᤥ ᤔᤧᤱᤄᤥᤶᤏᤠᤒᤠ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤒᤠ ᤔᤏᤠ ᤌᤡᤰ ᤂᤧᤸᤗᤧ ᤁᤢᤕᤢᤰᤏᤠᤀᤥ ᤕᤢᤱᤛᤡᤱ᤹॥ ᤀᤠᤸᤗ ᤔᤏᤠᤜᤠ᤹ ᤜᤠᤱᤜᤠᤱ ᤗ᤹ᤖᤡᤰ ᤏᤢ ᤂᤧᤴ ᤋᤠ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤔᤧᤘᤠ᤹ᤒᤠ ᤕᤧᤶᤔᤥ ᤂᤧᤸᤗᤧ ᤆᤧᤶᤓᤴᤗᤠᤶ ᤜᤠᤱᤈᤢᤶᤔᤡᤴ ᤜᤢᤰᤁᤠᤵ ᤆᤥᤃᤢ᤹॥ 22 ᤂᤧᤴ ᤀᤣᤃᤠᤱ ᤂᤧᤸᤗᤧ ᤁᤢᤍᤃᤡ ᤔᤢᤰᤛᤠᤶᤛᤠᤒᤠ ᤌᤰᤛᤢᤒᤠᤜᤠ᤹ ᤔᤧᤰᤂᤢᤛᤡ᤹. ᤜᤧᤰᤁᤩᤠᤱ ᤂᤧᤴᤏᤢ ᤛᤥᤖᤡᤰ ᤔᤠᤱᤜᤢᤵᤐᤥᤒᤠ ᤗᤠᤶᤗᤥᤒᤧᤴᤏᤠᤱ ᤔᤧᤔᤧᤰᤂᤢ᤹॥ 23 ᤂᤢᤏᤧ᤹ ᤂᤧᤴᤏᤢ ᤏᤠᤍᤱ ᤆᤥᤃᤢ ᤛᤢᤖᤢᤀᤠᤱ ᤂᤧᤸᤗᤧ ᤀᤡᤱᤗᤧᤰ ᤕᤠ᤺ᤶᤒᤰ ᤆᤥᤃᤢ᤹ ᤜᤧᤰᤁᤩᤠᤱ ᤛᤢ᤺ᤸᤗᤡᤰ ᤔᤏᤠᤜᤠ᤹ᤏᤢ ᤂᤢᤏᤧ᤹ ᤕᤢᤰ ᤆᤥᤃᤢ᤹॥ 24 ᤁᤧᤖᤧᤰᤏᤢ᤺ᤸᤗᤧ ᤕᤠᤱᤛᤠᤁᤢᤴᤎᤣᤛᤠᤒᤠ ᤋᤧᤱᤃᤵᤜᤠ᤹ᤖᤧ ᤁᤶᤒᤪᤠᤱᤅᤥ ᤔᤧᤘᤠ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤠ᤹ᤒᤠ ᤕᤧᤶᤔᤥ ᤂᤧᤸᤗᤧ ᤌᤱᤅᤥ ᤑᤳᤋᤢᤛᤡ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤒᤠ ᤁᤢᤴᤎᤒᤠᤜᤠ᤹ᤖᤧ ᤔᤧᤴᤈᤥᤃᤢᤶᤒᤠ ᤕᤠ᤺ᤶᤒᤰ ᤆᤥᤃᤢ᤹॥ ᤂᤧᤸᤗᤧ ᤏᤠᤵᤋᤢᤛᤡᤒᤠ ᤛᤠᤔᤠᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣᤜᤠ᤹ ᤂᤢᤏᤧ᤹ ᤁᤧᤍᤡᤶᤒᤠᤜᤠ᤹ ᤜᤠ᤺ᤳᤋᤢᤛᤡ᤹॥ ᤂᤧᤸᤗᤧ ᤜᤠᤱᤕᤰᤜᤠ᤹ ᤏᤠ᤺ᤶᤔᤠᤛᤡᤖᤧ ᤗᤠᤃᤡ ᤆᤧᤶᤓᤴ ᤆᤥᤃᤢ᤹ ᤁᤖ ᤁᤴ ᤛᤵᤔᤠ ᤌᤡᤰᤗᤧ ᤗᤠᤃᤡᤖᤰ ᤐᤥᤱ᤹॥ 25 “ᤕᤖᤡᤰ ᤌᤰᤛᤢᤒᤠᤜᤠ᤹ᤏᤢ ᤛᤥᤖᤡᤰ ᤐᤥᤱᤅᤠᤱ ᤂᤢᤏᤧ᤹ ᤗᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤢᤔᤢᤰᤛᤠᤶ ᤏᤢ ᤁᤢᤛᤡᤰᤛᤶᤔᤥ ᤁᤧᤍᤶᤒᤠ ᤗᤧᤱᤛᤡᤱ᤹॥ ᤗᤠᤱᤃᤧᤳ ᤐᤡᤛᤠᤱᤒᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤏᤢ ᤛᤠ᤹ᤖᤡᤰ ᤔᤢᤰᤛᤠᤶᤛᤠᤒᤠ ᤌᤰᤛᤢᤒᤠᤜᤠ᤹ ᤑᤥ᤺ᤰᤂᤢᤛᤡᤀᤠᤱ ᤌᤱ ᤆᤥᤰ. ᤁᤖ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤔᤧᤈᤥᤃᤢᤒᤠ ᤆᤧᤶᤓᤴᤏᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤐᤥ᤺ᤰᤔᤠ ᤔᤧᤛᤢᤰᤏᤧᤴ᤹॥ 26 ᤂᤢᤏᤧ᤹ᤀᤣ ᤁᤢᤍ᤺ᤰ ᤁᤧᤈᤠᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤱᤔᤠ ᤔᤧᤃᤥ᤺ᤳᤋᤢ᤹॥ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤔᤧᤏᤠ᤺ᤴᤍᤢᤛᤡ᤹ ᤂᤧᤶᤒᤩᤠᤱ ᤕᤖᤡᤰ ᤔᤏᤠᤜᤠ᤹ ᤌᤱᤅᤥ ᤔᤧᤛᤡᤖᤥ॥ 27 ᤂᤧᤴ ᤏᤧᤳᤇᤡ ᤜᤠᤱᤜᤠ᤹ᤖᤧ ᤑᤧᤴᤏᤡᤱᤘᤠ᤹ ᤀᤡ᤺ᤳᤇᤢ ᤜᤧᤰᤁᤩᤠᤱ ᤗᤳᤇᤠ ᤆᤠᤈᤠᤔᤠᤍᤧᤴᤏᤥ ᤕᤢᤱᤛᤡᤀᤠᤱ ᤂᤢᤴᤇᤡ᤹ ᤗᤢᤶᤔᤥ ᤀᤡᤱᤗᤧᤰ ᤐᤠᤴ ᤐᤠ᤺ᤳᤇᤡ᤹. ᤁᤖ ᤏᤡᤱᤘᤠ᤹ ᤆᤥ᤺ᤰᤛᤢᤒᤠ ᤐᤠ᤺ᤴᤏᤡᤴ ᤂᤢᤴᤇᤡ᤹ ᤔᤧᤄᤥᤛᤢᤴ᤹. ᤌᤣᤀᤠᤱᤓᤧᤸᤗᤧ ᤁᤢᤏᤢᤵᤔᤠ ᤕᤧᤴᤏᤡᤱᤃ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥᤀᤣ ᤋᤠᤖᤥ॥ 28 “ᤕᤖᤡᤰ ᤕᤠᤱᤛᤠᤁᤢᤴᤎᤣᤏᤢ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤜᤠᤱᤅᤡᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤏᤢ᤺ᤱᤒᤣᤰ. ᤁᤖ ᤂᤧᤸᤗᤧ ᤁᤢᤏᤡᤱᤘᤠᤴ ᤛᤣᤛᤣ ᤔᤠᤱᤜᤢᤵᤐᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤘᤠ᤹॥ ᤂᤢᤏᤧ᤹ ᤁᤸᤗᤧ ᤁᤢᤍᤰᤗᤧᤱᤘᤠᤀᤥ ᤕᤠ᤺ᤶᤒᤰ ᤆᤥᤃᤢ᤹. ᤜᤧᤰᤁᤩᤠᤱ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤏᤢ᤺ᤱᤒᤣᤰ॥ 29 “ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤂᤧᤸᤗᤧ ᤕᤠᤶᤔᤥ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤗᤠᤈᤣᤴ ᤌᤱᤅᤥ ᤑᤳᤋᤢ᤹. ᤁᤖ ᤁᤴ ᤕᤧᤶᤔᤥ ᤋᤃᤡᤒᤠ ᤕᤠᤰᤏᤠᤶᤔᤡᤴᤏᤢ᤺ᤸᤗᤧ ᤘᤣ᤹ ᤐᤥᤱ᤹॥ 30 ᤏᤠᤶᤎᤠ ᤁᤢᤕᤠ ᤗᤧᤵᤔᤠᤱᤒᤠ ᤗᤠᤈᤣ᤹ᤜᤠ᤹ᤗᤠᤶ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤘᤠᤗᤠᤎᤠᤜᤠ᤹ ᤔᤧᤓᤧᤴ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤰᤔᤠ ᤐᤢ᤹ᤖᤥ॥ ᤂᤧᤒᤩᤠᤱ ᤏᤢ᤺ᤱᤅᤠᤱ ᤛᤣᤛᤣ ᤔᤠᤱᤜᤢᤵᤐᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤌᤠᤛᤢ᤹॥ ᤂᤧᤴ ᤏᤢ᤺ᤱᤒᤣ᤺ᤰᤁᤠᤱ ᤂᤢᤏᤧ᤹ ᤛᤣᤛᤣᤔᤠᤱᤜᤢᤵ ᤁᤧᤗᤧᤵᤐᤠ ᤁᤧᤍᤣᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹॥ 31 “ᤔᤠᤱᤜᤡᤶᤔᤡᤴ ᤀᤠᤛᤢᤳᤌᤥ ᤆᤥ᤺ᤰᤔᤠᤖᤧ ᤗᤠᤃᤡ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤖᤧ ᤁᤠᤵᤋᤢᤛᤡᤒᤠ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤔᤧᤒᤥᤰ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤡᤰᤕᤠ᤺ᤴᤎᤰᤐᤠ ᤛᤡᤍᤢᤱᤈᤓᤠᤜᤠ᤹ ᤔᤧᤛᤠᤰᤋᤢ᤹॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤀᤠᤔᤧᤱᤔᤧᤱᤒᤠ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤴ ᤔᤧᤕᤢᤰᤂᤢ᤹॥ 32 ᤔᤠᤱᤜᤢᤵ ᤁᤧᤓᤣ᤺ᤶᤒᤠᤜᤠ᤹ ᤂᤧᤸᤗᤧ ᤀᤡᤱᤗᤧᤰᤋᤢᤛᤡᤀᤠᤱ ᤆᤔᤢᤛᤡ ᤜᤧᤰᤁᤩᤠᤱ ᤑᤧᤳᤗᤠ᤺ᤴᤍᤢᤛᤡ᤹. ᤁᤖ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤁᤢᤛᤡᤱ ᤁᤧᤏᤡ᤺ᤵᤐᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤂᤢᤏᤧ᤹ ᤔᤧᤀᤳᤋᤢ᤹॥ 33 “ᤀᤠᤳᤋᤡᤴᤜᤠ᤹ ᤛᤡᤰᤁᤢᤶᤛᤠᤒᤠ ᤔᤧᤈᤥᤰ. ᤂᤧᤱᤜᤠ᤹ᤖᤧ ᤕᤖᤡᤰ ᤔᤏᤠᤜᤠ᤹ ᤏᤡᤛᤠᤶ ᤔᤧᤜᤢ᤹ᤖᤢᤛᤡ᤹. ᤜᤧᤰᤁᤣᤛᤠᤱ ᤁᤢᤓᤠ ᤕᤧᤶᤗᤧ ᤗᤠᤃᤡ ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢᤛᤡ᤹ ᤀᤡᤃᤪ ᤔᤡ᤺ᤸᤗᤧ ᤔᤧᤀᤥ᤹ᤖᤢᤛᤡ᤹ ᤀᤡᤃᤪ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡ᤹ ᤀᤡᤃᤪ ᤔᤧᤏᤠᤵᤋᤢᤛᤡ᤹॥ 34 ᤀᤠᤸᤗ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤥ ᤔᤧᤈᤥ᤺ᤴᤏᤡᤸᤗᤧ. ᤂᤧᤱᤜᤠ᤹ᤖᤧ ᤆᤒᤧ᤺ᤳᤇᤡᤰ ᤁᤢᤓᤠ᤹ ᤔᤧᤄᤥᤛᤢ᤹. ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤁᤢᤍᤥ᤺ᤵᤔᤠ ᤔᤧᤴᤈᤥ᤺ᤰᤏᤧᤴ. ᤂᤧᤱᤜᤠ᤹ ᤂᤧᤵᤔᤥ ᤔᤧᤒᤳ॥ 35 ᤂᤧᤱᤜᤠ᤹ᤀᤥ ᤁᤢᤓᤠ ᤛᤡᤰᤁᤢᤶᤛᤠᤒᤠᤜᤠ᤹ ᤔᤧᤍᤥᤰ. ᤁᤶᤓᤗ᤹ᤖᤡᤰ ᤂᤧᤱᤜᤠ᤹ ᤁᤢᤏᤢᤵᤔᤠ ᤕᤧᤴᤏᤥ ᤌᤠᤖᤡᤰ ᤛᤢᤳᤌᤥ ᤔᤧᤒᤥᤱ᤹. ᤛᤣᤛᤣ ᤔᤧᤒᤥᤱ᤹ ᤜᤧᤰᤁᤩᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤧᤈᤥᤃᤢᤛᤡ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤴᤏᤡᤴ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤋᤠᤖᤥ॥ 36 “ᤌᤠᤱᤃᤧᤳ ᤐᤡᤛᤠᤱᤒᤠ ᤜᤠᤱᤅᤡᤸᤗᤧ ᤌᤣ ᤆᤥ᤺ᤰᤔᤠ ᤁᤢᤛᤡᤖᤠ᤹ᤌᤠᤱ ᤜᤠᤒᤠ ᤂᤧᤴᤏᤣ ᤆᤥᤃᤢ᤹॥ ᤂᤢᤏᤧ᤹ ᤀᤠᤵᤑᤣᤰ ᤁᤧᤖᤧᤰ ᤔᤠᤱᤜᤠ᤹ᤏᤢ᤺ᤸᤗᤧ ᤌᤥ ᤕᤶᤒᤠ ᤆᤥ᤺ᤰᤛᤡᤱ᤹ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤵᤑᤠᤸᤗᤧᤀᤠᤱ ᤔᤧᤱᤄᤧᤶᤔᤣᤒᤠ ᤐᤠᤴ ᤐᤠ᤺ᤳᤋᤢ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤐᤥ᤺ᤰᤔᤠ ᤕᤧᤶᤔᤡᤴ ᤔᤧᤴᤏᤢᤵᤐᤣ ᤌᤠᤖᤡᤰ ᤂᤧᤴ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤌᤧᤔᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤐᤥ᤺ᤰᤂᤧᤀᤠᤱ ᤘᤠ᤹. ᤂᤧᤴ ᤐᤠ᤺ᤴᤏᤡᤴ ᤁᤧᤵᤔᤠᤀᤣ ᤐᤥᤱ᤹॥ 37 ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤛᤠᤶᤔᤠᤱᤜᤠ᤹ ᤀᤡᤃᤪ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ ᤁᤧᤎᤠᤱᤔᤧᤴᤏᤠᤱ ᤂᤢᤏᤧ᤹ ᤏᤡᤏᤡ ᤔᤧᤗᤠᤵᤋᤢᤴ. ᤂᤢᤏᤧ᤹ ᤀᤠᤳᤋᤡᤴ ᤔᤠᤱᤅᤡᤴᤏᤠᤱ ᤏᤡᤏᤡ ᤂᤧᤶᤄᤧᤶ ᤔᤧᤗᤠᤵᤋᤢᤴ᤹. ᤁᤖ ᤂᤢᤏᤧ᤹ ᤀᤠᤵᤑᤣᤰ ᤂᤧᤱᤜᤠ᤹ ᤁᤧᤖᤧᤰᤏᤢ᤺ᤸᤗᤧ ᤌᤥ ᤕᤶᤒᤠ ᤆᤥ᤺ᤰᤛᤡᤱ᤹॥ 38 ᤂᤧᤱᤜᤠ᤹ᤖᤧ ᤁᤢᤗᤧᤰᤘᤠ ᤂᤢᤏᤧ᤹ ᤜᤠᤱᤕᤰᤜᤠ᤹ᤀᤥᤒᤠ ᤔᤠᤱᤎᤡᤰ ᤔᤡᤱᤛᤥᤎᤠ᤺ᤱᤛᤥ ᤐᤡᤖᤢ᤹. ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠ ᤔᤠᤱᤅᤡᤴ ᤛᤠᤶᤔᤩᤠᤱ ᤏᤢ ᤕᤢᤵᤐᤠ. ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤜᤧᤰᤁᤩᤠᤱ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤡᤰᤋᤥ᤺ᤰᤜᤠ᤹ ᤋᤥ᤺ᤴᤍᤢᤀᤠᤱ ᤔᤡᤱᤛᤥᤎᤠ᤺ᤱᤛᤥ ᤐᤡᤖᤢ᤹॥ 39 ᤂᤢᤏᤧ᤹ ᤗᤳᤇᤠ ᤘᤣ᤹ ᤗᤠᤈᤣ᤹ᤒᤠ ᤔᤠᤱᤅᤡᤸᤗᤧ ᤁᤢᤓᤠ᤹ᤗᤠᤶ ᤁᤧᤖᤧᤰᤏᤢ᤺ᤸᤗᤧ ᤁᤧᤎᤢᤶᤒᤠ ᤜᤠᤱᤕᤰᤜᤠ᤹ ᤌᤱᤅᤥ ᤑᤳᤋᤢᤛᤡ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠᤴ ᤁᤧᤄᤧᤶᤒᤠᤜᤠ᤹ ᤔᤡᤱᤛᤥᤎᤠ᤺ᤱᤛᤥ ᤐᤡᤖᤢᤛᤡ᤹॥ ᤂᤢᤏᤧ᤹ ᤂᤧᤱᤜᤠ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤢᤰᤛᤠᤒᤠ ᤆᤥᤃᤢᤛᤡ᤹ ᤜᤧᤰᤁᤩᤠᤱ ᤜᤠᤱᤛᤧᤶ ᤁᤢᤀᤡᤛᤡᤰ ᤗᤠᤈᤣ᤹ᤛᤡᤱᤒᤢᤱ ᤑ᤺ᤰᤂᤢ ᤐᤡᤖᤢᤛᤡ᤹॥ 40 “ᤁᤢᤏᤢᤵᤔᤠ ᤕᤧᤶᤔᤥ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤜᤠᤱᤅᤡᤴ ᤂᤧᤴᤏᤢ ᤌᤱ ᤆᤥᤰ. ᤜᤧᤰᤁᤩᤠᤱ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤜᤠᤱᤅᤡᤴ ᤀᤴᤗᤠᤎᤠᤜᤠ᤹. ᤀᤴᤃᤧᤕᤢᤰᤐᤠᤜᤠ᤹ ᤏᤢ ᤕᤖᤡᤰ ᤘᤠᤗᤠᤎᤠᤜᤠ᤹ ᤕᤢᤖᤢᤛᤡᤀᤠᤱ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤛᤢᤖᤡᤳ ᤁᤣᤈᤱ ᤁᤢᤀᤡᤛᤡᤰ ᤕᤢᤖᤥ॥ ᤂᤢᤏᤧ᤹ ᤕᤖᤡᤰ ᤗᤠᤈᤣ᤹ᤜᤠ᤹ ᤌᤱᤅᤥ ᤑᤳᤋᤢᤛᤡ᤹. ᤂᤢᤏᤧ᤹ ᤁᤧᤃᤢᤱᤒᤠ ᤁᤧᤕᤢᤒᤠ ᤆᤫᤠ᤺ᤳ ᤜᤧᤰᤁᤣ ᤂᤧᤱᤜᤠ᤹ ᤛᤢ᤺ᤵᤋᤢᤛᤡ᤹॥ 41 ᤂᤢᤏᤧ᤹ ᤂᤧᤴ ᤏᤢᤒᤠ ᤗᤠᤈᤣ᤺ᤴᤏᤠᤱ ᤌᤱᤅᤥ ᤑᤳᤋᤢ᤹॥ ᤕᤖᤡᤰ ᤗᤠᤈᤣ᤹ᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱ᤹. ᤁᤖ ᤀᤧᤍᤥᤔ. ᤔᤥᤀᤠᤒ ᤏᤢ ᤀᤶᤔᤥᤏᤒᤠ ᤏᤢᤒᤠ ᤋᤧᤴᤜᤠ᤹ ᤂᤧᤸᤗᤧ ᤁᤢᤜᤢᤰᤁᤥᤗᤠᤶ ᤋᤠᤱ᤹॥ 42 ᤂᤧᤸᤗᤧ ᤕᤖᤡᤰ ᤗᤠᤈᤣ᤹ᤜᤠ᤹ᤀᤥ ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤴ ᤑᤥᤛᤢᤀᤠᤱ ᤔᤡᤛᤪ ᤗᤠᤈᤣ᤺ᤴᤏᤠᤱ ᤔᤧᤍᤠᤱᤏᤧᤴ॥ 43 ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤜᤧᤰᤁᤩᤠᤱ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤋᤠᤖᤢ᤹ ᤜᤧᤰᤁᤩᤠᤱ ᤗᤡᤒᤡᤕᤠᤗᤡᤜᤠ᤹ ᤏᤢ ᤁᤢᤛᤡᤜᤠ᤹ ᤕᤢᤰᤁᤥ ᤋᤠᤖᤢᤛᤡ᤹॥ 44 “ᤁᤖ ᤏᤠᤱᤃᤧᤴ ᤏᤢ ᤌᤠᤱᤃᤧᤳ ᤐᤡᤛᤠᤱᤗᤠᤶ ᤁᤧᤕᤢᤒᤠ ᤀᤡᤱᤄᤱᤜᤠ᤹ᤖᤧ ᤂᤢᤏᤧ᤹ ᤁᤢᤕᤱᤔᤠ ᤁᤧᤳ ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤁᤠᤱ ᤕᤖᤡᤰ ᤔᤏᤠᤜᤠ᤹ ᤜᤍ᤹ ᤔᤧᤱᤔᤠᤛᤡ ᤏᤢ ᤂᤢᤴᤇᤡ᤹ ᤔᤡᤱ ᤔᤠᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤋᤃᤡ ᤌᤠᤛᤡᤱ ᤐᤣᤰ॥ 45 ᤂᤢᤏᤧ᤹ ᤂᤧᤴ ᤏᤢᤒᤠ ᤛᤣᤛᤣ ᤁᤥ᤺ᤰᤔᤠᤀᤥ ᤏᤢ ᤘᤖ᤺ᤱᤜᤠ᤹ᤖᤧ ᤁᤢᤗᤢᤶᤔᤥ ᤂᤢᤏᤧ᤹ ᤁᤢᤜᤠᤱ ᤛᤠ᤺ᤱᤃᤠᤜᤠ᤹ ᤗᤣ᤺ᤳᤋᤢ᤹॥ ᤜᤧᤰᤁᤣᤛᤠᤱ ᤂᤧᤴ ᤔᤧᤰ ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤂᤢᤏᤧ᤹ ᤔᤧᤓᤠ᤹ᤖᤢᤴᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.