ᤍᤠᤏᤡᤀᤧᤗ 10 - LIFOTNT

ᤋᤠᤀᤡᤃᤪᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤍᤠᤏᤡᤀᤧᤗᤖᤧ ᤛᤢᤑᤥ ᤏᤡᤛᤢ

¹ ᤑᤠᤖᤛᤒᤠ ᤜᤠᤱ ᤁᤥᤖᤣᤛᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤍᤠᤏᤡᤀᤧᤗᤖᤧ (ᤂᤢᤏᤧ᤹ ᤒᤣᤗᤋᤛᤈᤖ ᤔᤧᤔᤧᤳᤋᤢ) ᤘᤣ᤹ ᤛᤢᤑᤥ ᤌᤡᤰ ᤏᤡᤛᤢ॥ ᤁᤴ ᤛᤢᤑᤥ᤺ᤸᤗᤧ ᤀᤡᤱᤄᤱᤅᤡᤴ ᤛᤧᤰᤂᤠᤒᤠ ᤆᤥᤃᤧ ᤜᤧᤰᤁᤩᤠᤱ ᤁᤴ ᤗᤳᤇᤠ ᤕᤶᤒᤠ ᤌᤱᤗᤧ ᤁᤢᤕᤠ᤺ᤶᤒᤣᤀᤥ ᤘᤕᤧ॥ ᤂᤧᤴ ᤀᤡᤱᤄᤱᤅᤡᤸᤗᤧ ᤁᤢᤒᤣᤴ ᤂᤢᤏᤧ᤹ ᤛᤢᤑᤥᤀᤥ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥

² ᤂᤧᤴ ᤕᤧᤶᤔᤥ ᤀᤠᤱᤃᤠ᤹. ᤍᤠᤏᤡᤀᤧᤗᤧᤴ. ᤕᤧᤳᤏᤠᤶ ᤛᤢᤶᤛᤡ ᤌᤠᤖᤡᤰ ᤔᤧᤖᤡᤱ ᤌᤰᤋᤠᤱᤗ ᤘᤕᤠᤱ॥

³ ᤀᤠᤱᤃᤠ᤹ ᤌᤣᤀᤠᤱ ᤁᤢᤈᤠ ᤁᤧᤏᤢ᤹ᤒᤠ ᤁᤢᤈᤠ ᤔᤧᤴᤈᤠᤒᤠᤴ. ᤛᤠ. ᤆᤧᤸᤗᤧᤰᤛᤣ᤹ ᤌᤡ ᤀᤠᤶᤒᤪᤠᤀᤥ ᤔᤧᤗᤠᤛᤧᤴ. ᤜᤧᤰᤁᤩᤠᤱ ᤕᤧᤳᤏᤠᤶ ᤛᤢᤶᤛᤡ ᤔᤧᤸᤗᤧᤰᤁᤣ ᤌᤠᤖᤡᤰ ᤀᤠᤱᤃᤠ᤹ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤏᤡ᤺ᤱᤃᤣ᤹ ᤔᤧᤜᤢ᤺ᤳᤇᤡᤱᤅᤠᤴ॥

⁴ ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤏᤡᤒᤥᤱᤅᤠᤱ ᤗᤡᤛᤡ ᤁᤧᤖᤧᤒᤠ ᤕᤧᤴᤏᤥ ᤀᤠᤸᤗ ᤀᤠᤱᤃᤠ᤹ ᤕᤶᤒᤠ ᤋᤠᤀᤡᤃᤪᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤕᤧᤒᤠᤱᤃᤖᤠᤱᤅᤡᤸᤗᤧ.

⁵ ᤀᤠᤱᤃᤠ᤹ ᤌᤠ᤺ᤱ ᤀᤥᤔᤕᤠᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤁᤢᤃᤣᤱᤅᤥ ᤀᤢᤐᤈ ᤗᤠᤈᤣ᤹ᤒᤠ ᤛᤠ᤹ᤖᤡᤰ ᤏᤢᤒᤠ ᤛᤠᤶᤔᤩᤠᤱ ᤑ᤹ᤀᤡ ᤁᤧᤕᤢᤶᤒᤠᤀᤠᤱ ᤏᤤᤏᤠᤛᤢᤳ ᤆᤠᤱ ᤁᤧᤈᤠᤱᤒᤠ ᤔᤏᤠᤎᤡᤰ ᤏᤡᤛᤢᤱ॥

⁶ ᤂᤢᤏᤧ᤹ ᤁᤢᤎᤰᤁᤡᤴ ᤀᤡᤔᤧᤸᤗᤢᤱᤒᤠ ᤔᤢᤎᤡᤱ ᤁᤢᤀᤡᤛᤡᤰ ᤁᤧᤀᤥ᤺ᤵᤐᤠ ᤆᤥᤃᤧ. ᤂᤢᤏᤧ᤹ ᤁᤢᤏᤠᤖᤠᤴ ᤛᤠ᤺ᤶᤓᤣ ᤁᤧᤗᤧᤰᤐᤠ ᤜᤧᤰᤁᤣ ᤁᤧᤍᤡ᤺ᤵᤐᤠ ᤆᤥᤃᤧ. ᤂᤢᤏᤧ᤹ ᤁᤢᤔᤡᤰᤁᤡᤴ ᤋᤩᤠ᤺ᤸᤗᤥᤳ ᤜᤧᤰᤁᤣ ᤋᤡᤖᤧᤀᤠᤱ ᤐᤳᤇᤧ॥ ᤂᤢᤏᤧ᤹ ᤁᤢᤜᤢᤰ ᤏᤢ ᤁᤢᤗᤠᤱᤜᤠ᤹ ᤀᤡ᤺ᤱᤔᤏᤠᤒᤠ ᤁᤠᤛᤠ ᤜᤧᤰᤁᤣ ᤛᤧᤸᤗᤧᤱ ᤛᤧᤸᤗᤧᤱ ᤗᤧᤰᤋᤧ ᤂᤶᤓᤩᤠᤱ ᤂᤢᤏᤧ᤹ ᤁᤢᤀᤡᤰᤗᤠ᤺ᤱᤃ ᤕᤖᤡᤰ ᤔᤏᤠᤜᤠ᤹ ᤜᤕᤱ ᤁᤡᤸᤗᤡᤱ ᤔᤧᤗ᤹ᤒᤠ ᤀᤡᤰᤗᤠ ᤜᤧᤰᤁᤣ ᤗ᤹ᤖᤧ॥

⁷ ᤀᤠᤱᤃᤠ᤹. ᤍᤠᤏᤡᤀᤧᤗᤖᤧᤖᤰ ᤂᤧᤴ ᤛᤢᤑᤥᤴ ᤏᤡᤛᤢᤱ॥ ᤀᤠᤱᤃᤠ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤧᤴ ᤔᤧᤴᤏᤡᤛᤢᤴ. ᤁᤖ ᤂᤧᤱᤜᤠ᤹ ᤐᤃᤡ ᤔᤧᤃᤡᤛᤧ ᤜᤧᤰᤁᤩᤠᤱ ᤔᤧᤄᤧᤳᤇᤡᤱᤅᤠᤱ ᤀᤠᤵᤑᤣᤰ ᤔᤧᤈᤡᤱᤛᤡᤱ॥

⁸ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴ ᤏᤡᤱᤘᤠ᤹ ᤁᤧᤔᤠᤒᤠ ᤛᤢᤑᤥᤴ ᤀᤥᤔᤧᤳᤋᤢᤱᤅᤠᤱ ᤐᤳᤇᤠᤱᤒᤠ ᤕᤧᤶᤔᤥ ᤀᤠᤱᤃᤠ᤹ ᤀᤣ᤺ᤰ ᤔᤧᤗᤧᤖᤠᤱ ᤔᤧᤎᤩᤠᤱ॥ ᤀᤠᤱᤃᤠ᤹ ᤆᤒᤧ᤺ᤳᤇᤡᤰᤁᤠᤱ ᤔᤧᤎᤢᤶᤍᤠᤱᤅᤡᤴ. ᤀᤠᤱᤃᤠ᤹ ᤀᤠᤏᤠᤖᤠᤴ ᤁᤧᤛᤡᤒᤠ ᤁᤢᤀᤡᤛᤡᤰ ᤀᤶᤃᤧᤗ᤹ᤒᤠ ᤐᤥ᤺ᤰᤂᤧᤀᤠᤱ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤐᤥ᤺ᤰᤂᤠᤱ॥

⁹ ᤂᤧᤒᤩᤠᤱ ᤂᤢᤏᤧ᤹ ᤐᤠᤖᤧᤒᤠ ᤂᤧᤵᤛᤢᤱ ᤜᤧᤰᤁᤩᤠᤱ ᤀᤠᤸᤗ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤱᤗ ᤐᤳᤇᤠᤱᤅᤡᤸᤗᤧ ᤀᤠᤱᤃᤠ᤹ ᤂᤠᤶᤒᤠᤱᤅᤥ ᤛᤠᤒᤴ ᤐᤳᤇᤠᤱᤅᤠᤱ ᤔᤢᤖᤢᤰ ᤂᤠᤖᤢᤰ ᤀᤡᤵᤛᤠᤱ ᤗᤠᤛᤠᤱ॥

¹⁰ ᤗᤳᤇᤠ ᤜᤢᤰᤌᤡᤰᤗᤧ ᤀᤠᤱᤃᤠ᤹ ᤛᤢᤛᤠᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤡᤛᤠᤱᤅᤠᤱ ᤕᤰᤂᤠᤱᤅᤠᤱ ᤐᤳᤇᤠᤱᤗᤀᤣ ᤀᤠᤜᤢᤰ ᤏᤢ ᤀᤠᤎᤢᤱᤒᤥ᤺ᤸᤗᤧ ᤋᤰᤛᤡᤱᤅᤠᤱᤗ ᤕᤠ᤺ᤴᤍᤠᤱ॥

¹¹ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤍᤠᤏᤡᤀᤧᤗᤀᤣ. ᤏᤡᤱᤘᤠ᤹ᤑᤢᤔᤠᤱᤅᤥ ᤂᤧᤏᤧ᤹ᤃ ᤛᤠ᤹ᤖᤡᤰᤁᤣ ᤀᤡᤔᤧᤸᤗᤢᤱᤒᤠ ᤁᤧᤈᤥᤰ. ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤖ ᤐᤳᤋᤠᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹. ᤜᤧᤰᤁᤩᤠᤱ ᤋᤰᤐᤧᤳ ᤕᤧᤒᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤔᤧᤒᤠᤱᤄᤠᤱᤅᤠᤱ ᤘᤠ᤹ᤀᤠ॥” ᤀᤠᤸᤗ ᤂᤢᤏᤧ᤹ ᤁᤴ ᤔᤧᤳᤋᤠᤱᤅᤠᤱ ᤀᤠᤱᤃᤠ᤹ ᤌᤧᤃᤰᤁᤰᤏᤠ ᤕᤰᤂᤠᤱᤗ ᤕᤧᤶᤛᤡᤱᤅᤠᤖᤥ॥

¹² ᤂᤢᤏᤧ᤹ ᤐᤠ᤺ᤳᤋᤢᤖ ᤋᤣ᤹ᤖᤢ. “ᤍᤠᤏᤡᤀᤧᤗᤀᤣ. ᤔᤧᤃᤡᤛᤧᤴᤏᤧ᤹. ᤂᤧᤏᤧ᤹ ᤁᤧᤏᤡᤱᤘᤠᤴ ᤂᤠᤛᤡᤱᤏᤡ᤺ᤵᤔᤠ ᤗᤧᤵᤔᤠᤱ ᤏᤡᤱᤘᤠ᤹ ᤁᤧᤒᤡᤖᤢᤒᤠ ᤏᤢ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤵᤑᤣᤰ ᤏ᤺ᤶᤏ᤺ᤶᤒᤠ ᤁᤧᤈᤥ᤺ᤰᤛᤡᤱᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤠᤱᤎᤥᤀᤣ ᤁᤧᤒᤣ᤺ᤸᤗᤡᤜᤠ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤘᤕᤧ. ᤀᤠᤱᤃᤠ᤹ ᤁᤧᤒᤣᤗᤡᤃᤧᤴ ᤋᤢᤘᤠ᤺ᤸᤗᤧ ᤏᤢᤃᤵ ᤐᤡᤛᤧ ᤕᤠᤱᤅᤠᤱ ᤘᤠ᤹ᤀᤠ॥

¹³ ᤁᤖ ᤑᤠᤖᤛ ᤜᤠᤱᤈᤢᤶᤔᤥᤒᤠ ᤕᤠᤶᤛᤠᤶᤃᤧᤴ ᤕᤢᤰᤛᤠᤒᤧᤸᤗᤧ ᤀᤠᤱᤃᤠ᤹ ᤏᤡᤒᤥᤱᤅᤠᤱ ᤌᤡᤰᤕᤧᤴ ᤌᤠᤖᤡᤰ ᤀᤳᤋᤠᤱ॥ ᤂᤧᤒᤩᤠᤱ ᤋᤢᤶ ᤔᤠᤱᤗᤠᤀᤡᤱᤒᤠ ᤔᤡᤂᤠᤀᤣᤗᤧᤴ ᤀᤠᤱᤃᤠ᤹ ᤀᤠᤓᤠ᤹ᤛᤧ ᤕᤧ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤑᤠᤖᤛᤒᤠ ᤜᤠᤱᤜᤠ᤹ᤏᤢ ᤀᤣ᤺ᤰᤛᤧᤳᤇᤠ ᤜᤠᤒᤠ ᤂᤧᤵᤔᤥ ᤘᤕᤠᤱ॥

¹⁴ ᤀᤠᤸᤗ ᤁᤧᤍᤠᤒᤠ ᤕᤧᤶᤔᤥ ᤁᤧᤔᤏᤠᤜᤠ᤹ ᤌᤣ ᤔᤧᤒᤥᤱ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤆᤧᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤕᤩᤠᤱᤀᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤛᤢᤑᤥᤴ ᤋᤠ᤺ᤴᤍᤡ ᤁᤧᤍᤠᤒᤠ ᤐᤠ᤺ᤴᤜᤠ᤹ᤏᤢ ᤋᤱᤗᤥ॥”

¹⁵ ᤂᤢᤏᤧ᤹ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗ ᤐᤳᤇᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤎᤣᤃᤣ᤺ᤰᤁᤡᤴ ᤋᤷᤄᤢ᤹ ᤔᤧᤳᤋᤢᤱᤅᤠᤱ ᤌ᤺ᤳᤌᤠ ᤐᤥ᤺ᤰᤂᤠᤱ॥

¹⁶ ᤜᤧᤰᤁᤩᤠᤱ ᤂᤧᤴ ᤔᤏᤠ ᤜᤧᤰᤋᤱᤒᤠ ᤏᤡᤃᤧᤍᤧᤵᤐᤠ ᤌᤡᤰᤗᤧ ᤀᤠᤱᤃᤠ᤹ ᤀᤠᤶᤒᤪᤠᤴ ᤛᤢᤛᤢ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤶᤒᤪᤠᤴ ᤜᤴᤍᤢᤱᤅᤠᤱ ᤐᤠ᤺ᤵᤔᤠ ᤜᤣ᤺ᤰᤋᤠᤱ॥ ᤀᤠᤱᤃᤠ᤹ ᤀᤠᤍᤃᤡ ᤁᤧᤕᤧᤵᤐᤧᤴ ᤔᤧᤳᤋᤢᤱ. “ᤀᤠᤍᤠᤱᤒᤣ. ᤛᤢᤑᤥ᤺ᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤕᤠᤶᤍᤢᤰᤔᤠ ᤏᤢ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥

¹⁷ ᤀᤠᤱᤃᤠ᤹. ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤴ. ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ᤏᤢ ᤐᤠ᤺ᤵᤔᤠ ᤛᤢᤰᤁᤠᤒᤣ. ᤀᤠᤍᤠᤱᤒᤣ᥅ ᤀᤠᤱᤃᤠ᤹ ᤔᤧᤴᤎᤢᤶᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ ᤂᤧᤒᤩᤠᤱ ᤛᤰᤔᤠ ᤛᤥ᤺ᤴᤇᤡᤱᤔᤠᤀᤠᤱ ᤁᤧᤛᤠᤰᤐᤠ ᤋᤢᤔᤢᤱᤅᤠᤱ ᤘᤠ᤹॥”

¹⁸ ᤕᤠᤶᤔᤥ ᤂᤧᤴ ᤔᤏᤠ ᤜᤧᤰᤋᤱᤒᤠ ᤏᤡᤃᤧᤍᤧᤵᤐᤧᤸᤗᤧ ᤀᤠᤱᤃᤠ᤹ ᤛᤢᤛᤠᤱᤅᤠᤱ ᤁᤧᤎᤢᤶᤒᤠ ᤆᤥᤃᤠᤱ॥

¹⁹ ᤂᤢᤏᤧ᤹ ᤔᤧᤳᤋᤠᤱ. “ᤏᤡᤱᤘᤠ᤹ᤑᤢᤔᤠᤱᤅᤥ ᤂᤧᤏᤧ᤹ᤃ ᤛᤠ᤹ᤖᤡᤰᤁᤣ ᤀᤡᤔᤧᤸᤗᤢᤱᤒᤠ ᤁᤧᤈᤥᤰ. ᤔᤧᤃᤡᤛᤧᤴᤏᤧ᤹॥ ᤁᤧᤏᤡᤱᤘᤠ᤹ ᤜᤠᤱᤜᤠᤱ ᤗ᤹ᤖ. ᤀᤠᤸᤗ ᤂᤧᤏᤧ᤹. ᤁᤧᤎᤢᤶᤒᤠ ᤐᤥ᤺ᤰᤂᤧ᤹॥” ᤀᤠᤸᤗ ᤂᤢᤏᤧ᤹ ᤀᤠᤱᤃᤠ᤹ᤏᤢ ᤐᤠᤖᤧᤸᤗᤧ. ᤀᤠᤱᤃᤠ᤹ ᤁᤧᤎᤢᤶᤒᤠ ᤐᤥ᤺ᤰᤂᤠᤱᤅᤠᤱ ᤐᤠᤖᤠᤱ. “ᤀᤠᤍᤠᤱᤒᤣ. ᤐᤠᤖᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤎᤢᤶᤒᤠ ᤁᤧᤈᤥᤃᤠᤱᤅᤠᤱ ᤘᤠ᤹॥”

²⁰ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤔᤧᤳᤋᤠᤱ. “ᤀᤠᤱᤃᤠ᤹ ᤂᤧᤏᤧ᤹ᤀᤥ ᤌᤣᤀᤠᤱ ᤕᤩᤠᤱᤀᤠᤱ ᤘᤠ᤹ᤀᤠ. ᤂᤧᤏᤧ᤹ ᤁᤧᤏᤡᤛᤢᤒᤡ᥅ ᤑᤠᤖᤛᤒᤠ ᤕᤠᤶᤛᤠᤶᤃᤧᤴ ᤕᤢᤰᤛᤠᤒᤧᤴᤏᤢ ᤌᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤜᤠᤖᤠᤀᤣ ᤏᤢ᤺ᤱᤅᤠᤖᤥ. ᤜᤧᤰᤁᤩᤠᤱ ᤀᤠᤸᤗ ᤀᤠᤱᤃᤠ᤹ ᤐᤣ᤺ᤰᤁᤠᤀᤠᤱ ᤃᤪᤡᤛᤒᤠ ᤕᤠᤶᤛᤠᤶᤃᤧᤴ ᤕᤢᤰᤛᤠᤒᤧᤴ ᤑᤧᤴ॥

²¹ ᤁᤖ ᤛᤧᤰᤂᤠᤒᤠ ᤛᤠᤵᤐᤴᤏᤥ ᤌᤣ ᤛᤠᤵᤋᤧᤀᤠᤱ ᤐᤳ. ᤋᤃᤡ ᤀᤠᤱᤃᤠ᤹ ᤂᤧᤴ ᤂᤧᤏᤧ᤹ ᤆᤧᤰᤏᤧᤖᤥ॥ (ᤂᤧᤏᤧ᤹ ᤋᤢᤶ ᤁᤧᤔᤠᤱᤗᤠᤀᤡᤱᤒᤠ ᤔᤡᤂᤠᤀᤣᤗᤧᤴᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠ ᤀᤠᤱᤃᤠ᤹ ᤔᤧᤓᤠ᤹ᤀᤠᤴᤗᤥ॥”