ᤁᤗᤛ᤻ᤛᤡ 3 - LIFOTNTᤂᤪᤡᤛ᤻ᤋᤀᤥ ᤁᤢᤛᤱ ᤜᤡᤱᤔᤴ 1 ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤂᤪᤡᤛ᤻ᤋᤧᤴᤏᤢᤀᤣ ᤁᤢᤜᤡᤱᤘᤧᤳ ᤁᤧᤈᤥᤃᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ ᤁᤥ᤺ᤳᤋᤧᤶᤔᤧ᤹ᤖ ᤘᤕᤧᤶᤔᤧ᤹ᤀᤥ॥ ᤂᤧᤳᤌᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤔᤡᤱᤛᤥ ᤀᤡᤱᤎᤠᤱᤏᤢ ᤔᤢᤰᤛᤠᤶᤍᤧᤴᤏᤥ ᤂᤪᤡᤛ᤻ᤋᤧᤴ ᤕᤢᤰᤂᤢᤀᤠᤱ ᤕᤢᤱᤗᤥ॥ 2 ᤁᤵᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤖᤰ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥ 3 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤴ ᤛᤩᤧ᤺ᤸᤗᤧ ᤂᤡᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤁᤧᤛᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤧᤰᤂᤠᤒᤠ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤂᤪᤡᤛ᤻ᤋᤧᤴᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤆᤡᤰᤂᤧᤀᤠᤱ ᤘᤠ᤹ᤖᤥ॥ 4 ᤂᤡᤏᤡ᤹ ᤛᤧᤰᤂᤠᤒᤠ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤱᤃ ᤂᤪᤡᤛ᤻ᤋᤖᤥ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤠ᤺ᤶᤛᤡᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤡᤔᤡᤍᤡᤱᤅᤥ ᤁᤧᤎᤠ᤺ᤶᤔᤠᤛᤡᤖᤥ॥ 5 ᤂᤧᤸᤗᤧᤆᤥᤃᤢᤸᤗᤧ ᤔᤧᤴᤇᤢᤔᤠ᤹ ᤏᤢ ᤕᤧᤶᤒᤡᤳᤇᤠ᤹ᤜᤠ᤹ ᤆᤠᤖᤠᤶᤔᤠ ᤐᤠ᤺ᤴᤏᤡᤴ. ᤆᤡ᤺ᤴᤈᤡᤴᤒᤠ ᤁᤧᤈᤥ᤺ᤰᤐᤠ ᤕᤠ᤺ᤶᤒᤰ. ᤆᤠᤖᤠᤶᤔᤠ ᤏᤡᤱᤘᤠ᤹ ᤆᤥ᤺ᤰᤔᤠᤴ. ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤴ ᤏᤢ ᤂᤡ᤺ᤶᤕᤰ ᤆᤥ᤺ᤰᤔᤠᤴ ᤜᤧᤰᤋᤱᤒᤠ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤕᤧᤵᤗᤧᤰᤜᤠ᤹ᤃ ᤏᤠᤘᤠᤀᤡᤳᤗᤠᤴ ᤔᤠᤱᤄ᤺ᤶᤏᤠᤒᤠᤖᤥ॥ ᤂᤡᤏᤡ᤹ ᤂᤧᤴ ᤁᤠᤰ ᤕᤢᤰᤋᤧᤶᤔᤧ᤹ᤀᤥ॥ 6 ᤌᤣᤀᤠᤱᤓᤧᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤛᤶᤍᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤆᤢᤰᤗᤥ॥ 7 ᤀᤢᤴᤇᤥ᤺ᤴᤒᤠ ᤂᤡᤏᤡ᤹ ᤜᤡᤱᤔᤴᤏᤥ ᤒᤠ ᤀᤰᤋᤱᤒᤠ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ ᤁᤧᤘᤕᤡᤖᤥ॥ 8 ᤁᤖ ᤀᤠᤸᤗᤥᤃ ᤂᤡᤏᤡ᤹ᤀᤠᤱ ᤛᤡᤰᤐᤥ᤺ᤰᤔᤠᤴ. ᤛᤠᤰᤁᤧᤴᤏᤡᤴ. ᤏᤠᤜᤧᤶᤔᤠᤴ. ᤜᤡᤏᤠ᤺ᤶ ᤔᤧᤳᤇᤡᤱᤔᤠᤴ. ᤔᤧᤴᤇᤡᤰᤁᤪᤠ ᤐᤠ᤺ᤴᤜᤠ᤹ ᤁᤠᤰ ᤗᤧᤵᤔᤠ ᤋᤣᤔᤠᤀᤣ ᤐᤥᤱᤗᤥ॥ 9 ᤂᤡᤏᤡ᤹ ᤀᤡᤱᤗᤧᤰ ᤔᤧᤔᤧᤳᤋᤠᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤋᤃᤡᤒᤠ ᤗᤠᤕᤥᤒᤠ ᤛᤢᤳᤏᤠ᤺ᤴ ᤏᤢ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰᤜᤠ᤹ ᤁᤠᤰ ᤁᤧᤗᤧᤖᤢᤶ ᤁᤧᤍᤣᤛᤢᤶᤔᤠᤱ ᤁᤧᤘᤕᤡ᤹. 10 ᤜᤧᤰᤁᤩᤠᤱ ᤂᤡᤏᤡ᤹ᤃ ᤁᤢᤛᤱ ᤛᤢᤳᤏᤠ᤺ᤴ ᤋᤣᤳ ᤜᤧᤰᤁᤣ ᤁᤧᤈᤠᤰᤂᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ᤃ ᤏᤠᤘᤠᤃᤧᤴ ᤆᤀᤡ᤺ᤳᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤂᤢᤏᤧ᤹ ᤁᤢᤀᤡ᤺ᤳ ᤜᤧᤰᤁᤣ ᤁᤧᤒᤥ᤺ᤰᤂᤡᤖ ᤁᤧᤒᤳᤇᤡᤖᤥ॥ 11 ᤀᤠᤸᤗ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤢ ᤕᤜᤢᤍᤡ. ᤜᤷᤍᤥ ᤁᤧᤜᤧᤰᤐᤠ ᤏᤢ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ. ᤂᤠᤛᤡᤱ ᤁᤧᤏᤡ᤺ᤵᤐᤠ ᤏᤢ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ. ᤕᤥᤰ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹ ᤛᤧᤴᤇᤡᤱᤔᤠ ᤜᤥᤵᤗᤥ. ᤁᤖ ᤂᤪᤡᤛ᤻ᤋᤧᤴᤗᤰ ᤁᤧᤕᤧᤰᤐᤠ ᤆᤥᤰ. ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤰ ᤐᤠ᤺ᤴᤜᤠ᤹ᤀᤥᤀᤣ ᤘᤠ᤹ᤖᤥ॥ 12 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹. ᤛᤣᤛᤣ ᤏᤢ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤜᤠ᤹ᤖᤧ. ᤗᤢᤱᤍᤢᤰᤁᤡᤴ. ᤗᤢᤱᤔᤠ᤹ ᤋᤢᤰᤛᤡᤱᤔᤠᤴ. ᤏᤥᤏᤡᤱᤘᤠ᤹ᤀᤡᤴ. ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤗ᤹ᤔᤠᤴ ᤏᤢ ᤏᤠᤛᤡ ᤌ᤺ᤵᤔᤠᤴ ᤆᤠᤱ ᤁᤢᤀᤡᤛᤡᤰ ᤆᤠᤰᤛᤡᤱᤔᤠ ᤐᤥᤱᤗᤥ॥ 13 ᤂᤡᤏᤡ᤹ᤃ ᤘᤣ᤹ᤜᤠ᤹ᤏᤢ ᤏᤠᤛᤡ ᤌ᤺ᤳᤇᤡᤱᤔᤠ ᤐᤥᤱᤅᤠᤱ ᤏᤡᤱᤘᤠ᤹ ᤋᤢᤰᤔᤠ ᤐᤠ᤺ᤴᤜᤠ᤹ ᤘᤠ᤹ᤛᤠᤱ ᤗᤧᤵᤔᤡ ᤐᤡᤀᤠᤛᤡᤶᤔᤧ᤹ᤀᤥ॥ ᤍᤠᤱᤒᤠᤸᤗᤧ ᤗᤧᤵᤔᤡ ᤁᤧᤒᤡᤖᤡᤒᤠ ᤁᤢᤀᤡᤛᤡ᤺ᤰᤁᤣ ᤗᤧᤵᤔᤡ ᤐᤡᤀᤠᤛᤡᤶᤔᤧ᤹ᤀᤥ॥ 14 ᤜᤧᤰᤁᤩᤠᤱ ᤁᤴ ᤁᤧᤖᤧᤰᤏᤢ᤺ᤸᤗᤧ ᤕᤖᤡᤰ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ॥ ᤂᤧᤸᤗᤧᤀᤣ ᤂᤡᤏᤡ᤹ ᤌᤡᤰᤜᤢᤵ ᤐᤥᤱᤔᤠ ᤁᤢᤗᤡᤱᤍᤥ ᤁᤧᤃᤧᤳᤋᤡ᤹ᤖᤥ॥ 15 ᤜᤠᤖᤠ᤹ ᤂᤪᤡᤛ᤻ᤋᤖᤧ ᤁᤢᤛᤏᤠᤖᤢᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤕᤢᤰᤋᤢᤖᤖᤥ. ᤌᤣᤀᤠᤱᤓᤧᤸᤗᤧ ᤛᤏᤠᤖᤢᤱᤅᤥ ᤘᤠ᤹ᤔᤠ ᤑᤠ᤹ᤀᤠᤱ ᤂᤡᤏᤡ᤹ᤃ ᤗᤳᤌᤡᤰ ᤏᤠᤛᤡᤱᤃᤧᤴ ᤌᤰᤁᤥ ᤀᤢ᤺ᤳᤇᤡᤱᤔᤠ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤏᤥᤃᤧᤴᤛᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥ 16 ᤜᤠᤖᤠ᤹ ᤂᤪᤡᤛ᤻ᤋᤖᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤋᤡᤶᤔᤠᤱ ᤘᤠ᤹ᤖᤖᤥ॥ ᤂᤡᤏᤡ᤹ ᤒᤠ ᤁᤴ ᤐᤠ᤺ᤴᤈᤠᤰᤁᤡᤸᤗᤧ ᤜᤢ᤹ᤀᤠᤛᤡᤶᤔᤧ᤹. ᤜᤧᤰᤁᤩᤠᤱ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤛᤢᤈᤠ ᤐᤡᤀᤠᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤛᤧᤘᤠ ᤆᤥ᤺ᤰᤔᤠ ᤛᤠᤶᤗᤥᤜᤠ᤹. ᤕᤠᤶᤛᤠᤶᤃᤧᤴ ᤛᤠᤶᤗᤥᤜᤠ᤹ ᤏᤢ ᤛᤣᤛᤣᤔᤠᤱᤗᤠᤶ ᤁᤧᤍᤠᤒᤠ ᤛᤠᤶᤗᤥᤜᤠ᤹ ᤛᤠᤶᤃᤧᤔᤧᤳᤋᤢᤶᤔᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥᤏᤢᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤀᤥ॥ 17 ᤂᤡᤏᤡ᤹ ᤆᤩᤠ ᤁᤧᤒᤠ᤺ᤳᤋᤢᤶᤛᤠᤱ ᤆᤩᤠ ᤁᤧᤈᤥᤃᤢᤶᤛᤠᤱ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤀᤥ॥ ᤏᤛᤠᤏᤡᤒᤠ ᤜᤡᤶᤛᤕᤱ ᤌᤡᤶ 18 ᤔᤧᤸᤗᤡᤱᤃᤧᤴ ᤔᤣ᤺ᤳᤇᤣ. ᤂᤡᤏᤡ᤹ ᤀᤡᤳᤌᤢᤱᤃᤧᤴ ᤕᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥ ᤀᤰᤂᤣ ᤆᤥ᤺ᤰᤔᤠᤃ ᤍᤠᤱᤒᤠᤀᤥ ᤗᤠ᤹ᤖᤢᤖᤥ॥ 19 ᤜᤧᤰᤁᤩᤠᤱ ᤀᤡᤳᤌᤢᤱᤃᤧᤴ ᤕᤧᤶᤒᤠᤛᤣ. ᤂᤡᤏᤡ᤹ ᤔᤧᤸᤗᤡᤱᤃᤧᤴ ᤔᤣ᤺ᤳᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ ᤁᤖ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥ 20 ᤜᤡᤴᤈᤠ᤹ᤒᤡᤳᤇᤠᤛᤣ. ᤂᤡᤏᤡ᤹ ᤐᤠᤔᤠᤜᤠ᤹ᤖᤧ ᤔᤢᤖᤠ ᤁᤧᤶᤔᤧᤳᤋᤡᤒᤠ ᤐᤠ᤺ᤴᤏᤡᤴ ᤀᤠᤵᤑᤠᤸᤗᤧᤛᤠᤱ ᤂᤧᤵᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤏᤡᤸᤗᤧ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢ᤹ᤖᤥ॥ 21 ᤐᤠᤏᤢᤍᤡᤱ ᤐᤠᤛᤣ. ᤂᤡᤏᤡ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤢᤰᤂᤧᤶ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤂᤢᤏᤡ᤹ ᤏᤡᤱᤘᤠ᤹ ᤐᤱᤛᤡᤱᤗᤥ॥ 22 ᤛᤣᤘᤠᤖᤥᤒᤠᤛᤣ. ᤀᤡᤰᤛᤠᤒᤠ ᤂᤡᤏᤡ᤹ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤐᤠᤴ ᤁᤧᤄᤧᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥ ᤁᤱᤃ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤔᤠ ᤐᤡᤔᤠᤛᤡᤖᤧ ᤗᤠᤃᤡᤖᤰ ᤔᤣ᤺ᤴ. ᤁᤖ ᤁᤠᤰ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤀᤡᤴᤏᤢ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥᤖᤧ ᤗᤠᤃᤡ ᤆᤥᤃᤧᤶᤔᤧ᤹ᤀᤥ॥ 23 ᤂᤡᤏᤡ᤹ ᤆᤩᤠ ᤁᤧᤈᤥᤃᤢᤶᤛᤠᤱ ᤔᤏᤠᤖᤧ ᤗᤠᤃᤡ ᤔᤣ᤺ᤴ. ᤁᤖ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤖ ᤆᤥᤃᤧᤶᤔᤧ᤹ᤀᤥ॥ 24 ᤌᤣᤀᤠᤱᤓᤧᤸᤗᤧ ᤜᤠᤱᤛᤧᤶ ᤁᤢᤀᤡᤛᤡᤰ ᤍᤠᤱᤒᤠᤸᤗᤧ ᤐᤡᤏᤡᤱ ᤁᤧᤔᤧᤳᤋᤡᤒᤠ ᤗᤰᤁᤡᤴ ᤂᤥᤛᤢᤶᤒᤧ᤹ ᤁᤧᤗ᤹ᤒᤠᤴ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤍᤠᤱᤒᤠ ᤂᤪᤡᤛ᤻ᤋᤧᤴ ᤛᤧᤘᤠ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥ 25 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤸᤗᤧ ᤁᤧᤛᤠᤰᤐᤠ ᤂᤢᤶᤍᤡᤱ ᤂᤥᤛᤢ᤹ᤖᤥ॥ ᤂᤧᤵᤔᤥᤃ ᤔᤏᤠ ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠᤴ ᤌᤣᤀᤠᤱ ᤔᤧᤒᤥᤱᤏᤧᤸᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.