ᤀᤠᤔᤥᤛ 9 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤠᤛᤧᤴ

¹ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤕᤧᤒᤧᤒᤠ ᤏᤡᤛᤢᤱ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ— “ᤂᤧᤏᤧ᤹ ᤗᤠᤶᤎᤣ᤺ᤵᤐᤢᤱᤜᤠ᤹ ᤔᤢᤴᤗ ᤌᤠᤖᤡᤰ ᤛᤡᤳᤗᤠᤱᤜᤠ᤹ᤖᤧ ᤁᤢᤛᤶᤜᤠ᤹ᤀᤥ ᤜᤡᤵᤋᤧ᤹ᤀᤥ. ᤛᤡᤳᤗᤠᤱ ᤛᤶᤜᤠ᤹ᤖᤧ ᤔᤏᤠ ᤌᤧᤃᤣ᤺ᤰᤜᤠ᤹ ᤋᤧᤳᤋᤢᤖᤖᤥ ᤜᤧᤰᤁᤩᤠᤱ ᤁᤧᤍᤠᤱᤒᤠᤜᤠ᤹ ᤀᤠᤱᤃᤠ᤹ ᤋᤠᤓᤣ᤺ᤸᤗᤧ ᤛᤧᤖᤢᤱᤛᤡᤱᤗᤥ॥ ᤗᤳᤇᤠᤀᤠᤱ ᤂᤧᤳᤇᤡᤱᤔᤠ ᤔᤧᤱᤄᤥᤏᤧᤴᤗᤥ ᤗᤳᤌᤡᤰᤁᤠᤱ ᤂᤧᤳᤇᤡᤱᤔᤠ ᤔᤧᤄᤥᤏᤧᤴᤗᤥ॥

² “ᤂᤧᤱᤜᤠ᤹ᤖᤧ ᤀᤡᤐᤢᤱᤅᤥᤒᤠ ᤗᤢᤶᤒᤠ᤺ᤳᤋᤡᤴ ᤔᤢ ᤔᤧᤍᤕᤢᤀᤠᤱ ᤔᤧᤒᤣ᤺ᤰᤛᤠᤱ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤂᤧᤵᤔᤥᤗᤠᤶ ᤌᤠᤰᤋᤢᤱᤛᤡᤱᤗᤥ॥ ᤂᤧᤱᤜᤠ᤹ ᤛᤠᤱᤃᤪᤠᤶᤐᤣᤍᤠᤱ ᤌᤠ᤺ᤱ ᤔᤧᤎᤥ᤺ᤰᤛᤡᤱ ᤔᤧᤒᤣ᤺ᤰᤛᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤔᤢ ᤌᤠᤛᤢᤱᤛᤡᤱᤗᤥ॥

³ ᤂᤧᤱᤜᤠ᤹ ᤁᤷᤔᤣᤗ ᤁᤥ᤺ᤰᤔᤠᤸᤗᤧ ᤁᤢᤛᤶᤔᤥ ᤔᤧᤈᤡᤱᤛᤡᤱᤛᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤜᤰᤛᤢᤱᤛᤡᤱᤅᤠᤱ ᤕᤢᤖᤢᤱᤛᤡᤱᤗᤥ॥ ᤂᤧᤱᤜᤠ᤹ ᤀᤠᤱᤃᤠ᤹ᤗᤠᤶ ᤘᤖ᤺ᤱᤛᤡᤃᤠᤱ ᤔᤧᤈᤡᤱᤛᤡᤱᤛᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤀᤛᤣ᤺ᤰᤁᤡᤸᤗᤧ ᤀᤃᤢᤛᤡᤖ ᤕᤠ᤺ᤴᤍᤢᤱᤛᤡᤱᤗᤥ॥

⁴ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤛᤠᤱ ᤀᤠᤱᤃᤠ᤹ ᤋᤠᤓᤣᤴ ᤔᤢᤖᤠ ᤔᤧᤳᤋᤢᤱᤅᤠᤱ ᤂᤧᤸᤗᤧ ᤂᤧᤱᤜᤠ᤹ ᤛᤧᤖᤢᤛᤡᤖᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤏᤢᤒᤠ ᤐᤠ᤺ᤴᤗᤧ ᤗᤠᤃᤡ ᤔᤣ᤺ᤴᤗᤥ ᤁᤖ ᤋᤠᤵᤑᤧ᤺ᤶᤒᤧᤸᤗᤧ ᤗᤠᤃᤡ ᤔᤡᤰᤆᤥ ᤐᤥ᤹ᤖᤢᤱᤛᤡᤱᤗᤥ॥”

⁵ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤢᤛᤢᤖᤥ. ᤜᤧᤰᤁᤩᤠᤱ ᤂᤧᤴ ᤕᤥ᤺ᤶᤒᤣ᤺ᤰᤗᤥ॥ ᤂᤧᤒᤩᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤔᤧᤖᤡᤱ ᤔᤧᤎᤰᤗᤥ. ᤜᤧᤰᤁᤩᤠᤱ ᤗᤠᤈᤣᤴ ᤂᤰᤐᤧᤳ ᤗᤧᤱᤎᤠᤱᤗᤥ. ᤂᤧᤒᤩᤠᤱ ᤔᤡᤛᤪᤒᤠ ᤘᤜ᤺ᤱᤅᤡᤴ ᤜᤧᤰᤁᤣ ᤕᤢᤶᤗᤠ᤺ᤳᤗᤥ॥

⁶ ᤂᤢᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤢᤕᤢᤱᤔᤠᤍᤧᤴ ᤆᤥᤃᤢᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤸᤗᤧ ᤁᤢᤒᤢᤱ ᤕᤢᤰᤂᤢᤖᤥ. ᤂᤢᤏᤧ᤹ ᤋᤢᤱᤃᤥᤍᤡᤱ ᤘᤖ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤀᤢ᤺ᤳᤋᤢᤖᤥ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤢᤗᤧ᤺ᤶ ᤂᤧᤴ ᤜᤢᤰᤂᤢᤖᤥ— ᤂᤢᤏᤧ᤹ ᤁᤢᤔᤡᤱᤅᤡᤴ ᤕᤜᤘᤣ ᤍᤠᤱᤒᤠᤖᤥ॥

⁷ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤀᤠᤱᤃᤠ᤹ ᤀᤠᤗᤠᤃᤡᤃ ᤂᤡᤏᤡ᤹ ᤁᤢᤛᤡᤜᤠ᤹ ᤜᤧᤰᤁᤣ ᤁᤧᤗ᤹ᤖᤡᤱᤃ᥅ ᤌᤣ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ. ᤐᤗᤡᤛ᤻ᤋᤡᤜᤠ᤹ ᤁᤵᤋᤥᤖᤗᤠᤶ ᤏᤢ ᤀᤖᤠᤔᤡᤜᤠ᤹ ᤁᤡᤖᤗᤠᤶ ᤀᤠᤱᤃᤠ᤹ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤒᤠ ᤔᤣ᤺ᤴᤏᤠᤱᤒᤡ᥅

⁸ “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤴ ᤗᤠᤕᤥ ᤀᤡᤛᤣ᤺ᤱᤒᤠ ᤜᤠᤱᤈᤢᤶᤔᤥ ᤆᤢᤰᤋᤧᤀᤠᤱ ᤐᤳᤗᤥ॥ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤂᤧᤴ ᤌᤩ᤺ᤱ ᤔᤧᤰᤂᤢᤱᤗᤥ. ᤁᤖᤛᤠᤱ ᤕᤠᤁᤢᤒᤖᤧ ᤁᤢᤜᤡᤶᤛᤕᤱᤜᤠ᤹ ᤀᤠᤱᤃᤠ᤹ ᤘᤖᤧᤱᤗᤧᤱ ᤔᤧᤔᤧᤱᤅᤠᤛᤡᤱᤅᤡᤸᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

⁹ “ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤆᤡ᤹ᤗᤡᤱᤃᤣᤀᤥ ᤁᤢᤈᤠ ᤀᤧᤰᤔᤏᤠᤒᤠ ᤜᤧᤰᤁᤣ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤀᤡᤛᤪᤠᤀᤡᤗᤡᤜᤠ᤹ ᤕᤰᤂᤢᤱᤛᤡᤱᤗᤥ. ᤜᤧᤰᤁᤩᤠᤱ ᤆᤢᤰᤛᤠ ᤗᤢᤱᤈᤣᤰ ᤌᤡᤰᤁᤠᤱ ᤂᤠᤶᤔᤥ ᤔᤰᤔᤧᤎᤠᤏᤧᤴᤗᤥ॥

¹⁰ ‘ᤋᤢᤰᤂᤣ ᤗᤠᤰᤂᤣᤜᤠ᤹ ᤀᤠᤏᤡᤃᤣ ᤛᤶᤎᤠᤱ ᤔᤧᤎᤠᤏᤧᤴᤗᤥ. ᤂᤧᤸᤗᤧ ᤀᤠᤏᤡᤃᤣ ᤕᤠᤱᤔᤠᤀᤠᤱ ᤔᤧᤕᤠᤱᤄᤡᤃᤧᤴᤗᤥ’ ᤁᤧᤗ᤹ᤒᤠ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤀᤥᤒᤠ ᤁᤧᤖᤧᤰ ᤗᤠᤕᤥᤒᤠᤜᤠ᤹ ᤋᤠᤓᤣ᤺ᤸᤗᤧ ᤑᤠ᤺ᤳᤗᤧᤱ ᤔᤧᤈᤩᤧᤵᤋᤢ ᤔᤧᤛᤧᤖᤢᤛᤡᤖᤥ॥

ᤀᤡᤛᤪᤠᤀᤡᤗᤧᤴ ᤕᤠᤶᤔᤥ ᤐᤥᤰ

¹¹ ᤂᤧᤴ ᤕᤧᤴᤏᤥ ᤍᤠᤀᤢᤍᤖᤧ ᤁᤧᤈᤥ᤺ᤶᤒᤠ ᤁᤢᤕᤢᤰᤏᤠᤴ ᤕᤠᤶᤔᤥ ᤑᤥ᤺ᤰᤂᤢᤱᤗᤥ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤒᤵᤐᤠ ᤁᤢᤜᤱᤜᤠ᤹ ᤆᤠ᤺ᤱᤘᤠ ᤔᤧᤳᤋᤢᤱᤗᤥ॥ ᤂᤧᤒᤩᤠᤱ ᤁᤧᤗᤢ᤺ᤶᤒᤠᤀᤠᤱ ᤁᤧᤏᤧᤒᤥᤗᤠᤶ ᤂᤧᤴ ᤀᤠᤱᤃᤠ᤹ ᤑᤥ᤺ᤰᤂᤢᤱᤗᤥ. ᤜᤧᤰᤁᤩᤠᤱ ᤋᤃᤡᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤂᤧᤴ ᤆᤥᤃᤢᤱᤗᤥ.

¹² ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤣᤍᤥᤔᤀᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤏᤢ ᤀᤠᤱᤃᤠ᤹ ᤀᤠᤔᤡᤱᤅᤥ ᤁᤧᤘᤠ᤹ᤒᤠ ᤛᤢᤘᤠᤱᤜᤠ᤹ ᤕᤢᤰᤁᤥ ᤔᤧᤃᤳᤋᤢᤛᤡᤖᤖᤥ.” ᤁᤴ ᤐᤠ᤺ᤴᤜᤠ᤹ ᤀᤰᤂᤣᤀᤣ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

¹³ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤀᤥᤔᤧᤳᤋᤧᤶᤔᤧ᤹. ᤁᤶᤓᤍᤠᤱᤒᤠ ᤕᤧᤴᤜᤠ᤹ ᤋᤠᤖ ᤐᤳᤗᤥ. ᤀᤠᤸᤗ ᤁᤧᤰᤆᤢ ᤁᤧᤎᤥ᤺ᤱᤒᤧᤸᤗᤧ ᤁᤢᤈᤠ ᤁᤧᤛᤢᤶᤒᤧᤴ ᤗᤠᤶᤓᤠᤰᤋᤢᤖᤥ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤁᤧᤀᤣ᤺ᤶᤒᤧᤸᤗᤧ ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤒᤧᤴ ᤗᤠᤶᤒᤠᤰᤋᤢᤖᤥ॥ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤗᤠᤶ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ ᤘᤕᤢᤖᤥ ᤜᤧᤰᤁᤩᤠᤱ ᤁᤧᤖᤧᤰ ᤌᤧᤃᤢ ᤔᤠᤱᤘᤠᤜᤠ᤹ᤗᤠᤶ ᤂᤧᤴ ᤁᤢᤱᤕᤢᤖᤥ॥

¹⁴ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤛᤡᤒᤠ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤀᤠᤱᤃᤠ᤹ ᤕᤠᤱᤏᤠ ᤏᤢ᤺ᤰᤋᤢᤱ ᤑᤧᤳᤋᤢᤱᤛᤡᤱᤗᤥ॥ ᤁᤧᤗᤢ᤺ᤶᤒᤠ ᤁᤧᤒᤣ᤺ᤰᤐᤠ ᤕᤧᤰᤕᤰᤜᤠ᤹ ᤂᤧᤱᤜᤠ᤹ᤖᤧ ᤕᤠᤶᤔᤥ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤘᤠ᤹ ᤔᤧᤕᤢᤱᤗᤥ॥ ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤔᤧᤗᤣ᤺ᤳᤋᤢᤖᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤌᤡ ᤔᤧᤎᤢᤅᤢᤖᤥ॥ ᤂᤧᤱᤜᤠ᤹ᤖᤧ ᤛᤡᤱᤛᤣ᤹ ᤛᤡᤱᤒᤢᤱᤜᤠ᤹ ᤔᤧᤗᤣ᤺ᤳᤋᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤛᤡᤱᤛᤣ᤹ᤜᤠ᤹ ᤔᤧᤈᤖᤥ॥

¹⁵ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ᤀᤥᤀᤣ ᤕᤢᤰᤂᤢᤱᤛᤡᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤡᤖᤢᤱᤛᤡᤱᤒᤠ ᤗᤠᤈᤣ᤹ᤗᤠᤶ ᤂᤧᤱᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤓᤥ᤺ᤰᤂᤢᤱᤛᤡᤅᤡᤸᤗᤥ.” ᤕᤜᤘᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥