ᤀᤠᤔᤥᤛ 8 - LIFOTNT

ᤁᤧᤍᤢᤶᤒᤠ ᤛᤡᤱᤛᤣ᤹ᤖᤧ ᤁᤧᤍᤡᤶᤒᤠ ᤏ᤹ᤀᤡᤔᤠ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤁᤴ ᤀᤥ᤺ᤴᤎᤠᤰᤋᤠᤱᤗᤥ—ᤀᤠᤱᤃᤠ᤹ ᤁᤧᤍᤢᤶᤒᤠ ᤛᤡᤱᤛᤣᤸᤗᤧ ᤁᤢᤗᤧ᤺ᤶ ᤁᤧᤍᤡᤶᤒᤠ ᤏ᤹ᤀᤡᤔᤠ ᤌᤡᤰ ᤏᤡᤛᤢᤱ॥

² ᤂᤢᤏᤧ᤹ ᤀᤠᤱᤃᤠ᤹ ᤛᤣ᤺ᤴᤍᤥᤛᤠᤱ. “ᤀᤠᤔᤥᤛᤣ. ᤂᤧᤏᤧ᤹ ᤌᤣ᤺ᤴ ᤁᤧᤏᤡᤛᤢᤒᤣ᥅” ᤀᤠᤱᤃᤠ᤹ ᤂᤢᤏᤧ᤹ ᤏᤢᤃᤵ ᤐᤡᤖᤢᤱ. “ᤁᤧᤍᤢᤶᤒᤠ ᤛᤡᤱᤛᤣᤸᤗᤧ ᤁᤧᤍᤡᤶᤒᤠ ᤏ᤹ᤀᤡᤔᤠ ᤌᤡᤰ ᤏᤡᤛᤢᤱ᤹॥” ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤏᤢᤵᤔᤧᤴ ᤁᤧᤖᤧᤀᤠᤱ ᤘᤠ᤹ᤖᤥ॥ ᤀᤠᤸᤗ ᤀᤠᤱᤃᤠ᤹ ᤂᤧᤱᤜᤠ᤹ ᤕᤠᤶᤔᤥ ᤔᤧᤗᤧᤳᤋᤠᤛᤡᤱᤅᤡᤴ᤹॥”

³ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹. “ᤂᤧᤴ ᤕᤧᤴᤏᤥ ᤔᤠᤱᤜᤡᤶᤔᤥᤒᤠ ᤛᤠᤶᤗᤥᤔᤠᤜᤠ᤹ ᤜᤠ᤺ᤵᤔᤠ ᤆᤡᤱᤔᤠᤀᤥ ᤗᤧᤱ᤹॥ ᤕᤖᤡᤰ ᤕᤖᤡᤰ ᤆᤣᤜᤠ᤹ ᤁᤧᤖᤧᤰ ᤐᤡᤛᤠᤱ ᤛᤫᤠ᤺ᤳᤋᤠᤱ ᤗᤠᤵᤔᤧᤍᤣᤛᤢ ᤔᤧᤏᤧᤛ᤻ᤛᤢᤛᤡᤖᤥ॥”

⁴ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤗᤠᤱᤅᤡᤸᤗᤧ ᤁᤧᤍᤥ᤹ᤒᤠ ᤏᤢ ᤗᤠᤈᤣ᤹ᤀᤥᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤔᤧᤱᤒᤠᤛᤣ. ᤁᤴ ᤂᤧᤵᤛᤧᤶᤔᤧ᤹ᤀᤥ.

⁵ ᤂᤡᤏᤡ᤹ᤃ ᤀᤰᤂᤣ ᤁᤧᤒᤠ᤺ᤵᤋᤢᤶᤗᤥ. “ᤗᤠᤍᤢᤵᤐᤡᤴ ᤀᤠᤵᤑᤠᤸᤗᤧ ᤔᤠ᤺ᤵᤐᤠᤒᤣ᥅ ᤂᤧᤒᤩᤠᤱ ᤀᤠᤏᤡ᤹ ᤆᤠ᤺ᤴ ᤛᤱᤔᤠ ᤀᤠᤛᤢᤰᤋᤢᤶᤒᤠᤒᤣ. ᤀᤠᤓᤧᤸᤗᤧ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤐᤣ᤺ᤰᤐᤠᤒᤣ᥅ ᤂᤧᤒᤩᤠᤱ ᤔᤠᤛᤡᤴ ᤀᤠᤏᤡ᤹ ᤛᤱᤔᤠ ᤀᤠᤛᤢᤰᤋᤢᤶᤒᤠᤒᤣ᥅ ᤀᤠᤓᤧᤸᤗᤧ ᤁᤢᤛᤡ᤺ᤰᤔᤠ ᤏᤢ ᤁᤢᤍᤱᤔᤧᤴ ᤆᤢᤰᤐᤠ ᤆᤥ᤺ᤰᤔᤠᤀᤠᤱ ᤔᤧᤱᤃᤧᤵᤔᤏᤠᤒᤠ ᤁᤢᤎᤠᤱᤔᤠᤴ ᤕᤠᤱᤔᤠᤀᤠᤱ ᤀᤡᤱᤗᤧᤰᤔᤠᤛᤡᤒᤣ॥

⁶ ᤂᤧᤒᤩᤠᤱ ᤕᤠᤱᤃᤧᤛᤠ᤹ᤒᤧᤴ ᤕᤠᤱᤅᤥ ᤏᤢ ᤌᤣᤀᤠᤱ ᤔᤧᤱᤃᤵᤔᤏᤠᤒᤧᤴ ᤁᤢᤃᤠᤵ ᤌᤡᤰ ᤗᤠᤱᤛᤢ᤺ᤵᤐᤥ ᤀᤠᤓᤧᤸᤗᤧ ᤀᤡᤱᤔᤠ ᤀᤠᤛᤢᤰᤋᤢᤶᤛᤡᤶᤒᤣ. ᤂᤧᤒᤩᤠᤱ ᤁᤢᤛᤡᤵ ᤁᤢᤗᤠᤱᤏᤢ ᤛᤥᤖᤡᤰ ᤔᤠᤛᤡᤴ ᤀᤠᤓᤧᤸᤗᤧ ᤛᤱᤔᤠ ᤀᤠᤄᤥᤛᤢᤶᤒᤣ॥”

⁷ ᤕᤠᤁᤢᤒᤖᤧ ᤁᤢᤜᤧᤴᤇᤡᤱᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤔᤠᤱᤜᤧᤰᤛᤡᤱᤅᤠᤱ ᤘᤠ᤹ᤖᤥ— “ᤂᤧᤱᤜᤠ᤹ᤖᤧ ᤔᤧᤈᤥᤃᤢᤀᤠᤱ ᤘᤠ᤹ᤒᤠ ᤀᤠᤳᤋᤡᤴ ᤕᤠ᤺ᤶᤒᤰᤁᤡᤴᤏᤠᤱ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤱᤅᤡᤴᤗᤥ॥

⁸ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤧᤕᤱᤏᤧᤴᤏᤠᤱᤒᤡ᥅ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤔᤧᤖᤡᤱ ᤔᤧᤴᤎᤰᤏᤧᤴᤏᤠᤱᤒᤡ᥅ ᤁᤧᤖᤧᤰ ᤗᤠᤈᤣᤴ ᤏᤡᤗ ᤘᤜ᤺ᤱᤅᤡᤴ ᤁᤢᤀᤡᤛᤡᤰ ᤐᤥᤎᤠᤱᤗᤥ. ᤔᤡᤛᤪᤒᤠ ᤘᤜ᤺ᤱᤅᤡᤴ ᤗᤧᤱᤎᤠᤱᤅᤠᤱ ᤑᤡᤗᤠ᤺ᤵᤐᤠ ᤜᤧᤰᤁᤣ ᤕᤢᤶᤒᤣ᤺ᤰᤗᤥ॥”

⁹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤗᤧᤴᤍᤡᤰ ᤔᤛᤣᤖᤠ ᤏᤠᤶᤎᤠᤖ ᤕᤠ᤺ᤴᤍᤢᤗᤥ. ᤜᤧᤰᤁᤩᤠᤱ ᤂᤠᤀᤥ᤺ᤳᤗᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤠᤎᤠᤵᤋᤢᤖ ᤆᤥᤃᤢᤱᤗᤥ॥

¹⁰ ᤀᤠᤱᤃᤠ᤹ ᤂᤡᤏᤡ᤹ ᤛᤠᤶᤕᤥᤒᤠ ᤋᤱᤏᤠᤶᤜᤠ᤹ ᤔᤧᤖᤡᤱ ᤌᤰᤔᤥ ᤜᤧᤰᤁᤩᤠᤱ ᤁᤧᤖᤧᤰ ᤛᤠᤶᤗᤥᤜᤠ᤹ ᤜᤠ᤺ᤵᤔᤠ ᤆᤡᤱᤔᤥ ᤗᤧᤰᤂᤢᤱ ᤐᤡᤏᤡᤱᤗᤥ॥ ᤀᤠᤱᤃᤠ᤹ ᤂᤡᤏᤡ᤹ ᤁᤧᤖᤧᤰ ᤛᤃᤡᤋᤣᤳ ᤁᤧᤈᤠᤰᤂᤢᤶᤗ ᤆᤥ᤺ᤰᤏᤡᤱᤗᤥ ᤜᤧᤰᤁᤩᤠᤱ ᤂᤡᤏᤡ᤹ ᤌᤧᤃᤣ᤺ᤰᤀᤡ᤺ᤴ ᤁᤧᤏ᤺ᤰᤂᤢᤶᤗ ᤕᤠ᤺ᤴᤏᤡᤱᤗᤥ॥ ᤗᤳᤇᤠᤖᤰ ᤕᤧᤶᤒᤡᤳᤇᤠᤛᤠ᤺ᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤌᤰᤔᤏᤠᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤴ ᤕᤧᤶᤔᤡᤴ ᤐᤥᤱᤗ ᤆᤥᤃᤢᤱᤗᤥ ᤂᤧᤒᤩᤠᤱ ᤂᤧᤸᤗᤧ ᤁᤢᤏᤢᤵᤔᤠ ᤕᤧᤴᤏᤡᤴ ᤛᤠ᤹ᤖᤡᤰ ᤁᤢᤈᤠ ᤁᤧᤓᤧᤶᤒᤠ ᤐᤥᤱᤗᤥ॥”

¹¹ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤠᤸᤗ ᤀᤰᤋᤱᤒᤠ ᤕᤧᤴᤜᤠ᤹ ᤋᤠᤖ ᤐᤳᤗᤥ. ᤀᤠᤱᤃᤠ᤹ ᤗᤠᤈᤣ᤹ᤀᤥ ᤛᤠᤰᤘᤠᤴ ᤑᤥ᤺ᤰᤂᤢᤱᤗᤥ— ᤂᤧᤱᤃ ᤐᤥᤃᤢᤃᤧᤴ ᤁᤢᤈᤠ ᤛᤠᤰᤘᤠᤴ ᤔᤣ᤺ᤴᤗᤥ. ᤘᤠᤔᤡ᤺ᤰᤔᤠ ᤆᤫᤠ᤺ᤳᤋᤡᤸᤗᤧᤴ ᤛᤠᤰᤘᤠ᤺ᤴᤏᤠᤱ ᤔᤣ᤺ᤴᤗᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤂᤧᤶᤔᤠ ᤛᤠᤰ ᤐᤥ᤺ᤰᤗᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤥ᤺ᤵᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤗᤳᤇᤠ ᤘᤖ᤺ᤱᤅᤥᤗᤠᤶ ᤏᤠᤛᤔᤠ ᤘᤖ᤺ᤱᤅᤥ ᤌᤠᤖᤡᤰ. ᤂᤶᤓᤩᤠᤱ ᤌᤠᤱᤃᤧᤳᤗᤠᤶ ᤏᤠᤱᤃᤧᤴ ᤌᤠᤖᤡᤰ ᤏᤠ ᤏᤢ ᤁᤳᤏᤠ ᤆᤥᤏᤠ᤺ᤶ ᤆᤥᤏᤠ᤺ᤶ ᤔᤧᤗ᤹ᤖ ᤗᤠᤱᤔᤧᤄᤣ᤺ᤰᤗᤥ. ᤁᤖ ᤂᤧᤱᤜᤠ᤹ᤖᤧ ᤁᤴ ᤔᤧᤱᤄᤥᤛᤢᤴᤗᤥ॥

¹³ ᤂᤧᤸᤗᤧ ᤕᤠ᤺ᤴᤍᤡᤰ. ᤏᤢᤔᤠ ᤔᤧᤴᤇ᤻ᤕᤠᤜᤠ᤹ ᤏᤢ ᤁᤧᤎᤢᤶᤒᤠ ᤌᤠᤱᤒᤧᤴᤜᤠ᤹ ᤘᤠᤔᤡ᤺ᤰᤔᤠᤸᤗᤧ ᤋᤖᤢᤛᤡᤀᤠᤱ ᤂᤢᤴᤇᤡ᤹ ᤌᤏᤠ ᤗᤧᤱᤗᤥ॥

¹⁴ ᤛᤠᤔᤖᤡᤕᤠ᤺ᤸᤗᤧ ᤁᤢᤏᤠᤎᤠᤔᤥ ᤔᤠᤱᤃᤧᤜᤧᤰᤛᤡᤱᤒᤠᤜᤠ᤹. ‘ᤍᤠᤏᤀᤣ. ᤁᤧᤔᤠᤱᤅᤡᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤜᤧᤰᤁᤣ’ ᤁᤡᤃᤪ ‘ᤒᤣᤷᤛᤣᤒᤠᤒᤠ ᤔᤠᤱᤅᤡᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤜᤧᤰᤁᤣ’ ᤁᤧᤒᤠ᤺ᤵᤐᤠ ᤂᤧᤱᤜᤠ᤹ ᤁᤧᤖᤧᤰ ᤔᤧᤈᤥᤴᤗᤥ. ᤜᤧᤰᤁᤩᤠᤱ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥ᤺ᤰᤏᤧᤴᤗᤥ॥”