ᤀᤠᤔᤥᤛ 7 - LIFOTNT

ᤏᤡ᤺ᤱᤄᤢᤰᤘᤠ ᤏᤡᤔᤧᤎᤠᤒᤧᤒᤠ ᤛᤢᤑᤥ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤁᤴ ᤀᤥ᤺ᤴᤎᤠᤰᤋᤠᤱᤗᤥ—ᤜᤠᤱᤅᤡᤸᤗᤧ ᤁᤢᤗᤰᤁᤥᤒᤠ ᤆᤠᤜᤠ᤹ ᤛᤢᤶᤔᤠ ᤆᤢᤖᤧ ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤏᤡᤛᤡᤃᤣᤰᤐᤠ ᤆᤠ᤺ᤸᤗᤧ ᤁᤢᤏ᤺ᤰ ᤌᤠᤱᤔᤠ ᤜᤣ᤺ᤰᤋᤧᤖ ᤐᤳᤇᤧᤸᤗᤧ ᤍᤠᤱᤒᤧᤸᤗᤧ ᤏᤡ᤺ᤱᤄᤢᤰᤘᤠ ᤁᤢᤒᤴᤈᤩᤠᤱᤔᤠ ᤌᤡᤰ ᤕᤠᤖᤡᤵ ᤆᤥᤃᤢᤛᤡᤖ ᤕᤠᤃᤧ॥

² ᤀᤠᤸᤗ ᤂᤧᤴ ᤏᤡ᤺ᤱᤂᤢ᤺ᤰᤘᤠᤜᤠ᤹ᤖᤧ ᤗᤠᤈᤣ᤹ᤀᤥᤒᤠ ᤀᤡᤰᤋᤠᤵ ᤆᤠᤜᤠ᤹ ᤔᤧᤈ ᤔᤧᤍᤣᤛᤢᤸᤗᤧ. ᤀᤠᤱᤃᤠ᤹ ᤂᤢᤏᤧ᤹ ᤔᤧᤳᤋᤢᤱ. “ᤕᤜᤘᤣ ᤍᤠᤱᤒᤠᤀᤣ. ᤗᤧᤵᤔᤡ ᤐᤡᤖᤧᤛᤧ᤹ᤀᤥ᥄ ᤕᤠᤁᤢᤒᤧᤴ ᤀᤠᤰᤂᤣᤗ᤹ᤖᤡᤰ ᤜᤡᤱᤔᤠ ᤛᤢᤰᤐᤣ᥅ ᤂᤧᤴ ᤛᤠ᤹ᤖᤡᤰ ᤆᤢᤰᤛᤠ ᤆᤥᤰᤗᤥ᥄”

³ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤏᤢ᤺ᤰᤋᤢ॥ ᤕᤜᤘᤣ ᤍᤠᤱᤒᤧᤸᤗᤧ “ᤀᤰᤂᤣ ᤔᤧᤒᤥᤱᤏᤧᤴᤏᤠ.” ᤐᤠ᤺ᤳᤋᤢᤖᤥ॥

ᤁᤧᤍᤡ᤺ᤵᤐᤠ ᤔᤡ ᤛᤢᤑᤥ

⁴ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤁᤴ ᤀᤥ᤺ᤴᤎᤠᤰᤋᤠᤱᤗᤥ—ᤕᤜᤘᤣ ᤍᤠᤱᤒᤧᤸᤗᤧ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤗᤠᤶ ᤂᤠᤛᤧᤴ ᤆᤥ᤺ᤰᤔᤠ ᤐᤠᤱᤄᤢᤛᤡ॥ ᤂᤧᤴ ᤔᤡ᤺ᤸᤗᤧ ᤐᤠᤰᤐᤧᤵᤐᤠ ᤋᤢᤱᤃᤥᤍᤡᤱ ᤘᤖ᤺ᤱᤅᤡᤴ ᤆᤍᤣᤛᤢᤀᤠᤱ ᤂᤠᤶᤒᤣ᤺ᤰᤁᤧᤴᤏᤠᤱ ᤆᤍᤣᤛᤢᤀᤠᤱ ᤏᤧᤛ᤻ᤛᤧ॥

⁵ ᤂᤶᤓᤩᤠᤱ ᤀᤠᤱᤃᤠ᤹ ᤑᤡ᤺ᤰᤋᤠᤱᤅᤠᤱ ᤔᤧᤳᤋᤢᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤐᤣᤗᤡ ᤑᤠᤰᤏᤧ. ᤛᤵᤑᤠᤖᤥ᥄ ᤕᤠᤁᤢᤒᤧᤴ ᤀᤠᤰᤂᤣᤗ᤹ᤖᤡᤰ ᤕᤧᤵᤔᤠ ᤛᤢᤰᤐᤣ᥅ ᤂᤧᤴ ᤛᤠ᤹ᤖᤡᤰ ᤆᤢᤰᤛᤠ ᤆᤥᤰᤗᤥ᥄”

⁶ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤏᤢ᤺ᤰᤋᤢ॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ “ᤀᤰᤂᤣ ᤔᤧᤒᤥᤱᤏᤧᤴᤏᤠ.” ᤐᤠ᤺ᤳᤋᤢᤖᤥ॥

ᤁᤢᤛᤡ᤺ᤰᤔᤠ ᤛᤢᤑᤥ

⁷ ᤂᤢᤏᤧ᤹ ᤜᤠᤒᤠ ᤁᤴ ᤀᤠᤱᤃᤠ᤹ ᤀᤥ᤺ᤴᤎᤠᤰᤋᤠᤱᤗᤥ—ᤂᤧᤵᤔᤥ ᤁᤢᤛᤡ᤺ᤰᤔᤠ ᤂᤡᤍᤥᤖᤠ᤺ᤸᤗᤧ ᤛᤡ᤺ᤰᤔᤏᤠᤀᤠᤱ ᤛᤧᤵᤔᤏᤠᤒᤠ ᤗᤢᤱᤎᤠᤰ ᤕᤧᤒᤧ॥ ᤍᤠᤱᤒᤧᤴ ᤁᤢᤜᤢᤰᤁᤥ ᤁᤢᤛᤡ᤺ᤰᤔᤠ ᤂᤡᤍᤥᤖᤠ᤺ᤴ ᤕᤠᤱᤛᤡᤱᤅᤠᤱ ᤗᤢᤱᤎᤠᤰᤁᤡᤸᤗᤧ ᤁᤢᤒᤣᤛᤠᤱ ᤕᤧᤶᤛᤡᤱᤅᤠᤱ ᤕᤧᤒᤧᤃᤖᤧ॥

⁸ ᤜᤧᤰᤁᤩᤠᤱ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤀᤠᤔᤥᤛᤣ. ᤂᤧᤏᤧ᤹ ᤌᤣ᤺ᤴ ᤁᤧᤏᤡᤛᤢᤖ ᤁᤧᤒᤵᤐᤣ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤗᤳᤇᤠ ᤁᤢᤛᤡ᤺ᤰᤔᤠ ᤂᤡᤍᤥᤖᤠ॥” ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤳᤇᤠ ᤁᤢᤛᤡ᤺ᤰᤔᤠ ᤂᤡᤍᤥᤖᤠ ᤑᤳᤇᤢᤱᤗ ᤐᤳᤋᤠ॥ ᤀᤠᤸᤗ ᤀᤠᤱᤃᤠ᤹ ᤂᤧᤱᤜᤠ᤹ ᤕᤠᤶᤔᤥ ᤔᤧᤍᤠᤱᤄᤢᤱᤛᤡᤱᤅᤡᤴ॥

⁹ ᤀᤡᤛᤜᤠᤁᤖᤧ ᤁᤢᤈᤴᤈᤶᤒᤠᤍᤧᤴᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤛᤣᤛᤣᤍᤧᤴᤜᤠ᤹ ᤑᤢᤳᤗᤢᤶ ᤌᤩ᤺ᤱ ᤐᤥᤱ᤹॥ ᤀᤠᤱᤃᤠ᤹ ᤋᤠᤓᤣᤴ ᤕᤠᤱᤅᤠᤛᤡᤱᤅᤠᤀᤠᤱ ᤕᤠᤖᤥᤒᤠᤔᤖᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤁᤠᤖᤥ॥”

ᤀᤠᤔᤥᤛ ᤏᤢ ᤀᤔᤛᤩᤠᤜ

¹⁰ ᤂᤧᤒᤩᤠᤱ ᤒᤣᤌᤣᤗᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤔᤛᤩᤠᤜᤖᤧ ᤀᤡᤱᤛᤠᤒᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤠᤖᤥᤒᤠᤔᤖᤧᤀᤥ ᤐᤠᤱᤄᤢᤍᤣᤛᤢ. “ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤔᤥᤛᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤗᤳᤇᤠ ᤆᤧᤶᤓᤴ ᤆᤥᤃᤢᤖ ᤕᤠᤰ॥ ᤁᤴ ᤗᤠᤈᤣ᤺ᤸᤗᤧ ᤂᤧᤸᤗᤧ ᤁᤧᤖᤧᤰ ᤁᤢᤒᤠ᤺ᤴᤜᤠ᤹ ᤌᤶᤔᤠ ᤔᤧᤛᤢᤰᤋᤢᤴ॥

¹¹ ᤌᤣᤀᤠᤱᤓᤧᤸᤗᤧ ᤀᤠᤔᤥᤛᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤘᤠ᤹. ‘ᤕᤠᤖᤥᤒᤠᤔᤧᤴ ᤋᤠᤓᤣ᤺ᤸᤗᤧ ᤔᤧᤛᤧᤖᤢ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤛᤧᤰᤂᤠᤀᤣ ᤁᤢᤗᤠᤈᤣ᤹ᤗᤠᤶ ᤔᤠ᤺ᤱᤄᤠ ᤔᤧᤗ᤺ᤳᤋᤢ ᤔᤧᤍᤧᤶᤛᤢ᤹॥’”

¹² ᤂᤧᤒᤩᤠᤱ ᤀᤔᤛᤩᤠᤜ᤺ᤸᤗᤧ ᤀᤠᤔᤥᤛᤧᤴ ᤔᤧᤳᤋᤢ. “ᤔᤡᤰ ᤁᤧᤏᤡᤒᤣ. ᤁᤵᤔᤥᤗᤠᤶ ᤂᤧᤳᤇᤡᤱᤅᤧ᤹ᤀᤠᤱ ᤕᤜᤢᤍᤠᤀᤥ ᤐᤣᤃᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤂᤖᤧ᤺ᤱ ᤆᤩᤧ᤹ᤀᤠᤱ ᤁᤧᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤂᤧ᤹ᤕᤥ ᤐᤠ᤺ᤳᤋᤧ᤹॥

¹³ ᤒᤣᤌᤣᤗᤀᤥ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤶᤒᤠ᤺ᤳᤋᤣ. ᤌᤣᤀᤠᤱᤓᤧᤸᤗᤧ ᤁᤱᤃ ᤜᤠᤱᤅᤡᤸᤗᤧ ᤁᤢᤛᤣᤛᤣᤍᤧᤴ ᤏᤢ ᤜᤠᤱᤈᤢᤶᤔᤥᤒᤠ ᤔᤠᤱᤜᤡᤶᤗᤥ॥”

¹⁴ ᤀᤠᤔᤥᤛᤧᤸᤗᤧ ᤀᤔᤛᤩᤠᤜᤴ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤥ᤺ᤵᤋᤠᤱ. ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤛ᤻ᤛᤠᤀᤠᤱ ᤔᤣ᤺ᤴᤀᤠ॥ ᤁᤖ ᤀᤠᤱᤃᤠ᤹ᤃ ᤔᤧᤸᤗᤢᤰᤁᤶᤒᤠ ᤏᤢ ᤐ᤺ᤳᤇᤣᤸᤗᤧ ᤁᤢᤒᤢᤱᤜᤠ᤹ ᤀᤥᤃᤧᤔᤧᤵᤐᤠ ᤁᤧᤛᤠ᤺ᤰᤐᤠ ᤔᤏᤠ ᤘᤕᤠᤱ॥

¹⁵ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤸᤗᤢᤰ ᤔᤧ᤺ᤴᤍᤠ ᤆᤠᤖᤠᤶᤔᤠᤗᤠᤶ ᤀᤢ᤺ᤳᤋᤠᤱᤅᤠᤱ ᤔᤧᤳᤋᤠᤱ. ‘ᤐᤣᤃᤧ᤹ᤀᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤳᤋᤧᤛᤧ᤹॥’

¹⁶ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧ᤹— “ᤂᤧᤏᤧ᤹ ᤁᤧᤗ᤹. ‘ᤀᤡᤛᤪᤠᤀᤡᤗᤖᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠᤖᤧᤴᤏᤧ᤹. ᤀᤡᤛᤜᤠᤁᤖᤧ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤱᤛᤧᤔᤠ ᤏᤠ᤹ᤖᤧ᤹॥’

¹⁷ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ‘ᤂᤧᤏᤧ᤹ ᤁᤧᤔᤣ᤺ᤳᤋᤧᤴ ᤕᤧᤰᤕᤰᤁᤥ ᤗᤳᤇᤠ ᤁᤧᤳᤏᤡᤔᤠ ᤐᤥᤱᤗᤥ. ᤜᤧᤰᤁᤩᤠᤱ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢᤛᤡᤖᤥ. ᤂᤧᤏᤧ᤹ ᤁᤧᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤔᤧᤛᤡ᤺ᤰᤋᤢᤀᤠᤱ ᤔᤧᤓ᤺ᤰᤂᤢᤖᤥ॥ ᤂᤧᤏᤧ᤹ᤃ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤁᤧᤛᤡᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤱᤃ ᤛᤧᤰᤂᤠᤛᤠᤱ ᤀᤠᤵᤑᤣᤰ ᤁᤢᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤀᤠᤱ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤖᤥ॥’”