ᤀᤠᤔᤥᤛ 6 - LIFOTNT

ᤀᤡᤛᤪᤠᤀᤡᤗᤖᤧ ᤁᤢᤔᤧᤰᤔᤠ

¹ ᤁᤧᤈᤡ᤺ᤳᤋᤡ ᤁᤧᤛᤩᤧᤀᤡᤖᤥ. ᤛᤡᤕᤥᤏᤀᤥ ᤜᤠᤱᤜᤠᤱ ᤗ᤹ᤖᤡᤰ ᤁᤧᤕᤢᤱᤒᤠᤛᤣ. ᤜᤧᤰᤁᤩᤠᤱ ᤛᤠᤔᤖᤡᤕᤠᤒᤠ ᤁᤥ᤺ᤰᤔᤠᤀᤥ ᤁᤶᤒᤪᤠᤱ ᤁᤧᤗᤣ᤺ᤳᤇᤡᤱᤒᤠᤛᤣ॥ ᤂᤡᤏᤡ᤹ ᤁᤴ ᤐᤕᤶ ᤕᤶᤒᤠ ᤛᤢᤘᤠᤱᤒᤠ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤗᤠᤶᤗᤥᤒᤠᤜᤠ᤹. ᤂᤡᤏᤡ᤹ᤀᤥ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤁᤢᤓᤠ᤹ ᤏᤠ᤺ᤰᤛᤧ ᤔᤧᤍᤠᤖᤥ᥄

² ᤁᤸᤏᤣᤜ ᤕᤧᤰᤕᤰᤁᤥ ᤐᤣᤃᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹ᤀᤥ. ᤂᤧᤵᤔᤥᤗᤠᤶ ᤐᤕᤶ ᤕᤶᤒᤠ ᤜᤔᤠᤋ ᤕᤧᤰᤕᤰᤁᤥ ᤐᤣᤃᤧᤶᤔᤧ᤹ᤀᤥ॥ ᤂᤧᤴ ᤀᤣᤃᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰ ᤕᤥ ᤃᤠᤋᤀᤥ ᤐᤣᤃᤧᤶᤔᤧ᤹ᤀᤥ. ᤌᤣ ᤂᤧᤱᤜᤠ᤹ ᤕᤜᤢᤍᤠ ᤜᤧᤰᤁᤩᤠᤱ ᤀᤡᤛᤪᤠᤀᤡᤗ ᤜᤠᤱᤈᤢᤶᤜᤠ᤹ᤏᤢ᤺ᤸᤗᤧ ᤏᤢᤒᤠ ᤆᤥ᤺ᤰᤐᤡ᥅ ᤌᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤂᤡᤏᤡ᤹ᤀᤡᤴᤏᤢ᤺ᤸᤗᤧ ᤕᤶᤒᤠ ᤆᤥ᤺ᤰᤐᤡ᥅

³ ᤋᤢᤰᤂᤣᤗᤠᤰᤂᤣᤒᤠ ᤕᤧᤴᤏᤡᤴ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤁᤧᤏᤠ᤺ᤳᤋᤢᤶᤗᤥ. ᤁᤖ ᤛᤧᤰᤂᤠ᤺ᤸᤗᤧ ᤁᤢ᤹ᤀᤡᤃᤧᤓᤧᤶᤒᤠ ᤕᤢᤰᤁᤡᤴ ᤏᤡ᤺ᤳᤋᤠᤱ ᤁᤧᤍᤠᤖᤢᤶᤗᤥ॥

⁴ ᤋᤰᤔᤡᤒᤠ ᤁᤣ᤺ᤱᤅᤡᤸᤗᤧ ᤛᤢ᤺ᤵᤔᤏᤠᤒᤠ ᤏᤧᤳᤏᤠᤀᤥ ᤁᤧᤏᤧᤛ᤻ᤛᤡᤖᤥ. ᤜᤧᤰᤁᤩᤠᤱ ᤆᤡᤵᤔ᤺ᤵᤔ᤺ᤵᤐᤠ ᤕᤢᤰᤏᤠᤍᤧᤴᤏᤥ ᤛᤸᤗᤡᤰ ᤁᤧᤛᤴᤏᤠᤛᤡᤖᤥ. ᤂᤧᤒᤩᤠᤱ ᤘᤖᤢᤵᤗᤢᤵᤐᤠ ᤔᤧᤸᤗᤢᤰᤜᤠ᤹ ᤏᤢ ᤁᤧᤔᤧ᤹ᤒᤠ ᤐᤡᤳᤛᤠᤳᤜᤠ᤹ ᤁᤧᤈᤠᤶᤛᤡᤶᤗᤥ॥

⁵ ᤋᤢ᤺ᤱᤃᤣ ᤀᤡᤰᤗᤠᤜᤠ᤹ᤀᤥ ᤂᤡᤏᤡ᤹ ᤌᤣᤏᤠᤎᤣᤒᤠ ᤛᤠᤶᤗᤥᤜᤠ᤹ ᤛᤠᤶᤃᤧᤔᤧᤳᤋᤢᤶᤗᤥ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤁᤢᤀᤡᤛᤡᤰ ᤀᤠᤸᤗᤥᤄᤥᤖᤥ ᤀᤡᤰᤗᤠ ᤁᤧᤗ᤺ᤳᤋᤢᤶᤗᤥ॥

⁶ ᤕᤶᤒᤠ ᤆᤸᤗᤠᤱᤏᤠ ᤂᤥᤷᤕᤠ ᤁᤢᤗᤧ᤺ᤶ ᤆᤧᤸᤗᤧᤰᤛᤣ᤹ ᤌᤡ ᤁᤧᤎᤢᤅᤢᤶᤗᤥ. ᤜᤧᤰᤁᤩᤠᤱ ᤀᤡᤔᤧᤸᤗᤢᤱᤒᤠ ᤁᤢᤏᤠᤶ ᤁᤧᤏᤢ᤹ᤒᤠ ᤑᤢᤱᤏᤠᤶᤔᤡᤴ ᤁᤧᤜᤢ᤺ᤳᤋᤠᤛᤡᤖᤥ. ᤁᤖ ᤕᤥᤛᤣᤑᤖᤧ ᤁᤢᤔᤧᤰᤔᤠᤀᤥ ᤂᤡᤏᤡ᤹ ᤏᤡᤏᤡ ᤂᤧᤶᤄᤧᤶ ᤁᤧᤴᤗᤠᤵᤋᤢᤶᤔᤡᤴᤗᤥ॥

⁷ ᤂᤧᤸᤗᤧᤆᤥᤃᤢᤸᤗᤧ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢᤛᤡᤒᤠᤜᤠ᤹ᤀᤥ ᤋᤃᤡ ᤁᤧᤒᤥᤰᤂᤡᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠ ᤛᤠᤓ᤺ᤱᤈᤠᤴ ᤏᤢ ᤂᤡᤱᤛᤡᤱᤔᤠᤀᤠᤱ ᤏᤧᤔᤠᤃᤶᤔᤧᤴ ᤏᤢᤵᤗᤥ॥

⁸ ᤕᤜᤘᤣ ᤍᤠᤱᤒᤠᤴ ᤀᤠᤒᤠᤅᤣ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱᤅᤠᤱ ᤘᤠ᤹. ᤕᤜᤘᤣ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢᤘᤠ ᤆᤥᤃᤢᤖᤥ— “ᤀᤠᤱᤃᤠ᤹ ᤕᤠᤁᤢᤒᤖᤧ ᤁᤢᤀᤠᤱᤍᤡᤱ ᤗ᤹ᤔᤠᤴ ᤀᤠᤛᤡᤰᤗᤧ᤺ᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤰᤜᤠ᤹ ᤐᤈᤡ᤺ᤳ ᤆᤡ᤺ᤳᤋᤢᤱᤗᤥ॥ ᤀᤠᤱᤃᤠ᤹ ᤁᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤏᤢ ᤛᤥᤛᤥᤖᤡᤰ ᤁᤴ ᤕᤧᤰᤕᤰᤁᤡᤴ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤱᤗᤥ॥”

⁹ ᤗᤳᤇᤠ ᤜᤡᤶᤔᤥ ᤌᤡᤒᤥᤱ ᤔᤏᤠᤜᤠ᤹ ᤔᤧᤜᤡᤅᤧᤀᤠᤱ ᤔᤧᤘᤠ᤹ᤏᤧᤓᤃᤪ. ᤂᤧᤱᤜᤠ᤹ᤀᤠᤱ ᤔᤧᤛᤡᤖᤥ॥

¹⁰ ᤜᤧᤰᤁᤩᤠᤱ ᤆᤣᤜᤠ᤹ ᤗᤢᤵᤔᤠᤛᤡ ᤑᤠ᤹ᤀᤠᤱ ᤁᤢᤓᤠᤖᤧ ᤂᤢᤴᤇᤡ᤹ ᤁᤠ᤹ᤀᤡᤜᤠ᤹ ᤔᤧᤍᤠᤀᤠᤱ ᤜᤡᤶᤔᤥᤗᤠᤶ ᤆᤣᤜᤠ᤹ ᤗ᤺ᤵᤔᤠᤛᤡᤖᤧ ᤗᤠᤃᤡ ᤂᤧᤵᤔᤥ ᤁᤧᤈᤡᤱᤛᤡᤱᤒᤠᤀᤠᤱ ᤁᤧᤕᤢᤱᤒᤧᤴ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤢ. “ᤀᤠᤸᤗᤛᤠᤱ ᤂᤧᤏᤧ᤹ᤏᤢ ᤁᤢᤓᤠ ᤘᤣ᤹ ᤔᤧᤘᤠ᤹ᤒᤡ᥅” ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤃᤵ ᤐᤡᤖᤢᤛᤡ᤹. “ᤔᤧᤜᤥᤵᤗᤥ॥” ᤂᤧᤒᤩᤠᤱ ᤂᤧᤸᤗᤧ ᤔᤧᤳᤋᤢᤛᤡ᤹. “ᤛᤫᤠ᤺ᤳ ᤔᤧᤒᤠᤖᤧᤶᤔᤡᤴᤏᤧ᤹᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤀᤠᤏᤡ᤹ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴᤗᤥ॥”

¹¹ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤕᤶᤒᤠ ᤜᤡᤶᤜᤠ᤹ ᤕᤷᤃᤧᤰ ᤕᤛᤢᤀᤠᤱ ᤁᤢᤶᤈᤡᤰᤔᤠ ᤆᤥᤃᤢᤖᤥ ᤂᤧᤒᤩᤠᤱ ᤆᤢᤰᤐᤠ ᤜᤡᤶᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥

¹² ᤌᤣ ᤀᤴᤜᤠ᤹ ᤕᤠᤰᤐᤣ᤹ ᤛᤶᤎᤠᤱᤒᤠ ᤕᤠᤰᤁᤣ᤺ᤰᤁᤥ ᤔᤧᤗᤥ᤺ᤰᤐᤡ᥅ ᤌᤣ ᤁᤢᤓᤠᤖᤧ ᤂᤧᤵᤔᤥ ᤐᤡᤳᤜᤠ᤹ ᤁᤧᤰᤆᤢ ᤌᤥ᤺ᤰᤂᤢᤛᤡᤒᤡ᥅ ᤁᤖ ᤂᤡᤏᤡ᤹ᤃ ᤂᤠᤛᤧᤴᤏᤡᤴ ᤏᤡᤱ ᤏᤢ ᤛᤠᤶᤕᤥᤏᤡᤔᤠᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤴ ᤐᤄᤡ᤺ᤰ ᤁᤧᤄᤡ᤺ᤰᤐᤠ ᤁᤧᤈᤥᤃᤢᤶᤔᤠᤱ ᤘᤠ᤹ᤖᤥ॥

¹³ ᤗᤥ-ᤍᤣᤒᤠᤖ ᤕᤧᤰᤕᤰᤁᤡᤴ ᤂᤡᤏᤡ᤹ ᤜᤠᤖᤡ ᤁᤧᤈᤠ᤺ᤳᤋᤢᤶᤒᤠᤀᤥ ᤂᤡᤏᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤀᤰᤂᤣ ᤁᤧᤒᤠ᤺ᤳᤋᤢᤶᤗᤥ. “ᤀᤠᤏᤡ᤹ ᤀᤠᤵᤑᤣᤰ ᤔᤢᤰᤁᤡᤸᤗᤧ ᤁᤠᤷᤏᤣᤔᤧᤴ ᤜᤢᤰᤁᤥ ᤀᤠᤴᤎᤠᤛᤢᤶᤔᤡᤴᤒᤡ᥅”

¹⁴ ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤛᤣ. ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤰᤋᤱᤒᤠ ᤛᤢᤘᤠᤱᤎᤡᤰ ᤜᤢᤛᤢᤱᤗᤥ. ᤂᤧᤸᤗᤧ ᤗᤧᤒᤥ-ᤜᤔᤠᤋᤗᤠᤶᤔᤠᤱ ᤕᤥ ᤀᤖᤠᤒᤠᤒᤠ ᤏᤧᤏᤧᤍᤧᤒᤠᤍᤧᤴ ᤌᤠᤖᤡᤰ ᤁᤧᤖᤧᤰ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤕᤢᤰᤋᤡᤖᤥ॥”