ᤀᤠᤔᤥᤛ 5 - LIFOTNTᤗᤠᤕᤥᤗᤠᤶ ᤜᤡᤶᤔᤠᤖᤧ ᤗᤠᤃᤡ ᤐᤣᤗᤡ 1 ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤛᤣ. ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤔᤧᤖᤡᤱ ᤌᤰᤋᤠᤱᤒᤠ ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ— 2 “ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤀᤡᤛᤪᤠᤀᤡᤗᤧᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤐᤥ᤺ᤰᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤆᤥ᤺ᤴᤍᤧᤀᤠᤱ ᤏᤧᤖᤥ. ᤂᤧᤴ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤔᤧᤏᤠ᤹ᤖᤢᤀᤠᤱ ᤏᤧᤖᤥ. ᤂᤧᤴ ᤁᤧᤓᤥᤱᤒᤠ ᤜᤠ᤺ᤳᤋᤠᤱ ᤔᤧᤜᤥᤵᤗᤥ॥” 3 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤀᤠᤳᤋᤡᤴ ᤕᤧᤰᤕᤰᤁᤥᤗᤠᤶ ᤗᤠ᤺ᤰᤁᤠᤳ ᤜᤧᤴᤇᤡᤱ ᤌᤡᤰ ᤌᤰᤛᤢᤒᤠᤜᤠ᤹ ᤔᤧᤒᤠᤱᤄᤢᤔᤧᤍᤣᤛᤢᤛᤡ᤹ ᤂᤧᤱᤜᤠ᤹ᤀᤥᤗᤠᤶ ᤁᤡᤵ ᤌᤡᤰᤗᤰ ᤔᤧᤍᤠᤱ ᤔᤧᤕᤠ᤺ᤰᤗᤥ॥ ᤀᤠᤳᤋᤡᤴ ᤕᤧᤰᤕᤰᤁᤥᤗᤠᤶ ᤁᤡᤵ ᤌᤡᤰ ᤌᤰᤛᤢᤒᤠᤜᤠ᤹ ᤗᤠ᤺ᤰᤁᤠᤳ ᤔᤧᤒᤠᤱᤄᤢᤔᤧᤍᤣᤛᤢᤛᤡ᤹ ᤂᤧᤱᤜᤠ᤹ᤀᤥᤗᤠᤶ ᤌᤡᤒᤥᤱ ᤔᤏᤠᤖᤰ ᤔᤧᤜᤡᤱ ᤔᤧᤕᤠ᤺ᤰᤗᤥ॥” 4 ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤢᤛᤡᤖᤥ. “ᤀᤠᤱᤃᤠ᤹ ᤀᤠᤃᤥ᤺ᤳᤋᤧ᤹ᤀᤥ ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤅᤧᤶᤔᤧ᤹ᤀᤥ. 5 ᤒᤣᤌᤣᤗᤧᤴ ᤔᤧᤃᤥ᤺ᤳᤋᤧᤶᤔᤡᤴᤏᤧ᤹. ᤃᤡᤗᤃᤠᤗᤀᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤒᤣᤷᤛᤣᤒᤠᤀᤥ ᤗᤠᤶᤍᤡᤰ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤃᤡᤗᤃᤠᤗᤧᤴ ᤛᤧᤰᤂᤠᤀᤣ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖᤥ. ᤜᤧᤰᤁᤩᤠᤱ ᤒᤣᤌᤣᤗᤧᤴ ᤜᤏᤧ ᤌᤣᤏᤠᤎᤣᤒᤠ ᤐᤥᤱᤗᤥ॥” 6 ᤕᤜᤘᤣ ᤍᤠᤱᤒᤧᤴ ᤜᤰᤛᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤅᤧᤶᤔᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤂᤢᤏᤧ᤹ ᤕᤥᤛᤣᤑᤖᤧ ᤁᤢᤜᤡᤶᤛᤕᤱᤅᤥ ᤔᤡ ᤜᤧᤰᤋᤱᤒᤠ ᤐᤥᤱᤒᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤴ ᤔᤡ᤺ᤸᤗᤧ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤖᤥ. ᤜᤶᤓᤩᤠᤱ ᤒᤣᤌᤣᤗᤀᤥ ᤂᤧᤴ ᤔᤡᤴ ᤁᤧᤛᤧᤵᤐᤠ ᤜᤠ᤺ᤳᤋᤠᤱ ᤔᤧᤜᤥᤵᤗᤥ॥ 7 ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤔᤧᤴᤘᤠ᤹ᤔᤏᤠᤒᤠ ᤁᤧᤈᤥ᤺ᤰᤐᤠᤛᤣ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤐᤠ᤺ᤴᤏᤡᤴ ᤂᤠᤶᤒᤠᤱᤅᤥ ᤁᤧᤍᤥ᤹ᤒᤠᤛᤣ. 8 ᤂᤣᤛᤣ ᤂᤣ᤺ᤶᤛᤡᤰ ᤏᤢ ᤔᤧᤴᤇ᤻ᤕᤠ ᤐᤢᤖᤢᤰᤔᤠ ᤁᤧᤈᤥ᤺ᤰᤐᤠ. ᤜᤧᤰᤁᤩᤠᤱ ᤔᤠᤰᤛ᤻ᤍᤡ᤺ᤱᤃᤩᤠ᤺ᤵᤐᤠ ᤂᤠᤃᤧᤔᤠᤰᤐᤧᤴ ᤋᤠ᤺ᤴᤇᤥᤃᤧᤴ ᤋᤠᤏᤠᤶ ᤂᤠᤃᤧᤀᤥ᤺ᤵᤐᤠ ᤁᤧᤈᤥ᤺ᤰᤐᤠ. ᤗᤧᤴᤍᤡᤰᤁᤧᤴ ᤂᤠᤃᤧᤔᤠᤰᤐᤠ ᤁᤧᤈᤥ᤺ᤰᤐᤠᤀᤠᤱ ᤛᤧᤴᤍᤡᤰ ᤁᤧᤈᤥ᤺ᤰᤐᤠᤴ ᤁᤥ᤺ᤳᤋᤧᤶᤔᤧ᤹ᤀᤥ. ᤘᤖ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤌᤠ᤺ᤱ ᤁᤧᤀᤢ᤺ᤵᤐᤠ ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤧᤴ ᤁᤧᤜᤢᤱᤒᤧᤴ ᤁᤥ᤺ᤳᤋᤧᤶᤔᤧ᤹ᤀᤥ ᤂᤢᤏᤧ᤹ ᤁᤢᤔᤡᤱᤅᤡᤴᤃ ᤕᤜᤘᤣᤖᤥ॥ 9 ᤂᤢᤏᤧ᤹ ᤁᤧᤎᤢᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤡᤰᤗᤧᤱᤗᤧ ᤘᤖᤧᤱᤗᤧᤱ ᤔᤧᤰᤔᤠᤛᤡᤔᤠᤴ ᤋᤠᤖᤢᤖᤥ. ᤜᤧᤰᤁᤩᤠᤱ ᤛᤧ᤺ᤵᤛᤡᤱᤔᤠᤍᤧᤴ ᤕᤰᤜᤠ᤹ ᤂᤢᤏᤧ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ 10 ᤂᤠᤛᤧᤴᤗᤥᤶᤔᤠ ᤜᤡᤶᤔᤥ ᤁᤧᤕᤢᤱᤒᤠᤀᤠᤱ ᤁᤧᤓᤧ᤺ᤰᤐᤧᤴ ᤁᤧᤈᤡ᤺ᤳᤋᤢᤶᤗᤥ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤐᤠᤴ ᤁᤧᤒᤠ᤺ᤵᤐᤧᤴᤏᤠᤱ ᤂᤡᤏᤡ᤹ ᤁᤧᤏᤠ᤹ᤖᤢᤶᤗᤥ॥ 11 ᤌᤣᤀᤠᤱ ᤔᤧᤱᤃᤵᤔᤏᤠᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤍᤥ᤹ᤖᤢᤶᤛᤡᤶᤗᤥ. ᤜᤧᤰᤁᤩᤠᤱ ᤛᤠᤰᤁᤧᤸᤗᤧᤰ ᤆᤠ ᤁᤧᤶᤒᤡᤖᤡᤖ ᤁᤧᤕᤠ᤺ᤴᤍᤢᤶᤛᤡᤶᤗᤥ॥ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤂᤥ᤺ᤶᤔᤏᤠ ᤗᤰᤔᤏᤠᤒᤠ ᤗᤢᤱ ᤜᤡᤶᤜᤠ᤹ ᤁᤧᤈᤥᤃᤢᤶᤛᤠᤱ ᤂᤡᤏᤡ᤹ ᤂᤧᤱᤜᤠ᤹ᤀᤥ ᤕᤢᤱᤔᤠ ᤁᤧᤱᤄᤥᤛᤢᤶᤔᤡᤴᤗᤥ. ᤂᤡᤏᤡ᤹ ᤆᤡᤏ᤹ᤏ᤹ ᤁᤧᤗ᤹ᤒᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤁᤧᤗᤣ᤺ᤳᤋᤢᤶᤛᤠᤱ ᤂᤡᤏᤡ᤹ ᤂᤧᤴ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤁᤧᤱᤄᤥᤛᤢᤶᤔᤡᤴᤗᤥ॥ 12 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤵᤋᤡᤰᤜᤠ᤹ ᤕᤖᤡᤰ ᤘᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤕᤶᤒᤠ ᤗᤠᤕᤥᤜᤠ᤹ ᤁᤧᤈᤥᤃᤢᤶᤔᤠᤱ ᤘᤠ᤹ᤒᤠᤴ ᤏᤡᤛᤢᤱᤗᤥ॥ ᤛᤠᤶᤕᤥᤒᤠᤜᤠ᤹ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤳᤋᤢᤶᤛᤡᤶᤗᤥ ᤜᤧᤰᤁᤩᤠᤱ ᤂᤡᤏᤡ᤹ᤃ ᤛᤫᤠ᤺ᤳᤋᤠᤱ ᤕᤠᤱ ᤁᤧᤍᤠ᤺ᤰᤋᤢᤶᤗᤥ ᤜᤧᤰᤁᤩᤠᤱ ᤂᤠᤛᤧᤴᤗᤥᤶᤔᤠ ᤜᤡᤶᤜᤠ᤹ᤀᤥ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤶᤔᤠ ᤐᤡᤔᤠᤛᤡ ᤁᤧᤶᤓᤠ᤺ᤰᤋᤢᤶᤛᤡᤶᤔᤡᤴᤗᤥ॥ 13 ᤂᤧᤸᤗᤧᤆᤥᤃᤢᤸᤗᤧ ᤂᤠᤛᤡᤱ ᤁᤧᤏᤡ᤺ᤵᤐᤠ ᤔᤏᤠᤴ ᤛᤫᤠ᤺ᤳ ᤘᤠ᤹ᤖᤥ ᤌᤣᤀᤠᤱᤓᤧᤸᤗᤧ ᤕᤧᤶᤔᤡᤴ ᤋᤠᤵᤑᤧ᤺ᤶᤒᤠ ᤆᤥᤰᤗᤥ॥ 14 ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤔᤣ᤺ᤴ. ᤏᤢᤒᤠ ᤐᤠ᤺ᤴᤏᤡᤴ ᤁᤥ᤺ᤳᤋᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤜᤡᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥ ᤂᤧᤒᤩᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤁᤢᤀᤡᤛᤡ᤺ᤰᤁᤣ ᤕᤜᤘᤣ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥ 15 ᤋᤠᤵᤑᤧ᤺ᤶᤒᤠᤴ ᤐᤠ᤺ᤴᤏᤡᤴ ᤆᤡ᤺ᤳᤋᤧᤶᤔᤧ᤹. ᤏᤢᤒᤧᤴ ᤗᤢᤱᤔᤠ᤹ ᤋᤢᤰᤋᤧᤶᤔᤧ᤹ᤀᤥ. ᤂᤠᤛᤧᤴ ᤗᤥ᤺ᤶᤔᤠ ᤜᤡᤶᤜᤠ᤹ᤀᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹ᤀᤥ॥ ᤐᤥᤱᤔᤠ ᤛᤢᤰ ᤕᤜᤘᤣ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤕᤥᤛᤣᤑᤖᤧ ᤁᤢᤔᤏᤠᤜᤠ᤹ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤗ᤹ᤖᤥ॥ 16 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ. ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤁᤧᤖᤧᤰ ᤔᤠᤖᤠᤶᤜᤠ᤹ᤀᤥ ᤜᤠ᤺ᤶᤗᤠᤰᤘᤠ ᤐᤥ᤺ᤰᤗᤥ. ᤜᤧᤰᤁᤩᤠᤱ ᤁᤧᤖᤧᤰ ᤗᤰᤂᤢᤶᤜᤠ᤹ᤀᤥ ᤂᤧᤱᤜᤠ᤹ ᤀᤰᤂᤣ ᤔᤧᤗ᤹ᤖᤥ. ‘ᤀᤣ ᤏᤠ᤹ᤖᤠᤱᤛᤩᤠᤱᤗᤥ᥄ ᤀᤣ ᤏᤠ᤹ᤖᤠᤱᤛᤩᤠᤱᤗᤥ᥄’ ᤕᤠ᤺ᤴᤃᤧᤔᤒᤠᤜᤠ᤹ ᤜᤠ᤺ᤵᤔᤠᤖᤧ ᤗᤠᤃᤡ ᤏᤢ ᤆᤣᤍᤡ᤺ᤰᤗᤠᤒᤠᤜᤠ᤹ ᤜᤠ᤺ᤶᤗᤠᤰᤘᤠ ᤑᤥᤱᤔᤠᤖᤧ ᤗᤠᤃᤡ ᤔᤧᤀᤢ᤺ᤳᤋᤢᤛᤡᤖᤥ॥ 17 ᤁᤧᤖᤧᤰ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤀᤥ ᤜᤠ᤺ᤶᤗᤠᤰᤘᤠ ᤐᤥ᤺ᤰᤗᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥᤗᤠᤶ ᤐᤥᤱᤅᤠᤀᤠᤱ ᤐᤣ᤺ᤰᤁᤠᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ ᤁᤧᤍᤠᤒᤠᤖ ᤁᤧᤒᤵᤐᤠ ᤂᤠᤛᤧᤴ 18 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤁᤧᤜᤠᤱᤒᤠᤜᤠ᤹ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤂᤡᤏᤡ᤹ ᤌᤣᤀᤠᤱ ᤁᤧᤜᤠᤱᤄᤢᤶᤒᤠᤒᤣ᥅ ᤂᤧᤴ ᤕᤧᤴᤏᤡᤱᤃ ᤂᤠᤃᤧᤔᤠᤰᤐᤠ ᤐᤥᤱ᤹. ᤂᤠᤃᤧᤀᤥ᤺ᤵᤐᤠ ᤔᤧᤒᤥᤱᤏᤧᤴᤗᤥ॥ 19 ᤂᤧᤴ ᤕᤧᤴᤏᤥ ᤂᤡᤖᤡᤱᤒᤠᤗᤠᤶ ᤁᤧᤄᤧᤳᤇᤡᤱᤒᤠ ᤔᤏᤠ᤺ᤸᤗᤧ ᤔᤠ᤹᤺ᤕᤢ᤺ᤴ ᤋᤢᤔᤢᤒᤠ ᤜᤧᤰᤁᤣ ᤁᤧᤒᤥᤰᤂᤡᤖᤥ. ᤀᤡᤃᤪ ᤜᤡᤶᤛᤡᤃᤠᤱ ᤁᤧᤗᤠ᤺ᤵᤐᤠᤀᤠᤱ ᤗᤢᤱᤎᤠᤰᤁᤥ ᤜᤢᤰ ᤁᤧᤓᤶᤒᤧᤴ ᤀᤛᤣ᤺ᤰᤁᤡᤸᤗᤧ ᤀᤃᤢᤒᤠ ᤜᤧᤰᤁᤣ ᤁᤧᤒᤥᤰᤂᤡᤖᤥ॥ 20 ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤂᤠᤃᤧᤀᤥ᤺ᤵᤐᤠ ᤔᤣ᤺ᤴ. ᤁᤖ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤏᤢ ᤀᤠᤈᤧ᤺ᤳᤇᤡᤰᤁᤠᤱ ᤂᤠᤔᤧᤴᤀᤥ᤺ᤵᤔᤏᤠᤒᤠ ᤂᤠᤔᤠᤰᤆᤢᤶᤒᤠ ᤔᤧᤒᤥᤱᤏᤧᤴᤏᤠᤱᤒᤡ᥅ 21 “ᤀᤠᤱᤃᤠ᤹ ᤂᤡᤏᤡ᤹ ᤛᤠᤶᤕᤥᤒᤠ ᤋᤱᤏᤠᤶᤜᤠ᤹ ᤆᤡ᤺ᤳᤋᤢᤱᤗᤥ. ᤀᤠᤱᤃᤠ᤹ ᤂᤡᤏᤡ᤹ ᤆᤢᤶᤗᤢᤱᤜᤠ᤹ ᤏᤠᤛᤡᤌ᤺ᤵᤔᤠ ᤔᤧᤛᤢᤰᤁᤠᤴᤗᤥ॥ 22 ᤂᤡᤏᤡ᤹ ᤀᤠᤱᤃᤠ᤹ ᤀᤠᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤜᤧᤰᤁᤩᤠᤱ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤁᤧᤍᤥ᤺ᤴᤍᤢᤶᤛᤠᤱ ᤔᤧᤍᤠ᤺ᤰᤁᤠᤴᤗᤥ. ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤂᤡᤏᤡ᤹ ᤋᤱᤈᤢᤶ ᤛᤡᤍᤢᤱᤈᤓᤠᤜᤠ᤹ᤀᤠᤱ ᤏᤡᤏᤡ ᤔᤧᤗᤠᤵᤐᤠᤴᤗᤥ॥ 23 ᤂᤡᤏᤡ᤹ ᤛᤠᤶᤃᤧᤗᤥᤖᤡᤒᤠ ᤀᤡᤰᤗᤠᤜᤠ᤹ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤁᤳᤋᤧᤶᤔᤧ᤹ᤀᤥ᥄ ᤀᤠᤱᤃᤠ᤹ ᤂᤡᤏᤡ᤹ ᤋᤢᤱᤃᤣᤜᤠ᤹ᤖᤧ ᤁᤢᤀᤡᤰᤗᤠᤜᤠ᤹ ᤂᤧᤶᤔᤠ ᤀᤠᤏᤡᤱᤘᤠ᤹ ᤜᤥᤵᤗᤥ॥ 24 ᤁᤖ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤘᤜ᤺ᤱ ᤁᤢᤀᤡᤛᤡᤰ ᤏᤢ ᤛᤠᤶᤕᤥᤏᤡᤔᤠᤴ ᤀᤠᤵᤑᤠᤸᤗᤧᤀᤠᤱ ᤔᤧᤴᤈᤵᤔᤏᤠ ᤕᤱᤄᤱ ᤁᤢᤀᤡᤛᤡᤰ ᤘᤃᤢᤖᤖᤥ᥄ 25 “ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤛᤣ. ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤴ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤌᤣ ᤂᤡᤏᤡ᤹ ᤛᤡᤍᤢᤱᤈᤓᤠᤜᤠ᤹ ᤏᤢ ᤜᤢᤰᤘᤠᤜᤠ᤹ ᤀᤠᤱᤃᤠ᤹ᤀᤥ ᤁᤧᤍᤥ᤺ᤴᤍᤢᤶᤔᤠᤱ ᤘᤕᤧᤒᤡ᥅ 26 ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤧᤈᤥᤃᤢᤶᤒᤠ ᤜᤠᤱᤅᤡᤸᤗᤧ ᤁᤢᤛᤠ᤺ᤱᤃᤠᤜᤡᤶᤔᤡᤴ. ᤂᤡᤏᤡ᤹ ᤏᤠᤘᤠᤀᤡᤳᤗᤠ ᤕᤢᤰᤏᤠᤴ ᤏᤢ ᤂᤣ᤺ᤶᤛᤡᤰᤐᤠ ᤔᤠᤱᤅᤡᤴ ᤁᤧᤃᤢᤕᤢᤶᤔᤠᤱ ᤁᤧᤘᤕᤡᤖ ᤐᤥᤱᤗᤥ॥ 27 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤍᤔᤛ᤻ᤁᤛᤏᤢ᤺ᤸᤗᤧᤀᤠᤱ ᤏᤠᤎᤠ᤺ᤶᤒᤡ ᤀᤠᤱᤃᤠ᤹ ᤂᤡᤏᤡ᤹ ᤗᤠᤈᤣ᤹ᤗᤠᤶ ᤗ᤺ᤳᤏᤡᤱᤍᤣᤏᤡᤱᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. ᤂᤢᤏᤧ᤹ ᤁᤢᤔᤡᤱᤃ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.