ᤀᤠᤔᤥᤛ 4 - LIFOTNT

ᤀᤡᤛᤪᤠᤀᤡᤗᤡᤜᤠ᤹ ᤜᤢ᤹ᤛᤡᤱᤔᤠ ᤔᤧᤴᤇᤢᤰᤏᤧᤴ

¹ ᤛᤠᤔᤖᤡᤕᤠᤒᤠ ᤁᤥ᤺ᤰᤔᤠᤀᤥ ᤁᤧᤘᤠ᤹ᤔᤠ ᤒᤠᤛᤠᤏᤒᤠ ᤐᤡᤵᤔᤠᤛᤣ. ᤛᤡᤶᤒᤥᤛᤠᤔᤠ ᤔᤧᤴᤇᤢᤔᤠᤛᤣ. ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤂᤡᤏᤡ᤹ ᤕᤠᤱᤃᤧᤛᤠ᤹ᤒᤠᤜᤠ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤳᤋᤢᤶᤛᤡᤶᤗᤥ. ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤂᤡᤏᤡ᤹ ᤁᤧᤕᤢᤰᤋᤢᤶᤛᤡᤶᤗᤥ. ᤂᤧᤒᤩᤠᤱ ᤂᤡᤏᤡ᤹ ᤕᤧᤶᤒᤠᤜᤠ᤹ ᤀᤰᤂᤣ ᤁᤧᤔᤧᤳᤋᤢᤶᤛᤡᤶᤗᤥ. “ᤌᤢᤱᤔᤠᤖᤧᤗᤠᤃᤡ ᤀᤠᤏᤡᤃᤣ ᤁᤢᤓᤠ ᤌᤧᤔᤠᤀᤡ ᤋᤠᤖᤧᤀᤠᤒᤡᤖᤧ᤹ᤀᤥ॥”

² ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤛᤣᤛᤣᤃᤧᤴᤗᤠᤶ ᤁᤴ ᤔᤠᤱᤜᤧᤰᤁᤡᤴ ᤆᤥᤃᤢᤀᤠᤱ ᤘᤠ᤹ᤖᤥ. “ᤀᤥᤔᤧᤳᤋᤧᤶᤔᤧ᤹. ᤕᤧᤴᤜᤠ᤹ ᤂᤡᤏᤡ᤹ᤀᤥ ᤋᤠᤖ ᤐᤳᤗᤥ ᤂᤧᤒᤩᤠᤱ ᤀᤠᤸᤗ ᤂᤧ᤺ᤰᤆᤢᤖᤡ᤺ᤸᤗᤧ ᤂᤡᤏᤡ᤹ ᤁᤧᤶᤀᤢ᤺ᤰᤂᤡᤖᤥ ᤜᤧᤰᤁᤩᤠᤱ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤂᤡᤏᤡ᤹ ᤔᤏᤠᤜᤠ᤹ ᤂᤣ᤺ᤱᤅᤡᤸᤗᤧ ᤔᤧᤘᤣ᤹ᤖᤢ ᤔᤧᤍᤣ᤹ᤖᤢᤛᤡᤖᤥ॥

³ ᤂᤡᤏᤡ᤹ ᤂᤰᤐᤧᤳ ᤗᤢᤱᤎᤠᤰᤁᤡᤸᤗᤧ ᤁᤢᤓᤡ᤺ᤵᤔᤠᤜᤠ᤹ᤗᤠᤶ ᤁᤧᤒᤥ᤺ᤰᤂᤡᤀᤠᤱ ᤁᤢᤍᤥ᤺ᤵᤔᤠ ᤁᤧᤒᤣᤃᤡᤖᤥ. ᤜᤧᤰᤁᤩᤠᤱ ᤜᤷᤔᤥᤏ ᤗᤧᤵᤔᤠᤱ ᤂᤡᤏᤡ᤹ ᤗᤠᤵᤁᤧᤶᤓᤢᤛᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

⁴ “ᤒᤣᤌᤣᤗᤀᤥ ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤗᤠᤕᤥ ᤆᤥᤃᤧᤶᤔᤧ᤹ᤒᤠ. ᤃᤡᤗᤃᤠᤗᤀᤥ ᤐᤣᤃᤧᤶᤔᤧ᤹ᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤗᤠᤕᤥ ᤆᤥᤃᤧᤶᤔᤧ᤹ᤒᤠ॥ ᤋᤠᤏᤠᤶ ᤌᤰᤔᤠ ᤂᤡᤏᤡ᤹ ᤛᤡᤍᤢᤱᤈᤓᤠᤜᤠ᤹ ᤋᤠᤖᤧᤶᤔᤧ᤹ᤒᤠ ᤂᤶᤓᤩᤠᤱ ᤋᤱᤒᤣ ᤛᤢᤶᤛᤡ ᤌᤰᤔᤠ ᤌᤡᤒᤥᤱ ᤗᤰᤜᤠ᤹ ᤋᤠᤖᤧᤶᤔᤧ᤹ᤒᤠ॥

⁵ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤂᤖᤧ᤺ᤱᤅᤡᤴ ᤏᤢᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤀᤠᤵᤑᤣᤰ ᤂᤡᤏᤡ᤹ ᤏᤡᤱᤘᤠ᤺ᤸᤗᤧ ᤁᤧᤍᤥ᤺ᤴᤍᤢᤶᤒᤠ ᤛᤡᤍᤢᤱᤈᤓᤠᤜᤠ᤹ᤖᤧ ᤗᤠᤃᤡ ᤀ᤺ᤰᤋᤧᤶᤔᤧ᤹ᤀᤥ ᤕᤶᤒᤠ ᤜᤧᤴᤏᤠᤛᤡᤶᤔᤧ᤹ᤖ ᤗᤠᤱᤄᤣᤃᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤡᤛᤪᤠᤀᤡᤗᤡᤏᤡᤱᤗᤥ. ᤜᤧᤰᤁᤣᤀᤣ ᤆᤥ᤺ᤰᤔᤠ ᤂᤡᤏᤡ᤹ ᤛᤡᤖᤠ᤹ᤌᤠᤱᤗᤥ.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

⁶ “ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤀᤠᤱᤃᤠ᤹ ᤂᤡᤏᤡ᤹ ᤔᤢᤖᤠᤀᤥ ᤁᤢᤈᤠᤔᤠ ᤆᤠ ᤔᤣ᤺ᤴᤏᤣ ᤜᤧᤰᤁᤩᤠᤱ ᤁᤧᤖᤧᤰ ᤐᤠᤱᤈᤢᤶᤜᤠ᤹ᤀᤥ ᤂᤖᤧ᤺ᤱ ᤔᤣ᤺ᤴᤏᤣ ᤆᤥ᤺ᤰᤏᤡᤱᤗᤥ. ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤱᤃᤠ᤹ᤀᤥ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤁᤧᤘᤕᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

⁷ “ᤐᤥᤃᤢᤃᤧᤴ ᤁᤢᤈᤠ ᤛᤢᤶᤔᤠ ᤕᤧᤶ ᤀᤠᤸᤗᤛᤠᤱ ᤗᤠ ᤛᤢᤶᤛᤡ ᤋᤠᤔᤠ ᤘᤕᤧᤖᤀᤣ ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤐᤠᤱᤃᤧᤴᤍᤡᤱ ᤘᤜᤡᤳ ᤌᤠᤔᤠ ᤔᤧᤶᤒᤠᤱᤒᤠᤖᤥ. ᤀᤠᤱᤃᤠ᤹ ᤗᤳᤇᤠ ᤕᤧᤰᤕᤰᤁᤥ ᤘᤜᤡᤳ ᤌᤠᤔᤠ ᤐᤠᤱᤄᤢᤱᤗᤥ ᤁᤖ ᤘᤣ᤹ ᤕᤧᤰᤕᤰᤁᤥ ᤘᤜᤡᤳ ᤌᤠᤔᤠ ᤔᤧᤒᤠᤱᤄᤢᤱᤅᤡᤴᤗᤥ॥ ᤗᤳᤇᤠ ᤀᤡᤰᤋᤠᤵᤐᤥ ᤘᤜᤡᤳ ᤌᤩᤧ. ᤘᤣ᤹ᤛᤔᤠ ᤀᤡᤰᤋᤠᤵᤐᤥ ᤔᤧᤎᤩᤧᤏᤧᤴᤗᤥ ᤜᤧᤰᤁᤩᤠᤱ ᤂᤧᤴ ᤀᤡᤰᤋᤠᤵᤐᤡᤴ ᤛᤷᤃᤧᤱ ᤜᤣᤖᤧᤒᤣᤖᤥ॥

⁸ ᤔᤏᤠᤜᤠ᤹ ᤐᤠᤱᤈᤢᤶ ᤐᤠᤱᤈᤢᤶᤔᤥ ᤆᤫᤠ᤺ᤳᤗᤧ ᤗᤠᤃᤡ ᤆᤥᤏᤠ᤺ᤶ ᤆᤥᤏᤠ᤺ᤶ ᤔᤧᤗ᤹ᤖᤧᤖ ᤗᤠᤱᤔᤧᤄᤣᤃᤧᤖᤥ. ᤁᤖ ᤌᤢᤱᤔᤠᤖᤧᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤥᤒᤠ ᤔᤧᤱᤄᤥᤛᤢᤴᤗᤥ. ᤁᤖᤛᤠᤱ ᤂᤡᤏᤡ᤹ ᤀᤠᤱᤃᤠ᤹ᤀᤥ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤁᤧᤘᤕᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

⁹ “ᤀᤠᤱᤃᤠ᤹ ᤕᤖᤡᤰᤗᤧᤱ ᤂᤡᤏᤡ᤹ ᤛᤡᤱᤛᤣ᤹ᤀᤡᤰᤜᤠ᤹ᤀᤥ ᤏᤢ ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤀᤥ ᤂᤢ᤺ᤰᤘᤠᤔᤣ᤺ᤳ ᤏᤢ ᤛᤢᤰᤏᤠ᤺ᤶᤒᤠ ᤌᤩᤧᤖ ᤕᤠ᤺ᤴᤍᤢᤱᤗᤥ॥ ᤂᤡᤏᤡ᤹ ᤐ᤺ᤳᤇᤣ᤹ᤜᤠ᤹ ᤏᤢ ᤂᤡᤏᤡ᤹ ᤆᤤᤋᤢᤏ ᤛᤡᤱᤒᤢᤱᤜᤠ᤹ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤖ ᤕᤠ᤺ᤴᤍᤢᤱᤛᤡᤱᤗᤥ. ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤱᤃᤠ᤹ᤀᤥ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤁᤧᤘᤕᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

¹⁰ “ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤔᤡᤛᤪ ᤗᤠᤈᤣ᤹ᤀᤥ ᤆᤥᤃᤢᤱᤒᤠ ᤜᤧᤰᤁᤣ ᤔᤡᤱᤍᤣ᤹ᤜᤠ᤹ ᤐᤠᤱᤄᤢᤱᤗᤥ॥ ᤂᤡᤏᤡ᤹ ᤌᤠᤱᤒᤧᤴ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤛᤩᤧᤖᤢᤱᤛᤡᤱᤗᤥ. ᤂᤡᤏᤡ᤹ ᤀᤴᤜᤠ᤹ ᤋᤣ᤹ᤖᤢᤱᤛᤡᤱᤅᤠᤱ ᤐᤠᤱᤄᤢᤱᤍᤣᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤁᤢᤃᤡ᤺ᤰᤁᤡᤴ ᤂᤡᤏᤡ᤹ ᤏᤧᤒᤥᤀᤥ ᤌᤠᤖᤡᤰᤁᤣ ᤌᤡᤶᤛᤢᤱᤗᤥ. ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤔᤧᤴᤏᤢ᤺ᤱᤅᤣ ᤁᤧᤘᤕᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

¹¹ “ᤛᤍᤥᤔ ᤏᤢ ᤃᤔᤥᤖᤠᤴ ᤜᤧᤰᤁᤣ ᤀᤠᤱᤃᤠ᤹ ᤂᤡᤏᤡ᤹ ᤁᤢᤓᤠ ᤕᤧᤰᤕᤰᤜᤠ᤹ ᤕᤢᤔᤪᤧᤰ ᤔᤧᤰᤂᤢᤱᤗᤥ॥ ᤂᤡᤏᤡ᤹ᤃ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤔᤡᤀᤥᤗᤠᤶ ᤑᤡ᤺ᤱᤔᤏᤠ ᤗ᤺ᤵᤔᤏᤠᤒᤠ ᤔᤡᤎᤰᤐᤢ ᤜᤧᤰᤋᤱᤒᤠ ᤁᤧᤘᤕᤡᤖᤥ. ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤔᤧᤴᤏᤢ᤺ᤱᤅᤣ ᤁᤧᤘᤕᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

¹² “ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤀᤰᤂᤣ ᤆᤥᤃᤢᤱᤗᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤀᤰᤂᤣ ᤆᤥ᤺ᤰᤔᤠ ᤀᤡ᤺ᤳᤋᤢᤱᤒᤠᤸᤗᤧ ᤆᤥᤃᤢᤸᤗᤧ. ᤀᤡᤛᤪᤠᤀᤡᤗᤀᤣ. ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤶᤔᤠᤖᤧ ᤗᤠᤃᤡ ᤕᤠᤖᤡᤵ ᤐᤥ᤺ᤰᤂᤧ᤹ᤀᤥ॥”

¹³ ᤂᤢᤏᤧ᤹ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤖᤥ ᤂᤢᤏᤧ᤹ ᤛᤠᤶᤔᤡᤳ ᤛᤢᤖᤡᤳ ᤁᤣᤈᤱ ᤆᤥᤃᤢᤖᤥ. ᤂᤢᤏᤧ᤹ ᤁᤢᤏᤡᤱᤘᤠᤀᤥᤒᤠ ᤐᤠ᤺ᤴᤜᤠ᤹ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤣ᤺ᤶᤒᤠ ᤁᤣ᤺ᤶᤒᤠ ᤋᤧᤴᤜᤠ᤹ᤀᤥ ᤗᤠᤱᤄᤣ᤺ᤰᤗᤥ— ᤂᤢᤏᤧ᤹ ᤁᤢᤔᤡᤱᤃ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ॥