ᤀᤠᤔᤥᤛ 3 - LIFOTNT

ᤀᤡᤛᤪᤠᤀᤡᤗᤖᤧ ᤁᤢᤍᤰᤗᤧᤱᤘᤠᤀᤥ ᤋᤥ᤺ᤴᤍᤡ

¹ ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤈᤠ᤺ᤰᤁᤡᤴ ᤂᤧᤵᤛᤧᤶᤔᤧ᤹. ᤀᤡᤃᤪ ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤒᤠ ᤁᤧᤖᤧᤰ ᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ—

² “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤡᤶᤛᤕᤱᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤂᤡᤏᤡ᤹ᤖᤰ ᤛᤣ᤺ᤰᤏᤡᤱᤅᤠᤱ ᤘᤠ᤹ᤖᤥ॥ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤂᤡᤏᤡ᤹ ᤂᤢᤶᤍᤡᤱ ᤐᤡᤏᤡᤱᤗᤥ॥”

³ ᤌᤣ ᤏᤧᤳᤇᤡ ᤔᤏᤠᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤐᤠ᤺ᤴᤔᤧᤴᤍᤱᤅᤣ ᤌᤧᤶᤒᤠ ᤂᤢᤴᤇᤡ᤹ ᤛᤥᤛᤥᤖᤡᤰ ᤗᤠᤱᤄᤣ᤺ᤰᤛᤡᤀᤠᤱᤒᤡ᥅

⁴ ᤌᤣ ᤛᤠᤏᤠᤳ ᤔᤧᤴᤕᤠᤰᤔᤏᤠᤒᤠ ᤋᤠᤶᤓᤢᤱᤅᤥ ᤂᤡᤖᤡᤱᤒᤠᤴ ᤜᤢ᤺ᤰᤐᤡ᥅ ᤌᤣᤀᤠᤱ ᤔᤧᤱᤄᤥᤀᤣ ᤂᤧᤴ ᤁᤢᤄᤠᤀᤥ ᤜᤠᤃᤠ᤺ᤰ ᤜᤠᤃᤠ᤺ᤰ ᤗ᤹ᤒᤡ᥅

⁵ ᤌᤣ ᤂᤠᤶᤒᤠᤱᤅᤥ ᤀᤡᤈᤥᤴ ᤔᤧᤱᤃᤧᤀᤣ ᤂᤧᤵᤔᤥ ᤐᤢ᤺ᤴ ᤌᤠᤒᤡ᥅ ᤌᤣ ᤋᤧᤶᤔᤠᤖᤧ ᤗᤠᤃᤡ ᤌᤣᤀᤠᤱ ᤔᤧᤶᤔᤧᤳᤋᤣ ᤂᤠᤶᤒᤠᤱᤅᤥᤗᤠᤶ ᤆᤧᤴᤏᤡᤴ ᤑᤧᤰᤐᤡ᥅

⁶ ᤌᤣ ᤕᤧᤰᤕᤰᤁᤥ ᤌᤱᤗᤧ ᤗᤠᤃᤡ ᤛᤠᤍᤠᤱ ᤔᤢ᤺ᤵᤔᤏᤠᤒᤠ ᤀᤡᤰᤗᤠᤴ ᤗᤠᤀᤡ᤺ᤰᤁᤡᤸᤗᤧ ᤔᤏᤠᤜᤠ᤹ ᤔᤧᤴᤕᤱᤏᤧᤴ ᤔᤧᤱᤃᤡᤏᤧᤶᤒᤡ᥅ ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤒᤠᤱᤄᤢᤴ ᤔᤧᤍᤠᤛᤢᤴᤗ ᤌᤠᤖᤡᤰ ᤕᤧᤰᤕᤰᤁᤥ ᤕᤧᤳᤋᤢᤰᤂᤣ ᤋᤠᤒᤡ᥅

⁷ ᤛᤧᤰᤂᤠᤛᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤠ᤹ᤖᤢᤒᤠ ᤐᤠ᤺ᤴᤏᤡᤴ ᤀᤠᤵᤑᤣᤰ ᤁᤢᤛᤧᤘᤠᤖᤥᤒᤠ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠᤵᤐᤠᤜᤠ᤹ ᤀᤥ᤺ᤴᤔᤧᤎᤠᤰᤋᤢᤛᤡᤴᤗ ᤌᤠᤖᤡᤰ ᤂᤢᤏᤧ᤹ ᤀᤠᤵᤑᤣᤰ ᤌᤧᤔᤠᤀᤠᤱ ᤔᤧᤈᤥᤃᤢᤴᤗᤥ॥

⁸ ᤂᤡᤖᤡᤱᤒᤠᤴ ᤜᤢ᤺ᤰᤋᤧᤀᤠᤱ ᤘᤠ᤹. ᤜᤠᤳ ᤔᤧᤃᤡᤏᤧᤶᤒᤣ᥅ ᤕᤜᤘᤣ ᤍᤠᤱᤒᤧᤴ ᤐᤠᤖᤧᤀᤠᤱ ᤘᤠ᤹. ᤜᤠ᤺ᤳᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤴᤏᤠᤱᤒᤧ᥅

⁹ ᤀᤛ᤻ᤍᤥᤍᤒᤠ ᤕᤰᤜᤠ᤹ᤀᤥ ᤏᤢ ᤔᤡᤛᤪᤒᤠ ᤕᤰᤜᤠ᤹ᤀᤥ ᤀᤢᤘᤠ ᤆᤥᤃᤧ᤹ᤀᤥ— “ᤛᤠᤔᤖᤡᤕᤠᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤂᤡᤏᤡ᤹ ᤀᤠᤵᤑᤣᤰ ᤆᤢᤶᤗᤢᤱ ᤆᤢᤵᤛᤧᤶᤔᤧ᤹ᤀᤥ॥ ᤂᤧᤵᤔᤥ ᤁᤧᤒᤥᤱᤒᤠ ᤕᤶᤒᤠ ᤜᤕᤱ ᤁᤡᤸᤗᤡᤱᤅᤡᤴ ᤏᤢ ᤂᤧᤵᤔᤥ ᤔᤧᤕᤢᤰᤋᤢᤛᤡᤒᤠ ᤐᤠ᤺ᤴᤏᤡᤴ ᤀᤥᤔᤧᤳᤋᤧᤶᤔᤧ᤹ᤀᤥ॥”

¹⁰ ᤕᤜᤘᤣ ᤍᤠᤱᤒᤠᤸᤗᤧ ᤀᤢᤘᤠ ᤆᤥᤃᤢᤖᤥ. “ᤂᤧᤱᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤏᤢ ᤑᤠ᤺ᤴᤍᤠ ᤕᤠ᤺ᤶᤒᤰ ᤔᤧᤈᤥᤃᤢᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤂᤢᤴᤇᤡ᤹ ᤕᤰᤜᤠ᤹ᤀᤥ ᤔᤧᤗᤢᤵᤛᤢᤖᤥ ᤂᤧᤱᤜᤠ᤹ᤖᤧ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤸᤗᤧᤛᤢᤴᤗᤥ॥”

¹¹ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤏᤡᤱᤔᤡ ᤌᤡᤰᤗᤧ ᤗᤠᤈᤣᤴ ᤁᤒᤪᤡᤱ ᤁᤒᤢᤖᤥ. ᤂᤧᤸᤗᤧ ᤂᤡᤏᤡ᤹ ᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤂᤡᤏᤡ᤹ ᤕᤰᤜᤠ᤹ ᤁᤧᤏᤠᤵᤋᤡᤖᤥ॥”

¹² ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤔᤧᤸᤗᤢᤰ ᤁᤶᤒᤠᤸᤗᤧ ᤌᤧᤖᤡᤱᤒᤧᤸᤗᤧ ᤁᤢᤶᤒᤪᤠᤀᤥᤗᤠᤶ ᤗᤠᤱᤅᤥᤒᤠ ᤁᤢᤀᤠᤳ ᤏᤧᤳᤇᤡ ᤛᤠᤕᤧᤳ ᤀᤡᤃᤪ ᤏᤧᤓᤠᤰᤁᤥᤒᤠ ᤁᤢᤔᤢᤸᤗᤠ ᤌᤡᤰᤗᤰ ᤌᤧᤖᤡᤱᤒᤧᤴ ᤏᤠᤵᤔᤠ ᤛᤢᤰᤋᤢᤒᤠ ᤁᤢᤀᤡᤛᤡᤰ ᤛᤠᤔᤖᤡᤕᤠᤀᤥ ᤁᤧᤕᤢᤱᤒᤠ ᤀᤡᤛᤪᤠᤀᤡᤗᤡᤜᤠ᤹ ᤏᤧᤳᤏᤠ᤺ᤸᤗᤧ ᤁᤢᤕᤠ᤺ᤴᤏᤢ ᤕᤢᤰᤏᤠ᤺ᤸᤗᤧ ᤁᤢᤛᤢᤰᤐᤧᤴᤏᤢ ᤋᤠᤱᤔᤧᤛᤧ᤺ᤵᤗᤥ॥

¹³ “ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹. ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤡᤖᤧᤶᤔᤧ᤹.” ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢᤘᤠ ᤆᤥᤃᤢᤖᤥ॥

¹⁴ “ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤁᤢᤗᤠᤕᤥᤜᤠ᤹ᤖᤧ ᤗᤠᤃᤡ ᤂᤢᤶᤍᤡᤱ ᤐᤡᤖᤢᤱᤒᤠ ᤕᤧᤴᤏᤥ. ᤒᤣᤌᤣᤗᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤠᤱᤜᤠ᤹ ᤛᤩᤠᤰ ᤐᤢ᤹ᤖ ᤆᤩᤧᤵᤋᤢᤱᤗᤥ ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤔᤰᤌᤠᤖ ᤕᤠ᤺ᤴᤍᤢᤱᤗᤥ॥

¹⁵ ᤀᤠᤱᤃᤠ᤹ ᤆᤢᤱᤛᤡ᤺ᤰᤔᤠ ᤕᤧᤶᤔᤥ ᤕᤢᤱᤔᤠ ᤜᤡᤶᤜᤠ᤹ ᤏᤢ ᤜᤠᤱᤘᤠᤔᤠ ᤕᤧᤶᤔᤥ ᤕᤢᤱᤔᤠ ᤜᤡᤶᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤋᤰᤔᤡᤒᤠ ᤁᤣ᤺ᤱᤅᤡᤸᤗᤧ ᤁᤧᤄᤧᤶᤒᤠ ᤆᤥ᤺ᤰᤔᤏᤠᤒᤠ ᤜᤡᤶᤜᤠ᤹ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤜᤧᤰᤁᤩᤠᤱ ᤕᤶᤒᤕᤶᤒᤠ ᤜᤡᤶᤜᤠ᤹ ᤔᤧᤎᤢᤵᤛᤢ ᤔᤧᤍᤣᤛᤢᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥