ᤀᤠᤔᤥᤛ 2 - LIFOTNT

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤔᤥᤀᤠᤒᤖᤧ ᤛᤢᤶᤛᤡ ᤁᤢᤗᤠᤕᤥᤜᤠ᤹ ᤀᤡᤃᤪ ᤗᤡᤛᤡᤀᤣ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤂᤧᤸᤗᤧ ᤀᤣᤍᤥᤔᤒᤠ ᤜᤠᤱᤅᤡᤸᤗᤧ ᤁᤢᤕᤧᤵᤐᤠᤜᤠ᤹ ᤀᤥ᤹ᤖᤢᤀᤠᤱ ᤂᤠᤵᤐᤢᤌᤩ᤺ᤱ ᤆᤢᤏᤡ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ.

² ᤀᤠᤱᤃᤠ᤹ ᤔᤥᤀᤠᤒᤀᤥ ᤔᤡ ᤁᤣ᤺ᤳᤋᤢᤱᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤡᤷᤕᤥᤋᤒᤠ ᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ ᤔᤥᤀᤠᤒᤧᤴ ᤜᤕᤱᤁᤡᤸᤗᤡᤱ. ᤕᤶᤒᤠ ᤌᤱ ᤀᤡᤰᤗᤠ ᤜᤧᤰᤁᤩᤠᤱ ᤌᤢᤳᤋᤢᤖᤡ᤺ᤵᤐᤠ ᤗᤠᤀᤡᤰᤐᤠ ᤀᤡᤰᤗᤠᤀᤥ ᤔᤧᤰᤗᤥ॥

³ ᤀᤠᤱᤃᤠ᤹ ᤂᤧᤸᤗᤧ ᤁᤢᤕᤢᤰᤛᤠᤒᤠᤜᤠ᤹ ᤔᤧᤰᤂᤢᤱᤛᤡᤱᤗᤥ ᤂᤶᤓᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤛᤧᤖᤢᤱᤛᤡᤱ᤹.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥

⁴ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤜᤢᤍᤠ᤺ᤸᤗᤧ ᤛᤢᤶᤛᤡ ᤁᤢᤗᤠᤕᤥᤜᤠ᤹ ᤀᤡᤃᤪ ᤗᤡᤛᤡᤀᤣ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤂᤧᤱᤜᤠ᤹ᤖᤧ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤏᤠ᤹ᤖᤢᤒᤠᤸᤗᤧ ᤆᤥᤃᤢᤸᤗᤧ. ᤂᤶᤓᤩᤠᤱ ᤂᤢᤏᤧ᤹ ᤁᤢᤎᤡᤶᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤍᤡᤶᤍᤢᤛᤡᤒᤠ ᤀᤡᤱᤗᤧᤰᤐᤠ ᤔᤠᤱᤜᤠ᤹ᤖᤧ ᤂᤧᤱᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ.

⁵ ᤀᤠᤱᤃᤠ᤹ ᤕᤜᤢᤍᤠᤀᤥ ᤔᤡ ᤁᤣ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤕᤖᤢᤛᤗᤧ᤺ᤶᤒᤠ ᤕᤰᤜᤠ᤹ ᤌᤩ᤺ᤱ ᤔᤡᤎᤡᤰᤂᤢᤖᤥ॥”

ᤀᤡᤛᤪᤠᤀᤡᤗᤀᤥ ᤂᤠᤛᤧᤴ

⁶ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤡᤛᤪᤠᤀᤡᤗᤖᤧ ᤛᤢᤶᤛᤡ ᤁᤢᤗᤠᤕᤥᤜᤠ᤹ᤖᤧ ᤀᤡᤃᤪ ᤗᤡᤛᤡᤀᤣ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤔᤧᤄᤧᤳᤋᤢᤱᤅᤡᤴᤗᤥ॥ ᤂᤧᤱᤜᤠ᤹ᤖᤧ ᤛᤠᤶᤕᤥᤒᤠᤜᤠ᤹ ᤕᤢᤵᤐᤠᤀᤥ ᤏᤢ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤁᤢᤃᤠᤵ ᤌᤡᤰ ᤗᤠᤱᤛᤢ᤺ᤵᤐᤥ ᤔᤧᤛᤱᤄᤢ ᤔᤧᤍᤣᤛᤢᤛᤡᤖᤥ॥

⁷ ᤂᤧᤱᤜᤠ᤹ᤖᤧ ᤂᤠᤶᤒᤠᤱᤅᤥᤒᤠ ᤂᤠᤶᤜᤡ᤺ᤰᤁᤡᤴ ᤔᤧᤍᤥ᤹ᤖᤢᤒᤠ ᤜᤧᤰᤁᤣ ᤕᤠᤱᤃᤧᤛᤠ᤹ᤒᤠᤜᤠ᤹ ᤂᤢᤴᤇᤡ᤹ ᤌᤧᤃᤣ᤺ᤰᤁᤥ ᤔᤧᤍᤥ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤵᤔᤠᤱᤒᤠ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤂᤧᤱᤜᤠ᤹ ᤂᤧᤶᤔᤠ ᤔᤧᤴᤍᤧᤏᤧᤴᤗᤥ॥ ᤁᤢᤶᤒᤠ ᤏᤢ ᤁᤢᤛ᤻ᤛᤠ ᤗᤳᤇᤠ ᤔᤧᤴᤇ᤻ᤕᤠᤀᤥ ᤐᤡᤳᤇᤡᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱᤅᤡᤴ ᤑᤧᤳᤗᤠ᤺ᤴᤇᤢᤖᤥ॥

⁸ ᤂᤧᤱᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤖᤧ ᤁᤢᤒᤣᤛᤠᤱ ᤛᤡᤱᤏᤠᤳ ᤁᤧᤍᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ᤀᤥ ᤔᤧᤏᤠ᤺ᤶᤛᤡᤱᤗᤥ॥ ᤛᤠᤶᤒᤠᤴ ᤜᤢᤱᤔᤠ ᤔᤧᤒᤠᤱᤄᤢᤛᤡᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤡᤶᤔᤥ ᤔᤧᤎᤢᤅᤢᤖᤥ॥

⁹ “ᤂᤡᤏᤡ᤹ ᤋᤃᤡᤗᤠᤶ ᤀᤣᤔᤥᤖᤡᤜᤠ᤹ ᤔᤧᤰᤂᤢᤱᤛᤡᤱᤗᤥ. ᤂᤧᤱᤜᤠ᤹ ᤛᤠᤶᤔᤠᤱᤛᤡᤱᤜᤠ᤹ ᤁᤢᤀᤡᤛᤡᤰ ᤁᤣ᤺ᤶᤒᤠ ᤏᤢ ᤕᤜᤡᤒᤠᤛᤡᤱ ᤕᤠᤖᤡᤰ ᤁᤧᤎᤢᤶᤒᤠ ᤔᤧᤈᤥᤃᤧᤖᤥ॥ ᤁᤖ ᤀᤠᤱᤃᤠ᤹ ᤁᤢᤛᤶᤎᤠᤱᤒᤠ ᤁᤢᤈᤠ᤹ᤜᤠ᤹ ᤏᤢ ᤁᤢᤒᤢᤱ ᤛᤡᤃᤠᤱ ᤗᤧᤵᤔᤠᤱᤒᤠ ᤛᤠ᤺ᤵᤜᤠ᤹ ᤔᤧᤰᤂᤢᤱᤗᤥ॥

¹⁰ ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤗ᤺ᤳᤏᤡᤱ ᤌᤠᤰᤏᤡᤱᤗᤥ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤂᤡᤏᤡ᤹ ᤗᤠᤶᤗᤥᤏᤡᤱᤗᤥ ᤜᤧᤰᤁᤩᤠᤱ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤂᤡᤏᤡ᤹ ᤐᤡᤏᤡᤱᤗᤥ॥

¹¹ ᤀᤠᤱᤃᤠ᤹ ᤂᤡᤏᤡ᤹ ᤕᤧᤶᤒᤡᤳᤇᤠ ᤛᤠᤜᤠ᤹ᤀᤥᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤢ ᤂᤡᤏᤡ᤹ ᤌᤠᤱᤒᤧᤴ ᤔᤏᤠᤜᤠ᤹ᤗᤠᤶ ᤏᤠᤈᤡᤖᤡᤜᤠ᤹ ᤛᤣᤃᤢᤱᤛᤡᤱ ᤗ᤺ᤳᤋᤢᤱᤛᤡᤱᤗᤥ॥ ᤀᤡᤛᤪᤠᤀᤡᤗᤒᤠ ᤔᤧᤴᤇᤠᤶ ᤕᤠᤵᤔᤡᤛᤣ. ᤌᤣ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠ ᤔᤣ᤺ᤶᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

¹² “ᤁᤖ ᤏᤠᤈᤡᤖᤡᤜᤠ᤹ ᤆᤧᤸᤗᤧᤰᤛᤣ᤹ ᤌᤡ ᤁᤧᤎᤢᤱᤄᤢᤶᤛᤡᤶᤗᤥ. ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ‘ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠᤖᤧᤶᤔᤡᤴᤏᤧ᤹’ ᤑᤠ᤹ᤀᤠᤱ ᤀᤡᤱᤈᤠᤱ ᤁᤧᤒᤡᤖᤢᤶᤛᤡᤶᤗᤥ॥

¹³ “ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤠᤸᤗ ᤆᤠ᤺ᤸᤗᤧ ᤛᤎᤧᤰ ᤁᤧᤍᤡᤶᤒᤠ ᤐᤡᤳᤗᤠᤎᤠ᤺ᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤕᤢ᤺ᤳᤏᤡᤱᤗᤥ॥

¹⁴ ᤁᤧᤛᤢ᤺ᤰᤐᤠᤖ ᤁᤧᤗᤥ᤺ᤰᤐᤠᤜᤠ᤹ ᤂᤧᤳᤇᤡᤱᤔᤠ ᤔᤧᤱᤄᤥᤏᤧᤴᤗᤥ. ᤜᤧᤰᤁᤩᤠᤱ ᤁᤧᤎᤢᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤰᤁᤧᤴ ᤗ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ. ᤔᤢᤰᤛᤠᤶᤛᤠᤒᤠᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤛᤰᤔᤠ ᤁᤣ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥

¹⁵ ᤗᤡᤃᤧᤕᤠᤱᤒᤠᤜᤠ᤹ ᤋᤰᤐᤧᤳ ᤕᤧᤵᤔᤠ ᤔᤧᤴᤇᤢᤰᤏᤧᤴᤗᤥ. ᤜᤧᤰᤁᤩᤠᤱ ᤁᤧᤈᤠᤵᤐᤠᤖ ᤁᤧᤗᤥ᤺ᤰᤐᤠᤜᤠ᤹ ᤛᤧ᤺ᤵᤛᤡᤱᤔᤠ ᤔᤧᤴᤇᤢᤰᤏᤧᤴᤗᤥ. ᤀᤴᤃᤧᤕᤢᤰᤐᤠᤜᤠ᤹ᤀᤠᤱ ᤛᤰᤔᤠ ᤐᤣ᤺ᤰᤔᤠᤗᤠᤶ ᤛᤧ᤺ᤵᤛᤡᤱᤔᤠ ᤔᤧᤴᤇᤢᤰᤏᤧᤴᤗᤥ॥

¹⁶ ᤁᤧᤖᤧᤰᤏᤢ᤺ᤸᤗᤧ ᤔᤧᤱᤃᤡᤔᤏᤠᤒᤠ ᤌᤰᤗᤡᤜᤠᤱᤜᤠ᤹ᤀᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤗᤧᤰᤆᤠ᤹ᤒᤢᤎᤢᤰ ᤔᤧᤄᤧᤳᤇᤡᤱ ᤔᤧᤄᤧᤳᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥