ᤛᤣ᤺ᤰᤕᤢᤰᤔᤡᤒᤠᤜᤠ᤹ 9 - LIFOTNT

ᤍᤔᤛ᤻ᤁᤛᤒᤠ ᤗᤠᤶᤔᤥ ᤛᤠᤘᤗᤖᤧ ᤕᤧᤛᤢᤴ ᤋᤢᤔᤢ᤹

^1-2 ᤁᤖ ᤍᤠᤱᤒᤠᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤧᤖᤧᤰ ᤛᤧᤵᤔᤠᤛᤡ ᤑᤠ᤹ᤀᤠᤱ ᤛᤠᤘᤗᤖᤧ ᤛᤠ᤹ᤖᤡᤰ ᤕᤱᤔᤠ ᤛᤧᤖᤢᤛᤡᤖᤥ॥ ᤂᤢᤏᤧ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤐᤣᤀᤠᤱ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤍᤠᤱᤒᤠᤸᤗᤧ ᤁᤢᤗᤠᤶ ᤁᤧᤍᤡᤶᤒᤠ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠᤜᤠ᤹ ᤐᤢᤱᤗᤠᤎᤠᤒᤠ ᤆᤥ᤺ᤰᤔᤠᤛᤡᤀᤠᤱ ᤕᤖᤢᤛᤗᤧᤶᤔᤥ ᤋᤠ᤺ᤵᤔᤠᤛᤡ ᤜᤧᤰᤁᤩᤠᤱ ᤂᤢᤶᤍᤡᤱ ᤐᤡᤔᤠᤛᤡ ᤛᤢᤰᤋᤢᤱᤗ ᤑᤠ᤹ᤀᤠᤱ ᤍᤔᤛ᤻ᤁᤛᤀᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤗᤠᤃᤡ ᤛᤰᤀᤡᤱᤄᤱ ᤛᤠᤵᤐᤠᤱᤄᤢᤛᤡᤖᤥ॥

³ ᤜᤧᤰᤁᤩᤠᤱ ᤂᤢᤏᤧ᤹ ᤍᤔᤛ᤻ᤁᤛᤖᤧ ᤁᤢᤒᤣᤛᤠᤱ ᤁᤧᤖᤧᤖ ᤐᤳᤇᤧᤸᤗᤧ ᤜᤰᤆᤄᤳ ᤋᤠᤱᤛᤠᤰᤐᤥᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤂᤢᤏᤧ᤹ ᤁᤢᤄᤡᤖᤡ ᤗᤧᤰᤋᤧᤖᤥ॥

⁴ ᤜᤧᤰᤁᤩᤠᤱ ᤂᤢᤏᤧ᤹ ᤂᤠᤶᤔᤥ ᤜᤷᤃᤢᤵ ᤆᤥ᤺ᤴᤍᤧᤀᤠᤱ ᤀᤡᤰᤗᤠᤎᤡᤰ ᤂᤧᤵᤛᤢ. “ᤛᤠᤘᤗᤀᤣ. ᤛᤠᤘᤗᤀᤣ. ᤀᤡᤱᤃᤠ᤹ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅”

⁵ ᤛᤠᤘᤗᤖᤧ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤂᤧᤏᤧ᤹ᤃ ᤜᤠ᤺ᤳᤏᤧᤴᤒᤣ᥅” ᤜᤧᤰᤁᤣ᤺ᤸᤗᤧ ᤀᤰᤂᤣᤗ᤹ᤖᤡᤰ ᤏᤥᤃᤵ ᤋᤩᤧ. “ᤀᤡᤱᤃᤠ᤹ᤃ ᤋᤢᤰᤂᤣ ᤁᤧᤈᤠ᤺ᤳᤋᤢᤖ ᤁᤧᤘᤠ᤹ᤒᤠ ᤕᤧᤛᤢᤀᤠᤖᤥ॥

⁶ ᤀᤠᤸᤗ ᤂᤧᤏᤧ᤹ ᤐᤥᤃᤧ᤹ᤀᤠᤱ ᤕᤧᤰᤕᤰᤁᤥ ᤐᤣᤃᤧ᤹॥ ᤂᤧᤵᤔᤥᤀᤣ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤐᤥᤱ ᤀᤡᤱᤃᤠ᤹ ᤔᤧᤳᤏᤧ᤹ᤖᤥ॥”

⁷ ᤀᤠᤸᤗ ᤛᤠᤘᤗᤏᤢ ᤗᤠᤶᤍᤡᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤌᤣᤀᤠᤱ ᤔᤧᤶᤒᤠ᤺ᤳᤋᤣ ᤔᤧᤕᤧᤒᤧ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤀᤡᤰᤗᤠᤴ ᤂᤧᤶᤔᤠᤃ ᤔᤧᤄᤧᤵᤛᤢ. ᤁᤖ ᤜᤠ᤺ᤳᤋᤠᤱ ᤔᤧᤴᤏᤡᤛᤢᤴᤗᤥ॥

⁸ ᤛᤠᤘᤗᤧᤴ ᤂᤠᤶᤔᤥᤗᤠᤶ ᤔᤢᤳᤌᤪᤡᤰ ᤐᤥᤃᤧ. ᤁᤖ ᤁᤢᤔᤡᤰᤁᤡᤴ ᤜᤴᤍᤢᤸᤗᤧ ᤌᤣᤀᤠᤱ ᤏᤡᤔᤠ ᤔᤧᤛᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤗᤠᤶᤍᤡᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤁᤢᤜᤢᤰᤁᤥ ᤔᤧᤍᤧᤶᤛᤢᤀᤠᤱ ᤔᤧᤀᤢ᤺ᤰᤂᤢᤖ ᤍᤔᤛ᤻ᤁᤛᤀᤥ ᤔᤧᤍᤣ᤹ᤖᤢᤖᤥ॥

⁹ ᤜᤧᤰᤁᤣᤗ᤹ᤖᤡᤰ ᤛᤢᤶᤕᤧᤴ ᤌᤠᤖᤡᤰ ᤌᤧᤔᤠᤀᤠᤱ ᤏᤡᤔᤠ ᤔᤧᤛᤢᤰᤋᤢᤴ ᤜᤧᤰᤁᤩᤠᤱ ᤌᤧᤔᤠᤀᤠᤱ ᤔᤧᤈᤏᤧᤴ. ᤔᤧᤎᤢᤅᤢᤴᤗᤥ॥

¹⁰ ᤀᤠᤸᤗ ᤍᤔᤛ᤻ᤁᤛᤀᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤜᤢ᤹ᤛᤠᤶᤒᤠᤎᤡᤰ ᤘᤕᤧ॥ ᤂᤧᤴ ᤛᤢᤑᤥᤀᤥ ᤍᤠᤱᤒᤠᤸᤗᤧ ᤀᤰᤂᤣ ᤔᤧᤳᤋᤢ. “ᤜᤏᤏᤡᤕᤠᤀᤣ᥄” ᤜᤏᤏᤡᤕᤠᤖᤧ ᤏᤥᤃᤵ ᤐᤡᤖᤢ. “ᤌᤧᤔᤠᤒᤣ. ᤀᤠᤍᤠᤱᤒᤣ᥅”

¹¹ ᤍᤠᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤋᤥ᤺ᤴᤍᤥᤴ ᤔᤧᤵᤔᤏᤠᤒᤠ ᤗᤠᤶᤔᤥ ᤕᤜᤢᤍᤠ᤺ᤸᤗᤧ ᤁᤢᤜᤡᤶᤔᤥ ᤐᤣᤃᤧ᤹॥ ᤂᤧᤵᤔᤥ ᤋᤠᤷᤛᤛᤒᤠ ᤛᤠᤘᤗ ᤔᤧᤵᤔᤏᤠᤒᤠ ᤔᤏᤠᤴ ᤘᤠ᤹ᤒᤡ ᤑᤠ᤹ᤀᤠᤱ ᤛᤣ᤺ᤴᤍᤥᤛᤧ᤹॥ ᤁᤴ ᤕᤧᤶᤔᤥ ᤂᤢᤏᤧ᤹ ᤂᤧᤵᤔᤥ ᤋᤢᤘᤠ ᤆᤥ᤺ᤰᤏᤢ ᤕᤢᤱᤗᤥ॥

¹² ᤂᤢᤏᤧ᤹ ᤛᤢᤑᤥᤀᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤔᤏᤠᤴ ᤋᤠᤀᤠᤱ ᤂᤢᤏᤧ᤹ ᤕᤠᤶᤔᤥ ᤏᤡᤔᤠ ᤛᤢᤰᤋᤢᤏᤡ ᤑᤠ᤹ᤀᤠᤱ ᤁᤢᤜᤢᤰᤜᤠ᤹ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢᤒᤡᤖᤢᤒᤠ ᤏᤡᤛᤢᤀᤠᤱ ᤘᤠ᤹ᤖᤥ॥”

¹³ ᤜᤏᤏᤡᤕᤠ᤺ᤸᤗᤧ ᤀᤳᤋᤢᤖ ᤏᤥᤃᤵ ᤐᤡᤖᤢ. “ᤁᤖ ᤀᤠᤍᤠᤱᤒᤣ. ᤂᤧᤸᤗᤧᤃ ᤕᤖᤢᤛᤗᤧᤶᤔᤥᤒᤠ ᤂᤧᤏᤧ᤹ ᤛᤣᤛᤣ ᤁᤧᤔᤏᤠᤜᤠ᤹ ᤕᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤀᤡᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹ᤀᤠᤖᤥ॥

¹⁴ ᤜᤧᤰᤁᤩᤠᤱ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤗᤠᤶ ᤕᤢᤰ ᤂᤥᤛᤢᤀᤠᤱ ᤂᤧᤏᤧ᤹ᤀᤥ ᤏᤛᤠᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤋᤧᤶᤔᤠᤛᤡ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤩᤧᤀᤠᤱ ᤘᤠ᤹ᤖᤥ॥”

¹⁵ ᤁᤖ ᤍᤠᤱᤒᤠᤸᤗᤧ ᤜᤏᤏᤡᤕᤠᤴ ᤔᤧᤳᤋᤢ. “ᤂᤧᤏᤧ᤹ ᤐᤣᤃᤧ᤹᥄ ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠᤴ ᤀᤡᤱᤃᤠ᤹ ᤀᤠᤛᤧᤘᤠ ᤆᤥᤃᤢᤏᤡ ᤑᤠ᤹ᤀᤠᤱ ᤛᤣᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤸᤗᤧᤃ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹. ᤜᤠᤱᤜᤠ᤹. ᤏᤢ ᤀᤡᤛᤪᤠᤀᤡᤗᤡᤜᤠ᤹ ᤀᤠᤔᤡᤱ ᤀᤡᤱᤓᤴ ᤆᤥᤃᤢᤛᤡ᤹ᤖᤥ॥

¹⁶ ᤀᤡᤱᤃᤠ᤹ ᤀᤠᤗᤠᤃᤡ ᤂᤧᤸᤗᤧ ᤀᤠᤰᤂᤧᤴ ᤋᤢᤰᤂᤣ ᤆᤠᤔᤠ ᤐᤥᤱ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤥᤛᤣ᤺ᤴᤎᤠᤰᤋᤢᤱᤗᤥ॥”

¹⁷ ᤜᤧᤰᤁᤩᤠᤱ ᤜᤏᤏᤡᤕᤠᤴ ᤂᤧᤴ ᤜᤡᤶᤔᤥ ᤐᤣᤀᤠᤱ ᤛᤠᤘᤗᤖᤧ ᤁᤢᤎᤧᤃᤣᤰ ᤛᤶᤍᤠᤱ ᤁᤢᤜᤢᤰᤜᤠ᤹ ᤏᤧᤛ᤻ᤛᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤠᤴᤛᤠ᤹ ᤛᤠᤘᤗᤀᤣ. ᤍᤠᤱᤒᤠ ᤕᤧᤛᤢᤖᤧ ᤀᤡᤱᤃᤠ᤹ ᤐᤠᤱᤄᤠᤱᤒᤠᤖᤥ॥ ᤂᤢᤏᤧ᤹ᤃ ᤁᤵᤔᤥ ᤍᤔᤛ᤻ᤁᤛᤀᤥ ᤁᤧᤍᤩᤧᤖ ᤁᤧᤒᤳᤇᤧᤸᤗᤧ ᤗᤠᤶᤔᤥ ᤂᤧᤏᤧ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤶᤔᤥ ᤏᤡᤔᤠ ᤁᤧᤛᤢᤰᤋᤢᤖ. ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤎᤢᤰᤗ ᤑᤠ᤹ᤀᤠᤱ ᤐᤠᤱᤄᤠᤱᤒᤠᤖᤥ॥”

¹⁸ ᤂᤡᤔᤥ ᤛᤠᤘᤗᤖᤧ ᤁᤢᤔᤡᤰᤁᤥᤗᤠᤶ ᤅᤠᤛᤣ᤺ᤰ ᤜᤧᤰᤋᤱᤒᤠ ᤔᤰᤌᤩᤧᤀᤠᤱ ᤂᤢᤏᤧ᤹ ᤕᤠᤶᤔᤥ ᤏᤡᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤐᤥᤃᤧᤀᤠᤱ ᤜᤏᤏᤡᤕᤠ᤺ᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤖᤥ॥

¹⁹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤠ ᤆᤀᤠᤱ ᤁᤢᤛᤰᤔᤠ ᤋᤩᤧᤖᤥ॥ ᤛᤠᤘᤗᤧᤴ ᤁᤢᤓᤠ ᤕᤧᤴ ᤌᤠᤖᤡᤰ ᤍᤔᤛ᤻ᤁᤛᤀᤥᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤘᤕᤧ॥

ᤛᤠᤘᤗᤖᤧ ᤍᤔᤛ᤻ᤁᤛᤀᤥ ᤛᤢᤏᤠᤀᤡᤱ ᤛᤧᤛᤢ᤹

²⁰ ᤂᤢᤏᤧ᤹ ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶ ᤜᤧᤱᤄᤠᤳᤋᤡ ᤐᤣᤀᤠᤱ ᤕᤧᤛᤢᤴ ᤏᤡᤱᤘᤠ᤹ᤑᤢᤛᤠᤖᤥ ᤑᤠ᤹ᤀᤠᤱ ᤂᤡᤔᤥ ᤀᤡᤱᤓᤴ ᤆᤥ᤺ᤰᤔᤠ ᤜᤣ᤺ᤰᤋᤢᤖᤥ॥

²¹ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠᤴ ᤁᤧᤄᤧᤶᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤇᤡᤱ. “ᤕᤖᤢᤛᤗᤧᤶᤔᤥ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤜᤶ ᤁᤧᤈᤥᤰᤐᤧᤴ ᤒᤠᤁᤴ ᤔᤏᤠᤴ ᤔᤣ᤺ᤶᤒᤡ᥅ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤋᤧᤶᤔᤠ ᤋᤣ᤹ᤔᤠᤛᤡ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤩᤧᤒᤠᤃ ᤔᤣ᤺ᤶᤒᤡ᥅”

²² ᤁᤖ ᤛᤠᤘᤗᤖᤧ ᤀᤠᤸᤗᤛᤠᤱ ᤔᤢᤰᤛᤠᤶ ᤁᤢᤎᤡᤶᤒᤠ ᤀᤡᤱᤓᤴ ᤛᤧᤛᤢᤖ ᤐᤣᤀᤠᤱ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹. ᤕᤧᤛᤢᤴ ᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤕᤠ᤺ᤴᤍᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵᤐᤣ ᤐᤡᤔᤠ ᤔᤧᤴᤇᤢᤰᤋᤢᤴᤗᤥ॥

²³ ᤜᤧᤰᤁᤩᤠᤱ ᤕᤖᤡᤰ ᤕᤧᤶ ᤀᤣᤃᤠᤱ ᤂᤧᤵᤔᤥᤒᤠ ᤕᤜᤢᤍᤡᤜᤠ᤹ᤖᤧ ᤛᤠᤘᤗᤧᤴ ᤛᤧᤵᤔᤠ ᤑᤠ᤹ᤀᤠᤱ ᤀᤡᤱᤔᤧᤍᤱᤄᤢ.

²⁴ ᤁᤖ ᤁᤴ ᤐᤠ᤺ᤴᤏᤡᤴ ᤛᤠᤘᤗᤖᤧ ᤏᤡᤱᤘᤠ᤹ ᤂᤥᤛᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤛᤧᤴᤍᤡᤰ ᤗᤧᤴᤍᤡᤰ ᤂᤢᤏᤧ᤹ ᤋᤧᤶᤔᤠᤀᤠᤱ ᤛᤧᤵᤔᤠ ᤑᤠ᤹ᤀᤠᤱ ᤕᤧᤰᤕᤰᤁᤥᤒᤠ ᤐᤕᤶ ᤗᤠᤶᤎᤣ᤺ᤵᤜᤠ᤹ᤀᤥ ᤔᤧᤛᤢᤃᤢᤖᤥ॥

²⁵ ᤁᤖ ᤌᤡᤰ ᤛᤧᤴᤍᤡᤰ ᤛᤠᤘᤗᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤠᤵᤐᤥᤀᤥ ᤔᤧᤕᤠᤰᤋᤢᤀᤠᤱ ᤕᤧᤰᤕᤰᤁᤡᤸᤗᤧ ᤗᤢᤱᤎᤠᤰ ᤗᤠ᤺ᤰᤁᤠᤳ ᤀᤡᤍᤠ᤺ᤰᤁᤡᤸᤗᤧ ᤔᤧᤓᤥᤴᤍᤢ ᤔᤧᤎᤠᤛᤢᤀᤠᤱ ᤔᤧᤄᤧᤳᤋᤢ ᤔᤧᤍᤣᤛᤢᤖᤥ॥

²⁶ ᤛᤠᤘᤗᤧᤴ ᤕᤖᤢᤛᤗᤧᤔ ᤐᤣᤀᤠᤱ ᤂᤧᤵᤔᤥᤒᤠ ᤜᤢ᤹ᤛᤠᤶᤒᤠᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤠ᤹ᤖᤡᤰ ᤔᤧᤃᤡᤖᤢ ᤜᤧᤰᤁᤩᤠᤱ ᤂᤢᤏᤧ᤹ ᤜᤢ᤹ᤛᤠᤶᤒᤠ ᤑᤠ᤹ᤀᤠᤱ ᤁᤢᤏᤠᤛᤠ᤹ᤔᤠᤀᤣ ᤔᤧᤴᤇᤢᤰᤋᤢᤴᤗᤥ॥

²⁷ ᤁᤖ ᤒᤖᤏᤠᤒᤠᤛᤧᤴ ᤋᤩᤧᤀᤠᤱ ᤛᤠᤘᤗᤧᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤋᤠᤖᤢᤀᤠᤱ ᤀᤠᤰᤂᤣᤗ᤹ᤖᤡᤰ ᤛᤠᤘᤗᤖᤧ ᤍᤔᤛ᤻ᤁᤛ ᤐᤣ᤺ᤰᤔᤠ ᤗᤠᤶᤔᤥ ᤍᤠᤱᤒᤠᤴ ᤋᤢᤔᤢ ᤜᤧᤰᤁᤩᤠᤱ ᤍᤠᤱᤒᤠᤴ ᤂᤢᤏᤧ᤹ᤏᤢ ᤐᤠᤖᤧ. ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰ ᤍᤔᤛ᤻ᤁᤛᤀᤥ ᤔᤧᤱᤃᤡᤀᤣ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤘᤗᤖᤧ ᤀᤡᤱᤓᤴ ᤛᤧᤛᤢ ᤁᤧᤗ᤹ᤒᤠᤴ ᤁᤠᤰ ᤆᤧᤰᤋᤢᤛᤡᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤠ᤺ᤰᤋᤢᤖᤥ॥

²⁸ ᤜᤧᤰᤁᤩᤠᤱ ᤛᤠᤘᤗᤧᤴ ᤂᤧᤱᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ ᤜᤣ᤺ᤰᤋᤧᤀᤠᤱ ᤕᤖᤢᤛᤗᤧᤔ ᤂᤠᤖᤠᤰ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤔᤧᤱᤃᤡᤀᤣ ᤀᤡᤱᤓᤴ ᤆᤥᤃᤢᤖᤥ॥

²⁹ ᤜᤧᤰᤁᤩᤠᤱ ᤃᤪᤡᤁ ᤁᤧᤒᤠ᤺ᤵᤐᤠ ᤕᤜᤢᤍᤡᤜᤠ᤹ᤏᤢᤀᤠᤱ ᤐᤠ᤺ᤴᤎᤰᤋᤧ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤑᤠ᤹ᤀᤠᤱ ᤗᤠᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧ॥

³⁰ ᤁᤴ ᤐᤠ᤺ᤴᤏᤡᤴ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤔᤧᤍᤣ᤹ᤖᤢ॥ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤛᤠᤘᤗᤧᤴ ᤋᤠᤷᤛᤛ ᤕᤧᤰᤕᤰ ᤗᤧᤵᤔᤠᤱ ᤘᤠᤗᤠᤎᤠᤗᤠᤶ ᤔᤧᤒᤠᤱᤄᤢ ᤔᤧᤍᤣᤛᤢᤖᤥ॥

³¹ ᤜᤧᤰᤁᤩᤠᤱ ᤕᤜᤢᤍᤡᤕᤠ. ᤃᤠᤗᤡᤗ. ᤏᤢ ᤛᤠᤔᤖᤡᤕᤠᤀᤥᤛᤔᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤏᤡᤱᤄᤢᤶ ᤐᤥᤱᤔᤠ ᤆᤰ ᤌᤩᤧᤀᤠᤱ ᤕᤧᤶᤕᤧᤶᤘᤠ ᤋᤩᤧ॥ ᤂᤧᤱᤜᤠ᤹ᤖᤧ ᤍᤠᤱᤒᤠᤴ ᤛᤠ᤹ᤖᤡᤰ ᤀᤡᤱᤎᤠᤱ ᤔᤧᤒᤡ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡᤀᤠᤱ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤖ ᤂᤧᤱᤜᤠ᤹ ᤔᤧᤒᤥᤖᤧᤖ ᤔᤧᤒᤣᤖᤥ॥

ᤀᤣᤏᤡᤕᤠᤛᤧᤴ ᤘᤣ᤺ᤳ

³² ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤠᤶᤍᤡᤰ ᤆᤥᤃᤧᤖ ᤗᤡᤍ᤻ᤍᤠᤒᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤛᤠ᤹ᤖᤢᤛᤡᤖᤥ॥

³³ ᤂᤧᤵᤔᤥ ᤀᤣᤏᤡᤕᤠᤛ ᤔᤧᤵᤔᤏᤠᤒᤠ ᤋᤱᤒᤣ ᤕᤧᤳᤇᤡᤀᤠᤱᤎᤥ (᥎) ᤗᤱᤗᤧ᤺ᤱ ᤋᤢᤰᤔᤠᤸᤗᤧ ᤋᤖᤢᤀᤠᤱ ᤏᤧᤳᤏᤠᤀᤥᤖᤰ ᤁᤧᤏᤧᤒᤠ ᤔᤏᤠᤴ ᤋᤢᤔᤢ॥

³⁴ ᤐᤋᤪᤢᤛᤖᤧ ᤂᤧᤴ ᤔᤧᤳᤋᤢ. “ᤀᤣᤏᤡᤕᤠᤛᤣ. ᤕᤧᤛᤢ ᤂᤪᤡᤛ᤻ᤋᤖᤧ ᤁᤧᤘᤣ᤺ᤴᤗᤥ॥ ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠᤴ ᤑᤥ᤺ᤰᤂᤧ᤹ᤀᤥ᥄” ᤂᤡᤔᤥ ᤂᤧᤴ ᤔᤢᤳᤌᤪᤡᤰ ᤐᤥᤃᤧ॥

³⁵ ᤜᤧᤰᤁᤩᤠᤱ ᤗᤡᤍ᤻ᤍᤠ ᤕᤧᤰᤕᤰᤁᤥ ᤏᤢ ᤛᤠᤖᤥᤏ ᤋᤧᤶᤒᤣ᤹ᤀᤥ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤔᤏᤠᤴ ᤘᤣ᤺ᤳᤋᤧᤒᤠ ᤔᤧᤏᤡᤛᤢᤀᤠᤱ ᤍᤠᤱᤒᤠ ᤗᤧᤵᤔᤠᤱ ᤔᤧᤜᤡᤛᤡᤱᤗᤥ॥

ᤐᤋᤪᤢᤛᤖᤧ ᤋᤒᤡᤳᤋᤠᤴ ᤘᤣ᤺ᤴᤍᤢ᤹

³⁶ ᤜᤧᤰᤁᤩᤠᤱ ᤈᤥᤵᤐᤠ ᤕᤧᤰᤕᤰᤁᤥ ᤋᤒᤡᤋᤠ ᤔᤡᤱ ᤁᤧᤘᤠ᤺ᤵᤔᤠ ᤜᤢ᤹ᤛᤠᤶᤔᤠ ᤌᤡᤰ ᤘᤕᤧ॥ (ᤂᤧᤸᤗᤧ ᤁᤢᤔᤡᤱ ᤃᤪᤡᤰᤁᤥ ᤍᤥᤖᤁᤠᤛ ᤘᤕᤧ—ᤂᤧᤴ ᤑᤠ᤹ᤀᤡᤴ ᤐᤧ᤺ᤱᤘᤠ ᤐᤥᤱᤗᤥ॥) ᤂᤧᤴ ᤛᤍᤠᤍᤡᤱ ᤘᤣ᤹ᤜᤠ᤹ᤖᤧ ᤗᤠᤃᤡ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤓᤠ᤹ᤔᤠ ᤘᤕᤧᤖᤥ॥

³⁷ ᤂᤢᤏᤧ᤹ ᤂᤧᤴ ᤕᤧᤶᤔᤥ ᤋᤢᤃᤧᤀᤠᤱ ᤛᤩᤧ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤘᤠᤔᤧᤜᤵᤋᤢᤀᤠᤱ ᤌᤥᤛᤔᤠ ᤕᤠᤰᤑᤠᤀᤥ ᤔᤧᤍᤣ᤹ᤖᤢᤀᤠᤱ ᤔᤧᤏᤧᤛ᤻ᤛᤢᤖᤥ॥

³⁸ ᤈᤥᤵᤐᤠ ᤕᤧᤰᤕᤰᤁᤡᤴ ᤗᤡᤍ᤻ᤍᤠ ᤕᤧᤰᤕᤰᤗᤠᤶ ᤔᤧᤔᤠ᤺ᤰᤂᤧᤴ. ᤜᤧᤰᤁᤣ᤺ᤸᤗᤧ ᤜᤢ᤹ᤛᤠᤶᤒᤠᤜᤠ᤹ᤖᤧ ᤐᤋᤪᤢᤛᤧᤴ ᤗᤡᤍ᤻ᤍᤠᤀᤥ ᤘᤠ᤹ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤏᤧᤵᤑᤢ ᤔᤏᤠᤜᤠ᤹ ᤁᤢᤗᤠᤛᤧ ᤔᤧᤒᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤧᤳᤇᤡᤀᤠᤱ ᤐᤋᤪᤢᤛᤧᤴ. “ᤀᤠᤍᤠᤱᤒᤣ. ᤜᤠᤖᤠ᤹ ᤈᤥᤵᤐᤠᤀᤥ ᤑᤧᤖᤧ᤹ᤀᤥ.” ᤔᤧᤳᤋᤧᤇᤢᤖ ᤐᤣᤗᤡ ᤑᤠᤰᤋᤧᤳᤇᤢᤖᤥ॥

³⁹ ᤂᤧᤸᤗᤧᤆᤥᤃᤢᤸᤗᤧ ᤐᤋᤪᤢᤛᤧᤴᤏᤠᤱ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤏᤢ ᤈᤥᤵᤐᤠᤀᤥ ᤐᤣ॥ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤖᤧᤏᤢᤔᤧ᤺ᤴᤏᤣ ᤂᤢᤏᤧ᤹ ᤌᤥᤛᤔᤠ ᤕᤠᤰᤑᤠᤀᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤔᤣᤔᤣᤍᤢᤔᤠᤜᤠ᤹ ᤐᤋᤪᤢᤛᤖᤧ ᤁᤢᤄᤡᤖᤡ ᤔᤧᤕᤧᤒᤧᤀᤠᤱ ᤍᤥᤖᤁᤠᤛᤖᤧ ᤁᤢᤜᤡᤱᤘᤧᤳ ᤘᤕᤧᤸᤗᤧ ᤋᤕᤢᤒᤠ ᤋᤣ᤺ᤵᤑᤢᤱᤜᤠ᤹ ᤀᤥᤛᤣ᤺ᤴᤔᤧᤎᤠᤰᤋᤢᤖ ᤔᤧᤜᤠᤒᤧ॥

⁴⁰ ᤐᤋᤪᤢᤛᤧᤴ ᤐᤣᤀᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤠᤰᤑᤠᤗᤠᤶ ᤗᤠ᤺ᤰᤁᤠᤳ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤂᤢᤏᤧ᤹ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤋᤢᤘᤠ ᤆᤥᤃᤢᤀᤠᤱ ᤂᤧᤴ ᤁᤧᤛᤡᤔᤠ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢ. “ᤋᤒᤡᤋᤠᤀᤣ. ᤐᤥᤃᤧ᤹ᤀᤥ॥” ᤂᤧᤸᤗᤧ ᤁᤢᤔᤡᤰᤜᤠ᤹ ᤜᤴᤍᤢ. ᤜᤧᤰᤁᤩᤠᤱ ᤐᤋᤪᤢᤛᤧᤴ ᤏᤡᤛᤢ ᤜᤧᤰᤁᤩᤠᤱ ᤐᤥᤃᤧᤀᤠᤱ ᤕᤢᤱᤛᤡᤱᤗᤥ॥

⁴¹ ᤐᤋᤪᤢᤛᤖᤧ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ ᤕᤧᤵᤛᤢ ᤜᤧᤰᤁᤩᤠᤱ ᤔᤣᤔᤣᤍᤢᤔᤠᤜᤠ᤹ ᤏᤢ ᤘᤣ᤹ ᤏᤛᤠᤏᤡᤒᤠᤜᤠ᤹ ᤐᤋᤪᤢᤛᤖᤧ ᤀᤢ᤺ᤳᤋᤢᤛᤡᤀᤠᤱ ᤂᤧᤴ ᤜᤢᤰᤛᤢᤵᤋᤢᤛᤡᤖᤥ॥

⁴² ᤜᤧᤰᤁᤩᤠᤱ ᤈᤥᤵᤐᤠ ᤂᤠᤖᤠᤰ ᤁᤴ ᤐᤠ᤺ᤴᤏᤡᤴ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤕᤖᤡᤰᤗᤧ ᤍᤠᤱᤒᤠᤴ ᤏᤛᤠᤴ ᤔᤧᤈᤥᤃᤢᤖᤥ॥

⁴³ ᤐᤋᤪᤢᤛᤧᤴ ᤈᤥᤵᤐᤠᤀᤥ ᤁᤢᤓᤠ ᤕᤧᤶ ᤛᤧᤜᤥᤒᤠᤸᤗᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤕᤠ᤺ᤰᤋᤧᤖᤥ॥