ᤛᤣ᤺ᤰᤕᤢᤰᤔᤡᤒᤠᤜᤠ᤹ 8 - LIFOTNT

ᤛᤠᤘᤗᤖᤧ ᤛᤣᤛᤣᤜᤢᤵᤗᤰᤁᤡᤴ ᤋᤢᤰᤂᤣ ᤆᤠ᤺ᤳᤋᤢ᤹

^1-2 ᤂᤧᤵᤔᤥ ᤛᤠᤘᤗᤖᤧᤀᤠᤱ ᤛ᤻ᤋᤡᤑᤏᤛᤖᤧ ᤁᤢᤛᤡᤔᤧᤴᤏᤥ ᤋᤧᤴᤍᤡᤱ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤔᤡᤱᤛᤥᤍᤠᤱᤒᤠ ᤛᤠᤶᤕᤥᤛᤠᤒᤠ ᤔᤏᤠᤜᤠ᤹ᤖᤧ ᤛ᤻ᤋᤡᤑᤏᤛᤧᤴ ᤔᤧᤜᤢᤶᤛᤢ ᤔᤧᤛᤢᤖᤢᤀᤠᤱ ᤛᤠ᤹ᤖᤡᤰ ᤔᤧᤖᤡᤱ ᤔᤧᤎᤰᤋᤧᤖᤥ॥ ᤂᤧᤴ ᤕᤧᤴᤏᤠᤱᤎᤥ ᤕᤖᤢᤛᤗᤧᤶᤔᤥᤒᤠ ᤛᤣᤛᤣᤜᤢᤵᤗᤰᤁᤥ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤵᤔᤠ ᤔᤧᤜᤣ᤺ᤰᤋᤢᤛᤡᤖᤥ॥ ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤘᤣ᤹ ᤁᤠᤰ ᤏᤛᤠᤏᤡᤒᤠᤜᤠ᤹ ᤕᤜᤢᤍᤡᤕᤠ ᤏᤢ ᤛᤠᤔᤖᤡᤕᤠ ᤋᤧᤱᤃᤵ ᤗᤧᤵᤛᤠᤱ ᤔᤧᤛᤧᤖᤧ ᤔᤧᤒᤣᤖᤥ॥

³ ᤁᤖ ᤛᤠᤘᤗᤖᤧ ᤛᤣᤛᤣᤜᤢᤵᤗᤰᤁᤡᤴ ᤔᤧᤶᤓᤤ ᤆᤥ᤺ᤰᤔᤠ ᤜᤣ᤺ᤰᤋᤢ॥ ᤂᤢᤏᤧ᤹ ᤜᤡᤶᤜᤡᤶ ᤐᤣᤀᤠᤱ ᤏᤛᤠᤴ ᤁᤧᤈᤥ᤺ᤰᤐᤠ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ ᤋᤧᤶᤛᤢᤛᤡᤀᤠᤱ ᤀᤢ᤺ᤰᤂᤢᤛᤡᤖ ᤐᤢᤱᤗᤠᤜᤡᤶᤔᤥ ᤌᤧᤰᤋᤢᤛᤡᤖᤥ॥

ᤛᤠᤔᤖᤡᤕᤠᤀᤥ ᤛᤢᤏᤠᤀᤡᤱ ᤛᤧ᤹᤺

⁴ ᤕᤖᤢᤛᤗᤧᤔᤗᤠᤶ ᤁᤧᤛᤧᤒᤠᤖ ᤁᤧᤒᤣ᤺ᤰᤐᤠᤜᤠ᤹ᤖᤧ ᤀᤠᤳᤋᤡ ᤔᤧᤒᤣᤛᤠᤱ ᤛᤢᤏᤠᤀᤡᤱ ᤔᤧᤛᤧᤛᤢᤖᤥ॥

⁵ ᤑᤡᤗᤡᤵᤐᤧᤴᤏᤠᤱ ᤛᤠᤔᤖᤡᤕᤠᤛᤔᤠ ᤕᤧᤰᤕᤰᤁᤥ ᤐᤣᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ ᤕᤧᤛᤢᤴ ᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤀᤡᤱᤓᤥᤛᤢᤖᤥ॥

⁶ ᤑᤡᤗᤡᤐᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡᤛᤢᤸᤗᤧ ᤔᤏᤠᤜᤠ᤹ᤖᤧ ᤏᤢᤖᤡᤰᤁᤠᤱ ᤁᤢᤒᤠ᤺ᤴᤏᤥ ᤏᤡᤱᤘᤠ᤹ ᤔᤧᤒᤡᤖᤢᤖᤥ॥

⁷ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤀᤥᤏᤢ ᤑᤧᤴᤛᤠᤶᤜᤠ᤹ ᤔᤧᤓᤡ᤺ᤰᤋᤧᤖ ᤔᤧᤗ᤺ᤴᤍᤧ ᤔᤧᤒᤣ. ᤜᤧᤰᤁᤩᤠᤱ ᤕᤖᤡᤰ ᤗᤱᤗᤧ᤺ᤱᤘᤠᤜᤠ᤹ ᤏᤢ ᤗᤠᤱᤛᤰᤐᤠᤜᤠ᤹ᤀᤠᤱ ᤔᤧᤏᤢᤖᤧᤖᤥ॥

⁸ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤰᤕᤰᤁᤥ ᤐᤕᤶ ᤛ᤺ᤵᤔᤠ ᤏᤢ ᤀᤥᤔᤢᤗ᤹ᤔᤠᤴ ᤋᤩᤧᤖᤥ॥

⁹ ᤀᤠᤸᤗ ᤋᤃᤡᤀᤠᤱᤎᤥ ᤂᤧᤴ ᤕᤧᤰᤕᤰᤁᤥ ᤛᤡᤔᤥᤏ ᤔᤧᤵᤔᤏᤠᤒᤠ ᤁᤡᤳᤆᤠᤰᤌᤡᤰ ᤘᤕᤧ॥ ᤂᤧᤸᤗᤧ ᤁᤡᤳᤆᤠᤰ ᤕᤠ᤺ᤶᤒᤰ ᤆᤥᤃᤢᤀᤠᤱ ᤛᤠᤔᤖᤡᤕᤠᤛᤔᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤠᤛᤢ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ ᤂᤧᤸᤗᤧᤃ ᤀᤠᤒᤠᤅᤣ ᤀᤡᤱᤃᤠ᤹ᤀᤣ ᤐᤕᤶ ᤕᤶᤒᤠᤀᤠ ᤑᤠ᤹ᤀᤠᤱ ᤀᤠᤱᤍᤡᤱ ᤗ᤹ᤖᤧᤀᤠᤱ ᤘᤕᤧᤖᤥ॥

¹⁰ ᤜᤧᤰᤁᤩᤠᤱ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤕᤶᤒᤠ ᤆᤢᤰᤐᤠ ᤁᤧᤖᤧᤰᤗᤧ ᤁᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤁᤢᤔᤢᤰᤛᤠᤶ ᤁᤳᤋᤢᤖᤥ ᤗ᤹ᤖᤡᤰ ᤂᤧᤴ ᤔᤧᤔᤧᤳᤋᤢᤀᤠᤱ ᤔᤧᤘᤕᤧᤖᤥ॥

¹¹ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤕᤖᤡᤰ ᤋᤱᤒᤣᤀᤠᤱᤎᤥ ᤂᤢᤏᤧ᤹ ᤁᤢᤃᤡᤳᤆᤠᤰ ᤔᤢᤴᤎᤢᤶᤔᤡᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤠᤛᤢ ᤐᤡᤖᤢᤛᤡᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤔᤧᤒᤳᤇᤧᤖᤥ॥

¹² ᤁᤖ ᤂᤧᤴ ᤔᤏᤠᤜᤠ᤹ᤖᤧ ᤑᤡᤗᤡᤐᤖᤧ ᤀᤡᤱᤓᤥᤛᤢᤒᤠ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤏᤢ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤔᤧᤈᤥᤃᤢᤀᤠᤱ ᤕᤧᤶᤒᤡᤳᤇᤠ᤹ ᤔᤧᤴᤇᤢᤔᤠ᤹ ᤁᤠᤰ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥

¹³ ᤛᤡᤔᤥᤏᤖᤧᤀᤠᤱ ᤀᤠᤒᤠᤅᤣ ᤏᤛᤠᤴ ᤆᤥᤃᤢᤀᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤑᤡᤗᤡᤐᤏᤢ ᤘᤕᤧᤃᤳᤋᤧᤸᤗᤧ ᤑᤡᤗᤡᤐᤖᤧ ᤆᤥᤃᤢᤒᤠ ᤕᤖᤡᤰ ᤐᤖᤡᤰᤗᤧᤴ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤏᤡᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤕᤧᤖᤥ॥

¹⁴ ᤜᤧᤰᤁᤩᤠᤱ ᤕᤖᤢᤛᤗᤧᤶᤔᤥᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤛᤠᤔᤖᤡᤕᤠᤛᤔᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤋᤧᤴᤍᤡᤱ ᤔᤧᤈᤥᤃᤢ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤴ ᤂᤧᤵᤔᤥ ᤔᤧᤒᤠᤱᤄᤢᤛᤡᤖᤥ॥

¹⁵ ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤠᤔᤖᤡᤕᤠᤀᤥ ᤁᤧᤖᤧᤳᤇᤡᤀᤠᤱ ᤏᤛᤠᤏᤡᤒᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤏᤡ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢ ᤐᤡᤖᤧᤳᤇᤢᤖᤥ.

¹⁶ ᤌᤣᤀᤠᤱᤓᤧᤸᤗᤧ ᤀᤠᤸᤗᤥ ᤌᤠᤖᤡᤰ ᤏᤛᤠᤏᤡᤒᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴ ᤔᤧᤱᤄᤥᤀᤣ ᤔᤧᤘᤕᤧ. ᤁᤖ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥᤖᤰ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥

¹⁷ ᤜᤧᤰᤁᤩᤠᤱ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤛᤠᤔᤖᤡᤕᤠᤛᤔᤠ ᤏᤛᤠᤏᤡᤒᤠᤜᤠ᤹ ᤛᤶᤍᤠᤱ ᤏᤧᤛ᤻ᤛᤢ ᤐᤡᤖᤧᤳᤇᤢᤀᤠᤱ ᤂᤧᤱᤜᤠ᤹ᤖᤧ ᤛᤣᤛᤣᤔᤠᤱ ᤔᤧᤄᤥᤛᤢᤖᤥ॥

¹⁸ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤴ ᤏᤧᤛ᤻ᤛᤧᤳᤇᤢᤸᤗᤧ ᤔᤏᤠᤜᤠ᤹ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤒᤠ ᤛᤡᤔᤥᤏᤖᤧᤀᤠᤱ ᤏᤡᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤱ ᤐᤡᤖᤢᤛᤡᤖ

¹⁹ ᤀᤰᤂᤣ ᤔᤧᤳᤋᤢᤛᤡ. “ᤔᤏᤠᤛᤶᤍᤠᤱ ᤀᤡᤱᤃᤠ᤹ᤀᤠᤱ ᤀᤠᤜᤢᤰ ᤏᤧᤛ᤻ᤛᤢᤱ ᤐᤡᤖᤢᤱᤛᤡᤱᤅᤡᤸᤗᤧ ᤜᤠᤖᤠ᤹ ᤛᤣᤛᤣᤔᤠᤱᤅᤡᤴ ᤔᤧᤄᤥᤛᤢᤏᤡ ᤑᤠ᤹ᤀᤠᤱ ᤁᤴ ᤔᤢᤰᤛᤠᤶᤔᤡᤴ ᤕᤠᤵᤔᤡ ᤀᤠᤒᤡᤖᤧᤳᤇᤧ᤹ᤀᤥ॥”

²⁰ ᤁᤖ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤁᤧᤕᤠᤱᤅᤡᤴ ᤂᤧᤏᤧ᤹ᤏᤢᤀᤣ ᤔᤧᤰᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤷᤎᤠ᤺ᤶᤔᤡᤴ ᤕᤠᤱᤅᤡᤸᤗᤧ ᤀᤡᤱᤔᤠ ᤁᤧᤀᤡ᤺ᤳᤋᤢ᤹ᤖᤥ॥

²¹ ᤂᤧᤏᤧ᤹ᤃ ᤁᤴ ᤛᤣᤘᤠᤀᤥ ᤗᤰ ᤂᤥᤔᤠ ᤏᤢ ᤁᤵᤔᤠ ᤌᤣᤀᤠᤱ ᤁᤧᤴᤇᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤡᤰᤗᤢᤱᤔᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤏᤢᤒᤠ ᤜᤥᤵᤗᤥ॥

²² ᤜᤧᤰᤁᤣ᤺ᤸᤗᤧ ᤁᤧᤓᤧᤴ ᤏᤡᤱᤘᤠ᤹ᤀᤥᤗᤠᤶ ᤜᤡᤴᤍᤧ᤹ᤀᤠᤱ ᤍᤠᤱᤒᤠᤴᤏᤢ ᤋᤢᤘᤠ ᤆᤥᤃᤧ᤹ᤀᤥ॥ ᤜᤧᤰᤋᤱᤒᤠ ᤑᤧᤴ ᤏᤡᤱᤘᤠ᤹ᤀᤥᤗᤠᤶ ᤗᤧᤵᤔᤡ ᤁᤧᤄᤥᤛᤢᤒᤡ᥄

²³ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤏᤠᤜᤧᤶᤔᤠᤸᤗᤧ ᤁᤢᤎᤡᤶ ᤏᤢ ᤗᤠᤕᤥ ᤀᤡᤛᤣ᤺ᤱᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤧᤕᤢᤰᤋᤧᤒᤠᤴ ᤀᤡᤱᤃᤠ᤹ ᤏᤡᤏᤧᤖᤥ॥”

²⁴ ᤜᤧᤰᤁᤩᤠᤱ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢᤛᤡ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤀᤠᤳᤋᤡᤴ ᤐᤠ᤺ᤴᤜᤠ᤹ᤀᤠᤱ ᤀᤡᤱᤃᤠ᤹ ᤀᤠᤛᤶᤍᤠᤱ ᤔᤧᤈᤢᤰᤏᤧᤴᤗ ᤑᤠ᤹ᤀᤠᤱ ᤍᤠᤱᤒᤠᤴᤏᤢ ᤀᤡᤱᤃᤠ᤹ ᤀᤠᤗᤠᤃᤡ ᤋᤢᤘᤠ ᤆᤥᤃᤧ ᤀᤠᤒᤡᤖᤧᤳᤇᤧ᤹ᤀᤥ॥”

²⁵ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤆᤧᤰᤂᤧᤳᤇᤢᤖ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰ ᤀᤡᤱᤓᤴ ᤆᤥᤃᤧᤳᤇᤢᤀᤠᤱ ᤕᤢᤜᤢᤴᤏᤠᤴ ᤏᤢ ᤐᤋᤪᤢᤛᤧᤴ ᤕᤖᤢᤛᤗᤧᤔ ᤗᤧᤵᤔᤠᤱ ᤏᤢ᤺ᤰᤂᤧᤳᤇᤡᤸᤗᤧ ᤗᤠᤶᤔᤥᤒᤠ ᤕᤖᤡᤰ ᤛᤠᤔᤖᤡᤕᤠᤛᤔᤠ ᤐᤠᤱᤓᤣ᤹ᤜᤠ᤹ᤀᤥ ᤛᤢᤏᤠᤀᤡᤱ ᤛᤧᤛᤧᤳᤇᤢᤖᤥ॥

ᤑᤡᤗᤡᤵᤐᤧᤴ ᤏᤢ ᤀᤡᤌᤡᤕᤥᤐᤡᤕᤠ ᤗᤠᤈᤣ᤹ᤒᤠ ᤔᤏᤠᤴ

²⁶ ᤌᤡᤰᤕᤧᤴ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤸᤗᤧ ᤑᤡᤗᤡᤵᤐᤧᤴ ᤀᤰᤂᤣ ᤔᤧᤳᤋᤢ. “ᤕᤖᤢᤛᤗᤧᤔᤗᤠᤶ ᤕᤥ ᤗᤠᤱᤃᤧᤴ ᤗᤧᤵᤔᤠᤱᤒᤠ ᤃᤠᤈᤠ ᤁᤧᤒᤣ᤺ᤰᤐᤠ ᤕᤧ᤺ᤱᤄᤠᤍᤧᤴᤒᤠ ᤔᤠᤖᤠᤶᤔᤥ ᤐᤣᤃᤧ᤹॥”

²⁷ ᤜᤧᤰᤁᤣ᤺ᤸᤗᤧ ᤑᤡᤗᤡᤵᤐᤧᤴᤏᤠᤱ ᤂᤧᤵᤔᤥ ᤌᤠᤛᤡᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤌᤡᤕᤥᤐᤡᤕᤠᤛᤔᤠ ᤛᤧᤓᤰᤐᤠ ᤕᤶᤒᤠ ᤛᤢᤜᤠᤱᤕᤢᤰᤐᤧᤴ ᤋᤢᤔᤢ॥ ᤂᤧᤴ ᤀᤡᤌᤡᤕᤥᤐᤡᤕᤠᤛᤔᤠ ᤜᤠᤱᤔᤠ ᤁᤴᤍᤠᤁᤡᤖᤧ ᤁᤢᤕᤠᤱᤛᤠᤁᤢᤴᤎᤣ ᤀᤥᤃᤧᤔᤧᤵᤐᤠ ᤛᤢᤜᤠᤱᤕᤢᤰᤐᤠ ᤘᤕᤧᤖᤥ॥ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤛᤧᤘᤠ ᤆᤥ᤺ᤰᤛᤧ ᤐᤣᤀᤠᤱ ᤘᤕᤧᤖᤥ॥

²⁸ ᤜᤧᤰᤁᤩᤠᤱ ᤀᤴᤗᤠᤀᤥ ᤕᤢᤱᤛᤡᤱᤅᤠᤱ ᤁᤢᤜᤡᤶᤔᤥ ᤏᤢ᤺ᤰᤂᤧᤖ ᤐᤳᤇᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤵᤐᤴᤏᤡᤴ ᤏᤡᤖᤢᤖ ᤕᤢᤅᤧ॥

²⁹ ᤛᤣᤛᤣᤔᤠᤱᤅᤡᤸᤗᤧ ᤑᤡᤗᤡᤵᤐᤧᤴ ᤔᤧᤳᤋᤢ. “ᤀᤴᤗᤠ᤺ᤸᤗᤧ ᤁᤢᤒᤣᤛᤠᤱ ᤐᤣᤃᤧ᤹॥”

³⁰ ᤜᤧᤰᤁᤩᤠᤱ ᤑᤡᤗᤡᤵᤐᤧᤴᤏᤠᤱ ᤗᤥ᤺ᤰᤋᤧᤖ ᤀᤴᤗᤠ᤺ᤸᤗᤧ ᤁᤢᤒᤣᤛᤠᤱ ᤐᤣ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤵᤐᤴᤏᤡᤴ ᤏᤡᤖᤢᤖ ᤕᤢᤅᤧᤒᤠ ᤂᤧᤵᤛᤢ॥ ᤜᤧᤰᤁᤩᤠᤱ ᤑᤡᤗᤡᤐᤖᤧ ᤛᤣ᤺ᤴᤍᤥᤛᤢ. “ᤁᤴ ᤁᤧᤏᤡᤖᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤒᤡ᥅”

³¹ ᤂᤧᤴ ᤛᤧᤓᤰᤐᤧᤸᤗᤧ ᤏᤥᤃᤵ ᤐᤡᤖᤢ. “ᤐᤥᤎᤰ ᤕᤠᤵᤔᤡ ᤁᤧᤈᤥᤰ ᤁᤧᤒᤡᤒᤠ ᤔᤏᤠ ᤔᤧ᤺ᤴᤏᤣᤃ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤱᤒᤣ᥅” ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤑᤡᤗᤡᤵᤐᤧᤴ ᤀᤢ᤺ᤳᤋᤢᤀᤠᤱ ᤛᤥᤖᤡᤰ ᤂᤢᤏᤧ᤹ᤏᤢᤀᤣ ᤕᤢᤰᤂᤢ॥

³² ᤂᤧᤸᤗᤧ ᤏᤡᤖᤢᤒᤠ ᤛᤠᤶᤕᤥᤛᤠᤵᤗᤠ ᤗᤰᤁᤡᤴ ᤁᤴ ᤘᤕᤧᤖᤥ— “ᤂᤢᤏᤧ᤹ᤃ ᤛᤧᤳᤇᤧ ᤋᤣ᤹ᤔᤏᤠᤒᤠ ᤔᤧᤸᤗᤢᤰ ᤜᤧᤰᤁᤣ ᤆᤥᤃᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤢᤖᤡᤰ ᤁᤧᤏ᤺ᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤠᤱ ᤛᤫᤠ᤺ᤳ ᤁᤧᤕᤧᤵᤐᤠ ᤔᤧᤸᤗᤢᤰᤛᤠ ᤜᤧᤰᤁᤣᤀᤣ ᤌᤣᤀᤠᤱ ᤔᤧᤒᤠ᤺ᤳᤋᤢᤴᤗᤥ॥

³³ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤠ ᤔᤧᤎᤠᤛᤢ ᤔᤧᤒᤡᤖᤢᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤖᤥ॥ ᤁᤢᤔᤢ᤹ᤀᤡᤍᤠᤱᤛᤠᤖᤧ ᤁᤢᤕᤠ᤺ᤶᤒᤣᤀᤥ ᤜᤠ᤺ᤳᤗᤧᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤣ᤹ᤖᤧᤖᤥ॥”

³⁴ ᤜᤧᤰᤁᤩᤠᤱ ᤂᤧᤴ ᤛᤧᤓᤰᤐᤧᤸᤗᤧ ᤑᤡᤗᤡᤵᤐᤧᤴ ᤛᤣ᤺ᤴᤍᤥᤛᤢ. “ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤜᤠ᤺ᤳᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤣ᥅ ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤡ. ᤘᤣ᤹ᤛᤔᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤡ᥅ ᤀᤡᤱᤃᤠ᤹ ᤐᤥᤎᤰ ᤆᤥᤃᤠᤱ ᤐᤡᤖᤠᤱᤅᤧ᤹ᤀᤥ॥”

³⁵ ᤜᤧᤰᤁᤣ᤺ᤸᤗᤧ ᤑᤡᤗᤡᤐᤖᤧ ᤛᤠᤶᤕᤥᤛᤠᤵᤗᤠᤒᤠ ᤒᤠ ᤁᤴ ᤗᤰᤁᤥᤗᤠᤶ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤏᤠᤀᤡᤱᤅᤡᤴ ᤐᤥᤎᤰ ᤆᤥᤃᤢᤸᤗᤧ ᤂᤧᤴ ᤛᤧᤓᤰᤐᤧᤸᤗᤧ ᤏᤛᤠᤴ ᤆᤥᤃᤢᤖᤥ॥

^36-37 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤴ ᤗᤠᤶᤔᤥ ᤗᤠᤶᤍᤡᤰ ᤆᤥᤃᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤆᤫᤠ᤺ᤳ ᤁᤧᤏᤧᤒᤠ ᤋᤧᤴᤏᤥ ᤁᤧᤖᤧᤳᤇᤡ॥ ᤜᤧᤰᤁᤩᤠᤱ ᤂᤧᤴ ᤛᤧᤓᤰᤐᤧᤸᤗᤧ ᤛᤣ᤺ᤴᤍᤥᤛᤢ. “ᤀᤥᤔᤧᤳᤋᤧ᤹. ᤁᤵᤔᤥ ᤆᤫᤠ᤺ᤳ ᤏᤧᤖᤥ॥ ᤀᤡᤱᤃᤠ᤹ ᤒᤵᤋᤡᤛ᤻ᤔᤠ ᤐᤥᤱᤔᤠ ᤔᤧᤛᤢᤰᤁᤠᤴᤒᤡ᥅” (ᤑᤡᤗᤡᤐᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤠᤰ ᤁᤧᤏᤡᤱᤘᤠ᤹ᤖᤧ ᤏᤛᤠᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤧᤛᤢᤰᤋᤢᤖᤥ” ᤂᤧᤴ ᤛᤧᤓᤰᤐᤧᤸᤗᤧ ᤏᤥᤃᤵ ᤐᤡᤖᤢ. “ᤕᤧᤛᤢ ᤂᤪᤡᤛ᤻ᤋᤧᤴ ᤏᤡᤱᤘᤠ᤹ᤑᤢᤛᤠ ᤑᤠ᤹ᤀᤠᤱ ᤏᤛᤠᤴ ᤆᤥᤃᤢᤱᤗᤥ॥”)

³⁸ ᤜᤧᤰᤁᤩᤠᤱ ᤂᤧᤴ ᤀᤴᤗᤠᤴ ᤕᤧᤵᤔᤠ ᤐᤠᤱᤄᤢᤀᤠᤱ ᤂᤢᤴᤇᤡ᤹ ᤕᤥ ᤆᤫᤠ᤺ᤳᤋᤥ ᤐᤣᤛᤡᤀᤠᤱ ᤑᤡᤗᤡᤐᤖᤧ ᤂᤧᤴ ᤒᤵᤋᤡᤛ᤻ᤔᤠ ᤐᤡᤖᤢ॥

^39-40 ᤂᤧᤱᤜᤠ᤹ ᤕᤥ ᤆᤫᤠ᤺ᤳᤋᤥᤗᤠᤶ ᤗ᤺ᤴᤍᤧ ᤌᤠᤅᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤍᤠᤱᤒᤠᤸᤗᤧ ᤁᤢᤛᤣᤛᤣ ᤕᤠᤶᤛᤠᤶᤔᤡᤸᤗᤧ ᤂᤡᤔᤥ ᤑᤡᤗᤡᤵᤐᤧᤴ ᤐᤰᤂᤢ ᤋᤣ᤹ᤖᤢᤀᤠᤱ ᤀᤠᤈᤥᤳᤋᤥᤛ ᤔᤧᤵᤔᤏᤠᤒᤠ ᤋᤧᤴᤏᤥ ᤁᤧᤳᤋᤢᤖᤥ॥ ᤂᤧᤵᤔᤥ ᤂᤢᤏᤧ᤹ ᤛᤡᤈᤖᤡᤕᤠ ᤔᤧᤱᤃᤧᤳᤋᤣ ᤌᤠᤖᤡᤰ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤛᤢᤖ ᤐᤣᤖᤥ॥ ᤛᤧᤓᤰᤐᤧᤸᤗᤧ ᤂᤢᤏᤧ᤹ ᤕᤠᤶᤔᤥ ᤔᤧᤏᤡᤛᤢᤴ. ᤁᤖ ᤂᤧᤴ ᤛ᤺ᤳᤋᤧᤖ ᤁᤢᤗᤠᤶᤍᤡ᤺ᤰᤁᤥ ᤐᤣᤖᤥ॥