Online Bible

- Reklamy -


ᤛᤣ᤺ᤰᤕᤢᤰᤔᤡᤒᤠᤜᤠ᤹ 5 - LIFOTNT


ᤜᤏᤏᤡᤕᤠ ᤏᤢ ᤛᤑᤡᤖᤠ

1 ᤁᤖ ᤂᤧᤵᤔᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣᤳ ᤛᤑᤡᤖᤠ᤺ᤴᤏᤢ ᤂᤢᤴᤇᤡ᤹ ᤗᤰᤁᤥᤒᤠ ᤁᤢᤓᤠ ᤗᤠᤈᤣ᤹ᤎᤡᤰ ᤛᤱᤄᤧᤳᤇᤢᤀᤠᤱ

2 ᤁᤢᤓᤠ ᤕᤠᤱᤅᤡᤴ ᤁᤢᤔᤣ᤺ᤳᤋᤡᤸᤗᤧ ᤏᤡᤛᤢᤖ ᤆᤡᤰᤂᤢᤗᤠᤖᤢ ᤜᤧᤰᤁᤩᤠᤱ ᤁᤢᤓᤠ ᤕᤠᤱᤅᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤋᤠᤖᤢᤖᤥ॥

3 ᤁᤖ ᤐᤋᤪᤢᤛᤖᤧ ᤛᤣ᤺ᤴᤍᤥᤛᤢ. “ᤜᤏᤏᤡᤕᤠᤀᤣ. ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤴ ᤀᤡᤱᤗᤧᤰᤔᤠ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤀᤡᤴ ᤌᤣᤀᤠᤱᤏᤧ ᤔᤠᤑᤧᤴᤛᤠᤶᤔᤡᤴ ᤌᤡᤶᤔᤠ ᤁᤧᤒᤠᤱᤄᤢᤒᤠᤒᤣ᥅ ᤌᤣᤀᤠᤱ ᤂᤧᤏᤧ᤹ ᤁᤢᤓᤠ ᤕᤠᤱᤅᤡᤴ ᤁᤧᤗᤠᤖᤢᤀᤠᤱ ᤁᤠᤰ ᤕᤠᤱ ᤁᤧᤒᤡᤒᤠ ᤁᤧᤗᤠᤶᤛᤡᤱᤒᤠᤒᤣ᥅

4 ᤁᤱᤃ ᤔᤧᤴᤇᤱᤅᤣ ᤘᤕᤧᤛᤠᤱ ᤂᤧᤏᤧ᤹ᤀᤡᤴᤏᤣᤛᤧ ᤘᤕᤧᤒᤠ᥄ ᤀᤠᤸᤗᤥ ᤁᤧᤛᤱᤄᤢᤀᤠᤱᤛᤠᤱ ᤒᤠ ᤁᤧᤜᤢᤰᤁᤥᤀᤣᤛᤠ ᤕᤠᤱᤅᤡᤴ ᤘᤠ᤹ᤒᤠ᥄ ᤀᤰᤂᤣᤗ᤹ᤖᤡᤰ ᤌᤣᤀᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤋᤠᤵᤑᤧ᤺ᤶᤒᤠ ᤁᤧᤀᤡ᤺ᤳᤋᤢᤒᤠᤒᤣ᥅ ᤂᤧᤏᤧ᤹ᤃ ᤔᤧᤴᤇᤠᤶᤃᤧᤴ ᤕᤠᤵᤔᤡ᤺ᤴᤗᤰ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤀᤡᤱᤃᤧᤗᤧᤰᤋᤢᤀᤠᤱ ᤘᤠ᤹ᤖᤥ॥”

5 ᤜᤧᤰᤁᤩᤠᤱ ᤜᤏᤏᤡᤕᤠᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤏᤢᤔᤧ᤺ᤴᤏᤣ ᤜᤷᤃᤢᤵᤛᤠ ᤆᤥ᤺ᤴᤍᤧᤀᤠᤱ ᤁᤢᤛᤰᤔᤠ ᤐᤣᤖᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤂᤧᤴ ᤁᤧᤄᤧᤶᤒᤠ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥

6 ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤠ ᤌᤠᤱᤒᤧᤴᤜᤠ᤹ᤖᤧ ᤆᤣ ᤋᤣ᤺ᤳᤋᤡᤸᤗᤧ ᤔᤧᤃᤡᤳᤋᤢ ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤔᤧᤍᤣ᤹ᤖᤢᤀᤠᤱ ᤔᤧᤗᤢᤵᤋᤢᤖᤥ॥

7 ᤜᤧᤰᤁᤩᤠᤱ ᤁᤢᤔᤢᤰ ᤛᤢᤶᤛᤡ ᤀᤣᤃᤠᤱ ᤜᤏᤏᤡᤕᤠᤖᤧ ᤁᤢᤔᤣ᤺ᤳᤋᤡᤴ ᤁᤢᤕᤧᤶᤒᤠ᤹ᤀᤡᤴ ᤌᤧᤔᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤄᤥᤀᤣ ᤂᤧᤵᤔᤥ ᤋᤩᤧᤖᤥ॥

8 ᤐᤋᤪᤢᤛᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤜᤏᤏᤡᤕᤠᤖᤧ ᤁᤢᤗᤠᤈᤣᤴ ᤛᤱᤄᤢᤀᤠᤱ ᤂᤥᤛᤢᤒᤠ ᤁᤢᤔᤧᤸᤗᤢᤱ ᤕᤠᤱ ᤒᤠ ᤁᤶᤔᤩᤠᤰᤗᤰᤐᤡ᥅” ᤜᤧᤰᤁᤣ᤺ᤸᤗᤧ ᤂᤧᤸᤗᤧᤀᤠᤱ ᤏᤥᤃᤵ ᤐᤡᤖᤢ. “ᤀᤥᤖᤥ᥄ ᤁᤢᤔᤧᤸᤗᤢᤱ ᤕᤠᤱᤃ ᤒᤠ ᤂᤧᤶᤔᤩᤠᤰᤗᤰᤗᤥ॥”

9 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤧᤴ ᤔᤧᤳᤋᤢ. “ᤀᤠᤰᤂᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤁᤢᤛᤣᤛᤣ ᤔᤠᤱᤅᤡᤴ ᤛᤠ᤹ᤔᤠ ᤑᤠ᤹ᤀᤠᤱ ᤂᤡᤴᤇᤡ᤹ ᤏᤡᤱᤘᤠ᤹ᤀᤡᤴ ᤁᤧᤍᤱᤄᤧᤳᤇᤢᤒᤣ᥅ ᤂᤧᤵᤛᤧ᤹ᤀᤥ. ᤂᤧᤏᤧ᤹ ᤁᤧᤃᤠᤵᤐᤥᤒᤧᤴ ᤁᤧᤗᤢᤵᤐᤠᤜᤠ᤹ ᤂᤠ ᤗᤠᤶᤎᤣ᤺ᤵᤐᤥ ᤔᤧᤃᤧᤳᤗᤖᤰ ᤔᤧᤒᤳᤗᤥ॥ ᤂᤧᤱᤜᤠ᤹ᤖᤧ ᤁᤧᤎᤰᤁᤡᤴᤏᤠᤱ ᤔᤧᤒᤰᤂᤢᤀᤠᤱ ᤔᤧᤍᤣ᤹ᤖᤢᤖᤥ॥”

10 ᤂᤡᤔᤥ ᤐᤋᤪᤢᤛᤖᤧ ᤁᤢᤗᤠᤱᤈᤰᤐᤥ ᤂᤧᤴ ᤜᤷᤃᤢᤵᤛᤠ ᤆᤥ᤺ᤴᤍᤧᤀᤠᤱ ᤁᤢᤛᤰᤔᤠ ᤐᤣᤖᤥ॥ ᤜᤧᤰᤁᤩᤠᤱ ᤂᤧᤴ ᤌᤠᤱᤒᤧᤴᤜᤠ᤹ ᤛᤡᤃᤠᤱ ᤔᤧᤗᤠᤛᤧᤸᤗᤧ ᤂᤧᤴ ᤛᤩᤧᤒᤠ ᤔᤧᤏᤡᤛᤢ. ᤜᤧᤰᤁᤩᤠᤱ ᤔᤧᤒᤰᤂᤢ ᤔᤧᤍᤣ᤹ᤖᤢᤀᤠᤱ ᤁᤢᤕᤧᤶᤒᤠ᤹ᤀᤡᤸᤗᤧ ᤁᤢᤒᤣᤛᤠᤱ ᤔᤧᤗᤢᤵᤋᤢᤖᤥ॥

11 ᤜᤧᤰᤁᤩᤠᤱ ᤂᤧᤴ ᤐᤠᤴ ᤁᤧᤄᤧᤶᤒᤠ ᤔᤏᤠᤜᤠ᤹ ᤏᤢ ᤛᤣᤛᤣᤜᤢᤵᤗᤰᤁᤥᤒᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥


ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤔᤧᤈᤥᤃᤢ᤹

12 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤕᤖᤡᤰ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤏᤠᤗᤢᤶᤔᤥ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤁᤧᤖᤧᤰ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤀᤧᤳᤗᤧᤱ ᤛᤥᤗᤥᤔᤏᤖᤧ ᤁᤢᤀᤠ᤺ᤶᤓᤥᤀᤥ ᤛᤥᤛᤥᤖᤡᤰ ᤔᤧᤘᤕᤧᤖᤥ॥

13 ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ᤏᤢ ᤋᤱᤛᤡᤱᤔᤠ ᤑᤠ᤹ᤀᤠᤱ ᤀᤠ᤺ᤴᤇᤡᤱᤔᤠ ᤔᤧᤴᤇᤢᤰᤋᤢᤴ. ᤁᤖ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤛᤡᤖᤥ॥

14 ᤜᤧᤰᤁᤣᤛᤠᤱ ᤍᤠᤱᤒᤠᤴ ᤏᤛᤠᤴ ᤁᤧᤈᤥ᤺ᤰᤐᤠ ᤔᤧᤴᤇᤢᤔᤠ᤹ ᤏᤢ ᤕᤧᤶᤒᤡᤳᤇᤠ᤹ᤜᤠ᤹ ᤀᤠᤸᤗᤛᤠᤱ ᤕᤖᤡᤰ ᤔᤧᤕᤥ᤹ᤛᤡᤱᤗ ᤔᤧᤒᤣᤖᤥ॥

15 ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤐᤋᤪᤢᤛᤧᤴ ᤂᤧᤵᤔᤥᤗᤠᤶ ᤐᤣ᤺ᤰᤁᤡᤸᤗᤧ ᤁᤢᤛᤠᤶᤔᤪᤡ᤺ᤵᤐᤧᤴ ᤁᤧᤍᤢᤰᤐᤠ ᤛᤶᤍᤠᤱ ᤆᤢᤰᤁᤠᤱ ᤔᤧᤘᤣ᤺ᤳᤗ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤗᤠᤶᤗᤠᤶᤔᤥ ᤂᤢᤏᤡ᤹ ᤏᤧᤳᤏᤠᤀᤥ ᤔᤧᤏᤧᤛ᤻ᤛᤢᤛᤡᤖᤥ॥

16 ᤕᤖᤢᤛᤗᤧᤔ ᤂᤡᤖᤡᤒᤠ ᤐᤠᤱᤈᤢᤶᤗᤠᤶᤔᤠᤱ ᤂᤧᤵᤔᤥ ᤔᤏᤠᤜᤠ᤹ ᤔᤧᤈᤢᤵᤛᤧ॥ ᤂᤧᤱᤜᤠ᤹ᤖᤧ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤏᤢ ᤑᤧᤴᤛᤠᤶᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤂᤧᤵᤔᤥ ᤔᤧᤍᤠᤖᤢᤛᤡ. ᤜᤧᤰᤁᤩᤠᤱ ᤁᤠᤰ ᤔᤧᤘᤣ᤺ᤳᤋᤧᤖᤥ॥


ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ᤹

17 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤛᤍᤢᤁᤡ ᤗᤰᤁᤥᤒᤠ ᤂᤢᤏᤧ᤹ ᤁᤢᤴᤈᤢᤶᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤠ᤹ᤖᤡᤰ ᤏᤠᤔᤧᤜᤧᤳᤋᤢᤛᤡ॥

18 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡ॥

19 ᤁᤖ ᤛᤧᤴᤍᤡᤰ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤧᤴ ᤋᤩᤧᤀᤠᤱ ᤗᤠᤶᤎᤣ᤺ᤵᤐᤧᤴ ᤜᤴᤍᤢᤒᤡᤖᤢᤛᤡ. ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ.

20 “ᤔᤠᤱᤜᤡᤶᤔᤥ ᤐᤣᤃᤧᤶᤔᤧ᤹ᤀᤠᤱ ᤁᤴ ᤁᤢᤛᤱ ᤜᤡᤱᤔᤴᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤁᤠᤰ ᤐᤠ᤺ᤴᤏᤡᤴ ᤔᤏᤠᤜᤠ᤹ ᤀᤡᤱᤓᤴ ᤆᤥᤃᤧᤶᤛᤡᤶᤔᤧ᤹ᤀᤥ॥”

21 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤔᤠᤱᤜᤡᤶᤔᤥ ᤔᤧᤗᤠᤛᤧᤀᤠᤱ ᤔᤏᤠᤜᤠ᤹ ᤜᤢ᤹ᤔᤠ ᤔᤧᤜᤣ᤺ᤰᤋᤢᤛᤡᤖᤥ॥ ᤒᤠ ᤂᤧᤴ ᤕᤧᤶᤔᤥ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤁᤢᤴᤈᤢᤶᤜᤠ᤹ᤖᤧ ᤕᤜᤢᤍᤡ ᤕᤧᤈᤢᤶᤓᤥ ᤏᤢ ᤁᤠᤰ ᤀᤡᤛᤪᤠᤀᤡᤗᤛᤔᤠ ᤋᤢᤶᤓᤠᤰᤛᤠᤜᤠ᤹ᤖᤧᤴ ᤆᤢᤶᤗᤢᤱ ᤔᤧᤈᤥᤃᤢᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤋᤠᤖᤧᤛᤧ᤹ ᤑᤠ᤹ᤀᤠᤱ ᤐᤢᤱᤗᤠᤀᤡᤱᤒᤠᤴ ᤀᤡᤱᤄᤱ ᤔᤧᤜᤠᤰᤋᤢᤖᤥ॥

22 ᤁᤖ ᤌᤰᤛᤢᤒᤠᤜᤠ᤹ ᤐᤢᤱᤗᤠᤜᤡᤶᤔᤥ ᤔᤧᤃᤧᤖᤧᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤂᤧᤵᤔᤥ ᤔᤧᤜᤥ᤺ᤵᤋᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤀᤰᤂᤣ ᤔᤧᤔᤧᤳᤋᤢᤛᤡ.

23 “ᤀᤠᤏᤡᤃᤣ ᤐᤢᤱᤗᤠᤜᤡᤶᤔᤥ ᤁᤧᤖᤡᤃᤧᤸᤗᤧ ᤗᤠᤶᤎᤣ᤺ᤵᤐᤧᤴ ᤏᤢᤖᤡᤰᤁᤠᤱ ᤀᤧᤳᤇᤡᤱᤅᤠᤱ ᤐᤳᤇᤧ. ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤀᤠᤱ ᤗᤠᤶᤎᤣ᤺ᤵᤐᤧᤴ ᤔᤧᤃᤥᤛᤢᤖ ᤔᤧᤕᤧᤒᤧᤖᤥ. ᤁᤖ ᤀᤠᤏᤡᤃᤣ ᤗᤠᤶᤎᤣ᤺ᤵᤐᤧᤴ ᤜᤶᤏᤠ᤺ᤸᤗᤧ ᤂᤧᤵᤔᤥ ᤜᤠ᤺ᤳᤋᤠᤱ ᤔᤧᤕᤠᤃᤧᤴᤗᤥ॥”

24 ᤔᤠᤱᤜᤡᤶ ᤁᤧᤃᤥᤒᤠ ᤌᤰᤋᤢᤶᤒᤠᤴ ᤏᤢ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤠᤸᤗ ᤌᤣ ᤐᤥᤱᤒᤠᤒᤣ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜ᤺ᤴᤍᤠ ᤗᤧᤰᤋᤧᤖᤥ॥

25 ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤠ ᤔᤏᤠᤎᤡᤰ ᤑᤧᤖᤧᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤐᤢᤱᤗᤠᤜᤡᤶᤔᤥ ᤁᤧᤛᤠᤰᤋᤢᤶᤛᤡᤶᤒᤠ ᤔᤏᤠᤜᤠ᤹ᤖᤧᤃ ᤏᤠ ᤔᤠᤱᤜᤡᤶᤔᤥᤏᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖ ᤔᤧᤕᤠᤰᤗᤥ॥”

26 ᤂᤧᤴ ᤌᤰᤋᤢᤶᤒᤠᤸᤗᤧ ᤌᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤌᤣᤀᤠᤱ ᤔᤧᤶᤔᤧᤳᤇᤡᤱᤅᤣ ᤕᤧᤈᤢᤶᤓᤥᤀᤥ ᤋᤠᤖᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤏᤠᤜᤠ᤹ᤖᤧ ᤗᤢᤱᤅᤡᤸᤗᤧ ᤀᤠᤶᤗᤧᤵ ᤀᤠᤶᤛᤧᤳ ᤑᤠ᤹ᤀᤠᤱ ᤔᤧᤃᤡᤛᤧᤖᤥ॥

27 ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤕᤧᤈᤢᤶᤓᤥ ᤋᤃᤡ ᤔᤧᤕᤧᤵᤛᤢᤛᤡᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ.

28 “ᤀᤠᤏᤡᤃᤧᤃ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ ᤌᤣᤀᤠᤱ ᤔᤧᤜᤢ᤹ᤖᤧᤶᤛᤡᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤀᤠᤛᤡᤃᤧᤀᤠᤱ ᤘᤕᤧ. ᤁᤖ ᤂᤡᤏᤡ᤹ᤃ ᤕᤖᤢᤛᤗᤧᤶᤔᤥ ᤂᤡᤏᤡ᤹ ᤏᤡᤛᤠᤶᤔᤡᤸᤗᤧ ᤁᤧᤎᤡᤶᤛᤢᤶᤔᤠᤱ ᤁᤴ ᤔᤏᤠ᤺ᤸᤗᤧ ᤁᤢᤛᤡᤔᤧᤸᤗᤧ ᤀᤠᤵᤋᤡᤰᤁᤡᤴ ᤕᤠᤵᤔᤡ ᤁᤢ᤺ᤵᤔᤠ ᤁᤧᤃᤥ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ᥄”

29 ᤁᤖ ᤐᤋᤪᤢᤛ ᤏᤢ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤐᤠ᤺ᤴᤏᤡᤴ ᤂᤧᤶᤔᤠᤏᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴᤏᤧ ᤂᤧᤶᤔᤠ ᤐᤥᤱᤗᤥ॥

30 ᤂᤡᤏᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠᤛᤧᤵᤔᤠ ᤁᤧᤒᤠᤱᤄᤢᤶᤛᤡᤶᤒᤠ ᤕᤧᤛᤢᤴ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤖᤥ॥

31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤗᤠᤶᤗᤥᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤐᤥᤱᤛᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤰᤂᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤛᤔᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤗᤠᤶ ᤜᤡᤶᤔᤠ ᤏᤢ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤢᤕᤧᤶ ᤔᤧᤄᤥᤛᤢᤀᤠᤱ ᤔᤧᤘᤠ᤹ᤖᤥ॥

32 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡ᤺ᤱᤃ ᤀᤠᤏᤡᤃᤣ ᤘᤕᤡᤃᤧᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤜᤠ᤹ ᤐᤡᤖᤢᤛᤡᤒᤠ ᤛᤣᤛᤣᤔᤠᤱᤅᤡᤴᤏᤠᤱ ᤋᤥ᤺ᤴᤍᤡ ᤘᤠ᤹ᤖᤥ॥”

33 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤧᤈᤢᤶᤓᤥᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤛᤠᤰᤁᤧᤴ ᤐᤥᤃᤧᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥

34 ᤁᤖ ᤂᤧᤵᤔᤥ ᤛᤠᤶᤕᤥᤌᤡᤶᤛᤠᤶᤒᤠ ᤏᤢ ᤁᤠᤰ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤒᤠ ᤃᤔᤠᤗᤡᤕᤗ ᤔᤧᤵᤔᤏᤠᤒᤠ ᤑᤖᤡᤛᤡᤴ ᤕᤧᤶᤛᤡᤱᤅᤠᤱ ᤂᤧᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤵᤑᤠᤎᤡᤰ ᤗᤠ᤺ᤰᤁᤠᤳ ᤐᤠᤱᤄᤢᤛᤡ॥

35 ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤕᤜᤢᤍᤡ ᤕᤧᤈᤢᤶᤓᤥᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤛᤔᤠ ᤔᤏᤠᤛᤣ. ᤁᤴ ᤔᤏᤠᤜᤠ᤹ ᤌᤧᤔᤠ ᤔᤧᤵᤔᤠᤛᤡ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤣ᥅ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄

36 ᤁᤢᤓᤠ ᤋᤱᤒᤣ ᤋᤃᤡ ᤌᤡᤕᤠᤍᤛ ᤔᤧᤵᤔᤏᤠᤒᤧᤴ ᤋᤩᤧᤀᤠᤱ ᤘᤕᤧ॥ ᤂᤢᤏᤧ᤹ᤃ ᤖᤥᤔᤡ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤜᤠᤱᤒᤡᤑᤩᤢᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤣ᤺ᤰ ᤗ᤹ᤖᤧᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤁᤢᤓᤠ ᤁᤢᤃᤡᤵ ᤗᤡᤛᤡ (᥊᥆᥆) ᤔᤏᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤔᤧᤍᤡᤶᤍᤢ. ᤁᤖ ᤁᤢᤓᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢᤀᤠᤱ ᤂᤢᤏᤧ᤹ ᤁᤧᤍᤡᤶᤒᤠ ᤔᤏᤠᤜᤠ᤹ ᤁᤠᤰ ᤔᤧᤛᤧᤖᤧᤀᤠᤱ ᤔᤧᤏᤢᤒᤧ ᤔᤧᤒᤣᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤌᤣᤏᤠ ᤌᤣᤒᤠ ᤔᤧᤒᤥ᤺ᤰᤂᤧ॥

37 ᤕᤠᤱᤛᤡ ᤐᤕᤶ ᤕᤠᤶᤏᤠ᤺ᤳᤏᤡ᤺ᤳᤋᤥ ᤃᤠᤗᤡᤗᤛᤔᤠ ᤕᤜᤢᤍᤠ ᤔᤧᤵᤔᤏᤠᤒᤧᤴ ᤋᤩᤧᤀᤠᤱ ᤁᤢᤓᤠ ᤔᤏᤠᤜᤠ᤹ᤏᤢ ᤋᤱᤛᤡᤱᤅᤠᤱ ᤜᤠᤱᤒᤡᤑᤩᤢᤱ ᤆᤥᤃᤢᤖᤥ. ᤁᤖ ᤂᤢᤏᤧ᤹ᤀᤠᤱ ᤔᤧᤛᤧᤖᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤍᤡᤶᤒᤠᤜᤠ᤹ᤀᤠᤱ ᤔᤧᤛᤧᤖᤧ ᤔᤧᤒᤣᤖᤥ॥

38 ᤁᤴ ᤔᤏᤠᤜᤠ᤹ ᤔᤧᤛᤢᤛᤧᤶᤛᤡᤶᤔᤡᤴᤏᤧ᤹ ᤗᤧᤖᤧᤶᤍᤧ᤺ᤛᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤛᤢᤈᤠ ᤐᤡᤏᤡᤱᤗᤥ॥ ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧ ᤔᤧᤜᤢ᤹ᤖᤢᤛᤡᤒᤠ ᤔᤧᤈᤥᤃᤢᤛᤡᤒᤠ ᤐᤠ᤺ᤴᤏᤡᤴ ᤔᤏᤠᤗᤠᤶᤏᤧ ᤑᤠ᤹ᤃᤪ ᤁᤴ ᤔᤏᤠᤜᤠ᤹ ᤔᤧᤏᤢᤵ ᤔᤧᤒᤣ᤺ᤰᤗᤥ॥

39 ᤁᤖ ᤏᤡᤱᤘᤠ᤹ᤑᤢᤔᤠᤱᤗᤠᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤴ ᤔᤏᤠᤜᤠ᤹ ᤀᤵᤔᤠ ᤁᤧᤴᤇᤢᤰᤋᤢᤶᤛᤡᤶᤔᤡᤴᤗᤥ. ᤁᤖ ᤕᤠᤱᤏᤠ ᤂᤡᤏᤡ᤹ᤏᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥᤃᤡᤒᤠ ᤁᤢᤀᤡᤛᤡᤰ ᤐᤥᤱᤗᤥ॥”

40 ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤕᤧᤈᤢᤶᤓᤥᤒᤠ ᤔᤏᤠᤜᤠ᤹ ᤂᤧᤶᤔᤠ ᤔᤧᤍᤧᤴᤍᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤔᤧᤀᤢ᤺ᤳᤋᤢᤛᤡᤀᤠᤱ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡᤖ ᤀᤠᤸᤗ ᤁᤴ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤜᤢ᤹ᤔᤠ ᤁᤧᤱᤄᤥᤛᤢᤶᤔᤡᤴᤗᤥ ᤑᤠ᤹ᤀᤠᤱ ᤀᤡᤱᤈᤠᤱ ᤔᤧᤒᤡᤖᤢᤛᤡᤀᤠᤱ ᤔᤧᤗᤧᤖᤢᤛᤡᤖᤥ॥

41 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤕᤧᤈᤢᤶᤓᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤀᤠᤏᤡᤃᤧᤃ ᤕᤧᤛᤢᤖᤧ ᤁᤢᤔᤏᤠ ᤐᤥ᤺ᤰᤂᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤋᤢᤰᤂᤣ ᤆᤠᤔᤠ ᤗᤠ᤹ᤖᤡᤃᤧ ᤑᤠ᤹ᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥

42 ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰ ᤂᤧᤱᤜᤠ᤹ ᤔᤠᤱᤜᤡᤶᤔᤥ ᤏᤢ ᤜᤡᤶᤜᤡᤶ ᤔᤧᤒᤣᤀᤠᤱ ᤕᤧᤛᤢᤴ ᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤁᤴ ᤛᤢᤏᤠᤀᤡᤱᤅᤡᤴ ᤆᤰᤔᤧᤸᤗ᤹ᤀᤣ ᤔᤧᤜᤢ᤹ᤖᤢᤛᤡᤖ ᤀᤡᤱᤓᤴ ᤔᤧᤈᤥᤃᤢᤖᤥ॥

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Následuj nás:



Reklamy