ᤛᤣ᤺ᤰᤕᤢᤰᤔᤡᤒᤠᤜᤠ᤹ 28 - LIFOTNTᤐᤠᤘᤗᤧᤴ ᤔᤠᤸᤋᤠ ᤘᤠᤃᤵᤂᤠᤶᤔᤥ 1 ᤜᤧᤰᤁᤩᤠᤱ ᤀᤠᤏᤡᤃᤣ ᤁᤧᤖᤧᤰ ᤌᤣᤀᤠᤱ ᤔᤧᤶᤒᤥᤱᤅᤣ ᤁᤢᤕᤠᤀᤥ ᤗ᤺ᤴᤍᤡᤃᤧᤀᤠᤱ ᤁᤴ ᤘᤠᤃᤵᤂᤠᤶᤔᤡᤸᤗᤧ ᤁᤢᤔᤡᤱ ᤔᤠᤸᤋᤠ ᤘᤕᤧᤒᤠᤴ ᤏᤡᤱᤘᤠ᤹ ᤂᤥ᤺ᤶᤏᤠᤖᤥ॥ 2 ᤂᤧᤵᤔᤥ ᤁᤧᤕᤢᤱᤒᤠ ᤐᤠᤱᤋᤡᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤀᤠᤏᤡᤃᤣ ᤛᤠ᤹ᤖᤡᤰ ᤗᤢᤱᤔᤠ᤹ ᤔᤧᤍᤢᤰᤋᤡᤃᤧᤀᤠᤱ ᤔᤡᤔᤧᤍᤢᤵᤋᤢᤀᤠᤱ ᤗᤠᤶᤍᤠ᤺ᤰᤔᤠ ᤔᤧᤒᤡᤖᤡᤃᤧᤖᤥ. ᤌᤣᤀᤠᤱᤓᤧᤸᤗᤧ ᤘᤠᤜᤡᤳᤔᤠᤴ ᤌᤩᤧᤖ ᤐᤳᤇᤧᤀᤠᤱ ᤆᤢᤱᤈᤡ᤺ᤰᤋᤧᤖᤥ॥ 3 ᤐᤠᤘᤗᤖᤧ ᤛᤡᤱᤔᤢᤈᤡ᤹ ᤛᤢᤵᤛᤢᤖ ᤔᤡᤀᤥ ᤁᤣ᤺ᤳᤋᤢᤸᤗᤧ ᤔᤡ᤺ᤸᤗᤧ ᤕᤧᤶᤍᤢᤀᤠᤱ ᤀᤛᤣ᤺ᤰᤐᤧᤴ ᤂᤧᤴ ᤛᤡᤱᤔᤢᤈᤡ᤹ᤀᤥᤏᤢ ᤗ᤺ᤴᤍᤧᤀᤠᤱ ᤐᤠᤘᤗᤖᤧ ᤁᤢᤜᤢᤰᤁᤥ ᤁᤡᤳᤇᤡᤱᤗᤥ॥ 4 ᤐᤠᤱᤋᤡᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤐᤠᤘᤗᤖᤧ ᤁᤢᤜᤢᤰᤁᤥ ᤀᤛᤣ᤺ᤰᤐᤧᤴ ᤁᤡᤳᤇᤡᤱᤒᤠ ᤔᤧᤏᤡᤛᤢᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤛᤧᤰᤂᤠᤛᤠᤱ ᤔᤏᤠ ᤁᤧᤛᤧᤵᤐᤠᤀᤣᤖᤥ॥ ᤁᤴ ᤘᤠᤜᤱᤅᤥᤗᤠᤶ ᤜᤡᤅᤧᤛᤠᤱ ᤁᤴ ᤂᤠᤛᤧᤴ ᤁᤧᤗᤥ᤺ᤶᤒᤠ ᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤐᤡᤶᤔᤠ ᤔᤧᤛᤢᤰᤋᤧᤴᤗᤥ॥” 5 ᤁᤖ ᤐᤠᤘᤗᤖᤧ ᤂᤧᤴ ᤀᤛᤣ᤺ᤰᤐᤧᤸᤗᤧ ᤀ᤺ᤰᤔᤠ ᤔᤧᤱᤄᤥᤀᤣ ᤔᤡᤀᤥ ᤛᤠᤰᤂᤢ ᤁᤣ᤺ᤳᤋᤢᤀᤠᤱ ᤌᤣᤀᤠᤱ ᤔᤧᤒᤥ᤺ᤰᤂᤧᤴᤗᤥ॥ 6 ᤀᤠᤸᤗ ᤐᤠᤘᤗᤧᤴ ᤌᤱᤍᤢᤀᤠᤱ ᤜᤷᤃᤢᤵ ᤆᤥ᤺ᤴᤏᤠᤱ ᤛᤡ᤹᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤔᤏᤠᤜᤠ᤹ᤖᤧ ᤔᤧᤜᤠᤱᤄᤢᤖᤥ॥ ᤕᤖᤡᤰ ᤕᤧᤶ ᤔᤧᤜᤠᤱᤄᤢᤛᤠᤱ ᤂᤢᤏᤧ᤹ ᤌᤧᤔᤠᤀᤠᤱ ᤔᤧᤒᤥ᤺ᤰᤂᤧᤶᤒᤠ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤔᤧᤗᤧᤰᤂᤢᤖ ᤀᤰᤂᤣ ᤔᤧᤔᤧᤳᤇᤡᤱᤗᤥ. “ᤁᤱᤃ ᤛᤧᤰᤂᤠᤛᤠᤱ ᤔᤠᤱᤗᤥ॥” 7 ᤂᤧᤵᤔᤥ ᤏᤡ᤺ᤳᤋᤠᤱᤅᤣ ᤂᤧᤴ ᤘᤠᤃᤵᤂᤠᤶ ᤕᤢᤰᤐᤠ ᤐᤒ᤻ᤗᤡᤕᤛᤖᤧ ᤁᤢᤗᤠᤈᤣ᤹ ᤏᤧᤛ᤻ᤛᤧ॥ ᤂᤧᤸᤗᤧ ᤀᤠᤏᤡᤃᤣ ᤁᤢᤜᤡᤶᤔᤥ ᤋᤣ᤹ᤖᤡᤃᤧᤀᤠᤱ ᤛᤠ᤹ᤖᤡᤰ ᤏᤢᤖᤡᤰ ᤔᤧᤳᤋᤡᤃᤧᤖ ᤛᤢᤶᤕᤧᤴ ᤌᤠᤖᤡᤰ ᤋᤖᤣ ᤕᤠᤵᤔᤡ ᤋᤥᤛᤧᤖᤥ॥ 8 ᤐᤒ᤻ᤗᤡᤕᤛᤖᤧ ᤁᤢᤶᤒᤠ ᤋᤢᤱ ᤏᤢ ᤔᤠᤰᤂᤡ᤹ ᤜᤡᤒᤡ᤺ᤵᤔᤠᤸᤗᤧ ᤋᤖᤢᤀᤠᤱ ᤏᤧᤳᤏᤠᤀᤥ ᤏᤧᤛ᤻ᤛᤧ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤁᤢᤜᤡᤶᤔᤥ ᤐᤣᤀᤠᤱ ᤋᤢᤘᤠ ᤆᤥᤃᤢ ᤐᤡᤖᤢᤀᤠᤱ ᤜᤢᤰ ᤏᤧᤛ᤻ᤛᤢᤀᤠᤱ ᤘᤣ᤺ᤴᤍᤢᤖᤥ॥ 9 ᤀᤰᤂᤣ ᤐᤥ᤺ᤰᤂᤧᤸᤗᤧ ᤘᤠᤃᤵᤗᤠᤈᤣ᤹ᤀᤥᤒᤠ ᤁᤠᤰ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤘᤣ᤺ᤳᤋᤧᤖᤥ॥ 10 ᤂᤧᤱᤜᤠ᤹ᤖᤧ ᤕᤖᤡᤰ ᤀᤡᤱᤎᤠᤱ ᤔᤧᤒᤡᤖᤡᤃᤧᤖ ᤔᤡᤰᤋᤥᤰ ᤏᤢ ᤆᤧᤛ᤻ᤛᤢᤱᤜᤠ᤹ ᤔᤧᤍᤥ᤺ᤴᤍᤡ ᤔᤧᤒᤡᤖᤡᤃᤧ॥ ᤕᤠᤱᤛᤡ ᤐᤣ᤺ᤰᤔᤠ ᤕᤧᤶ ᤐᤥ᤺ᤰᤂᤧᤸᤗᤧ ᤘᤠᤗᤠᤶᤍᤡ᤺ᤰᤁᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤘᤠᤗᤠᤎᤠᤀᤥ ᤔᤧᤕᤠᤰᤋᤢ ᤔᤧᤒᤡᤖᤡᤃᤧᤖᤥ॥ 11 ᤜᤧᤰᤁᤩᤠᤱ ᤂᤧᤵᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤘᤕᤡᤃᤧᤀᤠᤱ ᤂᤧᤵᤔᤥ ᤀᤗᤧᤰᤈᤧᤴᤍᤪᤡᤕᤠᤗᤠᤶ ᤁᤧᤍᤠᤒᤠ ᤁᤠᤵᤛᤠᤒᤠ ᤃᤪᤡᤁ ᤔᤠᤱᤜᤠ᤹ᤖᤧᤴ ᤂᤥ᤺ᤶᤔᤏᤠᤒᤠ ᤀᤡᤳᤇᤠᤵ ᤁᤧᤒᤵᤐᤠ ᤘᤠᤗᤠᤎᤠᤀᤥ ᤗᤠ᤺ᤵᤔᤏᤠᤀᤠᤱ ᤀᤠᤏᤡᤃᤣ ᤘᤠᤗᤠᤶᤍᤡ᤺ᤰᤁᤥ ᤌᤠᤛᤡᤱᤔᤏᤠᤖᤥ॥ ᤂᤧᤴ ᤘᤠᤗᤠᤎᤠᤴ ᤆᤢᤱᤘᤠ᤺ᤶᤔᤠᤀᤥ ᤂᤧᤴ ᤘᤠᤃᤵᤂᤣ᤺ᤱᤅᤥ ᤋᤩᤧᤀᤠᤱ ᤘᤕᤧᤖᤥ॥ 12 ᤜᤧᤰᤁᤩᤠᤱ ᤀᤠᤏᤡᤃᤣ ᤛᤡᤖᤠᤁᤛ ᤔᤧᤵᤔᤏᤠᤒᤠ ᤕᤧᤰᤕᤰᤁᤥ ᤁᤧᤵᤔᤏᤠᤀᤠᤱ ᤛᤢᤶᤕᤧᤴ ᤌᤠᤖᤡᤰ ᤂᤧᤵᤔᤥ ᤏᤧᤔᤏᤠ॥ 13 ᤂᤧᤵᤔᤥᤗᤠᤶ ᤌᤠᤛᤡᤱᤔᤏᤠᤀᤠᤱ ᤀᤡᤋᤠᤗᤡ ᤗᤠᤈᤣ᤹ᤒᤠ ᤖᤣᤃᤡᤕᤔ ᤔᤧᤵᤔᤏᤠᤒᤠ ᤕᤧᤰᤕᤰᤁᤥ ᤁᤧᤵᤔᤏᤠᤖᤥ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤗᤠᤱᤃᤧᤳ ᤐᤡᤛᤠᤱᤗᤠᤶ ᤛᤢᤖᤡᤳ ᤁᤣᤈᤱ ᤜᤢᤖᤧ. ᤜᤧᤰᤁᤩᤠᤱ ᤌᤠᤛᤡᤱᤔᤏᤠᤀᤠᤱ ᤁᤢᤀᤠᤳᤇᤧᤴᤍᤠᤴ ᤐᤋᤡᤀᤥᤗᤡ ᤔᤧᤵᤔᤏᤠᤒᤠ ᤐᤠᤱᤈᤢᤶᤔᤥ ᤁᤧᤵᤔᤏᤠᤖᤥ॥ 14 ᤂᤧᤵᤔᤥ ᤀᤠᤏᤡᤃᤣ ᤁᤢᤓᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤋᤢᤶᤔᤏᤠᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤳᤏᤠᤶᤎᤡᤰ ᤕᤠ᤺ᤰᤋᤧᤶᤔᤧ᤹ ᤗ᤹ᤖᤡᤰ ᤐᤣᤗᤡ ᤕᤠᤵᤔᤡ ᤔᤧᤓᤠᤰᤋᤧᤖᤥ॥ ᤀᤠᤏᤡᤃᤣ ᤂᤢᤴᤇᤡ᤹ᤏᤢ ᤕᤧᤴᤏᤠᤶᤎᤡᤰ ᤕᤠ᤺ᤰᤔᤏᤠᤀᤠᤱ ᤖᤥᤔ ᤗᤧᤵᤔᤠᤱ ᤌᤠᤛᤡᤱᤔᤏᤠᤖᤥ॥ 15 ᤖᤥᤶᤔᤥ ᤁᤧᤘᤠ᤹ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤀᤠᤏᤡᤃᤣ ᤋᤩᤧ᤹ᤀᤡᤃᤧᤖ ᤐᤳᤇᤡᤃᤧᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤵᤐᤡᤕᤠᤛᤔᤠ ᤐᤠᤱᤈᤢᤶ ᤏᤢ ᤛᤢᤶᤛᤡ ᤀᤡ᤺ᤰᤂᤡᤶ ᤔᤧᤵᤔᤏᤠᤒᤠᤍᤧᤴᤏᤥ ᤀᤠᤏᤡᤃᤣ ᤋᤢᤶᤛᤧ ᤗᤠᤶᤍᤣ᤺ᤱ ᤌᤠᤖᤡᤰ ᤗᤠᤶᤗᤰᤛᤧ ᤔᤧᤍᤩᤧᤀᤠᤱ ᤔᤧᤘᤕᤧᤖᤥ॥ ᤜᤧᤰᤁᤩᤠᤱ ᤐᤠᤘᤗᤖᤧ ᤂᤧᤱᤜᤠ᤹ ᤏᤡᤛᤢᤛᤡᤀᤠᤱ ᤜᤠᤱᤜᤠᤱ ᤐᤥ᤺ᤰᤂᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖᤥ॥ 16 ᤀᤠᤏᤡᤃᤣ ᤖᤥᤶᤔᤥ ᤁᤧᤵᤔᤏᤠᤀᤠᤱ ᤂᤧᤵᤔᤥ ᤌᤰᤛᤢᤒᤠ ᤁᤥᤔᤠᤀᤥ ᤐᤠᤘᤗᤖᤧ ᤀᤠᤒᤠᤅᤣ ᤋᤱᤃᤠᤶ ᤆᤥᤃᤢᤒᤠ ᤕᤧᤱᤘᤠᤜᤡᤶᤔᤥ ᤘᤠ᤹ᤔᤠ ᤔᤧᤒᤠᤱᤄᤢᤖᤥ॥ 17 ᤛᤢᤶᤕᤧᤴ ᤀᤣᤃᤠᤱ ᤐᤠᤘᤗᤖᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤆᤢᤶᤗᤢᤱᤅᤥ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ ᤔᤧᤈᤢᤵᤛᤧᤸᤗᤧ ᤀᤰᤂᤣ ᤔᤧᤳᤋᤢᤛᤡᤖᤥ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤀᤡᤱᤃᤠ᤹ᤃ ᤀᤠᤏᤡ᤹ ᤔᤏᤠᤜᤠ᤹ ᤏᤢ ᤀᤠᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤀᤠᤶᤒᤡᤖᤧ ᤀᤠᤶᤕᤢᤛᤧᤒᤠ ᤛᤠᤰᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤔᤧᤶᤒᤠ᤺ᤵᤐᤧᤴᤗᤥ. ᤜᤧᤰᤁᤣᤛᤠᤱ ᤀᤡᤱᤃᤠ᤹ᤃ ᤕᤖᤢᤛᤗᤧᤶᤔᤥ ᤔᤧᤍᤧᤶᤛᤠᤱᤅᤠᤱ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤜᤢᤰᤔᤧᤛᤢᤵᤋᤠᤱᤗᤥ॥ 18 ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤔᤧᤛᤠ᤹ᤖᤠᤱᤅᤠᤱ ᤕᤠᤵᤔᤡ ᤗᤧᤵᤔᤠᤍᤣᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠ ᤌᤣᤀᤠᤱ ᤑᤧᤴᤐᤠᤴ ᤔᤧᤴᤈᤥ᤺ᤰᤁᤣ ᤘᤕᤠᤱᤗᤥ॥ 19 ᤀᤠᤏᤡ᤹ ᤀᤠᤒᤠᤅᤣ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤀᤠᤵᤋᤡᤰ ᤌᤣᤀᤠᤱ ᤔᤧᤃᤳᤋᤠᤴᤇᤠᤱ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤛᤠ᤹ᤖᤡᤰ ᤔᤧᤀᤳᤋᤠᤱᤅᤡᤸᤗᤧ ᤀᤡᤱᤃᤠ᤹ ᤜᤠᤱᤕᤢᤰᤐᤠ ᤛᤡᤈᤖᤗᤥ ᤕᤧᤰᤐᤣᤗᤡ ᤆᤥ᤺ᤰᤔᤠᤀᤣ ᤁᤧᤒᤥᤱᤒᤠ ᤐᤥ᤺ᤰᤂᤠᤱᤗᤥ॥ 20 ᤂᤧᤸᤗᤧᤆᤥᤃᤢᤸᤗᤧᤀᤣ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤋᤢᤶᤔᤠᤀᤠᤱ ᤌᤣᤀᤠᤱ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤆᤧᤱᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤁᤵᤔᤥ ᤋᤩᤧᤶᤔᤧ᤹ ᤑᤠ᤹ᤀᤠᤱ ᤀᤢ᤺ᤳᤏᤡᤱᤒᤠᤖᤥ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤠ᤺ ᤁᤧᤗ᤹ᤒᤠ ᤏᤡᤱᤛᤠᤱ ᤔᤧᤈᤥᤃᤢᤒᤠ ᤔᤠᤱᤌᤢᤰᤐᤧᤴ ᤏᤛᤠᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤀᤠᤀᤡᤴ ᤁᤴ ᤀᤡᤄᤣ᤺ᤱᤅᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ॥” 21 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤕᤜᤢᤍᤡᤕᤠᤗᤠᤶ ᤁᤧᤕᤠ᤺ᤶᤒᤣᤀᤥ ᤌᤣᤀᤠᤱ ᤛᤰᤀᤡᤱᤄᤱ ᤔᤧᤱᤄᤥᤀᤣ ᤘᤕᤡᤃᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴᤜᤠ᤹ ᤁᤧᤍᤠ᤺ᤵᤐᤠ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤔᤧᤜᤥᤵᤗᤥ॥ 22 ᤁᤖ ᤁᤴ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤀᤠᤱ ᤁᤧᤘᤠ᤹ᤒᤠ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤒᤠ ᤀᤠᤳᤋᤡᤛᤠᤱ ᤂᤧᤵᤛᤢᤶᤒᤧᤖ ᤘᤕᤡᤃᤧ॥ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤏᤡᤱᤘᤠ᤹ ᤌᤧᤔᤠ ᤘᤠ᤹ᤒᤣ ᤑᤠ᤹ᤀᤠᤱ ᤂᤧᤶᤔᤠ ᤛᤡᤖᤠ᤹ᤌᤠᤅᤧᤀᤠᤱ ᤘᤠ᤹ᤖᤥ॥” 23 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤐᤠᤘᤗᤏᤢ ᤕᤠᤶᤔᤥ ᤋᤢᤶᤔᤠ ᤕᤧᤶ ᤏᤡ᤺ᤴᤎᤥ ᤔᤧᤈᤥᤃᤢ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤐᤠᤘᤗᤖᤧ ᤁᤢᤕᤧᤱᤘᤠᤜᤡᤶᤔᤥ ᤕᤖᤡᤰ ᤔᤧᤍᤩᤧᤖᤥ॥ ᤜᤧᤰᤁᤩᤠᤱ ᤐᤠᤘᤗᤖᤧ ᤋᤠᤏᤠᤶᤏᤢ ᤏᤠᤶᤎᤩᤧᤖ ᤌᤠᤖᤡᤰ ᤏᤡᤱᤘᤠ᤹ᤑᤢᤜᤠᤱᤈᤢᤶ ᤏᤢ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤱᤜᤠ᤹ ᤏᤛᤠᤴ ᤁᤧᤈᤥ᤺ᤰᤐᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤛᤠᤵᤗᤠᤗᤠᤶ ᤁᤢᤒᤣ ᤜᤴᤍᤢᤀᤠᤱ ᤆᤧᤰᤋᤢᤛᤡᤖᤥ॥ 24 ᤂᤧᤱᤜᤠ᤹ ᤁᤢᤓᤠᤖᤧᤃ ᤐᤠᤘᤗᤖᤧ ᤐᤠ᤺ᤳᤋᤢᤒᤠᤴ ᤏᤠᤔᤧᤛᤠ᤹ᤖᤢ ᤁᤖ ᤘᤣ᤹ᤜᤠ᤹ᤖᤧᤃ ᤏᤠᤔᤧᤴᤇᤠ᤹ᤖᤢᤴᤗᤥ॥ 25 ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤡ᤹ ᤗᤢᤶᤔᤥᤀᤣ ᤏᤡᤱᤘᤠ᤹ ᤔᤧᤴᤍᤱ ᤐᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤐᤠᤘᤗᤖᤧ ᤀᤰᤂᤣ ᤔᤧᤳᤋᤢᤛᤡ. “ᤛᤧᤰᤂᤠᤀᤣ ᤏᤢᤖᤡᤰᤁᤠᤱ ᤛᤣᤛᤣᤔᤠᤱᤅᤡᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤠ᤹ᤖᤥ— 26 “‘ᤁᤴ ᤔᤏᤠᤜᤠ᤹ᤖᤥ ᤐᤣᤃᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤛᤧ᤹. ᤀᤠᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤁᤧᤄᤧᤵᤛᤢᤶ ᤀᤠᤸᤗᤛᤠᤱ ᤏᤢᤖᤡᤰᤁᤠᤱ ᤁᤧᤄᤧᤵᤛᤢᤶ. ᤁᤖ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥ ᤀᤠᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤀᤥᤃᤧᤔᤧᤳᤋᤢᤶ ᤀᤠᤸᤗᤛᤠᤱ ᤏᤢᤖᤡᤰᤁᤠᤱ ᤀᤥᤃᤧᤔᤧᤳᤋᤢᤶ ᤜᤧᤰᤁᤣᤛᤠᤱ ᤁᤧᤴᤏᤡᤛᤢᤶᤔᤡᤴᤗᤥ॥ 27 ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤎᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤂᤢᤏᤡ᤹ ᤏᤧᤰᤂᤥ᤹ᤜᤠ᤹ ᤛᤢᤒᤧᤀᤠᤱ ᤐᤳᤗᤥ॥ ᤂᤢᤏᤡ᤹ ᤔᤡᤰᤜᤠ᤹ ᤛᤢᤒᤧᤀᤠᤱ ᤐᤳᤗᤥ॥ ᤔᤣ᤺ᤴᤏᤣ ᤑᤠ᤹ᤃᤪ ᤔᤧᤏᤡᤛᤢ. ᤔᤧᤄᤧᤵᤛᤢ. ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤱᤃᤠ᤹ᤀᤥ ᤔᤧᤏᤢ᤺ᤰᤂᤧᤒᤠᤖᤥ ᤜᤧᤰᤁᤩᤠᤱ ᤘᤣ᤺ᤴᤏᤡᤱᤒᤠ ᤘᤕᤧᤖᤥ ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥’” 28 ᤜᤧᤰᤁᤩᤠᤱ ᤐᤠᤘᤗᤖᤧ ᤁᤢᤏᤢᤵᤔᤥ ᤀᤰᤂᤣ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤛᤧᤴᤗᤵᤖᤧ ᤛᤢᤏᤠᤀᤡᤱᤅᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤐᤠᤱᤄᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤔᤧᤄᤧᤵᤛᤢ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥” 29 (ᤜᤧᤰᤁᤩᤠᤱ ᤐᤠᤘᤗᤖᤧ ᤁᤴ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤜᤢᤍᤡᤜᤠ᤹ ᤂᤢᤏᤡ᤹ ᤗᤢᤶᤔᤥ ᤛᤠ᤹ᤖᤡᤰ ᤐᤠ᤺ᤴᤎᤱ ᤔᤧᤎᤰᤋᤧᤖ ᤂᤧᤵᤔᤥᤗᤠᤶ ᤔᤧᤒᤣᤖᤥ॥) 30 ᤋᤱᤒᤣ ᤏᤧᤳᤇᤡ ᤌᤠᤖᤡᤰ ᤐᤠᤘᤗᤖᤧ ᤀᤠᤒᤠᤅᤣ ᤋᤱᤃᤠᤶ ᤆᤥᤃᤢᤒᤠ ᤕᤧᤱᤘᤠᤜᤡᤶᤔᤥ ᤕᤠ᤺ᤰᤋᤧᤀᤠᤱ ᤁᤢᤍᤢᤶᤛᤧ ᤁᤧᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ ᤗᤠᤶᤍᤠ᤺ᤰᤔᤠ ᤐᤡᤖᤢᤛᤡᤖ ᤘᤕᤧᤖᤥ॥ 31 ᤜᤧᤰᤁᤩᤠᤱ ᤔᤧᤱᤃᤡᤀᤣ ᤜᤠᤱᤜᤠᤱ ᤗ᤹ᤖᤡᤰ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤴ ᤆᤥᤃᤢᤖ ᤁᤧᤍᤠᤒᤠ ᤁᤧᤒᤣ᤺ᤰᤐᤠᤜᤠ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤜᤢ᤹ᤖᤢᤛᤡᤖᤥ॥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤜᤧᤰᤁᤣ ᤆᤥ᤺ᤰᤔᤥᤗᤠᤶ ᤂᤢᤏᤧ᤹ ᤛᤠᤰᤔᤠ ᤔᤧᤱᤃᤥ᤺ᤳᤋᤢᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.