ᤛᤣ᤺ᤰᤕᤢᤰᤔᤡᤒᤠᤜᤠ᤹ 26 - LIFOTNT

ᤀᤃᤪᤡᤐᤠ ᤜᤠᤱᤅᤡᤸᤗᤧ ᤁᤢᤍᤃᤡ ᤐᤠᤘᤗᤧᤴ ᤏᤠᤱᤛᤡᤱ

¹ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤐᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤠᤱᤛᤡᤱᤔᤠ ᤐᤠ᤺ᤴᤏᤡᤴ ᤕᤢᤱᤔᤠ ᤁᤧᤄᤥᤛᤢ᤹ᤖᤥ॥” ᤐᤠᤘᤗᤖᤧᤀᤠᤱ ᤁᤢᤜᤢᤰᤜᤠ᤹ ᤛᤴᤇᤢᤖ ᤁᤢᤏᤠᤱᤛᤡᤱᤔᤠ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤕᤢᤰᤂᤢ—

² “ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤣ. ᤀᤡᤱᤃᤠ᤹ᤃ ᤀᤠᤀᤡᤴ ᤕᤜᤢᤍᤡᤜᤠ᤹ᤖᤧ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰᤗᤧ ᤁᤢᤍᤰᤗᤧᤱᤘᤠᤀᤥ ᤏᤠᤱᤛᤡᤱᤔᤠ ᤐᤠᤴ ᤁᤧᤍᤃᤠᤱ ᤕᤢᤱᤔᤠ ᤛᤢᤕᤧᤶ ᤂᤥᤛᤢᤱᤒᤠᤀᤥ ᤀᤡᤱᤃᤠ᤹ ᤀᤠᤒᤠᤅᤣ ᤁᤢᤍ᤹ᤕᤠᤴ ᤁᤧᤏᤢ᤹ᤒᤠ ᤆᤥ᤺ᤰᤁᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤅᤠᤖᤥ॥

³ ᤌᤣᤀᤠᤱᤓᤧᤸᤗᤧ ᤁᤢᤳᤆᤡᤀᤥᤃ ᤂᤧᤏᤧ᤹ ᤏᤢ᤺ᤖᤡᤰᤁᤠᤱ ᤀᤠᤏᤡᤃᤣ ᤕᤜᤢᤍᤡ ᤆᤥ᤺ᤰᤌᤡᤶ ᤏᤢ ᤕᤧᤔᤧᤴᤍᤱ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤁᤧᤏᤡᤛᤢ ᤁᤧᤗᤧᤛ᤻ᤛᤢᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤒᤠ᤺ᤴᤏᤡᤴ ᤏᤠᤛᤡ ᤌ᤺ᤳᤋᤧ᤹ᤀᤠᤱ ᤂᤧᤵᤛᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥

⁴ “ᤀᤡᤱᤃᤠ᤹ ᤆᤢᤰᤋᤠᤱᤅᤠᤱᤎᤥᤀᤣ ᤀᤠᤒᤠᤅᤣ ᤀᤠᤗᤠᤈᤣ᤹ᤛᤠᤒᤠᤗᤢᤶᤔᤥ ᤏᤢ ᤕᤖᤢᤛᤗᤧᤶᤔᤥ ᤘᤕᤠᤱᤅᤡᤸᤗᤧ ᤀᤠᤜᤡᤱᤔᤴ ᤀᤠᤰᤋᤱᤒᤠ ᤘᤕᤧ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ᤖᤧ ᤔᤧᤏᤡᤛᤢᤖᤥ॥

⁵ ᤀᤢᤴᤇᤣ᤺ᤴᤏᤠᤱᤎᤥᤀᤣ ᤂᤧᤱᤜᤠ᤹ᤖᤧ ᤀᤠᤕᤠ᤺ᤶᤒᤣᤀᤥ ᤔᤧᤏᤡᤛᤢᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ ᤔᤧᤈᤥᤃᤢᤏᤧ ᤑᤠ᤹ᤃᤪ ᤀᤡᤱᤃᤠ᤹ᤃ ᤀᤠᤏᤡᤃᤣ ᤛᤠᤶᤕᤥᤌᤡᤶᤔᤥ ᤁᤠᤰᤏᤢ ᤁᤧᤛᤠᤰᤐᤠ ᤜᤧᤴᤌᤡᤶᤒᤠ ᤑᤖᤡᤛᤡ ᤛᤠᤶᤕᤥᤗᤰᤁᤥᤒᤠ ᤘᤕᤠᤱ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤥ᤺ᤴᤍᤡ ᤐᤡᤔᤠ ᤔᤧᤛᤢᤰᤋᤢ᤹ᤖᤥ॥

⁶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤳ ᤗ᤹ᤖᤡᤰ ᤏᤡᤱᤛᤠᤱ ᤆᤥᤃᤢᤱᤒᤠᤸᤗᤧ ᤀᤡᤱᤃᤠ᤹ᤃ ᤀᤠᤀᤡᤴ ᤁᤵᤔᤥ ᤂᤠᤛᤧᤴ ᤗᤥ᤺ᤶᤔᤠ ᤋᤧᤴᤏᤥ ᤕᤧᤵᤐᤠᤖᤥ॥

⁷ ᤒᤠ ᤂᤧᤴ ᤔᤠᤱᤜᤧᤰᤁᤡᤴ ᤂᤥᤔᤠ ᤏᤡᤱᤛᤠᤱ ᤔᤧᤈᤥᤃᤢᤖ ᤀᤠᤏᤡᤃᤣ ᤌᤡᤰ-ᤏᤧᤳ ᤌᤠ᤺ᤰᤛᤢᤘᤠᤱᤜᤠ᤹ᤖᤧ ᤛᤧᤴᤍᤡᤰ ᤗᤧᤴᤍᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤔᤧᤈᤥᤃᤢᤖᤥ॥ ᤀᤠᤍᤠᤱᤒᤠ ᤜᤠᤱᤅᤣ. ᤒᤠ ᤂᤧᤴ ᤏᤡᤱᤛᤠᤱᤅᤡᤸᤗᤧ ᤆᤥᤃᤢᤸᤗᤧ ᤀᤠᤀᤡᤴ ᤁᤴ ᤕᤜᤢᤍᤡᤜᤠ᤹ᤖᤧ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥

⁸ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡᤒᤠ ᤔᤏᤠᤜᤠ᤹ ᤁᤢᤜᤡᤱᤘᤧᤳ ᤆᤥᤃᤢᤛᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤌᤣᤀᤠᤱ ᤂᤡᤏᤡ᤹ ᤏᤛᤠᤴ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠᤒᤣ᥅

⁹ “ᤀᤡᤱᤃᤠ᤹ ᤀᤠᤒᤠᤅᤣ ᤏᤠᤛᤖᤋᤒᤠ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤕᤖᤡᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤐᤥᤱ ᤁᤧᤗ᤹ᤒᤠ ᤀᤡ᤺ᤳᤇᤡᤱᤅᤠᤱ ᤘᤕᤠᤱᤅᤠᤱ

¹⁰ ᤕᤖᤢᤛᤗᤧ᤺ᤶᤔᤥᤒᤠ ᤜᤧᤰᤁᤣᤀᤣ ᤆᤥᤃᤢᤱᤗᤥ॥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥᤗᤠᤶ ᤕᤢᤰ ᤂᤥᤛᤢᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤐᤢᤱᤗᤠᤜᤡᤶᤔᤥ ᤌᤧᤰᤋᤢᤱᤛᤡᤱ. ᤜᤧᤰᤁᤩᤠᤱ ᤛᤡᤔᤧᤸᤗᤧ ᤂᤢᤶᤍᤡᤱ ᤔᤧᤒᤡᤖᤢᤛᤡᤸᤗᤧ ᤀᤡᤱᤃᤠ᤹ᤀᤠᤱ ᤋᤧᤴᤍᤡᤱ ᤐᤡᤖᤢᤱᤛᤡᤱᤗᤥ॥

¹¹ ᤀᤡᤱᤃᤠ᤹ ᤕᤖᤡᤰᤗᤧᤱ ᤕᤜᤢᤍᤡ ᤆᤢᤶᤗᤢᤱᤜᤡᤶ ᤌᤵᤔᤣ ᤐᤣᤃᤠᤱᤅᤠᤱ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤛᤠᤰᤁᤧᤸᤗᤧᤰᤁᤠᤱ ᤔᤠᤱᤆᤧ᤹ᤕᤠ ᤐᤠ᤺ᤵᤔᤠ ᤐᤠᤱᤄᤢᤱᤛᤡᤱᤗᤥ॥ ᤛᤠ᤹ᤖᤡᤰ ᤀᤠᤛᤡᤰᤁᤡᤴ ᤐᤥᤃᤧᤒᤠᤸᤗᤧ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠ ᤔᤠ᤺ᤱᤄᤠ ᤗᤠᤈᤣ᤹ᤀᤥᤒᤠ ᤕᤧᤰᤕᤰᤁᤥᤀᤠᤱ ᤂᤧᤱᤜᤠ᤹ ᤋᤢᤰᤂᤣ ᤆᤠ᤺ᤳᤇᤧ ᤐᤣᤃᤠᤱᤗᤥ॥

¹² ᤌᤡᤰᤕᤧᤴ ᤁᤴ ᤕᤠ᤺ᤶᤒᤰᤁᤥ ᤕᤖᤢᤛᤗᤧᤶᤔᤥᤒᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥᤗᤠᤶ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤋᤧᤶᤔᤠᤛᤡᤀᤠᤱ ᤛᤠᤰᤔᤠᤛᤡ ᤁᤧᤗ᤹ᤒᤠ ᤕᤢᤰ ᤏᤢ ᤀᤡᤱᤈᤠᤱ ᤂᤥᤛᤢᤱᤅᤠᤱ ᤍᤔᤛ᤻ᤁᤛᤀᤥ ᤐᤣᤃᤠᤱᤗ ᤐᤳᤇᤠᤱ॥

¹³ ᤀᤠᤍᤠᤱᤒᤠ ᤜᤠᤱᤅᤣ. ᤗᤧᤴᤍᤡᤰ ᤗᤠᤶᤔᤥ ᤐᤣᤃᤠᤱᤗ ᤐᤳᤇᤠᤱᤅᤡᤸᤗᤧ ᤋᤠᤱᤛᤠᤰᤐᤥᤗᤠᤶ ᤏᤠᤶᤔᤡᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤧᤗᤧᤰᤐᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤀᤠᤏᤡᤃᤣ ᤂᤡᤖᤡ ᤔᤡᤰᤁᤡᤴ ᤆᤧᤔᤢᤖ ᤗᤧᤰᤋᤧᤖᤥ॥

¹⁴ ᤀᤠᤏᤡᤃᤣ ᤁᤠᤰ ᤗᤠᤶᤍᤡᤰ ᤁᤧᤈᤥ᤺ᤰᤐᤠᤜᤠ᤹ ᤗᤠᤶᤔᤥ ᤜᤷᤃᤢᤵᤛᤠ ᤆᤥ᤺ᤴᤍᤡᤃᤧᤖᤥ॥ ᤜᤧᤰᤁᤩᤠᤱ ᤜᤡᤒᤪᤢ ᤐᤠ᤺ᤴᤏᤥ ᤀᤰᤋᤱᤒᤠ ᤀᤡᤰᤗᤠᤎᤡᤰ ᤂᤧᤶᤔᤏᤠ. ‘ᤛᤠᤘᤗᤀᤣ. ᤛᤠᤘᤗᤀᤣ. ᤀᤡᤱᤃᤠ᤹ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅ ᤀᤡᤱᤃᤠ᤹ᤏᤢ ᤌᤱ ᤁᤧᤈᤥ᤺ᤰᤏᤧ ᤑᤠ᤹ᤃᤪ ᤀᤠᤒᤠᤅᤣᤖᤰ ᤁᤧᤄᤢᤶᤗᤥ॥’

¹⁵ “ᤀᤡᤱᤃᤠ᤹ᤀᤠᤱ ᤍᤠᤱᤒᤣ. ᤂᤧᤏᤧ᤹ᤃ ᤜᤠ᤺ᤳᤏᤧᤴᤒᤣ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱ॥ “ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤏᤥᤃᤵ ᤐᤡᤖᤠᤱ. ‘ᤀᤡᤱᤃᤠ᤹ᤃ ᤋᤢᤰᤂᤣ ᤁᤧᤈᤠ᤺ᤳᤋᤢᤖ ᤁᤧᤘᤠ᤹ᤒᤠ ᤕᤧᤛᤢᤀᤠᤖᤥ॥

¹⁶ ᤀᤠᤸᤗ ᤐᤥᤃᤧ᤹. ᤀᤠᤀᤡᤴ ᤂᤧᤏᤧ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤅᤠᤱᤅᤠᤱ ᤀᤠᤛᤧᤘᤠᤖᤥᤒᤠ ᤏᤢ ᤀᤠᤍᤥ᤺ᤴᤍᤡ ᤁᤧᤒᤡᤒᤠ ᤆᤥ᤺ᤰᤏᤧᤀᤠᤱ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤀᤠᤀᤡᤴ ᤁᤧᤏᤡᤛᤢᤒᤠ ᤐᤠ᤺ᤴᤏᤡᤴ ᤏᤢ ᤋᤠ᤺ᤴᤍᤡ ᤋᤠᤕᤧᤶᤔᤥ ᤀᤥᤛᤣ᤺ᤴᤎᤠᤰᤏᤧᤒᤠ ᤐᤠ᤺ᤴᤜᤠ᤹ ᤘᤣ᤹ ᤔᤏᤠᤜᤠ᤹ ᤀᤡᤱᤃᤧᤓᤥᤛᤢᤛᤡᤖ ᤐᤥᤱᤗᤥ॥

^17-18 ᤀᤡᤱᤃᤠ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤧᤵᤈᤠᤱᤗᤠᤶ ᤋᤠᤱᤛᤧ᤺ᤵᤏᤧ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤡ᤹ ᤔᤡᤰᤜᤠ᤹ ᤜᤴᤇᤧ. ᤔᤠᤰᤆᤡᤃᤧᤴ ᤂᤠᤍᤠᤶᤔᤥᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤋᤠ᤺ᤳᤇᤧ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤕᤢᤰᤁᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤢᤰᤁᤥ ᤋᤠ᤺ᤳᤇᤧ ᤂᤧᤱᤜᤠ᤹ᤖᤥ ᤐᤠᤱᤏᤧ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤏᤛᤠᤴ ᤔᤧᤈᤥᤃᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥᤛᤢ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤛᤣᤛᤣ ᤆᤥᤃᤢᤛᤡᤒᤠ ᤁᤢᤔᤏᤠᤜᤠ᤹ᤏᤢ ᤂᤢᤏᤡ᤹ ᤕᤢᤱᤍᤧᤴ ᤔᤧᤄᤥᤛᤢ᤹ᤖᤥ॥’

¹⁹ “ᤜᤧᤰᤁᤣ᤺ᤸᤗᤧ ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤣ. ᤀᤡᤱᤃᤠ᤹ᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤥᤛᤢᤱᤒᤠ ᤛᤢᤑᤥᤖᤧ ᤀᤡᤱᤈᤠᤱᤃᤧᤶᤒᤠᤀᤣ ᤐᤥ᤺ᤰᤂᤠᤱᤗᤥ॥

²⁰ ᤁᤠᤰᤏᤢ ᤋᤃᤡ ᤍᤔᤛ᤻ᤁᤛᤀᤥ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤏᤢ ᤁᤠᤰ ᤕᤜᤢᤍᤡᤕᤠ ᤗᤠᤈᤣ᤹ᤒᤠ. ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤏᤢ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤜᤡᤴᤍᤡᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤧᤶᤔᤧ᤹ᤀᤥ ᤑᤠ᤹ᤀᤠᤱ ᤀᤡᤱᤓᤴ ᤆᤥᤃᤢᤱᤛᤡᤱᤗᤥ॥

²¹ ᤜᤧᤰᤁᤣᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧᤀᤣ ᤕᤜᤢᤍᤡᤜᤠ᤹ᤖᤧ ᤔᤠᤱᤜᤡᤶᤔᤥ ᤀᤡᤱᤃᤠ᤹ ᤔᤧᤍᤧᤶᤛᤠᤱᤅᤠᤱ ᤛᤧᤵᤔᤠ ᤔᤧᤃᤥ᤺ᤳᤋᤠᤱᤒᤠᤖᤥ॥

²² ᤁᤖ ᤀᤠᤀᤡᤴ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤠ᤹ ᤐᤡᤖᤠᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤣ᤺ᤸᤗᤧᤀᤣ ᤀᤡᤱᤃᤠ᤹ ᤆᤢᤰᤐᤠ ᤕᤶᤒᤠ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤵᤔᤠᤀᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤔᤠ ᤛᤢᤕᤧᤶ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤔᤥᤛᤠ ᤜᤧᤰᤁᤩᤠᤱ ᤘᤣ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤋᤠ᤺ᤴᤍᤡ ᤐᤥᤱ ᤗ᤹ᤖᤡᤰ ᤔᤧᤒᤠ᤺ᤳᤋᤢᤒᤠᤴᤏᤠᤱᤎᤥ. ᤘᤣ᤹ ᤌᤣᤀᤠᤱ ᤀᤡᤱᤃᤠ᤹ ᤔᤧᤶᤒᤠ᤺ᤳᤋᤣ ᤘᤠ᤹ᤀᤠᤖᤥ॥

²³ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤋᤢᤰᤂᤣ ᤆᤠᤔᤠᤀᤠᤱ ᤛᤡᤔᤠᤀᤣ ᤐᤥᤱ. ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥᤱᤔᤠ ᤜᤧᤰᤁᤩᤠᤱ ᤁᤠᤰᤏᤢ ᤋᤢᤶᤒᤠ ᤐᤥᤱᤅᤠᤱ ᤛᤧᤴᤗᤵᤖᤧᤴ ᤀᤥ᤺ᤳᤋᤡ᤺ᤴ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤓᤥᤛᤢᤛᤡᤖᤥ ᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧᤖᤥ॥”

²⁴ ᤀᤰᤂᤣᤗ᤹ᤖᤡᤰ ᤐᤠᤘᤗᤖᤧ ᤏᤠᤱᤛᤡᤱᤔᤠ ᤐᤠ᤺ᤴᤏᤡᤴ ᤐᤠ᤺ᤳᤋᤢᤖ ᤐᤳᤇᤧᤸᤗᤧ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤖᤧ ᤑᤧ᤺ᤰᤋᤢ. “ᤐᤠᤘᤗᤀᤣ. ᤂᤧᤏᤧ᤹ᤃ ᤁᤧᤏᤠᤰᤂᤧ ᤁᤧᤒᤣᤖᤥ᥄ ᤂᤧᤏᤧ᤹ᤃ ᤕᤖᤡᤰ ᤏᤡᤛᤠᤶᤔᤡᤸᤗᤧ ᤁᤧᤏᤠᤰᤂᤧ ᤁᤧᤒᤣᤖᤥ॥”

²⁵ ᤁᤖ ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤀᤣ. ᤀᤡᤱᤃᤠ᤹ᤃ ᤔᤧᤴᤏᤠᤱᤅᤣ ᤘᤠ᤹ᤀᤠ॥ ᤀᤡᤱᤃᤠ᤹ᤃ ᤛᤧᤰᤂᤠ ᤛᤣᤏᤡᤱᤘᤠ᤹ᤀᤥ ᤐᤠ᤺ᤳᤋᤠᤖᤥ॥

²⁶ ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤡᤸᤗᤧᤀᤠᤱ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤏᤡᤛᤢᤒᤠᤸᤗᤧ ᤂᤢᤏᤧ᤹ ᤁᤢᤍᤃᤡ ᤜᤠᤱᤜᤠᤱᤅᤠᤱ ᤐᤠ᤺ᤵᤔᤠ ᤛᤢᤰᤁᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤐᤠ᤺ᤴᤜᤠ᤹ᤃ ᤏᤢᤖᤡᤰᤁᤠᤱ ᤁᤢᤏᤡᤱᤘᤠ᤹ᤀᤥ ᤕᤢᤰᤂᤢᤀᤠᤱ ᤘᤠ᤹ ᤗ᤹ᤖᤡᤰ ᤀᤡᤱᤃᤠ᤹ ᤏᤡᤛ᤻ᤛᤣ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤒᤠ ᤐᤠ᤺ᤴᤜᤠ᤹ᤃ ᤁᤧᤖᤧᤰᤗᤧ ᤔᤧᤏᤡᤛᤢᤖᤥ॥”

²⁷ ᤜᤧᤰᤁᤩᤠᤱ ᤐᤠᤘᤗᤖᤧ ᤔᤧᤳᤋᤢ. “ᤀᤃᤪᤡᤐᤠ ᤜᤠᤱᤅᤣ. ᤂᤧᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤐᤠ᤺ᤴᤜᤠ᤹ ᤏᤛᤠᤴ ᤁᤧᤈᤥᤃᤢᤒᤡ᥅ ᤛᤧᤰᤂᤠᤛᤠᤱ ᤂᤧᤏᤧ᤹ ᤁᤧᤈᤥᤃᤢ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤛᤢᤱᤗᤥ॥”

²⁸ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤐᤠᤘᤗᤧᤴ ᤔᤧᤳᤋᤢ. “ᤛᤵᤑᤠᤖᤧᤛᤠ ᤂᤧᤏᤧ᤹ ᤀᤡᤱᤃᤠ᤹ᤀᤠᤱ ᤂᤪᤡᤛ᤻ᤋᤠᤏᤡ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”

²⁹ ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥᤛᤠᤱ ᤋᤠ᤺ᤴᤍᤡᤛᤠᤱ. ᤀᤠᤍᤠᤱᤒᤠᤖᤰ ᤔᤣ᤺ᤴ. ᤁᤖ ᤀᤠᤀᤡᤴ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠᤴ ᤁᤧᤄᤧᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤴ ᤐᤢᤱᤗᤠ ᤌᤠ᤺ᤔᤠᤀᤥᤖᤰ ᤔᤧ᤺ᤴᤏᤠᤱᤃ ᤘᤣ᤹ ᤀᤡᤱᤃᤠ᤹ ᤜᤧᤰᤁᤣᤀᤣ ᤏᤛᤠᤏᤡᤒᤠ ᤔᤧᤒᤥᤱᤏᤡ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤆᤥ᤺ᤰᤁᤠᤖᤥ॥”

³⁰ ᤜᤧᤰᤁᤩᤠᤱ ᤀᤃᤪᤡᤐᤠ ᤜᤠᤱ. ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛ ᤏᤢ ᤒᤷᤏᤡᤛ ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥᤒᤠ ᤘᤣ᤹ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ

³¹ ᤂᤧᤵᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤖ ᤔᤧᤒᤳᤇᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱᤗᤥ. “ᤁᤴ ᤔᤏᤠ᤺ᤸᤗᤧᤃ ᤐᤢᤱᤗᤠᤎᤠᤒᤠ ᤐᤥᤱᤔᤠ ᤏᤢ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤂᤥᤔᤠᤃ ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤘᤠ᤹ᤖᤥ॥”

³² ᤜᤧᤰᤁᤩᤠᤱ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤧᤴ ᤔᤧᤳᤋᤢ. “ᤁᤸᤗᤧ ᤛᤡᤈᤖᤧᤴ ᤕᤧᤰᤐᤣᤗᤡ ᤔᤧᤴᤈᤥ᤺ᤰᤁᤣ ᤘᤕᤧᤸᤗᤧᤃ ᤗᤧᤵᤔᤠᤍᤣᤔᤠᤀᤠᤱ ᤛᤢᤰᤋᤧᤳᤋᤧᤒᤠᤖᤥ॥”