ᤛᤣ᤺ᤰᤕᤢᤰᤔᤡᤒᤠᤜᤠ᤹ 20 - LIFOTNTᤐᤠᤘᤗᤧᤴ ᤔᤧᤛᤣᤍᤥᤏᤡᤕᤠ ᤏᤢ ᤃᤪᤡᤛ ᤗᤠᤈᤣ᤹ᤀᤥ ᤗᤠᤶᤍᤡᤰ ᤆᤥᤰ 1 ᤜᤧᤰᤁᤩᤠᤱ ᤂᤧᤴ ᤜᤕᤱᤁᤡᤸᤗᤡᤱ ᤗ᤹ᤔᤧᤴ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤐᤠᤘᤗᤖᤧ ᤀᤣᤑᤡᤛᤛᤔᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤧᤶᤔᤢ᤹ᤀᤡ ᤆᤥᤃᤢᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤔᤧᤛᤣᤍᤥᤏᤡᤕᤠᤀᤥ ᤐᤣᤖᤥ॥ 2 ᤜᤧᤰᤁᤩᤠᤱ ᤂᤧᤴ ᤌᤢᤶᤔᤥ ᤐᤥ᤺ᤰᤂᤧᤖ ᤗᤠᤶᤍᤡᤰ ᤆᤥᤃᤧᤸᤗᤧ ᤏᤛᤠᤏᤡᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤃᤪᤡᤛ ᤗᤠᤈᤣ᤹ᤀᤥ ᤁᤧᤖᤧᤀᤠᤱ 3 ᤂᤢᤏᤧ᤹ ᤂᤧᤵᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤕᤠ᤺ᤰᤋᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤛᤡᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡᤰ ᤆᤥ᤺ᤰᤔᤠᤀᤠᤱ ᤐᤣ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤀᤡᤱᤔᤧᤍᤱᤄᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤧᤵᤔᤥᤗᤠᤶ ᤂᤢᤏᤧ᤹ ᤔᤧᤛᤣᤍᤥᤏᤡᤕᤠᤗᤠᤶ ᤗᤠᤱᤄᤣ᤺ᤰᤔᤠᤀᤠᤱ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥ 4 ᤜᤧᤰᤁᤩᤠᤱ ᤒᤣᤖᤡᤕᤠ ᤁᤧᤕᤢᤱᤒᤠ ᤐᤢᤖᤛᤖᤧ ᤁᤢᤛ᤻ᤛᤠ ᤛᤥᤐᤠᤋᤪᤥᤛ. ᤌᤡᤛ᤻ᤛᤗᤥᤏᤡᤁᤠᤗᤠᤶ ᤀᤖᤡᤛ᤻ᤋᤠᤷᤂᤛ ᤏᤢ ᤛᤡᤁᤴᤍᤛ. ᤍᤷᤒᤡᤗᤠᤶ ᤃᤠᤕᤛ. ᤃᤗᤠᤋᤡᤕᤠᤗᤠᤶ ᤋᤡᤔᤥᤌᤡ. ᤜᤧᤰᤁᤩᤠᤱ ᤀᤣᤛᤡᤕᤠᤛᤔᤠ ᤋᤧᤱᤃᤵᤐᤥᤗᤠᤶ ᤋᤢᤂᤡᤁᤛ ᤏᤢ ᤋᤪᤥᤑᤡᤔᤛᤛᤡ ᤂᤢᤏᤧ᤹ᤏᤢᤀᤣ ᤔᤧᤘᤕᤧᤖᤥ॥ 5 ᤂᤧᤱᤜᤠ᤹ ᤀᤠᤴᤇᤡᤃᤧᤏᤢ ᤋᤃᤡ ᤔᤧᤒᤣᤀᤠᤱ ᤋᤪᤥᤀᤠᤛᤀᤥᤀᤣ ᤕᤠᤵᤔᤡ ᤔᤧᤜᤠᤱᤄᤡᤃᤧᤖᤥ॥ 6 ᤀᤠᤏᤡᤃᤣ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ ᤁᤢᤀᤣᤃᤠᤱ ᤘᤠᤗᤠᤶᤍᤡ᤺ᤰᤁᤥ ᤑᤡᤗᤡᤵᤐᤡᤗᤠᤶ ᤌᤠᤛᤡᤱᤔᤏᤠᤀᤠᤱ ᤅᤠᤛᤡ ᤕᤧᤴ ᤀᤣᤃᤠᤱ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ ᤋᤪᤥᤀᤠᤛᤀᤥ ᤋᤢᤶᤏᤠᤛᤡ ᤜᤧᤰᤁᤩᤠᤱ ᤂᤧᤵᤔᤥ ᤏᤢᤛᤡ (᥍) ᤕᤧᤴ ᤛᤥᤖᤡᤰ ᤘᤠ᤹ᤔᤏᤠᤖᤥ॥ ᤐᤠᤘᤗᤖᤧ ᤌᤠᤱᤒᤧᤴᤎᤡᤰ ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢ᤹ 7 ᤜᤧᤰᤁᤩᤠᤱ ᤋᤧᤏᤧᤒᤠ ᤕᤧᤴᤏᤡᤸᤗᤧᤴ ᤕᤢ᤺ᤴᤇᤡᤰ ᤀᤠᤏᤡᤃᤣ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤆᤠᤔᤠ ᤑᤠ᤹ᤀᤠᤱ ᤛᤥᤖᤡᤰ ᤆᤢᤶᤔᤏᤠᤖᤥ॥ ᤁᤴ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤐᤠᤘᤗᤧᤴ ᤛᤧᤳᤗᤢᤶᤓᤰᤋᤧᤖ ᤌᤠᤖᤡᤰ ᤐᤠᤖᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤁᤢᤏᤠᤶᤍᤠ᤺ᤵᤔᤠ ᤂᤧᤵᤔᤥᤗᤠᤶ ᤁᤧᤒᤣ᤺ᤰᤐᤠ ᤘᤕᤧᤖᤥ॥ 8 ᤀᤠᤏᤡᤃᤣ ᤆᤢᤶᤗᤢᤱ ᤆᤥ᤺ᤰᤔᤏᤠᤒᤠ ᤌᤥᤛᤔᤠ ᤕᤠᤰᤑᤠᤀᤥ ᤕᤖᤡᤰ ᤛᤣᤔᤡᤜᤠ᤹ ᤔᤧᤜᤠ᤺ᤴᤍᤢᤀᤠᤱ ᤕᤢᤅᤧᤖᤥ॥ 9 ᤂᤧᤵᤔᤥ ᤕᤢᤋᤠᤀᤡᤁᤛ ᤔᤧᤵᤔᤏᤠᤒᤠ ᤏᤠᤗᤡᤱᤃᤧᤴ ᤌᤠᤱᤒᤧᤴᤎᤡᤰ ᤐᤣᤎᤠ᤺ᤵᤐᤥ ᤐᤣᤀᤠᤱ ᤕᤢᤱᤛᤡᤱ॥ ᤐᤠᤘᤗᤧᤴ ᤆᤰᤔᤧᤸᤗ᤹ᤀᤣ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤌᤠᤱᤒᤧᤴᤏᤡᤴ ᤁᤢᤔᤡᤁᤩᤢᤛᤧᤀᤠᤱ ᤀᤡᤶᤎᤰᤘᤠ ᤗᤥᤖᤧᤖ ᤕᤢᤅᤧ॥ ᤜᤧᤰᤁᤩᤠᤱ ᤂᤧᤴ ᤛᤠ᤹ᤖᤡᤰ ᤀᤡᤵᤛᤧᤸᤗᤧ ᤛᤢᤶᤛᤡᤃᤣ᤺ᤰᤛᤔᤠ ᤂᤠᤶᤗᤥᤀᤥᤏᤢ ᤕᤥ ᤔᤰᤌᤩᤧᤀᤠᤱ ᤛᤩᤧᤖᤥ॥ ᤔᤏᤠᤜᤠ᤹ᤖᤧ ᤔᤧᤒᤣᤀᤠᤱ ᤀᤥᤔᤧᤔᤧᤳᤋᤢᤸᤗᤧᤃ ᤀᤠᤴᤍᤣ᤺ᤴᤇᤠ ᤛᤩᤧᤀᤠᤱ ᤏᤧᤛ᤻ᤛᤧᤖᤥ॥ 10 ᤁᤖ ᤐᤠᤘᤗᤧᤴ ᤕᤥ ᤐᤣᤀᤠᤱ ᤂᤢᤏᤧ᤹ ᤛᤶᤍᤠᤱ ᤛᤸᤗᤡᤰ ᤛᤴᤇᤡᤱᤗ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ᤀᤥ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤂᤢᤏᤧ᤹ᤃ ᤁᤢᤜᤡᤱᤘᤧᤳ ᤘᤠ᤹ᤖᤥ᥄” 11 ᤜᤧᤰᤁᤩᤠᤱ ᤌᤥᤛᤔᤠ ᤕᤠᤰᤑᤠᤀᤥ ᤔᤧᤒᤣᤀᤠᤱ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤛᤥᤖᤡᤰ ᤔᤧᤈᤖᤥ॥ ᤂᤢᤏᤧ᤹ ᤂᤠᤀᤥ᤺ᤳᤋᤧᤖ ᤌᤠᤖᤡᤰ ᤂᤢᤏᤡ᤹ᤏᤢ ᤋᤠ᤹ᤈᤧᤰᤂᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤛᤧᤶᤔᤢ᤹ᤀᤡ ᤐᤥ᤺ᤰᤂᤧᤀᤠᤱ ᤌᤠᤛᤡᤱᤗᤥ॥ 12 ᤂᤧᤱᤜᤠ᤹ᤖᤧ ᤂᤧᤴ ᤌᤠᤱᤒᤧᤴᤏᤡᤴ ᤁᤢᤜᤡᤱᤘᤧᤳᤋᤣ ᤁᤢᤜᤡᤶᤔᤥ ᤔᤧᤍᤣ᤹ᤖᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰᤁᤣ ᤜᤠᤱᤜᤠᤱ ᤔᤧᤗ᤹ᤖᤧᤖᤥ॥ ᤋᤪᤥᤀᤠᤛᤗᤠᤶ ᤔᤡᤗᤣᤋᤛ ᤗᤧᤵᤔᤠᤱ ᤘᤠᤗᤠᤶᤍᤡᤰ 13 ᤀᤠᤏᤡᤃᤣ ᤘᤠᤗᤠᤎᤠᤗᤠᤶ ᤋᤃᤡ ᤀᤛ᤻ᤛᤥᤛ ᤕᤧᤰᤕᤰᤁᤥ ᤐᤣ᤺ᤰᤔᤏᤠ॥ ᤂᤧᤵᤔᤥᤀᤣ ᤐᤠᤘᤗᤧᤴ ᤘᤠᤗᤠᤎᤠᤗᤠᤀᤥ ᤁᤣ᤺ᤵᤔᤠ ᤐᤠᤴ ᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤌᤠᤖᤡᤰ ᤗᤠᤱᤄᤣ᤺ᤰᤔᤠᤖ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤖᤥ॥ 14 ᤜᤧᤰᤁᤩᤠᤱ ᤐᤠᤘᤗᤖᤧ ᤀᤛ᤻ᤛᤥᤛᤀᤥ ᤕᤠᤵᤔᤡ ᤋᤢᤔᤡᤃᤧ ᤜᤧᤰᤁᤩᤠᤱ ᤘᤠᤗᤠᤎᤠᤀᤥ ᤁᤣ᤺ᤵᤔᤏᤠᤀᤠᤱ ᤂᤧᤵᤔᤥᤗᤠᤶ ᤔᤡᤳᤋᤡᤗᤣᤏᤡ ᤘᤠᤃᤵᤂᤠᤶ ᤗᤧᤵᤔᤠᤱ ᤌᤠᤛᤡᤱᤔᤏᤠᤖᤥ॥ 15 ᤂᤧᤵᤔᤥᤗᤠᤶ ᤀᤠᤏᤡᤃᤣ ᤁᤢᤍᤠ᤺ᤴᤍᤡᤰᤔᤠ ᤂᤡᤕᤛ ᤘᤠᤃᤵᤂᤠᤶᤔᤥ ᤁᤧᤵᤔᤏᤠ॥ ᤜᤧᤰᤁᤩᤠᤱ ᤁᤢᤀᤠᤳᤇᤡᤴᤍᤠ᤺ᤴ ᤛᤠᤔᤥᤛ ᤘᤠᤃᤵᤂᤠᤶᤔᤥ ᤁᤧᤵᤔᤏᤠᤀᤠᤱ ᤁᤢᤀᤠᤰᤂᤧᤴᤍᤠᤴ ᤔᤡᤗᤣᤋᤛ ᤕᤧᤰᤕᤰᤁᤥ ᤋᤠ᤺ᤶᤏᤠᤖᤥ॥ 16 ᤐᤠᤘᤗᤖᤧ ᤀᤣᤛᤡᤕᤠᤛᤔᤠ ᤋᤧᤱᤃᤵᤐᤥ ᤔᤧᤴᤏᤠ᤺ᤶᤛᤡᤱᤅᤣ. ᤜᤧᤰᤁᤩᤠᤱ ᤀᤣᤑᤡᤛᤛᤀᤥ ᤔᤧᤴᤗ᤺ᤴᤏᤣ ᤁᤢᤒᤣᤛᤠᤱ ᤐᤥᤱᤔᤠᤖ ᤐᤣ᤺ᤰᤔᤠᤀᤠᤱ ᤜᤠᤖᤠᤀᤣ ᤕᤖᤢᤛᤗᤧᤔ ᤁᤧᤵᤔᤠ ᤏᤡᤱᤘᤠ᤹ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤐᤧᤴᤋᤡᤁᤥᤛ᤻ᤋ ᤋᤱᤏᤠᤶᤔᤥ ᤂᤧᤵᤔᤥ ᤘᤠ᤹ᤔᤠ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ ᤘᤕᤧ॥ ᤐᤠᤘᤗᤧᤴ ᤀᤣᤑᤡᤛᤛᤔᤠ ᤋᤢᤶ ᤗᤠᤶᤗᤥᤒᤠᤜᤠ᤹ᤏᤢ ᤛᤧᤶᤔᤢ᤹ᤀᤡ ᤏᤠ᤺ᤰ 17 ᤐᤠᤘᤗᤖᤧ ᤔᤡᤗᤣᤋᤛ᤻ᤗᤠᤶ ᤀᤣᤑᤡᤛᤛᤔᤠ ᤛᤣᤛᤣᤜᤢᤵᤗᤰᤐᤠ ᤋᤢᤶᤗᤠᤶᤗᤥᤒᤠᤜᤠ᤹ ᤁᤢᤍᤢᤶᤛᤧ ᤀᤢ᤺ᤳᤋᤢᤛᤡ॥ 18 ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤐᤠᤘᤗᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤣᤛᤡᤕᤠᤛᤔᤠ ᤋᤧᤱᤃᤵᤐᤥ ᤁᤧᤖᤠᤱᤒᤠ ᤌᤡᤰᤛᤡᤃᤣ᤺ᤰᤛᤔᤠ ᤕᤧᤴᤏᤠᤱᤎᤥᤀᤣ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ᤏᤢ ᤘᤕᤠᤱ ᤁᤧᤗ᤹ᤒᤠ ᤂᤡᤏᤡ᤹ ᤏᤢᤖᤡᤰᤁᤠᤱ ᤁᤧᤏᤡᤛᤢᤶᤔᤠᤱ ᤁᤧᤘᤕᤡᤖᤥ॥ 19 ᤀᤡᤱᤃᤠ᤹ᤃ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤏᤢ ᤔᤡᤰᤘᤠ ᤛᤥᤖᤡᤰ ᤕᤜᤢᤍᤡ ᤏᤡᤱᤄᤢᤶᤔᤥᤀᤠᤱ ᤍᤠᤱᤒᤠᤸᤗᤧ ᤁᤢᤛᤧᤘᤠ ᤆᤥᤃᤢᤱᤗᤥ॥ 20 ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤔᤠ ᤌᤠᤔᤠ ᤁᤧᤒᤥᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤔᤧᤳᤏᤡᤱᤅᤠᤱ ᤘᤕᤠᤱ ᤜᤧᤰᤁᤩᤠᤱ ᤔᤏᤠᤗᤢᤶᤔᤥ ᤀᤡᤱᤓᤴ ᤆᤥ᤺ᤰᤔᤠ ᤏᤢ ᤂᤡᤏᤡ᤹ ᤜᤡᤶᤜᤡᤶ ᤋᤠᤰᤁᤶᤔᤠᤖ ᤏᤡᤛᤠᤶ ᤜᤢ᤹ᤔᤠ ᤀᤡᤱᤃᤠ᤹ ᤆᤰᤔᤧᤸᤗ᤹ᤀᤣ ᤆᤥᤃᤢᤱᤅᤠᤱ ᤘᤕᤠᤱᤒᤠᤱᤃ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱᤅᤣ ᤁᤧᤘᤕᤡ᤹ᤖᤥ॥ 21 ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤏᤢ᤺ᤰᤂᤧᤶᤔᤧ᤹ ᤔᤧᤵᤔᤠᤛᤡ ᤏᤢ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋ ᤛᤶᤍᤠᤱ ᤏᤛᤠᤴ ᤆᤥᤰ ᤐᤠᤱᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤛᤠᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ 22 “ᤀᤠᤸᤗ ᤛᤣᤛᤣᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤰᤋᤠᤱᤒᤠ ᤁᤢᤀᤡᤛᤡᤰ ᤕᤖᤢᤛᤗᤧᤔ ᤐᤣ᤺ᤰᤁᤠᤖ ᤐᤳᤋᤠᤖᤥ॥ ᤂᤧᤵᤔᤥ ᤌᤣ ᤐᤥᤱ ᤁᤧᤗ᤹ᤒᤠ ᤀᤡᤱᤃᤠ᤹ ᤌᤣᤀᤠᤱ ᤏᤡᤱᤘᤠ᤹ ᤔᤧᤃᤳᤋᤠᤴᤗᤥ॥ 23 ᤁᤖ ᤁᤧᤖᤧᤰ ᤀᤡᤱᤃᤠ᤹ ᤐᤣᤃᤠᤱᤒᤠ ᤕᤧᤰᤕᤰᤁᤥ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ. ᤐᤢᤱᤗᤠᤜᤡᤶ ᤏᤢ ᤋᤢᤰᤂᤣᤖᤧ ᤂᤧᤵᤔᤥ ᤜᤠᤱᤅᤠᤖ ᤘᤠ᤹ᤀᤠᤖᤥ॥ 24 ᤁᤖ ᤀᤠᤜᤡᤱᤔᤴᤏᤥ ᤍᤠᤱᤒᤠ ᤕᤧᤛᤢᤖᤧ ᤐᤡᤖᤠᤱᤒᤠ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤛᤢ᤺ᤵᤔᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱᤄᤱ ᤀᤡᤱᤓᤥᤔᤠᤀᤠᤱᤎᤥ ᤘᤣ᤹ ᤌᤣᤀᤠᤱ ᤔᤧᤀᤡ᤺ᤳᤋᤢᤱᤅᤡᤴᤗᤥ॥ 25 “ᤀᤠᤸᤗ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤀᤡᤱᤓᤴ ᤆᤥ᤺ᤰᤏᤡᤱᤒᤠ ᤂᤡᤏᤡ᤹ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤕᤠᤶᤔᤥ ᤕᤠᤵᤔᤡ ᤁᤧᤴᤏᤡᤛᤡᤴ ᤑᤠ᤹ᤀᤠᤱ ᤏᤡᤛᤢᤱᤗᤥ॥ 26 ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤀᤠᤳᤋᤡᤸᤗᤧᤴᤏᤠᤱ ᤔᤧᤰᤔᤠᤸᤗᤧᤴ ᤀᤡᤱᤃᤠ᤹ ᤀᤠᤵᤋᤡᤰ ᤔᤧᤄᤥᤀᤠᤴᤗᤥ ᤑᤠ᤹ᤀᤠᤱ ᤀᤠᤀᤡᤴ ᤀᤡᤱᤃᤠ᤹ ᤔᤧᤳᤏᤡᤱᤗᤥ॥ 27 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤏᤡᤱᤛᤣᤰ ᤀᤡᤱᤓᤴ ᤆᤥ᤺ᤰᤔᤠ ᤀᤣᤃᤠᤱ ᤔᤧᤶᤒᤵᤐᤧᤴᤗᤥ॥ 28 ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤡᤏᤡ᤹ ᤀᤥᤔᤧᤳᤋᤠᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤰᤐᤧᤴᤏᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤏᤢᤖᤡᤰᤁᤠᤱ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤁᤧᤈᤥᤃᤡᤀᤠᤱ ᤘᤠ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤡᤅᤢᤒᤠ ᤛᤣᤛᤣᤜᤢᤵᤗᤰᤁᤡᤴ ᤁᤶᤒᤪᤠᤱ ᤔᤧᤳᤋᤧᤶᤔᤧ᤹॥ 29 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤰᤌᤠᤏᤡᤱᤅᤠᤱᤃ ᤁᤡᤵᤔᤠ ᤁᤧᤄᤢᤒᤠ ᤐᤖᤠᤒᤠᤜᤠ᤹ ᤔᤧᤍᤠᤀᤠᤱ ᤔᤧᤸᤗᤢᤰ ᤗᤢᤵᤜᤠ᤹ ᤔᤧᤴᤏᤴᤇᤢᤴᤛᤡᤴᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤗᤢᤶᤔᤥᤀᤣ ᤀᤡᤱᤗᤧᤰᤐᤠ ᤛᤡᤰᤛᤠᤶᤒᤠᤜᤠ᤹ ᤔᤧᤗ᤺ᤴᤏᤠᤱ ᤂᤡᤏᤡ᤹ ᤁᤧᤔᤧᤴᤍᤠᤱᤄᤡᤴ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥ 30 ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥᤏᤢᤀᤣ ᤀᤡᤱᤗᤧᤰᤐᤠᤜᤠ᤹ ᤔᤧᤗᤴ ᤔᤧᤍᤠᤀᤠᤱ ᤏᤛᤠᤏᤡᤒᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤗᤠᤶ ᤔᤧᤓᤥ᤺ᤳᤋᤢ ᤔᤧᤍᤣ᤹ᤖᤢᤛᤡᤖᤥ॥ 31 ᤜᤧᤰᤁᤣ᤺ᤸᤗᤧ ᤜᤧᤰᤋᤱᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤗᤧᤴᤍᤡᤰ ᤛᤧᤴᤍᤡᤰ ᤀᤡᤱᤃᤠ᤹ ᤔᤡᤰᤘᤠᤖᤧ ᤁᤢᤎᤡᤶ ᤐᤥ᤺ᤰᤂᤠᤱᤗ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤏᤡᤱᤗ ᤘᤕᤠᤱᤗᤥ॥ 32 “ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱ ᤏᤢ ᤗᤢᤱᤃᤢᤶᤃᤧᤴ ᤁᤢᤒᤠ᤺ᤴᤈᤠᤰᤁᤥ ᤜᤢᤰᤛᤢᤵᤏᤡᤱᤗᤥ. ᤂᤧᤸᤗᤧ ᤂᤡᤏᤡ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ ᤁᤧᤛᤢᤰᤋᤡ᤹. ᤜᤧᤰᤁᤩᤠᤱ ᤛᤣᤛᤣ ᤁᤧᤒᤥᤱᤒᤠ ᤁᤧᤖᤧᤰ ᤁᤢᤔᤏᤠᤜᤠ᤹ ᤗᤢᤶᤔᤥ ᤗᤰᤂᤥᤔᤠᤴ ᤐᤡᤔᤠ ᤁᤧᤛᤢᤰᤋᤡᤖᤥ॥ 33 ᤀᤡᤱᤃᤠ᤹ᤃ ᤀᤠᤳᤋᤡᤴᤜᤠ᤹ᤖᤧᤴᤏᤠᤱ ᤂᤢᤏᤡ᤹ ᤛᤠᤶᤔᤩᤠᤱ ᤕᤢᤵᤐᤠ ᤏᤢ ᤏᤢᤒᤠ ᤋᤧ᤺ᤳᤑᤢᤱᤜᤠ᤹ᤀᤥ ᤔᤡᤰᤔᤧᤱᤃᤣᤐᤠᤴᤗᤥ॥ 34 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤒᤠᤅᤣ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤕᤠᤱ ᤌᤃᤢᤱᤅᤠᤱ ᤀᤠᤴᤈᤢᤶᤜᤠ᤹ ᤏᤢ ᤀᤡᤱᤃᤠ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃᤰᤘᤠᤜᤠ᤹ ᤋᤱᤃᤠᤶ ᤆᤥᤃᤢᤱᤅᤠᤱ ᤘᤕᤠᤱᤒᤠᤴ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ 35 ᤆᤠᤔᤠ ᤌᤢᤱᤔᤠ ᤀᤠᤒᤠᤅᤣ ᤋᤱᤃᤠᤶ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤕᤠᤶᤒᤢᤎᤡᤰᤐᤠ ᤐᤥᤱᤔᤠ ᤐᤥᤱ ᤁᤧᤗ᤹ᤒᤠ ᤀᤡᤱᤃᤠ᤹ ᤀᤥᤛᤣ᤺ᤴᤎᤠᤰᤏᤡᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤩᤠᤱ ‘ᤋᤠ᤺ᤰᤔᤠᤏᤢ᤺ᤸᤗᤧ ᤐᤡᤔᤠᤀᤥᤀᤣ ᤕᤖᤡᤰ ᤔᤢ᤹ᤀᤡᤛᤠᤶ ᤘᤠ᤹’ ᤗ᤹ᤖᤡᤰ ᤍᤠᤱᤒᤠ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤏᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥” 36 ᤜᤧᤰᤁᤩᤠᤱ ᤐᤠᤘᤗᤖᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤧᤱᤜᤠ᤹ ᤁᤠᤰ ᤌᤢᤱᤒᤥᤜᤈ᤹ ᤔᤧᤕᤢᤱᤛᤡᤱᤅᤠᤱ ᤋᤢᤘᤠ ᤔᤧᤈᤥᤃᤧᤖᤥ॥ 37 ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤜᤧᤵᤋᤢᤀᤠᤱ ᤔᤧᤜᤠᤒᤧᤖ ᤆᤢᤵ ᤔᤧᤔᤧᤳᤋᤢᤖᤥ॥ 38 ᤐᤠᤘᤗᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡᤒᤠ ᤘᤣ᤹ ᤐᤠ᤺ᤴᤜᤠ᤹ᤏᤢ᤺ᤸᤗᤧᤀᤠᤱ ᤀᤠᤵᤑᤠᤸᤗᤧᤀᤠᤱ ᤀᤠᤏᤠᤖᤠᤴ ᤁᤧᤴᤏᤡᤛᤢᤶᤔᤡᤴᤗᤥ ᤔᤧᤳᤋᤢᤛᤡᤒᤠᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤛᤠᤶᤔᤥ ᤔᤧᤎᤩᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤘᤠᤗᤠᤎᤠᤀᤥ ᤌᤠᤖᤡᤰ ᤔᤧᤛᤔᤧᤎᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.